Kulironga kureta mauwa

WA MONA rumwe vantu vana kuhorowora enyango ndi? Sinzi sawo kutara emoneko nounene walyo mokudimburura nsene lina pi. Vantu vamwe kulifumbwira. Vamwe kulikwata nokulimyanga. Ano vamwe kuliviha pokutura enyango limwe mokuwoko kumwe ano limwe mokukwawo va divilise asi lipi po lyomukumo lina kara nomema gomanzi. Morwasinke ava yi ruganene eyi? Awo kukonakona malisigo pokudiworoka eli va horowere siruwo sa ka pita nokulihetakanesa neli vana kumona posiruwo oso. Awo tava gwana enyango lyoutovara morwa elituromo lyawo.

Mauwa gokulironga Nonkango daKarunga manzi unene kupitakana eyi. Apa elirongo lyangoso ali gusa evango lyomulyo momaparu getu, epuro lyetu kunkondopara, eharo lyetu kunenepa, sirugana setu sokuzuvhisa kutompoka, ntani matokoro getu aga atu tura po kulikida nondunge nounongo wokutunda kwaKarunga. Kuhamena mauwa ogo, Yisewe 3:15 kutanta asi: “Kutupu eyi wa hara yokuvhura kuheteka po.” Nove kuna kugwanena mo mauwa gangoso ndi? Ayo kuvhura kuyikundama monkedi omu o lirongo.—Koros. 1:9, 10.

Yisinke kulironga? Ayo kwa pitakana tupu kuresa. Ayo kwa kwatera mo kuruganesa nondunge doge mokukonakona nawa ndi momunene sirongwa songandi. Ayo kwa kwatera mo kuhetakanesa eyi ono kuresa kumwe neyi wa diva nare, ntani nokudidilika nokonda edi vana gava. Nsene kuna kulironga, gazadara ko unene kwankenye magano gomape koge. Gazadara ko hena omu no vhura kuruganesa nawa mapukururo gomoMatjangwa meparu lyoge. NgoMbangi zaJehova, ngo hara hena kugazadara ko nompito omu no ruganesa eyi ono kuresa mokuvatera nawopeke. Yosili, kulironga kwa kwatera mo kuteda.

Kuwapaika mutjima posiruwo selirongo

Nsene kuna kuliwapaikira kulironga, pwagesa Bibeli zoge nankenye yimbapiratjangwa ono hara kuruganesa nopena nokabuke komadidiliko. Nye nove kuwapaika mutjima goge ndi? Bibeli kututantera asi Esira “kwa wapaikire mutjima gwendi mokulironga veta zaJehova nokuzisikisa mo ntani nokuronga moIsraeli nompangera nouhungami.” (Esir. 7:10, NW) Yisinke eyi ya hamena mo mokuwapaika mutjima goge?

Kukanderera kutuvatera tu lironge Nonkango daKarunga nomutjima gomuwa. Tuna hara nomutjima detu di tambure mavyukiso aga ana kutupa Jehova. Ketameko lyankenye elirongo, kanderera kwaJehova kevatero lyompepo zendi. (Ruk. 11:13) Mu hundira a ku vatere o kwate egano eyi ono kulironga, nomu ya lizasana nositambo sendi, nomu nayi vhura kukuvatera o dive kuhangura uwa koudona, nomu no ruganesa nompango dendi meparu lyoge, ntani nomu eyi ono kuresa nayi kundama elikwatakano lyoge kumwe nendi. (Yis. 9:10) Ngomu ono kulironga, ‘hundira kwaKarunga’ unongo. (Jak. 1:5) Likonakona nyamoge nawa kuliza neyi ono kulironga ngomu ono kupapara evatero lyaJehova mokunyokera po magazaro gepuko ndi madowo gomadona. Gava nkenye apa mpandu kwaJehova koyininke eyi ana kuhorora. (Epis. 50:23) Kulironga kumwe nokukanderera kutwaredesa kokudiva nawa Jehova, mokumona asi ayo kutuvhulikisa mokupurakena kwendi apa a tu uyungisa kupitira moNonkango dendi.—Epis. 145:18.

Kutambura mapukururo monkedi zangesi kuninkisa vantu vaJehova va lisige nava womouzuni. Vantu ava va dira kukara netjiroKarunga kuvhura kukara nomasinganyeko nokurwanesa eyi va tjanga moBibeli. Nye ose kapisi yimo twa kara ngoso. Ose kwa huguvara Jehova. (Yis. 3:5-7) Nsene kapi tuna kukwata egano yuma yongandi, ose kapi atu hulisa tupu asi ayo kuna kara epuko. Ngomu tuna kukondja mokupapara malimbururo, ose kundindira kwaJehova nga tu pe malimbururo. (Mika 7:7) Ngwendi Esira, nose kwa kara nositambo sokusikisa mo nokuronga eyi atu lirongo. Netokomeno eli lyokomutjima, ose ngatu gwana mauwa gomanzi melirongo lyetu.

Omu natu lironga

Mevango lyokutameka paragarafu zo-1 nokutwikira dogoro kouhura, pomuhowo tarurura pausupi sirongwa ndi egaununo nalinye. Tameka pokukonakona muzaro gononkango domosiparatjangwa. Esi kuna kara sitambo sosirongwa. Konakona omu yiparatjangwagona yina lizi nositambo. Konakona nawa mafano ndi tukende twelirongo otu tuna kara mosirongwa. Konyima zetarururo eli lyesupi, lipura nyamoge asi: ‘Yisinke eyi nani lirongera mo mosirongwa esi? Monkedi musinke nani gwanena mo uwa?’ Eyi kugava sitambo kelirongo lyoge.

Ngesi gwana nye mausili. Moyirongwa yelirongo yoRuhungu ntani nonobuke dimwe kwa kara mo mapuro. Ngomu ono kuresa nkenye paragarafu, ya kara nomulyo mokudidilika malimbururo. Nampili kapi muna kara mapuro, simpe kuvhura o didilike magano gomulyo aga ono hara kudiworoka. Nsene egano olyo epe koge, ruganesa siruwo songandi mokudivilisa asi ono li kwata nawa egano. Koneka nkenye yifanekeso ndi magano gomawa aga ngo vhura kuruganesa moyirugana yokuzuvhisa ndi moyiuyungwa yoge. Gazadara ko vantu vamwe ava epuro lyawo ngali nkondopara nsene ngo va simwitira ko eyi ono kulironga. Didilika magano aga ono hara kuruganesa ntani ga ruguruka apa no mana elirongo lyoge.

Ngomu ono kukonakona eyi ono kulironga, tara matjangwa aga vana tura mo. Gazadara ko omu nkenye etjangwa lina lizi nomagano gomoparagarafu.

Kuvhura o gwane yitwa eyi ono kudira kukwata nawa egano ndi eyi ono hara kukonakona momunene. Mevango lyokuyipulisira yi ku donganese, yi didilika nokuyayikonakona konyima zosiruwo. Yitwa pamwe kuyafaturuka ngomu ono kutwikira kuresa sirongwa nasinye. Nsene kapi yina ku faturukire, kuvhura o rugane mapaparo gokugwederera ko. Yininke musinke eyi no vhura kudidilika no ya rugana epaparo? Nampo kolili etjangwa eli va temwinina ono kudira kukwata nawa egano. Ndi nampo kapi ono kudimburura omu lina lizi nosirongwa esi vana kuzogera. Ndi nampo kuna kulizuvha asi ono kwata egano sitwa songandi mosirongwa nye kapi to vhuru kusifatwilira muntu gwapeke. Mevango lyokusisiga, ayo nayi wapa mokurugana epaparo apa no mana eyi ono kulironga.

Apa mupositoli Paurusa ga tjangerere mbilive zendi koVakriste woVahebeli, age kwa pwizumukire sikatji nokutanta asi: “Sitwa somulyo sesi.” (Heb. 8:1, NW.) Nove kulidiworokesa nkenye apa monkedi zangoso ndi? Konakona eyi ga yi ruganenene Paurusa ngoso. Momagaununo gokuhova gombilive zendi, age ga yi likidire asi Kristusa ngoMupristeli goMunene gwaKarunga ga hwilira meguru. (Heb. 4:14–5:10; 6:20) Pokunkondopeka sitwa esi somulyo petameko lyegaununo 8, Paurusa kwa wapaikire nondunge dovaresi vendi mokugazadara ko momunene omu ya kundama maparu gawo. Age kwa yi likidire asi Kristusa kwa moneka kwaKarunga mwarwawo ntani yiyo ga va zegwilira nzira va hwilire “moNzugo zoKupongokerera.” (Heb. 9:24; 10:19-22) Ehuguvaro lyawo lyosili ngano lya va tumangedere mokutura pasirugana mapukururo aga ga kara mombilive ezi kuhamena epuro nedidimiko nonkareso zoSikriste. Mokulifana, apa atu lirongo, nsene tu demenena koyitwa yomulyo, ngayi tu vatera tu kwate egano omu va si tunga sirongwa ntani ngayi tu pa nokonda donongwa deyi twa hepera kuparuka kuliza nayo.

Kuvhura elirongo lyopwanyamoge ngali ku tumangede o yi ture pasirugana ndi? Eli kuna kara epuro lyomulyo. Nsene to lirongo yuma yongandi, lipura nyamoge asi: ‘Ngapi omu eyi nayi kundama nkareso ntani noyitambo yange meparu? Ngapi omu nani vhura kuruganesa mapukururo aga mokukohonona po udigu ndi pokutura po etokoro ndi mokusikisa mo sitambo songandi? Ngapi omu nani ga ruganesa mepata lyange nomoyirugana yokuzuvhisa ndi mombungakriste?’ Kanderera kuhamena mapukururo aga nokuteda ko komaukaro gosili omu no vhura kuruganesa ediwo lyoge.

Konyima zokumana kuresa egaununo ndi sirongwa, litulira po siruwo sokuruguruka mo. Heteka nsene kuvhura o diworoke magano gomulyo nonokonda dokukwatesa ko. Ntambo ezi ngazi ku vatera o pungure mapukururo yipo ngo ga ruganese komeho.

Eyi no vhura kulironga

Ngovantu vaJehova, twa kara neyi yoyinzi yokulironga. Nye yisinke natu tameka nayo? Nkenye ezuva, ose kulironga etjangwa nomagano gomoKonakona Matjangwa nkenye ezuva. Nkenye sivike, ose kukara momapongo gomombungakriste, ano elirongo eli atu rugana mokugaliwapaikira ngali tu vatera tu gwanene mo uwa wounene. Mokugwederera ko kweyi, vamwe kwa litulira po siruwo sokulironga yimbapiratjangwa yetu yimwe yoSikriste eyi va nduruka komeho va ya lironge usili. Vamwe kuhorowora maruha gamwe gereso lyoBibeli lyankenye sivike ntani nokugakonakona unene.

Ngapi nsene maukaro goge kapi gana kukupulisira o lironge nawa nombudi nadinye edi ngava ka zogera momapongo gankenye sivike? Nyokera po nkareso zokugenderera kuresa asi o mane usimbu ndi o dire kuliwapaikira nampili simbapiratjangwa simwe morwa asi kapi to vhuru kuyiliwapaikira nayinye. Mevango lyoyo, tokora asi yokusika kupi no vhura kulironga, ntani yi rugana nawa. Yi rugana nkenye sivike. Ngomu sina kupita siruwo, kondjera mokuhamesera mo maliwapaikiro gomapongo gapeke.

‘Korangeda vemembo lyoge’

Jehova ga yi diva asi vanturagumbo va hepa kurugana unene yipo va fire sinka vahali vawo. Yisewe 24:27, NW kutanta asi: “Hova tanko kuwapaika epya lyoge, makura kuna nombuto doge.” Nampili ngoso, wa ha ncenuna yihepwa yopampepo yepata lyoge. Yipo nye, velise ezi kwa twikira ko asi: “Konyima wa hepa hena kukorangeda vemembo lyoge.” Ngapi omu vanturagumbo nava vhura kuyirugana eyi? Yisewe 24:3 kutanta asi: “Mambo kugadikisa ketateko lyounongo nonondunge.”

Ngapi omu unongo nau vhura kuretera uwa epata lyoge? Unongo kwa kwatera mo evhuliko lyokukwata egano yininke eyi vana dili kukutantera. Elirongo lyewa lyepata kutamekera pokukonakona epata lyoge. Ngapi omu vemepata lyoge vana kukura pampepo? Purakena nawa mononzogera doge kumwe nawo. Awo kuna kulikida mpepo zesivano ndi zonyengo? Kukondjera emona kuna kara sitambo sosinene kwawo ndi? Apa o kara moyirugana yokuzuvhisa kumwe novana woge, awo kulizuvha umanguruki mokulidivisa vene kovakwawo asi awo vamwe woNombangi daJehova ndi? Awo kuhafera elirongo ntani nelikwamo lyereso lyoBibeli lyepata ndi? Awo sili kuparuka monkedi ezi a hafere Jehova ndi? Kukonakona nawa ngayi horora eyi no vhura kurugana nganturagumbo mokutura nokutunga yikara yopampepo mwankenye gumwe gemepata.

Tara moRuhungu nomoAwake! koyirongwa eyi ayi uyunga kuhamena yihepwa yemepata lyoge. Makura tantera vepata komeho zosiruwo eyi ngomu ya lironga, yipo va vhure kukagazadara ko. Kara nonkareso zongwa zeharo posiruwo selirongo. Wa ha handukira ndi o fise nomuga nkenye ogu gemepata, nye likida mulyo gweyi muna kulironga, ntani nomu nomu yi ruganesa mepata. Hamesera mo navenye vemepata. Vatera nkenye gumwe gemepata a dimburure omu da “sikilira mo” Nonkango daJehova mokugava yihepwa yemeparu.—Epis. 19:7.

Kugwana mauwa

Vantu ava va dira kukara nediwo lyeyi yopampepo kuvhura va lironge kuhamena unsitwe noyihorokwa youzuni ntani nampili yokuhamena kwavene, nye kapi ava kwata egano etanto lyeyi ava mono. Mokulisiga, mevatero lyompepo zaKarunga, vantu ava ava lirongo nkenye apa Nonkango daKarunga kuvhura kukwata egano moyihorokwa eyi yirugana yaKarunga nesikiliromo lyomauporofete goBibeli, ntani nesikiliromo lyositambo saKarunga ngetungiko kovantu wovalimburukwi.—Mar. 13:4-29; Rom. 1:20; Ehor. 12:12.

Nampili ngomu ayi tetukisa eyi, ayo ngano kapisi yi tu ninkise tu linenepeke. Mevango lyoyo, kukonakona nkenye ezuva Nonkango daKarunga kutuvatera tu linunupike. (Deut. 17:18-20) Ado hena kutupopera ‘di dire kutupukisa nonzo,’ morwa nsene Nonkango daKarunga kuna kara nomwenyo monomutjima detu, nonzo kapi ngadi diinina po etokomeno lyetu lyokudinyokera po. (Heb. 2:1; 3:13; Koros. 3:5-10.) Yipo nye, ose ‘ngatu wapa kukara moomu ga hara Hompa, tatu rugana nkenye apa yokumuhafesa. Ose ngatu yima yiyimwa yoyirugana nayinye yoyiwa moukaro wetu.’ (Koros. 1:10) Kurugana ngoso kuna kara sitambo setu seyi atu lirongere Nonkango daKarunga, ntani ngayi reta mauwa gomanzi nsene ngatu yi sikisa mo.