Paradisa kwa zi zumbanesere — BIBILIYOTEKA ZOKOINTANETA

Ruha 2

Paradisa kwa zi zumbanesere

Muengeli gomurwanesi kwa kumbagerere mugara nomukadi wokuhova, Adamu naEva, mokunyokera po upangeli waKarunga. Ngoyitundwamo, nzo nonomfa kwa wiza mouzuni

NARE-NARE komeho zokuunga vantu, Karunga kwa ungire yisitwa yopampepo, vaengeli. MoEdeni, muengeli gomurwanesi, ogu va ya tumbwire asi Satana Muzonaguli, kwa kumbagerere Eva a lye kenyango lyokositji esi ga va silikire Karunga asi va ha lya ko.

Pokuruganesa ezoka, nokulininkisa ngwendi yilyo lina kuuyunga, Satana kwa tembe asi Karunga kwa horekerere mukadi nayendi yininke yoyiwa. Muengeli kwa tanterere Eva asi nage nayendi kapi ngano ngava fa nsene va lya kositji esi va va silikire. Yipo nye, Satana kwa rundilire Karunga mokukumbagera vantu. Satana kwa retesere po kudira kulimburukwa kwaKarunga ngonkedi zongwa zokuvhura kutwaredesa kediwo lyokulikarera nokoumanguruki. Nye eyi nayinye kwa kere yimpempa, ayo kwa kere yimpempa yokuhova pevhu. Nompata dene-dene kwa hamenene mo upangeli waKarunga wanayinye. Satana kwa patanesere nsene asi Karunga ga kara nouhunga wokupangera ndi nsene asi age kupangera monkedi zouhunga nokuretera uwa kovapangerwa vendi.

Eva ga pulire yimpempa yaSatana. Age kwa tamekere kudowokera enyango, makura ta li. Konyima ta ya peko yendi, nage ta li. Awo makura tava kara vananzo. Eyi va rugene kwa kere yirugana yourwanesi. Pokuhorowora kudira kulimburukwa kompangera zaKarunga mowina, Adamu naEva kwa nyokere upangeli woMusiti ogu ga va pere nayinye, kukwatera mo eparu lyokusikilira mo.

Karunga kwa futisire varwanesi owo koyirugana yawo. Age kwa pumbire ewizo lyoRuvharo rwetumbwidiro ndi Muzowoli, ogu nga ya zonagura po Satana, ndi ezoka. Karunga kwa rangesere nomfa daAdamu naEva pokaruwogona, nokulikida nkenda kovana vawo ava va ya retere. Vana owo kwa ya kere netateko lyehuguvaro, morwa ogu ga ya tumine Karunga nga ya gusa po yitundwamo eyi wa reta po urwanesi womoEdeni. Esikiliromo lyositambo saKarunga kuhamena Muparuli ogu gokomeho, kwa ya si horwere kanunu-kanunu ngomu lya ya twikilire etjango lyoBibeli.

Karunga kwa tjidire mo oAdamu naEva moParadisa. Awo va hepere kurugana unene nokutjimpuka mokugwana nondya pokukalima pevhu eli lya kere ponze zosikunino saEdeni. Eva ta ya kara nezimo makura ta hampuruka mbeli zawo, Kaini. Valikwali kwa ya kere hena novana wovagara nava wovakadi, kukwatera mo Abeli ntani naSete, ozinyakuru vaNowa.

—Kuna tundu mwaGenesis egaununo 3 dogoro 5; Ehororo 12:9.

◼ Yimpempa musinke yokuhova ya kere, ntani yilye ga yi uyungire?

◼ Ngapi omu oAdamu naEva va zumbanesere Paradisa?

◼ Pokufutisa varwanesi koyirugana yawo, etateko lyehuguvaro musinke ga tulire po Karunga?

[Nonkango depepenuno 5]

Ruvharo “ngaru myona mutwe goge, ove ngo ru huma kosinsinsina saro.”—Genesis 3:15

[Kakende kepepenuno 5]

KUDIRA KUSIKILIRA MO NONOMFA

Karunga kwa ungire oAdamu naEva wokusikilira mo, nositambo sokuparuka narunye moParadisa. Apa va rwanesere Karunga, awo kwa zonene. Yipo nye, Adamu naEva va zumbanesere kusikilira mo kwawo nokuhagekesa po elikwatakano lyawo noNtundiliro zeparu, Jehova. Ngoyitundwamo, awo novana vawo wokudira kusikilira mo kapi tava vhuru kukandana po nzo nonomfa.—Varoma 5:12.

[Kakende kepepenuno 5]

Genesis ●

Exodus

Levitikus

Numeri

Deuteronomium

Josuwa

Vapanguli

Rutu

1 Samwere

2 Samwere

1 Vahompa

2 Vahompa

1 Histoli

2 Histoli

Esira

Nehemiya

Esitera

Joba

Mapisarome

Yisewe

Muudisi

Rusumo

Jesaya

Jeremiya

Malirankali

Hesekiyeli

Ndaniyera

Hoseya

Marakiya

Mateusa

Marukusa

Rukasa

Johanesa

Yirugana

Varoma

1 Vakolinte

2 Vakolinte

Vagarata

Vaefeso

Vafilipi

Vakorosi

1 Vatesaronika

2 Vatesaronika

1 Timoteusa

2 Timoteusa

Titusa

Firemoni

Vahebeli

Jakopo

1 Peturusa

2 Peturusa

1 Johanesa

2 Johanesa

3 Johanesa

Juda

Ehororo