“Diworokeni ava ava mu pitisire”

EDI kuna kara nonkango ga tjenge mupositoli Paurusa moVahebeli 13:7, kuvhura kuditoroka hena asi: “Diworokeni vagendesi veni.” Kutundilira poPentekoste momvhura 33, vapositoli wovalimburukwi vaHompa Jesus Kristusa kwa sikisa mo situmbukira esi ngombungagendesi ezi za pitisilire mokugava mavyukiso kombungakriste zompe. (Yirug. 6:2-4) Koyiha yomvhura 49, mbungagendesi ezi kwa ya ligwederere kukwatera mo vapositoli vaJesus. Apa wa horokere udigu weyi yovamba, mombungagendesi kwa hamenene mo ‘vapositoli novakurona womoJerusarema.’ (Yirug. 15:1, 2) Aso kwa kere situmbukira sawo sokuzogera maudigu aga ga kundamene Vakriste navenye. Awo kwa tumine nombilive nonompangera, edi da nkondopekere nombungakriste nokuvatera varongwa va lize momagazaro nomoyirugana. Nombungakriste kwa limburukwire nokukwama mavyukiso gombungagendesi, ngoyitundwamo, Jehova ga di tungikire.—Yirug. 8:1, 14, 15; 15:22-31; 16:4, 5; Heb. 13:17.

² Konyima zonomfa dovapositoli, varwanesi usili yipo va tamekere. (2 Tes. 2:3-12) Ngomu ga yi pumbire Jesus mosifanekeso sendi soyilya nomau mwaMateusa, mau (Vakriste woyimpempa) kwa ga kunine moyilya (Vakriste wovagwavekwa). Konyima zosiruwo, nombunga mbali kwa di pulisilire di twikire kukara po dogoro posiruwo sokuteza, “uhura wouzuni.” (Mat. 13:24-30, 36-43) Nkenye mugwavekwa kwa gwanena mo uwa mwaJesus, nye kapi pwa kere mbungagendesi ntani nongendeseso ezi ga ruganesere Jesus mokugava mavyukiso kovasikuli vendi. (Mat. 28:20) Nye ga pumbire asi ngapa horoka erunduruko posiruwo setezo.

³ “Yilye nani mukareli gokulimburukwa gonondunge?” Pokupura epuro olyo, Jesus Kristusa kwa tumbwire sifanekeso, ngoruha ‘rosidiviso’ ga geve kuhamena ‘uhura wouzuni.’ (Mat. 24:3, 42-47) Jesus kwa pumbire asi mukareli ogu gokulimburukwa nga litura mo unene mokugava nondya dopampepo kovantu vaKarunga “posiruwo sado.” Ngwendi moomu tupu Jesus ga ruganesere mbunga zovagara mevango lyokuruganesa muntu gumwe posiruwo sanare, nomukareli gokulimburukwa ogu ana kuruganesa Jesus pouhura wouzuni kuna kara mbunga kapisi muntu gumwe tupu.

KUDIMBURURA “MUKARELI GOKULIMBURUKWA GONONDUNGE”

⁴ Yilye Jesus ga horowora a gave nondya dopampepo? Age kwa ruganesa Vakriste wovagwavekwa apa pevhu. Bibeli kuvatumbura asi ‘vapristeli wopasiuhompa’ ava va horowora asi va ‘“udise yitetu” yogu ga va zigida va tunde momundema va wize mouzera wendi wokutetura.’ (1 Pet. 2:9; Mara. 2:7; Ehor. 12:17) Vagwavekwa navenye vepevhu kuna kara mukareli gokulimburukwa gonondunge ndi? Hawe. Apa Jesus ga geve nondya dopanyama pasitetu kovagara 5 000, kugusa ko vakadi novanona, age kwa di pere varongwa vendi, makura awo tava di gavere kombunga. (Mat. 14:19) Age kwa kutikire wovanzi kupitira mwava wovasesu. Naina, age kuna kugava nondya dopampepo monkedi zokulifana.

⁵ Mukareli ndi “erenga lyokulimburukwa lyonondunge” kwa tulisa po mbungagona sovanavazinyetu wovagwavekwa ava ava wapaike nokugava nondya dopampepo posiruwo esi sekaropo lyaKristusa. (Ruk. 12:42) Momazuva aga gopouhura, vanavazinyetu wovagwavekwa ava va hamena ‘momukareli gokulimburukwa gonondunge’ kurugana kumwe komberewa zonene zoNombangi. Naina, mbungagona zovanavazinyetu ava wovagwavekwa yiwo Mbungagendesi zoNombangi daJehova.

⁶ Kristusa kuruganesa mbungagona ozo mokugava nombudi kuhamena omu mauporofete goBibeli gana kusika mo ntani nomavyukiso omu natu ruganesa nompango doBibeli meparu lyetu. Nondya edi dopampepo kudigavera kupitira monombungakriste doNombangi daJehova. (Jes. 43:10; Gar. 6:16) Posiruwo sanare, mukareli ndi erenga lyokulimburukwa yilyo ngali gendesa embo. Mokulifana, mukareli gokulimburukwa gonondunge kwa mu pa situmbukira sokugendesa embo lyaKarunga. Mukareli gokulimburukwa nage kugendesa yiweka noyirugana yokuzuvhisa noyigongi ntani nomalikwamo goyigongi nokutulisa po vapitisili momaruha gokulisiga-siga mombunga ntani nokunduruka yimbapiratjangwa yoBibeli, nayinye eyi kuretera ‘vantu’ mauwa.—Mat. 24:45.

⁷ Wolye nye ‘vantu’? Awo vaava ava gwana nondya dopampepo. Pomuhowo, vantu owo kwa kere tupu vagwavekwa. Konyima zosiruwo, vantu owo kwa ya hamena mo emukurumbunga ‘lyononzwi dapeke.’ (Joh. 10:16) Nombunga nadinye odo kugwanena mo uwa monondya dopampepo edi a gava mukareli gokulimburukwa.

⁸ Posiruwo soudigu wounene, Jesus nga wiza nokuyapangura uzuni ou woudona, age nga ya tumba mukareli gokulimburukwa a kare mukungi “gemona lyendi mudima.” (Mat. 24:46, 47) Ava va hamena momukareli gokulimburukwa ngava ka gwana mfeto zawo meguru. Mukareli gokulimburukwa nage kwa hamena mwava 144 000, ava ngava ka pangera kumwe naKristusa meguru. Nampili ngomu pevhu ngapa dira mukareli gokulimburukwa gonondunge, Jehova naJesus ngava gava mavyukiso kwava ngau pangera Uhompa woUmesiyasa kupitira mwava ngava ka horowora va ka kare ‘vapangeli.’—Epis. 45:16.

MORWASINKE NATU ‘DIWOROKERA AVA AVA PITISIRE’?

⁹ Pwa kara nokonda dononzi deyi natu ‘diworokera ava ava pitisire’ neyi natu va huguvarera. Morwasinke ayi tu reterere uwa? Mupositoli Paurusa kwa tente asi: “Awo kutakamesa nomwenyo deni, ngwendi vava ava di zeresere Karunga. Nsene mu va limburukwa, tava yi rugana nehafo, kapisi nomutjimakoka, yeeyi kapi yi mu kwafe.” (Heb. 13:17) Ayo ya kara nomulyo kulimburukwa nokukwama mavyukiso gava ava pitisire morwa awo kutakamesa ndi kupopera elikwatakano lyetu naJehova ntani nonkareso zetu.

¹⁰ Ngomu va yi tjanga mo-1 Vakolinte 16:14, Paurusa kwa tente asi: “Yirugana yeni nayinye omu yi rugane meharo.” Matokoro aga ava tulisira po vantu vaKarunga kugatura po morwa sikara sosinene seharo. Kuhamena eharo, 1 Vakolinte 13:4-8 kutanta asi: “Eharo kwa kwata nedidimiko nounambili; eharo kapi lya paka mfudu, eharo kapi ali likanganga, kapi ali litumbu, kapi ali reta yoyidona, kapi ali papara yeeyi lya hara lyene, kapi ali nyegenya, kapi lya paka nkoko, kapi ali hafere udona, nye alyo kuhafa kumwe nousili. Eharo kwa kwata nayinye: kupura nayinye, kuhuguvara nayinye, kudidimika nayinye. Eharo kapi ali haga.” Mokumona asi matokoro nagenye aga ava tura po yipo vakareli vaJehova va gwanene mo uwa kuyiruganena morwa eharo, yipo nye twa hepera kulimburukwa komavyukiso gawo. Mokurugana ngoso, awo kulikida eharo lyaJehova.

¹¹ Ngwendi posiruwo sanare, ava ana kuruganesa Jehova va pitisire vantu vendi kuna kara vantu wokudira kusikilira mo. Pwanare, Jehova kwa ruganesere vantu wokudira kusikilira mo mokusikisa mo mpango zendi. Nowa kwa tungire emuwato nokuzuvhisa kuhamena ezonauko momazuva gendi. (Gen. 6:13, 14, 22; 2 Pet. 2:5) Mosesa kwa mu horowere a pitisire vantu vaJehova va pwage moEgipite. (Ex. 3:10) Vagara ava wokudira kusikilira mo kwa va gendesere mpepo zokupongoka va tjange Bibeli. (2 Tim. 3:16; 2 Pet. 1:21) Jehova mokuruganesa vantu wokudira kusikilira mo naina va pitisire sirugana sokuzuvhisa nokutulisa po varongwa kapi ayi ninkisa ehuguvaro lyetu mombunga zendi li dire kupama. Nye ayo kutunkondopeka morwa twa yi diva asi pwa hana evatero lyaJehova, mbunga ezi ngano kapi za yi tompoka kusikisa mo eyi za rugana. Maudigu noyihorokwa yoyinzi eyi za pita mbunga ezi kulikida asi mpepo zaKarunga yizo zina kuzigendesa. Ruha rwepevhu rombunga zaJehova kwa ru tungika unene. Eyi yiyo yina karere nomulyo tu zi kwatese ko unene nokuzihuguvara.

OMU NATU LIKIDA EHUGUVARO LYETU

¹² Vagara ava va pa yitumbukira apa ava yi sikisa mo noulimburukwi, awo ngoso kuna kulikida ehuguvaro lyawo mombunga zaJehova. (Yirug. 20:28) Ngovazuvhisi woUhompa, ose kuzuvhisa tunda embo zende embo, nokutengura kwava tuna gwana ntani nava atu lirongo nawo Bibeli. (Mat. 24:14; 28:19, 20) Mokugwanena mo uwa wounene monondya edi a gava mukareli gokulimburukwa, ose kuliwapaikira nokukara komapongo ntani nopoyigongi nayinye. Ose kugwanena mo uwa momakorangedo govanavazinyetu pokukara nawo komapongo.—Heb. 10:24, 25.

¹³ Apa atu kwatesa ko mbunga zetu pokuruganesa yiweka yetu, ose kulikida asi twa zi huguvara. (Yis. 3:9, 10) Apa atu mono asi vanavazinyetu kuna kuhepa, ose kuvavatera usimbu. (Gar. 6:10; 1 Tim. 6:18) Ose kuyiruganena eyi morwa kuhara vanavazinyetu, ntani nokupapara nkenye apa nompito dokulikida asi twa kara norupandu kwaJehova nokombunga zendi komauwa aga atu gwana.—Joh. 13:35.

¹⁴ Ose kulikida hena asi twa huguvara mbunga pokukwatesa ko matokoro gazo. Eyi kwa kwatera mo kukwama mavyukiso govanavazinyetu ava ava pitisire mbunga ngwendi vatareli wonombungakriste novakuronambunga. Vanavazinyetu ava ‘ava pitisire’ twa fira kuvalimburukwa nokuvazuvha. (Heb. 13:7, 17) Nampili tu dire kukwata egano matokoro gongandi, twa yi diva asi pokugakwatesa ko ngayi tu retera uwa wanarunye. Ngoyitundwamo, Jehova kututungika morwa ose kulimburukwa koNonkango dendi nokombunga zendi. Monkedi zangesi tatu likida ulimburukwi wetu koMupitisili, Jesus Kristusa.

¹⁵ Twa kara nokonda zokuhuguvara momukareli gokulimburukwa gonondunge. Satana, mupangeli gouzuni ou, kuna kukondja paapa ga hulira mokuswaukisa edina lyaKarunga nombunga zendi. (2 Kol. 4:4) Wa ha pulisira Satana a ku pukise! (2 Kol. 2:11) Age ana yi diva asi “siruwo sendi esi sina hupu ko sisupi” komeho zokukamumanga, ano ana tokomene kupukisa vakareli vaJehova wovanzi. (Ehor. 12:12) Nye ngomu Satana ana kukondja unene mokuhara kutupukisa, nose tu hedere unene kwaJehova. Ngano tu huguvareni unene mwaJehova ntani mongendeseso zendi ezi ana kuruganesa mokuvyukisa vantu vendi naina. Pokurugana ngoso, ngatu kara mouumwe novanavazinyetu.