Vazuvhisi wombudi zongwa

JEHOVA kwa tu pa Munwendi, Jesus Kristusa yipo tu kwame sihonena sendi. (1 Pet. 2:21) Apa muntu a ya kara murongwa gwaJesus, age kuzuvhisa mbudi zongwa ngomurugani kumwe naKarunga. Age kugwana rufuwo pampepo, ngamoomu ga yi tente Jesus asi: “Wizeni kwange namuvenye, one ava wa rorora udigu, ni ya mu pwizumukise. Likambekeni ndjoko zange, mu lirongere nge po, yeeyi ame kwa gomoka, yiyo na linunupika momutjima, ngomu gwane rufuwo monomwenyo deni.” (Mat. 11:28, 29) Etumbwidiro lyendi kwa sika mo kwankenye ogu ga tambura ezigido eli.

² NgoMuzuvhisi goMunene, Jesus kwa zigidire vamwe va kare varongwa vendi. (Mat. 9:9; Joh. 1:43) Age kwa va dewire omu nava zuvhisa ntani kwa va tumine va ka rugane yokulifana neyi nga rugana. (Mat. 10:1–11:1; 20:28; Ruk. 4:43) Konyima, ga ya tumine varongwa 70 va ka zuvhise mbudi zongwa kuhamena Uhompa ndi Untungi waKarunga. (Ruk. 10:1, 8-11) Apa Jesus ga tumine varongwa owo, kwa va tanterere asi: “Ogu ana kumuzuvha, nyame a zuvhu, ogu ana kumunyoka, nyame ana nyoka. Ano ogu ana kunyoka nge, googu ga tuma nge, yige ana nyoka.” (Ruk. 10:16) Monkedi ezi, Jesus kwa nkondopekere mulyo gosirugana esi ga pere varongwa vendi. Awo kwa karerere po Jesus naKarunga Munankondo nadinye! Ayo yina lifana nanavenye ava vana kutambura ezigido lyaJesus eli asi: “Wiza o ya kwame nge.” (Ruk. 18:22; 2 Kol. 2:17) Ava va tambura ezigido olyo, kuzuvhisa mbudi zongwa zoUhompa ntani kutulisa po varongwa.—Mat. 24:14; 28:19, 20.

³ Morwa twa tambura ezigido lyaJesus lyokumukwama, ose twa gwanena mo mauwa ‘mokudiva’ Jehova Karunga naJesus Kristusa. (Joh. 17:3) Ose twa ya diva nompango daJehova. Jehova ga tu vatera tu rundurure magazaro getu nokugusa muntu gomupe ntani nokurundurura nkareso zetu zi lize nonompango dendi. (Rom. 12:1, 2; Efe. 4:22-24; Koros. 3:9, 10) Eharo lyetu lyokuhara Jehova yilyo lya tu tumangeda tu ligave kwendi nokugwana ekuho. Apa atu gwana ekuho, ose kuyakara vakareli vaJehova.

⁴ Twa hepa kudiworoka asi mokukarera Karunga, twa hepa kukara tuna hungama moyirugana nomomagazaro getu. (Epis. 24:3, 4; Jes. 52:11; 2 Kol. 6:14–7:1) Ose twa kara nezwi lyewa lyokomutjima, morwa twa pura mwaJesus Kristusa. (Heb. 10:19-23, 35, 36; Ehor. 7:9, 10, 14) Mupositoli Paurusa kwa korangedere Vakriste va rugane yininke mokufumadekesa ko Karunga nye kapisi mokupundukisa wopeke. Mupositoli Peturusa kwa tente asi kukara nonkareso zongwa kuvhura yi tezwilise ava va dira kupura. (1 Kol. 10:31, 33; 1 Pet. 3:1) Ngapi no vatera muntu a wapere kukara muzuvhisi gombudi zongwa?

VAZUVHISI WOVAPE

⁵ Apa tupu no tameka kulironga nomuntu Bibeli, mu korangeda a tantere ko wopeke eyi ana kulironga. Age kuvhura a tantere ko vanekoro novakaume novarugani vakwawo ntani navamwe ngoso. Ezi kuna kara nkedi zomulyo mokuronga wovape va kare varongwa vaJesus Kristusa ngovazuvhisi wombudi zongwa. (Mat. 9:9; Ruk. 6:40) Ngomu vana kudiva Karunga nokukara nonkareso zokutantera ko wopeke, ngayi va tumangeda va tameke kuzuvhisa.

EYI GA HEPA KUSIKISA MO

⁶ Komeho muntu a pwage nombungakriste mokuzuvhisa tunda embo zende embo, wa hepa kudivilisa asi ana sikisa mo yihepwa yongandi. Muntu ogu a pwaga nose mokuzuvhisa, vantu kumutara asi Mbangi zaJehova. Eyi kulikida asi age ga tameka nare kuparuka kuliza nonompango daJehova, makura ta kara muzuvhisi gokudira kugwana ekuho.

⁷ Ngomu ono kulironga nomuntu Bibeli nokuzogera nage nompango damo, ove ngo ya diva ukaro wendi. Nampo wa yi dimburura asi age kuna kuparuka kuliza neyi ana kulironga. Nye koyili hena simpe vakuronambunga va hepa kuzogera nove nomurongwa goge kuhamena nkareso zendi.

⁸ Muwapaiki gombunga zovakuronambunga nga tura po mawapaiko novakuronambunga vavali (gumwe gomoKomitiye zoyirugana yokuzuvhisa) va zogere nove ntani nomurongwa goge. Nsene mombungakriste vakuronambunga vasesu mo, mukuronambunga nomukwafimbunga gokuwapera situmbukira oso kuvhura va yi rugane. Vanavazinyetu owo vana horowora va hepa kuyirugana nosiruwo. Nsene muzuvhisi ana divisa vakuronambunga kepongo asi murongwa gwendi ana hara kukara muzuvhisi, kuvhura va zogere nage nomurongwa gwendi konyima zepongo. Va hepa kuyirugana monkedi zongwa. Komeho murongwa va mu tantere asi ana wapere kukara muzuvhisi gokudira kugwana ekuho, va hepa kutara yihepwa eyi yina kukwama ko:

1. (1) Age ga yi pura asi Bibeli kuna kara Nonkango daKarunga ndi?—2 Tim. 3:16.

2. (2) Age ga kara nediwo lyokugwanena po lyomarongo goBibeli ndi? Apa ngava mu pura mapuro, nga limburura kuliza noBibeli kapisi neyi aga rongo maukarelikarunga goyimpempa ndi magano gamwene?—Mat. 7:21-23; 2 Tim. 2:15.

3. (3) Age kukwama nompango domoBibeli pokulipakerera novantu vaJehova komapongo ndi?—Epis. 122:1; Heb. 10:24, 25.

4. (4) Age ga diva eyi azi rongo Bibeli kuhamena kuhondera ndi kuteza po nonkwara ndi kukwara masupareko ndi kulirara mugara nomugara ndi mukadi nomukadi, nokuparuka kuliza neyi azi rongo Bibeli ndi? Nsene muntu ogu vana kupuragera mugara ndi mukadi ogu ga tunga nomuntu kumwe va hana kulikwara, va hepa kulikwara paveta zosirongo ndi zopampo.—Mat. 19:9; 1 Kol. 6:9, 10; 1 Tim. 3:2, 12; Heb. 13:4.

5. (5) Age ga diva asi Bibeli za silika unkorwe nokukoka makanya ntani kuruganesa nkenye yikwepangwe ndi?—2 Kol. 7:1; Efe. 5:18; 1 Pet. 4:3, 4.

6. (6) Age ga dimburura mulyo gokunyokera po vakaume wovadona ndi?—1 Kol. 15:33.

7. (7) Age ga ligusa ko koukarelikarunga ou ga kere nare pokutjanga mbilive asi kapi ana kara hena gumwe gwawo ndi? Ndi ga hageka kuza koukarelikarunga owo nokudira kulihameka mo?—2 Kol. 6:14-18; Ehor. 18:4.

8. (8) Age kapi a lihameke mwanayinye eyi ya likwatakana noupolitika ndi?—Joh. 6:15; 15:19; Jak. 1:27.

9. (9) Age ga yi pura eyi za uyunga Jesaya 2:4 kuhamena nomuhoko nokuparuka kuliza nayo ndi?

10. (10) Age ana hara sili kukara Mbangi zaJehova ndi?—Epis. 110:3.

⁹ Nsene vakuronambunga vana dimburura asi murongwa kapi ana kuvhura kulimburura mapuro ogo moomu ya fira, awo kuvhura kuruganesa matjangwa ngomu vana kuzogera nage. Ayo ya kara nomulyo a kwate egano asi ava ava lipakerere noNombangi daJehova mokuzuvhisa va hepa kuparuka kuliza neyi aga uyunga Matjangwa. Eyi na uyunga ngayi vatera vakuronambunga va tokore nsene asi age ga diva eyi yina kumundindira ndi ana wapere kuzuvhisa nombunga.

¹⁰ Vakuronambunga va hepa kudivisa usimbu murongwa ogo nsene asi ana wapere ndi hawe. Eyi kuyirugana konyima tupu zapa nava mana kuzogera nage. Nsene ana wapere, vakuronambunga tava mu tantere asi ngesi ove muzuvhisi. (Rom. 15:7) Va hepa kumukorangeda a tameke kuzuvhisa nombungakriste mokwedi kooko yipo nga gave nzapo zendi kehagero lyokwedi. Vakuronambunga kuvhura va faturure asi apa murongwa goBibeli a wapere kukara muzuvhisi gokudira kugwana ekuho nokugava nzapo zendi zokuhova, awo kutjanga edina lyendi posikarata ava tumbura asi Congregation’s Publisher Record nokusipungura. Awo kugusa mauzera ogo komuzuvhisi mwene yipo mbunga zaJehova zi twikire kupakera mbili yirugana yokuzuvhisa yoNombangi daJehova uzuni mudima ntani muzuvhisi a vhure kulihameka moyirugana yopampepo nokugwana evatero lyopampepo. Ntani hena, awo kudiworokesa muzuvhisi gomupe asi nkenye mauzera gomuntu kugaruganesa kuliza noveta Global Data Protection Policy zoNombangi daJehova za kara ko jw.org.

¹¹ Nsene tu diva nawa muzuvhisi gomupe nokulikida elituromo kweyi ana kutompora ngayi mu vatera unene. Ayo ngayi mu tumangeda a gave nzapo zendi nkenye kwedi ntani nokulitura mo unene mokukarera Jehova.—Fil. 2:4; Heb. 13:2.

¹² Nsene vakuronambunga va yi dimburura asi murongwa goBibeli ana wapere kuzuvhisa, tava mu pe buke Kwa zi wapaika mokurugana mpango zaJehova. Apa murongwa a gava nzapo zendi zokuhova, makura tava gava ediviso kombungakriste asi ana kara muzuvhisi gokudira kugwana ekuho.

KUVATERA VANONA

¹³ Vanona kuvhura nawo va wapere kukara vazuvhisi wombudi zongwa. Jesus kwa tambwire vanona ntani ga va tungikire. (Mat. 19:13-15; 21:15, 16) Vamwe mombungakriste kuvhura kuvatera vanona ava vana hara kuzuvhisa, nampili ngomu sa kara situmbukira sovakurona vawo. Nsene wa kara novanona, sihonena soge sokuzuvhisa mbudi zongwa noupampi ngasi korangeda vana woge va kare noupampi mosirugana saKarunga. Ngapi natu vatera munona ogu ga kara neharo lyokutantera ko vakwawo eyi ga pura yipo a twikire komeho?

¹⁴ Aso situmbukira sovakurona mokutantera ko gumwe govakuronambunga gomoKomitiye zoYirugana yomoMbungakriste va zogere nsene munona ogo ana wapere kukara muzuvhisi. Muwapaiki gombunga zovakuronambunga nga tura po mawapaiko novakuronambunga vavali (gumwe gomoKomitiye zoyirugana yokuzuvhisa) va zogere nomunona kumwe novakurona vendi ndi nogu a mu rere. Nsene munona ga kara nediwo lyoBibeli ntani ana hara kuzuvhisa, eyi kulikida asi age kuna kutura po marunduruko. Konyima zokuzogera nomunona ogo, vakuronambunga vavali kuvhura va tokore nsene munona ogo ana wapere kukara muzuvhisi gokudira kugwana ekuho ndi hawe. (Ruk. 6:45; Rom. 10:10) Pokuzogera nomunona, kapisi hepero kuzogera mapuro nagenye ngwendi moomu ava zogere novakondi, morwa yininke yimwe kapi ya wapera vanona.

¹⁵ Monzogera ozo, vakuronambunga va hepa kupandadeka munona komarunduruko ana kutura po nokumukorangeda a litulire po sitambo sokugwana ekuho. Mokumona asi vakurona kurugana unene mokuronga munawo a dive usili, nawo va hepa kuvapandadeka. Mokuvatera vakurona va twikire kuvatera munona, vakuronambunga va hepa kulikida vakurona ruha “Mbudi kovareti woVakriste,” pepenuno 179-181.

ELIGAWO NTANI EKUHO

¹⁶ Nsene o ya diva Jehova nokumuhara pokusikisa mo eyi ya hepa po ntani nokuzuvhisa, wa hepa kupameka elikwatakano lyoge nage. Monkedi musinke? Pokuligava kwendi nokugwana ekuho pokukudivida momema.—Mat. 28:19, 20.

¹⁷ Kuligava kulikida asi ono tokora kurugana yomulyo po meparu. Kuligava kwaJehova Karunga kutanta asi kukanderera kwendi nokumutumbwidira asi ngo mu ruganena eparu lyoge nalinye ntani ngo sikisa mo nompango dendi. Ayo kutanta hena asi ngo mu karera gelike dogoro narunye. (Deut. 5:9) Eli kuna kara ekanderero lyopwanyovelike. Kwato ogu na vhura kuyikuruganena po.

¹⁸ Nampili ngoso, yinzi ya hepa po kupitakana tupu kutantera Jehova Karunga asi ono hara kumukarera. Wa hepa kuyilikida kovantu asi ono ligava kwendi. Ayo kuyilikida pokugwana ekuho, ngomu ga yi rugene Jesus. (1 Pet. 2:21; 3:21) Nsene ono tokora asi ngo karera Jehova ntani ono hara kugwana ekuho, yisinke wa hepa kurugana? Wa hepa kudivisa muwapaiki gombunga zovakuronambunga. Age nga tura po mawapaiko novakuronambunga va zogere nove yipo va tokore nsene ono wapere kugwana ekuho ndi kapi ono wapere. Komauzera gomanzi, tara ruha “Mbudi komuzuvhisi gokudira kugwana ekuho,” no gwana mobuke ezi pepenuno 182-184, ntani “Mapuro kwava vana hara kugwana ekuho,” no gwana pepenuno 185-207.

YITUNDWAMO YOYIRUGANA YOKUZUVHISA

¹⁹ Ayo kukorangeda vantu vaJehova mokumona asi sivaro sovazuvhisi uzuni mudima kuna kuligwederera. Kutunda tupu apa Jesus Kristusa ga tanterere varongwa vendi asi mbudi zongwa ngava zi udisa mouzuni mudima, Vakriste wousili va litura mo unene mokusikisa mo sirugana esi.—Mat. 28:19, 20; Mar. 13:10; Yirug. 1:8.

²⁰ Varongwa vaJesus nawo kwa hefe apa ngava mono yitundwamo yomoyirugana yokuzuvhisa. (Mar. 6:30) Buke zoYirugana kutanta asi momvhura 33 vantu wokusika 120 kwa gwene mpepo zokupongoka poPentekoste. Mwaza siruwo, varongwa kwa ya ligwederere nokusika konyara 3 000, ano konyima tava ya siki 5 000. Yitundwamo kwa kere asi ‘Hompa nga gwederere ko nkenye ezuva vapuli kombunga zawo’ ntani hena ‘vapristeli wovanzi nawo tava ya kara vapuli.’ (Yirug. 1:15; 2:5-11, 41, 47; 4:4; 6:7) Ayo kwa korangedere varongwa vaJesus mokumona omu sa ligwedererere sivaro. Eyi yiyo ya va tumangedere va twikire nosirugana sawo sokuzuvhisa nampili ngomu va pitire momahepeko gokutunda kovampitisili womaukarelikarunga goVajuda.

²¹ Koyiha yomvhura 60 dogoro 61, mupositoli Paurusa kwa tjangerere Vakorosi mbilive asi ‘mbudi ezi zongwa kuna kureta yiyimwa, azo kuna kulihanena uzuni mudima’ ntani kwa “zi udisira nkenye sisitwa somouzuni.” (Koros. 1:5, 6, 23) Vakriste womosiruwo sovapositoli kwa limburukwire koNonkango daKarunga, ano mpepo zokupongoka kwa va nkondopekere va sikise mo sirugana sokuzuvhisa komeho va ya zonagure po Jerusarema momvhura 70. Ayo kwa korangedere Vakriste owo wovalimburukwi apa va zuvhire yitundwamo yokuzuvhisa mbudi zongwa.

²² Mokulifana, mbunga zaJehova nanaina kuna kutwikira kusikisa mo uporofete ou va tjanga mwaMateusa 24:14, ou au tanta asi: “Nye Mbudi zoNgwa ezi zoUntungi waKarunga tanko ngava zi divisa mwa za uzuni mudima, zi kare umbangi wonomuhoko nadinye, ntani nye ngaku kwama uhura.” Ngovakareli vaKarunga ava twa ligava, twa kara nosirugana somulyo twa hepa kurugana. Twa hepa kulitura mo unene yipo tu sikise mo sirugana esi sokuzuvhisa komeho uhura u wize. Jehova ngayi mu hafesa mokutumona omu tuna kusikisa mo sirugana sendi.—Hes. 3:18-21.

NZAPO ZOMOYIRUGANA YOKUZUVHISA

²³ Yisinke no vhura kutjanga ponzapo? Mbunga zaJehova kugava yipepa eyi ayi likida eyi no tjanga ponzapo zomoyirugana yokuzuvhisa. Noparagarafu dokukwama ko nadi ka tu vatera omu natu yi rugana.

²⁴ Moruha va tjanga “Yimbapiratjangwa ndi yokukwateka eyi wa gavera,” didilika sivaro soyininke oyo wa pa vantu ava va hana si Nombangi ndi vazuvhisi ava va dira kugwana ekuho. Ano ruha va tjanga “Novidiyo edi wa likida,” didilika mo sivaro sonovidiyo edi wa likida mokwedi oko.

²⁵ Moruha “Yikando eyi wa tengwira ko,” tjanga mo yikando eyi wa tengwira ko mokukazogera novantu ava va likida elituromo va hana si Nombangi. Kutjanga etengwiroko kapisi dogoro kuna zi pembo lyomuntu, nye nampili kuna mu tjangere mbilive ndi kuna mu bela ndi walye kuna mu tumine mbudi koselefoni ndi e-mail ndi kuna ka mu sigira yimbapiratjangwa, nayo ngoso etengwiroko. Nkenye apa no ka lironga nomurongwa goge wa hepa kutjanga etengwiroko. Mukurona kuvhura a tjange etengwiroko limwe nkenye sivike nsene kuna kupitisira ukareli wepata omu muna hamene munona ogu ga dira kugwana ekuho.

²⁶ Nampili ngomu atu rugana elirongo lyoBibeli nomuntu nkenye sivike, nye kehagero lyokwedi ose kutjanga murongwa gumwe tupu. Vazuvhisi va hepa kutjanga pononzapo dawo sivaro sovarongwa vawo woBibeli ava vana lirongo nawo mokwedi oko. Varongwa woBibeli kwa kwatera mo ava atu lirongo nawo va hana asi Nombangi. Ntani nsene gomoKomitiye zoyirugana yokuzuvhisa a ku pura o lironge nagumwe ga tengura monyima ogu ga gwana ekuho ndi nagumwe ogu ga gwana ekuho nye kapi ga mana kulironga buke Hafera eparu narunye! ogo nage ngoso murongwa goBibeli.

²⁷ Ayo mulyo unene kutjanga “Novili” edi sili wa zuvhisa. Eyi kwa tamba konovili edi wa rugana tunda embo zende embo ndi edi wa rugana matengwiroko ndi edi wa ruganesa mokulironga novarongwa woge woBibeli ndi edi wa zuvhisa nampili kapisi mokuzuvhisa ono kara ndi edi wa zuvhisa pokuruganesa sitoroli. Nsene vazuvhisi tava rugana vavali, navenye kuvhura va varure novili nye gumwe yige na tjanga etengwiroko ndi murongwa goBibeli ogu vana rugana. Vakurona ava ava rugana Ukareli wEpata novana vawo kuvhura kutjanga navenye vili zimwe mosivike. Vanavazinyetu wovagara ava ava gava yiuyungwa yanavenye nawo kuvhura kuvarura nominute edi ana ruganesa pokugava siuyungwa. Ano ogu ana kutoroka siuyungwa sanavenye nage kuvhura kuvarura nominute. Nsene asi kuna kuliwapaikira o ze mokuzuvhisa ndi kuna kara pepongo lyomokuzuvhisa ndi kuna kukarandera muntu yuma ntani nayimwe ngoso, kapi to varura novili.

²⁸ Nkenye muzuvhisi ga hepa kutokora omu na varura novili mokukwama ezwi lyendi lyokomutjima eli ga deura kuliza neyi ga lironga moBibeli. Vazuvhisi vamwe kuzuvhisira monomukunda omu mwa zura vantu, ano vamwe monomukunda omu mwa kara vantu wovasesu ntani awo pamwe kuhepa kugenda sinano sosire. Nomukunda kwa lisiga; vazuvhisi nawo kwa lisiga omu ava tara sirugana sawo sokuzuvhisa. Mbungagendesi kapi azi tokwere po vazuvhisi omu nava varura novili domokuzuvhisa, ndi va horowore gumwe ogu na konakona novili odo komeho va di tume koBeteli.—Mat. 6:1; 7:1; 1 Tim. 1:5.

²⁹ Ponzapo kutjanga po tupu novili nye kapisi nominute. Nye nsene muzuvhisi mukurupe ndi kuvera-vera ndi ukaro wendi kapi una kumupulisira, kuvhura kutjanga nominute. Muzuvhisi gwangoso, kuvhura a tjange nominute 15 ponzapo zendi. Nampili kuna zuvhisa nominute 15 mokwedi, ga hepa kuditjanga po. Simpe tava mu varura asi muzuvhisi. Ewapaiko eli kwa tamba hena komuzuvhisi ogu una kudira kupulisira ukaro wendi pokaruwogona, nampo kapi ana kuvhura kugenda kwedi nakunye ndi kuna kuvera unene ndi kuna remana. Ewapaiko eli kwa tamba tupu kovazuvhisi ava vana kara momaukaro gangoso. Komitiye zoyirugana yokuzuvhisa yizo azi tokora nsene asi muzuvhisi ogo kuvhura a tjange tupu ponzapo nominute 15.

SIKARATA SANKENYE MUZUVHISI

³⁰ Nzapo zankenye muzuvhisi zomoyirugana yokuzuvhisa kuzitjanga posikarata ava tumbura asi Congregation’s Publisher Record. Sikarata oso kapi a si kara komuzuvhisi mwene. Nsene kuna kudirukira kombungakriste zapeke, divisa ko vakuronambunga womombungakriste zeni. Ano hamutjanga gombungakriste ezi wa kere nga tuma sikarata soge kombungakriste ezi ono dirukire. Makura vakuronambunga womombungakriste ezi ono dirukire ngava kutambura nawa nokukuvatera pampepo. Nsene ove kuna kara ure nombungakriste makwedi gatatu, simpe wa hepa kutuma nzapo zoge zoyirugana yokuzuvhisa kombungakriste ezi wa tunda.

EYI ATU GAVERE NONZAPO DOMOYIRUGANA YOKUZUVHISA

³¹ Ove poyiruwo yimwe kudivara kugava nzapo zoge zomoyirugana yokuzuvhisa ndi? Eyi yiyo twa hepera natuvenye madiworokeso. Nsene tu kara nomutaro gouhunga nokukwata egano eyi natu gavera nonzapo detu, ngayi tu vatera tu diworoke kudigava nkenye kwedi.

³² Vamwe kulipura asi: “Morwasinke nani gavera nzapo zange kombungakriste nsene asi Jehova ga diva nayinye eyi atu mu ruganene?” Jehova ga diva eyi atu rugana mosirugana sendi, ntani ga yi diva nsene asi kuna kuyirugana nomutjima nagunye ndi nomutjimakoka. Diworoka asi Jehova kwa tjenge mazuva aga ga kere Nowa memuwato ntani nomvhura edi va kere Vaisraeli momburundu. Karunga kwa tjanga moBibeli sivaro sava va limburukwire nava va dilire kulimburukwa. Ntani ga tjenge hena omu va si fundire sirongo saKanani ntani neyi va rugene vapanguli wovalimburukwi woVaisraeli. Yosili, age kwa tjenge mauzera gomanzi kuhamena eyi va rugene vakareli vendi. Mokumona asi age kwa tjenge moBibeli nayinye eyi ya horokere, eyi kutulikida omu Jehova a tara kutura yininke patjangwa.

³³ Yihorokwa eyi va tjanga moBibeli kulikida siruwo souhunga ntani neyi ya horokere vantu vaJehova. Mokuninka asi yihorokwa yomoBibeli yi kundame vantu, va hepere kutumbura sivaro sokuvyukilira. Koneka yihonena eyi yina kukwama ko: Genesis 46:27; Exodus 12:37; Vapanguli 7:7; 2 Vahompa 19:35; 2 Histoli 14:9-13; Johanesa 6:10; 21:11; Yirugana 2:41; 19:19.

³⁴ Nampili ngomu atu dili kutjanga pononzapo nayinye eyi atu ruganene Jehova, ado kusikisa mo sitambo somulyo mombunga zaJehova. Momazuva govapositoli, apa vapositoli va ka tengwire kosirugana sokuzuvhisa, awo kwa tanterere Jesus “nayinye eyi va ka rugene neyi va ka rongere.” (Mar. 6:30) Poyiruwo yimwe, nonzapo kuvhura kuhorora maruha gongandi aga va hepa kupakera mbili unene. Sivaro kuvhura si likida omu yirugana yokuzuvhisa yina kuza komeho komavega gamwe, ngwendi omu sivaro sovazuvhisi sina kuligwederera ndi sina kutengura monyima. Kuvhura yi kare asi pana hepa ekorangedo ndi kukohonona po maudigu gongandi. Vatareli wonombungakriste kuyidimburura kupitira mononzapo ntani nokukonakona nkenye ukaro ou una kukondera vazuvhisi va dire kuligwederera ndi mbungakriste zi dire kukura.

³⁵ Nonzapo kuvatera hena mbunga zaJehova zi dive oku kuna hepa evatero ndi vazuvhisi. Nomukunda musinke omu vana kutambura vantu usili? Monomukunda musinke vana kudira kutambura usili? Yimbapiratjangwa musinke yina hepa po yipo vantu va lironge usili? Nonzapo kuvatera mbunga zaJehova zi dive yimbapiratjangwa eyi vana hepa mokuzuvhisa moyirongo yokulisiga-siga mouzuni mudima ntani nokuyituma koyirongo oyo.

³⁶ Apa atu zuvhu yitundwamo yomoyirugana yokuzuvhisa kutukorangeda. Ose kuhafa apa atu zuvha omu vanavazinyetu vana kulitura mo unene mokuzuvhisa mbudi zongwa uzuni mudima. Apa atu zuvhu omu vazuvhisi vana kuligwederera kutuvatera tu kare nomutaro gouhunga omu zina kukura mbunga zaJehova. Yihorokwa eyi kutuhafesa ntani kututumangeda tu liture mo unene mokuzuvhisa. (Yirug. 15:3) Ayo mulyo tu ruganene kumwe mokugava nonzapo ntani ayo kulikida asi twa kara nosinka kovanavazinyetu. Monkedi ezi, ose ngoso kuna kulimburukwa kewapaiko eli za tura po mbunga zaJehova.—Ruk. 16:10; Heb. 13:17.

KULITULIRA PO YITAMBO

³⁷ Kapisi hepero tu lihetakanese nava wopeke monkedi omu atu zuvhisa. (Gar. 5:26; 6:4) Maukaro getu ga lisiga. Ose ngatu gwanena mo uwa pokulitulira po yitambo ngomu tuna kulitura mo unene mokuzuvhisa. Kusikisa mo yitambo yetu ngayi tu retera ruhafo.

³⁸ Jehova kuna kugenderera kupongaika mbunga ezi nga popera “poudigu wounene.” Ose kuna kuparuka posiruwo esi una kusika mo uporofete waJesaya ou asi: “Nepata lyeeli lyenunu lyesupi ngali nenepa tali nkondopa ngwendi muhoko. Apa ngasi sika mo siruwo, ngani yi ninka yi horoke usimbu eyi. Ame nyame HOMPA!” (Ehor. 7:9, 14, NW; Jes. 60:22) Aso situmbukira sokulikarera sokukara vazuvhisi wombudi zongwa, unene po pomazuva aga gopouhura.—Mat. 24:14.