Nonkedi dokuzuvhisa mbudi zongwa

NGOMUZUVHISI gomupampi gombudi zongwa, Jesus kwa tulira po sihonena sosiwa varongwa vendi. Age kwa litulire mo unene mokuronga vantu nkenye oku ngava gwana, yi kare asi momambo ndi komavango oku ngaku kara vantu wovanzi. (Mat. 9:35; 13:36, Ruk. 8:1) Age nga uyunga novantu ntani nga rongo varongwa vendi pwavelike, ano poyiruwo yimwe nga rongo mbunga zonene zovantu. (Mar. 4:10-13; 6:35-44; Joh. 3:2-21) Age nga ruganesa nkenye mpito mokuvatera vantu va kare nehuguvaro. (Ruk. 4:16-19) Nampili ngomu nga roroka poyiruwo yimwe, age simpe nga twikire kuzuvhisa. (Mar. 6:30-34, Joh. 4:4-34) Apa atu resa moBibeli kuhamena yirugana yaJesus yokuzuvhisa, ngano yi tu tumangede tu mu honene ngwendi moomu va yi rugene vapositoli.—Mat. 4:19, 20; Ruk. 5:27, 28; Joh. 1:43-45.

² Tu konakoneni nonkedi omu Vakriste naina nava vhura kuzuvhisa, ngomu ga yi rugene Jesus nomvhura 2 000 da ka pita.

KUZUVHISA TUNDA EMBO ZENDE EMBO

³ NgoNombangi daJehova, ose twa diva mulyo gokuzuvhisa mbudi zongwa tunda embo zende embo. Ose kwa divikwa morwa kuruganesa nkedi ezi zokuzuvhisa. Mokuruganesa nkedi ezi, kwa tu vatera tu zuvhisire vantu wokusika komamiliyona mosiruwo sosisupi tupu, ano eyi kwa reta yitundwamo yoyiwa. (Mat. 11:19; 24:14) Kuzuvhisa tunda embo zende embo kuna kara nkedi ezi atu likida asi twa hara Jehova novantu.—Mat. 22:34-40.

⁴ Kuzuvhisa tunda embo zende embo, kapisi nkedi zompe koNombangi daJehova. Mupositoli Paurusa nga zuvhisire momambo govantu. Apa ga fatwililire vakurona womombunga zoVaefeso kuhamena sirugana sendi, age kwava tanterere asi: “Kutundilira kezuva lyopomuhowo eli na wizire moAsiya, . . . ame kapi na mu horeka ko yimwe yokumukwafa, nye ame ngani mu udisire oku tani mu rongo moyipafi nomomambo geni.” Mononkedi edi, Paurusa kwa geve umbangi koVajuda nokoVagereka “asi va litezurure va rugwire kwaKarunga, awo hena va pure Hompa gwetu Jesus Kristusa.” (Yirug. 20:18, 20, 21) Mosiruwo sina, epangero lyaRoma ngali korangeda vantu va karere yikarunga yoyimpempa ntani vamwe kwa kere ‘vakereli wovakarunga owo.’ Ya kere hepero kovantu va papare “Karunga ogu ga sita uzuni neyi ya kara mo nayinye,” ogu ga hara “vantu navenye asi va litezurure.”—Yirug. 17:22-31.

⁵ Mulyo unene tu zuvhise mbudi zongwa kovantu navenye, morwa uhura wouzuni ou woudona pepi una kara. Eyi kututumangeda tu liture mo unene mokuzuvhisa. Kuzuvhisa tunda embo zende embo kuna kara nkedi zongwa po zokugwana vantu ava vana hepa kudiva usili womoBibeli. Nkedi ezi kututompoka ngwendi moomu ngayi tompoka vapositoli momazuva gaJesus.—Mar. 13:10.

⁶ Nove kuzuvhisa tunda embo zende embo ndi? Nsene yimo, ngoso ove kuna kuhafesa Jehova. (Hes. 9:11; Yirug. 20:35) Nampo ove kukudigopera kuzuvhisa tunda embo zende embo. Pamwe morwa mauvera ndi vantu womomukunda ogu o zuvhisire kapi ava purakene. Ndi nampo masiliko gokutunda kepangero. Ndi nampo ove nomuga ndi kukudigopera kutameka nzogera novantu wa dira kudiva. Yipo nye, kuzuvhisa tunda embo zende embo kuvhura kukuretera sinka. Nye ya ha ku dompesa. (Ex. 4:10-12) Ukaro woge wa lifana nou vana kupita vanavazinyetu moyirongo yimwe.

⁷ Jesus kwa tumbwidilire varongwa vendi asi: “Tareni, ame neni ngani kara dogoro nokouhura wouzuni.” (Mat. 28:20) Etumbwidiro eli kutunkondopeka tu liture mo unene mosirugana sokutulisa po varongwa. Ose kulizuvha ngwendi moomu ga lizuvhire mupositoli Paurusa, ogu ga tente asi: “Ame kuvhura nayinye nononkondo dogu a pameke nge.” (Fil. 4:13) Kwatesa ko mawapaiko gomombungakriste gokuzuvhisa tunda embo zende embo. Pokuzuvhisa kumwe novakweni, awo ngava kukorangeda nokukuvatera. Kanderera nkenye apa yipo o funde po nkenye marwaneso, ntani litura mo unene mokuzuvhisa mbudi zongwa.—1 Joh. 5:14.

⁸ Ngomu ono kuzogera novantu kuhamena mbudi zongwa, ngo gwana mpito zokuvatantera ko ‘ehuguvaro eli wa kara nalyo.’ (1 Pet. 3:15) Ngo ya dimburura nokudiva malisigo ga kara pokatji kava va dira kuhuguvara moUhompa ntani nava va huguvara moUhompa. (Jes. 65:13, 14) Ngo ya hafa pokudiva asi ove kuna kulimburukwa kompangera zaJesus ezi asi: ‘Nosite seni naso yimo nasi tema.’ Ntani ngo gwana mpito zokuvatera vantu va dive Jehova nousili ou ngau va twaredesa komwenyo gwanaruye.—Mat. 5:16; Joh. 17:3; 1 Tim. 4:16.

⁹ Momazuva-zuva nomoyikondovike, pwa kara mawapaiko gokuzuvhisa tunda embo zende embo. Monomukunda dimwe omu vantu ava dili kukara pembo mutenya, nombungakriste dimwe kutura po mawapaiko gokuzuvhisa kongurova. Vantu vamwe kuvhura kuyihafera pokuvadingura kongurova kupitakana ngurangura.

KUPAPARA VANTU WOVAWA

¹⁰ Jesus kwa tumine varongwa vendi va ‘pulide’ ndi va papare vantu wovawa. (Mat. 10:11) Mokupapara vantu wovawa, Jesus kapi ga zuvhisire tupu tunda embo zende embo, nye nga zuvhisa hena nkenye apa nga gwana mpito nampili kapisi mokuzuvhisa ana kara. (Ruk. 8:1; Joh. 4:7-15) Vapositoli nawo ngava zuvhisire nkenye oku ngava gwana vantu.—Yirug. 17:17; 28:16, 23, 30, 31.

¹¹ Mokulifana, sitambo setu kuna kara asi tu zuvhisire nkenye ogu mbudi zoUhompa. Nsene tu yi rugana oyo, ose ngoso kuna kuhonena Jesus novapositoli vendi monkedi omu ngava tulisa po varongwa nokuliza noukaro wovantu womomukunda ogo ntani posiruwo esi ava kara vantu pomambo. (1 Kol. 7:31) Pasihonena, vazuvhisi ya va tompoka kuzuvhisira komavango gonongesefa. Moyirongo yimwe, ya va tompoka kuzuvhisira mononzira nokomavango gokupwizumukira ntani oku ava sikameke matuwa ndi nkenye oku aku kara vantu. Nombungakriste dimwe kuruganesa yitafura noyitoroli mokuzuvhisira momukunda gwawo. Ntani Beteli pamwe kuzigida vazuvhisi wokonombungakriste dokulisiga-siga va ka zuvhisire komavango oku aku kara vantu wovanzi, unene po moyitata. Ayo kuvatera mokugwana vantu ava ava dili kukara pomambo yipo nawo va zuvhe mbudi zongwa.

¹² Nsene tuna ligwana novantu ava vana kara neharo lyokupurakena mbudi zomoBibeli kuvhura tu va pe ko simbapiratjangwa kuliza noukaro wawo. Mokumuvatera a hare kudiva ko yoyinzi, kuvhura o gave mauzera goge nokutura po mawapaiko gokukatengwira ko ndi o mu likide Intaneta zetu jw.org ndi o mu pe mauzera kuhamena oku sa karera Sinyanga soUhompa sopopepi. Ngo gwana ruhafo rorunene nsene o zuvhisira komavango oku aku kara vantu wovanzi.

¹³ Kuzuvhisa mbudi zongwa kapisi yiso selike sirugana ava rugana Vakriste naina. Nsene wa hara kuvatera wopeke va gwane usili wokutwaredesa komwenyo gwanarunye, twikira kutengwira ko kovantu ava va hara kulironga yipo nawo va ya dive Jehova.

KURUGANA MATENGWIROKO

¹⁴ Jesus kwa tanterere varongwa vendi asi: “Ngomu kare nombangi dange, . . . dogoro nokooku wa ka twa uzuni.” (Yirug. 1:8) Age ga va tanterere hena asi: “Yipo nye nomu zira konomuhoko nadinye, mu ka di ninke di kare varongwa vange, . . . Ka di rongeni, di ka limburukwire nayinye eyi na mu rekera.” (Mat. 28:19, 20) Kurugana matengwiroko kureta ruhafo. Nsene o tengwira ko kovantu ava wa zuvhisilire mbudi zongwa sikando sokuhova, ngava yi hafera. Pokulironga nawo Bibeli, ngo nkondopeka epuro lyawo mwaKarunga ntani ngo va vatera va dimburure asi va hepa Karunga. (Mat. 5:3, NW) Nsene o liwapaikira nawa ntani nokurugana etegwiroko posiruwo souhunga, ngayi ku tompoka kutameka elirongo lyoBibeli. Ntani ngayi kurerupira kurugana matengwiroko nkenye apa. Ose kapi tupu atu kunu mbuto nye simpe kuzitekera.—1 Kol. 3:6.

¹⁵ Vamwe kuvadigopera kurugana matengwiroko. Nampo ove kwa diva kutameka nzogera novantu ava o zuvhisire mbudi zongwa, ntani yiyo yelike tupu o hafere. Nye kukudigopera kurugana matengwiroko ndi o tameke elirongo lyoBibeli nomuntu. Ayo ya wapa kuliwapaikira nawa komeho zosiruwo. Hetekera ko kuruganesa magano aga ga kara mombapira zekepongo kuhamena etengwiroko. Kuvhura o ture po mawapaiko gokupwaga kumwe nomuzuvhisi ogu ga kara noudivi a ku vatere.

KURUGANA ELIRONGO LYOBIBELI

¹⁶ Apa Filipusa ga uyungire nerenga eli lya resere Nonkango daKarunga, age kwa li pulire asi: “Enye, tomu yi zuvhu tupu eyi muna kuresa?” Erenga tali limburura asi: “Omu nani yi zuvha ngapi, pwa hana ogu na vyukisa nge?” Sihorokwa somoYirugana egaununo 8 kututantera asi Filipusa kwa tamekere kufatwilira erenga kutamekera petjangwa eli lya resere, makura tali “udisire Mbudi zoNgwa zokuhamena Jesus.” (Yirug. 8:26-36) Kapi tuna diva asi siruwo sokuhura kupi Filipusa ga kere nerenga, nye Filipusa kwa fatwilire mbudi zongwa dogoro erenga tali ya kara mupuli nokugwana ekuho. Alyo kwa ya kere murongwa gwaJesus Kristusa.

¹⁷ Sinzi sovantu kapi va diva nawa Bibeli, eyi yiyo atu tengwilire ko yikando yoyinzi mokukalironga nawo, pamwe kugusa yivike ndi makwedi ndi mvhura ntani vana kutambura usili, ano konyima awo kuyagwana ekuho. Nsene o didimika nokukara neharo lyokuvatera wonomutjima donongwa va kare varongwa vaJesus ngo gwanena mo mauwa, ngomu ga yi tente Jesus asi: “Kugava kwa kara nerago, kwa pitakana kutambura.”—Yirug. 20:35.

¹⁸ Ove ngo hafera kurugana elirongo lyoBibeli pokuruganesa simwe soyimbapiratjangwa esi va wapaika nositambo sokulironga Bibeli. Nsene o tura pasirugana magano aga atu lirongo mepongo lyomosivike ntani nokupwaga mokuzuvhisa kumwe nava va diva kuronga, ngayi ku vatera o kare murongi gomuwa pokuvatera wopeke va kare varongwa vaJesus Kristusa.

¹⁹ Nsene ono hepa evatero lyokutameka elirongo lyoBibeli ndi omu ava rugana elirongo lyoBibeli, pura gumwe govapitisili ndi Mbangi ezi za diva kurugana nawa elirongo lyoBibeli. Magano ga kara mombapira Eparu lyetu noyirugana yokuzuvhisa ntani malikido aga ava rugana komapongo ngayi ku vatera. Huguvara mwaJehova ntani kanderera nkenye apa yipo yi ku tompoke. (1 Joh. 3:22) Ntani kara nositambo sokukara nomurongwa goBibeli nampili ngomu o lirongo Bibeli nava vemepata lyoge. Pokurugana elirongo lyoBibeli, ngo hafera unene kuzuvhisa.

VA VATERA VA DIVE MBUNGA ZAJEHOVA

²⁰ Apa atu vatere vantu va dive Jehova Karunga ntani nokukara varongwa vaJesus Kristusa, awo kuyahama kombungakriste. Nsene varongwa woBibeli va diva mbunga zaJehova nokuruganena kumwe nazo, awo ngava tura po ezokomeho. Va ronga eyi ya karera nomulyo kudiva mbunga zaJehova. Novidiyo ntani mbapira Wolye vana kurugana mpango zaJehova? kwa yi wapaikira nositambo oso. Mauzera gamwe gemEgaununo 4 mobuke ezi kuvhura ga ku vatere.

²¹ Tupu nomu tameka kulironga nomurongwa goge Bibeli, mu vatera a mone asi Jehova kuna kuruganesa mbunga zendi zi sikise mo sirugana sokuzuvhisa mouzuni mudima. Tumbura mulyo goyimbapiratjangwa eyi atu ruganesa mokulironga novantu Bibeli nokuvafatwilira omu valizambeli ava yi rugana nokuyigavera uzuni mudima. Zigida murongwa goge goBibeli komapongo koSinyanga soUhompa. Mu fatwilira omu ava ga rugana mapongo, ntani mu vatera a lidive novanavazinyetu womombungakriste. Ntani koyigongi mu vatera ali yike noNombangi dimwe. Poyilika yimwe, mu siga a limonene mwene omu vantu vaJehova ava likida eharo, nomu eharo lya kara sidimbwiliso soVakriste wousili. (Joh. 13:35) Moomu ana kuhara unene mbunga zaJehova, yimo nga hedere Jehova pepi.

KURUGANESA YIMBAPIRATJANGWA

²² Vakriste womosiruwo sovapositoli kwa kere vazuvhisi woupampi woNonkango daKarunga. Awo ngava tjangurura Matjangwa yipo va ga ruganese vene ntani mombungakriste. Awo ngava tantere ko wopeke usili womoNonkango daKarunga. Matjangwa aga va tjangwilire kwa kere gomasesu ntani va hepere kugapungura nawa. (Koros. 4:16; 2 Tim. 2:15; 3:14-17; 4:13; 1 Pet. 1:1) Nombangi daJehova kuna kuruganesa nomahina dokunduruka yipo va nduruke yimbapiratjangwa yoBibeli mamiliyona nokuyihanesa. Ayo kwa kwatera mo yitratate, nombapira ntani noyifo yomomaraka gokulisiga-siga.

²³ Ngomu ono kuzuvhisira ko wopeke mbudi zongwa, ruganesa nawa yimbapiratjangwa eyi zina kugava mbunga zaJehova. Pokudimburura omu o gwanene mo uwa mokuresa nomokulironga yimbapiratjangwa yoNombangi daJehova, ngayi ku tumangeda o tantere ko wopeke.—Heb. 13:15, 16.

²⁴ Wovanzi kuruganesa Intaneta mokugwana mauzera gomanzi. Yipo nye, kugusa ko yimbapiratjangwa, Intaneta zetu zopaveta jw.org kuna kara siruganeso sosinene mokuhanesa mbudi zongwa. Wovanzi kuruganesa kompiuta pokuresa nokupurakena makwateko goBibeli ntani goyimbapiratjangwa momaraka gokulisiga-siga. Ava ayi dili kutompoka kuzogera nose ndi ava va tunga konomukunda dokoure oku kwa dira Nombangi daJehova, kuvhura kuruganesa Intaneta zetu jw.org momambo gawo yipo va dive eyi twa pura.

²⁵ Yipo nye, ose kudivisa Intaneta zetu jw.org nkenye apa atu gwana mpito. Nsene ogu tuna gwana po pembo tatu pura kuhamena epuliro lyetu, kuvhura tu ruganese selefoni ndi tablet tu mu likide elimbururo poopo. Nsene tu gwana muntu ogu a uyunga eraka lyapeke ndi rupurupuru, kuvhura tu mu likide koIntaneta zetu, a gwane Bibeli ndi yimbapiratjangwa meraka eli a zuvhu. Vazuvhisi wovanzi kwa ruganesa novidiyo dimwe dokoIntaneta mokutameka kuzogera nomuntu kuhamena Bibeli.

KUZUVHISA NAMPILI KAPISI MOKUZUVHISA ONO KARA

²⁶ Jesus kwa tanterere ava va tambwire mbudi ezi nga zuvhisa asi: “One nyone uzera wouzuni. . . . Nosite seni naso yimo nasi temena vantu, asi ava mone yirugana yeni yoyiwa, ava fumadekere po Guhyeni gemeguru.” (Mat. 5:14-16) Varongwa vena kwa kweme nompango daKarunga pokuhonena Jesus ogu ga tente asi: “Nyame uzera wouzuni.” Jesus kwa tulira po Vakriste sihonena pokuninka ‘uzera wawo womwenyo’ u teme yipo navenye ava vana kupurakena va gwanene mo uwa.—Joh. 8:12.

²⁷ Mupositoli Paurusa nage kwa tu tulira po sihonena esi natu kwama. (1 Kol. 4:16; 11:1) Apa ga kere moAtena, age nga zuvhisire vantu ava ngava zi pomarandesero nkenye ezuva. (Yirug. 17:17) Vakriste womoFilipi kwa kweme sihonena sendi. Morweyi, Paurusa yipo ga va tjangerere asi awo kuna kuparuka “mokatji kovantu ava va penga, awo hena va puka,” makura va hepere kupaima “mokatji kawo ngwendi nombungururu edi adi minikire mouzuni.” (Fil. 2:15) Ngomu tuna kuzuvhisira wopeke mbudi zongwa, nose twa hepa kuninka usili woUhompa u teme kupitira mononkango nomoyirugana yetu. Yosili, sihonena setu sosiwa ntani nokuhungika nkenye apa, ngayi vatera vantu va dimburure asi twa lisiga nouzuni ou. Yipo nye, nsene tu va zuvhisira mbudi zongwa, ngava dimburura konda zeyi twa lisigira.

²⁸ Vantu vaJehova kuzuvhisa mbudi zongwa nkenye oku ava gwana vantu, yi kare asi kosure ndi koyirugana ndi oku ava rondere vantu matuwa. Nsene morugendo tuna kara, kuvhura tu zuvhisire ko ava tuna kugenda nawo. Nsene kuna kuzogera novantu, kuvhura o tjindje nzogera yipo o gwane mpito zokuvazuvhisira. Tu kareni tuna liwapaikire nkenye apa yipo tu zuvhisire ko wopeke mwankenye ukaro.

²⁹ Nsene tu diva asi ose kuna kuyererepeka Musiti gwetu ntani nokuretera edina lyendi efumano, ayo ngayi tu tumangeda tu zuvhise. Ntani ngayi tu tumangeda tu vatere wonomutjima donongwa va dive Jehova yipo nawo ngava mu karere nokukara nehuguvaro lyomwenyo gwanarunye kupitira mwaJesus Kristusa. Elituromo lyangoso, kuhafesa Jehova ntani age kutara sirugana esi asi sa pongoka.—Heb. 12:28; Ehor. 7:9, 10.

MUKUNDA OGU ATU ZUVHISIRE

³⁰ Azo mpango zaJehova asi mbudi zongwa zoUhompa va zi zuvhise mouzuni mudima, yi kare asi moyitata nomonomukunda. Yipo nye, Beteli kugava konombungakriste nomukunda edi nadi zuvhisira ntani nokovazuvhisi ava va kara ure nodoropa. (1 Kol. 14:40) Eyi ya lifana nomu Karunga nga gendesa sirugana esi mosiruwo sanare. (2 Kol. 10:13; Gar. 2:9) Sirugana zokuzuvhisa kuna kulihana pomazuva aga gopouhura, morwa nombungakriste kuna kukwatesa ko ewapaiko lyokuzuvhisira nomukunda edi va pa nkenye mbungakriste.

³¹ Mupitisili goyirugana yokuzuvhisa yige a tulisa po ewapaiko eli. Mukwafimbunga kuvhura a wapaike karata zomukunda ogu nava zuvhisira nokugava mukunda kovazuvhisi. Nomukunda kwa di hangura pavali, gumwe gokuzuvhisira kumwe nombunga, ano gumwe gokuzuvhisira muntu gelike. Momukunda omu mwa kara mambo gomasesu, mupitisili gokambunga kuwapaika mambo aga nava zuvhisira womokambunga kendi. Ano momukunda omu mwa kara mambo gomanzi, nkenye muzuvhisi kuvhura kumupa mambo aga na zuvhisira gelike.

³² Muzuvhisi ogu va pa mambo aga na zuvhisira, age kuvhura kuzuvhisira mambo ogo nampili kapi pana kara mawapaiko gepongo lyomokuzuvhisa ndi nsene kapi yina mu tompoka kukazuvhisa kumwe nombunga. Pasihonena, vazuvhisi vamwe kwava pa oku nava zuvhisira pepi noku ava ruganene, ayo kuvarerupira kuzuvhisa nsene pometaha ndi pokudumbuka koyirugana. Mapata gamwe kwaga pa mambo aga nava zuvhisira aga ga kara pepi nokuvatunga yipo va zuvhise nampili kongurova. Ayo kuvatera vazuvhisi va ruganese nawa siruwo sawo mokuzuvhisa, nsene va kara nomambo gokuzuvhisira pepi nokuvakara. Nampili ngoso, mukunda ogu va pa muzuvhisi, simpe kuvhura kuzuvhisira mo ngombunga. Nsene ono hara mukunda ogu no zuvhisira, kuvhura o pure ogu va pa situmbukira sokugava nomukunda kovazuvhisi.

³³ Yi kare asi mukunda ogo kuguzuvhisira ngombunga ndi kwagu pa komuzuvhisi gumwe, muntu ogu va pa mukunda ogo ga hepa kudivilisa asi nkenye embo ana lizuvhisire. Mawapaiko gokurugana mukunda ga hepa kuliza noveta zosirongo kuhamena kutjanga mauzera gomuntu. Nkenye mupitisili gokambunga ndi muzuvhisi ogu va pa mukunda gokuzuvhisira, ga hepa kudivilisa asi a gu mane momakwedi gane. Nsene vana mana kuguzuvhisira va hepa kudivisa ogu va pa situmbukira sokugava nomukunda. Kuliza nomaukaro, mupitisili gokambunga koyirugana yokuzuvhisa ndi muzuvhisi ogo, kuvhura a ruguruke kuzuvhisira mukunda ogo ndi a pure va mu pe ko gwapeke.

³⁴ Nsene womombungakriste va ruganena kumwe, mukunda ogo kuvhura ngava gu mane kuguzuvhisira nagunye. Twa hepa kunyokera po kurugana mukunda gumwe yikando yoyinzi posiruwo simwe tupu morwa vantu kuvhura va dire kuyihafera. Nsene tu yi rugana ngoso, ngayi likida asi ose kugazadara ko vanavazinyetu ntani novantu ava va kara momukunda ogo.

KUZUVHISIRA VANTU WOMARAKA NAGENYE

³⁵ Nkenye gumwe ga hepa kulironga kuhamena Jehova Karunga naMunwendi ntani noUhompa waKarunga. (Ehor. 14:6, 7) Ose kuna kulitura mo mokuvatera vantu womaraka nagenye yipo va kuge edina Jehova ngava va parure ntani nokuvavatera va tunge po yikara yoSikriste. (Rom. 10:12, 13; Koros. 3:10, 11) Maudigu musinke atu ligwanekere nago nsene kuna kuzuvhisira momukunda ogu ava uyunga maraka gokulisiga-siga? Nkedi musinke natu ruganesa mokuzuvhisa yipo vantu navenye va zuvhe mbudi zoUhompa meraka lyawo?—Rom. 10:14.

³⁶ Nkenye mbungakriste kuzipa mukunda omu ava uyunga eraka eli ava ruganesa mombungakriste ozo. Nye momukunda omu ava uyunga maraka gokulisiga-siga, vazuvhisi womonombungakriste dokulisiga-siga kuvhura kuzuvhisira mo. Moukaro ou, ayo ya wapa kovazuvhisi owo va zuvhisire vantu ava ava uyunga eraka eli ava ruganesa mombungakriste zawo. Eyi hena kwa tamba nsene kuna kuhanesa yimbapira yezigido. Nsene kuna kuzuvhisira komavango oku ava kara vantu wovanzi ndi nampili kapisi mokuzuvhisa ono kara, ya wapa kuzuvhisira nkenye gumwe nokumupa simbapiratjangwa semeraka lyendi.

³⁷ Nombungakriste dimwe, kapi adi vhuru kumana kuzuvhisira nomukunda edi adi uyunga eraka lyawo. Momaukaro gangoso, vatareli woyirugana yokuzuvhisa womonombungakriste va hepa kuruganena kumwe yipo va dive omu nava zuvhisira mukunda ogo va gu mane. Eyi ngayi vatera nkenye gumwe a zuvhe mbudi zoUhompa meraka lyamwene ntani ngayi gusa po epiyagano kovazuvhisi.—Yis. 15:22.

³⁸ Yisinke natu rugana nsene ogu tuna gwana pembo kuuyunga eraka lyapeke? Kapisi tu gazare asi vazuvhisi ava ava uyunga eraka lyendi ngava ya mu zuvhisira. Vazuvhisi vamwe kulironga omu nava tameka nzogera meraka lyapeke, yipo va zuvhisire vantu ava ava uyunga eraka olyo. Kuvhura tu likide muntu omu na resa yimbapiratjangwa ndi na yi kwateka koIntaneta zetu jw.org, ndi kuvhura tu mu pe ko simbapiratjangwa semeraka lyawo.

³⁹ Nsene gumwe ana hara kulironga Bibeli, ya wapa kumugava kwagumwe ogu a uyunga eraka olyo yipo a mu vatere. Kuvhura hena tu mu tantere omu na gwana oku ava pongere ava ava uyunga eraka lyendi. Nsene ana hara gumwe ogu a uyunga eraka lyendi nga ya mu dingure, kuvhura tu mu likide omu na tura mo ehundiro ko-jw.org. Makura Beteli nazi wapaika muzuvhisi ogu na mu vatera ndi kambunga ndi mbungakriste oku nga pongera.

⁴⁰ Twa hepa kutwikira kuvatera muntu ogu ana hara kulironga dogoro ngatu gwane muzuvhisi ogu a uyunga eraka lyendi. Poyiruwo yimwe, Beteli kudivisa vakuronambunga asi kapi vana kugwana muntu ogu na mu vatera a uyunga eraka olyo. Moukaro wangesi, twa hepa kurugana paapa twa hulira yipo tu mu vatere. Kuvhura tu tameke kulironga nage Bibeli pokuruganesa nampo yimbapiratjangwa yemeraka lyendi. Nsene tu diva kuruganesa nawa mafano nokuninka muntu ogo a rese matjangwa aga va tura mosimbapiratjangwa oso, ngayi mu vatera a dive madi goBibeli. Nsene kweli gumwe gemepata lyawo ogu ga diva nawa eraka eli o uyunga kuvhura a mu torokere.

⁴¹ Mokuninka asi muntu ogo a dive mbunga zaJehova, twa hepa kumuzigida komapongo nampili yi kare asi kapi ta ka yi kwata nawa egano. Nsene mepongo tava resa etjangwa mu vatera pokumulikida moBibeli zemeraka lyendi nsene kozili. Kutulisa po ukaume nava womombunga ngayi mu vatera a kare nelikwatakano lyewa naKarunga.

⁴² Kambungagona: Kambungagona kwa hamena mo vazuvhisi ava ava zuvhisa meraka lyapeke, nampili yi kare asi mwato mukuronambunga ndi mukwafimbunga ogu na vhura kupitisira mapongo gomosivike meraka olyo. Beteli kuvhura kupulisira mbungakriste zi pakere mbili kambungagona kemeraka lyapeke nsene mbungakriste zi sikisa mo yihepwa eyi yina kukwama ko:

1. (1) Nsene sinzi sovantu womomukunda kuruganesa unene eraka lyapeke kupitakana eli ava ruganesa mombungakriste.

2. (2) Nsene moveli vazuvhisi ava va diva eraka olyo ndi vana hara kulironga eraka olyo.

3. (3) Nsene mbunga zovakuronambunga zina yi kwatesa ko kupitisira sirugana sokuzuvhisa meraka olyo.

Nsene mbunga zovakuronambunga zina hara kutulisa po kambungagona oko, makura awo tava divisa ko mutareli gonombungakriste. Age nampo kuvhura a dive ko nombungakriste dimwe edi da hara kuzuvhisira vantu ava ava uyunga eraka olyo ntani kuvhura a gave ko mauzera aga naga vatera yipo va tokore asi mbungakriste musinke ezi nazi pakera mbili kambungagona oko. Ano nsene vana horowora mbungakriste, vakuronambunga tava tjangere koBeteli mbilive kuhamena kambungagona oko nokuhundira epulisiro nsene mbungakriste ozo kuvhura zi pakera mbili kambungagona oko.

⁴³ Tumbunga: Beteli kuvhura kupulisira mbungakriste zi pakere mbili kambunga kemeraka lyapeke nsene mbungakriste zi sikisa mo yihepwa eyi yina kukwama ko:

1. (1) Nsene veraka olyo kuna kulironga Bibeli ntani kuna kumoneka asi vanzi ngava tambura usili.

2. (2) Nsene moveli vazuvhisi ava va diva eraka olyo ndi vana hara kulironga eraka olyo.

3. (3) Nsene pweli mukuronambunga ndi mukwafimbunga gokuwapera ogu na pitisira epongo nampili limwe mosivike meraka olyo, ngwendi siuyungwa sanavenye ndi Elirongo lyoRuhungu.

Nsene nayinye oyo yina siki mo, makura mbunga zovakuronambunga tazi tjangere koBeteli mbilive kuhamena kambunga oko nokuhundira epulisiro nsene mbungakriste ozo kuvhura zi pakera mbili kambunga oko. Mukuronambunga ndi mukwafimbunga ogu nga pitisira nga kara nositumbukira sokupakera mbili nayinye yomokambunga oko.

⁴⁴ Nsene va tulisa po kambunga, mbunga zovakuronambunga zomombungakriste ozo tazi tokora maruha gomapongo aga ka hepa kurugana kambunga oko ntani rungapi nava rugana mapongo ogo mokwedi. Ntani kuvhura va ture po mawapaiko yipo kambunga oko ka rugane mapongo gomoyirugana yokuzuvhisa. Navenye womokambunga oko, va hepa kukwama epitisiro lyovakuronambunga womombungakriste oku ka hamena. Vakuronambunga ngava gava mavyukiso gokuwapera nokupakera mbili kambunga oko. Apa mutareli gonombungakriste a rugana kumwe nokambunga oko mokuzuvhisa mosivike sedinguro, age kugava yitundwamo koBeteli kuhamena ezokomeho lyokambunga oko ntani neyi vana hepa. Mwaza siruwo, kambunga oko kuvhura kuyakara mbungakriste. Nsene womokambunga oko va kwama mavyukiso gombunga zaJehova, ayo ngayi mu hafesa.—1 Kol. 1:10; 3:5, 6.

KUZUVHISA NGOMBUNGA

⁴⁵ Vazuvhisi ava va gwana ekuho va kara nositumbukira sokuzuvhisa mbudi zongwa kwava wopeke. Pwa kara nonkedi dononzi dokuzuvhisa, nye sinzi setu kuyihafera apa atu pwaga novakwetetu moyirugana yokuzuvhisa. (Ruk. 10:1) Eyi yiyo nombungakriste adi karere nepongo lyomoyirugana yokuzuvhisa mokatji kosivike ntani moyikondovike. Posiruwo sepwizumuko, vanavazinyetu kugwana hena mpito zokuza mokuzuvhisa kumwe nombunga morwa sinzi sawo kapi ava zi koyirugana. Komitiye zoYirugana yomoMbungakriste za hepa kutura po mawapaiko yipo va zogere siruwo sokuwapera ntani nonomukunda oku nava zuvhisira kongurangura ndi kongurova.

⁴⁶ Kuzuvhisa kumwe ngombunga kuvatera vazuvhisi va ruganene kumwe ntani yipo ‘navenye va gwanene simwe ekwafo.’ (Rom. 1:12) Vazuvhisi wovape va hepa kurugana kumwe novazuvhisi ava va kara noudivi yipo va gwane edeuro. Monomukunda dimwe, ya wapa kovazuvhisi va rugane vavali ndi kupitakana opo mokuninkira yiponga. Nsene ono hara kuzuvhisira momukunda nyovelike, ya wapa kukaponga tanko kumwe ngombunga yipo o ka gwane ko makorangedo. Ayo ngayi ku korangeda pokudiva asi vazuvhisi vakweni nawo kuna kuzuvhisira momukunda ogo. Vazuvhisi ntani novazuvhisi wokukarerera pamwe kuvhura va dire kuza komapongo gomoyirugana yokuzuvhisa aga za wapaika mbungakriste, unene po aga ava rugana nkenye ezuva. Nampili ngoso, awo kuvhura va kwatese ko mapongo gamwe goyirugana yokuzuvhisa aga ava rugana nkenye sivike.

⁴⁷ Ngano natuvenye tu kwame sihonena esi ga tu tulira po Jesus novapositoli vendi. Moomu tuna kulitura mo unene mosirugana sokuzuvhisa mbudi zongwa zoUhompa, yimo Jehova nga tu tungika.—Ruk. 9:57-62.