Muzonaguli ta heteke Jesus

Konyima zekuho lyaJesus, mpepo zokupongoka ta zi mu twara momburundu. Age kapi ga lire mazuva 40, makura ta zuvhu nzara zonene. Muzonaguli makura ta mu wizire nokumuninka asi: ‘Nsene asi o MunwaKarunga, ninka mamanya aga, ga kare nomboroto.’ Nye Jesus ta mu limburura pokuruganesa Matjangwa asi: ‘Kwa tjanga va tjanga asi muntu kapi a paruka komboroto zelike. Muntu kuparuka kwankenye nkango ezi azi tundu mokana kaJehova.’

Muzonaguli ta heteke hena Jesus asi: ‘Nsene asi o MunwaKarunga, vatukira pevhu, yeeyi kwa tjanga va tjanga asi: Age nga tuma vaengeli vendi va ku kaure.’ Nye Jesus ta mu limburura pokuruganesa Matjangwa asi: ‘Kwa tjanga va tjanga asi walye o heteke Jehova.’

Satana makura ta ka likida Jesus mauntungi gouzuni nomaufuuli gamo. Ta mu tantere asi: ‘Nayinye eyi ono kumona ngano nani yi ku pa, nsene o twa nongoro pevhu o tongamene nge.’ Jesus ta mu limburura asi: ‘Zende kwina, Satana, yeeyi kwa tjanga asi, Jehova gelike no karera a huru.’

Muzonaguli ta tundu po, ano vaengeli tava wiza tava ya mu pe nondya a lye. Kutunda opo, Jesus ta zuvhisa mbudi zongwa zoUhompa. Aso yiso sirugana va mu tuminine pevhu a ya rugane. Vantu kwa here eyi nga va rongere Jesus makura tava mu kwama nkenye oku ga zire.