Egaununo 13
Kulirongera ko komaheteko gaJesus
JESUS kwa pwa tupu kumukuhwa, makura mpepo zaKarunga tazi mu twara mosirongo somburundu moJudeya. Age ga hepere kugazara ko yoyinzi, morwa pekuho lyendi ‘eguru kwa mu zegurukilire’ yipo a vhure kudiworoka yininke yemeguru. Yosili, ga hepere kuteda ko unene.
Jesus ga kere mazuva 40 nomasiku 40 momburundu ga hana kulya. Makura apa za mu kwete Jesus nzara zonene, Muzonaguli ta heda kwendi a mu heteke, ta ninki asi: “Nsenesi o MunwaKarunga, ninka mamanya aga, ga lisitunuke nomboroto no.” Nye Jesus ga yi divire asi ayo epuko mokuruganesa nonkondo dendi pasitetu mokuhafesa madowo gendi. Yipo nye, ga nyokere pokumuheteka.
Nye Muzonaguli kapi ga hagekere. Ta hetekere ko hena kuruganesa nkedi zapeke. Ta heteke Jesus asi a vatuke kontembeli yipo vaengeli vaKarunga va mu kaure. Nye Jesus kapi ga hetekere kurugana sitetu sangoso sokulimonekesa. Jesus ta temwinine Matjangwa mokulikida asi ayo epuko kuheteka Karunga monkedi ezi.
Meheteko lyautatu, Muzonaguli ta likida Jesus mauntungi gouzuni nagenye monkedi zokutetukisa nokumutantera asi: “Nayinye eyi ono kumona ngano nani yi ku pa, nsene o twa nongoro pevhu o tongamene nge.” Nye Jesus ga nyokere hena mokugwira meheteko lyokurugana yininke yepuko, ta tokora mokukara ngorooro noulimburukwi kwaKarunga.
Kuvhura nose tu lirongere ko komaheteko gaJesus. Pasihonena, ago kulikida asi Satana age muntu mwene-mwene ogu a dili kumoneka, kapisi ngwendi moomu ava mu gazarere vantu vamwe asi sikara tupu sosidona. Omu va hetekere Jesus kulikida hena asi mapangero nagenye gouzuni kuna kara goMuzonaguli. Ngano mapangero kapi ga kere sili momawoko goMuzonaguli, ngano kapi lya kere nye eheteko kwaJesus.
Gazadara ko kweyi asi: Muzonaguli ga liwapaikilire mokufuta Jesus nsene a mu tongamena, nampili mokumupa mauntungi nagenye gouzuni. Muzonaguli kuvhura kutuheteka monkedi zokulifana, nampo pokutupa nompito dokuhuguvaresa yipo tu gwane ungawo nononkondo ndi noyipundi yokuzeruka yomouzuni. Nye, hansa kulikida nondunge nokukwama sihonena saJesus pokulimburukwa kwaKarunga mwankenye maheteko! Mateusa 3:16; 4:1-11; Marukusa 1:12, 13; Rukasa 4:1-13.
▪ Yininke musinke eyi ga tedere Jesus apa ga kere mazuva 40 momburundu?
▪ Ngapi omu ga hetekere Muzonaguli Jesus?
▪ Yinke natu vhura kulirongera ko komaheteko gaJesus?