Yisinke Uhompa waKarunga?

“Mbudi zoNgwa ezi zoUhompa waKarunga . . . ”—MATEUSA 24:14.

PEUDISO lyendi lyopoNdundu, Jesus kwa geve ekanderero lyosihonena, omu mwa hamena ehundiro eli kwaKarunga asi: “Uhompa woge au wize.” Mamiliyona govantu kwa kwata ekanderero eli momutwe nokulirugurura nkenye apa. Buke zimwe kwa tanta asi: “Alyo kuna kara ekanderero eli ava ruganesa vantu wovanzi momaukarelikarunga gawo.” Nye, wovanzi ava ava li rugurura kapi va diva asi yisinke Uhompa ndi neyi ngau ya rugana apa ngau wiza.—Mateusa 6:9, 10.

Kapi tayi tu tetura oyo, morwa vampitisili wonongereka kugava mafatururo gokulilimba-limba gokupukisa goudigu kuhamena Uhompa. Mugara gumwe kwa tjenge asi Uhompa waKarunga kuna kara “sininke sononkondo unene, . . . esi sa likwatakana naKarunga gomunamwenyo . . . , sininke omu nava gwanena eparuro vagara novakadi.” Gumwe kwa singonona Uhompa asi “erongo kuhamena ngereka.” Ano buke zimwe kwa tanta asi: “Uhompa waKarunga kuna kara uhungami nombili noruhafo atu gwana moMpepo zoKupongoka.”—The Catholic Encyclopedia.

No ka gwana efatururo lyewa pepenuno 2 lyosifo esi. Kutanta asi: “Uhompa waKarunga, kuna kara epangero lyemeguru, eli ngali ka hagekesa po maudona nagenye ntani nokukarundurura evhu li ka kare paradisa.” Tu zeni tu ka konakone omu Bibeli za kwatesa ko egano olyo.

Vapangeli wokomeho evhu nalinye

Uhompa kuna kara epangero eli a pangere hompa. Ano Hompa goUhompa waKarunga kuna kara Jesus Kristusa ogu va vhumbwire koufe. Etumbo lyendi moupangeli wemeguru kwa li singonwene memoneko eli ga mwene muporofete Ndaniyera, ogu ga tjenge asi: “Memoneko eli masiku, tani mono yuma yokufana ngwendi muntu [Jesus]. Age kwa hederere nge, ago maremo kuna mu kundurukida, ta zi kogu ga kerera po narunye [Jehova Karunga], ta ka kara komeho zendi. Makura tava mu pe epangero nefumano nononkondo dosiuhompa, asi vantu wonomuhoko nadinye nomarudi nomaraka nagenye va mu ruganene. Epangero lyendi ngali karerera, ano untungi wendi kapi ngau haga po.”—Ndaniyera 7:13, 14.

Buke zaNdaniyera kwa likida hena asi Uhompa ngau tura po Karunga, awo ngau gusa po mapangero nagenye govantu ano awo kapi ngava u pinganesera po. Egaununo 2 kwa singonona nzodi ezi ga rotere hompa gwaBabironi, omu ga mwene efano, eli lya fanekesere mapangero gomouzuni. Muporofete Ndaniyera kwa fatwilire nzodi ozo. Age kwa tjenge asi: “Komazuva gopouhura . . . Karunga gemeguru nga ka tura po uhompa umwe ou ngava dira kuzonagura konomvhura nadinye. Mpili epangero lyawo kapi ngava li gava kovantu nawopeke; nye awo ngau ka ndembagura po . . . mauhompa aga nagenye, awo ngau ka sikama narunye.”—Ndaniyera 2:28, 44, Bibeli zoRutjadi.

Hompa goUhompa waKarunga kapi nga pangera gelike. Apa ga kere Jesus pevhu, age kwa tumbwidilire vapositoli vendi wovalimburukwi kumwe navamwe asi ngava va vhumbwira keparu lyemeguru nokukahingira poyipundi yoUhompa. (Rukasa 22:28-30) Age kapi ga tembe yipundi yene-yene, morwa Jesus kwa tente asi Uhompa ngau kara meguru. Bibeli kusingonona owo ngava ka pangera naJesus asi ngava tundilira ‘momazimo nomomaraka nomonomuhoko nadinye nomomarudi nagenye.’ Awo ngava kara “ohompa novapristeli vaKarunga gwetu, ava ngava pangera ngohompa evhu nalinye.”—Ehororo 5:9, 10.

Eyi mbudi zoUhompa zina karere zongwa

Koneka asi Jesus Kristusa kwa mu pa upangeli wokupangera “vantu wonomuhoko nadinye nomarudi nomaraka nagenye” ntani ava ngava ka lipakerera kumwe nendi ngava ka ‘pangera ngohompa evhu nalinye.’ Wolye nye ava ngau ka pangera Uhompa ou? Vaava vana kupurakena nawa kombudi zongwa ezi vana kuzuvhisa naina. Kwa kwatera mo hena owo ngava ka vhumbwira keparu lyepevhu nokukakara nomeho zokukaparuka narunye.

Bibeli kwa singonona nawa mauwa aga ngava ka hafera vantu moUhompa. Aga yigo mauwa gamwe:

“Age kwa hageka yita mouzuni mudima; ga tezagura mauta, yiyo ga haraganesa magonga, yilikandwiso yiyo ga yi hwika momundiro!”—Episarome 46:9.

“Vantu ngava litungira mambo omu ngava kara – nagumwe si ogu nga va ruganesa. Awo ngava tapeka moyipata, tava lipanda vhinyu – azo kapi ngava zi nwa vapeke.”—Jesaya 65:21-22.

“Karunga nga kokota mahodi nagenye komeho gawo. Nomfa kapi hena ngadi kara ko, neguwo si nomalirankali nokukora kapi ngayi kara ko hena, yeeyi yininke yomuhowo yina dimi po.”—Ehororo 21:3, 4.

“Vatwiku ngava vhura kumona ko noyipurupuru ngayi zuvha ko. Yirema yomondambo ngayi lidinkura tayi dana, ano yipurupuru ngayi dimba unene.”—Jesaya 35:5, 6.

“Siruwo ngasi wiza, apa ngava zuvha ezwi lyendi navenye ava va kara monontoko, makura tava pwaga mo: ava va rugana yoyiwa, va vhumbukire mwenyo gwanarunye.”—Johanesa 5:28, 29.

“Valinunupiki yiwo ngava hingira sirongo, awo ngava hafera mpora zonene.”—Episarome 37:11.

Yosili ozo kuna kara mbudi zongwa! Mokugwederera ko, esikiliromo lyomauporofete goBibeli kuna kulikida asi siruwo pepi sina kara yipo Uhompa u ka pangere mouhungami evhu nalinye.