Lirongera ko koNonkango daKarunga

Ngapi omu epata lyoge nali kara noruhafo?

Sirongwa esi kwa tumbura mapuro gamwe aga nampo wa lipura nokukakulikida asi kupi oku no vhura kuresa moBibeli zoge o gwane malimbururo. Nombangi daJehova nava ka yi hafera pokukazogera kumwe nove malimbururo ogo.

1. Morwasinke kukwara paveta ayi retere ruhafo mepata?

Jehova, Karunga goruhafo yige mutoti gononkwara. Kukwara paveta mulyo morwa ayo kugamena elikwatakano lyovalikwali ntani kuvatera mokurera nawa vanona. Ngapi Karunga a tara nonkwara? Age kwa hara asi nonkwara di kare malikwatakano gokukarerera gopaveta. (Rukasa 2:1-5) Karunga kwa hara asi mugara nomukadi va fumadeke nonkwara. (Vahebeli 13:4) Kuhondera yizo zelike konda ga pulisira Jehova Vakriste mokulizumba nokukakwara hena.—Resa Mateusa 19:3-6, 9.

2. Ngapi omu valikwali va hepa kulitekura?

Jehova kwa ungire mugara nomukadi va ruganene kumwe. (Genesis 2:18) Ngomutwe gepata, mugara ga hepa kupakera mbili epata lyendi nokuvaronga kuhamena Karunga. Ga hepa kuhara unene mukadendi. Mugara nomukadi ava va likwara va hepa kulihara nokulifumadeka. Mokumona asi awo kapi va sikilira mo, va hepa nye kulironga kuligusira po morwa ayo kureta ruhafo mononkwara.—Resa Vaefeso 4:31, 32; 5:22-25, 33; 1 Peturusa 3:7.

3. Kuvhura kuligaunuka nsene mwato ruhafo mononkwara ndi?

Nsene nove nomulikwali goge kuna kuligwanekera nomaudigu, kondjeni mokulitekura neharo. (1 Vakolinte 13:4, 5) Nonkango daKarunga kapi da uyunga asi eligaunuko yizo nkedi zokukohonona po maudigu gomononkwara. Nye momaukaro gomadigu, Mukriste ga hepa kutokora nsene tava ligaunuka ndi hawe.—Resa 1 Vakolinte 7:10-13.

4. Vanona, yisinke ana mu harere Karunga?

Jehova kuna mu harere mu hafe. Age kugava mavyukiso gomawa omu nomu hafera udinkantu weni. Age kuna hara mu gwanene mo uwa mounongo noudivi wovakondi veni. (Vakorosi 3:20) Jehova kumuhafesa ulimburukwi weni kovakondi veni.—Resa Muudisi 11:9–12:1; Mateusa 19:13-15; 21:15, 16.

5. Vakurona, yisinke va hepa vana veni va kare noruhafo?

Mwa hepa kurugana unene mokurandera vana veni nondya noyidwara. (1 Timoteusa 5:8) Nye mokuninka asi va kare noruhafo, mwa hepa hena kuvaronga va hare Karunga nokumuhonena. (Vaefeso 6:4) Sihonena seni sokuhara Karunga ngasi kundama vana veni. Nsene mu va ronga kuliza noNonkango daKarunga, erongo olyo ngali vatera vana veni monkedi zongwa.—Resa Deuteronomium 6:4-7; Yisewe 22:6.

Vanona kugwanena mo uwa nsene mu va korangeda nokuvapandadeka. Va hepa hena kuvapisura nokuvavyukisa. Erongo lyangoso kupopera munona konkareso zondona. (Yisewe 22:15) Nye, mwa ha va pisura monkedi zonyanya.—Resa Vakorosi 3:21.

Nombangi daJehova kwa tjanga nobuke edi nadi vatera vakurona novanona. Magano gomonobuke odo kwa tunda moBibeli.—Resa Episarome 19:7, 11.

Komauzera gomanzi tara egaununo 14 mobuke Yinke azi rongo Bibeli sili?, ezi va nduruka Nombangi daJehova.