Sikora zoUkareli
Sitambo: Kudeura vazuvhisi va kare varongi wovawa wombudi zongwa.
Siruwo: Kutwikira ngorooro.
Evega: PoSinyanga soUhompa somomukunda.
Yihepwa: Navenye ava ava wiza nkenye apa komapongo, ava va tambura marongo goBibeli nokuparuka kuliza nonompango dazo.
Omu no lihameka mo: Mutareli goSikora zoUkareli kutjanga varongwa ava nava lihameka mo.
Sharon, ogu ana kara sirema, kwa tanta asi: “Sikora soUkareli kwa ronga nge omu nani rugana mapaparo nokugava nombudi monkedi zokuliza. Ame na lironga hena kudemenena koyihepwa yopampepo yava wopeke, kapisi yanyamwange tupu.”
Arnie, mutareli gokundingura, kwa tanta asi: “Ame kwa reta nge nosikokoma, ano ayo kwa karerere nge udigu kuuyunga nawa nava wopeke. Sikora ezi za vatera nge ni lizuvha asi name mulyo. Nevatero lyaJehova kupitira medeuro eli, na lironga omu nani vhura kuhesera nokudemenena kweyi nani uyunga. Ame nina hafa sili kevhuliko lyokutanga Karunga mombungakriste nomoyirugana yokuzuvhisa.”
Sikora zoVabeteli wovape
Sitambo: Mokuvatera wovape yipo yi va tompoke mosirugana sawo somoBeteli.
Siruwo: Nominute 45 nkenye sivike moyivike 16.
Evega: Beteli.
Yihepwa: Ga hepa kurugana moBeteli ndi mulizambeli gosiruwo sosisupi ogu va tambura a rugane koBeteli mvhura zimwe ndi kupitakana opo.
Omu no lihameka mo: Vabeteli navenye wovape yiwo ava litjangesa.
Demetrius, ogu ga lihamekere mosikora ezi mo-1980, kwa tanta asi: “Sikora ezi kwa wapukurwire nkareso zange zelirongo ntani kwa vaterere nge ni liwapaikire kurugana moBeteli siruwo sosire. Varongi nelikwamo nepukururo lyoparugano kwa ninkisire nge ni nongonone asi Jehova kupakera nge mbili ntani asi age kwa harere nge sirugana sange somoBibeli si tompoke nge.”
Kaitlyn, kwa tanta asi: “Ame kwa vatera nge ni demenene kurugana yininke moomu ga yi harera Jehova. Sikora zoVabeteli wovape kwa vatera nge ni likide rupandu kwaJehova nokonzungo zendi nokombunga zendi.”
Sikora zoyirugana yoUhompa
Sitambo: Mokudeura vatareli wokudingura novakuronambunga ano poyiruwo yimwe vakwafimbunga yipo va pakere mbili yitumbukira yawo mombungakriste. (Yirug. 20:28) Kuzogera mo maukaro gantani ntani noyihepwa yomombungakriste. Sikora ezi kuzirugana konyima zonomvhura dongandi kuliza netokoro lyoMbungagendesi.
Siruwo: Monomvhura edi dantani sikora ozo vatareli wokudingura kuzirugana mazuva gavali noharufa ano vakuronambunga kuzirugana ezuva limwe noharufa ano vakwafimbunga ezuva limwe.
Evega: Kwa hwa kukarera poSinyanga soUhompa ndi soSigongi.
Yihepwa: Ga hepa kukara mutareli gokudingura ndi mukuronambunga ndi mukwafimbunga.
Omu no lihameka mo: Vakuronambunga novakwafimbunga wokuwapera kuvadivisa mutareli gonombunga. Mberewa zomutayi kuzigida vatareli wokudingura.
“Sikora ozo nampili ngomu azi zogere nombudi dononzi mosiruwo sosisupi tupu, azo kuvatera vakuronambunga va kare noruhafo ntani va ‘kare sigara’ mosirugana saJehova. Vakuronambunga wovape nava vanare kulironga va tarere nawa siunda ntani va lipakerere ‘kumwe moyigazo.’”—Quinn (konhi).
“Edeuro eli kutuvatera tu kwate egano yininke eyi ya likwatakana nepuro lyetu, nokuturondora yiponga, nokutupa magano goparugano tu pakere mbili siunda. Jehova ga kara nonkenda zokutuvatera.”—Michael.
Sikora zovazuvhisi wokukarerera
Sitambo: Kuvatera vazuvhisi wokukarerera va ‘sikise mo sirugana sawo.’—2 Tim. 4:5.
Siruwo: Yivike yivali.
Evega Etokoro kutundilira komberewa zomutayi, unene po kuziruganena moSinyanga soUhompa.
Yihepwa: Vaava va rugana uzuvhisi wokukarera mvhura zimwe ndi kupitakana opo.
Omu no lihameka mo: Vazuvhisi wokukarerera wokuwapera kuvapukurura mutareli gonombunga.
Lily (korulyo) kwa tanta asi: “Sikora ozo kwa vatera nge ni lididimikire maudigu gomoyirugana yokuzuvhisa naga gemeparu. Ntani na wapukurura nkedi zange zokulironga nokuronga nomu ani ruganesa Bibeli. Kwa wapaika nge ni vatere wopeke nokukwatesa ko vakuronambunga, nokugwederera kekuro lyombungakriste.”
Brenda ogu ga lihameka mosure ozo yikando yivali kwa tanta asi: “Azo kwa vatera nge ni lihameke unene koyininke yopampepo nokunkondopeka ezwi lyange lyokomutjima nokudemenena kuvatera wopeke. Yosili, Jehova mugavi!”
Sikora zovakuronambunga
Sitambo: Mokuvatera vakuronambunga va pakere nawa mbili yitumbukira yawo yomombungakriste nokunkondopeka elikwatakano lyawo naJehova.
Siruwo: Mazuva gatano.
Evega: Etokoro kutundilira komberewa zomutayi, unene po kuziruganena moSinyanga soUhompa ndi soSigongi.
Yihepwa: Ga hepa kukara mukuronambunga.
Omu no lihameka mo: Vakuronambunga kuvadivisa mberewa zomutayi.
Koneka makumbururo gavamwe ava va kere mosure ozo zo-92 moAmerika:
“Na gwanena mo mauwa, nokuvatera nge ni likonakone nyamwange nomu nani pakera mbili nonzwi daJehova.”
“Ame nina liwapaikire kukorangeda navenye pokuruganesa yitwa yomoMatjangwa.”
“Ame ngani ruganesa edeuro eli meparu lyange nalinye.”
Sikora zovatareli wokudingura novakadi vawo
Sitambo: Mokuvatera vatareli wonombunga nava wonomukunda va vatere nawa nombungakriste ‘mokurugana unene mokuudisa nomokuronga.’—1 Tim. 5:17; 1 Pet. 5:2, 3.
Siruwo: Makwedi gavali.
Evega: Etokoro kutundilira komberewa zomutayi.
Yihepwa: Ga hepa kukara mutareli gonombunga ndi gonomukunda.
Omu no lihameka mo: Vatareli wokudingura novakadi vawo kuvadivisa mberewa zomutayi.
“Rupandu rwetu koupangeli waJesus mombunga zaJehova kwa ligwedererere. Twa dimbwilire hepero zokukorangeda vanavazinyetu ava va kara mepakero mbili lyetu nokunkondopeka uumwe mwankenye mbungakriste. Sikora ozo kwa tu likidire nawa-nawa asi, nampili ngomu mutareli gokudingura kugava epukururo nevyukiso poyiruwo yimwe, sitambo sendi sosinene kuna kara sokuvatera vanavazinyetu va dimburure asi Jehova ga va hara.”—Joel, ogu ga kere mosure zo-1, 1999.
Sikora zoBibeli zovagara wovadike
Sitambo: Mokuwapaikira vakuronambunga novakwafimbunga wovadike koyitumbukira yimwe mombunga zaJehova. Sinzi sowo ava gwana edeuro olyo kuvatuma oku kuna kara hepero mosirongo sawo. Vamwe wovasesu kuvatuma koyirongo yapeke nsene va divisa mberewa zomutayi asi vana hara kukakerera kosirongo sapeke. Vamwe ava va gwana edeuro olyo kurugana karuwogona uzuvhisi wosiruwo nasinye va ka tameke nokutamununa sirugana konomukunda dokulikarera da kara ure.
Siruwo: Makwedi gavali.
Evega: Etokoro kutundilira komberewa zomutayi, unene po kuziruganena moSinyanga soSigongi ndi soUhompa.
Yihepwa: Munazinyetugara gomudike gonomvhura dokutamekera 23 dogoro 62, ogu ga kara noukanguki wouwa ana hara kukaruganena vanavazina noku kuna hepa vazuvhisi woUhompa. (Mar. 10:29, 30) Va hepa kukara vakuronambunga ndi nomvhura mbali mositumbukira soukwafimbunga nokukara hena vazuvhisi wokukarerera nomvhura mbali.
Omu no lihameka mo: Epongo lyowo vana hara kukahamena mo mosikora ozo kulirugana posigongi somazuva gavali.
Rick, ogu ga kere mosure zo-23 moAmerika kwa tanta asi: “Kupitira mosure ezi, mpepo zaJehova za rundurura eparu lyange. Nsene Jehova ta ku pe situmbukira, age ta ku vatere mosirugana oso. Ame na lirongere asi nsene ni demenena kompango zaKarunga, age nga nkondopeka nge.”
Andreas, ogu a ruganene moNdovesiranda kwa tanta asi: “Ame na lironga asi monkedi omu azi rugana mbunga zaKarunga naina kuna kara sitetu. Edeuro olyo lya vatera nge ni liwapaikire kosirugana sokomeho. Ntani hena yihonena yoyinzi yomoBibeli kwa ronga nge usili ou womulyo: kuruganena vanavazinyetu naJehova kutwaredera koruhafo rousili.”
Sikora zoBibeli zovalikwali
Sitambo: Kugava edeuro lyokulikarera kovalikwali yipo a va ruganese Jehova nombunga zendi. Sinzi sowo ava gwana edeuro olyo kuvatuma oku kuna kara hepero mosirongo sawo. Vamwe wovasesu kuvatuma koyirongo yapeke nsene vene vana hara kukakerera koyirongo oyo. Vamwe ava gwana edeuro olyo kurugana karuwogona uzuvhisi wosiruwo nasinye va ka tameke nokutamununa sirugana konomukunda dokulikarera da kara ure
Siruwo: Makwedi gavali.
Evega: Sikora ezi kuziruganena moAmerika, ntani ketamekero lyaSitarara 2012 ngazi ka karera hena komavega aga ngava horowora, unene po moSinyanga soSigongi ndi soUhompa.
Yihepwa: Valikwali wonomvhura dokutamekera 25 dogoro 50, ava va kara noukanguki wouwa vana hara kukakarera oku kuna kara hepero ntani va kara nonkareso ezi asi: “Nyame ogu, tuma nge!” (Jes. 6:8) Ntani va hepa kukara mononkwara kupitakana nomvhura mbali ntani kwa kara mosirugana soUhompa sosiruwo nasinye kupitakana nomvhura mbali va hana kuhageka. Mugara ga hepa kukara mukuronambunga ndi nomvhura mbali mositumbukira soukwafimbunga.
Omu no lihameka mo: Epongo lyowo vana hara kukahamena mo mosikora ozo kulirugana posigongi somazuva gatatu. Nsene mosirongo seni kapi ava rugana epongo olyo posigongi oso nye ono hara kutura mo ehundiro, kuvhura o tjangere komberewa zomutayi komauzera gomanzi.
“Yivike oyo ntantatu kwa rundwilire eparu lyetu ntani kwa kere mpito zongwa kovalikwali ava va here kurugana unene mosirugana saJehova! Ose kuna tokomene kukara nehetakano meparu yipo tu ruganese siruwo setu monaruwa.”—Eric naCorina, (konhi) womosure zo-1, 2011.
[Kakende pepenuno 17]
Sikora zoBibeli zaGiliyata
Sitambo: Mokudeura varongwa va ka ruganene konomukunda dapeke ngovatumwa oku kwa kara vantu wovanzi ndi va kare vatareli wokudingura ndi Vabeteli. Sitambo sokunkondopeka nokupameka nomukunda nonomberewa domutayi.
Siruwo: Makwedi gatano.
Evega: KoWatchtower Educational Center, moPatterson, New York, moAmerika.
Yihepwa: Valikwali ava va kara nare mosirugana soUhompa sosiruwo nasinye, kutanta asi womosirugana soutumwa ava va dira kuza simpe kosikora ozo ndi vazuvhisi wosiruwo nasinye ndi vatareli wokudingura ndi Vabeteli. Va hepa kukara mosirugana sosiruwo nasinye kupitakana nomvhura ntatu va hana kuhageka. Va hepa kuuyunga nawa Ruingilisa nokururesa nokurutjanga.
Omu no lihameka mo: Valikwali kuvadivisa Komitiye zomutayi va ture mo mahundiro.
Lade naMonique wokoAmerika ngesi awo kuna kuruganena moAfrika. Lade kwa tanta asi: “Sikora zaGiliyata kwa tu wapaika tu ze nkenye oku mouzuni, nokukara tuna liwapaikire mokurugana kumwe novanavazinyetu.”
Monique kwa gwederera ko asi: “Ngomu nina kutura pasirugana eyi na lironga moNonkango daKarunga, ame kugwana ruhafo rorunene mosirugana sange. Ame na yi dimburura asi ruhafo kuhorora eharo lyaJehova.”
Sikora zava womoKomitiye zoMutayi novakadi vawo
Sitambo: Mokuvatera owo ava rugana moKomitiye zoMutayi va pakere nawa mbili sirugana sokugendesa epata lyoBeteli, noyirugana eyi ayi kundama nombungakriste nokutarera yirugana yovatareli wonombunga nava wonomukunda. Awo hena kulironga kuhamena etoroko nenduruko nokutuma yimbapiratjangwa.
Siruwo: Makwedi gavali.
Evega: KoWatchtower Educational Center, moPatterson, New York, moAmerika.
Yihepwa: Munazinyetugara ga hepa kukara moKomitiye zoMberewa zomutayi ndi zoSirongo ndi kwa mu pa situmbukira oso.
Omu no lihameka mo: Vanavazinyetugara novakadi vawo kuvadivisa Mbungagendesi.
Lowell naCara, ava va kere mosure zo-25, ngesi kuna kuruganena moNigelia. Lowell, kwa tanta asi: “Ame kwa diworokesere nge asi nampili ni kare moyiviyauka ndi mosirugana esi va pa nge, twa hepa kurugana yininke monkedi ezi azi hafesa Jehova. Sikora ozo kwa tu ronga omu ya kara nomulyo mokuhonena eharo eli ga likida Jehova vakareli vendi.”
Cara, kwa gwederera ko asi: “Ame kwa teda ko koyuma eyi. Nsene kapi nina kufaturura monkedi omu nayi rerupira muntu a yi kwate egano, na hepa nyamwange kulironga sirongwa oso komeho ni ka si ronge wopeke.”