Ngapi omu Nombangi daJehova adi tara kuteza po nonkwara?
Ose kukwama eyi ezi uyunga ko Bibeli kuhamena nonkwara ntani elizumbo. Karunga kwa tura nonkwara yipo di karere pokatji komugara nomukadi. Konda zomomatjangwa zokuvhura kuteza po nonkwara kuna kara ruhonda.—Mateusa 19:5, 6, 9.
Nombangi daJehova kuvatera valikwali ava vana kuligwanekera nomaudigu mononkwara ndi?
Yimo, mononkedi dokusiga-siga:
Yimbapiratjangwa. Yimbapiratjangwa eyi kunkondopeka nonkwara nampili nonkwara edi adi moneka asi kapi nga di wapa hena. Pasihonena, tara yirongwa “Kulikida ehuguvaro mononkwara,” “Omu no gusira po,” ntani “Kutunga po hena ehugavaro mononkwara.” Moruingilisa
Mapongo. Koyigongi yezuva limwe, komapongo ntani koyigongi yomazuva gatatu ose kuzogera mapukururo gomoBibeli kuhamena nonkwara.
Vakuronambunga. Vakuronambunga kuvatera valikwali pokuvalikida matjangwa ngwendi Vaefeso 5:22-25.
Komeho valikwali woNombangi va lizumbe Vakuronambunga va hepa kukwatesa ko etokoro lyawo ndi?
Hawe. Nampili ngomu vakuronambunga ava va pura va vatere valikwali ava vana kara nomaudigu mononkwara dawo, awo kapi va kara nononkondo dokutantera valikwali eyi nava rugana. (Vagarata 6:5) Nye nampili ngoso, muntu ogu ana hara kulizumba pwahana konda zomomatjangwa kapi ana kara nemanguruko lyokukwara ko gumwe hena.—1 Timoteusa 3:1, 5, 12.
Ngapi omu Nombangi daJehova adi tara elizumbo?
Bibeli kukorangeda valikwali va kare kumwe nampili nonkwara dawo kapi dina kugenda po nawa. (1 Vakolinte 7:10-16) Sinzi somaudigu kuvhura kuga kohonona po pokukanderera, kutura pasirugana nompango domoBibeli ntani nokulikida eharo.—1 Vakolinte 13:4-8; Vagarata 5:22.
Nampili ngoso momaukaro gamwe ngwendi gaga gana kukwama ko Vakriste kuvhura kutokora nsene tava ligaunuka nomulikwali gwawo:
Nsene kapi a hara kupakera mbili epata lyendi.—1 Timoteusa 5:8.
Nsene kutoona mukwali ngwendi.—Episarome 11:5.
Nsene a tura upapempo wendi mosiponga. Pasihonena, mulikwali kuvhura a sinininke mbangi a teze po nompango daKarunga, ano ogu vana kutjilisa kuvhura a tokore kuligaunuka yipo a ‘limburukwe po Karunga ngomupangeli, nye kapisi vantu. .’—Yirugana 5:29.