Kondja o nkondopeke nonkwara doge

“Wokukwara tani va tantere – kapisi nyame, hompa.”—1 KOL. 7:10.

KUVHURA O FATURURE NDI?

Monkedi musinke Karunga a mangakana valikwali kumwe?

Ngapi Vakriste ava vana kara nomaudigu mononkwara nava va vatera vakuronambunga?

Ngapi omu natu tara nonkwara?

1. Ngapi omu Vakriste nava tara nonkwara, ntani morwasinke?

APA ava kwara Vakriste, awo kutumbwidira kwaKarunga, ano etumbwidiro lyawo va hepa kulitara asi mulyo. (Muud. 5:4-6) Mokumona asi age Mutoti gononkwara, yige a “mangakana” valikwali. (Mar. 10:9) Emangakano olyo mulyo kosipara saKarunga kupitakana noveta dosirongo kuhamena nonkwara. Vakriste va hepa kutara nonkwara ngamoomu a di tara Jehova, yi kare asi apa va kwere awo kwa kere vakareli vendi ndi hawe.

2. Mapuro musinke natu ka zogera mosirongwa esi?

² Nonkwara kuvhura kureta ruhafo rorunene. Nye yisinke no vhura kurugana nsene elikwatakano lyomononkwara mokuteka lina karere? Kuvhura kunkondopeka nonkwara edi dina hara kuteka po ndi? Evatero musinke lya kara po kowo vana zumbanesa mbili mononkwara?

NGADI KARA DORUHAFO NDI DOMAUDIGU?

3, 4. Yisinke nayi vhura kuhoroka nsene muntu a tura po matokoro gepuko pokuhorowora mulikwali?

³ Apa adi karerere nonkwara doVakriste, ado kureta ruhafo nomfumwa kwaJehova. Ano nsene di haga po, ado kureta ruguwo rorunene. Mukriste gomudike ogu a kwama mavyukiso gaKarunga nga tameka nonkwara dendi monaruwa. Nye, muntu ogu a tura po matokoro gepuko pokuhorowora mulikwali kuvhura kutwaredesa komaudigu nokoruguwo. Pasihonena, vadinkantu vamwe kulivandekera va hana kuliwapaikira koyitumbukira eyi ya kara mononkwara. Ano vamwe kugwana mulikwali kupitira moInterneta nokugenderera kuhwilira mononkwara edi adi dili kureta ruhafo. Vapeke kuhondera posiruwo selivandekero, nokutameka nonkwara dawo netateko lyedona ntani kudira kulifumadeka.

⁴ Vakriste vamwe kapi va kwara ‘paSikriste’ ano awo kuhepa koyitundwamo yoyidona morwa kukwara muhapuli. (1 Kol. 7:39) Nsene yiyo ono kuligwanekera nayo, kanderera kwaKarunga a ku vatere ntani a ku gusire po. Age kapi nga gusa po yitundwamo yepuko lyoge lyanare, nye nga vatera ava ava litezurura va lididimikire maudigu. (Epis. 130:1-4) Tokomena kuhafesa Jehova, ano ‘ehafo lyomwaHOMPA’ ngali kara nonkondo doge.—Neh. 8:10.

APA ELIKWATAKANO LYONONKWARA ALI KARA MOSIPONGA

5. Magazaro musinke va hepa kunyokera po valikwali vana kara nomaudigu mononkwara?

⁵ Ava ava ligwanekere nomaudigu mononkwara kuvhura va lipure asi: ‘Ni popere nonkwara dange ndi? Ndi walye hansa kuvhura ni gwane ruhafo nsene ni kwara gwapeke?’ Awo kuhara kulizumba novalikwali vawo nokugazara asi: ‘Nina hara kumanguruka! Tu lizumbe ndi? Nampili kapi pana kara konda zoPatjangwa zokulizumba, kuvhura ni ligaunuke nomulikwali gwange nokukahafera hena eparu ndi?’ Mevango lyokugazadara yininke oyo, Vakriste kurugana paapa va hulira va papare mavyukiso gaKarunga nokugakwama.

6. Yisinke adi tanta nonkango daJesus domwaMateusa 19:9?

⁶ Nsene Mukriste va mu zumba, age kapi ga kara nemanguruko lyokukakwara hena. Jesus kwa tente asi: “Ogu a zumbu mukadendi, nye pwa hana konda zehondero, a ka kware nagepeke, nonkwara a teza.” (Mat. 19:9) Ayo mulyo koMukriste a hundire Karunga a mu pe mavyukiso nsene kuna kugazara kuzumba mulikwali gwendi pwa hana konda zehondero.

7. Yisinke nava gazara vantu nsene di teka po nonkwara doMukriste?

⁷ Nonkwara edi adi haga po morwa kulizumba kuvhura kulikida asi muntu ogo kapi ana kara nelikwatakano lyewa naKarunga. Mupositoli Paurusa kwa pulire asi: “Muntu nsene yi mu puka yokugendesa nawa embo lyendi, omu na vhura nye kutekura mbungakriste zaKarunga ngapi?” (1 Tim. 3:5) Apa adi teka po nonkwara doVakriste, vantu kuvhura va gazare asi awo kapi ava kwama eyi ava zuvhisa.—Rom. 2:21-24.

8. Nsene valikwali woVakriste va tokora kuligaunuka ndi kulizumba, udigu musinke va kara nawo?

⁸ Valikwali woVakriste ava va tokora kuligaunuka ndi kulizumba pwa hana konda zopatjangwa, ngoso va kara noudigu melikwatakano lyawo naKarunga. Kuvhura yi kare asi gumwe ndi navenye kapi vana kutura pasirugana nompango domoBibeli. Nsene navenye kwa huguvara mwaJehova nonomutjima dawo nadinye, awo ngava vhura kupopera nonkwara dawo.—Resa Yisewe 3:5, 6.

9. Ngapi omu Vakriste vamwe va gwanena mo mauwa pokudira kuligaunuka novalikwali vawo?

⁹ Nonkwara dononzi edi da monekere ngwendi tadi teka po, mwaza siruwo kuyakara nonkwara doruhafo. Vakriste ava ava kara noudigu mononkwara nye va dire kutokora kuligaunuka, narunye kuyagwanena mo mauwa. Pasihonena, gazara eyi nayi vhura kuhoroka nsene mugara muhapuli. Mupositoli Peturusa kwa tjenge asi: “None si vakadi, omu limburukwe kovagara veni, asi vamwe mo ava va dira kupura nonkango daKarunga, ngayi va tezwilise po yikara yovakadi vawo, awo va hana kuuyunga, nsene va mona ukuhuki netjirokarunga lyeni.” (1 Pet. 3:1, 2) Morwa nkareso zongwa zomulikwali, muhapuli kuvhura a ya tambure usili. Vakriste ava ava popere nonkwara dawo pokudira kuligaunuka novalikwali vawo kufumandeka Karunga, ano epata lyawo nalinye kuvhura li gwanene mo mauwa.

10, 11. Maudigu musinke aga horoka mpamwe mononkwara, ntani evatero musinke na vhura kugwana Mukriste?

¹⁰ Morwa kuhara kuhafesa Jehova, sinzi soVakriste wovadike kuhorowora vapuli vakwawo va kare valikwali vawo. Nampili ngoso, maukaro kuvhura kurunduruka monkedi omu ava dili kuyindindira. Pasihonena, mulikwali kuvhura a zaruke. Ndi kuvhura a hageke kuza moyirugana yokuzuvhisa. Pasihonena, Linda,a muzuvhisi gomupampi nazinya geharo, apa yendi ga tamekere kurugana yininke yoyidona nokumugusa mo mombungakriste, age kwa lizuvhire asi kwato mutompo. Yisinke nava rugana Vakriste nsene nonkwara dawo kuna kumoneka ngwendi kwato mutompo?

¹¹ Kuvhura o lipure asi: ‘Ni twikire kuhetekera ko kupopera nonkwara dange yi kare asi maudigu musinke gana kuhoroka ndi?’ Kwato gumwe ogu na vhura kukutokwera po. Nye pwa kara nokonda donongwa deyi no hetekerera ko kupopera nonkwara doge. Vakriste ava ava lididimikilire maudigu gomononkwara morwa ezwi lyawo lyokomutjima awo mulyo kwaKarunga. (Resa 1 Peturusa 2:19, 20.) Kupitira moNonkango nomompepo zendi, Jehova nga vatera Vakriste ava ava kondjo va nkondopeke nonkwara dawo.

VA LIWAPAIKIRA MOKUKUVATERA

12. Ngapi omu ngava tu tara vakuronambunga nsene tu papara evatero lyawo?

¹² Nsene kuna kara nomaudigu gomononkwara, wa ha likata-kata kupapara evatero koVakriste ava va kura pampepo. Vakuronambunga awo vasita wosiunda, ano ngava yi hafera kukulikida mapukururo gaKarunga moBibeli. (Yirug. 20:28; Jak. 5:14, 15) Vakuronambunga ngava mu fumadeka nampili mu zogere nawo maudigu geni gomononkwara ndi mu va pure evatero. Awo ngava mu hara unene nokumufumadeka morwa vana dimburura asi muna hara kuhafesa Karunga.

13. Epukururo musinke atu gwana mo-1 Vakolinte 7:10-16?

¹³ Apa mulikwali ogu ga kwara muhapuli a pura evatero kovakuronambunga, awo kuvhura kuruganesa epukururo lyaPaurusa eli asi: “Wokukwara tani va tantere – kapisi nyame, hompa – asi: mukadi nokuzumba si yendi. Nye nsene a zumba yendi, a kare ngorooro udike ntani, ndi va lirugwide nayendi; ano mugara nage ga ha zumba mukadendi. . . . Ove mukadi ngapi omu wa diva asi ngo parura yoge? Ndi nyove mugara, ngapi omu wa diva asi ngo parura mukadoge?” (1 Kol. 7:10-16) Ee, ruhafo musi naru kara nsene mulikwali gomuhapuli a ya kara mukareli gwaJehova!

14, 15. Siruwoke Mukriste na tokora kuligaunuka nomulikwali gwendi, nye morwasinke ga hepera kukanderera koyuma oyo nokukonakona malizuvho gendi?

¹⁴ Nokonda musinke na vhura ‘kuzumbira’ mukadi goMukriste yendi? Vamwe kutokora kuligaunuka nsene mugara kuna kunyoka kupakera mbili epata. Ano vapeke kuligaunuka morwa valikwali vawo kuna kuvatoona unene nokutura eparu lyawo mosiponga ndi kapi vana kuvhura kukarera Karunga morwa kuvarwanesa.

¹⁵ Va lizumbe ndi hawe, olyo kuna kara etokoro lyomuntu mwene. Nye, Vakriste va hepa kukanderera kuhamena yuma oyo nokukonakona nawa malizuvho gawo. Pasihonena, Mukriste sili kapi ana kuvhura kukarera Karunga morwa erwaneso lyomulikwali gwendi gomuhapuli ndi mwene ana kudira kukara nkenye apa nelirongo lyanyamwendi lyoBibeli nokuza komapongo nokuzuvhisa ndi?

16. Morwasinke Vakriste nava dilira kugenderera kutura po etokoro lyokulizumba nomulikwali gwawo?

¹⁶ Mokumona asi elikwatakano lyetu naKarunga mulyo ntani twa hepa kulikida rupandu nokufumadeka uhwi wononkwara, kapisi tu genderere kutura po etokoro lyokulizumba nomulikwali gwetu. Ngovakareli vaJehova, ose twa kara nosinka kuhamena kupongora edina lyendi. Morwa oyo, kapi tuna hara kukumbangera mulikwali gwetu mokumuzumba morwa tuna hara kukakwara ko hena gumwe.—Jer. 17:9; Mara. 2:13-16.

17. Moukaro musinke natu vhura kutanta asi Karunga kwa tu zigidira mbili?

¹⁷ Mukriste ogu ga kwara muhapuli ga hepa kukondja kunkondopeka nonkwara dawo. Nye nampili ngoso, nsene kapi yina kumutompoka kupopera nonkwara dawo, Mukriste ga ha lizuvha unzoni nsene mulikwali gwendi gomuhapuli a tokora kumuzumba. Paurusa kwa tjenge asi: “Ogu ga dira kupura, nsene ana hara asi va lizumbe, kuvasiga tupu va lizumbe. Mweyi yangoso, a kare mugara ndi mukadi, kutupu esininiko. Yeeyi Karunga kwa tu zigidira mbili.”—1 Kol. 7:15.b

HUGUVARA MWAJEHOVA

18. Nampili kapi yina kukutompoka mokukondja o popere nonkwara doge, uwa musinke nau tunda mo mekondjo lyoge?

¹⁸ Nsene tuna kara noudigu mononkwara detu, twa hepa kukanderera tu gwane nonkondo nokuhuguvara mwaJehova nkenye apa. (Resa Episarome 27:14.) Konakona sihonena saLinda, ogu tuna tumbura nare. Nampili ngomu ga kondjere nomvhura dononzi a popere nonkwara dawo, nye moruhura va ya lizumbire. Ngoso age kulizuvha asi kwa hepekere tupu siruwo sendi ndi? Age kwa tanta asi: “Hawe. Ekondjo lyange kwa gava umbangi wouwa kovantu. Ame nina kara nezwi lyewa lyokomutjima. Mwanayinye, nomvhura odo kwa vaterere munwetu gomukadona a kwaterere kousili. Age kwa kura noupampi nokukara Mbangi zokuligava kwaJehova.”

19. Nsene ono litura mo mokupopera nonkwara doge, yisinke nayi vhura kuhoroka?

¹⁹ Mukadi goMukriste gedina Marilyn ana hafa asi ga huguvarere mwaKarunga nokukondja unene a popere nonkwara dawo. Age kwa tanta asi: “Ame kwa here kuligaunuka nayange morwa kapi nga pakere mbili epata ntani kwa tulire elikwatakano lyange naJehova mosiponga. Nye mugara gwange kwa kere mukuronambunga komeho a ya lihameke monongesefa dokudira kuzira mo. Age kwa tamekere kufaura komapongo, ntani twa ya hagekere kuzogera kumwe. Apa vateroriste va homwene sitata setu kwa tjilisire nge unene nokudigopera nge kukara kumwe nava wopeke. Makura yipo na ya yi dimbwilire asi name na kere mepuko. Yipo twa tamekere hena kuzogera kumwe nokutengwidira po elirongo lyetu lyepata nokuza komapongo. Vakuronambunga kwa tu vaterere unene. Nonkwara detu yipo da kere ngwendi donompe hena. Mwa za siruwo, mugara gwange yipo ga gwene hena yitumbukira mombungakriste. Aso sihorokwa sosidigu, nye yitundwamo kwa ya kere yokuhafesa.

20, 21. Yisinke tuna tokomene kurugana mononkwara detu?

²⁰ Tu kare asi tu vadike ndi twa kwara, tu kareni nouradi nokuhuguvara mwaJehova. Nsene tuna kara nomaudigu mononkwara detu, twa hepa kukondja tu ga kohonone po, pokudiworoka asi valikwali “kapisi vavali hena, hawe, awo rutu rumwe tupu.” (Mat. 19:6) Nsene tu dira kuligaunuka nomulikwali gwetu gomuhapuli nampili tu kare nomaudigu, ezuva limwe nampo ngatu hafa apa ngatu ya mu mona kuna kukarera Jehova.

²¹ U kare asi ukaro wetu musinke, twa hepa kurugana monkedi omu natu vhura kugava umbangi wouwa kovahapuli. Nsene tuna kara nomaudigu mononkwara ntani kuna kulizuvha asi tuna hara kuligaunuka nomulikwali gwetu, twa hepa kukanderera nokukonakona nawa nokonda detu nokupapara evatero kovakuronambunga. Mwanayinye, ngano tu tokomene kuhafesa Jehova Karunga mwankenye eyi nokulikida rupandu rokufumadeka uhwi wendi wouwa wononkwara.

[Nonkango dokonhi]

[Nonkango pepenuno 10]

Vakriste ava ava kara noudigu mononkwara nye va dire kuligaunuka, narunye kuyagwanena mo mauwa

[Nonkango pepenuno 12]

Huguvara mwaJehova nkenye apa nokumuhundira nonkondo

[Efano pepenuno 9]

Jehova kutungika valikwali ava ava kondjo va nkondopeke nonkwara dawo

[Efano pepenuno 11]

Womombungakriste kuvhura kuhengagwida nokuvatera pampepo