Vahompa vauvali
2 Apa ga here Jehova kutwara Eliya meguru kupitira mekundungu, Eliya naElisa tava tundu mo mositata saGiligali. 2 Eliya ta tantere Elisa asi: “Na kanderere kara paapa, morwa Jehova ana tumu nge ni ze koBeteli.” Nye Elisa ta tanta asi: “Ame tani gana kwaJehova Karunga goMunamwenyo ntani koge asi ame kapi nani kusiga.” Makura tava zi kumwe koBeteli. 3 Makura vana wovaporofete* womoBeteli tava wiza kwaElisa, tava mu tantere asi: “Ono yi diva asi neina Jehova ta twara hekuroge ntani kapi nga kara mupitisili goge ndi?” Elisa ta tanta asi: “Mweneni, na yi diva nare.”
4 Eliya ta mu tantere asi: “Na kanderere Elisa, kara paapa morwa Jehova kuna tumu nge ni ze koJeliko.” Nye age ta mu tantere asi: “Tani gana kwaJehova Karunga goMunamwenyo ntani koge asi ame kapi nani kusiga.” Makura tava zi koJeliko. 5 Vana wovaporofete ava va kere moJeliko tava zi kwaElisa, tava ka mu tantera asi: “Ono yi diva asi neina Jehova ta twara hekuroge ntani kapi nga kara mupitisili goge ndi?” Makura Elisa ta tanta asi: “Mweneni, na yi diva nare.”
6 Eliya ta tantere hena Elisa asi: “Na kanderere kara paapa morwa Jehova kuna tumu nge ni ze komukuro gwaJorodana.” Nye age ta mu tantere asi: “Tani gana kwaJehova Karunga goMunamwenyo ntani koge asi ame kapi nani kusiga.” Makura tava zi kumwe. 7 Ano vana wovaporofete 50, nawo tava va kwama ntani awo kwa sikeme koure va tarere Eliya naElisa ava va sikeme konontere domukuro gwaJorodana. 8 Makura Eliya ta gusa erwakani lyendi ta li dingi ntani ta li toona pomema. Ano mema taga ligaunuka pokatji, korulyo rwendi ntani nokorumoho. Makura mouvali wawo tava rutu, awo kwa gendere pevhu lyekukutu.
9 Apa va ka sikire mesinya mwina, Eliya ta tantere Elisa asi: “Hundira nge nkenye eyi ono hara ni ku ruganene komeho va guse nge poge.” Elisa ta tanta asi: “Na kanderere, pe nge ko mpepo zokupongoka zimwe ezi ga ku pa Karunga.” 10 Eliya ta limburura asi: “Ove kuna pura nge sininke soudigu. Nsene no mona nge apa nava gusa nge po, ayo nayi kuhorokera nye nsene kapi no mona nge, ayo kapi nayi kuhorokera.”
11 Ngomu va gendere awo kuna kusimwitira, va liharuka ko etemba nononkambe yokufana ngwendi mundiro tayi va piti pokatji, ano Eliya ta zi meguru kupitira mekundungu. 12 Ngomu Elisa ga tere, age kwa zigilire asi: “Tate! Tate! Tareni etemba lyomoIsraeli nomurondi gwalyo!” Apa ga dongonokere momeho gendi, ta gusa erwakani lyendi, ta li taura pokatji. 13 Konyima, ta damuna erwakani lyaEliya eli lya mu gwire, makura ta tengura a ka sikame konontere domukuro gwaJorodana. 14 Ta gusa erwakani lyaEliya eli lya mu gwire, ta li toona pomema, ta tanta asi: “Kupi ana kara Jehova Karunga gwaEliya?” Apa ga toonene pomema, ago taga ligaunuka pokatji, korumoho rwendi nokorulyo makura Elisa ta rutu.
15 Apa va mu mwene vana wovaporofete womoJeliko koure, tava tanta asi: “Mpepo ezi ga kere nazo Eliya zina zi kwaElisa.” Makura awo tava zi kwendi, tava ka linyongamena komeho zendi. 16 Awo tava mu tantere asi: “Ose tuna kara novagara wononkondo 50, tuna kanderere va pulisira va ze va ka papare hekuroge. Nampo mpepo zaJehova kuna mu damuna zi ka mu zugumine kondundu ndi momuramba gumwe.” Nye Elisa ta va tantere asi: “Mwa ha va tuma.” 17 Nye awo tava mu sininike dogoro ta lizuvhu udona, makura ta tanta asi: “Va tumeni.” Awo tava tumu vagara 50 ano awo kwa ka mu paparere mazuva gatatu, nye kapi va ka mu gwene. 18 Apa va ka tengwire, tava ya gwana Elisa moJeliko. Makura age ta va pura asi: “Nani kapi na mu tanterere asi mwa ha za ko?”
19 Konyima zosiruwo, vagara womositata tava tantere Elisa asi: “Tate, none kuna kumona asi sitata esi kwa kara pevango lyewa, nye mema gamo madona ntani kapi a mu mene mbuto.”* 20 Makura Elisa ta va tantere asi: “Retereni nge rupasa rorununu rorupe ntani tureni po mungwa.” Makura awo tava ru mu retere. 21 Makura ta zi korunone romema, ta zugumine mo mungwa, ta tanta asi: “Jehova kuna kutanta asi: ‘Ame nina kuhura mema aga. Ago kapi ngaga ninkisa hena vantu va fe ndi vakadi va dire kureta.’”* 22 Ano mema ogo kwa ga kuhura dogoro naina, ngwendi moomu ga uyungire Elisa.
23 Kutunda opo, Elisa ta zi koBeteli. Monzira zendi, ta ligwanekere novamati ava va tundire mositata, tava tameke kumusindagura. Awo kwa tente asi: “Tunda po apa ove mugara gongwara! Tunda po apa ove mugara gongwara!” 24 Konyima, ta piruka a va tare, ta va fingi medina lyaJehova, makura mambungu gomakadi gavali taga tundu moyihwa, taga papagura po vanona 42. 25 Kutunda opo ta zi dogoro koNdundu zaKarumeli, ano konyima ta ka tengura koSamaliya.