MAPURO AGA AVA PURA VADINKANTU
Ngapi omu Bibeli nazi vatera nge?—Ruha 2: Tovareka ereso lyoge lyoBibeli
Will kwa tanta asi: “Nsene kapi wa diva kutovareka ereso lyoge lyoBibeli kuvhura yi ku sete usimbu.”
Ono hara kudiva omu no hafera ereso lyoge lyobibeli ndi? Sirongwa esi nasi kuvatera.
Mona momagano eyi ono kuresa
Litura mo nyamoge mweyi ono kuresa. Rugana eyi:
Horowora sihorokwa somoBibeli esi ono hara kulironga. Kuvhura o horowore sihorokwa simwe somoBibeli ndi sihorokwa simwe somoMavangeli ndi yidanauka yemereso lyoBibeli eyi ya kara kojw.org.
Resa sihorokwa oso. Kuvhura o si rese nyovelike ndi kumwe novakweni ndi nava vemepata. Gumwe kuvhura a rese ruha romusimwitili ano vakwawo maruha gava vana hamene mo mosihorokwa oso.
Heteka kuruganesa magano aga gana kukwama ko:
Faneka mafano geyi ya horokere mosihorokwa oso. Ndi faneka mafano gemesimwititi olyo kuliza nomu yihorokwa yamo ya likweme. Ruganesa mafano mokusingonona eyi yina kuhoroka mwankenye ruha.
Faneka karata. Pasihonena, ngomu ono kuresa muntu ogu ga limburukwire, gazara yikara noyirugana yendi yoyiwa ntani nomatungiko aga ga gwene.
Tjindja sihorokwa oso si kare sosipe. Gava mauzera nomutaro gokulisiga-siga, mu hamene “mapuragero” kumwe nava va hamenene mo ntani nava va yi mwene.
Nsene gumwe ogu ga hamenene mo kwa tulire po etokoro lyedona, gazara yitundwamo yokulisiga. Pasihonena, gazara Peturusa ogu ga patanene Jesus. (Marukusa 14:66-72) Ngano ngapi omu Peturusa ga fundire po makondjeso?
Nsene ono hara, kuvhura o tjange sidanauka sanyamoge esi nasi liza nosihorokwa somoBibeli. Mosidanauka esi no tjanga, hamesera mo yirongwa eyi ono lirongere ko.—Varoma 15:4.
Kuvhura o tovareke ereso lyoge lyoBibeli!
Rugana mapaparo!
Nsene o papara mauzera, ove ngo gwana maugawo aga ga horama mosihorokwa oso. Yosili, poyiruwo yimwe, mosihorokwa somoBibeli kuvhura va nkondopeke mo nkango ndi nonkango domulyo po.
Pasihonena, hetakanesa Mateusa 28:7 kumwe naMarukusa 16:7.
Morwasinke Marukusa ga tulira mo mauzera aga asi Jesus tava ka mu mona varongwa vendi “naPeturusa”?
Umbangi: Marukusa kapi ga kere po apa ya horokere eyi, nye age kwa gwene nombudi edi kwaPeturusa.
Ugawo wa horama: Ngapi omu Petutusa ya mu hengagwidire apa ga zuvhire asi Jesus ana hara kumumona? (Marukusa 14:66-72) Ngapi ga yi likidire Jesus kwaPeturusa asi age kaume gosili? Ngapi no honena Jesus ntani ngapi omu no kara kaume gosili kovakweni?
Ngo hafera ereso lyoBibeli nsene o li tura mo nyamoge mosihorokwa nokurugana mapaparo!