Vagara, one kulimburukwa koupangeli waKristusa ndi?

“Kristusa yige mupangeli gwankenye mugara.”—1 KOL. 11:3.

1. Yisinke ali likida asi Jehova age Karunga ogu ga dira kuhara epiagano?

EHORORO 4:11 kwa tanta asi: “Ove Hompa Karunga gwetu, uyerere nefumano nononkondo yoge, yeeyi nyove wa sita nayinye, ano mpango zoge yizo za pakesa po nayinye, yi pwe kusita.” Morwa yige ga sita yininke nayinye, Jehova Karunga age Mupangeli goMunene gwanayinye ntani yisitwa nayinye kwa kara mepangero lyendi. Jehova “Karunga kapi ga hara epiagano, mbili ga hara” eyi kuyimonenena monkedi omu ga wapaika epata lyendi lyovaengeli.—1 Kol. 14:33; Jes. 6:1-3; Heb. 12:22, 23.

2, 3. (a) Yilye ogu ga hovere Jehova kusita? (b) Malikwatakano musinke ga kara po pokatji koMbeli naGuhwe?

² Komeho zokusita yininke nayinye, age Karunga nare-nare ga kara po. Age kwa hovere kusita sisitwa sopampepo esi sa divikwa asi “Nkango” morwa aso kwa kere Muuyungili po gwaJehova. Yininke nayinye kwa ya yi sitilire kupitira moNkango. Konyima, za wizire pevhu ngomuntu gokusikilira mo ntani nokuyadivikwa asi Jesus Kristusa.—Resa Johanesa 1:1-3, 14.

³ Yisinke aga tanta ko Matjangwa kuhamena malikwatakano pokatji kaKarunga ntani noMbeli zendi? Kupitira megendeso lyompepo zokupongoka, mupositoli Paurusa kwa tjenge asi: “Ame kuna mu harere mu kwate egano lyeyi asi, Kristusa yige mupangeli gwankenye mugara, mugara mupangeli gomukadi, ano Karunga yige mupangeli gwaKristusa.” (1 Kol. 11:3) Kristusa kwa kara konhi zoupangeli woGuhwe. Mokuninka asi yisitwa yonondunge yi kare mombili nemegendeso lyewa, pwa hepa upangeli ntani noulimburukwi. Nampili mogu ‘va sitilire yininke nayinye’ nage ga hepa kulimburukwa koupangeli waKarunga.—Koros. 1:16.

4, 5. Ngapi omu ga lizuvhire Jesus kuhamena situmbukira sendi sokulimburukwa Jehova?

⁴ Ngapi omu ga lizuvhire Jesus kuhamena kulimburukwa koupangeli waJehova ntani nokuwiza pevhu? Matjangwa kwa tanta asi: ‘Jesus Kristusa nampili ngomu ga kere moukaro waKarunga, kapi ga sininikire mononkondo asi a hetakane naKarunga. Nye age kwa linunupikire, makura ta fana ngwendi musigona, kumutara muntuuntu. Age kwa linunupikire, ta limburukwa dogoro konomfa, nda dogoro nokonomfa [dokositji, NW] deedi.’—Fil. 2:5-8.

⁵ Moyiruwo nayinye, Jesus ga limburukwire nelinunupiko kompango zoGuhwe. Age kwa tente asi: “Nayimwe si eyi ani lifuminine kurugana mwanyamwange. . . . Ano mpanguro zange kwa hungama, yeeyi ame kapi ani kwama mpango zanyamwange, nye mpango zaTate ogu ga tuma nge.” (Joh. 5:30) Age kwa tente asi: “Ame kurugana nkenye apa eyi ga hara [Tate].” (Joh. 8:29) Kehagero lyeparu lyendi pevhu, Jesus kwa kanderere koGuhwe asi: “Ame na ku yererepeka pevhu. Ano sirugana esi wa pa nge ni si rugane, na si sikisa mo.” (Joh. 17:4) Yosili, Jesus kapi ga kere noudigu mokunongonona ntani nokutambura upangeli waKarunga.

Munwa ga gwanene mo mauwa pokulimburukwa koGuhwe

6. Yikara musinke yoyiwa eyi ga likidire Jesus?

⁶ Apa ga ya kere Jesus pevhu, age kwa likidire yikara yoyinzi yoyiwa. Moyikara oyo age kwa likidire eharo lyenene koGuhwe. Age kwa tente asi: ‘Ame kwa hara Tate.’ (Joh. 14:31) Age hena kwa likidire eharo lyenene kovantu. (Resa Mateusa 22:35-40.) Jesus kwa likidire nkenda nelituromo kovantu, kapi ga kere nonyanya ndi a linenepeke. Age kwa tente asi: “Wizeni kwange namuvenye, one ava wa rorora udigu, ni ya mu pwizumukise. Likambekeni ndjoko zange, mu lirongere nge po, yeeyi ame kwa gomoka, yiyo na linunupika momutjima, ngomu gwane rufuwo monomwenyo deni. Yeeyi ndjoko zange nderu, ano mudigo gwange kwa pepuka.” (Mat. 11:28-30) Vantu navenye wokufana ngwendi nonzwi, unene po owo ngava hepa va gwanene mo ehengagwido lyenene koyikara yoyiwa yaJesus ntani nokombudi zendi zokutumangeda.

7, 8. Kuliza noVeta zaMosesa, ngapi omu va mu tekwire mukadi ogu ga verere ruhonde, nye ngapi omu ga mu tekwire Jesus?

⁷ Koneka omu Jesus nga tekura vakadi. Monomvhura nadinye, vagara wovanzi kwa tekura vakadi momudona. Vampitisili womaukarelikarunga moIsraeli zanare yimo ngorooro ngava tekura vakadi. Nye Jesus nga tekura vakadi nefumadeko. Eyi kuyimonenena monkedi omu ga tekwire mukadi ogu ga verere ruhonde nomvhura murongo nambali. Age “nga hepa unene” kononganga oku lya pwililire emona lyendi. Nampili ngomu ga kondjere unene, uvera wendi ngwendi ‘kwau sangumwine.’ Kuliza noVeta zaMosesa, mukadi ogo kwa nyete pampo. Nkenye gumwe gokumuguma nage ta nyata pampo.—Lev. 15:19, 25.

⁸ Apa mukadi ga zuvhire asi Jesus kuna kuverura vaveli nage yipo ga zire aka lipakerere kumwe nombunga ezi za kundurukidire Jesus, mukadi ta uyunga asi: “Sinene tupu ni guma nampili kosikoverero sendi, nyame kuveruka.” Age ga gumine Jesus, naruvali si ta veruka. Jesus ga yi divire asi kapi ya wapa komukadi gwina mokuguma sikoverero sendi. Nye nampili ngoso, Jesus kapi ga mu handukililire. Age kwa likidire nkenda komukadi gwina. Jesus ga kwete egano omu ga lizuvhire mukadi ogo nomvhura nadinye odo douvera wendi ntani Jesus ga yi divire asi ga hepere evatero. Nonkenda, Jesus kwa tanterere mukadi asi: “Munwange, epuro lyoge lina ku parura, zende mombili, ove hena o veruke.”—Mar. 5:25-34.

9. Apa varongwa vaJesus va hetekerere ko kusilika vanona va wize kwendi, ngapi omu ga limbwilire Jesus?

⁹ Nampili vanona kwa va rerupililire kuhedera Jesus. Posikando simwe, apa vantu va reterere Jesus vanona, varongwa vendi kwa va silikire, nampo awo kwa gazarere asi Jesus kapi ana hara va mu donganese vanona. Nye Jesus kapisi yimo ga lizuvhire ngoso. Bibeli kututantera asi: “Apa ga yi mwene Jesus, ta va nyokere [varongwa], ta va tantere asi: ‘Sigeni vanona va wize kwange. Mwa ha va silika, yeeyi vangoso yiwo wa hamena Untungi waKarunga.’” Makura ‘Jesus ta dingilikida vanona mawoko gendi, ta ga va kambeke a va tungike.’ Jesus kapi ga ncenwine vanona, nye ga va tambwire neharo.—Mar. 10:13-16.

10. Ngapi omu Jesus ga gwene yikara eyi ga likidire?

¹⁰ Ngapi omu Jesus ga gwene yikara eyi ga likidire apa ga ya kere pevhu? Komeho zokuyakara muntu, age ga nomenenene oGuhwe vemeguru nomvhura dononzi ntani nokulirongera ko kwawo. (Resa Yisewe 8:22, 23, 30.) Apa ga kere meguru Jesus ga mwene omu Jehova a ruganesa upangeli wendi monaruwa koyisitwa yendi nayinye. Ngano Jesus kapi ga limburukwire, age ngano kapi ga lirongerere ko koGuhwe. Age ga yi haferere mokulimburukwa koGuhwe, ano Jehova ya mu hafesere mokukara noMuna gomulimburukwi. Apa Jesus ga ya kere pevhu, age ga likidire yikara yoyiwa yoGuhwe vemeguru. Ee, mfumwa musi kwetu mokulimburukwa Kristusa Mupangeli ogu ga tura po Karunga moUhompa wemeguru!

Honena yikara yaKristusa

11. (a) Yilye ogu twa hepa kuhonena? (b) Morwasinke vagara womombungakriste nava kondjera mokuhonena Jesus?

¹¹ Navenye ava va kara mombungakriste unene po vagara, va hepa kutwikira kurugana unene mokuhonena yikara yaKristusa. Ngwendi moomu vana yi tumbura petamekero, Bibeli kwa tanta asi: “Kristusa yige mupangeli gwankenye mugara.” Ngamoomu Kristusa ga honenene Mupangeli gwendi, Karunga gosili, vagara woVakriste va hepa kukondja mokuhonena mupangeli gwawo Kristusa. Apa ga ya kere mupositoli Paurusa Mukriste, nage ga rugene yokulifana. Age kwa tumangedere Vakriste vakwawo asi: “Omu honene nge ame, moomu ani honene name Kristusa.” (1 Kol. 11:1) Mupositoli Peturusa kwa tente asi: “Eyi yiyo va mu zigidira. Morwa naKristusa nyone ga hepera, yiyo ga mu sigira sihonena, mu rugane moomu nga rugana age.” (1 Pet. 2:21) Pwa kara hena konda zimwe zeyi vagara nava honenena Kristusa. Awo yiwo ava ya kara vakuronambunga novakwafimbunga. Ngamoomu Jesus ga gwene ruhafo mokuhonena Jehova, vagara woVakriste va hepa kugwana ruhafo mokuhonena Kristusa noyikara yendi.

12, 13. Ngapi omu vakuronambunga nava tekura nonzwi edi va va pa?

¹² Vakuronambunga mombungakriste kwa kara nositumbukira sokulironga va kare ngwendi Kristusa. Peturusa kwa pere vakuronambunga etumangedo eli asi: “Kareni vasita wosiunda saKarunga esi ga mu pa, si takameseni neharo, moomu ga yi mu harera Karunga, nye kapisi komusininiko. Omu rugane yirugana yeni, kapisi morwamfuto za nyata, nye neharo lyewa lyokurugana. Walye omu kara ohompa vava va mu pa asi mu va takamese, kareni sihonena kombunga.” (1 Pet. 5:1-3) Vakuronambungakriste kapisi va kare nonyanya ndi va tekure momudona siunda. Mokuhonena Kristusa, awo va hepa kukondja mokutekura neharo nonkenda ntani nelinunupiko nonzwi edi va va pa.

¹³ Ava ava pitisire mombungakriste kuna kara vagara wokudira kusikilira mo, ntani awo nkenye apa va hepa kuyidiva oyo. (Rom. 3:23) Yipo nye, awo va hepa kukara neharo mokulironga kuhamena Jesus ntani nokuhonena eharo lyendi. Awo va hepa kugazadara ko monkedi omu Karunga naKristusa ava tekura vantu ntani va kondjere mokuvahonena. Peturusa kwa tu tumangeda asi: “Namuvenye momalikaro geni omu linunupike, yeeyi ‘Karunga kwa nyenga valinenepeki, nye valinunupiki age kuvafira nkenda.’”—1 Pet. 5:5.

14. Ngapi omu vakuronambunga nava likida efumadeko kwava wopeke?

¹⁴ Mokuruganena kumwe nosiunda saKarunga vakuronambungakriste va hepa kulikida yikara yoyiwa. Varoma 12:10 kutanta asi: “Omu lihare-hare neharo lyosiumbya lyomwaKristusa. Omu gave sihonena sokulifumadeka-fumadeka.” Vakuronambunga novakwafimbunga kulikida efumadeko kwava wopeke. Ngwendi Vakriste navenye, vagara ava ‘kapisi va rugane yuma mokulitara tupu pwavene ndi mokupapara efumano lyomawoko-woko. Nye ava linunupike, nokutara vakwawo asi va va pita mekuto.’ (Fil. 2:3) Vagara ava ava pitisire va hepa kutara vakwawo asi va va pita mekuto. Nsene va yi rugana oyo, awo kuna kukwama epukururo lyaPaurusa asi: “Ano ose ko ava tuna koro mepuro, atu kwafeni varupiranonkondo momaudigu gawo, kapisi tu lipakere mbili nyamwetu nyoselike. Nkenye ogu a pakere mbili mukwawo mokumuruganena uwa asi a kure mepuro. Yeeyi naKristusa si kapi ga lipakerere mwene mbili.”—Rom. 15:1-3.

‘Fumadekeni vakadi’

15. Ngapi omu vagara nava vhura kutekura vakadi vawo?

¹⁵ Konekeni epukururo lyaPaurusa kovagara wokukwara. Age kwa tjenge asi: “None si vagara, omu kare nonondunge novakadi veni, mu dive asi awo vantu va pira nonkondo, mu va fumadeke.” (1 Pet. 3:7) Kufumadeka muntu kutanta asi kumutara asi age mulyo unene. Eyi kwa kwatera mo mokutarura magano noyihepwa yendi ntani neyi ga hara muntu ogo, ano yi mu ruganena ntudi pana kara konda zomulyo zeyi no dilira kuyirugana oyo. Yimo nye ngoso mugara na vhura kutekura mukadendi.

16. Erondoro musinke dina kugava Nonkango daKarunga kovagara kuhamena kufumadeka vakadi vawo?

¹⁶ Apa Peturusa ga tanterere vagara va fumadeke vakadi vawo, age kwa gwederere ko pokuvarondora asi: “Neisi ngayi limba makanderero geni.” (1 Pet. 3:7) Eyi kwa likida nawa-nawa omu Jehova a lizuvhu kuhamena nkedi ezi mugara a tekura mukadendi. Nsene a dira kulikida efumadeko kwamukadendi ngayi limba makanderero gendi. Yosili, nsene vagara va tekura vakadi vawo monkedi zefumadeko, vakadi nawo ngava va fumadeka.

17. Eharo lyokuhura kupi na kara nalyo mugara kwamukadendi?

¹⁷ Kombinga zokuhara vakadi, Nonkango daKarunga kupukurura asi: “Vagara nawo ava hare vakadi vawo moomu va hara marutu gavene. . . . Nagumwe si ogu ga nyenga rutu rwamwene, nye age kurutekura oku ta ru pakere mbili, moomu a pakere mbili Kristusa [mbungakriste, NW] zendi. . . . Nkenye mugara a hare mukadendi moomu ga lihara mwene.” (Efe. 5:28, 29, 33) Eharo lyokuhura kupi na kara nalyo mugara kwamukadendi? Paurusa kwa tjenge asi: “Vagara, omu hare vakadi veni, moomu ga hara Kristusa [mbungakriste, NW], yiyo ga lizumbilira mwarwazo monomfa.” (Efe. 5:25) Yosili mugara ga hepa kukara neharo lyokuvhura kufira mukadendi, ngwendi moomu ga yi rugene Kristusa kwava wopeke. Apa mugara goMukriste a tekura mukadendi monkedi zeharo zombili nokumupurakena ntani nokudira kuligazara tupu pwamwene, ayo kurerupira mukadi a limburukwe koupangeli wayendi.

18. Yisinke nayi vatera vagara mokusikisa mo yitumbukira yawo mononkwara?

¹⁸ Mokulikida efumadeko kovakadi monkedi ozo, kuna kara situmbukira sosidigu kovagara ndi? Hawe, Jehova kapi tava pura va rugane sininke esi nava dira kuvhura kusikisa mo mononkondo dawo. Nye, vakareli vaJehova awo kuvhura kugwana nonkondo dononene unene moyisitwa nayinye, ado kuna kara mpepo zokupongoka zaKarunga. Jesus kwa tente asi: “Kumwe nyone wovadona mwa diva kupa vana veni yininke yoyiwa, ngaGuhyeni gemeguru yihuna nye pokugava Mpepo zoKupongoka kwava vana kumuhundira!” (Ruk. 11:13) Nsene vagara tava kanderere, va hundire mpepo zokupongoka zaJehova mokuvavatera omu nava tekura wopeke, kukwatera mo vakadi vawo.—Resa Yirugana 5:32.

19. Yisinke ngatu ka zogera mosirongwa sokukwama ko?

¹⁹ Yosili, vagara kwa kara nositumbukira sosidigu mokulironga omu nava kara noulimburukwi kwaKristusa ntani nokuhonena upangeli wendi. Nye ngapi kuhamena vakadi, unene po wokukwara? Sirongwa sokukwama ko ngasi ka zogera omu vakadi nava tara situmbukira sawo mewapaiko lyaJehova.

Vakadi, morwasinke nomu limburukwira koupangeli?

“Mugara mupangeli gomukadi.”—1 KOL. 11:3.

1, 2. (a) Yisinke ga tjenge mupositoli Paurusa kuhamena ngendeseso zaJehova kombinga zoupangeli ntani noulimburukwi? (b) Mapuro musinke natu ka zogera mosirongwa esi?

JEHOVA kwa tulisa po ngendeseso ezi ga tumbwire mupositoli Paurusa apa ga tjenge asi: “Kristusa yige mupangeli gwankenye mugara,” ano “Karunga yige mupangeli gwaKristusa.” (1 Kol. 11:3) Sirongwa sa ka pita twa zogerere asi Jesus kwa lizuvhire mfumwa noruhafo mokulimburukwa Mupangeli gwendi, Jehova Karunga, ntani asi vagara woVakriste va kara nomupangeli gwawo, Kristusa. Age nga tekura vantu nombili nonkenda neharo ntani kapi tupu nga ligazara pwamwene. Vagara womombungakriste nawo va hepa kutekura vakwawo monkedi ozo, unene po vakadi vawo.

² Ngapi kuhamena vakadi, yilye mupageli gwawo? Paurusa kwa tjenge asi: “Mugara mupangeli gomukadi.” Ngapi omu vakadi nava tara nonkango odo? Mpango ozo simpe kurugana nampili mugara age muhapuli ndi? Kulimburukwa koupangeli womugara kutanta nye asi mukadi kapi ta pwagesa magano gendi, nsene kuna kutura po matokoro ndi? Monkedi musinke mukadi ga fira kumutanga?

‘Tani mu ruganene ko mukwafi gwendi’

3, 4. Mauwa musinke ga kara mo mongendeseso zoupangeli mononkwara?

³ Karunga yige ga tokwere asi yilye na kara mupangeli mepata. Konyima zapa va mu ungire Adamu, Jehova Karunga kwa tente asi: “Kapisi nawa asi muntu a kare gelike. Tani mu ruganene ko gokumuhamena, mukwafi gwendi.” Apa va mu ungire Eva, Adamu kwa hefe pokukara nogu gokumuhamena nomukwafi, makura ta tanta asi: “Hawe ogu ntaantani damu-damu nyame nye, sisupa somoyisupa yange, nonyama zomonyama zange.” (Gen. 2:18-24) Adamu naEva kwa kere nomeho zokutetukisa zokukara guhya nazina govantu navenye wokusikilira mo, ava ngano va parukire narunye moruhafo moparadisa pevhu.

⁴ Morwa vakurona vetu wokuhova kwa rwanesere, eparu lyokusikilira mo mosikunino saEdeni va lizumbanesere. (Resa Varoma 5:12.) Nye simpe ngendeseso zoupangeli kapi za rundurukire. Nsene mugara a ruganesa nawa upangeli wendi monkedi zongwa ano mukadi a limburukwe koupangeli owo, ayo kureta mauwa gomanzi noruhafo mononkwara. Yitundwamo ta yi lifana ngwendi moomu ga lizuvhire Jesus mokukara noulimburukwi koMupangeli gwendi, Jehova. Komeho a ya kare muntu, Jesus nga “pembura nkenye apa komeho [zaKarunga].” (Yis. 8:30) Morwa kudira kusikilira mo, vagara kapi vana kara hena vapangeli wokusikilira mo, ano vakadi nawo kapi vana kulikida ulimburukwi wokusikilira mo. Nye, nsene vagara novakadi va twikira kurugana paapa va vhulira, ngendeseso zoupangeli kukareta ruhafo rorunene mononkwara posiruwo esi.

5. Morwasinke valikwali nava tambwira epukururo eli lya kara moVaroma 12:10?

⁵ Mokuninka asi nonkwara di tompoke, valikwali va hepa kutambura epukururo lyoPatjangwa eli lya fira Vakriste navenye asi: “Omu lihare-hare neharo lyosiumbya lyomwaKristusa. Omu gave sihonena sokulifumadeka-fumadeka.” (Rom. 12:10) Ntani hena, mugara nomukadi va hepa kurugana unene ‘mokulikara-kara nombili, oku tava lifira-fire nkenda, oku tava lidongwenene-dongwenene po.’—Efe. 4:32.

Nsene mulikwali goge muhapuli

6, 7. Nsene mukadi goMukriste a kara nonkareso zoulimburukwi kwayendi gomuhapuli, yitundwamo musinke ngayi kara?

⁶ Ngapi nsene mulikwali goge kapi a karere Jehova? Narunye, mugara yige a kara muhapuli. Moukaro wangesi, ngapi omu mukadi na tekura yendi? Bibeli kulimburura asi: “None si vakadi, omu limburukwe kovagara veni, asi vamwe mo ava va dira kupura nonkango daKarunga, ngayi va tezwilise po yikara yovakadi vawo, awo va hana kuuyunga, nsene va mona ukuhuki netjirokarunga lyeni.”—1 Pet. 3:1, 2.

⁷ Nonkango daKarunga kutantera mukadi a likide nkareso zoulimburukwi kwayendi gomuhapuli. Nkareso zongwa zomukadi kuvhura kuninkisa mugara a gazadare ko kweyi ayi ninkisa mukadendi a kare nononkedi donongwa. Ngoyitundwamo, mugara kuvhura nga konakone epuliro lyamukadendi goMukriste, moruhura ta tambura usili.

8, 9. Yisinke ga hepa kurugana mukadi goMukriste nsene mugara gwendi gomuhapuli kapi a nongonona nkareso zendi zongwa?

⁸ Ngapi nsene mugara gomuhapuli kapi a nongonona nkareso zongwa zamukadendi? Nampili yi kare udigu, Matjangwa kukorangeda mukadi gomupuli a likide yikara yoSikriste nkenye apa. Pasihonena, tatu resa mo-1 Vakolinte 13:4 asi: “Eharo kwa kwata nedidimiko.” Yipo nye, mukadi goMukriste ga hepa kutwikira ‘kukara mulinunupiki nomunambili, oku ta lididimike-didimike meharo,’ moukaro ou ana kara nawo. (Efe. 4:2) Nevatero lyononkondo daKarunga, mpepo zokupongoka, ayo kuvhulika mokulikida yikara yoSikriste nampili momaudigu.

⁹ Paurusa kwa tjenge asi: “Ame kuvhura nayinye nononkondo dogu a pameke nge.” (Fil. 4:13) Mpepo zaKarunga kuninkisa mulikwali goMukriste a rugane yininke yoyinzi eyi ngano na dira kusikisa mo. Pasihonena, nsene gumwe mulikwali gwendi kuna kumutekura momudona kuvhura yi mu zede mokurugwida kuwoko. Nye, Bibeli kutantera Vakriste navenye asi: “Walye omu likwatere-kwatere nonkoko. . . . Yeeyi kwa tjanga asi, ‘Ame nyame ani tengwida kuwoko nehandu, nyame ani futu, yimo ana kutanta Hompa.’” (Rom. 12:17-19) Mokulifana, 1 Vatesaronika 5:15 kutupukurura asi: “Nomeneni, walye omu lininki rwasiningambwa. Tambeni kulirugana momuwa nyamweni nanyamweni rambanga ko nanavenye.” Nevatero lyompepo zokupongoka zaJehova, ose kuvhura kusikisa mo eyi natu dira kurugana mononkondo danyamwetu. Ayo ya wapa asi tu kanderere kwaKarunga a tu pe mpepo zendi zokupongoka.

10. Ngapi omu Jesus ga tekwire ava ngava mu uyungire ndi nokumurugana yininke yoyidona?

¹⁰ Jesus kwa tulire po sihonena sosiwa omu nga tekura ava ngava mu uyungire ndi nokumurugana yininke yoyidona. Mwa-1 Peturusa 2:23 kutanta asi: “Age ngava mu swaura, nye age kapi nga ninki asi nage a va swaure. Napa si ngava mu hepeke, kapi nga handuka, nye nayinye kwa yi sigililire Karunga ogu a pangura mouhunga.” Kuna kututumangeda tu kwame sihonena sendi sosiwa. Kapisi di ku handukise nonkareso donondona dava wopeke. Vakriste navenye kuna kuvatumangeda va kare ‘nonkenda nomalinunupiko. Walye ava lihokwa-hokwa moudona, ndi va lituka-tuke.’—1 Pet. 3:8, 9.

Vakadi nokupwagesa si magano gawo ndi?

11. Mositumbukira musinke sosinene esi ngava ka lihameka vakadi vamwe woVakriste?

¹¹ Kulimburukwa koupangeli womugara kutanta nye asi mukadi nokuvhura si kupwagesa magano gendi moyuma yemepata ndi mweyi yapeke ndi? Hawe. Jehova kwa gava yitumbukira yoyinzi kovakadi nokovagara. Gazadara ko tupu komfumwa zonene ezi va kara nazo vantu 144 000 mokukakara vahompa novapristeli meguru apa nga ka pangera Kristusa evhu nalinye! Mosivaro oso vakadi nawo moveli. (Gar. 3:26-29) Yosili, Jehova ga gava situmbukira kovakadi megendeso lyendi lyoyininke.

12, 13. Gava sihonena sina kulikida asi nare vakadi ngava porofeta.

¹² Pasihonena, mosiruwo sanare vakadi vamwe ngava porofeta. Jowera 2:28, 29 kwa pumbire asi: “Ame ngani powomwena mpepo zange nkenye ogu; vana veni wovagara nava wovakadi ngava divisa mbudi zange; . . . Ame ngani powomwena mpepo zange novapika vaava, vagara novakadi.”

¹³ Varongwa vamwe vaJesus 120 kwa pongere monzugo zekeguru moJerusarema mezuva lyoPentekoste 33 S.N., omu mwa kere vakadi novagara. Mpepo zaKarunga kwa zi poomwenene kombunga nazinye ozo. Yipo nye Peturusa ga temwinine eyi ga pumbire muporofete Jowera ntani nokuninka uporofete owo u sikilire mo movagara novakadi vena. Peturusa kwa tente asi: “Eyi yiyo ga uyungire muporofete Jowera asi: ‘Karunga kutanta asi: Momazuva gouhura ngani poomwena Mpepo zange kovantu navenye. Vana veni wovagara nava wovakadi ngava pumba, . . . Nokovakareli vange wovagara nava wovakadi pomazuva ogo ngani va poomwena ko Mpepo, ngava pumbe.’”—Yirug. 2:16-18.

14. Ngapi omu va lihamekere mo vakadi mehaneso lyombudi zongwa?

¹⁴ Mouye wokuhova, vakadi kwa lihamekere mo unene mehaneso lyombudi zongwa. Awo kwa zuvhisilire ko vakwawo kuhamena Uhompa waKarunga ntani nokurugana yimwe yokuhamena sirugana oso sokuzuvhisa. (Ruk. 8:1-3) Pasihonena, mupositoli Paurusa kwa tumbwire Foibe asi “mukwafi gombungakriste zomoKenkereya.” Ano apa Paurusa ga tumine makundo kovarugani vakwawo, age kwa tumbwire mo vakadi wovanzi wovalimburukwi, kukwatera mo ‘Tilifaina naTilifosa, ava ngava rugana nomupampi mwaHompa.’ Age ga tumbwire hena Peresisi ‘munwamali gomukadi gokuhara ogu nga rugana unene mwaHompa.’—Rom. 16:1, 12.

15. Mosiruwo setu, ngapi omu vana kulihameka mo vakadi mehaneso lyombudi zongwa?

¹⁵ Mosiruwo setu, sivaro sovantu wokupitakana pomamiliyona ntambali ava vana kuzuvhisa mbudi zongwa zoUhompa waKarunga uzuni mudima, kwa hamena mo vakadi womapupi gokulisiga-siga. (Mat. 24:14) Sinzi sovakadi kurugana sirugana sokuzuvhisa Uhompa siruwo nasinye ndi vatumwa ndi kukarera koBeteli. Muepisarome Ndafita kwa dimbire asi: “Hompa kwa gavere eraka, vakadi wovanzi tava twara mbudi.” (Epis. 68:11) Nonkango edi da sika mo. Jehova kupandura vakadi kelihamekomo lyawo mokuudisa mbudi zongwa ntani nokusikisa sitambo sendi. Mpangera zendi kovakadi woVakriste zokukara noulimburukwi kapi zina kutanta asi kapi tava vhuru kupwagesa magano gawo.

Vakadi vavali ava va pwagesere magano gawo

16, 17. Ngapi omu sihonena saSara sa yi likida asi vakadi nawo kuvhura kupwagesa magano gawo mononkwara?

¹⁶ Nsene asi Jehova kupa vakadi yitumbukira yoyinzi, vagara ngano va hepa kupura ko vakadi vawo magano komeho zokutura po matokoro gomanene, ndi ngapi? Azo kuna kara nkedi zongwa kovagara mokuyirugana oyo. Bibeli za tumbura ko yihorokwa yongandi omu vakadi va pwagesere magano gawo ndi va rugene yuma eyi va dilire kukwatesa ko vagara vawo. Konekeni yihorokwa eyi yivali.

¹⁷ Sara mukada esimbi Abirahamu, nga twikire kutantera yendi asi a tjide mukadendi gwauvali namunwendi morwa kapi va kere nefumadeko. “Eyi kwa korere unene Abirahamu komutjima,” nye kapisi Karunga. Jehova kwa tanterere Abirahamu asi: “Wa ha kerera mutjima gomudona ogu mumati nomupika goge Hagara. Nkenye eyi na ku tantera Sara, yi rugana.” (Gen. 21:8-12) Abirahamu ga limburukwire Jehova nokupurakena kwaSara ntani ga rugene eyi ga mu hundilire.

18. Yininke musinke ga rugene Abigayili?

¹⁸ Konekeni hena sihorokwa saAbigayili mukadaNabali. Apa Ndafita ga tjwayukire hompa Sauru gomfudu, age kwa ka kere pepi nosiunda saNabali. Mevango lyokugusa po poyiweka yaNabali yoyinzi, oNdafita novantu vendi ngava yi kungu. Nye Nabali kwa kere “mukukutu age mulingilingi,” ntani age ‘kwa sandagwire’ vantu vaNdafita. Nabali kwa kere ‘nayimwe si,’ ntani “egova.” Apa vantu vaNdafita va hundilire Nabali nondya, age kwa nyokere. Yisinke ga rugene Abigayili apa ga zuvhire eyi ya horokere? Ga hana kutantera ko Nabali, age ta “rongere usimbu-simbu nomuhwi donomboroto mafere gavali nonompunda mbali dokuzura vhinyu, nonzwi ntano dokudosa nonokilogarama murongo nantano-nambali donombuto dokukanga noyisokombwa efere yomandjembere noyikuhuna mafere gavali yekuzu lyekukutu,” makura ta yi pe Ndafita novantu vendi. Abigayili ga rugene youhunga ndi? Nhi, eyi ya ka horokere konyima kwa likida asi ga rugene youhunga. Bibeli kutanta asi: “HOMPA ta toona Nabali, ta fu.” Konyima Ndafita ga ya kwere Abigayili.—1 Sam. 25:3, 14-19, 23-25, 38-42.

‘Mukadi ogu va fira kutanga’

19, 20. Yisinke ayi ninkisa mukadi va mu tange?

¹⁹ Bibeli kupandadeka mukadi gokukwara ogu a rugana yininke kuliza nonzira zaJehova. Buke zoYisewe kutanga “mukadi-kadi,” pokutanta asi: “Efumano lyendi lya pitakana tumanya tondiro. Mutjima gwayendi gwa mu huguvara, age kapi nga kara hepere nampili rumwe. Age kuruganena yendi uwa kapisi udona, moukaro wendi naunye.” Ntani hena asi: “Kana kendi kukazahwira nonkango donondunge. Age kuviyauka narunye, ta fire sinka epata lyendi eyi lina hepa. Vana vendi wovamati kukatuka, tava mu tanga asi munerago. Nayendi nage kumufumadeka.”—Yis. 31:10-12, 26-28.

²⁰ Yisinke ayi ninkisa mukadi va mu tange? Yisewe 31:30 kutanta asi: ‘Meho gomanene kukumbagera, ano ewapo lyorutu kuzonauka po. Nye mukadi ogu a tjira HOMPA yige va fira kutanga!’ MetjiroKarunga kwa kwatera mo kukara neharo lyokulimburukwa koupangeli ou ga tura po Jehova. “Mugara mupangeli gomukadi,” moomu tupu ya kara asi, “Kristusa yige mupangeli gwankenye mugara,” ano “Karunga yige mupangeli gwaKristusa.”—1 Kol. 11:3.

Likideni rupandu kouhwi waKarunga

21, 22. (a) Nokonda musinke va kara nado Vakriste wokukwara deyi nava likidira rupandu kwaKarunga kouhwi wononkwara? (b) Morwasinke natu likidira efumadeko kongendeseso zaJehova zoupangeli? (Tara ka-kende kana kara keguru.)

²¹ Vakriste wokukwara kwa kara nonokonda dononzi deyi nava likidira rupandu kwaKarunga. Awo kuvhura kuruganena kumwe ngovalikwali woruhafo. Unene po awo va likide rupandu kouhwi wononkwara ou ga gava Karunga morwa awo kuvapa mpito mokulikwatakana kumwe ntani nokukara nomalikwatakano naJehova. (Rutu 1:9; Mika 6:8) Jehova, Mutoti gononkwara ga diva nawa-nawa eyi ayi reta ruhafo mononkwara. Nampili mouzuni ou womaudigu, nsene mu rugana yininke kuliza nonzira zaJehova ‘ehafo lyomwaHOMPA, ngali kara nonkondo deni.’—Neh. 8:10.

²² Mugara goMukriste ogu ga hara mukadendi ngwendi moomu ga lihara mwene, nga ruganesa upangeli wendi monaruwa. Mukadendi goMukriste nga kara mukadi gomuwa, morwa age nga kwatesa ko yendi ntani nokumulikida efumadeko lyenene. Yomulyo po unene, nonkwara dawo donongwa ngadi retera mfumwa Karunga gwetu, Jehova.