Tura po matokoro aga aga fumadekesa Karunga

‘Vanandunge kutakamesa nontambo dawo.’—YIS. 14:15.

1, 2. (a) Sinka setu musinke sosinene nasi kara mokutura po matokoro? (b) Mapuro musinke natu ka konakona?

OSE kugatura po nkenye ezuva. Gamwe gokureta yitundwamo yokaruwogona tupu. Makwawo kuvhura kukundama eparu lyetu. Yininke musinke oyo? Matokoro. Matokoro aga atu tura po ga kare asi gomanene ndi gomanunu, sinka setu sosinene kuna kara mokufumadeka Karunga.—Resa 1 Vakolinte 10:31.

² Ove kukurerupira mokutura po matokoro ndi kukudigopera? Nsene tuna hara tu kure pampepo, twa hepa kulironga kuhangura uwa koudona ntani nokutura po matokoro gokuliza nepuliro lyetu, kapisi lyava wopeke. (Rom. 12:1, 2; Heb. 5:14) Nokonda musinke dimwe domulyo deyi twa hepera kulironga kutura po matokoro gomawa? Morwasinke poyiruwo yimwe ya karera udigu kutura po matokoro? Nontambo musinke twa hepa kugusa mokudivilisa asi matokoro getu kuna kufumadeka Karunga?

Morwasinke twa hepera kutura po matokoro?

3. Yisinke natu dira kupulisira yi dire kutudonganesa mokutura po matokoro?

³ Nsene kapi atu tokora usimbu kombinga zonompango doBibeli, vakwetu wokosure ndi wokoyirugana kuvhura va gazare asi ose kapi twa kwaterera nawa kepuliro lyetu ano kuvhura va tu pukise noureru. Awo kuvhura va kumbagere ndi va vake makura tava hetekere ko kutuzeda tu va ‘kwame’ pokulipakerera nawo ndi tu va vatere mokuhoreka eyi ava rugana. (Ex. 23:2) Nye, muntu ogu ga diva omu na tura po matokoro aga aga fumadekesa Karunga kapi nga pulisira utjirwe ndi eharo lyokumutambura vakwawo li mu ninkisa a tambure nkareso ezi nazi lilimba nezwi lyendi lyokomutjima eli va deura kuliza noBibeli.—Rom. 13:5.

4. Morwasinke nava harera vamwe kututulira po matokoro?

⁴ Kapisi navenye ava nava hara kututulira po matokoro kuna tu harere udona. Nampili vakaume ava va kara neharo lyokutuvatera kuvhura va tu sininike tu kwame epukururo lyawo. Nsene ose kapi twa tunga novakurona vetu, awo nampo kuvhura va kare nosinka sosinene koukalinawa wetu ntani nokuhara kulitura mo vene momatokoro gomulyo aga atu tura po. Pasihonena, tarurura udigu wokuhamena uhaku. Bibeli za silika nawa-nawa kuruganesa momudona honde. (Yirug. 15:28, 29) Yuma yimwe yokuhamena uhaku, kapi va yi tumbura kuvyukilira moBibeli ano nye pwa hepa asi nkenye gumwe gwetu a ture po etokoro lyamwene asi uhaku musinke na tambura ndi ou na dira kutambura.a Vekoro kuvhura va kare nomagano gononkondo koyuma oyo. Nye, nsene kuna kutura po matokoro koyuma oyo, nkenye Mukriste ogu ga gwana ekuho ga hepa “kusimba mudigo gwamwene.” (Gar. 6:4, 5) Sinka setu sosinene kuna kara sokukara nezwi lyewa lyokomutjima kosipara saKarunga, kapisi kovantu.—1 Tim. 1:5.

5. Ngapi omu natu kandana po kudira kuzumba epuro lyetu?

⁵ Kukara nonomutjima mbali kuvhura kututura mosiponga sosinene. Murongwa Jakopo kwa tjenge asi muntu ogu ga kara nonomutjima mbali “kapi ga vyuka moyikara yendi nayinye.” (Jak. 1:8) Ngwendi muntu ana kara mowato ou gana kuyeragura mankumpi, age ngaga mu yeragura magano govantu gokudira kuhuguvara. Ayo ureru komuntu gwangoso mokuzumba epuro lyendi makura a pe vapeke usima kweyi yina mu horokere. (1 Tim. 1:19) Ngapi natu vhura kukandana po yitundwamo oyo? Twa hepa kukara tuna ‘nkondopara mepuro.’ (Resa Vakorosi 2:6, 7.) Mokukara tuna nkondopara, twa hepa kulironga kutura po matokoro aga aga lizi nepuro lyetu lyomoNonkango daKarunga. (2 Tim. 3:14-17) Yisinke nayi vhura kukandana evhuliko lyetu lyokutura po matokoro gomawa?

Morwasinke kutura po matokoro ayi karere udigu?

6. Ngapi nau tu kundama utjirwe?

⁶ Utjirwe kuvhura u tu kundame, utjirwe wokutura po etokoro lyepuko, utjirwe wokudira kututompoka, ndi utjirwe wokumoneka ugova kwava wopeke. Yinka yangoso kuyikwata egano. Kwato ogu ana hara kutura po etokoro lyepuko, eli ngali reta udigu nokumufisa nomuga. Nampili ngoso, eharo lyokuhara Karunga noNonkango dendi kuvhura kutuvatera tu sesupike utjirwe wetu. Mononkedi musinke? Eharo lyokuhara Karunga ngali tu tumangeda nkenye apa mokutara moNonkango dendi nomoyimbapiratjangwa yoBibeli komeho tu ture po matokoro gomulyo. Mokurugana ngoso, ngatu sesupika mapuko aga atu tura po. Morwasinke? Morwa Bibeli kuvhura ‘kuninka mupirandunge a kare gonondunge, ano mudinkantu tazi mu rongo ediwo nomayere.’—Yis. 1:4.

7. Yisinke asi tu rongo sihonena sahompa Ndafita?

⁷ Ngoso nkenye apa ngatu tura po matokoro gouhunga ndi? Hawe. Natuvenye kutura mapuko. (Rom. 3:23) Pasihonena, hompa Ndafita kwa kere mugara gonondunge gokulimburukwa. Nye, poyiruwo yimwe nga tura po matokoro gepuko aga ngaga mu retere kukora nava wopeke. (2 Sam. 12:9-12) Nampili ngoso, Ndafita kapi ga sigililire mapuko ogo ga donganese evhuliko lyendi lyokutura po matokoro nokugwana ehafero lyaKarunga. (1 Vah. 15:4, 5) Kugusa ko mapuko ganare, kuvhura tu ture po matokoro gomawa nsene tu diworoka asi Jehova nga divara mapuko getu nokutudongwenena po, ngwendi moomu ga yi rugene kwaNdafita. Age nga twikira kuvatera ava va mu hara nokumulimburukwa.—Epis. 51:1-4, 7-10.

8. Yisinke eyi natu lirongera ko kweyi ga tente mupositoli Paurusa kuhamena kukwara?

⁸ Ose kuvhura kusesupika yinka eyi atu kara nayo kombinga zokutura po matokoro. Ngapi omu natu yi rugana? Pokunongonona asi poyiruwo yimwe pwa kara nonzira douhunga dongandi natu horowora. Konekeni omu Paurusa ga uyungire kuhamena kukwara. Megendeso lyompepo zokupongoka Paurusa kwa tjenge asi: “Nye kuvhura pa kare ogu ga yi tara asi kapisi yiwa nsene a kwara mbandeki zendi. Nampili ngoso nsene asi eharo lyendi lina vhuka unene, kapi yina kuwapera hena ogo mukadona, ayi tare asi yiwo kulikwara, va rugane moomu vana hara, va likware, kapi vana kuzona. Nye ogu ga kora komutjima, va hana kumusininika, nye ta kwama eharo lyamwene, yiyo ga tokora momwenyo gwendi asi kapi nga kwara, ta wapeke.” (1 Kol. 7:36-38) Paurusa ga tente asi udike yilyo etokoro lyewa, nye kapisi yilyo lyelike etokoro lyouhunga.

9. Kuvhura tu kare nosinka omu vapeke nava tara matokoro getu ndi? Faturura.

⁹ Kuvhura tu kare nosinka omu vapeke nava tara matokoro aga natu tura po ndi? Nhi, poyiruwo yimwe kuvhura. Koneka eyi ga uyungire Paurusa kuhamena kulya nondya edi ngava zamba koyikarunga yoyimpempa. Age ga nongwenene asi etokoro lyene ko kuvhura li dire kukara lyepuko, nye kuvhura li korese gumwe ogu ga dira kukara nezwi lyononkondo lyokomutjima. Yisinke ga tokwere Paurusa? Age kwa tjenge asi: ‘Nondya nsene di pukisisa mukwetu, ngani lifira hena kulya nyama, neisi ngani pukisisa mukwetu.’ (1 Kol. 8:4-13) Nose twa hepa kugazadara ko omu matokoro getu naga vhura kukundama ezwi lyokomutjima lyava wopeke. Nye, sinka setu sosinene kuna kara omu matokoro getu naga kundama elikwatakano lyetu naJehova. (Resa Varoma 14:1-4.) Nompango musinke doBibeli edi ngadi tu vatera tu ture po matokoro aga aga fumadekesa Karunga?

Nontambo ntazimwe mokutura po matokoro gomawa

10, 11. (a) Ngapi natu nyokera po elinenepeko mepata? (b) Yisinke va hepa kudiworoka vakuronambunga nsene tava tura po matokoro aga naga kundama mbungakriste?

¹⁰ Nyokera po elinenepeko. Komeho zokutura po etokoro, twa hepa kulipura asi: ‘Na kara nononkondo dokutura po etokoro eli ndi?’ Hompa Saromo kwa tjenge asi: “Vantu wokulinenepeka usimbu kuvafisa nomuga. Nye unongo kukara pwava va linunupika.”—Yis. 11:2.

¹¹ Vakurona kuvhura va pe ko mpito vana vawo mokutura po matokoro gamwe, nye vanona va ha gazara asi va kara nononkondo dangoso. (Koros. 3:20) Vakadi novazinya nawo va kara ko nononkondo dongandi mepata nye va hepa kunongonona upangeli wovagara vawo. (Yis. 1:8; 31:10-18; Efe. 5:23) Mokulifana, vagara nawo va hepa kunongonona asi nonkondo dawo kwa di yereka ntani asi awo va limburukwe kwaKristusa. (1 Kol. 11:3) Vakuronambunga kutura po matokoro aga naga kundama mbungakriste. Nye va hepa kudivilisa asi va ha “pitakanesa pweyi va tjanga” moNonkango daKarunga. (1 Kol. 4:6) Nawo kukwama mavyukiso aga ava gwana komukareli gokulimburukwa. (Mat. 24:45-47) Ose kuvhura tu nyokere po kuliretera nyamwetu nava wopeke yinka yoyinene neguwo pokutura po nawa matokoro nsene vana tu pe nonkondo dokuyirugana ngoso.

12. (a) Morwasinke twa hepera kurugana mapaparo? (b) Faturura omu muntu na rugana epaparo lyangoso.

¹² Rugana mapaparo. Saromo kwa tjenge asi: “O faneke nawa yuma yoge ngo gwane mo yoyinzi; nsene o rugana yampuku zange pya usimbu, kapi ngo gwana mo eyi yina ku gwanene.” (Yis. 21:5) Pasihonena, ove kuna kugazadara kutameka ngesefa ndi? Wa ha pulisira malizuvho goge ga ku pangere. Papara mauzera nagenye nokugwana mapukururo kowo va diva unangesefa ntani divilisa asi nompango musinke doBibeli da uyunga ko koyuma oyo. (Yis. 20:18) Mokurugana epaparo lyoge, didilika malikwamo gavali, limwe mauwa aga no gwana mo ano ekwawo maudigu gomongesefa. Komeho o ture po etokoro ‘varura eyi nayi pita mo.’ (Ruk. 14:28) Gazadara ko omu etokoro lyoge nali vhura kukundama ukaro woge woyimaliwa ntani nelikwatakano lyoge naJehova. Pwa hepa siruwo nelituromo mokurugana mapaparo. Nye mokurugana ngoso, ove kuvhura kunyokera po kutura po matokoro gopangenderera aga ngaga kutwaredesa komaudigu nokoyinka.

13. (a) Ehuguvaro musinke atu gwana mwaJakopo 1:5? (b) Ngapi omu natu hundira unongo u tu vatere?

¹³ Hundira unongo. Matokoro getu ngaga fumadekesesa Karunga nsene tu mu hundira a tu vatere mokutura po matokoro. Murongwa Jakopo kwa tjenge asi: “Opo muna kara, ntene pweli ogu ga pira nondunge, a di hundire kwaKarunga ogu a pe navenye neharo lyewa ga hana mutjimakoka, makura ta di mu pe.” (Jak. 1:5) Kapi ya kara nomuga mokuyitambura asi twa hepa unongo waKarunga yipo u tu vatere mokutura po matokoro. (Yis. 3:5, 6) Ano nsene tu huguvara mounongo wanyamwetu ngayi tu pukisa noureru. Apa atu hundire unongo nokupapara nompango monoNonkango daKarunga, ose ngoso kuna kupulisira mpepo zokupongoka zi tu vatere tu dive yitambo yetu yipo tu rugane ko yuma.—Heb. 4:12; resa Jakopo 1:22-25.

14. Morwasinke twa hepera kunyokera po kuliranga-ranga?

¹⁴ Tura po etokoro. Wa ha genderera kugusa ntambo ezi ove simpe kapi ono rugana mapaparo nokuhundira unongo. Muntu gonondunge kugusa siruwo ‘mokutakamesa nontambo dendi.’ (Yis. 14:15) Nye hena wa ha liranga-ranga. Muntu ogu a liranga-ranga kuvhura a ligusa-guse mo kweyi ana dilire kurugana ko yuma. (Yis. 22:13) Nye age simpe na tura po etokoro, ta tokora pokupulisira vapeke va pangere eparu lyendi.

15, 16. Yisinke ya hamena mo mokusikisa mo etokoro?

¹⁵ Sikisa mo etokoro. Nonkondo edi atu ruganesa mokutura po etokoro lyewa kuvhura di ze momema nsene kapi tuna kurugana ko yuma nokulisikisa mo. Saromo kwa tjenge asi: “O rugane unene paapa wa hulira.” (Muud. 9:10) Mokututompoka, twa hepa kukara neharo lyokuruganesa yiweka eyi yina hepa po mokusikisa mo matokoro getu. Pasihonena, muzuvhisi kuvhura a tokore kurugana uzuvhisi wokukarerera. Ngayi mu tompoka ndi? Kuvhura yi mu tompoke nsene a dira kupulisira yirugana yomouzuni noyilihafeso yi donganese nonkondo dendi nokugusa siruwo sendi esi ga hepa kuruganesa moyirugana yokuzuvhisa.

¹⁶ Matokoro gomawa po kapisi ureru kugasikisa mo. Morwasinke? Morwa “uzuni mudima kwa kara mepangero lyoMuzonaguli.” (1 Joh. 5:19) Twa hepa kurwanesa ‘vanankondo novapangeli wouzuni ou womundema, nonompepo donondona dekeguru-guru.’ (Efe. 6:12) Mupositoli Paurusa nomurongwa Juda kwa likidire asi owo ava tokora kufumadeka Karunga, ngava hepa kukondja unene moyirugana yawo.—1 Tim. 6:12; Juda 3.

17. Kombinga zomatokoro getu, yisinke ana tu harere Jehova?

¹⁷ Konakona etokoro lyoge nokutura po mawapukururo nsene hepero. Kapisi matokoro nagenye kusika mouta wa kora. “Ehudi kuhorokera” nkenye ogu. (Muud. 9:11) Nampili ngoso, Jehova kuna hara tu kwaterere ngorooro komatokoro gamwe nampili tu ligwanekere nomaudigu. Etokoro lyomuntu mokugava eparu lyendi kwaJehova ndi a ture po mugano gononkwara kapi ali runduruka. Karunga kuna tu harere tu paruke kuliza nomatokoro gangoso. (Resa Episarome 15:1, 2, 4.) Sinzi somatokoro kwa kara nomulyo gomununu. Muntu gonondunge poyiruwo noyiruwo nga konakona matokoro gendi aga nga tura po. Kapi nga pulisira elinenepeko nondino yi mu kandane mokuwapukurura ndi mokurundurura etokoro. (Yis. 16:18) Sinka sendi sosinene sokudivilisa asi mparukiso zendi kuna kufumadeka Karunga.

Deura vapeke mokutura po matokoro aga aga fumadekesa Karunga

18. Ngapi vakurona nava deura vana vawo va ture po matokoro gomawa?

¹⁸ Vakurona kuvhura va vatere vana vawo va lironge omu nava tura po matokoro aga naga fumadekesa Karunga. Kutura po sihonena sosiwa kuna kara nkedi zongwa zokuronga vanona. (Ruk. 6:40) Apa pana wapere, vakurona kuvhura va fatwilire vana vawo nontambo edi va gusire vene mokutura po matokoro gongandi. Kuvhura va pulisire vana vawo va ture po matokoro gamwe pwavene ntani nokuvapandadeka nsene etokoro olyo lina zire mo. Ngapi nsene munona ana tura po etokoro lyepuko? Vakurona vamwe kuvhura va hetekere ko kupopera munwawo koyitundwamo, nye nkedi zangoso kapi ngazi vhura kuvatera munona. Pasihonena, vakurona kuvhura va pulisire munwawo a gwane mbapira zousingi. Tu ninke nye asi munona kapi ana sikisa mo veta zepangero makura tava mu futisa. Vakurona kuvhura va mu futire po. Nye nsene munona kuvhura kurugana a yi fute, age nga lironga mokudiva asi yige kusimba mudigo gomapuko gendi.—Rom. 13:4.

19. Yisinke natu ronga valirongi vetu woBibeli, ntani ngapi omu natu vhura kuyirugana?

¹⁹ Jesus kwa tanterere vasikuli vendi mokuronga vakwawo. (Mat. 28:20) Sirongwa somulyo esi natu vhura kuronga valirongi vetu woBibeli kuna kara omu nava tura po matokoro gomawa. Mokuninka asi yi tompoke, twa hepa kunyokera po nkareso zokuvatantera eyi nava vhura kurugana. Ayo ya wapa kwetu mokuvaronga omu nava vhura kuteda ko konompango doBibeli yipo va tokore vene omu nava kara. Morwa “nkenye ogu mokatji ketu yige kuzeresa yirugana yendi kwaKarunga.” (Rom. 14:12) Yipo nye, natuvenye twa kara nokonda zongwa mokutura po matokoro aga aga fumadekesa Karunga.

[Nondanda dokonhi]

Ngapi omu no vhura kulimburura?

• Morwasinke twa hepera kulironga kutura po matokoro gomawa?

• Ngapi nau tu kundama utjirwe, ntani ngapi omu natu vhura kuufunda po?

• Nontambo musinke ntazimwe twa hepa kugusa mokudivilisa asi matokoro getu kuna kufumadekesa Karunga?

[Kakende/Efano lyepepenuno 20]

Nontambo mokutura po matokoro gomawa

1 Nyokera po elinenepeko

2 Rugana mapaparo

3 Hundira unongo

4 Tura po etokoro

5 Sikisa mo etokoro

6 Konakona etokoro lyoge nokutura po mawapukururo

[Efano lyepepenuno 19]

Muntu ogu ga kara nonomutjima mbali kwa fana ngwendi wato ou gana kuyeragura mankumpi