“Yiyimwa yompepo” kuyererepeka Karunga
“Nsene mu yima unene, ngoso Tate kuna mu yererepeke nye.”—JOH. 15:8.
1, 2. (a) Nompito musinke twa kara nado dokukorangeda wopeke? (b) Uhwi musinke au tundu kwaJehova ou au nkondopeke evhuliko lyetu lyokumukarera?
KONEKA yihorokwa yivali eyi: Mukriste gomukadi ana nongonona asi mudinkantukadi gumwe kuna kara nosinka soyuma. Age ta tura po ewapaiko mokugenda kumwe nomudinkatukadi ogo moyirugana yokuzuvhisa. Ngomu vana kugenda moyirugana yokuzuvhisa, mudinkantu ogo ta mu pwagesere maudigu gendi. Konyima zoyirugana yokuzuvhisa, mudinkantu ogo ta ka kanderera kwaJehova mokumupandura kelituromo lyeharo eli ana mu likida munazinyetukadi, alyo yilyo evatero ka hepa. Mosihorokwa sapeke, valikwali ntani tupu kava ka tundire kosirongo sapeke oku kava ka zuvhisilire. Pepongasano, tava simwitire noruhafo yilimonena yawo, ano mudinkantugara kuna hingire teete a purakene. Konyima zonomvhura dongandi, mudinkantugara ogo ta liwapaikire a ze kosirongo oku na ka zuvhisira, makura ta gazara kovalikwali vena nokonzogera ezi za mu ninkisire a hare kukara mutumwa.
2 Nampo yihorokwa oyo kukudiworokesa gumwe ogu ga retesere po marunduruko meparu lyoge ndi eparu lyagumwe eli lya ku kundamene unene. Yimo, kapi ya hwa nkenye apa nzogera zimwe tupu zi rundurure eparu lyomuntu, nye nkenye ezuva twa kara nonompito mokukorangeda nokupameka vakwetu. Gazadara asi pwa kara sininke nasi wapukurura evhuliko noyikara yoge yipo o vhure kuvatera nawa vanavanyoko nokuruganena Karunga. Ee, sininke musinke oso kouwa! Yosili, Jehova kutupa uhwi wangoso, mpepo zendi zokupongoka. (Ruk. 11:13) Ngomu mpepo zaKarunga zina kurugana meparu lyetu, azo kutupa yikara yoyiwa eyi ayi tu nkondopeke mwankenye sirugana setu kwaKarunga. Ee, uhwi musi wokutetukisa!—Resa Vagarata 5:22, 23.
3. (a) Ngapi omu kuyima ‘yiyimwa yompepo’ ayi yererepeke Karunga? (b) Mapuro musinke natu ka konakona?
3 Yikara eyi azi tu pe mpepo zokupongoka kuna kara silikidiso soyikara yoNtundiliro zompepo ozo, Jehova Karunga. (Koros. 3:9, 10) Jesus kwa likidire konda zomulyo eyi Vakriste va hepera kukondjera mokuhonena Karunga apa ga tantererere vapositoli vendi asi: “Nsene mu yima unene, ngoso Tate kuna mu yererepeke nye.”a (Joh. 15:8) Ngomu tuna kuyima ‘yiyimwa yompepo,’ yitundwamo kuyimonenena nawa-nawa monkedi omu atu uyunga nomu atu rugana, ano ayo kuretera eyererepeko Karunga gwetu. (Mat. 5:16) Mononkedi musinke yiyimwa yompepo ya lisiga noyikara youzuni waSatana? Ngapi natu vhura kuyima yiyimwa yompepo? Morwasinke nayi tu digoperera mokuyirugana oyo? Natu ka konakona mapuro ogo ngomu natu ka zogera maruha gatatu gokuhova goyiyimwa yompepo, eharo nehafo nombili.
Eharo lyokutunda mompango zokuzeruka
4. Eharo musinke Jesus ga rongere vasikuli vendi va li likide?
4 Eharo eli azi retesa po mpepo zokupongoka kwa lisiga unene neharo eli lya kara mouzuni. Ngapi omu ya lisiga? Alyo kutunda mompango zokuzeruka. Jesus kwa nkondopekere elisigo eli pEudiso lyopoNdundu. (Resa Mateusa 5:43-48.) Age kwa tumbwire asi nampili vananzo nawo kutekura vakwaawo moomu ava va tekura. ‘Eharo’ lyangoso kapi mwa hamena elizambero lyene-lyene nye kukwama kweyi ava va ruganene vapeke. Nsene tuna hara ‘kukara vana vaGuhyetu gemeguru,’ twa hepa kulisiga. Mevango lyokutekura vapeke moomu ava tu tekura nose, twa hepa kutara vapeke nokuvatekura ngwendi moomu a va tara nokuvatekura Jehova. Ngomu ga yi pangerere Jesus, kuvhura tu hare nonkore detu ndi?
5. Ngapi natu likida eharo kowo ava tu hepeke?
5 Tarurura sihonena simwe somoBibeli. Apa va zuvhisililire moFilipi, Paurusa naSirasa kwa va kwete nokuvatona unene nokuvatura modorongo, omu va tulire nompadi dawo mokakunzu. Ano apa va kere modorongo, nampo mutakamesi godorongo ga va tekwire hena momudona. Apa va va mangwilire modorongo va hana kuyindindira morwa ekankamo lyevhu lya horokere, awo va hafe asi tava tengwidire kuwoko mutakamesi gwina godorongo ndi? Hawe. Sinka sawo koukalinawa womugara gwina kwa va tumangedere va rugane ko yuma usimbu-simbu, pokuvatera mutakamesi gwina godorongo nepata lyendi va kare vapuli. (Yirug. 16:19-34) Sinzi sovanavazinyetu womosiruwo santaantani nawo kuna kurugana yokulifana ‘pokuswera ava ava va hepeke.’—Rom. 12:14.
6. Mononkedi musinke natu likida eharo lyokulizambera kovanavazinyetu? (Tara kakende pepenuno 25.)
6 Eharo lyetu lyokuhara vapuli vakwetetu lya hepa kunenepa. “Nose twa fira kugavera vakwetetu nomwenyo detu.” (Resa 1 Johanesa 3:16-18.) Nkenye apa ose kuvhura kulikida eharo moyininke yonunu. Pasihonena, nsene tu uyunga ndi tu rugane yininke eyi nayi handukisa munazinyetu, ose kuvhura kulikida eharo pokurugana ko yuma yipo tu tulise po mbili. (Mat. 5:23, 24) Ngapi nsene gumwe ana tu handukisa? Ose kuliwapaikira ‘mokumudongwenena po,’ ndi poyiruwo yimwe ose kukara nonkoko? (Epis. 86:5) Eharo lyenene eli ali tundilire kompepo zokupongoka kutuvatera tu dongonone po mapuko gomanunu, pokudongwenena po vakwetetu ‘moomu ga tu dongwenena po’ Jehova.—Koros. 3:13, 14; 1 Pet. 4:8.
7, 8. (a) Ngapi eharo lyokuhara Karunga ali kundama eharo lyetu lyokuhara vantu? (b) Ngapi natu nkondopeka eharo lyetu lyokuhara Jehova? (Tara sifanekeso esi sina kara konhi.)
7 Ngapi natu vhura kutunga po eharo lyokulizambera kovanavazinyetu? Pokunkondopeka eharo lyetu lyokuhara Karunga. (Efe. 5:1, 2; 1 Joh. 4:9-11, 20, 21) Siruwo esi atu ruganesa mokukara naJehova pokuresa Bibeli nokuteda nokukanderera kutukorangeda ntani kupameka eharo lyetu lyokuhara Guhyetu gemeguru. Nampili ngoso, twa hepa kulirandera siruwo sokuhedera pepi naKarunga.
8 Mokuyifanekesa: Tu ninke nye asi va tura po tupu vili zongandi nkenye ezuva mokuresa Nonkango daKarunga nokuteda ko ntani nokukanderera kwendi. Kapi ngano no takamesa asi kwato eyi nayi donganesa siruwo soge oso mokukara kumwe naJehova ndi? Yimo, kwato ogu na vhura kutukondera mokukanderera kwaKarunga ntani sinzi setu kuvhura kuresa Bibeli nkenye apa tuna harere. Nye twa hepa kutakamesa asi yirugana yetu yankenye ezuva kapisi yi donganese siruwo setu sokukara kumwe naKarunga. Ove kulirandera siruwo sosire nkenye ezuva yipo o hedere Jehova pepi ndi?
‘Ehafo lyokutunda kompepo zokupongoka’
9. Ngapi omu sa kara sikara sehafo esi za retesa po mpepo zokupongoka?
9 Yiyimwa yompepo ayo kwa likarera morwa ayo kutwikira kukara ngorooro mwetu nampili tu ligwanekere nomaudigu. Ehafo kuna kara ruha royiyimwa yompepo eli natu ka konakona, alyo kukara mwetu nampili momaudigu. Ehafo kwa kara ngwendi sitji esi asi vhuru kuparuka nampili momukarompepo goupyu. Evhu nalinye, sinzi sovakareli vaKarunga ‘nampili ngomu ava hepa unene, va tambura mbudi nehafo lyokutunda kompepo zokupongoka.’ (1 Tes. 1:6) Vamwe kuligwanekera nomaudigu nedompeso. Nye, Jehova kuvankondopeka kupitira mompepo zendi va “vhure kudidimika maudigu nagenye nehafo.” (Koros. 1:11) Yisinke ntundiliro zehafo olyo?
10. Yisinke ntundiliro zehafo lyetu?
10 Kapisi ngwendi ‘emona eli lya hana mutompo’ lyomouzuni waSatana, emona lyopampepo eli atu gwana kwaJehova kwa kara nomulyo gokukarerera. (1 Tim. 6:17; Mat. 6:19, 20) Age kwa tu pa ehuguvaro lyehafo lyomeho zanarunye. Ose twa kara nehafo pokukara ruha rovanavazinyetu woVakriste mouzuni mudima. Nye unene po, ruhafo rwetu kurugwana pokulikwatakana naKarunga. Nose kukara nomalizuvho aga ga kere nago Ndafita, ogu ga parukire ngomutjwayuki. Age kwa hambererere Jehova morusumo pokutanta asi: “Eharo lyoge lyenene, kwa pitakana mwenyo gwene, yiyo nye na harere kukupandura. Ame kuna hara ni ku pandure siruwo esi nina kuhesera.” (Epis. 63:3, 4) Nampili tu ligwanekere nomaudigu, ose kuyererepeka Jehova nehafo monomutjima detu.
11. Morwasinke ya karera nomulyo mokukarera Jehova nehafo?
11 Mupositoli Paurusa kwa tumangedere Vakriste asi: “Omu hafe nkenye apa mwaHompa. Tani rugwire mo hena asi, omu hafe.” (Fil. 4:4) Morwasinke ya karera nomulyo koVakriste mokusikisa mo sirugana sawo kwaJehova nehafo? Morwa nompata edi ga retesere po Satana kuhamena upangeli waJehova. Satana kwa tente asi kwato muntu gokukarera Jehova kutundilira meharo. (Joba 1:9-11) Nsene tu karera Jehova noulimburukwi nye kwato ruhafo, nzambo zetu zokumuhamberera ngazi kara za hana sikwafo. Yipo nye, tu kondjereni kutambura etumangedo lyomuepisarome eli asi: “Tongameneni HOMPA nehafo, wizeni komeho zendi nononsumo dehafo!” (Epis. 100:2) Sirugana esi atu rugana nehafo neharo lyokutundilira komutjima kuyererepeka Karunga.
12, 13. Yisinke natu rugana tu guse mo malizuvho gomadona?
12 Yosili, nampili vakareli vaJehova wokuligava nawo poyiruwo yimwe kudompa nomutjima nokukondja mokukara noruhafo. (Fil. 2:25-30) Yisinke nayi tu vatera poyiruwo yangoso? Vaefeso 5:18, 19 kwa tanta asi: “Omu zure Mpepo zoKupongoka. Omu litantera-tantere mapisarome nononsumo depando nononzumo dopaMpepo, oku tomu dimbi nonomutjima nadinye, mu fumadeke” Jehova. Ngapi natu tura epukururo olyo pasirugana?
13 Nsene tuna kara nomalizuvho gomadona, kuvhura tu likwambere kwaJehova mekanderero ntani nokukondja mokuteda ko koyininke eyi ya wapera epando. (Resa Vafilipi 4:6-9.) Vamwe va yi nongonona asi kupurakena kononsumo detu doUhompa nokudidimba kuvakorangeda nokuvavatera va gazare yoyiwa. Munazinyetugara ogu ga ligwanekerere noudigu wounene ou wa mu nyegenyesere nokumuguvisa, kwa tente asi: “Kugusa ko tupu kukanderera nkenye apa, ame kwa kwete momutwe nonsumo dongandi doUhompa. Ayo ya reterere nge mbili zomomutjima pokudimba mahamberero gomawa kwaJehova yi kare asi kuziguruka ndi momutjima. Ntani buke Draw Close to Jehovah kwa zi pwagesere posiruwo sokuwapera. Ame kwa zi resere ruvali momvhura za kweme ko. Kwa kere ngwendi magadi gomawa vana kwita nge komutjima. Na yi diva asi Jehova ga tungikire elituromo lyange.”
‘Uumwe kureta mbili’
14. Sikara sombili, yisinke asi retesa po?
14 Poyigongi yetu yoyirongo, vakalipo kuvaretera ruhafo mokulikwatakana kumwe novanavazinyetu. Poyihorokwa yangoso kulikida sikara sombili esi ava hafere vantu vaKarunga naina, aso uumwe wetu wouzuni mudima. Ava ava yi mono narunye kuvatetukisa apa ava mono vantu ava va fira ngano kukara nonkore kuna ‘kukondjera uumwe ou za va pa mpepo va kare nombili novakwaawo.’ (Efe. 4:3) Uumwe owo kuna kara sidiviso sousili seyi va funda po vantu wovanzi.
15, 16. (a) Gomomuhoko musinke ga kere Peturusa, ntani ngapi omu ya mu kundamene? (b) Ngapi Jehova ga vaterere Peturusa a rundurure nkareso zendi?
15 Ayo udigu mokureta kumwe vantu wokonontundiliro dokulisiga-siga. Mokutuvatera tu kwate egano eyi twa hepa kufunda po yipo uumwe wangoso u tu tompoke, tu zeni tu tarurure sihonena somouye wokuhova somupositoli Peturusa. Nkareso zendi koVapagani wokudira kurugana yovamba kuvhura kuzinongonona mononkango dendi edi: “None mwa yi diva tupu asi, kapi va yi pulisira asi Mujuda a ligendere nomupagani ndi asi a ze kwendi. Nye Karunga ana yi likida nge asi na ha tumbura muntu asi kapi ga pongoka ndi asi ga nyata.” (Yirug. 10:24-29; 11:1-3) Mokuliza nomagano gomosiruwo sawo, Peturusa kwa kulire nepuliro eli asi Veta kwa va pulisilire tupu mokuhara Vajuda vakwaawo. Yimo ya monekere kwendi asi ayo ya wapa mokutara Vapagani ngononkore dawo edi ga hepere kunyenga.b
16 Gazara tupu omu ga lizuvhire Peturusa udona-dona apa ga ka hwililire membo lyaKoroneliusa. Kuvhura nye mugara ogu ga kere negano lyepuko kuhamena Vapagani a ya ‘gwanekere’ kumwe nawo ‘nokukara mouumwe nombili’ ndi? (Efe. 4:3, 16) Nhi, morwa komeho zomazuva gongandi, mpepo zaKarunga kwa mahwire mutjima gwaPeturusa, nokumuvatera a tameke kutura po marunduruko monkareso zendi nokugusa po malitondororo. Kupitira memoneko, Jehova ga yi mu zereserere nawa-nawa asi Karunga omu a tara vantu kapi ya korera korudi ndi komuhoko. (Yirug. 10:10-15) Yipo nye, Peturusa ga tanterere Koroneliusa asi: “Ntaantani nina yi kwata egano nawa-nawa asi Karunga kapi ga paka mpongo, nye mwankenye muhoko nkenye ogu a mu tjira, nye ta rugana youhunga, ta mu tambura.” (Yirug. 10:34, 35) Peturusa ga rundwilire nkareso zendi nokuyakara mouumwe ‘wovapuli vakwaawo.’—1 Pet. 2:17.
17. Uumwe musinke wokutetukisa ava hafere vantu vaKarunga?
17 Sihorokwa saPeturusa kutuvatera tu likide rupandu kerunduruko lyokutetukisa eli lina kuhoroka movantu vaKarunga naina. (Resa Jesaya 2:3, 4.) Mamiliyona govantu gokutundilira “momarudi nagenye nomomakoro nagenye nomonomuhoko nadinye nomomaraka nagenye” kwa rundurura magazaro gawo va koneke ‘mpango zaKarunga neyi yoyiwa ya va wapera ayo ya sikilira mo.’ (Ehor. 7:9; Rom. 12:2) Sinzi sawo nare kwa va pukisire nyengo nounkore nomalitatagano gomouzuni waSatana. Kupitira mokulironga Nonkango daKarunga nevatero lyompepo zokupongoka, awo va lironga ‘kukondjera eyi ayi reta mbili.’ (Rom. 14:19) Ayo kureta uumwe ou au yererepekesa Karunga.
18, 19. (a) Ngapi omu nkenye gumwe gwetu na gwederera ko kombili nokouumwe mombungakriste? (b) Yisinke ngatu ka konakona mosirongwa sokukwama ko?
18 Ngapi omu nkenye gumwe gwetu na gwederera ko kombili nokouumwe ou wa kara mokatji kovantu vaKarunga? Nombungakriste dononzi kwa kara mo vantu ava va tunda koyirongo yapeke. Vamwe kwa kara nonompo dokulisiga ndi kapi ava uyunga eraka lyetu nawa. Ose kuhetekera ko mokuvadiva nawa ndi? Eyi yiyo adi korangeda Nonkango daKarunga asi tu yi rugane. Apa ga tjangerere kombungakriste zomoRoma, kukwatera mo Vajuda noVapagani ava va ya kere vapuli, Paurusa kwa tente asi: “Litambura-tambureni nye, moomu ga mu tambura Kristusa, makura Karunga a fumanene po.” (Rom. 15:7) Moveli vamwe mombungakriste zeni wa hepa kudiva nawa ndi?
19 Yisinke hena yimwe eyi natu rugana yipo tu pulisire mpepo zokupongoka zi gendese eparu lyetu? Sirongwa sokukwama ko ngasi ka konakona epuro eli ngomu ngatu ka zogera yikara yimwe hena yoyiyimwa yompepo.
[Nondanda dokonhi]
a Siyimwa esi ga tumbwire Jesus kwa kwatera mo ‘yiyimwa yompepo’ ntani siyimwa ‘sotuna twetu’ esi ava gava Vakriste kwaKarunga kupitira mosirugana sokuzuvhisa Uhompa.—Heb. 13:15.
b Levitikus 19:18 kutanta asi: “Walye omu tengwidire muntu kuwoko ndi asi mu mu nyengerere, nye hareni vakweneni moomu mwa lihara nyamweni.” Vampitisili womaukarelikarunga goVajuda kwa yi tere asi “muntu” ndi ‘vakweni’ kwa tembe koVajuda vakwaawo tupu. Veta kwa pangererere Vaisraeli asi va likare ure nonomuhoko dapeke. Nampili ngoso, Veta kapi za kwatesere ko egano eli lya lihanenene movampitisili womaukarelikarunga womouye wokuhova asi navenye va hana asi Vajuda va kare nonkore nokuvanyenga.
Ngapi omu no vhura kulimburura?
• Ngapi natu likida eharo lyokulizambera kovanavazinyetu?
• Morwasinke ya karera nomulyo koVakriste mokusikisa mo sirugana sawo kwaJehova nehafo?
• Ngapi natu gwederera ko kombili nokouumwe mombungakriste?
[Kakende kepepenuno 25]
“Ava yiwo Vakriste wousili”
Buke zimwe kwa simwitira eyi ga uyungire mudinkantu goMujuda ogu ga kere modorongo, age kwa singwenene sikando sokuhova esi ga ligwanekerere noNombangi daJehova apa va mu twere kokamba Neuengamme. Age kwa tente asi:
“Apa tupu twa ya sikire ose Vajuda mokamba tu tunde koDachau, Vajuda vakwetu tava tameke kuhoraika nayinye eyi va kere nayo morwa kapi va here kutupa ko. . . . Apa twa dilire kukara mokamba ngatu livatere-vatere. Nye ngesi moudigu wokufa nokutara, nkenye ogu kuna kara tupu nosinka sokuliparura mwene, nokudivara vakwaawo. Nye gazara asi yisinke va rugene Valirongi woBibeli. Posiruwo sina, awo kwa rugene unene, mokuwapaika nomuliu domema. Kwato ogu ga vhulire kuyikwata egano omu va lididimikire ukaro owo. Awo kwa tente asi Jehova kwa va pere nonkondo. Awo kwa hepere mboroto zawo, morwa nzara za va kwete. Nye yisinke va rugene? Awo kwa pongaikire nomboroto edi va kere nado, tava gusa po dawo, ano dimwe tava pe ko vapuli vakwaawo ava va tundire koDachau. Awo kwa tambwire vapuli vakwaawo nokuvancumita. Komeho va lye, awo kwa kanderere. Konyima navenye va kutire makura tava hafa. Awo kwa tente asi kapi va kere hena nonzara. Yipo nye, na gazarere asi: Ava yiwo Vakriste wousili.”—Buke Between Resistance and Martyrdom—Jehovah’s Witnesses in the Third Reich.
[Mafano gepepenuno 23]
Ove kulirandera siruwo nkenye ezuva koyirugana yapeke yipo o hedere pepi naJehova ndi?