Ove kulikida uyerere waJehova ndi?

“Ose kulikida uyerere waJehova ngwendi nontarero.”—2 KOL. 3:18, NW.

NGAPI OMU NO LIMBURURA?

Nampili ngomu twa kara vananzo, ngapi omu natu likida uyerere waJehova?

Ngapi omu makanderero getu nokukara komapongo goSikriste ayi tu vatere tu likide uyerere waKarunga?

Yisinke nayi tu vatera tu twikire kuyererepeka Jehova?

1, 2. Morwasinke vantu nava honenena yikara yaJehova?

MONONKEDI dimwe, natuvenye kwa lifana novakurona vetu. Nampo twa zuvha muntu ana kutantera mumati asi: ‘Ove kwa fana oguho.’ Kuvhura nampo va tantere mukadona asi: ‘Ove kudiworokesa nge onyoko.’ Ntani vanona narunye kuhonena eyi ava mono kovakurona vawo. Nye ose ngapi? Kuvhura tu honene Guhyetu gemeguru, Jehova ndi? Nampili ngomu twa dira kumumona, kuvhura tu lironge yikara yendi yoyiwa pokunomena yisitwa yendi nopokuresa nokuteda Nonkango dendi, unene po kweyi nga uyunga neyi nga rugana Munwendi, Jesus. (Joh. 1:18; Rom. 1:20) Ose kuvhura kulikida uyerere waJehova.

² Komeho Karunga a unge vantu, age ga yi divire asi awo kuvhura kurugana mpango zendi nokuhonena yikara yendi nokumuyererepeka. (Resa Genesis 1:26, 27.) NgoVakriste, tuna hara kuhonena yikara yaKarunga gwetu. Mokurugana ngoso, ose ngatu kara nomfumwa zokulikida uyerere waKarunga yi kare asi ngapi omu twa lironga ndi mpo zetu musinke ndi rudi rwetu musinke. Morwasinke? Morwa “Karunga kapi ga paka mpongo, nye mwankenye muhoko nkenye ogu a mu tjira, nye ta rugana youhunga, ta mu tambura.”—Yirug. 10:34, 35.

3. Ngapi omu atu lizuvhu ngomu tuna kukarera Jehova?

³ Vakriste wovagwavekwa nawo kulikida uyerere waJehova. Mupositoli Paurusa ogu ga kere gumwe gwawo, kwa tjenge asi: “Ose natuvenye ava atu likida uyerere waJehova ngwendi nontarero noyipara ya hana kukudumika, kutusitunukisa tu mu fane, twa tunda mouyerere ou twa za mwaumwe.” (2 Kol. 3:18, NW) Apa ga tundire Mosesa koNdundu zaSinayi noyitafura yivali yoYipango murongo, age sipara sendi tasi paima morwa kuuyunga naJehova. (Ex. 34:29, 30) Nampili ngomu yipara yoVakriste ayi dili kupaima ngwendi sipara saMosesa, awo kulikida ruhafo apa ava tantere ko vapeke kuhamena Jehova noyikara yendi ntani nositambo sendi kovantu. Tu kare asi tu vagwavekwa ndi nonzwi dapeke, ose kwa fana ngwendi nontarero monkedi omu atu likida uyerere waJehova monkareso nomoyirugana yetu yokuzuvhisa. (2 Kol. 4:1) Ove kuna kulikida uyerere waJehova pokuparuka monkedi ezi azi mu hafesa nokulihameka mosirugana sokuzuvhisa ndi?

TUNA HARA KULIKIDA UYERERE WAJEHOVA

4, 5. (a) Ngwendi Paurusa, ekondjeso musinke twa kara nalyo? (b) Ngapi omu nzo za tu kundama?

⁴ Ngovakareli vaJehova, tuna hara kulikida uyerere wendi mwankenye eyi atu rugana. Nye ose kurugana mapuko nampili ngomu atu hara kurugana youhunga. Paurusa nage ga kere noudigu wangoso. (Resa Varoma 7:21-25.) Pokufaturura eyi atu karere nekondjeso lyangoso, Paurusa kwa tjenge asi: “Navenye kwa zona, makura uyerere waKarunga yiyo va u pira.” (Rom. 3:23) Morwa kwa pinga nzo kwaAdamu, vantu navenye kuvahampuruka monzo, ezi za fana ngwendi hompa gonyanya ogu a va pangere.—Rom. 5:12; 6:12.

⁵ Yisinke nzo? Kuna kara nkenye eyi ayi lilimbi noyikara nonompango daJehova. Nzo kuzonagura elikwatakano lyomuntu naKarunga. Nzo kutukondera tu dire kulikida uyerere waKarunga, ngwendi moomu sininke nasi vhura kukondera muponyi mokunonga yuma. Poyiruwo yimwe kuvhura tu zonene mowina ndi kapi tuna yi divire. (Num. 15:27-31) Nzo kutupangera, ntani kuvhura kutugusa ko koMusiti gwetu. (Epis. 51:5; Jes. 59:2; Koros. 1:21) Sinzi sovantu kuparuka monkedi ezi ava ligusa ko kwaKarunga, yipo nye ava zumbanesere mpito zongwa zokulikida uyerere waKarunga. Nzo kwa retera vantu yitundwamo yoyidona.

6. Nampili ngomu twa kara vananzo, ngapi omu natu likida uyerere waKarunga?

⁶ Nampili ngomu va tu hampuruka monzo, Jehova ‘Karunga kutupa ehuguvaro.’ (Rom. 15:13) Age kwa geve Jesus Kristusa ngonzambo zosizoweseso sokutumangurura konzo. Pokulikida epuro monzambo ozo, kapi atu ‘kara hena vapika wononzo,’ ntani ose kuvhura kulikida uyerere waJehova nokukara vakaume vendi. (Rom. 5:19; 6:6; Joh. 3:16) Nsene tu kwaterera kelikwatakano lyetu naJehova, age ta tu tungike ngesi ano komeho ngatu ka sikilira mo nokukagwana mwenyo gwanarunye. Azo mfumwa zonene asi Karunga kututara ngovantu wokuvhura kulikida uyerere wendi nampili ngomu twa kara vananzo.

KULIKIDA UYERERE WAKARUNGA

7. Yisinke twa hepa kutambura nsene tuna hara kulikida uyerere waKarunga?

⁷ Ngovananzo, natuvenye twa kara nomaupirankondo. Nsene tuna hara kulikida uyerere waKarunga, nkenye gumwe gwetu ga hepa kudiva upirankondo wendi. (2 Hist. 6:36) Twa hepa kuyitambura asi twa kara nomaupirankondo ogo makura twa hepa kugarwanesa po yipo tu vhure kuyererepeka Karunga. Pasihonena, nsene kutarera mafano goruhonda, twa hepa kuyitambura asi tuna hepa evatero lyovakuronambunga. (Jak. 5:14, 15) Ezi yizo ntambo zokuhova twa hepa kurugana nsene tuna hara kuyererepeka Karunga. Twa hepa kudivilisa asi kuna kuparuka monkedi ezi ana tu harere Jehova. (Yis. 28:18; 1 Kol. 10:12) Yi kare asi maupirankondo getu musinke, twa hepa kukondja tu ga rwanesa po yipo tu vhure kulikida uyerere waKarunga.

8. Nampili ngomu twa dira kusikilira mo, yisinke twa hepa kurugana?

⁸ Jesus yige gelike muntu ogu nga rugana nkenye apa yokuhafesa Karunga nokulikida uyerere wendi. Nampili ngomu twa dira kusikilira mo, twa hepa kukondja tu temwinine sihonena saJesus. (1 Pet. 2:21) Jehova kapi a koneke tupu ezokomeho lyetu nye hena nekondjo lyetu lyokumuyererepeka, ntani age kutungika ekondjo lyangoso.

9. Ngapi omu azi tu vatere Bibeli yipo tu likide uyerere waKarunga?

⁹ Bibeli kuvhura kutuvatera tu kwate egano omu natu vhura kulikida nawa uyerere waKarunga. Twa hepa kulironga nawa Bibeli nokuteda ko kweyi azi tanta. (Epis. 1:1-3) Kuresa Matjangwa nkenye apa ngayi tu vatera tu ture po mawapukururo. (Resa Jakopo 1:22-25.) Eyi atu lirongo moBibeli kunkondopeka epuro lyetu neharo lyetu lyokunyokera po nzo yipo tu hafese Jehova.—Epis. 119:11, 47, 48.

10. Ngapi omu makanderero naga tu vatera tu rugane unene mosirugana saJehova?

¹⁰ Nsene tuna hara kulikida uyerere waKarunga, twa hepa hena ‘kukanderera narunye.’ (Rom. 12:12) Twa hepa kukanderera kwaJehova yipo a tu vatere tu mu karere monkedi ezi a tambura. Kuvhura tu mu hundire mpepo zendi zokupongoka nepuro lyenene nokutunkondopeka tu nyokere po maheteko ntani nevhuliko ‘lyokutoona nawa nonkango daKarunga dousili.’ (2 Tim. 2:15; Mat. 6:13; Ruk. 11:13; 17:5) Ngwendi moomu munona a korere koguhwe, nose twa hepa kukorera kwaGuhyetu gemeguru, Jehova. Nsene tu hundira Jehova a tu vatere tu rugane unene mosirugana sendi, tuna si huguvara asi nga tu vatera. Twa ha lizuvha asi makanderero getu kumunyegenyesa. Tu ruganeseni makanderero getu mokumuhamberera nokumupandura nokumuhundira evyukiso, unene po nsene kuna kara meheteko ntani a tu vatere tu mu karere monkedi ezi azi yererepeke edina lyendi lyokupongoka.—Epis. 86:12; Jak. 1:5-7.

11. Ngapi omu aga tu vatere mapongo tu likide uyerere waKarunga?

¹¹ Karunga kwa pa situmbukira “mukareli gokulimburukwa gonondunge” a pakere mbili nonzwi dendi. (Mat. 24:45-47; Epis. 100:3) Mbunga zomukareli kuna hara kutuvatera natuvenye tu likide uyerere waJehova. Nkedi zimwe omu azi yi rugana kuna kara kupitira momapongo aga aga tu vatere tu wapukurure yikara yetu, ngwendi moomu muhonzi a wapukurura yikoverero yetu yipo tu moneke nawa. (Heb. 10:24, 25) Eyi yiyo twa hepera kukasika komapongo nosiruwo, ano nsene twa kara nonkareso zokuhulilira kapi ngatu gwanena mo mauwa nagenye.

TU HONENENI KARUNGA

12. Ngapi omu natu honena Karunga?

¹² Kuvhura tu likide uyerere waJehova nsene tu ‘hetekera ko kukara moomu ga kara age.’ (Efe. 5:2) Nkedi zimwe omu natu honena Jehova kuna kara pokulironga kugazara monkedi omu a gazara. Pokudira kuyirugana kuswawisisa Jehova nokuturetera maudigu. Mokumona asi kuna kuparuka mouzuni waSatana, twa hepa kukondja tu nyenge eyi ga nyenga Jehova nokuhara eyi ga hara. (Epis. 97:10; 1 Joh. 5:19) Yosili nkedi zongwa zokukarera Karunga kuna kara kurugana yininke yokumufumadekesa ko.—Resa 1 Vakolinte 10:31.

13. Morwasinke natu nyengera nzo, ntani yisinke ngayi tu tumangeda tu yi rugana?

¹³ Jehova kwa nyenga nzo, nose twa hepa kuzinyenga. Nsene tu nyenga nzo, ose ngatu kara ure noyininke eyi ayi tu ninkisa tu zone. Pasihonena, twa hepa kukara ure nava ava rwanesa usili ava ava dili kuyererepeka Karunga. (Deut. 13:6-9) Twa hepa kunyokera po varwanesi usili nava ava lininkisa asi vanavanzinyetu nye awo kuswawisisa Karunga. Twa hepa kulikara ure nawo nampili va kare asi vemepata lyetu. (1 Kol. 5:11) Kuhetekera ko kulikida varwanesi usili nava ava rwanesa mbunga zaJehova asi va lipuka, siponga unene. Nombudi dawo, di kare koInterneta ndi moyimbapiratjangwa, kuvhura kuzonagura po elikwatakano lyetu naJehova.—Resa Jesaya 5:20; Mateusa 7:6.

14. Nkedi zimwe zomulyo musinke natu honena Jehova, ntani morwasinke?

¹⁴ Kulikida eharo kuna kara nkedi zimwe zomulyo kwetu zokuhonena Guhyetu gemeguru. (1 Joh. 4:16-19) Eharo eli twa kara nalyo mokatji ketu kutudimbwilisa asi ose sili varongwa vaJesus novakareli vaJehova. (Joh. 13:34, 35) Morwa kapi twa sikilira mo poyiruwo yimwe udigu kulikida eharo, nye twa hepa kuhetekera ko kulikida eharo nkenye apa. Kutunga po eharo noyikara yimwe yoSikriste ngayi tu vatera tu nyokere po kuzona ndi kuruganena wopeke udona.—2 Pet. 1:5-7.

15. Ngapi eharo ali kundama elikwatakano lyetu nava wopeke?

¹⁵ Eharo kutuninkisa tu ruganene uwa vakwetetu. (Rom. 13:8-10) Pasihonena, mugara nomukadi ava va lihara, ngava lihuguvara nkenye apa. Nsene tu hara vakuronambunga nokufumadeka sirugana sawo, ngayi tu vatera tu limburukwe kevyukiso lyawo. Vanona ava va hara vakurona vawo kuvalimburukwa ntani kapi ava va uyunga momudona. Nsene tu hara vantu vakwetetu, kapi ngatu va tara asi awo kwato mulyo ndi tu va uyungise monkedi zokudira efumadeko. (Jak. 3:9) Ntani vakuronambunga ava va hara nonzwi daKarunga ngava di tekura monkedi zongwa.—Yirug. 20:28, 29.

16. Ngapi kulikida eharo aku tu vatere moyirugana yokuzuvhisa?

¹⁶ Twa hepa hena kulikida eharo moyirugana yetu yokuzuvhisa. Morwa eharo lyokuhara Jehova, ayo kapi ngayi tu dompesa mutjima nampili vantu va dire kutupurakena ndi va dire kulitura mo. Nye, ose ngatu twikira kuzuvhisa mbudi zongwa. Eharo ngali tu tumangeda tu liwapaikire nawa nokukara varongi wovawa woNonkango daKarunga. Nsene twa hara sili Karunga novakwetetu, ose kapi ngatu tara sirugana sokuzuvhisa Uhompa asi sirugana tupu. Nye ngatu si tara asi mulyo ntani ngatu si rugana noruhafo.—Mat. 10:7.

TU TWIKIRENI KUYEREREPEKA JEHOVA

17. Morwa twa diva asi nzo kutuninkisa tu dire kulikida uyerere waKarunga, ano yisinke twa hepa kurugana?

¹⁷ Sinzi sovantu mouzuni kapi va diva omu za kara nzo nosiponga, nye ose twa yi diva. Eyi kutuninkisa tu rwanese po nkareso zokuzona. Twa hepa kudeura ezwi lyetu lyokomutjima yipo yi tu vatera tu rugane youhunga poopo tupu tuna kutameka kukara nomagazaro gomadona. (Rom. 7:22, 23) Yosili, ose varupiranonkondo, nye Karunga kutunkondopeka tu rugane youhunga mwankenye ukaro.—2 Kol. 12:10.

18, 19. (a) Yisinke ayi tu vatere tu funde po erwaneso lyaSatana nonompepo dendi? (b) Yisinke tuna tokomene kurugana?

¹⁸ Nsene tuna hara kuyererepeka Jehova, twa hepa kurwanesa po nompepo donondona. Yirwiso eyi ga tu pa Karunga kuvhura kutuvatera yi tu tompoke. (Efe. 6:11-13) Satana kukondja a guse uyerere ou wa tumbukira tupu Jehova. Muzonaguli kurugana unene yipo a zonagure po elikwatakano lyetu naJehova. Morwa mamiliyona govantu kukwaterera koulimburukwi wawo nokuyererepeka Jehova, eyi yiyo ayi ninkisa Satana a handuke unene. Tu twikireni kuhamberera Jehova ngwendi yisitwa yemeguru eyi ayi zigire asi: “Ove Hompa Karunga gwetu, uyerere nefumano nononkondo yoge, yeeyi nyove wa sita nayinye, ano mpango zoge yizo za pakesa po nayinye, yi pwe kusita.”—Ehor. 4:11.

¹⁹ Tu tokomeneni kutwikira kuyererepeka Jehova. Ayo kumuhafesa apa a mono vakareli vendi wovanzi kuna kukondja unene mokumuhonena nokulikida uyerere wendi. (Yis. 27:11) Ngano tu kare nomalizuvho gwendi gaNdafita ogu ga dimbire asi: “Ame kuna hara ni ku pandure nomutjima nagunye, HOMPA Karunga gwange; Ame kuna hara kuudisa unene woge narunye-narunye.” (Epis. 86:12) Ntaantani tupu vantu wovalimburukwi ngava likide nawa-nawa uyerere waJehova nokumuhamberera narunye-narunye! Aso ngasi ka kara siruwo soruhafo. Ove kuna kulikida uyerere waJehova Karunga ngesi, nehuguvaro lyokukayirugana narunye ndi?

[Mafano pepenuno 27]

Ove kuna kulikida uyerere waJehova mononkedi edi ndi?