1 Petelo
2 Dianu vo, nuyambula e mbi yawonso, yo luvunu lwawonso, yo umpuki* ye kimpala yo makumbu mawonso. 2 Nze nsedia, nuzolanga e kimvumina kia diambu dia Nzambi, kina ke kiasangwa má ko* kimana nwanungunuka yamuna luvuluzu, 3 kadi nuzeye* wo vo o Mfumu nkwa walakazi.
4 Wau nwizidi kwa yandi, wa tadi diamoyo dina diabembolwa kwa wantu, kansi diasolwa kwa Nzambi ye diantalu kwa yandi, 5 oyeno mpe, nu matadi mamoyo, nutungilwanga e nzo ya kimwanda, nwakala nganga zavauka, kimana nwatambika tukau twa mwanda, tutondakana kwa Nzambi muna Yesu Kristu. 6 Kadi Sono kivovanga vo: “Tala, nsidi muna Zione tadi diasolwa, e tadi diantalu dia konko kia nkubilwa, konso ona okwikila dio ke kendelekwa ko.”*
7 Dianu vo, kuna kwa yeno wantalu kikilu, kadi nu minkwikizi; kansi kw’awana ke bekwikilanga ko, “e tadi dina diabembolwa kw’atungi i diau diakituka se mbuta tadi dia konko”* 8 ye “tadi dia sakuba ye nsenzele a nlelo.” Betanga sakuba kadi ke belemvokelanga diambu ko. Eyayi i mbaninu ikubavingilanga. 9 Vo i yeno “nu kanda diasolwa, nu mfumu za nganga, nu zula kiavauka, nu nkangu akuvuila a Nzambi, kimana nwasamuna mwawonso mana mansongi”* ma Ndiona wanukatula muna tombe, nwiza muna ntemo andi wasivi. 10 Kadi oyeno, muna ntangwa yavioka, ke nwakala nkangu ko, owau nu nkangu a Nzambi; ke nwafwilwa nkenda ko, kansi owau nufwidilu e nkenda.
11 Azolwa, inukasakese nze anzenza ye minduti a nzila, nuyikenga muna zolela ya nitu, ina ikununwanisang’e vita. 12 Nwakala e nkal’ambote vana vena e zula, kimana muna mambu mana bekunutumbilanga nze mimpanga mambi, muna mavangu meno mambote bemonanga, bakembelela Nzambi muna lumbu kia nkingul’andi.
13 Muna diambu dia Mfumu, nusakalela nkubika zawonso za wantu, kana ntinu wau kasundidi e wisa 14 yovo anguvulu wau betumwanga kwa yandi muna tumba mimpanga mambi yo sanisina mimpanga mawete. 15 Kadi i luzolo lwa Nzambi vo wau nuvanganga o wete nwasukisa e moko ya uzowa ya minkondwa ngangu. 16 Nukala se nkangu avevoka, ke nusadila luvevoko lweno ko nze fukwa* kia mavangu mambi, kansi nze ntaudi za Nzambi. 17 Nuzitisanga wantu a mpila zawonso, nuzola kintwadi kia wana-ngudi,* nuvumina Nzambi, nuzitisa o ntinu.
18 Yambula aselo basakalela e mfumu zau kuna vumi wawonso, ke zina zambote kaka ko ye za ntim’anleka, kansi ye zina za ntima mia mbâdi mpe. 19 Kadi ediadi dialuyangalalu, avo muntu muna diambu dia ntona zandi muna Nzambi ozizidila e mpasi yo bangikwa kondwa kuma. 20 Nkia mfunu dina avo nuzizidila e mpasi za wandwa mu kuma kia diambu diambi nuvangidi? Kansi avo numweswa e mpasi wau nuvanganga mawete yo zizidila zo, ediadi dia luyangalalu kwa Nzambi.
21 Kieleka, kiaki i kuma nwabokelelwa, e kuma kadi o Kristu nkutu wanumwena e mpasi, wanusisila mbandu kimana nwalanda ntambi zandi una ufwene. 22 Kasumuka ko, ngatu soloka luvunu muna nu’andi. 23 Vava kalevolwanga* kavutula malevo* ko. Vava kamweswanga e mpasi, kavumisa ko, kansi wabunda e vuvu kiandi kwa Ndiona ofundisilanga muna unsongi. 24 Yandi kibeni wanata masumu meto muna nitu andi vana nti, kimana oyeto twavevolwa muna masumu, twakala moyo muna unsongi. “Muna mputa zandi i nwasasulwilwa.” 25 Kadi nwakala nze mameme mavila, kansi owau nuvutukidi kwa mvungudi yo nkengi a mioyo mieno.