Lusengomono
21 Mbwene zulu diampa ye nz’ampa; kadi e zulu diantete ye nz’antete iviokele, o kalunga kena diaka ko. 2 Mbwene mpe mbanz’avauka, Yerusaleme Yampa, ikulumukini tuka kuna zulu kwa Nzambi, yakubama nze ndumb’ansompi uyiviengese mu kuma kia nkaz’andi. 3 I bosi, ngwidi nding’angolo itukidi vana kunda, ivovele vo: “Tala! E saba kia Nzambi kina yo wantu, kakala yau, bekala nkangu andi. O Nzambi yandi kibeni okala yau. 4 Okunguna mansanga mawonso muna meso mau, lufwa ke lukala diaka ko, ngatu kala diaka dilu, yovo kazu ngatu mpasi. Mambu mantete maviokele.”
5 Ndiona ofongele vana kunda ovovele vo: “Tala! Mvanga lekwa yawonso se yampa.” Ovovele mpe vo: “Soneka, kadi e mambu mama makwikizi* ye ludi.” 6 Umpovese vo: “Mavangamene! Omono i Alfa ye Omega,* i lubantiku ye nsuka. Konso ona wina ye vuina, ikumvana nto za maza ma moyo e ngovo.* 7 Konso ona osunda, ovua mambu mama, omono ikala Nzambi andi, oyandi okala mwan’ame. 8 Kansi akwa unkuta ye awana bakondelo lukwikilu, ye akwa usafu ye ungemi, ye avondi a wantu, ye minta-zumba,* ye akwa mpandu, ye asambidi a teke ye akwa luvunu awonso, e kunku kiau kuna yanga dikweme tiya ye lengo. O lwalu i lufwa lwanzole.”
9 Mosi muna mbasi nsambwadi zina ye pidi* nsambwadi yazala ye vuku nsambwadi yansuka, wizidi, umpovese vo: “Wiza, ikusonga ndumb’ansompi, nkaz’a Mwan’a meme.” 10 Undete muna nkum’a mwanda vana mongo anene ye wandá, unsongele mbanz’avauka, Yerusaleme, ikulumukini kuna zulu, tuka kwa Nzambi 11 ina yo nkembo a Nzambi. O ntemo andi nze tadi diantalu kikilu, nze tadi dia yasepi dikezimanga nze kristale. 12 Ina ye yaka kiampwena, kiandá, ye mielo 12 ye mbasi 12 vana mielo, vana mielo vasonama e nkumbu za makanda 12 ma wan’a Isaele. 13 Kuna este mielo tatu, kuna node mielo tatu, kuna sude mielo tatu ye kuna weste mielo tatu. 14 E yaka kia mbanza mpe kina ye nkubilwa 12 za matadi, i mûna mwasonama e nkumbu 12 za ntumwa 12 za Mwan’a meme.
15 Ndiona ovovelenge yame okedi ye tezelo kia tutu dia wolo kimana kateza e mbanza, mielo miandi ye yaka yandi. 16 E mbanza ina ye ndambu yá zafwanana, o lambuka yo vonga mpe diau adimosi. O tezele e mbanza muna tutu, 12.000 ma stadia;* o lambuka, yo vonga yo la kwafwanana. 17 Otezele mpe yaka yandi, 144 ma yikonso* mun’owu wa ntezelo a muntu, eyayi mpe i ntezelo a mbasi. 18 E yaka ya matadi ma yasepi, e mbanza ya wolo wavelela nze pelo. 19 E nkubilwa ya yaka ya mbanza yaviengeselwa muna matadi mawonso mantalu: e nkubilw’antete yasepi, yanzole safiro, yantatu kankedone, ya nyá emeraude, 20 yatanu sadoni, yasambanu saredi, yansambwadi kerusolito, yanana berile, yavua topaze, yakumi kerusopraso, yakumi ye mosi yakinto, yakumi ye zole ametuste. 21 E mielo 12, pelola 12; konso mwelo wa pelola mosi. E nzila zampwena za mbanza za wolo wavelela nze pelo.
22 Kimwene mo tempelo ko, kadi Yave wa Nzambi wa Mpungu-ngolo i tempelo andi yo Mwan’a meme mpe. 23 E mbanza ke ivuidi ntangwa mfunu ko ngatu ngonde katemesa yo, kadi o nkembo a Nzambi utemenanga yo, e mini kiandi i Mwan’a meme. 24 E zula ikangalela muna ntemo andi, e ntinu mia nza betwasa nkembo au muna yandi. 25 E mielo miandi ke mizikwa nkutu ko muna mwini, kadi o fuku ke ukala diaka ko. 26 Betwasa nkembo yo zitu wa zula muna yandi. 27 Konso lekwa kiasafuka, konso ona ovanganga oma mangemi yo vova luvunu ke kota mo nkutu ko; awana kaka basonama muna nkand’a moyo a Mwan’a meme i bekota mo.