Kuna Kwa Ayibere

11 O lukwikilu i lusikidisu lwa mana mesiwanga e vuvu,+ i ziku kia mana malembele moneka. 2 Kadi muna lukwikilu, wantu a nz’ankulu* i basilwa umbangi.

3 Muna lukwikilu dituzayidi wo vo, e tandu* muna mvovo a Nzambi yakubikilwa, kimana ina imonekanga yakadila muna lekwa ilembi monekanga.

4 Muna lukwikilu, Abele watambika kimenga kwa Nzambi kiasunda kina kia Kaini+ o wete, muna lukwikilu lwalu i kasidilwa umbangi vo muntu a nsongi kakala, kadi Nzambi watonda* tukau twandi,+ kana una vo wafwa, wakinu vova+ muna lukwikilu lwandi.

5 Muna lukwikilu, Enoke+ wakatulwa kimana kalembi mona lufwa, kasoloka ko, e kuma kadi Nzambi wankatula;+ kadi una kakatwilu ko, watambula kimbangi vo Nzambi kayangidika. 6 Dianu vo, kondwa kwa lukwikilu ke dilendakana ko mu toma yangidika Nzambi, kadi konso ndiona ofinama Nzambi kafwete kwikila vo una kieleka, yandi i nsendi a awana bekumvavanga ye ziku kiawonso.+

7 Muna lukwikilu, Noa+ vava katambula lulukisu lwa Nzambi muna mambu ke mateka moneka ko,+ wasonga vumi wa Nzambi yo tunga e nzaza+ muna vuluza esi nzo andi; muna lukwikilu lwalu watumba e nza,+ yo badikilwa vo nsongi muna diambu dia lukwikilu lwandi.

8 Muna lukwikilu, Abarayama+ vava kabokelwa, walemvoka yo kwenda kuna fulu kina ketambula se vua diandi; wayenda kana una vo kazaya ko kuna kayendanga.+ 9 Muna lukwikilu i kakadila nze nzenza muna nsi a nsilu,+ wazingilanga muna saba+ yo Isaki yo Yakobo, ana bavingilanga yandi e vua dia nsilu wau mosi.+ 10 Kadi wavingilanga e mbanza ina ye nkubilwa yasikila, ina vo Nzambi i ntungi ye mvangi.+

11 Muna lukwikilu, o Sara mpe wavua e ngolo za yimita mbongo, kana una vo nunu kakala,*+ wau kabadikila Ndiona wasia nsilu vo nkwa kwikizi.* 12 Muna kuma kiaki, muna yakala dimosi dia nunu,*+ Abarayama, mwawutukila ulolo wa wana+ nze ntetembwa za zulu, ke balendi tangakana ko nze senge vana kumu dia kalunga.+

13 Awaya yau awonso muna lukwikilu bafwila, kana una vo ke batambula mana basilwa o nsilu ko;+ kansi kwanda bamwena mo yo+ tambulwila mo ye kiese, basianga umbangi vo nzenza ye minduti a nzila bakala muna nsi yayina. 14 Kadi awana bevovanga mpila yayi besonganga e ziku vo fulu kiau bevavanga. 15 Kele vo bayindulanga kaka e fulu kina batuka,+ badi vava e lau diavutuka. 16 Kansi owau, fulu kisundidi o wete bevavanga, kina vo, kia zulu. Dianu vo, o Nzambi ke mwenanga dio nsoni ko, edi diayikilwa vo Nzambi au,+ kadi wabakubikila e mbanza.+

17 Muna lukwikilu Abarayama vava katontwa,+ diakala nze yandi watambika Isaki—ndiona watambula e nsilu ye kiese kiawonso, wakubama mu tambika mwan’andi mosi kaka+⁠— 18 kanele vo Nzambi wamvovesa vo: “Ina iyikilwa vo mbongo aku muna Isaki ituka.”+ 19 Edi kayindula vo Nzambi olenda kumfula muna mafwa, i mûna kantambulwila nze kingana.+

20 Muna lukwikilu mpe, Isaki wasambula Yakobo+ yo Esau+ muna mambu mana mekwiza.

21 Muna lukwikilu, Yakobo vava kafinama fwa,+ wasambula wan’a Yosefe+ yo sambila Nzambi wau kasimba nkau andi.+

22 Muna lukwikilu, Yosefe vava kafinama fwa, wavovela luvaiku lwa wan’a Isaele, yo vana luludiku mu kuma kia visi yandi.*+

23 Muna lukwikilu vava Mose kawutuka, waswekwa ngonde tatu kwa se ye ngudi andi,+ kadi bamona vo mwana wambote-mbote,+ ke bamwena nkanikinu a ntinu wonga ko.+ 24 Muna lukwikilu, Mose vava kakala se mbuta,+ wamenga yikilwa vo ntekelo a Faro,*+ 25 wasola bangikwa kumosi yo nkangu a Nzambi, vana fulu kia yangalela o wete wa sumu wa kolo kiandwelo, 26 kadi wabadikila luvezo lwa Kristu vo i kimvuama kisundidi ke mu tusalu twa Engipito ko, kadi muna nsendo i kasia o meso. 27 Muna lukwikilu, wasisa Engipito,+ kamwena makasi ma ntinu wonga ko,+ kadi wazindalala nze yandi wamonanga Ndiona olembi monekanga.+ 28 Muna lukwikilu, wadia e Nduta yo kusa o menga vana tungwa ya mielo, kimana o mfwasi kalembi vonda* o wan’au antete.+

29 Muna lukwikilu baviokela muna Mbu Ambwaki nze vana ntoto ayuma,+ kansi vava esi Engipito bavava wo vanga, o mbu wabamina.+

30 Muna lukwikilu, e yaka ya Yeriko yabwa vava yazietwa kwa nkangu mu lumbu nsambwadi.+ 31 Muna lukwikilu Rakabi wa nkembi* i kalembi fwila kumosi ye akolami, kadi watambula alangi kuna luvuvamu.+

32 Adieyi ivova diaka? Kadi e ntangwa ikè muna yika oma ma Ngidone,+ Baraki,+ Samesone,+ Yefeta,+ Davidi,+ Samuele+ ye ngunza zankaka. 33 Muna lukwikilu, basunda yitinu e ngolo,+ basikidisa unsongi, batambula e nsilu,+ bakaka e nua mia nkosi,+ 34 basunda e ngolo za tiya,+ bavuluzwa muna meno ma nsosolo,+ bakumama muna lutovoko,+ bakituka se mabamba-ngolo muna vita,+ batinisa e vu kia atantu.+ 35 Akento batambula mafwa mau muna lufuluku,+ kansi akala ankaka babangikwa yamuna lufwa wau balembi tambulwila luvevoko, kimana babaka lufuluku lusundidi o wete. 36 Ankaka batontelwa muna tuvezo yo zwabulwa, muna tuvambu+ ye pelezo nkutu.+ 37 Batubwa matadi,+ batontwa, babukunua vana kati, bavondelwa muna nsosolo,+ bavuata nkanda mia mameme ye mia nkombo,+ vava ke bakala ye lekwa ko, vava bakala muna mpasi,+ yo vangwa e mbi;+ 38 e nza ke yabayangalela ko. Batinina muna makanga, muna miongo, muna nduka+ ye muna mawulu.

39 Awonso awaya, kana una vo basilwa umbangi wambote muna diambu dia lukwikilu lwau, ke bamona ndungan’a nsilu ko, 40 kadi o Nzambi wayindula kutuvana e lekwa kisundidi o wete,+ kimana balembi kituka se alunga kondwa kwa yeto.