Kala ye Ziku vo Yave Okufiaulwisa

1. Yika una wakala e zingu kia Ayuda muna kinkole.

YINDULA una bamona Ayuda ana bakala muna kinkole kuna Babele. Bamona vava e nsi au ya kingutukila yafwaswa. Muna kuma kia masumu mau ye masumu ma akulu au, bayalulwa muna nsi au yo natwa kuna nsi a kinzenza. (2 Tus. 36:15, 16, 20, 21) Dialudi vo vava bakala muna kinkole kuna Babele, bakala ye filuvevoko muna sala e yaka salu ya lumbu ke lumbu. (Yer. 29:4-7) Kana una vo i wau, e zingu kiau kiampasi kikilu kiakala, ke kiau ko i mpila zingu bavavanga. Aweyi bamona mu kuma kia mpasi zau? Tala dina kavova selo kimosi kia kwikizi ona wakala muna kinkole: “Vana nlambu a nkoko mia Babele, i vana twavuanda. Twadila vava twasungamenanga Zione.” (Nku. 137:1) Ayuda lufiaulwisu kikilu bavuanga o mfunu, kansi nani wadi kubafialwisa?

2-3. (a) Adieyi Yave kavanga mu kuma kia Ayuda bakala muna kinkole? (b) Nkia mambu tubadika mu longi diadi?

² Yave i “Nzambi a fiauzi wawonso.” (2 Kor. 1:3) Wau vo Nzambi a zola, oyangalelanga fiaulwisa awonso bekumfinamanga. Yave wazaya wo vo akaka muna Ayuda ana bakala muna kinkole, betambulwila e tumbu kina bavewa yo vutuka kwa yandi. (Yes. 59:20) Vioka 100 mvu vitila Ayuda banatwa muna kinkole, Yave wavumunuina Yesaya wa ngunza muna soneka nkanda uyikilwanga muna nkumbu andi. Nkia kani kasonekena nkanda wau? Yesaya wavova vo: “‘Nufiaulwisa, nufiaulwisa o nkangu ame,’ u kavovele o Nzambi eno.” (Yes. 40:1) Muna nkand’a Yesaya, Yave wavana lufiaulwisu badi vua o mfunu Ayuda muna kinkole.

³ Nze Ayuda ana bakala muna kinkole, yeto mpe lufiaulwisu tuvuanga o mfunu ntangwa ke ntangwa. Mu longi diadi, tubadika mpila tatu zina Yave kafiaulwisila Ayuda ana bakala muna kinkole: (1) Wasia nsilu waloloka awana baviluka o ntima, (2) wavana e vuvu kwa nkangu andi ye (3) wabasadisa mu lembi kala yo wonga. Tubadika mpe una Yave kekutufiaulwisilanga o unu.

YAVE MUNA NKENDA ZANDI OKUTULOLOKANGA

4. Aweyi Yave kasongela vo yandi Nzambi a nkenda? (Yesaya 55:7)

⁴ Yave i “Se dia nkenda.” (2 Kor. 1:3) Wasonga e fu kiaki vava kasia nsilu waloloka Ayuda ana baviluka ntima muna kinkole. (Tanga Yesaya 55:7.) Wavova vo: “Muna walakazi wakwele mvu, ikufwila e nkenda.” (Yes. 54:8) Aweyi Yave kasongela e nkenda zandi? Kana una vo Ayuda badi kala kuna Babele mu mvu miayingi mu kuma kia ukolami wau, Yave wasia nsilu vo ke badi kwamanana kwakuna ko yakwele mvu. (Yes. 40:2) Kalukatikisu ko vo e mvovo miami miafiaulwisa Ayuda ana baviluka ntima ye bazola yangidika Yave.

5. Ekuma tuvuididi kuma yayingi mu kwikila vo Yave okutulolokanga ke mu Ayuda ko?

⁵ Longi kwa yeto. Yave wakubama kena muna loloka emvimba e selo yandi. O unu tuvuidi kuma yayingi mu kwikila ediadi ke mu Ayuda ko ana bakala muna kinkole. Mu nkia mpila? Kadi tuzeye dina Yave kavanga muna loloka masumu meto. Vioka tandu yayingi vava Yesaya kavovela luloloko lwa Yave, o Yave watuma Mwan’andi ova ntoto kimana kavana lukûlu mu kuma kia asumuki awonso bevilukanga o ntima. Wau vo Yesu wafwa muna wete dieto, Yave olenda loloka emvimba masumu meto. (Mav. 3:19; Yes. 1:18; Efe. 1:7) Ekwe Nzambi a nkenda tusadilanga!

6. Ekuma dinina o mfunu mu sianga e sungididi muna nkenda za Yave? (Tala mpe mafoto.)

⁶ E mvovo mia Yave kuna kwa Ayuda muna Yesaya 55:7, milenda kutusadisa mpe kele vo tukwamanananga kuyitumba mu kuma kia masumu mana twavola, kana nkutu vo twaviluka e ntima. Ediadi dialudi kikilu kele vo twakinu mona e mpasi mu kuma kia vilwa weto. Ozevo, avo twafunguna masumu meto yo yambula vanga mambu mambi, tulenda kala ye ziku vo Yave watuloloka. Vava Yave kekutulolokanga, obakanga e nzengo za vilakana masumu meto. (Tezanesa dio yo Yeremiya 31:34.) Wau vo Yave ke yindulanga diaka ko masumu mana twavola, yeto mpe ke tufwete mo yindulanga ko. Edi disundidi o mfunu kuna kwa Yave i mana tuvanganga owau, ke vilwa ko una twavanga muna mvu miavioka. (Yez. 33:14-16) Ke kolo ko muna nz’ampa, o Se dieto dia nkenda okatula emvimba konso mpasi tumonanga mu kuma kia vilwa weto.

7. Adieyi dilenda kutufila mu vava lusadisu kele vo sumu tuswekanga?

⁷ Adieyi tufwete vanga kele vo tukwamanananga kuyitumba mu kuma kia sumu diampwena twavola ye tuswekanga dio? Bibila kikutukasakesanga twavava lusadisu lwa akuluntu. (Yak. 5:14, 15) Kansi, dilenda kala diampasi mu zayisa kwa akaka dina twavanga. Tufwete sungamenanga vo Yave osadilanga wantu awaya muna kutusadisa ye bekadila yeto kuna zola ye ngemba nze una Yave kekadilanga yeto. Tala una nkenda za Yave zafiaulwisila mpangi Arthur,a vava e ntona zandi zantumbanga. Mpangi Arthur wavova vo: “Yatalanga mavangu ma zumba mu mvu wamvimba. Kansi vava ya wá e longi diavovela ntona, yafunguna e sumu diame kwa nkaz’ame ye kwa akuluntu. Vava yafunguna e sumu diame yavua luvevoko, kansi yakwamanana kendalala mu kuma kia dina yavanga. Akuluntu bampovesa vo, Yave kambembola ko. Okutuvananga e tumbu kadi zola ke kutuzolanga. E mvovo miami mia ngemba miasimba ntim’ame ye miansadisa mu soba ngindu zame.” O unu, mpangi Arthur osalanga se mviti a nzila ye selo kia salu. Dialufiaulwisu kikilu mu zaya vo Yave okutufwilanga e nkenda avo tuvilukidi o ntima muna masumu meto.

YAVE OKUTUVANANGA E VUVU

8. (a) Yave nkia vuvu kavana kwa Ayuda bakala muna kinkole? (b) Landila Yesaya 40:29-31, e vuvu aweyi kiadi sadisila Ayuda ana baviluka e ntima?

⁸ Muna mbweno za wantu, ke diadi lendakana ko kwa Ayuda ana bakala muna kinkole mu vutuka kuna nsi au a kivuila. Diatoma zayakana vo Luyalu lwa Ngolo lwa Nz’amvimba lwa Babele, ke lwavevolanga abakami au ko. (Yes. 14:17) Kansi, Yave wavana e vuvu kwa nkangu andi. Wasia nsilu vo ovaikisa nkangu andi muna kinkole ye ke vakala diambu ko diadi kunkakidila. (Yes. 44:26; 55:12) Vana meso ma Yave, e Babele yakala nze mbundukutu. (Yes. 40:15) Muna tembwa kiakete, e mbundukutu ivilanga. E vuvu kiaki aweyi kiadi sadisila Ayuda muna kinkole? Vana ntandu a kubafiaulwisa, mayingi kiadi vanga. Yesaya wasoneka vo: “Awana bebundanga e vuvu muna Yave bevua diaka o nkuma.” (Tanga Yesaya 40:29-31.) Elo, e vuvu kiadi kubakumika; badi ‘tilumuka nze ngo-zulu.’

9. Ayuda ana bakala muna kinkole, nkia kuma bakala kiau mu kwikila muna nsilu mia Yave?

⁹ Yave wavana mpe kwa Ayuda bakala muna kinkole e kuma bafwana kwikidila muna nsilu miandi. Nkia kuma kabavana? Diavavanga vo bayindula muna ungunza walungana kala. Kasikil’owu, bazaya wo vo nze una Yave kasakula, Asuri bafwasa e Kintinu kia Node kia Isaele yo nata nkangu muna kinkole. (Yes. 8:4) Bamona esi Babele bafwasa Yerusaleme yo nata nkangu muna kinkole. (Yes. 39:5-7) Bazaya wo vo Ntinu a Babele wavonda meso ma Sedekiya wa Ntinu yo kunata kuna Babele. (Yer. 39:7; Yez. 12:12, 13) Mawonso mana Yave kasakula malungana. (Yes. 42:9; 46:10) Mawonso mama makumika mpe lukwikilu lwau muna nsilu a Yave wa sia vo, okubavevola.

10. Nkia mambu malenda kutusadisa mu siamisa e vuvu kieto mu lumbu yayi yambaninu?

¹⁰ Longi kwa yeto. Vava tukalanga mu lukendalalu, e nsilu mia Yave mu kuma kia kusentu milenda kutufiaulwisa yo kutusadisa mu vua nkuma. Ke tufwete yambula ko vo twabakama lukendalalu lwasaka. Yave wasia nsilu vo tuvua moyo a mvu ya mvu muna paradiso. Ke tufwete vilakananga e vuvu kiaki ko. Avo ke wau ko, e vuvu kieto kilenda kituka nze nzanza wambote-mbote tutadilanga vana pelo kia zianela kina ye mvindu. Aweyi tulenda “velelesela zianela” yayi, i sia vo, kumika e vuvu kieto? Tulenda wo vanga muna vaulanga e ntangwa mu badika e zingu kiambote tukala kiau muna nz’ampa. Tulenda tanga malongi muna nkanda mieto, tala e video yo winikinanga e nkunga mia Kintinu mivovelanga e vuvu kieto. Tulenda vova mpe kwa Yave muna sambu e nsilu mina tuvingilanga vo mialungana.

11. Nki kisadisanga mpangi mosi ankento ona una ye kimbevo kilembi sasukanga mu vua diaka o nkuma?

¹¹ Badika una e vuvu kifiaulwisilanga yo kumika mpangi ankento Joy ona una ye kimbevo kilembi sasukanga. Wavova vo: “Vava ikendalalanga isambanga kwa Yave muna kunsonga una imonanga ye vuvu kia sia vo okumbakula. Muna diadi Yave okumpananga ‘ulolo wa nkuma.’” (2 Kor. 4:7) Mpangi Joy okukiyindulanga mpe muna nz’ampa muna mukala vo “ke mosi ko ovova vo: ‘Yayela ngina.’” (Yes. 33:24) Yeto mpe, avo tuziudi e ntima mieto kuna kwa Yave yo sia sungididi muna vuvu kieto, tulenda vua nkuma.

12. Nkia kuma tuvuidi mu bunda e vuvu muna nsilu mia Yave? (Tala mpe mafoto ye fwaniswa.)

¹² Nze una kavanga kwa Ayuda bakala muna kinkole, Yave okutuvananga mpe kuma yayingi kimana twabundanga e vuvu muna nsilu miandi. Yindula ungunza una tumonanga vo ulungananga mu lumbu yeto. Kasikil’owu, tumonanga luyalu lwangolo lwa nz’amvimba luna vo e “ndambu yangolo, e ndambu yaleboka.” (Dan. 2:42, 43) Tuwanga mpe e nsangu za “nzakama za ntoto muna zunga eki ye kiankaka” ye tusamunanga mpe e nsangu zambote muna “zula yawonso.” (Mat. 24:7, 14) O ungunza wau ye wankaka ukumikanga lukwikilu lweto muna nsilu mia lufiaulwisu mia Yave mina ke mialunganene ntete ko.

YAVE OKUTUSADISANGA TWALEMBI KALA YO WONGA

13. (a) Nkia mambu Ayuda badi wanana mau kuna nima luvevoko lwau? (b) Nze una wasonama muna Yesaya 41:10-13, aweyi Yave kafiaulwisila Ayuda ana bakala muna kinkole?

¹³ Kana una vo Yave wavana e vuvu kwa Ayuda ana bakala muna kinkole muna kubafiaulwisa, wazaya wo mpe vo vava bevevolwa, bewanana ye mambu mampasi. Wasakula vo, kuna mfoko a kinkole kia Ayuda, ntinu mosi wa nkwa nkuma, wadi nuanisa yo kutumuna e zula yawonso ya Babele. (Yes. 41:2-5) Nga Ayuda, wonga badi kala wau? Yave wateka fiaulwisa o nkangu andi mu mvovo emi: “Kumoni wonga ko, kadi ngina yaku. Kutokani ko, kadi mono i Nzambi aku.” (Tanga Yesaya 41:10-13.) “Mono i Nzambi aku,” e mvovo miami, nkia nsasa mina? Yave kasungamesa Ayuda ko bansambila, kadi batoma wo zaya. Kansi, wabasungamesa vo wakala kuna sambu diau.—Nku. 118:6.

14. Aweyi Yave kavuvikila Ayuda ana bakala muna kinkole kimana balembi mona o wonga?

¹⁴ Yave muna vuvika Ayuda ana bakala muna kinkole balembi mona o wonga, wabasungamesa o nkum’andi wakondwa tezo yo zayi wandi. Walomba kwa Ayuda batala ntetembwa kuna zulu. Wabavovesa vo oyandi kavanga kaka ntetembwa ko, kansi obokelanga konso ntetembwa muna nkumbu andi. (Yes. 40:25-28) Vana ntandu, wau vo Yave ozeye nkumbu ya konso ntetembwa, kalukatikisu ko vo ozeye e nkumbu ya konso selo kiandi. Wau vo Yave ovuidi nkuma wa sema e ntetembwa, tulenda vova ye ziku vo ovuidi nkuma mu sadisa nkangu andi. Kieleka, Ayuda ana bakala muna kinkole ke bakala ye kuma ko mu telama o moyo ngatu mona wonga.

15. O Nzambi aweyi kakubikila Ayuda ana bakala muna kinkole mu kuma kia mana mabavingilanga kuna ntwala?

¹⁵ Yave wateka kubika mpe nkangu andi mu kuma kia mana mabavingilanga kuna ntwala. Muna ndambu antete ya nkand’a Yesaya, Nzambi wavovesa nkangu andi vo: “Nukota muna masuku meno ma kati, yo kanga yelo yeno. Nuyisweka mu fikolo yavana makasi mevioka.” (Yes. 26:20) E sono kiaki kialungana mu nkumbu antete vava Babele yakutumunua kwa Kurese wa Ntinu. Nsoneki mosi a lusansu lwa Ngerekia yankulu wavova vo vava Kurese kakota muna Babele, “wavana o nswa kwa [makesa mandi] vo bavonda wantu awonso bewanuka kuna mbazi.” Yindula wonga bamona o nkangu wazingilanga muna Babele! Kansi, Ayuda ana bakala muna Babele bavuka kadi balemvokela luludiku lwa Yave.

16. Ekuma ke tufwete kadila yo wonga ko mu kuma kia mpasi zayingi zibwa kuna sentu? (Tala mpe foto.)

¹⁶ Longi kwa yeto. Ke kolo ko e mpasi zayingi ziyantika, e yayi i ntangwa isunda e mpasi muna lusansu lwawonso lwa wantu. Vava e mpasi zayingi ziyantika, wantu awonso ke bezaya ko dina bevanga ye bezakama yo wonga. Kansi, o nkangu a Yave ke bekala yo wonga ko. Tuzeye wo vo Yave i Nzambi eto. Tukala ye vuvu kadi tuzaya wo vo “luvuluzu [lweto] lufinamene.” (Luka 21:28) Kana nkutu vava tunuaniswa kwa kintwadi kia zula, tukwamanana bunda e vuvu kwa Yave. Yave okutuvana ambasi muna kututanina ye tuludiku muna vuluza e mioyo mieto. Aweyi kekutuvanina tuludiku twatu? Tufwete vingila. Kansi, nanga muna nkutakani zeto tutambulwila tuludiku twatu. Muna mvovo miankaka, e nkutakani nanga i ‘masuku makati’ muna tuvuluzilwa. Aweyi tulenda kubamena mu kuma kia mana mekutuvingilanga kuna sentu? Tufwete kalanga entwadi ye mpangi zeto, kala wakubama muna lemvokelanga tuludiku twa nkubik’a Yave yo kala ye ziku vo Yave ofilanga e nkubik’eto.—Ayib. 10:24, 25; 13:17.

17. Aweyi olenda bundila e vuvu muna lufiaulwisu lwa Yave?

¹⁷ Kana una vo Ayuda ana bakala muna kinkole badi wanana ye mambu mampasi, Yave wabavana lufiaulwisu luna bavuanga o mfunu. Diau dimosi mpe kevanga muna wete dieto. Muna kuma kiaki, kiakala nkia mambu mebwa o mbazi, tukwamanana bunda e vuvu muna lufiaulwisu lwa Nzambi. Tukala ye lukwikilu vo ololokanga yo lunga-lunga e selo yandi yakwikizi. Kwamanana kumika e vuvu kiaku. Sungamena wo vo, Yave i Nzambi aku, ke vena ye kuma ko ofwete kadila yo wonga.