E Nkumbu a Yave Ekuma Inina o Mfunu kwa Yesu?

1-2. (a) Nkia diambu Yesu kavanga muna fuku vitila kavondwa? (b) Nkia yuvu tubadika mu longi diadi?

KINA Kiayá muna fuku, kia 14 kia Ngonde a Nisani ya mvu a 33 wa tandu kieto, Yesu wadia Nlekelo a Mfumu kumosi ye ntumwa zandi akwa kwikizi. Wazaya wo vo ke kolo ko, Yuda okunyekola, omweswa mpasi yo vondwa kwa mbeni zandi. Kuna mfoko a nlekelo a Mfumu, Yesu wavana malongi mayingi ma lukasakeso kwa ntumwa zandi. I bosi vitila bavaika, Yesu walomba sambu kiamfunu. Yoane wa ntumwa wasoneka e sambu kiaki ye tulenda kio solola muna Yoane kapu kia 17.

² Mu longi diadi, tumona maka mambu tulenda longoka muna sambu kia Yesu. Nkia diambu katokanenanga vitila lufwa lwandi? E sambu kiaki aweyi kikutusadisila mu bakula diambu diasunda o mfunu kwa Yesu ekolo kakala ova ntoto? Yambula twabadika e mvutu za yuvu yayi.

“YABAZAYISA E NKUMBU AKU”

3. Adieyi Yesu kavova mu kuma kia nkumbu a Yave? Adieyi kazola vova? (Yoane 17:6, 26)

³ Muna sambu kiandi, Yesu wavova vo: “Yabazayisa e nkumbu aku.” Tuzeye wo vo e diambu diadi mfunu kikilu diakala kwa Yesu, kadi nkumbu miole kavovesa dio kwa alongoki andi. (Tanga Yoane 17:6, 26.) Adieyi Yesu kazola vova? Nga wazola longa alongoki andi vo Yave i nkumbu a Nzambi? Alongoki a Yesu bakizayila kala vo Yave i nkumbu a Nzambi kadi Ayuda bakala. Muna Sono ya Kiyibere e nkumbu yayi vioka fulu 7.000 yasonama. Muna kuma kiaki, vava Yesu kavova vo: “Yabazayisa e nkumbu aku,” kabalonga ko vo Yave i nkumbu a Nzambi. Kansi wabalonga e mpila Nzambi kena o Yave. Yesu wasadisa alongoki andi batoma zaya e nsas’a nkumbu a Yave, kumosi ye kani diandi mu kuma kia ntoto yo wantu, salu yandi ye fu yandi yambote-mbote. Yesu kaka wafwana toma longa mambu mama, kadi yandi kaka otomene zaya Yave.

4-5. (a) Aweyi e nkumbu a muntu ilenda bakila nsasa yamfunu kwa yeto? Yika e nona. (b) Aweyi e nkumbu a Yave yabakila e nsasa yampwena kwa alongoki a Yesu?

⁴ Muna bonga e nona, yindula vo muna nkutakani aku muna yo nkuluntu mosi una ye nkumbu Davidi, dotolo kena ye unzeye se vioka mvu miayingi. I bosi, lumbu kimosi obwidilu sumbula kia kalu ye oneto mu nzaki kuna lupitalu luna nkuluntu ndioyo kesadilanga. Vana vau ovangidi mawonso muna vuluza moyo aku. Tuka muna kolo kiokio, e nkumbu a mpangi ndioyo ibakidi nsasa yamfunu kwa ngeye. O zola kwaku muna yandi kuwokele. Konso ntangwa owanga e nkumbu andi, osungamenanga dina kavanga muna wete diaku. Owau, kuna kwa ngeye mpangi Davidi ke nkuluntu kaka ko ona ozeye se vioka mvu miayingi, kansi mpe se dotolo ona wavuluza moyo aku.

⁵ Diau dimosi mpe, alongoki a Yesu bakizayila kala e nkumbu a Yave. Kansi, mu kuma kia salu kia samuna e nsangu zambote kina Yesu kasala, e nkumbu yayi yabaka e nsasa yampwena kwa yau. Ekuma tulenda vovela diambu diadi? Kadi Yesu watoma tanginina kiwuntu kia Se diandi muna mawonso kavovanga yo vanga. Muna kuma kiaki, konso ntangwa alongoki bawanga malongi ma Yesu yo mona una kakadilanga yo wantu, diabasadisanga mu toma zaya Yave.—Yoa. 14:9; 17:3.

“NKUMBU AKU, E NKUMBU AKU INA WAMPANA”

6. Adieyi Yesu kazola vova vava kavova vo e nkumbu aku ina wampana? (Yoane 17:11, 12)

⁶ Muna sambu kiandi, Yesu walomba muna wete dia alongoki andi vo: “Ubatanina mu kuma kia nkumbu aku, e nkumbu aku ina wampana.” (Tanga Yoane 17:11, 12.) Nga ediadi disongele vo Yesu wadi yantika yikilwa vo Yave? Ve. Kadi muna sambu kiaki, Yesu wayikila e nkumbu a Yave vo “nkumbu aku.” Ozevo, Yesu katambula nkumbu a Yave ko. Kansi, adieyi Yesu kazola vova vava kavova vo e nkumbu aku ina wampana? Diantete, Yesu nsunzudi ye Ntumw’a Nzambi kakala. Mu nkumbu a Se diandi kayizila ova ntoto ye mu nkumbu a Se diandi mpe kavangila masivi. (Yoa. 5:43; 10:25) Vana ntandu, e nkumbu a Yesu ina ye nsasa vo “Yave i Mvuluzi.” Kieleka, e nkumbu a Nzambi ngwizani ina ye nkumbu a Yesu.

7. Yika e nona kisonganga e kuma Yesu kafwana vovela muna nkumbu a Yave.

⁷ Muna toma bakula e kuma Yesu kavovela muna nkumbu a Yave, badika e nona eki: O mfumu a luyalu olenda sola muntu mosi kenda kunsunzula yo vovesa o nkangu mana kazolele kubazayisa. Ozevo, e mvovo mia muntu ndioyo mikala yo zitu wau umosi ye mvovo mia mfumu a luyalu. Diau dimosi mpe, Yesu nsunzudi a Yave kakala yo vovela muna nkumbu andi.—Mat. 21:9; Luka 13:35.

8. Ekuma Yave kavovela vo e nkumbu andi ina muna Yesu kana nkutu vitila Yesu keza ova ntoto? (Luvaiku 23:20, 21)

⁸ Bibila kiyikilanga Yesu vo “Diambu” kadi Yave wantumanga muna zayisa e nsangu ye tuludiku kwa mbasi ye kwa wantu. (Yoa. 1:1-3) Nanga Yesu i mbasi ona Yave katuma muna lunga-lunga Aneyisaele vava bakala muna Makanga. Vava Yave kakanikina Aneyisaele balemvokela mbasi ndioyo, wayika e kuma bafwana wo vangila. Wavova vo: “E nkumbu ame ina muna yandi.”a (Tanga Luvaiku 23:20, 21.) Yave wavova diambu diadi, kadi Yesu wansunzulanga. Kuna diak’e sambu, Yesu i muntu antete otaninanga yo zitisa e nkumbu a Se diandi.

“E TATA, KEMBESA E NKUMBU AKU”

9. Aweyi Yesu kasongela vo e nkumbu a Yave mfunu yakala kwa yandi?

⁹ Nze una tulongokele kala, e nkumbu a Yave yamfunu kikilu yakala kwa Yesu kana nkutu vitila keza ova ntoto. Vava kakala ova ntoto, Yesu wasonga muna mawonso kavanga vo e nkumbu a Yave mfunu kikilu yakala kwa yandi. Kuna mfoko a salu kiandi ova ntoto, Yesu walomba kwa Yave vo: “E Tata, kembesa e nkumbu aku.” Vana vau tuka kuna zulu, Se diandi wamvana e mvutu muna nding’a ngolo oku vo: “Nkembese yo kala, kembesa ikembesa yo diaka.”—Yoa. 12:28.

10-11. (a) Aweyi Yesu kakembesela e nkumbu a Yave? (Tala mpe fwaniswa.) (b) Ekuma e nkumbu a Yave ifwete zitisilwa yo tundidikwa?

¹⁰ Yesu mpe wakembesa e nkumbu a Yave. Mu nkia mpila? I mosi muna mpila kavangila wo i zayisa e fu ya Se diandi kwa akaka ye mambu mambote mana kevanganga. Kansi, mayingi diaka mavavuanga kwa Yesu muna kembesa nkumbu a Yave. Diavavanga mpe vo e nkumbu a Yave yazitiswa yo tundidikwa.b Yesu wasonga una e diambu diadi diakadila diamfunu vava kalonga alandi andi e sambu kia Se dieto. Wavova vo: “E Se dieto koko zulu, yambula e nkumbu aku yazitiswa.”—Mat. 6:9.

¹¹ Ekuma e nkumbu a Yave ifwete zitisilwa yo tundidikwa? Kadi, muna mpatu a Edene, Satana wa Nkadi ampemba wakumba Yave wa Nzambi yo safula e nkumbu andi. Satana wavova vo Yave mvuni ye diambu diambote kaswekelanga Adami yo Eva. (Tuku 3:1-5) Satana wavova mpe vo e mpila o Yave kavangilanga mambu ke yansongi ko. Mu kuma kia mambu mama mawonso kavova o Satana, wantu balenda yindula vo Yave muntu ambi. I bosi, muna lumbu ya Yobi, Satana wavova vo wantu besadilanga kaka Yave mu kuma kia mawete mana betambulanga kwa yandi. Satana wavova diaka vo wantu ke mu zola ko besadilanga Yave ye avo bawanane ye mambu mampasi beyambula sadila Nzambi. (Yobi 1:9-11; 2:4) Ntangwa diavavanga muna songa kana nani i mvuni, Yave yovo Satana.

“IYEKOLA MOYO AME”

12. Muna kuma kia zola kwandi muna nkumbu a Yave, adieyi Yesu kakadila wakubama mu vanga?

¹² Mu kuma kia zola kwandi muna Yave, Yesu wazola vanga mawonso kalenda muna zitisa yo tundidika e nkumbu a Yave. Yesu wavova vo: “Iyekola moyo ame.” (Yoa. 10:17, 18) Kieleka, Yesu wakubama kakala muna fwa mu kuma kia nkumbu a Yave.c Mase meto mantete Adami yo Eva, bakolamena Yave yo kala kuna sambu dia Satana. Nswaswani yo yau, Yesu wakubama kakala muna kwiza ova ntoto yo songa vo otoma zolanga Yave. Muna songa ziku kia diambu diadi, Yesu walemvokela Yave muna zingu kiandi kiawonso. (Ayib. 4:15; 5:7-10) Yesu wasikila ye kwikizi muna zingu kiandi kiawonso yamuna lufwa vana nti ampasi. (Ayib. 12:2) Muna mpila yayi wasonga o zola kwandi muna Yave ye nkumbu andi.

13. Ekuma tulenda vovela vo Yesu kaka wafwana songa vo Satana mvuni? (Tala mpe fwaniswa.)

¹³ Muna mawonso kavanga o Yesu muna zingu kiandi, wasonga vo Satana i mvuni, kansi ke Yave ko. (Yoa. 8:44) Yesu wasonga vo watoma zaya Yave lutila wantu awonso ana bazingidi kala. Kele vo vakala ye diambu dialudi muna mambu mawonso kavova o Satana mu kuma kia Yave, Yesu wadi dio zaya. Kansi, wau vo mawonso kavova o Satana ma luvunu, Yesu wasikila ye kwikizi yo tanina e nkumbu a Yave. Kana nkutu vava diamoneka vo Yave wambembola, Yesu watambulwila o fwa vana fulu kia kolamena Se diandi dianzodi.—Mat. 27:46.d

“MBANISI E SALU KINA WAMPANA”

14. Aweyi Yave kasendela e kwikizi kia Yesu?

¹⁴ Muna sambu kalomba muna fuku vitila lufwa lwandi, Yesu wavova vo: “Mbanisi e salu kina wampana.” Yesu wakala ye vuvu vo avo osikidi ye kwikizi, Yave okunsenda. (Yoa. 17:4, 5) Yesu ndungidi kakala yau wau kabunda e vuvu kwa Se diandi. Yave kanyambula ko vo kakwamanana muna ziami. (Mav. 2:23, 24) Yave wafula Yesu yo kumvana e fulu kisundidi kuna zulu. (Fili. 2:8, 9) Kuna kwalanda, Yesu wayantika yala se Ntinu a Kintinu kia Nzambi. E Kintinu kiaki nkia mambu kivanga? Muna ndambu ya nzole ya sambu kia Se dieto, Yesu wavova vo: “E Kintinu kiaku kiza. O luzolo lwaku [Yave] lwavangama ova ntoto nze koko zulu.”—Mat. 6:10.

15. O Yesu nkia mambu kesinga vanga?

¹⁵ Ke kolo ko, Yesu onuanisa mbeni za Yave yo fwasa yimpumbulu yawonso muna Armangedo. (Lus. 16:14, 16; 19:11-16) I bosi, Yesu otuba Satana muna “mbilu.” Ediadi disongele vo ke kala diaka yo nkuma wavanga konso diambu ko. (Lus. 20:1-3) Muna Luyalu lwandi lwa Funda dia Mvu, Yesu ovutula luvuvamu ova ntoto yo sadisa wantu mu kitula se wantu alunga. O fula mafwa yo kitula o ntoto wawonso se paradiso. Muna mpila yayi, o luzolo wa Yave luvangama.—Lus. 21:1-4.

16. E zingu kia wantu aweyi kikala kuna mfoko a Luyalu lwa Funda dia Mvu?

¹⁶ E zingu kia wantu aweyi kikala kuna mfoko a Luyalu lwa Funda dia Mvu? E sumu difokoka emvimba. Ke dikala diaka mfunu ko kwa wantu mu lomba ndoloki a masumu mau. Muna kala se akundi a Yave ke bevua diaka mfunu wa lukûlu ko, nkambami ngatu nganga. I bosi, “e mbeni a nsuka [watuka muna Adami] ofukiswa e mvimba i lufwa.” E ziami mpavala isala. Amafwa bevutuka diaka moyo. Awonso bekala ova ntoto bekituka se wantu alunga.—1 Kor. 15:25, 26.

17-18. (a) Nkia diambu divangama kuna mfoko a Luyalu lwa Funda dia Mvu? (b) Adieyi Yesu kevanga kuna mfoko a luyalu lwandi? (1 Korinto 15:24, 28) (Tala mpe fwaniswa.)

¹⁷ Nkia diambu diankaka diamfunu divangama kuna mfoko a Luyalu lwa Funda dia Mvu? Wantu awonso bekala ye ziku vo Yave i Nzambi avelela ye unsongi. Mu nkia mpila? Muna mpatu a Edene, Satana wavova vo Yave keyadilanga wantu kuna zola ko ye nkwa luvunu. Tuka muna kolo kiakina, ntangwa zawonso vekalanga yo wantu ana bezitisanga yo tundidika e nkumbu Yave yo toma kunzola. Muna kuma kiaki, kuna mfoko a Luyalu lwa Funda dia Mvu e nkumbu a Yave itundidikwa emvimba. Kalukatikisu ko vo Yave osonga vo i Se dianzodi.

¹⁸ Kuna mfoko a Luyalu lwa Funda dia Mvu, wantu awonso bezaya wo vo mawonso kavova Satana mu kuma kia Yave ma luvunu. Adieyi Yesu kevanga kuna mfoko a luyalu lwandi? Nga olanda e mbandu a Satana muna kolamena Yave? Ve, kalendi wo vanga ko. (Tanga 1 Korinto 15:24, 28.) Yesu ovutula e Kintinu kwa Se diandi. O sakalela luyalu lwa Yave. Elo, nswaswani yo Satana, Yesu wakubama kena mu tambika mawonso, kadi otoma zolanga Yave.

19. E nkumbu a Yave ekuma inina o mfunu kwa Yesu?

¹⁹ Kieleka, Yave kuma kiambote kakala kiau muna vana e nkumbu andi kwa Yesu. Yesu mpe otoma sunzulanga o Se diandi mu mpila yalunga. Ozevo, e nkumbu a Yave ekuma inina o mfunu kwa Yesu? Kadi kuna kwa yandi e nkumbu a Yave i diambu disundidi o mfunu. Yesu wavana nkutu moyo andi mu kuma kia nkumbu yayi. Kuna mfoko a Luyalu lwa Funda dia Mvu, ovutula mawonso kwa Se diandi. Kansi, aweyi tulenda tanginina e mbandu a Yesu? Tubaka e mvutu za kiuvu kiaki muna longi dilanda.