Nga Wasoneka Kala e Kalati Kiaku?
Nkia kalati? Kalati kia DPA (Outorga Durável de Procuração) kiavaikiswa mu kuma kia Mbangi za Yave za vubwa. Wau vo “kuzeye ko owu ukala e zingu kiaku e mbazi,” diamfunu wateka soneka e mpila za nguka ye nlongo olenda baka kele vo vabwidi diambu dia kinsalukisa. (Yak. 4:14; Mav. 15:28, 29) Muna kusadisa, mu baka e nzengo zambote, vavaikiswa e vídio Tratamentos Alternativos à Transfusão: Atendendo às Necessidades e aos Direitos do Paciente. Tala yo i bosi samba yo fimpulula dina olongokele muna lusadisu lwa yuvu ilende.—Nkanikinu: Wau vo e vídio isonganga maka mambu ma lupasu, amase bafwete zaya kana vo balenda tala e vídio yo wan’au yovo ve.
(1) Ekuma akaka muna buka kia awuki (madotolo) befimpululang’e diambu dia sadila menga? (2) Yika nona tatu ya lupasu lwampipita lwavangwa kondwa menga. (3) Madotolo makwa mu nz’amvimba besonganga luzolo lwa wuka mbevo lembi sadila menga? Ekuma bevangilanga wo? (4) Lufimpu lwavangama muna tupitalu adieyi lusonganga mu kuma kia sadila menga? (5) Nkia vonza kina mu sadila menga mu wuka yimbevo? (6) Nkia diambu bavova madotolo mamona e nluta walembi sadila e menga? (7) Nki kitwasanga kimbevo kia kondwa menga (Anemia)? Nkia tezo kia menga kilenda kuluka mu nitu yo lembi fwa? Adieyi dilenda vangwa muna sasula kimbevo kia kondwa menga? (8) Adieyi dilenda sadisa e nitu a mbevo yawuta diaka e menga? (9) Nkia ndekwa zisadilwanga mu lupasu lembi vidisa menga mayingi? (10) Nga mpila zakaka za wuka kondwa menga zilenda sadilwa mu wuka yingyana-ngyana yovo mbevo zakaka bena mu vonza? (11) Nkia nkanikinu wamfunu usonganga e mpila yambote ya wuka? (12) Ekuma dinina o mfunu vo Akristu bateka kisolela e mpila ya nguka yakondwa menga bazolele sadila? Aweyi tulenda wo vangila?
O tonda yovo lembi tonda e mpila za nguka zisongelo mu vídeo, i nzengo za muntu yandi kibeni una ye ntona za longwa kwa Nkand’a Nzambi. Nga yindwidi kala e mpila za nguka za konda menga olenda wukilwa kumosi ye wan’aku? Nga wasonekene kala e kalati kiaku kia DPA? Muna zaya maka mambu mu kuma kia diambu diadi, toma tanga kapu kia 7 kia nkanda “Zola kwa Nzambi” ye nkanda miakaka miyikilu muna kapu kiokio. Tala mpe elongi dina ye ntu a diambu “Aweyi Mfwete Badikila Ngengele za Menga ye fu kia Sadila Menga Mame mu Wukisa Kimbevo?” muna nkundikilu ya Salu Kieto kia Kintinu kia ngonde a Novemba 2006. Kala ye ziku vo, tomene kiesesa luzolo lwaku muna kalati kia DPA. E yitu yaku bena vo ke Mbangi za Yave ko ye awana solele mu kala se mbangi zaku, bafwete zaya e luzolo lwaku.
[Mvovo mia Fwaniswa mina muna lukaya lwa 3]
• Nga wabakidi kala e nzengo mu kuma kia mawuku ye nlongo olenda tonda sadila kumosi ye wan’aku?
• Nga okangalanga ye kalati kiaku kia DPA mu kuma kia diambu dia kinsalukisa dilenda kubwila?