Жахабанын ысымы биз үчүн кандай мааниге ээ болушу керек?

1, 2. Жахабанын ысымы Иса үчүн маанилүү экени эмнеден көрүнүп турат?

ЖАХАБАНЫН ысымы Иса үчүн баарынан маанилүү нерсе. Атасынын ысымын ыйыктоодо Иса эң башкы ролду ойнойт. Буга чейинки макаладан билгенибиздей, ал Атасынын ысымы үчүн жана анын аброюн коргош үчүн өлгөнгө да даяр болгон (Мр. 14:36; Евр. 10:7—9). Өзүнүн миң жылдык башкаруусу соңуна чыкканда, ал Жахабанын ысымы ыйыкталышы үчүн бардык бийликти ага өткөрүп бергенге даяр болот (Кор. 1-к. 15:26—28). Анын Атасынын ысымын ушунчалык кастарлаганынан экөөнүн мамилеси жөнүндө көп нерсени билсе болот. Бул анын ошол атты алып жүргөндүн өзүн канчалык жакшы көрөрүн далилдеп турат.

² Иса жерге келгенде Атасынын атынан келген (Жкн. 5:43; 12:13). Ал анын атын жолдоочуларына таанытып, ачып берген (Жкн. 17:6, 26). Жахабанын атынан окутуп, анын атынан көптөгөн кереметтерди жасаган (Жкн. 10:25). Ал Жахабадан өзүнүн шакирттери жөнүндө: «Өзүңдүн ысмың үчүн. . . аларды коргой жүр»,— деп да тиленген (Жкн. 17:11). Эгер Иса Жахабанын ысымын ушунчалык кастарлап ыйык тутса, анда Исанын чыныгы жолдоочусубуз дегендер анын ысымын билип, аны колдонушу керек эмеспи?!

3. Бул макалада эмнелерди талкуулайбыз?

³ Исанын чыныгы жолдоочулары болгондуктан биз Исадан үлгү алып, Жахабанын ысымын кастарлап, ыйык тутабыз (Пет. 1-к. 2:21). Бул макаладан бүгүнкү күндө Жахабанын Падышалыгы жөнүндөгү жакшы кабарды айткандардын эмне үчүн анын аты менен аталарын карап чыгабыз (Мт. 24:14). Ошондой эле Жахабанын ысымы жекече ар бирибиз үчүн кандай мааниге ээ болушу керектигин да карайбыз.

«ӨЗҮНҮН ЫСМЫ МЕНЕН АТАЛА ТУРГАН ЭЛ»

4. а) Иса асманга кетер алдында өзүнүн шакирттерине кандай тапшырма берген? б) Анын тапшырмасына байланыштуу кандай суроо туулат?

⁴ Иса мына-мына асманга кетейин деп турганда шакирттерине: «Силерге Кудайдын ыйык руху берилгенде, күчкө толосуңар да, Иерусалимде, бүт Жүйүт жеринде, Самарияда, ошондой эле жердин учу-кыйырына чейин мен жөнүндө күбөлөндүрөсүңөр»,— деген (Элч. 1:8). Мындан көрүнүп тургандай, жакшы кабар Ысрайыл жеринде эле эмес, башка жерлерде да таратылмак. Акыры жүрүп отуруп ар кайсы элден болгон адамдар Исанын жолдоочусу боло алмак (Мт. 28:19, 20). Бирок, байкасаңар, Иса: «Мен жөнүндө күбөлөндүрөсүңөр»,— деген. Анда жаңыдан шакирт болгондор Иса жөнүндө эле күбөлөндүрүшү керек беле? Же Жахабанын да ысымын билиши керек беле? Бул суроого жооп алыш үчүн Элчилер китебинин 15-бөлүмүндө жазылган окуяларга көңүл буралы.

5. Иерусалимдеги элчилер менен аксакалдардын сөздөрү Жахабанын ысымынын маанилүүлүгүн кандайча көрсөтүп турат? (Сүрөттү да карагыла.)

⁵ Б. з. 49-жылы Иерусалимдеги элчилер менен аксакалдар чогулуп, сүннөткө отургузулбагандар Исанын жолдоочусу болушу үчүн эмне кылышы керектигин талкуулашкан. Талкуунун аягында Исанын уялаш бир тууганы Жакып: «[Петир] бизге Кудай өзүнүн ысмы менен атала турган эл чогултуш үчүн башка улуттагыларга назар сала баштаганын эми эле айтып берди»,— деген. Анан Амос пайгамбардын сөздөрүн кайталап: «„Бул элдин аман калгандары бардык элдерден чыккан, менин ысмым менен аталган адамдар менен бирге мага, Жахабага, жан-дилден кызмат кылышы үчүн ошентем“,— дейт Жахаба»,— деп кошумчалаган (Элч. 15:14—18). Демек, жаңы шакирт болгондор Жахабанын атын билип эле койбой, анын аты менен да аталмак. Бул алардын ошол атты алып жүрөрүн жана ошол ат менен тааныларын билдирген.

6, 7. а) Иса эмне үчүн жерге келген? б) Анын жерге келишине дагы кандай маанилүү маселе себеп болгон?

⁶ Исанын аты «Жахаба — куткаруучу» дегенди билдирет. Ал өзү да Жахаба адамзатты куткарыш үчүн колдонгон курал болгон. Иса жерге келип, адамзат үчүн өмүрүн берген (Мт. 20:28). Мына ошондой кун төлөнгөндүн аркасында адамзаттын куткарылышына жана түбөлүк өмүр алышына жол ачылган (Жкн. 3:16).

⁷ Адамзат үчүн эмнеге кун төлөнүшү керек эле? Буга Эйден багында болгон окуя себеп болгон. Буга чейинки макалада талкуулангандай, адамзаттын түпкү ата-энеси Адам ата менен Обо эне Жахабага каршы чыгышкан. Ошонун айынан түбөлүк өмүрдөн кол жууп калышкан (Башт. 3:6, 24). Ошол себептен адамзат күнөөнүн кулчулугунан куткарылууга муктаж болчу. Бирок андан да башка маанилүү маселе бар болчу: Жахабанын атына көө жабылган (Башт. 3:4, 5). Мына ошон үчүн Адам ата менен Обо эненин урпактарынын куткарылышы алда канча чоң маселе менен — Жахабанын ысымынын ыйыкталышы менен — байланыштуу болгон. Иса Жахабанын өкүлү болгондуктан жана анын ысымын алып жүргөндүктөн бул маселеде негизги ролду ойногон.

8. Исага ишенгендердин баары эмнени түшүнүшү керек эле?

⁸ Жүйүт болобу же башка элден болобу, Исага ишенгендердин баары аларды Исанын асмандагы Атасы Жахаба Кудай куткараарын билиши керек болчу (Жкн. 17:3). Мындан тышкары, алар Исадай болуп, Жахабанын ысымын алып жүрүшмөк. Алар анын ысымынын ыйыкталышы канчалык маанилүү экенин да түшүнүшү керек болмок. Алардын куткарылышы ушундан көз каранды болчу (Элч. 2:21, 22). Ошондуктан Исанын берилген жолдоочуларынын баары Жахаба жөнүндө да, Иса жөнүндө да билиши керек болгон. Мына ошон үчүн Жакан китебинин 17-бөлүмүндө жазылгандай, Иса Кудайдан тиленип жатып сөзүн: «Сен мени кандай сүйсөң, алар да башкаларды ошондой сүйүшү үчүн жана алар менен биримдикте болушум үчүн, сенин атыңды аларга таанытып, ачып бердим, дагы да ачып берем»,— деп жыйынтыктаган (Жкн. 17:26).

«СИЛЕР МЕНИН КҮБӨЛӨРҮМСҮҢӨР»

9. Жахабанын ысымы биз үчүн маанилүү экенин кантип көрсөтө алабыз?

⁹ Буга чейин талкуулаганыбыздай, Исанын чыныгы жолдоочуларынын баары Жахабанын ысымынын ыйыкталышына кызыкдар болушу керек (Мт. 6:9, 10). Алар Жахабанын ысымын бардык нерседен жогору көрүшү керек. Бул ошондой көз карашта экенибизди иш жүзүндө көрсөтүүнү да билдирет. Анда канткенде Жахабанын ысымын ыйыктап, Шайтан жапкан көөдөн тазалай алабыз?

10. Ышая китебинин 42—44-бөлүмдөрүндө эмне жөнүндө айтылат? (Ышая 43:9; 44:7—9) (Сүрөттү да карагыла.)

¹⁰ Жахабанын ысымын ыйыкташ үчүн эмне кылышыбыз керектигин Ышая китебинин 42—44-бөлүмдөрүнөн биле алабыз. Ал бөлүмдөрдө каймана маанидеги сот отуруму жөнүндө сөз жүрөт. Анда ким чыныгы Кудай экени аныкталып жаткан болот. Жахаба өздөрүн кудай деп эсептегендерден чынында эле кудай экенин далилдеп беришин талап кылат. Муну далилдегенге күбөлөрдү да чакырат, бирок эч ким жок болуп чыгат. (Окугула: Ышая 43:9; 44:7—9.)

11. Ышая 43:10—12-аяттарда жазылгандай, Жахаба өз элине эмне дейт?

¹¹ Окугула: Ышая 43:10—12. Жахаба өзүнүн эли жөнүндө: «Силер менин күбөлөрүмсүңөр. . . мен болсо Кудаймын»,— дейт. Анан элинен: «Менден башка Кудай барбы?» — деп сурайт (Ыш. 44:8). Ошондуктан бул суроого биз жооп беришибиз керек. Мындай мүмкүнчүлүктү сыймык катары көрөбүз. Жахаба гана жалгыз чыныгы Кудай экенин сүйлөгөн сөзүбүз, кылган ишибиз менен далилдей алабыз. Жахабанын ысымы баарынан жогору турат. Ошон үчүн Шайтан кандай гана тоскоолдук жаратпасын, Жахабаны чындап сүйөрүбүздү, ага болгон берилгендигибизди жашообуз менен көрсөтөбүз. Ооба, Кудайыбыздын ысымынын ыйыкталышына ушинтип салым кошо алабыз.

12. Ышая 40:3, 5-аяттарда жазылгандар кантип аткарылган?

¹² Жахабанын ысымын ыйыктап, башкача айтканда, беделин коргоп жатканда Иса Машаяктан үлгү алган болобуз. Ышая пайгамбар «Жахабага жол даярдаган» бирөөнүн келерин да алдын ала айткан (Ыш. 40:3). Бул Чөмүлдүрүүчү Жакан Исага жол даярдаганда аткарылган. Себеби Иса Жахабанын атынан келип, Жахабанын атынан сүйлөгөн (Мт. 3:3; Мр. 1:2—4; Лк. 3:3—6). Андан ары Ышая пайгамбар: «Жахабанын даңкы айкын көрүнөт»,— деп айткан (Ыш. 40:5). Бул кандайча аткарылган? Иса жерге келгенде Жахаба Кудайдын табиятын ушунчалык айкын-так чагылдыргандыктан, жерге Жахаба өзү келгендей эле болгон. Жахабанын даңкы ушундайча айкын көрүнгөн (Жкн. 12:45).

13. Канткенде Исадан үлгү алган болобуз?

¹³ Иса Жахабанын күбөсү болгондой эле, биз да Жахабанын күбөлөрүбүз. Биз анын ысымын алып жүрөбүз жана баарына анын кереметтүү иштери жөнүндө айтабыз. Жахабанын мыкты күбөсү болуш үчүн башкаларга Исанын Жахабанын ысымын ыйыктоодо маанилүү ролду ойной турганы жөнүндө да айтышыбыз керек (Элч. 1:8). Иса Жахаба жөнүндө эң мыкты күбөлөндүргөн. Биз да андан үлгү алгыбыз келет (Аян 1:5). Бирок Жахабанын аты жеке ар бирибиз үчүн кандай мааниге болушу керек?

ЖАХАБАНЫН ЫСМЫ БИЗ ҮЧҮН КАНДАЙ МААНИГЕ ЭЭ?

14. Забур 105:3тө айтылгандай, Жахабанын ысымына карата кандай сезимдерди туябыз?

¹⁴ Биз Жахабанын ысымын алып жүргөнүбүзгө сыймыктанабыз. (Окугула: Забур 105:3.) Жахабанын ысымы менен сыймыктанып-мактанганыбызда, ал аябай сүйүнөт (Жер. 9:23, 24; Кор. 1-к. 1:31; Кор. 2-к. 10:17). «Жахаба менен мактануу» деген анын биздин Кудайыбыз болгонуна сыймыктанууну билдирет. Биз башкаларга Жахабанын ыйык Кудай экенин, ал кылган нерселердин баары туура экенин айтууну да сыймык катары көрөбүз. Чогуу иштешкендерибизге, классташтарыбызга, кошуна-колоңдорубузга жана башкаларга Жахабанын Күбөсү экенибизди айткандан эч качан уялбашыбыз керек. Шайтан биздин Жахабанын ысымы жөнүндө айтпай калышыбызды көздөйт (Жер. 11:21; Аян 12:17). Ооба, Шайтан менен анын калпын жайылткандар адамдардын Жахабанын ысымын унутуп калышын каалайт (Жер. 23:26, 27). Бирок Жахабанын ысымына болгон сүйүүбүз бизге «күнү бою кубанып», аны даңктай бергенге түрткү берет (Заб. 5:11; 89:16).

15. «Жахабанын ысмын чакыруу» деген эмнени билдирет?

¹⁵ Жахабанын ысымын чакырабыз (Жоел 2:32; Рим. 10:13, 14). «Жахабанын ысмын чакыруу» анын атын билүүдөн жана ага атынан кайрылуудан да көптү билдирет. Бул өз ичине Жахабанын кандай Кудай экенин таанып-билүүнү, ага таянууну, жардам беришин, жетектешин суранып, ага үмүт артууну камтыйт (Заб. 20:7; 99:6; 116:4; 145:18). Ошондой эле бул анын ысымы, сапаттары жөнүндө башкаларга жарыялап, аларга өкүнүп, Жахабага жаккыдай иш кылганга жардам берүүнү билдирет (Ыш. 12:4; Элч. 2:21, 38).

16. Шайтандын жалганчы экенин кантип далилдей алабыз?

¹⁶ Жахаба даңкталышы үчүн кыйынчылыктарга да даярбыз (Жкп. 5:10, 11). Кыйынчылыктарга кабылганда берилгендигибизден жазбасак, Шайтандын жалганчы экенин далилдейбиз. Аюп пайгамбардын күндөрүндө Шайтан Жахабага кызмат кылгандарга: «Ар бир адам өз жанын ойлойт. Өмүрүн сактап калыш үчүн ал колунда болгондун баарын берет»,— деп айып таккан (Аюп 2:4). Шайтан адамдар Жахабага бардыгы жакшы болуп турган учурда эле кызмат кылат, ал эми башына кыйынчылык түшкөндө аны таштап кетет деген. Кудайга болгон берилгендигинен жазбаган Аюп пайгамбар мунун калп экенин далилдеген. Бүгүнкү күндө бизде да Шайтандын жалганчы экенин далилдегенге мүмкүнчүлүк бар. Өзгөчө, кыйынчылык тарткан учурда же шаабайыбыз сууганда, Жахаба тарапта бек болсок, Шайтандын жалганчы экенин далилдейбиз. Ошондуктан өз ысымы даңкталышы үчүн, Жахаба бизди колдоп-коргоп турарынан кенедей да шектенбесек болот (Жкн. 17:11).

17. Петирдин 1-каты 2:12де айтылгандай, Жахабанын ысымын дагы кантип даңктай алабыз?

¹⁷ Жахабанын ысымын терең урматтайбыз (Накыл 30:9; Жер. 7:8—11). Биз Жахабанын өкүлү болгондуктан жана анын аты менен аталгандыктан, кылган иштерибизден улам ал даңкталышы мүмкүн же ага сөз тийип калышы мүмкүн. (Окугула: Петирдин 1-каты 2:12.) Ошондуктан эмне кылбайлы, сөзүбүз менен болобу, жүрүм-турумубуз менен болобу, Жахабаны даңктагыбыз келет. Ушинте берсек, жеткилең эмес болгонубузга карабай Жахабанын ысымынын даңкына даңк кошо беребиз.

18. Жахабанын ысымы биз үчүн маанилүү экенин дагы кантип далилдей алабыз? (Шилтемени да карагыла.)

¹⁸ Биз үчүн өз беделибизге караганда Жахабанын ысымы жогору турат (Заб. 138:2). Бул эмне үчүн ушунчалык маанилүү? Себеби Жахабага жаккандай иштерди кылганда көп учурда адамдарга жакпайбыз жана алар биз жөнүндө терс нерселерди айтышат. Ошентип жаманатты болуп калышыбыз мүмкүнa. Иса да Жахаба даңкталышы үчүн кылмышкер катары өлгөнгө даяр болгон. Ал ошондон уялган эмес. Башкалар ал жөнүндө эмне деп ойлоп жатканына ашыкча тынчсызданган эмес (Евр. 12:2—4). Ал бүт көңүлүн Кудайдын эркин аткарууга топтогон (Мт. 26:39).

19. Жахабанын ысымына карата кандай сезимдерди туясыңар жана эмне үчүн?

¹⁹ Ар бирибиз Жахабага кызмат кылганыбызга, Жахабанын Күбөлөрү деп аталганыбызга сыймыктанабыз. Ошон үчүн башкалар бизге жаман мамиле кылган күндө да Жахабаны даңктай беребиз. Биз үчүн өзүбүздүн кадыр-баркыбызга караганда Жахабанын ысымы маанилүү. Шайтан эмне кылып бут тоспосун, мындан ары да Жахабанын ысымын даңктай беребиз! Ошондо Иса Машаяк үчүн Жахабанын ысымы канчалык маанилүү болсо, биз үчүн да ошончолук маанилүү экенин далилдейбиз.