Mey

Ndala ingafiile Akiristu amuchaka 100 dowambeela katavulumuwile “vailambo yetene yavati wewo wali athu. Pivyookaiki-a ira miru damabanja dookumbanyela ira dinafwanyelenga avi mabanjiwa vyongo vyofuneya. Nanga bwanji vya azombwe anayo kan’na vyolinga vyofuna wenjedela utumikiwa? Kodi mwina aluwa koowambeela ona ira kaimeche kaye vyolinga viwavyo? Masiki ira vookala mavutwala, Akiristwayo koochenja vyongo mogwilizana namwemo vyongo vyaliliathu vamoywiwa. Aluwa koopitiliza laleela mwemo kawandeleathu moi koosangalala gawela Akiristu afwiwa a wu Yudeya vyongo vyevyo kan’naathu. (Vyo. 11:29, 30) Anayo kava-iwe vyongo vyofuneya koowona ira Yehova unowakami-a. (Mat. 6:31-33) Mwina aluwa koowambeela gwilizana vinjinji na Akiristu anayo kaakami-ilayo. Moi anayo kapelekile vyongo viwa kapena indana chito yokami-eyo, koofwanya imwerumweru eneyo inaza chifukwa yova-a. — Vyo. 20:35. w23.04 16 ¶12-13

Thawi dimo-i Yehova unosomeda mapepelo a atumikae volimbikisa athu oyi katinamutumikela ira kaakami-e. Mofwanafwani-a, liye oolimbikisa Mwene Aritasasita ira asomedele vyevyo Nehemiya avepile liye, vyoi awelele wu Yerusalemu dowa kami-a vachito yomanga mzinda. (Nehe. 2:3-6) Malambwano Yehova unokoza indi-eda chito athu anayo katinamutumikela ira kanikami-e vevo ninafuneela iyo likami-edo. Kai thawi detene vevo mapepelwi-u kanasomediwaathu mundila yodabwi-a. Koma vyosomeda vyevyo Yehova unapeleka liye vinonikami-a ira nikaleve ororomeleya wa Babi-u waudimula. Eno mukalenga cheru ira muonenga mwemo Yehova munasomedela liye mapepelwinyu. Thawi na thawi ninafuneela ambeelanga imela noganizela mwemo Yehova munasomedela liye mapepelwi-u. (Sal. 66:19, 20) Ninafuneya tonyi-eda iroromelo, ookala kedanga pepela wa Yehova ba-i, koma teto onanga mwemo liye munasomedela liye mapepelwi-u a tundu uliwetene. — Aheb. 11:6. w23.05 11 ¶13; 12 ¶15-16

Vevo navipelekile iyo wa Yehova, noomulonjeza ira ninoza nimulambelenga koma teto panga yofuna yae. Ninafuneela kwakwaneli-edanga lonjezo li-uli. Panga vyongo mogwilizana na vyevyo nalonjezile iyo ira ninoza nitumikele Yehova, nguudindo ulukulu. Moi Yehova anilengile ira nipangenga yofuna yae. (Chiv. 4:11) Liye anilengile mu ifwanafwani-edo yae koma teto na murima oyi nifunenga mulambela. Vyo-arelavo viwa pivyoi ninokalanae va usamwali koma teto ninosangalala vopanga yofuna yae. (Sal. 40:8) Kwaranya vyetene, napanganga yofuna ya Mulungu koma teto musazi-eda Mwanae, ‘ninosisimuliwa. (Mat. 11:28-30) Eno pitilizani esaesa ira mumuomeliwengana vinjinji Yehova munokoza panga vyevi mwaganizelanga vyapama vyevyo ukalile liye aupangelangani koma teto madaliso anayo unaze liye auva-eni usogolo. Mwamuomeliwangana vinjinji Mulungu, pavevo teto vinazeathu vikale vyo-orucha ira mumuvwelenga. (1 Yoh. 5:3) Yesu ookwakwani-a panga yofuna ya Mulungu chifukwa oovepa Yehova ira amukami-e koma teto ooganizela vinjinji madaliso anayo unaze liye afwanye usogolo. (Aheb. 5:7; 12:2) Mofwanafwana na Yesu, muvepenga Yehova ira auva-eni kopolo teto thawi detene muganizelenga idedi-edo yoza fwanya moyo o-omala. w23.08 27-28 ¶4-5

Etene iyene ninosangalala na athu anayo kali oleza murima. Chifukwa n’ni? Chifukwa ninolemekeza athu anayo kanaembekezela kapena dedi-edela yongo imo-iwene mo-okumudwa. Ninoyamikela athu amo-iwa kanilezela murima vevo nilakwi-ile iyo vyongo. Ninoyamikela teto ira anayo kanifunji-a Baibulo koonilezela murima vevo navuteya iyo funjeda, somedela kapena indi-eda chito makundo amo-iwene a m’Baibulo. Kwaranya vyetene, ninoyamikela vinjinji ira Yehova Mulungwi-u unonilezela murima. Komave, ngakale ira ninosangalala amo-iwa kalezanga murima, kai thawi detene vevo vinakalaathu vyokweya ira iyo nitonyi-edenga ikalelo inela. Mwaisazo, ninokoza lepela kala oleza murima ngati musewu muli magalimoto anjinji, simbwasimbwa vevo nichedwile iyo. Thawi dimo-i ninokoza lepela u-inda murima amo-iwa kanikumudwi-a. Teto thawi dimo-i ninokoza vuteya dedi-edela ilambo isha ineyo Yehova anilonjezile liye. Komave, va vyoireya vyetene vyevi, ninafuneya kala oleza murima vinjinji. w23.08 20 ¶1-2

Yehova oolamula Gidiyoni ira ayevi-e vinjinji chiwelengelo ya asilikalae. Liye ookoza ganiza ira, ‘Koma ndinafuneela panga vyevi? Kodi pivyokami-a?’ Ngakhale vyali eno, Gidiyoni oovwela. Malambwano teto andimuwa kanomusazi-eda Gidiyoni vo-arela malangizo a gulu la Yehova anayo kachenjile. (Aheb. 13:17) Gidiyoni oovwela ngakhale ira oowova koma teto vyevyo afuneela liye panga vyali vyoophi-a. (Owel. 9:17) Yehova angamusimikizele, Gidiyoni kaakaikela ira Mulungu unoza amukami-e aza avazanga khondo yoteteza athu a Yehova. Andimuwa anayo kanakala m’madela anayo chitwi-u ili yoruni-iwa kanomusazi-eda Gidiyoni. Molimba murima, aliwa kanosogolela vamisonkano koma teto va chito yolaleela ngakhale ira kanokoza mangiwa, fukiwa vyofuka, ireliwa vyachiwawa kapena teto chosiwa chito. Vathawi ya chisauso ilukulu, andimuwa kanafuneela za kala olimba murima ira kaze ka-arele malangizo anayo kanazeathu kava-iwe, mo-olandela ira kanagumana na vyoophi-a vyoi avi. w23.06 5-6 ¶12-13

Yehova oolola ira vyapama vyevyo Ndimuwa wa Asembala Yehoyada apangile liye vilembiwe m’Mawae ira vinilangizenga. (Arom. 15:4) Koma teto Yehoyada angatatiile, oova-iwa ulemu wavadela vo-eliwa m’manda “mu Mzinda wa Davide, chifukwa oopanga vyapama mu Izarayeli koma teto wa Mulungu oona na Nyumbae.” (2 Lim. 24:15, 16) Khani ya Yehoyada inokoza nikami-a etene iyene ira nimuovenga Mulungu. Andimuwa kanokoza musazi-eda Yehoyada vokala cheru notetezanga khosa da Mulungu mororomeleya. (Vyo. 20:28) Achikulile kanokoza funjedavo yongo wa Yehoyada ira akala kanaova Yehova nokalave ororomeleya, liye unokoza a-indi-eda chito vokwakwaneli-eda yolingae. Azombwe kanokoza funjedavo yongo voona mwemo Yehova airele liye vyongo na Yehoyada nomusazi-edanga volemekeza achikulile, simbwasimbwa anayo katumikele Mulungu mororomeleya wa thawi indendai. (Miya. 16:31) Tiyemoni nikami-enga mororomeleya ‘anayo kanasogolela vaari vi-u’ voavwela. — Aheb. 13:17. w23.06 17 ¶14-15

Vamisonkano, muirenga vyongo mozindikila vofuna sakula ira musomede vakwikwivakwikwi. Moi avi? Naimeli-anga muwonwi-u vakwikwivakwikwi, oiri-oyo unokoza kakamizeya ira aniromole moweli-edaweli-eda masiki ira amo-iwa katisomedile. Vyevi vinokoza pangi-a ira athu amo-iwa ka-iye imeli-a muwono. (Nam. 3:7) Ofalisa anjinji kaimecha muwono ira kasomede va phunzilo, kaninakayena mwayi woi nisomede vakwikwivakwikwi n’nga mwemo ninafunela iyo. Teto thawi dimo-i oiri-oyo kananitonye. Vyevi vinokoza nikumudwi-a komave kaninafuneela kumudwa akala kanitonyiwe. (Nam. 7:9) Akala kamukwakwani-e peleka ndemanga maulendo angasene n’nga mwemo mwafunela nyo, bwanji ookeda vuruwana mwacheru amo-i kasomedanga na yolinga yoi muwayamikele vanduli vamisonkano? Abali na arongolinyu kanokoza limbikisiwa nowayamikelawinyu n’nga mwemo kalimbikisiweleathu na ndemanga dinyu. w23.04 23-24 ¶14-16

Mufunjedenga Mawu a Mulungu koma teto aganizela modii-a. Mofwanafwana na tengo unoyo unakala olimba chifukwa yoi ukaana michichi dovolowa vati, na-iyene ninokoza kala olimba akala nin’na iroromelo chifukwa yofunjeda Mawu a Mulungu. Tengo waulukulanga, michichidiwa dinovolowa vati koma teto dinoinjiva. Mofwanafwana na vyevi nafunjedanga Mawu a Mulungu koma teto aganizela modii-a, ninokaana iroromelo yolimba koma teto ninokala osimikiza ira makundwiwa mbapama vinjinji. (Akol. 2:6, 7) Muganizelenga mwemo malangizo a Yehova kakami-edeleathu koma teto teteza atumikae mundulimu. Mofwanafwani-a, Ezekieli ooira chidwi vevo ngelo aeza liye kachisi unoyo namawongelola amuonile liye m’masomphenya. Masomphenyala koomulimbikisa Ezekieli moi ninofunjedavo teto makundo ofuneya okuza vyevyo ninapange iyo ira ni-arelenga makundo a Yehova okuza lambela waimbarimbari. (Ezek. 40:1-4; 43:10-12) Ninopindula vinjinji nafwanyanga thawi yofunjeda koma teto ganizela vyongo vyodii-a vya m’Mawu a Mulungu. Ninokoza kala na murima ogarateya, nodalilanga Yehova na murima wetene.— Sal. 112:7. w23.07 18 ¶15-16

M’Baibulo mukala visazo vyapama vinjinji vyevyo achinyamata kanavisazi-edeathu. Athu awale anala koomukonda Mulungu ndipo kookaana maudindo o-iyana-iyana vosamalela athwae. Munokoza teto fwanya visazo vyapama vya Akiristu olimba mwauzimu mubanja linyu koma teto mupingo. (Aheb. 13:7) Koma teto mukaana isazo yangwilo ya Yesu Kiristu. (1 Pe. 2:21) Mwafunjedanga mosamala vya athu anala, muganizelenga teto makalelo anayo kan’naathu. (Aheb. 12:1, 2) Vanduli viwa muonenga vyevyo munapange nyo ira muwasazi-ede. Muthu oganiza pama unoganizela kaye a-anasakule vyoira. Eno esaesani ira mukaena luso leli. Yowambeela, munafuneya funjeda makundo a m’Baibulo koma teto ganizelanga upamiwa. Ndiye mu-indi-edenga chito makundo anayo vosakula panga vyongo vyevyo vinamusangalase Yehova. (Sal. 119:9) Kaana luso leli, unoza uutandizeni vinjinji ira muulukule mwauzimu. — Miya. 2:11, 12; Aheb. 5:14. w23.12 24-25 ¶4-5

Makolo kanokoza afunji-a a-imiwa mwemo kanasomedeleathu mofaasa athu amo-iwa karuni-anga vyevyo kanaroromelaathu. (Yak. 3:13) Makolo amo-iwa kanoshishedela vyevi vathawi yolambela wavabanja. Kanoganizela khani doi mwina a-imiwa kanokoza gumanana usukulu. Kera eno kanokambilana nawo nowatonyi-eda mwemo kanasomedeleathu koma teto kanowafunji-a mwemo kanapangeleathu vyevyo mofaasa koma teto mundila yapama vinjinji. Kozeela unokoza akami-a Akiristu iziwa mwemo kanafotokozeleathu mo-inda murima vyevyo kanaroromelaathu. Unokoza akami-a teto azombwe simikizela ira kookaana vifukwa vyovweya vyororomela makundo a m’Baibulo. Va jw.org vagawo loi “Zimene Achinyamata Amafunsa,” vikala mbali yoi Zoti Achinyamata Achite. Vyevi vyakoziwe ira vikami-e azombwe limbi-a iroromelo iwa koma teto akozeeli-a ira kawandenga someda m’mawu ewaewa athu amo-iwa kaafukanga. Funjeda khani dedi monga banja unokoza kami-a etene iyene ira niwandenga fotokoza vyevyo ninaroromela iyo mofaasa koma teto mundila yapama vinjinji. w23.09 17 ¶10; 18 ¶15-16

Kodi moowambeela vi-elelavo yolinga imo-iwene yauzimu koma lepelanga ikwakwaneli-eda? Akala chi eno iziwani ira kamuli ekinyu. Mofwanafwani-a, Philip oofuna ira apepelenga vakwikwivakwikwi koma teto mapepelwae kangalenga apama, koma vyoomurucha fwanya thawi yopepela. Erika ookaana yolinga yoi kachedwenga fiya vamisonkano dokozeela muutumiki koma oochedwa sonkano uliwetene. Akala eni mun’na yolinga imo-iwene yoi kamunaikwakwaneli-ede, iziwani ira kamuli olepela. Ira muthu akwakwaneli-ede ngakhale yolinga ing’onong’ono unafuneela thawi koma teto tindi. Mwafunechechanga kwakwaneli-eda yolinga imo-iwene munotonyi-eda ira munoona usamwalinyu na Yehova kala wantengo wavadimu koma teto munofunechecha muva-a vyongo vyapama vinjinji. Yehova unoyamikela tindi linyu. Pivyoona ira kanaembekezela vinjinji kwaranya vyevyo munakwakwani-e nyo. (Sal. 103:14; Mik. 6:8) Eno mukaengana vyolinga vyevyo munavikwakwaneli-ede nyo malinga na mwemo vyongo vililiathu vamoywinyu. w23.05 26 ¶1-2

Athu olimba murima kanokoza kala na mantha, koma katinalola ira ova uwalepeli-e panga vyongo vyapama. Danieli ali muzombwe olimba murima vinjinji. Liye oofunjeda vyolemba vya anamaongela a Mulungu tangani-avo maulosi a namaongela Yeremiya. Chifukwa ya vyevi, vanduli viwa liye oozindikila ira ukapolo wa Ayuda wu Babulo wali unga-alile vang’ono mala. (Dan. 9:2) Mookaikela, ona maulosi a m’Baibulo kakwakwaneli-ediwanga woomukami-a Danieli ira aroromelenga Yehova, moi athu anayo kanaroromela vinjinji Yehova kanokoza kala olimba murima vinjinji. (Erekezelani na Aroma 8:32, 37-39.) Yofuneya vinjinji choi Danieli oopempela wa Babae waudimu vakwikwi vakwikwi. (Dan. 6:10) Liye oosomedela ira ali angamuchimwele Yehova moi oomufotokozela mwemo avwela liye koma teto muvepa ira amukami-e. (Dan. 9:4, 5, 19) Liye ali muthu ngati iyene, eno kaabaliwe na ikalelo yolimba murima. M’malomwiwa ookaana ikalelo inela chifukwa yofunjeda Mawu a Mulungu, pepela koma teto roromela Yehova. w23.08 3 ¶4; 4 ¶7

Navwelanga olamulela alukulualukulu, vinokami-a ira vyongo viniendele pama iyo koma teto athu amo-iwa. Chifukwa n’ni ninaonga eno? Yowambeela, ninopewa chilango ineyo inapelekiwa wa athu o-ovwela malamulo. (Arom. 13:1, 4) Navwelanga olamulela, aliwa kanoona ira a Mboni da Yehova etene mba athu ovwela. Mwaisazo, chaka dinjinji mundulimu, asilikali koovolowa mu Nyumba ya Umwene wu Nigeria misonkano dingali muwari. Aliwa kafufuza athu anayo kapanga vioneselo vofuna ira katipeleke misonkho. Koma ndimuwa wa asilikalayo ooawandela ira kakumemo ndipo aongile ira: “A Mboni da Yehova thawi detene kanopeleka misonkho.” Thawi iliyetene ineyo muvwelenyo lamulo, munokami-a ira athu a Yehova kakaena limbili lapama ndipo vyevi vinokoza za teteza Akiristu afwinyu usogolo. w23.10 9 ¶13

Atumiki amo-i a Yehova kookala kayembekezelanga mapeto ailambwela wa thawi indendayi. Wa athu, lonjezo la Mulunguli linokoza woneya n’nga linochedwa kwakwaneli-ediwa. Yehova unoiziwa mwemo atumikaye kanavwelaathu. Moi oomusimikizela Habakuku ira: “Uire vyevi voi masomphenyala kanadedi-eda thawiwa yo-eliwa teto kanotamangela umapeto uwa. Vyevyo vili m’masomphenyavi kai vyonama. Masiki masomphenyala kangazengelezile, uwadedi-edengave chifukwa kanoza kakwakwaneli-ediwe ndithu. Aluwa katinaza kadimbeluwa.” (Hab. 2:3) Kodi Mulungu awongile mawu anala vofuna mulimbikisa Habakuku eka? Kapena kodi kanokoza nilimbikisa iyo teto malambwano? Mosogoleliwa, namarumiwa Paulo oosambaula mawu anala wa Akiristu anayo kanayembekezela ilambo isha. (Aheberi 10:37) Eno masiki ira lonjezo la Mulungu loi unoza anivulumuche liwoneyanga n’nga linodimbeluwa, kaninakaikele ira ‘linoza likwakwaneli-ediwe ndithu, kalinaza lidimbeluwa.’ w23.04 30 ¶16

Aizaraeli anjinji katasomedele umboni oyi Yehova oomu-indi-eda chito Mose ngati omuimelela. (Num. 14:10, 11) Moweli-edaweli-eda, aliwa kookoonda somedela vyoi Mose arumiwe na Yehova. Vachifukwa inela, Yehova kaalolile ira Aizaraeli anala kadowe kavolowe Muilambo Yolonjeziwa. (Num. 14:30) Komave, vookala Aizaraeli amo-iwa anayo ka-arela malangizo a Yehova. Mwaisazo, thawi imo-iwa Yehova aongile ira: “Kalebe . . . ukala andi-arelanga na murima wetene.” (Num. 14:24) Mulungu oomudalisa Kalebe ndipo angafiile muilambo ya Kanani, oomulola ira asakule dela lelo unafuna liye kala. (Yos. 14:12-14) Aizaraeli anayo kaloliwe volowa Muilambo Yolonjeziwayo, koopeleka isazo yapama vo-arela malangizo a Yehova. Vevo Yoswa asakuliwe liye ira avolowe m’malo mwa Mose, ira aasogolelenga, aliwa ‘koomulemekeza vinjinji m’malambo etene a moywae.’ (Yos. 4:14) Vyo-arelavo viwa vyali vyoi, Yehova oowadalisa vowava-a ilambo ineyo aalonjezile liye. — Yos. 21:43, 44. w24.02 21 ¶6-7

Mofwanafwana na dokotala, unoyo unaanda iziwa vyokuza murimi-u voona gundauwa va muwono, na-iyene ninokoza iziwa ngati ninamukonda vinjinji Mulungu voona mwemo ninakondela iyo afwi-u. Ngati ninaone ira chikondi-u wa Akiristu afwi-u iambeela yeva, inela inokoza kala izindikilo yoi chikondi-u wa Mulungu iambeela teto yeva. Koma ngati thawi detene ninatonyi-eda chikondi, inokoza kala izindikilo yoi ninomukonda teto vinjinji Mulungu. Ngati kaninakonda vinjinji abali na arongoli-u ndiye kuti vikala vuto lilukulu. Chifukwa n’ni ninaonga eno? Chifukwa vinokoza tonyi-eda ira usamwali-u na Mulungu kuli paama. Mtumwi Yohani oofotokoza likundo leli vevo aongile liye ira: “Unoyo kanamukonda balae unoyo unamuona liye, kanamukonde Mulungu unoyo kanamuonevo.” (1 Yoh. 4:20) Ndiye kodi ninafunjedavo n’ni veva? Yehova unosangalala na iyo ngati ‘ninakondana.’ — 1 Yoh. 4:7-9, 11. w23.11 8 ¶3; 9 ¶5-6

Angali mwana, Mwene Yehoasi oosakula vyongo mwazelu. Liye kaan’na babae moi oo-arela malangizo a Ndimuwa wa Asembe Yehoyada unoyo ali ororomeleya. Ndimuwa wa asembeyo oomulangiza Yehoasi ngati mwanae. Volandela isazo ya Yehoyada, Yehoasi oosakula ira atumikelenga Yehova koma teto kami-a athu amo-iwa ira kamutumikelenga. Yehoasi oopanga vyoi kachisi wa Yehova asakaediwe. (2 Lim. 24:1, 2, 4, 13, 14) Ngati munafunji-iwa ira mumuomeliwengana Yehova koma teto arela makundwae vamoywinyu, iziwani ira munanava-iwa mphaso yavadela. (Miya. 2:1, 10-12) Makolwinyu kanokoza ufunji-ani vinjinji. Kanoza kasangalale akala muna-arelenga malangizo a m’Malemba anayo kanauva-aniathu. Yofuneya vinjinji choi munoza mumusangalase Mulungu moi munoza mukale nae va usamwali wolimba. (Miya. 22:6; 23:15, 24) Vyevi pi vifukwa vyapama vyoupangi-ani sazi-eda vyevyo Yehoasi apangile liye angali mwana. w23.09 8-9 ¶3-5

Yehova oolonjeza ira unerenga someda mapempelwi-u. Mulungwi-u unokonda atumikae ororomeleya. Eno kananyalanyaze mapempelwiwa. (Sal. 10:17; 37:28) Koma vi kavinatanthauza ira unerenga niva-a iliyetene ineyo ninamuvepe iyo. Ninafuneya dedi-edela mpakana muilambo isha ira nize niwachele vyongo vimo-i vyevyo ninavepa iyo. Yehova unosomeda mapempelo a athu mogwilizana na yolinga yae. (Yes. 55:8, 9) Mbali imo-i ya yolinga yae choi vailambo yavati vakale athu osangalala, ogwilizana koma teto ovwela ulamulilwae. Koma Satana unaonga ira athu kanokoza sangalalanga ngati kanavilamulela ekiwa. (Gen. 3:1-5) Vofuna tonyi-eda ira vyevyo Satana unaonga liye pivyonama, Yehova oolola ira athu kavilamulelenga. Koma ulamulilo wa athu uwambeeli-a mavuto anjinji anayo ninagumanana iyo malambwano. (Nam. 8:9) Ninoiziwa teto ira Yehova kanamali-e mavuto etene vathawiila. w23.11 21 ¶4-5

Yehova oolonjeza ira zela mwa Aburahamu, “mitundu dinjinji” dinoza didalisiwe. Komave, ngakale ira liye ali angan’na chaka 100 koma teto Sara ali angan’na chaka 90, mwana unoyo Mulungu aalonjezile liye ali aanabaliwe. Wa athu, vyali vyo-owandeya ira Aburahamu na Sara kakaena mwana. Veva Aburahamu ooyesiwa vinjinji. Komave “[liye] ookaana chiyembekezo koma teto iroromelo yoi unoza akale baba wa mitundu dinjinji.” (Arom. 4:18, 19) Ndipo vyevyo aembekezela liyevi vyooireya. Liye oobala Isaki, mwana unoyo amuembekezela liye wa thawi indendai. (Arom. 4:20-22) Mulungu unokoza sangalalanga na iyo koma teto nionanga ira nili olungama koma teto nionanga ira nili afwae ngati mwemo vyaliliathu na Aburahamu. Ndipo Paulo oofotokoza vyevi vevo alembile liye ira: “Mawu oyi “Mulungu oomuona [Aburahamu] ira ngolungama” katamulembele liye eka. Koonilembela teto iyo. Na-iyene ninokoza oniwanga ira nili olungama chifukwa yoi ninomuroromela Mulungu unoyo amuvenyi-ile Yesu Mbwii-u.” (Arom. 4:23, 24) Mofwanafwana na Aburahamu, ninafuneya muroromelanga Yehova, panganga vyapama koma teto embekezelanga ira vyetene vyevyo alonjezile liye vinoza vikwakwaneli-ediwe. w23.12 7 ¶16-17

Mwagumana na mayesero anayo kanaupangi-ani mantha, muumbuwelenga ira Yehova unoona vyevyo vinauireelanivyo ndipo unoiziwa mwemo munavwela nyo. Mwaisazo, Yehova kaakeda ona nkhanza dedo Aizarayeli kapangeliwaathu wu Iguputo koma ooiziwa ‘voreya wewo kavwaathu.’ (Ekis. 3:7) Koma mwina kamunaiziwe mwemo Yehova unautandizelani liye mwaovanga chifukwa ya maesero amo-iwene. Eno mumuvepenga ira autandizengani ira muonenga mwemo unautandizelani liye. (2 Mam. 6:15-17) Vanduliviwa muganizelenga vyongo vi: Kodi moovuruwana khani kapena ndemanga imo-iwene vamisonkano ineyo yaulimbikisileni? Kodi vikala buku, vidiyo kapena nyimbo ya broadcasting ineyo iulimbikisileni? Kodi vikala muthu unoyo aulimbikisileni na likundo limo-iliwalene kapena lemba? Vinokoza kala vyo-orucha diwala mwemo abali na arongoli-u kananitonyi-edelaathu chikondi koma teto mwemo vyongo vyevyo Yehova univa-ile liye vinanilimbikiselaathu. Koma dedi timphaso davadela dokumela wa Yehova. (Yes. 65:13; Maliko 10:29, 30) Mphaso dedi dinatonyi-eda ira Mulungu unonikonda. (Yes. 49:14-16) Dinotonyi-eda teto ira ngofwanelela ira nimuroromelenga. w24.01 4-5 ¶9-10

Aanawelele udimu, Yesu ooumbucha ofunjedae ira kanafuneela irela umboni vya liye, “mu Yerusalemu, wu Yudeya wetene na wu Samariya, dowa fiya umagomi-edo ailambo yavati.” (Vyo. 1:8; Luk. 24:46-48) Vaanavire thawi indendai asogoleli Achiyuda koomu-inda namarumiwa Petulo na Yohani nowadowana Ukhoti Lilukulu la Ayuda moi koowalamula ira ka-iye laleela koma teto koowaophophi-a. (Vyo. 4:18, 21) Petulo na Yohani kaongile ira: “Weluzani ekinyu, akala uli ofwanelela vamaso va Mulungu vwela nyo kwaranya Mulungu. Koma iyo kanina-iye onga vyongo vyevyo navionile iyo novivwa.” (Vyo. 4:19, 20) Petulo na Yohani kangamasuliwe, ofunjedayo koopepela wa Yehova mogweli-a mawu ira aakami-e kwakwaneli-eda yofuna yae. Yehova oosomeda pepelo lokumela vati vamurimali.— Vyo. 4:31. w23.05 5 ¶11-12

Yehova na Mwanae kookala limo-i wa chaka dinjinji ndipo vyevi vipangi-a ira kakondanenga vinjinji. Usamwaliwa ngwawale vinjinji kwaranya usamwali uliwetene. Yehova oofotokoza mwemo unamukondela liye Yesu monga mwemo lemba la dambo la peeno munaongelaathu. Yehova ookoza onga ira, ‘Ula ngunoyo unandisangalasa.’ Koma vofuna nitonyi-eda mwemo unamukondela liye Yesu, aongile ira, “ula ngu Mwananga unoyo ndinamukonda miyo.” Yehova oosangalala vinjinji na Yesu koma teto vyongo vyevyo Yesuyo a-alile liye vang’ono ira avipange vathawi ineyo. (Aife. 1:7) Ndipo Yesu kaakaikela ira Ababae kanomukonda. Oowona ira chikondi ya Yehova chiyeniyeni ndipo ooivwa chikondiyo m’murimani mwae. Liye oofotokoza moweli-edaweli-eda kumela vati vamurima ira Ababae kanomukonda.— Yoh. 3:35; 10:17; 17:24. w24.01 28 ¶8

Kaerekezelani ira fwinyu uuongelani vyotakala. Munoiziwa ira pivyonama, koma athu amo-iwa kanororomela vyongovyo. Enjedela vevo, athu kanopitilizave onga vyonamavyo ndipo athu amo-iwa teto anjinji kanoviroromela. Kodi munavwe avi m’murimani? Kaivyokaiki-a ira vyonama vyevi vinokoza uvoreyani vinjinji m’murimani. Isazo inela inokoza nitandiza vwechecha mwemo Yehova avwele liye limbili lae lingatakali-iwe. M’mo-i mwa a-imae auzimu oowonga vyonama vyokuza liye wa Hava, ndipo Hava oororomela vyonamavyo. Vyonama vyevi vyoopangi-a ira makolwi-u owambeela kativwele Yehova. Vyo-arelavo viwa pivyoi athu etene koochimwa ndipo kanokhwa. (Gen. 3:1-6; Arom. 5:12) Mavuto etene anayo ninaona iyo muilambwela monga imfa, kondo na vyongo vimo-iviwa vyovwi-a chisoni, vyaambeele chifukwa ya vyonama vyevyo Satana afalisile liye. Kodi Yehova vyoomuvoreya m’murimani chifukwa ya vyonama vyevi na vyo-arelavo viwa? Mookaikela vyoomuvoreya m’murimani. Komave Yehova kaavyile murima kapena sunga yam’murimani. Ndipo liye thawi detene ngu “Mulungu wachimwemwe.” — 1 Tim. 1:11. w24.02 8 ¶1-2

Kodi munapange avi ira mukaleve ororomeleya ngati Yosefe? Musakulenga panopa vyevyo munapange nyo mwaza mugumana na maesero. Mufunjedenga koonda mombaraanya vyongo vyevyo Yehova unaidanana liye ndipo kamudedi-enga ira muwambeele kaye viganizela pama. (Sal. 97:10; 119:165) Vyevi vinoza viutandizeni ira kamupange chimo chifukwa munaza mukala ira muiziwa wale vyofwanelela panga. Mwina nyo munoiziwa ira moofwanya choonadi ndipo munofuna tumikela Yehova na muriminyu wetene koma munozengeleza ira muvipeleke koma teto badiziwa. Ngati chi eno, munokoza panga vyevyo Mwene Davide apangile liye. Munokoza muvepa Yehova ira: “Ndifufuzeni nyo Mulungu, ndipo muiziwe murimanga. Ndifufuzeni ira muiziwe maganizwanga anayo kanandipangi-a kaana nkhawa. Muone ngati mwa miyo muli iliyetene yotakala, ndipo mundisogolele mundila yamuyaya.” (Sal. 139:23, 24) Yehova unodalisa athu anayo “kanamusaelasaela na murima wetene.” Mwaesaesanga ira mukwakwaneli-edenga yolinga inyu yoi muvipeleke koma teto badiziwa, munotonyi-eda ira munomusaelasaela na murima wetene. — Aheb. 11:6. w24.03 6 ¶13-15

Ndimuwa wa asembe ookaana udindo woimelela athu wa Mulungu. Ndimuwa wa asembe wa Aizarayeli owambeela ali Aroni ndipo asakuliwe na Yehova vevo chihema yaambeelaathu inda chito. Koma mogwilizana na vyevyo mtumwi Paulo afotokozile liye, “vafuneya kala asembe anjinji ovolowa m’malo chifukwa imfa yoowaruni-a pitiliza usembiwa.” (Aheb. 7:23-26) Voi katali angwilo, andimuwa a asembayo kafuneya teto pelekanga sembe da machimwiwa. Veva pavevo andimuwa a asembe a Aizarayeli kana-iyanaathu vinjinji na Ndimuwa wa Asembe wavadimu, unoyo uli Yesu Kiristu. Monga Ndimuwa wa Asembe, Yesu Kiristu ngu “wachito otumikela amo-iwa . . . muchihema yeniyeni, yomangiwa na Yehova, o-okala muthu.” (Aheb. 8:1, 2) Paulo afotokozile ira “chifukwa yokaana moyo wo-omala, kalivo omuvolowa m’malo [Yesu] va usembae.” Paulo oopitiliza fotokoza ira mo-iyana na asembe a Chiizarayeli, Yesu kai “otakali-iwa, o-iyana na athu ochimwa, eno kanafuneya peleka dambo na dambo sembe da machimwae.” w23.10 26 ¶8-9

“Udimu wawale unaimelela maboma a athu” anayo kanapanga vyongo mosogoleliwa na Satana na viwanda vyae. (Mat. 4:8, 9; 1 Yoh. 5: 19) Ndipo Baibulo lino-indi-eda chito mawu oyi “ilambo yavati” voonga vya athu. (Gen. 11:1; Sal. 96:1) Eno “ilambo yavati yawale” inaimelela athu otakala anayo kali vailambwela. Yehova kanaza akeda sakaeda vyongo vimo-i na vimo-i vyokuza “udimu” na “ilambo yavati” vyevyo vilivovi. M’malomwiwa unoza avichenje, kapena ira vichoselaatu. Unoza achose udimu na ilambo yavati vyevyo vilivo vathawiila noweli-eda “udimu usha na ilambo yavati isha,” vyevyo vinaimelela boma lisha koma teto athu olungama. Yehova unoza achenje ilambwela koma teto unoza apangi-e athu ira kakale asha vowakami-a ira kakale angwilo. Mogwilizana na vyevyo Yesaya aongile liye, ilambo yetene inoza ikale yoriya ngati munda wa Edeni. Muthu uliwetene vaekave unoza akami-iwe ira akale musha. Orangala, anayo kan’na vuto lo-oona koma teto lo-ovwa kanoza kachili-iwe ndipo ngakale anayo katatiile kanoza kakaena moyo nawili. — Yes. 25:8; 35:1-7. w23.11 4 ¶9-10

“Chisauso ilukulu” inoza iambeele morurumucha. (Mat. 24:21) Komave, mo-iyana na ngozi dimo-i dorurumucha, kai athu etene anayo kanaze karurumuwe na chisauso ilukulu inela. Chaka dotamangela 2 000 diviriledo, Yesu oochenjeza o-arelae ira kakozeelenga vya thawi inela. Nakala okozeya, vinaza vikala vyo-orucha vilela va thawi ineyo koma teto kami-a amo-iwa ira kavilelenga. (Luka 21:36) Ninafuneela za vilela ira nimuvwele Yehova nororomela ira unoniteteza. Kodi ninaza nipanga avi akala abali-u kalusile vyongo vimo-i kapena katundwiwa wetene? (Hab. 3:17, 18) Ninafuneela za kala achifundo ira niava-e vyevyo kanafuneelaathu. Kodi ninaza nipanga avi akala mgwilizano wavilambo uniukele moi ninafuneela kala na abali na arongoli-u mu isinyumba ing’onong’ono wa thawi yoyeva? (Ezek. 38:10-12) Ninafuneela za atonyi-eda chikondi ilukulu ira nize nivilele va thawi yorucheyo. w23.07 2 ¶2-3

Athu otelana kanokoza funjeda va isazo ya Akula na Purisikila, banja lelo Akiristu anjinji owambeela kalilemekezaathu. (Arom. 16:3, 4) Aluwa koo-inda chito, laleela koma teto kami-a athu amo-iwa kangali limo-i. (Vyo. 18:2, 3, 24-26) Teto thawi detene Baibulo laonganga vya Akula na Purisikila, linaaromolela limo-i. Kodi athu otelana kanaasazi-ede avi? Kaganizelani vyongo vinjinji vyevyo nyo monga mulombwana kapena mu-iyana, munafuneela nyo panga. Kodi pivyowandeya ira muirelenga limo-i vyongo vyevi monga banja, m’malo moi uliwetene airelenga vaekave? Mofwanafwani-a, Akula na Purisikila kalaleela limo-i. Kodi nyo teto thawi dinjinji munopangecha vyoi mulaleelenga limo-i? Akula na Purisikila ka-indela teto chito limo-i. Mwina nyo na mamuninyu kapena mu-iyaninyu kamuna-inda chito yofwanafwana, koma kodi munokoza indela limo-i chito davande? (Nam. 4:9) Mwakami-ananga chito imo-iwene, munogwilizana vinjinji koma teto munofwanya mpata owaleda. w23.05 22-23 ¶10-12

Etene iyene thawi dimo-i ninoova. Mwaisazo, vevo Mwene Sauli afuna liye mupha Davide, liye ootawela muzinda wa Afilisiti wa Gati. Vaanavire thawi, Akisi unoyo ali mwene wa wu Gati oovwa ira Davide ali msilikali wakopolo unoyo aromoliwa munyimbo ira oopha “masauzande anjinji” a Afilisiti. Davide “ookaana mantha vinjinji.” (1 Sam. 21:10-12) Liye aova vyevyo Akisi amuirele liye. Ndiye chin’ni yamutandizile Davide ira alimbe murima? Mu Salimo 56, Davide oofotokoza mwemo avwela liye vevo aliliye wu Gati. Salimoli linofotokoza pama vyevyo vyamupangi-ile ova koma teto vyevyo vyamupangi-ile ira a-iye ova. Angaambeele ova, Davide oororomela Yehova. (Sal. 56:1-3, 11) Liye ookaana vifukwa vyapama vyomupangi-a roromela Yehova. Motandiziwa na Yehova, Davide ooganiza vyopanga vyongo vimo-i vyailendo. Liye oovierekezela kala wamisala ndipo vyevi vyoomutandiza. Sopano Akisi kamuonile Davide ngati muthu oopi-a ndipo oomulola ira adowenga. — 1 Sam. 21:13–22:1. w24.01 2 ¶1-3

Kodi athu anala anayo kanaromoliwa mulemba la peenoli mbaani? Anala mbozoziwa etene. Eno ozoziwa omari-a kaza kalandiwa dowa udimu vanduli va chisauso ilukulu, imo-i mwa chitwiwa yowambeela inaza ikala vaza kondo. Kaza kavenyi-iwa dowa udimu, aliwa kanoza ka-inde chito limo-i na Kiristu na angelwae owela vovaza kondo yomari-a yolimbana na adani a Mulungu. Kakedani ganizela, kangali vailambwela, Akiristu amo-iwa ozoziwa kali ouluula koma teto o-okaana kopolo. Koma aliwa kaza kadowa udimu kanoza kakale vyolengiwa vyauzimu vyakopolo vyoi kavinakwa ndipo kanoza kavaze kondo limo-i na Mwene Wakondo Yesu Kiristu. Kondo ya Aramagedo yaza imala, aliwa kanoza ka-inde chito limo-i na Yesu votandiza athu ira kakale angwilo. Mo-okaikela, aliwa kanoza kaapangele abali na arongoliwa vyongo vyapama vinjinji kwaranya mwemo kapangelaathu kangali vailambwela. w24.02 6-7 ¶15-16

Athu amo-iwa ngakale ira kanakalecha kangakozeile, kanozengeleza ira kavipeleke koma teto badiziwa. Aliwa kanokoza ganizanga ira, ‘Bwanji ngati vanduliviwa ndinapange chimo lilukulu koma teto chosiwa?’ Ngati mun’na maganizo anala, iziwani ira Yehova unoza auva-eni vyevyo munafuneya nyo ira “mukale na ikalelo yogwilizana na vyevyo unafuna [liye], ira mumusangalasenga va iliyetene.” (Akol. 1:10) Liye unoza auva-eni teto kopolo ira mupangenga vyofwanelela. Yehova utonyi-eda ira unokoza panga vyevi chifukwa utandizavo wale athu anjinji ira kapangenga vyofwanelela. (1 Akor. 10:13) Chichifukwa iwa vanakala athu oyeva vinjinji anayo kanachosiwa mupingo. Yehova unotandiza athwae ira kakaleve ororomeleya. Muthu uliwetene unoyo kai wangwilo unoesiwa ira apange vyotakala. (Yak. 1:14) Komave, munokoza sakula vyevyo munapange nyo mwagumana na maesero. Likundo ti loi nyo ngunoyo un’na udindo osakula vyevyo munafuna nyo panga vamoywinyu. Ngakale ira athu amo-iwa kanoruni-anga vyevi, nyo munokoza vifunji-a ekinyu ira kamulakalakenga vyongo vyotakala. w24.03 5 ¶11-12