Juni

Yehova oodalisa Akiristu amuchaka 100 dowambeela ira kakwakwani-e vilela. Thawi dinjinji Akiristu amuthawi ya anamarumiwa koozuzumi-iwa mwina teto va thawi yoi kataiyembekezela. Kaganizelani vyevyo vyamuireele Baranaba na namarumiwa Paulo vevo kalaleelaathu wu Lusitala. Vowambeela aluwa koowacheliwa pama na athu anayo kaavuruwana. Koma thawi imo-i dambo lelo, oruni-a “kookopa athwayo” moi amo-i mwa aluwa koomuvoka Paulo mabwe nomu-iya anga-alile vang’ono khwa. (Vyo. 14:19) Koma Baranaba na Paulo koopitiliza laleela udela limo-i. Kodi vyo-arelavo viwa vyali vyoi avi? Aluwa kookami-a “athu oowelengeya ira kakale ofunjeda” moi vyoonga viwa koma teto isazo iwa yoolimbikisa Akiristu afwiwa. (Vyo. 14:21, 22.) Anjinji koopindula chifukwa yoi Baranaba na Paulo katawelele munduli masiki vevo kazuzumi-iweathu mo-oyembekezeleya. Na-iyene ninoza nidalisiwe akala kanina-iya inda chito eneyo Yehova uniwandelile liye ira nii-inde. w23.04 16-17 ¶13-14

Wa moywae wetene Mwene Davide oogumana na adani oopi-a, ndipo thawi dinjinji oomuvepa Yehova ira amukami-e. Davide oororomela ira Yehova unovwa koma teto someda mapepelwae. Nyo teto munokoza roromela vyevi. Baibulo linonisimikizela ira Yehova unokoza niva-a zelu koma teto kopolo dedo ninafuneela iyo ira nivilele. Liye unokoza indi-eda chito abali na arongola koma teto athu oyi vano katinamutumikela ira kanikami-e mundila imo-iwene. Ngakhale ira kai thawi detene vevo Yehova unasomede liye mapepelwi-u mundila ineyo naidedi-edela iyo, ninoiziwa ira unoza anisomede. Liye unoza aniva-e vyevyo ninafuneela iyo koma teto vathawi ineyo ninavifuna iyo. Eno pitilizani pepela mwangan’na iroromelo yoi Yehova unongousamalelani vathawiila koma teto ira ‘unoza akutirise vyokumba vya yamoyo iliyetene’ muilambo isha ineyo inaza. — Sal. 145:16. w23.05 8 ¶4; 13 ¶17-18

Ninopanga pama naganizelanga madaliso anayo ninawachela iyo nakwakwaneli-edanga vyolinga. Kodi mbamadaliso aavi anayo nyo munafuneela nyo aganizela? Akala yolinga inyu chokuza welenga Baibulo kapena pepela, muganizelenga mwemo kwakwaneli-eda yolingeyo unaukami-eleniathu limbi-a usamwalinyu na Yehova. (Sal. 145:18, 19) Akala yolinga inyu choi mukaena ikalelo imo-iwene, muganizelenga mwemo ikalelo ineyo inaukami-eleniathu ira mugwilizanenga na athu amo-i. (Akol. 3:14) Bwanji mulembe vifukwa vyetene vyevyo vinaupangi-ani funa kwakwaneli-eda yolinga inyu? Mwera eno muwelelengamo vakwikwivakwikwi ira muonenga vifukwavyo. Koma teto mukalenga na thawi yowaleda na athu anayo kanaulimbikiseni. (Miya. 13:20) Onga vyoona, etene iyene malambo amo-iwa ninoonecha ira kaninafuna panga yongo. Kodi vyevi vinatapulela ira kaninakwakwaneli-ede yolinga yi-u? Naari. Ninokoza kwakwaneli-edave yolinga yi-u ngakhale akala thawi dimo-i kaninakaena murima ofunechecha ikwakwaneli-eda. Pivyoona ira vyevi kavinakale vyokweeya koma vyo-arelavo viwa vinakala vyapama vinjinji. w23.05 27-28 ¶5-8

Iziwa ira ninafuneela gumana na vyo-arelavo vya vyevyo nisakulile iyo, unokoza nilimbikisa ira niulule machimwi-u, nikoze vyevyo nilakwi-ile iyo koma teto kanize niviwelele nawili. Panga vyevi unonikami-a ira nipitilize tamanga va mpikisano odowa wachela moyo. Ngati kamunawande chenja vyevyo musakulile nyo molakweya, musomedelenga mwemo vyongo vililiathu va moywinyu vathawiila. Kamutatilenga thawi na kopolo dinyu vovilungami-a kapena viimba mulandu kapena teto aimba athu amo-iwa mulandu. M’malomwiwa, musomedelenga vyevyo mwalakwi-ile nyo noesaesanga panga vyevyo munawande nyo ira vyongo vikale pama vathawiila. Ngati munaviimba mulandu chifukwa ya vyevyo mwalakwi-ile nyo, moviyevi-a mupepelenga wa Yehova nosomedela vyevyo mwalakwi-ile nyo koma teto vepa ira aukululukeleni. (Sal. 25:11; 51:3, 4) Mupepesenga wa anayo mwaalakwele nyo. Muvepenga teto ira andimuwa kaukami-eni akala vanafuneela panga eno. (Yak. 5:14, 15) Mufunjedenga va vyevyo mwalakwi-ile nyo teto muesaesenga ira kamuviwelele nawili. Mwapanganga vyevi, munokala osimikiza ira Yehova unoza auireleni chifundo koma teto unoza aukami-eni. — Sal. 103:8-13. w23.08 28-29 ¶8-9

Vyoira vya Yehoyada vyoomukami-a Yehoasi ira akale Mwene wapama. Vyo-arelavo viwa vyali vyoi mwene waizombwela oofuna musangalasa Yehova. Koma Yehoyada angatatiile, Yehoasi oovwela akalonga ampatuko. (2 Lim. 24:4, 17, 18) Ngakhale ira Yehova ookumudwa na vyevi, “oopitiliza tumiza anamaongela vaari viwa ira kaakami-e welela wa liye . . . , koma katavwele.” Aliwa katamuvwele ngakhale Zekariya mwana wa Yehoyada, oyi kaakede kala namaongela na wasembe wa Yehova, koma ali waibali wa Yehoasi. Teto Mwene Yehoasi oofiya vopangi-a ira Zekariya aphiwe. (2 Lim. 22:11; 24:19-22) Yehoasi kaapitilizile ova Yehova. Yehova ali angaongile ira: “Anayo kanandinyoza mbo-okaana chito wa miyo.” (1 Sam. 2:30) Va-anavire thawi, gulu ling’onong’ono la khondo la wu Siriya loogonji-a “gulu la khondo lilukulu vinjinji” la Yehoasi moi lamu-iile “avuteyanga vinjinji” na mabala. (2 Lim. 24:24, 25) Yehoasi oophiwa na atumikae chifukwa yoi oomupha Zekariya. w23.06 18-19 ¶16-17

Mtumwi Paulo oofunji-a koma teto laleela uthenga wapama wu Efeso. (Vyo. 19:1, 8-10; 20:20, 21) Liye oowakonda vinjinji abalae ndipo oofunechecha atandiza ira kakaleve ororomeleya wa Yehova. Akiristu awu Efeso anayo Paulo aalembele kalata, koororomela vyongo vyonama koma teto koopanga vyamizimu ka-anafunjede choonadi. Athu anjinji mu mzinda wa Efeso kali achiwerewere koma teto o-okaana manyazi. Koowonga teto nthabwala doruwana vowaleda ngakale teto va miyambo dachipembezo. (Aife. 5:3) Athu anjinji ‘katawanda zindikila makalelo apama’ tantauza ira “kataona voreya uliwetene.” (Aife. 4:17-19) Ka-anafunjede vyolondola vakhani ya vyongo vyofwanelela na vyo-ofwanelela, chikumbumtima ya Akiristu awu Efeso kayaaimba mulandu. Chichifukwa iwa Paulo aongile ira aliwa kali mu dima ya maganizo ndipo “kali olapelana na moyo unoyo unakumela wa Mulungu.” Komave, athu amo-iwa awu Efeso katali mu dima wa maganizo. w24.03 20 ¶2, 4; 21 ¶5-6

Gidiyoni afuneela panga vyongo mwatindi va chitwae monga oweluza. Amidiyani kangatawile ma-iyu va khondo, Gidiyoni oowatamangi-a kumela wu Chigwa ya Yezereeli mpakana dowa fiya wu Inje wa Yorodano. (Owel. 7:22) Ndiye kodi liye oo-iya atamangi-a angafiile wu injeniwo? Naari. Ngakhale ira ali angagomile, liye na alombwana 300 anayo an’na liye koolambuwa injeyo nopitiliza atamangi-a. Vogomi-eda viwa koowafwanya moi koowagonji-a. (Owel. 8:4-12) Gidiyoni oororomela ira Yehova unoza amuva-e kopolo, moi oomuva-a kopolodo. (Owel. 6:14, 34) Gidiyoni na asilikalae kali wavati vevo katamangi-aathu mamwene ambin’li a Chimidiyani, anayo mwina kali kangagwelile ngamila. (Owel. 8:12, 21) Komave mokami-iwa na Mulungu, Aizarayeli atindala kookwaranya va khondweyo. Mofwanafwana na vyevi, andimuwa kanokoza roromela Yehova unoyo “kanagoma kapena fooka.” Liye unoza aava-e kopolo vevo kanadifuneelaathu. — Yes. 40:28, 29. w23.06 6 ¶14, 16

Ninokoza kaana murima ogarateya ngakale nagagumanile na mavuto. Eno muroromelenga Yehova. Kaganizelani mwemo roromela malangizo a Yehova wamukami-edeleathu Baraki. Ngakale ira muilambo iwa kamwali vishango na mimwanango, Yehova oomuwandela ira adowe avaze kondo na gulu la asilikali awu Kanani, losogoleliwa na Sisera, lelo lan’na vida vyetene vyakondo. (Owel. 5:8) Namaongela wamu-iyana Debora oomuwandela Baraki ira atite m’mwangoni nodowa uchigwa ira adowe agumane na Sisera, unoyo an’na magaleta 900. Ngakale ira magaleta a Sisera katavuteyenga enda muchigwamo, Baraki oosomedela. Vevo asilikalayo kaambeeleathu tita m’Mwango wa Tabori, Yehova oowambeela rumbwi-a zongwe. Vyevi vyoopangi-a ira magaletayo kalepelenga enda m’madogo, moi Yehova oopangi-a ira Baraki akwaranye vakondweyo. (Owel. 4:1-7, 10, 13-16) Yehova unoza apangi-e ira na-iyene vyongo viniendelenga pama akala ninamuroromela koma teto vwela malangizo anayo unaniva-a liye zela mugulu lae. w23.07 19 ¶17-18

Leza murima kofuneya ira nize nivulumuwe. Mofwanafwana na atumiki ororomeleya awale, ninafuneela embekezela moleza murima ira Mulungu akwakwaneli-ede malonjezwae. (Aheb. 6:11, 12) Baibulo linonierekezela na mulimi. (Yak. 5:7, 8.) Mulimi unopanga tindi zala mbewu koma teto elela koma kanaiziwa ira dinaulukula alini. Komave mulimiyo unoembekezela moleza murima nororomelanga ira unoza a-ande. Mofwanafwana na vyevi, ninotanganisiwa na vyongo vyokuza lambela, ngakale ira ‘kaninaiziwa dambo lelo Mbwii-u unaze liye aze.’ (Mat. 24:42) Ninoembekezela moleza murima nororomelanga ira vathawiwa Yehova unoza akwakwaneli-ede vyetene vyevyo alonjezile liye. Koma akala kaninakale oleza murima, ninokoza goma nowambeela iya vang’ono na vang’ono imbarimbari. Ninowambeela teto saelasaela vyongo vyevyo ninaona iyo ira vinokoza nizi-eda imwerumweru vathawiila. Koma nakala oleza murima, ninokoza vilela mpakana vamapeto koma teto za vulumuwa. — Mik. 7:7. w23.08 22 ¶7

Naerekezela ulosi wava Daniyeli 2:41-43 na maulosi amo-iwa ofwanyeya m’buku la Danieli na Chivumbuluso, ninokoza onga ira manyalo kanaimelela ulamulilo wakopolo wavailambo yetene malambwano, wa Britain na America. Voonga vya ulamulilola, Danieli awongile ira “umwenoyo unaza ukala wolimba koma va vyongo vimo-i unaza ukala wo-olimba.” Chifukwa n’ni va vyongo vimo-i unaza ukala wo-olimba? Chifukwa yoi athu amo-iwa anayo kanaimelela ulongo wonyeta, kanofooki-a kopolo diwa dopanga vyongo ngati isulo. Ninofunjeda makundo ofuneya angasene aimbarimbari va vyevyo Danieli afotokozile liye, simbwasimbwa manyalwiwa. Yowambeela, ulamulilo wakopolo wa Vailambo Yetene wa Britain na America ukala utonyi-edanga ira ngwakopolo va vyongo vimo-i. Mwaisazo, vyevi pivilambo vin’li mwa vilambo vyevyo vyakwaranyile Vakondo Yowambeela koma teto Yanambili ya Vailambo Yetene. Komave ulamulilola ukala ungali wofooka va vyongo vimo-i moi unopitilizave kala wofooka chifukwa yoi zika diwa dinokangana ekiwaekiwa koma teto na boma. Yanambili, ulamulilola unaza ukala womari-a, Umwene wa Mulungu wa-anamali-e maboma etene a athu. w23.08 10-11 ¶12-13

Thawi dimo-i Davide ookumbanya vinjinji chifukwa ya mavuto anayo agumanana liye. (Sal. 18:4, 5) Koma oosisimuliwa chifukwa Yehova oomutonyi-eda chikondi koma teto musamalela. Vathawi inela, Yehova oomusogolela fwaela umalo “apama vinjinji” koma teto “umalo ovumela a ma-inje anjinji.” Vyevi vyoomutandiza Davide fwanya nawili kopolo ndipo oopitiliza tumikela Mulungu. (Sal. 18:28-32; 23:2) Malambwano, Yehova unonitonyi-eda chikondi yororomeleya ndipo ngakale ira ninogumana na mavuto anjinji, ‘kanimalilemo’ muilambwela. (Malilo 3:22; Akol. 1:11) Thawi dinjinji moyo wa Davide wakala vangozi ndipo adanae kali akopolo. Komave chikondi ya Yehova yoomutandiza ira avivwenga ira ngotetezeya. Thawi detene Davide oowona ira Yehova ali na liye ndipo vyevi vyoomulimbikisa. Eno liye ooimba nyimbo ira: “[Yehova] oondivulumucha uvyongo vyetene vyevyo vyandipangi-a mantha.” (Sal. 34:4) Ngakale ira thawi dimo-i Davide ookaana mantha vinjinji, liye ookalave olimba murima chifukwa yoiziwa ira Yehova unomukonda. w24.01 30 ¶15-17

Mufunjedengavo yongo va vyevyo Yehoasi alakwi-ile liye. Ndimuwa wa Asembe Yehoyada angatatiile, Yehoasi oogwilizana na athu olakweya. (2 Lim. 24:17, 18) Liye oowambeela vwela akalonga a Yuda anayo katamuomeliwana Yehova. Kodi munoona ira liye oopanga pama gwilizana na athu osokoneza anala? Komave liye oowaona ngati afwae moi oowavwela. Vevo suwenae Zekariya amulangizile liye, Yehoasi oolamula ira aphiwe. (2 Lim. 24:20, 21; Mat. 23:35) Wewu wali takala murima koma teto puusa vinjinji. Vowambeela Yehoasi ali muthu wapama koma pivyovwi-a chisoni ira oochenja nokala wampatuko koma teto opha. Vamapeto viwa atumikae koomupha. (2 Lim. 24:22-25) Vyongo vyoomuendela pama aakale ira oopitiliza vwela Yehova koma teto athu anayo kamuomeliwana. w23.09 9 ¶6

Yesu ooiziwa ira Petulo unokoza pitiliza kala ororomeleya. Eno, liye oomuwandela mooma murima ira: “Kuove.” Vyevyo Yesu apangile liye votonyi-eda ira oomuroromela Petulo, vyoomukami-a wa moywae wetene. Vanduli viwa Petulo na balae Andireya, koo-iya chitwiwa ya usozi kala o-arela a Mesiya, vyevyo vyapangi-ile ira kafwanye madaliso anjinji. (Maliko 1:16-18) Petulo oowona vyongo vinjinji vyosangalasa chifukwa yokala o-arela wa Kiristu. Mwaisazo, liye oowona Yesu achili-anga obulela, kumi-a viwanda koma teto venyi-a okhwa. (Mat. 8:14-17; Maliko 5:37, 41, 42) Petulo oowona teto masomphenya otonyi-eda ulemelelo unoyo Yesu unaze liye akaena monga Mwene wa Umwene wa Mulungu moi mookaikela vyevyo vyoomulimbikisa. (Maliko 9:1-8; 2 Pe. 1:16-18) Aakale ira Petulo kamu-arele Yesu, kaaona vyongo vyevi. Liye mwina oosangalala chifukwa yoi kalolile ira maganizo ofooki-a kamulepeli-e fwanya madaliso anala. w23.09 21 ¶4-5

Mukalatae yowambeela, mtumwi Petulo oo-indi-eda chito mawu oyi: “kalani oomeliwana vinjinji.” Chikondi inela inovu-elela o-okala machimo oyeva oka koma “machimo oinjiva.” (1 Pe. 4:8) Mwina Petulo aumbuwela vyevyo Yesu amufunji-ile liye chaka dingasidene mundulimu vakhani yokululuka. Vathawiyo, liye mwina aganiza ira akala unamukululukele balae “mpakana thawi 7,” unokoza tonyi-eda ira ngooma murima. Koma Yesu oomufunji-a Petulo koma teto iyovano ira ninafuneela kululuka “mpakana thawi 77,” tatauza ira mookaana malile. (Mat. 18:21) Akala thawi imo-iwa vyauruchileni arela malangizo anala, kamutatile murima. Atumiki etene a Yehova voi kai angwilo, thawi dimo-i vinowarucha kululuka. Yofuneya vinjinji vathawiila, kupanga vyetene vyevyo munawande nyo ira mumukululukele balinyu nokala nae nawili vamurendele. w23.09 29 ¶12

Angali m’mbani mwasomba, Yona kaakaikela ira Yehova unovuruwana pempelo lae lotonyi-eda viyevi-a koma teto lapa, teto ooiziwa ira Yehova unomukami-a. Eno Yehova oomuvulumucha ndipo liye ali okozeya dowa inda chito ineyo amurumile liye. (Yona 2:10–3:4) Mwagumananga na vyoshisha, kodi munodandaula vinjinji moi munolepela pempela wa Yehova? Kapena munofooka vinjinji moi munolepela funjeda vaekinyu? Muumbuwelenga ira Yehova unovwechecha mwemo vyongo vililiathu va moywinyu. Eno ngakale mungapempelile mwachidule, kamukaikelenga ira liye unouva-ani vyevyo munafuneela nyo. (Aife. 3:20) Ngati munalepela welenga koma teto funjeda vaekinyu chifukwa yamavuto, mushishenga vuruwana vyongo vyoira jambuliwa monga Baibulo kapena mabukwi-u amo-i. Vuruwana nyimbo kapena onela mavidiyo va jw.org unokoza teto ukami-ani. Mwapempelanga wa Yehova koma teto indi-eda chito vyongo vyevyo univa-ile liye, munakala mulolanga ira auva-eni kopolo. w23.10 13 ¶6; 14 ¶9

Vyongo vyevyo vyafwanyeya muwari mwa chihema vyali vyofwanafwana na vyevyo vyafwanyeya mu makachisi anayo kamangiwe wu Yerusalemu. Muwari mwiwa mwali masubi ambin’li. “Malo Owela” na “Malo Owela Vinjinji.” Masubayo koo-iyani-iwa na nguwo yopentiwa. (Aheb. 9:2-5; Ekis. 26:31-33) Muwari mwa Malo Owela mookala yo-elavo nyale yagolide, guwa la sembe la vyofukiza na tebulo la mkate wachioneselo. “Asembe ozoziwa” oka mbanayo kaloliwa volowa muwari mwa malo owela dowa inda chito diwa. (Num. 3:3, 7, 10) M’malo Owela Vinjinji mwakala likasa la pangano lagolide, lelo laimelela kalavo wa Yehova. (Ekis. 25:21, 22) Ndimuwa wa asembe eka ngunoyo aloliwa vira nguwo yochinga dowa wu Malo Owela Vinjinji va Dambo la Mwambo Wopimba Machimo. (Lev. 16:2, 17) Liye oovolowa na magazi a nyama ira adowe apimbe machimwae koma teto a Aizarayeli etene. Vanduli viwa, Yehova oofotokoza tantauzo la vyongo vyevyo vyafwanyeya muchihema. — Aheb. 9:6, 7. w23.10 27 ¶12

Mawu a Mulungu kanonilamula moweli-eda weli-eda ira ‘nikondanenga.’ (Yoh. 15:12; Arom. 13:8; 1 Ates. 4:9; 1 Pe. 1:22; 1 Yoh. 4:11) Komave chikondi inakalecha m’murimani ndipo kalivo muthu unoyo unaone m’murimani mwi-u. Ndiye kodi ninatonyi-ede avi ira ninowakonda amo-iwa? Vyoonga koma teto vyoira vi-u pivyevyo vinatonyi-ede. Vikala ndila do-iyana-iyana dedo ninatonyi-edele iyo ira ninowakonda abali na arongoli-u. Mwaisazo, Malemba kanonilimbikisa ira “Muwandelanenga vyoona.” (Zak. 8:16) “Sungani murendele vaari vinyu.” (Maliko 9:50) “Votonyi-edana ulemu, kalani vasogolo.” (Arom. 12:10) “Muwachelanenga.” (Arom. 15:7) “Pitilizani lolelana nokululukelana.” (Akol. 3:13) “Pitilizani tukulelana vyongo vyonyemela.” (Agal. 6:2) “Pitilizani limbikisana.” (1 Ates. 4:18) “Pitilizani tonthozana.” (1 Ates. 5:11) ‘Mupempelelanenga.’ — Yak. 5:16. w23.11 9 ¶7-8

Dambo lililetene ninafuneela iroromelo yolimba ira nisakule vyoira vakhani do-iyana-iyana monga maphunzilo, vyosangalasa, athu owaledana, banja, a-ima koma teto chito. Ninoira pama vifukanga ira: ‘Kodi vyevyo ndinasakula miyo vinotonyi-eda ira kandinakaikela ira ilambo yotakalela chineneveva inovolowiwa m’malo na ilambo isha ya Mulungu? Kapena kodi ndinosakula vyongo mofwanafwana na athu anayo kanawona ira khwa mbamapeto a vyetene?’ (Mat. 6:19, 20; Luka 12:16-21) Ninokoza sakulanga vyoira mwazelu akala ninaroromela ira ilambo isha ili vakwikwi vinjinji. Ninafuneela kaana iroromelo yolimba nagumanana mavuto. Ninokoza zuzumi-iwa, bulela marenda alukulu koma teto gumanana vyongo vimo-i vyofooki-a. Mwina vowambeela iyo podi wonanga ira ninokoza vilela mavuto anayo. Koma thawi dinjinji mavuto n’nga anala kanolanda thawi indedayi, eno ninafuneela iroromelo yolimba ira niavilele koma teto nipitilize mutumikela Yehova mosangalala. — 1 Pe. 1:6, 7. w23.04 27 ¶4-5

Yehova unoembekezela ira nipangenga vyongo mogwilizana na mapempelwi-u. Mwaisazo, m’bali unokoza vepa Yehova ira amukami-e vevo unavepa liye abwanae ira afwanyeye usonkano wachigawo. Kodi Yehova unasomede avi pempelo leli? Liye unokoza mukami-a m’baliyo ira alimbe murima dowa onga na abwanae. Koma m’baliyo unafuneya panga vyongo mogwilizana na pempelolo vodowa wa abwanayo dowa vepa. Mwina teto unofuneya vepa abwanayayo moweli-edaweli-eda. Unokoza teto vepa fwae uchitowo ira kachenjane thawi yo-indela chitweyo kapena unokoza teto vepa ira kava-iwe ndalama dambo lelo aa-indile liye chito. Yehova unoembekezela ira nipempelenga moweli-edaweli-eda nagumana na mavuto. Vyevyo Yesu aongile liye vinotonyi-eda ira thawi dimo-i kaninava-iwe thawi ineyo vyevyo nivepile iyo. (Luka 11:9) Eno kamutatile murima. Mupempelengave kumela vati va murima koma teto moweli-edaweli-eda. (Luka 18:1-7) Napempelanga moweli-edaweli-eda ninomutonyi-eda Yehova ira khaniyo chofuneya vinjinji wa iyo, teto ninomutonyi-eda ira ninomuroromela vinjinji ira unonikami-eda. w23.11 22 ¶10-11

Yehova oomulonjeza Aburahamu unoyo ali fwae ira mitundu detene vailambo yavati dinoza didalisiwe zela mwa mwanae. (Gen. 15:5; 22:18) Voi Aburahamu oororomela vinjinji Mulungu, kaakaikela ira lonjezo leli linoza likwakwaneli-ediwe. Ngakale vyali eno, Aburahamu an’na chaka 100 koma teto iyanae an’na chaka 90, ndipo banja lororomeleyali kalan’na mwana. (Gen. 21:1-7) Koma Baibulo lini: “Aburahamu ookaana chiyembekezo koma teto iroromelo yoi unoza akale baba wamitundu dinjinji . . . mogwilizana na vyevyo vyaongiwe.” (Arom. 4:18) Nyo munoiziwa ira vyevyo Aburahamu aembekezela liyevi vyookwakwaneli-ediwa. Liye oobala mwana wamulombwana zina laye Isaki, unoyo amuembekezela liye wa thawi indendai. Kodi chin’ni yamukami-ile Aburahamu ira kakaikelenga vyevyo Mulungu amulonjezile liye? Chifukwa yoi ali vausamwali na Yehova, Aburahamu “kaakaikela ira vyevyo [Mulungu] alonjezile liye,” vinoza vikwakwaneli-ediwe. (Arom. 4:21) Yehova oosangalala na Aburahamu, ndipo oomuromola ira ali olungama chifukwa yoi ookaana iroromelo. — Yak. 2:23. w23.12 8 ¶1-2

Wachinyamata ororomeleya, unokwakwaneli-eda maudindwae mororomeleya. Yesu oopeleka isazo yapama vinjinji vakhani inela. Liye kaapanga vyongo mo-osamala kapena moo-elelavo murima. M’malomwiwa oopanga vyongo vyetene vyevyo Yehova amurumile liye, ngakale vevo panga vyevi waliathu orucha. Yesu oowakonda athu makamaka ofunjedae, ndipo mofunechecha oopeleka moywae chifukwa ya aliwa. (Yoh. 13:1) Vomusazi-eda Yesu, mu-indenga mwatindi chito iliyetene ineyo muva-iwe nyo. Ngati kamunaiziwa mwemo munapangelenyo vyongo vimo-iviwa, munafuneya kala ovievi-a novepanga abali olimba mwauzimu ira kautandizeni. Kamukutirenga nokeda panga vyongo vyoyeva vyoka. (Arom. 12:11) M’malomwiwa, mumari-enga chito yetene ineyo muva-iwe nyo ngati “munamupangela Yehova, o-okala athu.” (Akol. 3:23) Komave, muumbuwelenga ira kamuli angwilo eno muiziwenga malilinyu nosomedelanga vyongo vyevyo mulakwi-ile nyo. — Miya. 11:2. w23.12 26 ¶8

Ninosangalala nabadiziwa nokala m’banja la Yehova. Athu anayo kabadiziwe kanokoza gwilizana na vyevyo Davide aongile liye ira: “Osangalala ngu muthu unoyo nyo Yehova mumusakulile, nomuzana vakwikwi na nyo ira akale m’mba mwinyu.” (Sal. 65:4) Yehova kanakeda lola ira muthu uliwetene avolowe m’mba mwae. Liye unosakula athu anayo kanatonyi-eda ira kanofunechecha kalanae vausamwali. (Yak. 4:8) Ndiye mwavipeleka wa Yehova koma teto badiziwa, liye ‘unoza aukutuleleni madaliso mpakana kamunaza musauwela yongo.” (Mala. 3:10; Yer. 17:8) Badiziwa inakedecha kala chiyambi chabe. Koma mwabadiziwa, munafuneya panga vyetene vyevyo munawande nyo ira mukwakwaneli-edenga lonjezo linyu ngakale vevo munagumana nyo na maesero. Nam. 5:4, 5) Monga ofunjeda wa Yesu, munafuneya arela isazo yae koma teto vwela malamulwae mosamala vinjinji. — Mat. 28:19, 20; 1 Pe. 2:21. w24.03 8 ¶1-3

Koma bwanji akala nyo na mamuninyu kapena iyaninyu kamunasangalala irela limo-i vyongo? kodi munaire avi? Kaganizelani vya isazo ya mulo. Mulo kunakedecha fiyeda kara mwakopolo. Unafuneela utetedela vang’onovang’ono, era eno ku-elangavo khuni dilukulu. Mofwanafwana na vyevi, bwanji muwambeele nofwanya thawi yoyeva dambo lililetene yoirela vyongo limo-i? Muonechechenga ira muirenga vyongo vyevyo etene munasangalalana nyo. (Yak. 3:18) Ambeela mwavang’onovang’ono unoukami-ani ira muulukuli-e chikondinyu. Lemekezana kofuneya vinjinji m’banja. Ninokoza ufwanafwani-eda na mpweya, unoyo unakami-a ira mulo ukarenga vinjinji. Akala mpweya unola kulivo, mulo unokoza tima mombaraanya. Mofwanafwana na vyevi, akala athu otelana katinalemekezana, chikondiwa inokoza yeva mombaraanya. Koma mulombwana na iyanae kaesaesanga ira kalemekezanenga, vinokami-a ira chikondiwa iulukulenga. Muumbuwelenga ira khani kai yokeda ganiza ira nyo munomulemekeza fwinyuyo koma ira liye aonenga ira munomulemekeza. w23.05 22 ¶9; 24 ¶14-15

Atumiki amo-i ororomeleya a Mulungu koongavo vya thawi ineyo kaan’naathu nkhawa kapena ngurumeda chifukwa ya adaniwa kapena mavuto amo-i. (Sal. 18:4; 55:1, 5) Na-iyene teto ninokoza runi-iwa usukulu, uchito, na athu am’banja li-u kapena na boma. Kapena ninokoza bulela mwakayakaya. Va thawi ngati inela ninokoza kala ngati mwana unoyo unasauwela tengo wo-inda. Kodi Yehova unanitandiza avi vathawi ngati inela? Liye unonitonthoza koma teto nilimbikisa. Eno kalani na thawi yopempela wa liye koma teto welenga Mawae. (Sal. 77:1, 12-14) Nazanigumana na mavuto, yowambeela panga inaza ikala pempela wa Babi-u waudimu. Mumufotokozelenga Yehova vyevyo vinauwiri-ani wova koma teto wudi-ani nkhawa. Mumulolenga ira auwongi-eni koma teto utothozani zela m’malemba. — Sal. 119:28. w24.01 24-25 ¶14-16

Ninafuneela kaana murima ofunechecha ira nikwakwaneli-ede vyolinga vyauzimu. Nakala ofunechecha vinokala vyo-orucha kwakwaneli-eda vyolinga vi-u. Ndiye kodi chin’ni inanikami-e ira nikaengana murima ofunechecha? Mumuvepenga Yehova ira mukaena murima ofunechecha. Vo-indi-eda chito zimwae Yehova unokoza ukami-ani kaana murima ofunechecha kwakwaneli-eda yolinga inyu. Thawi dimo-i ninovi-elela yolinga chifukwa ninoiziwa ira pi vyevyo ninafuneela iyo panga teto chipama vi-elela yolinga. Koma mwina kaninakaena murima ofunechecha kwakwaneli-eda yolingeyo. Muganizelenga vyevyo Yehova uuireleni liye. (Sal. 143:5) Namarumiwa Paulo ooganizela modii-a mwemo Yehova amutonyi-edele liye oma murima wae ulukulu moi vyevi vyoomulimbikisa ira airenga tindi vomutumikela. (1 Akor. 15:9, 10; 1 Tim. 1:12-14) Mofwanafwana na vyevi, nyo teto mwaganizelanga vinjinji vyevyo Yehova uuireleni liye, munoza mukale ofunechecha kwakwaneli-eda yolinga inyu. — Sal. 116:12. w23.05 27 ¶3-5

Ninomusangalasa Babi-u waudimu natamandanga zina lae. (Sal. 119:108) Komave, kodi vyevi vinatantauza ira Mulungu wakopolo detene uli ngati athu anayo kai angwilo, anayo kanafunecha tamandiwa chifukwa yofuna ira kavionenga ira mbofuneya? Naari. Namutamandanga Babi-u waudimu ninotandiza runi-a vyonama vyevyo Satana aongile liye vyevyo vinakuza teto muthu uliwetene. Satana unaongecha ira kalivo muthu unoyo unakaleve ororomeleya angagumanile na mayeselo votandiza ira zina la Mulungu kalitakali-iwe. Liye unaongecha ira ninokoza iya tumikela Mulungu ngati ninaona ira panga vyevyo unokoza pangi-a ira nigumane na mavuto. (Yob. 1:9-11; 2:4) Koma Yobu ookalave ororomeleya ndipo ootonyi-eda ira Satana ngonama. Nanga bwanji nyo? Uliwetene wa iyo ukaana mwai wotandiza ira zina la Babi-u kalitakali-iwe koma teto musangalasa vopitilizave mutumikela mororomeleya. (Miya. 27:11) Unola ngu mwai ulukulu vinjinji. w24.02 8-9 ¶3-5

Mose na Yoswa kangakhwile, Yehova oosakula oweluza ira kasogolelenga athwae. Vanduli viwa, muthawi ya mamwene, Yehova oosakula aneneri ira kapelekenga malangizo wa athwae. Mamwene ororomeleyala koo-arela malangizo a aneneri anala. Mwaisazo, Mwene Davide oovwela moviyevi-a angazuzuliwe na mneneri Natani. (2 Sam. 12:7, 13; 1 Lim. 17:3, 4) Mwene Yehosafati oororomela malangizo a mneneri Yahaziyeli ndipo oowalimbikisa athu a wu Yuda ira ‘karoromelenga aneneri a [Mulungu].’ (2 Lim. 20:14, 15) Mwene Hezekiya angamaliwe zelu, oovepa malangizo wa mneneri Yesaya. (Yes. 37:1-6) Thawi detene mamwene ka-arelanga malangizo a Yehova, koodalisiwa ndipo tundu wetene wookala wotetezeya. (2 Lim. 20:29, 30; 32:22) Veva uliwetene oowanda ona ira Yehova uno-indi-eda chito anenerayo vosogolela athwae. w24.02 21 ¶8

Satana unafuna ira nigwilizanenga na athu anayo kanapangi-e ira kanivwelenga makundo a Yehova. Niumbuwelenga ira athu anayo ninagwilizanana iyo kai anayo ninaaledana iyo vamaso na vamaso. Athwala kanotangani-avo anayo ninawaledana iyo va intaneti. Ninafuneya pewa maganizo amuilambwela oyi ikalelo ya chiwerewere kai yolakweya. Iyovano ninoiziwa ira maganizo anala mbolakweya. (Aife. 4:19, 20) Ninopanga pama vifuka ira: ‘Kodi ndinoesaesa pewa aleda mo-ofwanelela na afwanga auchito, usukulu kapena athu amo-iwa anayo katinalemekeza makundo olungama a Yehova? Kodi ndinololela arela makundo a Yehova ngakale athu amo-iwa kandionenga ira ndili orucha?’ Mogwilizana na lemba la 2 Timoteyu 2:20-22, ninafuneya teto kala osamala vevo ninasakula iyo afwi-u mupingo. Niumbuwelenga ira athu amo-iwa katinanitandize ira nikaleve ororomeleya wa Yehova. w24.03 22-23 ¶11-12

Kodi moowambeela ganizelavo ira Yehova ngoi avi? Ngakale ira kaninawande muona, Baibulo linomufotokoza mundila do-iyana-iyana. Mwaisazo, Yehova unoromoliwa ira “zuwa koma teto ishango” koma teto “mulo oononga.” (Sal. 84:11; Aheb. 12:29) Unofotokoziwa teto ira uli ngati libwe la safiro, isulo yowala koma teto zirilimbo. (Ezek. 1:26-28) Voi Yehova kaninawande muona, mwina vinokoza nirucha roromela ira unonikonda. Athu amo-iwa kanoganiza ira Yehova kanaakonda chifukwa ya vyongo vyotakala vyevyo vyaaireelevo mundulimu. Yehova unovwechecha mwemo ninavwela iyo ndipo unoiziwa mwemo vyevi vinapangi-elaathu ira vikale vyorucha kala vausamwali na liye. Eno vofuna nitandiza, liye unonifotokozela makalelwae osangalasa zela m’Mawae. Ikalelo ilukulu ya Yehova chi chikondi. (1 Yoh. 4:8) Baibulo linaonga ira Mulungu ngu chikondi. Vyongo vilivyetene vyevyo unapangecha liye, unavipanga chifukwa ya chikondi. Chikondi yae chiyakopolo vinjinji moi unoitonyi-eda ngakale wa athu anayo katinamukonda. — Mat. 5:44, 45. w24.01 26 ¶1-3

Yehova oomusakula Mose ira asogolele Aizaraeli vokuma wu Iguputo ndipo liye oowava-a umboni ooneya pama, tana oowasogolela vo-indi-eda chito chipilala ya murambo ndipo ma-iyu oowasogolela vo-indi-eda chito chipilala ya mulo. (Ekis. 13:21) Mose oo-arela chipilaleyo ineyo yamusogolele liye na Aizaraeli ira kadowe kafiye wu Nyanja Yofiila. Athwayo kookaana mantha vinjinji voganiza ira kanosauwela ovolowela chifukwa usogolo uwa wali nyanja ndipo unduli uwa wali asilikali a Iguputo. Koma Yehova ngunoyo aasogolela athwayo vomu-indi-eda chito Mose. (Ekis. 14:2) Vanduli viwa liye oowavulumucha mundila yodabwi-a vinjinji. (Ekis. 14:26-28) Va chaka 40 do-arela, Mose oopitiliza dalila chipilala ya murambo vosogolela athu a Mulungu muchipululu. (Ekis. 33:7, 9, 10) Yehova oowongi-ana na Mose zela muchipilaleyo ndipo Mose oopeleka malangizo a Yehovayo wa athu. Aizaraeli kookaana umboni okwakwanela otonyi-eda ira Yehova oomu-indi-eda chito Mose vowasogolela. w24.02 21 ¶4-5