Ogaste

Konani makundo ambin’li ofuneya anayo ninafwanya iyo mu salimuli: (1) Athu olungama kanogumanana mavuto. (2) Yehova unonivulumucha nagumanana mavuto. Ndiye kodi liye unanivulumucha avi? Ndila imo-i kunikami-a ira nionenga vyongo mofwanelela muilambwela. Masiki ira Yehova unonilonjeza ira ninongosangalala namutumikelanga, kanaonga ira kaninagumanenga na mavuto. (Yes. 66:14) Liye unonilimbikisa ira niganizelenga thawi eneyo ninaze iyo nikayena moyo onoyo unafuna liye ira nize nisangalalena mpakana walewale. (2 Akor. 4:16-18) Koma vathawiila liye unonikami-a ira nipitilize mutumikela dambo lililetene. (Malilo 3:22-24) Kodi malambwano ninafunjede n’ni va visazo vya atumiki a Yehova awale? Ninokoza gumana na mavuto ooembekezeleya. Koma namudalilanga Yehova, liye kanaza alepela nisamalela. — Sal. 55:22. w23.04 14-15 ¶3-4

Ninokoza funjedavo yongo vaisazo ya Yosefe na Mariya, anayo kali okozeya vwela olamulela alukulualukulu ngakale vevo vyaliathu vyorucha panga eno. (Luka 2:1-6) Vevo Mariya ali liye oembekezela wa medi 9, liye na Yosefe koowandeliwa ira kapange vyongo vyorucha. Augusto unoyo ali Olamulela wa Roma, ali angalamulile ira athu kalembi-e mukaundula. Yosefe na Mariya kafuneya enda ulendo orucha ovira m’mimwango dowa wu Betelehemu, unoyo wali wa makilomita otamangela 150. Ulendo unola wali orucha vinjinji, simbwasimbwa wa Mariya. Aliwa kookoza kumbanyelanga vinjinji vyokuza thanzi la Mariya koma teto mwana unoyo kamuembekezelaathu. Kodi vyakala avi aakale ira marenda koomuwambeelela vasewu? Liye aembekezela za bala mwana unoyo unaze akale Mesiya. Koma kodi vyevi vyoopangi-a ira aliwa kativwele lamulo la boma? Yosefe na Mariya katalolile ira vyongo vyevi vialepeli-e vwela lamulo. Yehova oowadalisa chifukwa yovwela uwa. Mariya oofiya pamapama wu Betelehemu, oobala mwana wathanzi ndipo ookami-a ira ulosi wa m’Baibulo ukwakwaneli-ediwe. — Mika 5:2. w23.10 8 ¶9; 9 ¶11-12

Koma bwanji akala munaova peleka ndemanga vamisonkano? Munokoza fwanya makundo amo-i anayo kanaukami-eni ira mukozeelenga pama. (Miya. 21:5) Mwakozeela pama khaniyo, kavinakala vyorucha ira musomede. Koma teto ndemanga dinyu dikalenga dachidule. (Miya. 15:23; 17:27) Kamunaovenga vinjinji ira mupeleke ndemanga yachidule. Mwasomedanga mwachidule koma teto mawu enyuenyu, munotonyi-eda ira muikozeela pama koma teto muvwechecha vyevyo mufunjedile nyo. Bwanji akala muyesedile arela amo-i mwamalangizwala koma munaona ira munanaovave peleka ndemanga maulendo men’li kapena poselavo? Kamukaikelenga ira Yehova unoyamikela ira munoyesayesa ira vyevyo munawande nyo. (Luka 21:1-4) Koma ira vyevyo munawande nyo kunatapulela vipanikiza. (Afil. 4:5) Muonenga vyevyo munawande nyo kwakwani-a viira, muvi-elelenga yolinga yoi muviire teto mupepelenga ira kamuovenga. Munokoza ambeela na yolinga yoi mupelekenga ndemanga imo-i yachidule. w23.04 21 ¶6-8

Mtumwi Paulo unonifwanafwani-eda na asilikali anayo kali cheru moi koowara vyowara vyaukhondo. Msilikali unoyo uli vachitwae, thawi detene unokalecha okozeya vaza khondo. Chimozimozi teto na iyo. Ninopitiliza kozeela dambo la Yehova vowara yovitetezela vamirima yairoromelo na chikondi koma teto chisoti yachipulumuso. Yovitetezela vamirima yooteteza murima wa msilikali. Iroromelo koma teto chikondi, vinoteteza murimi-u opipirisa. Makalelo anala kanonikami-a ira nipitilize tumikela Mulungu koma teto musazi-eda Yesu. Iroromelo inonikami-a kala osimikiza ira Yehova unoza aniva-e mphoto chifukwa yomusaelasaela na murima wetene. (Aheb. 11:6) Inonikami-a teto kalave ororomeleya wa Msogoleli-u, Yesu, ngakale vevo ninagumana iyo na mavuto. Ninokoza limbi-a iroromelo yi-u ira nivilele mavuto, voganizela visazo vya malambwano vya athu anayo kakalileve ororomeleya ngakale ira koozuzumi-iwa kapena koogumana na mavuto avyachuma. Ninokoza pewa msampha oomeliwana chuma vosazi-eda athu anayo kasakulile kaana moyo o-oulela vinjinji nayolinga yoi ka-elenga vyongo vya Umwene vamalo owambeela. w23.06 10 ¶8-9

Viruni-a unotangani-avo mwemo ninavwela iyo koma teto vyoira vi-u. Virui-a kofuneya teto ira niire vyapama simbwasimbwa akala vyevyo ninafuna iyo panga vili vyorucha kapena kanin’na murima ofunechecha viira. Umbuwelani ira viruni-a ti limo-i mwa makalelo anayo zimu owela unakumi-aathu eno muvepenga zimu owela wa Yehova ira uukami-engani kaana ikalelo yofuneya inela. (Luka 11:13; Agal. 5:22, 23) Kamudedi-edenga ira vyongo vikale pama. Muilambwela kavali thawi ineyo vyongo vyetene vinaniendelengeathu pama. Akala ninadedi-ede ira vyongo vikale pama, kaninakwakwaneli-ede yolinga yi-u. Thawi dimo-i kaninakaena murima ofunechecha kwakwaneli-eda yolinga yi-u chifukwa yoi yolingeyo inooneya kala yorucha. Akala mu pumwemo vililiathu na nyo, kodi munokoza ambeela na vyongo ving’onong’ono vokwakwaneli-eda yolingeyo? Akala yolinga inyu choi mukaena ikalelo imo-iwene, bwanji ambeela noitonyi-eda ikalelweyo mundila ding’onong’ono ding’onong’ono? Akala yolinga inyu choi muwelenge Baibulo letene, bwanji ambeela nowelenga wathawi yoyeva? w23.05 29 ¶11-13

M’malambo omari-ala, Yehova ukala a-indi-edanga chito gulu lae voniva-a yodja yauzimu na yolinga yoi etene iyene nipitilize enda va “Sewu wa Chiyelo.” (Yes. 35:8; 48:17; 60:17) Ninokoza onga ira muthu asomedela funjeda Baibulo, unokaana mwayi owambeela enda va “Sewu wa Chiyelo.” Amo-i kanakedecha enda va sewula wa thawi yoyeva vanduli viwa kuvenyavo. Koma amo-i koosimikizave pitiliza enda va sewula mpakana kangafiile wewo kanadowaathu. Kodi kanadowa waani? Wa anayo kan’na idedi-edo yoza dowa udimu, “Sewu wa Chiyelo” unowafii-a “m’paradaiso wa Mulungu” udimu. (Chiv. 2:7) Wa anayo kan’na idedi-edo yoza kala vailambwela, sewula unowakami-eda ira kaze kafiye vokala angwilo umapeto wa chaka 1 000. Akala munaenda va sewu unola kamuing’ane munduli, teto kamuvenyevo mpakana mwangafiile mu ilambo isha. w23.05 17 ¶15; 19 ¶16-18

Vinokala vyo-orucha ira muvipeleke wa Yehova ngati munaganizela vyongo vyetene vyevyo uupangeleni liye. (Sal. 116:12-14) Baibulo linaonga ira Yehova ngunoyo unapeleka “mphaso iliyetene yapama na yangwilo.” (Yak. 1:17) Mphaso ilukulu vinjinji ineyo aniva-ile liye chi sembe ya Mwanae, Yesu. Kakedani ganizela, dipo lipangi-a ira vikale vyowandeya ira mukale vausamwali na Yehova. Koma teto litandiza ira mukaena mwai oza kala na moyo mpakana walewale. (1 Yoh. 4:9, 10) Vipeleka chindila yapama yotonyi-eda ira munoyamikela chikondi ilukulu ineyo Yehova uutonyi-edeni liye koma teto madaliso anayo uuva-ileni liye. — Doto. 16:17; 2 Akor. 5:15. w24.03 5 ¶8

Makalelo otakala anayo ilambwela inalimbikisaathu, kanokoza nipangi-a vwa ngati mwemo avwele liye Loti, unoyo ali olungama. Liye “oovuteya murima vinjinji chifukwa ya makalelo onyaswi-a a athu otakala” voiziwa ira Babae waudimu unoidana na makalelo otakalala. (2 Pe. 2:7, 8) Ova koma teto muomeliwana Mulungu woomupangi-a Loti ira apewenga makalelo anayo athu omurungunuwa kairaathu. Na-iyene nirungunuwiwa na athu anayo katinalemekeza makundo a Yehova a makalelo apama. Ngakale vili eno, ninokoza kalave na makalelo apama akala ninapitilize muomeliwana Mulungu koma teto mulemekeza vinjinji. Vofuna nikami-a panga vyevi, Yehova unonilimbikisa mwachikondi vo-indi-eda chito buku la Miyambo. Akiristu etene, alombwana, a-iyana, a-ima koma teto andimuwa, kanokoza pindula vinjinji vo-arela malangizo azelu ofwanyeya m’bukuli. Naovanga Yehova, vinonitandiza ira kanivikululukelenga napanga vyotakala. w23.06 20 ¶1-2; 21 ¶5

Mwina nyo mugumana wale na mavuto monga runi-iwa na abalinyu, kapena teto mulolela ira kamukale na vyongo vinjinji na yolinga yoi mu-elenga vyongo vyokuza Umwene vamalo owambeela. (Mat. 6:33) Ngati chi eno iziwani ira Yehova unoona vyevyo munapanganyo vomutumikela mororomeleya. (Aheb. 6:10) Mwina teto nanyen’ne muona kwakwaneli-ediwa wa mawu a Yesu oyi: “Kalivo unoyo u-iile nyumba, achimwenae, arongolae, am’mae, ababae, a-ima kapena maminda chifukwa ya miyo koma teto chifukwa ya uthenga wapama, unoyo panopa kanaza afwanya vyongo vyoinjiva wilikiza maulendo 100 muthawiila. Liye unoza afwanye nyumba, achimwenae, arongolae, am’mae a-ima na maminda, koma teto unoza azuzumi-iwe, ndipo muthawi ineyo inazeyo, unoza afwanye moyo o-omala.” (Maliko 10:29, 30) Madaliso anayo munafwanyenyo mbaalukulu posa vyevyo mwaviimanilenyo. — Sal. 37:4. w24.03 9 ¶5

Vevo Akiristu awu Yudeya kagumanileathu na ndala ilukulu, abali a mupingo wawu Antiokeya “koosimikiza murima tumiza likami-edo lililetene lelo kawandeathu wa abali okala wu Yudeya.” (Vyo. 11:27-30) Ngakale ira Akiristu anayo kakuziwe na ndalela kakala undendai, Akiristu a wu Antiokeya kali osimikiza murima ira kaakami-e. (1 Yohani 3:17, 18) Na-iyene malambwano ninokoza tonyi-eda chifundo akala Akiristu afwi-u kakuziwe na ngozi damuchilengedwe kapena mavuto amo-iwa alukulu. Ninokoza iravo yongo mombaraanya, mwina vofuka andimuwa mupingo akala nina-indena chito yopeleka likami-edo, vopeleka ndalama dokami-eda va chito ya vailambo yetene koma teto vopepelela anayo kakuziwe. Abali na arongoli-u kanofuneya teto tandiziwa, ira kafwanye vyofuneya vamoywiwa. Vevo Mweni-u, Kiristu Yesu, unaze liye apeleke chiweluzo, aze anifwanye nitonyi-edanga chifundo teto aze aniwandele ira, “volowani mu Umwene.”— Mat. 25:34-40. w23.07 4 ¶9-10; 6 ¶12

Yesu oomusazi-eda Yehova vakhani yololela. Liye ootumiziwa vailambo yavatila ira alaleele wa “khosa dotatiya da nyumba ya Izarayeli.” Komave liye ootonyi-eda ira ali ololela vevo apanga liye utumikae. Vathawi imo-iwa muzimai m’mo-iwa unoyo kaali wa Chiizarayeli, oomuvepa ira amuchili-e mwanae wamu-iyana unoyo ali anga-indiwe na “chiwanda ilukulu.” Mwachifundo Yesu oopanga vyevyo muzimaiyo amuvepile liye moi oomuchili-a mwanaeyo. (Mat. 15:21-28) Kaganizelani teto isazo imo-iwa. Umaambeelelo wa utumikae, Yesu awongile ira: “Uliwetene ondikoonda . . . , namiyene ndinoza ndimukoonde.” (Mat. 10:33) Koma Yesu kaamu-iile Petulo ngakale ira Petuloyo ali angamukoondile maulendo angasene. Yesu ooiziwa ira Petulo ali angalapile koma teto ali ororomeleya. Angavenyi-iwe, liye oowoneela wa Petulo teto pivyovaela iziweya ira oomusimikizela ira oomukululukela koma teto ira unomuwomeliwana. (Luka 24:33, 34) Etene ambin’li Yehova Mulungu na Yesu Kiristu mbololela. Nanga bwanji iyo? Yehova unafuna ira nikale ololela. w23.07 21 ¶6-7

Kodi ninakami-e avi athu anayo kanakaikela lonjezo la Mulungu lokuza Paradaizo? Yowambeela, unoyo upelekile lonjezoli ngu Yehova. Buku la Chivumbuluso lini: “Ndipo Mulungu unoyo ugaratile vapando wa umwene eere: ‘Kaonani! Vyongo vyetene vyevyo ndinapanga miyo pivisha.’” Liye ukaana zelu koma teto kopolo ndipo unofunechecha angakwakwaneli-ede malonjezwae. Yanambili, pivyo-okaiki-a ira lonjezoli linoza likwakwaneli-ediwe ndipo wa Yehova vili ngati likwakwaneli-ediwa wale. Pivyovweya ira liye uni: “Mawu anala mbororomeleya koma teto oona. . . . Vikwakwaneli-ediwa!” Yanaralu, mawu oyi, “Miyo ndili Alefa na Omega,” kanonisimikizela ira Yehova aambeela panga yongo kana-iya mpakana ingawandeile. (Chiv. 21:6) Vyevyo Yehova unaze liye apange vinoza vitonyi-ede ira Satana ngonama koma teto olepela. Eno mwamuwelengela muthu, liye onga ira, “Vinovweya vyapama koma pivyorucha viroromela,” munokoza za muwelengela Chivumbuluso 21:5, 6. Nomufotokozela vyevyo Yehova aongile liye vosimikizela lonjezolo, vyevyo vyali ngati unanasainela mawae.— Yes. 65:16. w23.11 7 ¶18-19

Yehova oomulonjeza Abulahamu va thawi ineyo an’na liye chaka 75 ira unoza akaena mwana. Kodi Abulahamu oowona vyongo vyetene vyokuza lonjezoli vikwakwaneli-ediwanga? Naari. Pivyoona ira kangalambuwile Inje wa Firate noembekezela wa chaka 25, Abulahamu oowona baliwa wa mwanae Isaki wewo wali wodabwi-a moi vanduli va chaka dimo-i 60, oowona teto baliwa wa vizuulu vyae, Esau na Yakobo. (Aheb. 6:15) Koma Abulahamu kaawonile vizuulu vyae vyausogolo vikalanga tundu ulukulu koma teto wachela ilambo yolonjeziwa. Ngakale vyali eno, mulombwana ororomeleyola ali va usamwali wolimba na Mulengae. (Yak. 2:23) Moi aza avenyi-iwa, unoza asangalale iziwa ira mitundu detene da athu doodalisiwa chifukwa ya iroromelo koma teto leza murima wae. (Gen. 22:18) Kodi ninafunjedavo n’ni? Mwina na-iyene kaninaone vathawiila vyevyo Yehova alonjezile liye vikwakwaneli-ediwanga. Komave ngati nili oleza murima ngati Abulahamu, ninokala osimikiza ira Yehova unonidalisa vathawiila koma teto unoza anidalise vinjinji muilambo isha ineyo ulonjezile liye.— Maliko 10:29, 30. w23.08 24 ¶14

Mwene Uziya angali muzombwe ali oviyevi-a. Liye oofunjeda ‘ova Mulungu oona.’ Liye ookala na moyo wa chaka 68 moi Yehova oomudalisa wachaka dinjinji da moywae. (2 Lim. 26:1-4) Uziya oogonji-a adani anjinji a Aizarayeli moi oowonechecha ira mzinda wa Yerusalemu ngotetezeya. (2 Lim. 26:6-15) Pivyo-oira fuka ira Uziya oosangalala na vyetene vyevyo Mulungu amukami-ile liye panga. (Nam. 3:12, 13) Mwene Uziya ali angalemeele awandela amo-iwa vyoira. Kodi mwina vyevi pivyevyo vyamupangi-ile ira aganizenga vyoi unokoza panga iliyetene ineyo afuna liye? Dambo limo-i Uziya oopanga vyongo movikuza. Liye oovolowa mukachisi wa Yehova nowambeela peleka sembe dofukiza vaguwa, vyongo vyevyo mamwene kataloliwa vipanga. (2 Lim. 26:16-18) Ndimuwa wa Asembe Azariya ooshisha muruni-a koma liye oolunduwa vinjinji. Pivyovwi-a chisoni ira Uziya oowononga limbili lae lokala ororomeleya moi Yehova oomulanga vomupangi-a ira akaena makate. (2 Lim. 26:19-21) Vyongo vyoomuendela pama aakaleve oviyevi-a. w23.09 10 ¶9-10

Ngakale vanduli vozoziwa, mtumwi Petulo oolakwi-ave vyongo vimo-i. Mu 36 C.E., liye ookalavo vevo Koneliyo azoziwa liye na zimu owela. Unola wali umboni otonyi-eda ira “Mulungu kan’na sakulo” koma teto ira athu amitundu dimo-i kookaana mwai wovolowa mupingo wa Chikiristu. (Vyo. 10:34, 44, 45) Vanduli va vyevi, Petulo oomasuwa dja na athu amitundu dimo-i, vyongo vyoi vowambeela kaavipanga. Komave, Akiristu amo-iwa a Chiyuda kaona ira kai vyofwanelela ira Ayuda kadjenga limo-i na athu amitundu dimo-i. Ayuda anayo kan’na maganizo anala kangazile wu Antiokeya, Petulo oo-iya dja na abalae amitundu dimo-i, mwina voova ira unowakumudwi-a Ayudayo. Namarumiwa Paulo angaonile vyachinyengo vyevyo Petulo apangile liyevi, oomusumulula vamaso va athu etene. (Agal. 2:13, 14) Ngakale ira liye oolakwi-a vyongo, vyevi kavyamufooki-ile. w23.09 22 ¶8

Vifufuza moona murima unokoza ukami-ani ira muiziwe mbali dimo-i dedo munafuneela nyo sakaeda, komave kamunafuneela tatila murima. “Mbwiye ngooma murima” moi unoza aukami-eni. (1 Pe. 2:3) Mtumwi Petulo oonisimikizela ira: “Mulungu . . . unoza amari-e ufunji-ani. Unoza aulimbi-eni.”Vathawi imo-iwa, Petulo aviona ira kaali ofwanelela kala vakwikwi na Mwana wa Mulungu. (Luka 5:8) Koma mokami-iwa na Yehova koma teto Yesu, liye oopitilizave mu-arela Kiristu mororomeleya. Eno Yehova oolola ira Petulo ‘avolowe mwaulemelelo mu Umwene wo-omala wa Mbwiye na Mpulumusi-u Yesu Kiristu.’ (2 Pe. 1:11) Unola wali mwai wantengo wavadimu. Akala nanyen’ne munapitilizeve kala ororomeleya ngati Petulo, nololanga funji-iwa na Yehova, munoza muwachele moyo wo-omala. “Iroromelo inyu inoza ipangi-e ira miyoyo dinyu divulumuwe.” — 1 Pe. 1:9. w23.09 31 ¶16-17

Chihema yookaana bwalo lelo lan’na malo ochingiwa na mpanda wewo asembe ka-indaoathu chito diwa. M’bwalo leli mookala guwa la sembe lilukulu la mkuwa koma teto beseni la mkuwa la ma-inje lelo asembe kali-indi-edaathu chito voviweli-a ka-anaambeele utumikiwa wopatuleya. (Ekis. 30:17-20; 40:6-8) Malambwano abalae a Yesu ozoziwa ka-anadowe dowa tumikela na Yesu udimu monga asembe kanotumikela mororomeleya vailambo yavati m’bwalo lamuwari la kachisi wauzimu. Beseni lilukulu la ma-inje linowaumbucha ozoziwayo koma teto Akiristu etene ira kanafuneya kaana makalelo apama koma teto owela mwauzimu. Koma kodi a “khamu lilukulu,” kanatumikela Yehova kangali waani? Mtumwi Yohani oowaona “kangaimelile vamaso va pando waumwene,” vyevyo vinatonyi-eda ira kali m’bwalo launde lavailambo yavati wewo “kanamupangela [Mulungu] utumiki wopatuleya tana na ma-iyu mukachisae.” (Chiv. 7:9, 13-15) Ninoyamikela vinjinji ira Yehova univa-a mwai wantengo wavadimu womulambela mukachisae mulukulu wauzimu. w23.10 28 ¶15-16

Yehova unoniva-a kopolo vo-indi-eda chito andimuwa. Aliwa kali ngati mphaso dedo Yehova una-indi-eda liye chito vonilimbikisa koma teto nisisimula. (Yes. 32:1, 2) Eno mwakaana nkhawa, muwafotokozelenga andimuwa mavutwinyu. Kauva-angani thandizo muliwachelenga ndipo muliyamikelenga. Yehova unokoza a-indi-eda chito ira kauva-eni kopolo. Malonjezo a m’Baibulo kanoniva-a chiyembekezo yozakaana moyo wo-omala m’Paradaizo vailambo yavati kapena mu Umwene waudimu. Chiyembekezo yi-u inoniva-a kopolo. (Arom. 4:3, 18, 19) Ira niwande vilela vyoshisha, nilaleelenga utenga wapama koma teto nipangenga pama utumiki uliwetene mupingo. (1 Ates. 1:3) Chiyembekezo inela chineyo yamuva-ile kopolo mtumwi Paulo. Liye ‘oopanikiziwa,’ ‘maliwa zelu,’ ‘zuzumi-iwa’ koma teto ‘gwi-iwa vati.’ Thawi dimo-i, ngakale moywae weniweni wakala vangozi. (2 Akor. 4:8-10) Paulo oofwanya kopolo koma teto vilela chifukwa yo-ela maganizwae va chiyembekezo ineyo an’na liye. (2 Akor. 4:16-18) Paulo oo-ela maganizwae va chiyembekezwae yausogolo ya moyo oomala udimu. Chifukwa yoi Paulo ooganizela vya chiyembekezo ineyo, vyo-arelavo viwa vyali vyoi, “okaana maganizo apama dambo na dambo.” w23.10 15-16 ¶14-17

Vopempela, ganizelani ngati ili thawi yoi Yehova auva-eni vyevyo muvepile nyo. Mwina ninokoza funa ira Yehova anisomede mapempelwi-u muthawi ineyo. Koma vyoona pivyoi Yehova unoiziwa thawi yapama yoi anikami-e. (Aheb. 4:16) Ngati kaniva-iwe thawi ineyo vyevyo nivepile iyo, mwina ninokoza onanga ira Yehova ukowonda vyevyo nimuvepile iyovyo. Koma mwina vinokoza kala ira liye usomeda ira, ‘Dedi-ani kaye.’ Isazo ngu m’bali m’mo-iwa waizombwe unoyo avepile ira achili-iwe marendae. Koma marendae katamalile. Ngati Yehova amuchili-e modabwi-a Satana ookoza onga ira m’baliyo unapitiliza tumikela Yehova chifukwa yoi umuchili-a. (Yob. 1:9-11; 2:4) Enjedela vevo Yehova ookoza wale thawi yoi aze amali-e marenda etene. (Yes. 33:24; Chiv. 21:3, 4) Eno kaninaembekezela ira Yehova unochili-a athu modabwi-a malambwano. Ndiye m’baliyo unokoza vepa ira Yehova amuva-e kopolo koma teto murendele wa murima ira avilele marendayo koma teto apitilize mutumikela mororomeleya. w23.11 24 ¶13

Samisoni ali angalakwi-ile vyongo vinjinji komave kaa-iile tumikela Yehova. Liye oosaelasaela mpata woi akwakwaneli-ede utumiki unoyo Mulungu amuva-ile liye, ira agonji-e Afilisiti. (Owel. 16:28-30) Samisoni oomuvepa Yehova ira: “Ndiloleni ndiaweli-ede Afilisiti.” Mulungu oona oomusomeda moi oomuva-a nawili kopolo dodabwi-a. Eno vathawila, Samisoni oopha Afilisiti anjinji kwaranya maulendo amo-iwa mundulimu. Ngakale ira Samisoni oogumana na mavuto alukulu chifukwa yolakwi-a vyongo, liye kaa-iile panga yofuna ya Yehova. Eno kaya nilakwi-a vyongo moi ninafuneela sumululiwa, imechiwa va udindo kapena utumiki umo-iwene, kaninafuneela fooka. Niumbuwelenga ira Yehova unokala okozeya nikululukela. (Sal. 103:8, 9) Ngakale ira ninolakwi-a vyongo, Yehova unokoza ni-indi-edangave chito ngati mwemo apangele liye na Samisoni. w23.09 6 ¶15-16

Navilela maesero ninokala osomedeleya wa Yehova. Vyevi kavinatatauza ira Yehova unosangalala nagumananga na maesero kapena mavuto. M’malomwiwa, Mulungu unosangalala na iyo. Vilela wi-u unopangi-a ira nikale osomedeleya wa Mulungu. Anala mbamadaliso alukulu vinjinji! (Sal. 5:12) Umbuwelani ira Aburahamu oovilela maesero ndipo Mulungu oosangalala na liye. Yehova amuona ira ngu fwae, ndipo oomuromola ira ngolungama. (Gen. 15:6; Arom. 4:13, 22) Vyevi vinokoza niireela teto iyovano. Mulungu kanakeda sangalala noinjiva wa vyongo vyevyo ninapanga iyo vomutumikela kapena maudindo anayo nin’na iyo, liye unosangalala na iyo chifukwa yovilela wi-u mororomeleya. Ndipo etene iyene ninokoza vilela mo-olandela ira nili mwana kapena ndimuwa, koma teto mo-olandela mwemo vyongo vililiathu kapena teto luso li-u. Kodi vikala maesero anayo munaavilela nyo mororomeleya panopa? Ngati chi eno, vinoulimbikisani iziwa ira Mulungu unosangalala na nyo. Iziwa ira Mulungu unosangalala na iyo unokoza kami-a ira chiyembekezo yi-u ikale yakopolo. w23.12 11 ¶13-14

Mulombwana Wachikiristu unafuneya funjeda onga pama na athu. Muthu unoyo unaonga pama na athu, unovuruwana pama ira azindikile vyevyo vili m’maganizo mwa athu koma teto aiziwe mwemo kanavwelaathu. (Miya. 20:5) Liye unowanda zindikila vyongo vimo-i chifukwa ya mwemo mawu kanavweelaathu, mwemo khove inaoneelaathu koma teto mwemo muthu munapangela liye vyongo. Koma kamunaiziwe vyongo ngati vyevi ngati kamunaaleda na athu. Ngati thawi detene munaongecha na athu vo-indi-eda chito vipangizo vyamakono monga volemba ma imelo kapena mameseji, kamunakaena luso loonga na athu vamaso na vamaso. Eno, muesaesenga fwanya thawi yowaleda na athu vamaso na vamoso. (2 Yoh. 12) Mulombwana olimba mwauzimu unafuneya fwanyanga vyofuneya vamoywae koma teto vamoyo wa athu a m’banja lae. (1 Tim. 5:8) Vinokala pama funjeda luso lelo linaukami-eni ira muze mufwanye chito. (Vyo. 18:2, 3; 20:34; Aife. 4:28) Muiziweyenga ira muli muthu watindi, unoyo kana-iya chito mpakana angaimari-ile. Mwapanganga eno, munokoza fwanya chito ndipo katinauchoseni. w23.12 27 ¶12-13

Baibulo laonganga vya “dambo la Yehova,” linatapulela dambo lelo Yehova unaze liye aononge adanae novulumucha athwae. Mundulimu, thawi dimo-i Yehova oowononga adanae. (Yes. 13:1, 6; Ezek. 13:5; Zef. 1:8) Malambwano, “dambo la Yehova” linaza liambeela noonongiwa wa Babulo Mulukulu teto linoza lifiye vachimake va khondo ya Aramagedo. Ira nize nivulumuwe ‘va damboli’, ninafuneela kozeela vathawiila. Yesu oofunji-a ira, kaninafuneela keda kozeela “chisauso ilukulu” koma ninafuneela teto pitilizave ‘kala okozeya. (Mat. 24:21; Luka 12:40) Mukalatae yowandeliwa yowambeela ineyo alembele liye Akiristu a wu Tesalonika, namarumiwa Paulo oo-indi-eda chito mafanizo angasene vofuna akami-a ira kapitilize kozeela dambo lilukulu la Yehova. Liye ooiziwa ira damboli kalali vakwikwi va thawi ineyo. (2 Ates. 2:1-3) Komave, oowalimbikisa abalayayo ira kakozeelenga damboli ngati linaza mechelo, moi iyo teto ninafuneela indi-eda chito malangizwayala. w23.06 8 ¶1-2

Muchaka dam’ma 1970, wu Tokyo muilambo ya Japan woomangiwa nyumba yosanjikiza 60 dowa mudimu. Athu anayo kaona nyumbela imangiwanga kookumbanya chifukwa munzindola mooireya vivomerezi vakwikwi vakwikwi. Kodi chisisi ya nyumbela yali vaavi? Akaswiri anayo kamangile nyumbela kaimangile mundila yoi ikale yolimba koma teto ira iwandenga tekenyeya koma o-oonongeya. Kodi Akiristu kanafwanafwana avi na nyumba inela? Mkiristu unafuneela kala o-otekenyeya koma vathawi imo-ive ineyo unafuneela kala ololela. Liye unafuneela kala olimba koma teto o-otekenyeya va khani yo-arela malamulo a Yehova na makundwae. Liye unakala ‘okozeya vwela’ koma teto unopitiliza kala ororomeleya. Komave unafuneela kala ‘ololela’ akala pivyowandeya kapena teto akala vanafuneela panga eno. (Yak. 3:17) Mkiristu unoyo unaona vyongo mofwanelela va khani dedi unopewa kwimi-a vinjinji kapena lekelela vyongo. w23.07 14 ¶1-2

Yesu afuneya koonda maesero a Satana Mdyerekezi tangani-avo teto vyevyo amuwandela liye vyoi kakale ororomeleya wa Mulungu. (Mat. 4:1-11) Satana ooesaesa ira Yesu achimwe nayolinga yoi alepele peleka dipo. Va utumikae wavailambwela, Yesu oovilela teto maesero amo-iwa anjinji. Oozuzumi-iwa ndipo adanae anjinji koomuopopi-a ira kanomupha. (Luka 4:28, 29; 13:31) Afuneya teto vilela vyevyo ofunjedae kalakwi-aathu. (Maliko 9:33, 34) Vevo aimbiwa liye mulandu, oopangeliwa nkhanza koma teto nyoziwa. Vanduli viwa oophiwa mwankhanza koma teto oopangi-iwa manyazi. (Aheb. 12:1-3) Afuneya vilela mbali yomari-a ya maesero vaeka, mo-okami-iwa na Yehova. (Mat. 27:46) Onga vyoona, Yesu oogumana na mavuto alukulu ira apeleke dipo. Kodi ganizela mavuto anayo Yesu agumanilena liye chifukwa yofunechecha peleka moywae, kunaupangi-ani ira mumukondenga vinjinji? w24.01 10-11 ¶7-9

Leza murima unonikami-a napanganga vyongo na athu amo-iwa. Ninowanda vuruwana mwacheru athu amo-iwa kaonganga. (Yak. 1:19) Leza murima unolimbikisa murendele. Vevo nikumudwile iyo, leza murima unoniteteza ira kanipange vyongo mombaraanya vinjinji kapena onga vyongo vyevyo vinakumudwi-e amo-iwa. Moi akala nili oleza murima, kaninalunduwa mombaraanya, muthu m’mo-iwa anikumudwi-a. M’malo momuweli-eda, ninopitiliza “lolelana nokululukelana na murima wetene.” (Akol. 3:12, 13) Leza murima unokoza nikami-a ira nisakulenga vyoira mwazelu. M’malo mopanga vyongo mopupuluma kapena mo-oganiza pama, ninoza nifufuze koma teto ganizela vyevyo ninafuna iyo sakulavyo era eno sakula vyevyo vili vyapama vinjinji. Mwaisazo, akala ninasaela chito, ninokoza landeya ira nisomedele chito ineyo ifwanyeile mombaraanya, ngakale ira inongonisokoneza. Komave akala nili oleza murima, ninoganizela vyongo vimo-i monga wewo nina-indelenga iyo chitweyo, injiva wa thawi ineyo inafuneela koma teto mwemo inakuzeleathu banja li-u koma teto usamwali-u na Yehova. Leza murima unonikami-a ira kanisakule vyongo molakweya. w23.08 22 ¶8-9

Munokoza fooka chifukwa ya vyongo vyotakala vyevyo munalakalakanyo, ganizela vyevyo mwalonjezilenyo wa Yehova vevo mwavipelekanyo, unokoza uva-ani kopolo ira mupitilize limbana na maesero. Moi avi? Mwavipeleka wa Yehova munovikoonda ekinyu. Vyevi vinatantauza ira munokoonda vyolakalaka koma teto vyofuna vinyu vyevyo munaona nyo ira kavinamusangalase Yehova. (Mat. 16:24) Eno ngati munagumana na maesero, kamunaza mudimbeliwa noganizela vyevyo munairenyo. Munaza mukala mwangaiziwile wale vyofwanelela panga, ineyo ili kalave ororomeleya wa Yehova. Munoza mufunecheche pitiliza musangalasa Yehova. Vopanga vyevyo, munoza mufwanafwane na Yobu. Ngakale ira oogumana na maesero alukulu, liye oowonga mosimikiza ira: “Kandinaza ndi-iya kala ororomeleya.” — Yobu 27:5. w24.03 9 ¶6-7

‘Yehova Mulungu unoyo uli wachikondi’ uli na iyo. (2 Akor. 13:11) Liye unokonda muthu uliwetene vaekave. Kaninakaikela ira thawi detene “unonitonyi-eda chikondi yae yororomeleya.” (Sal. 32:10) Naganizelanga vinjinji mwemo unatonyi-edela liye chikondi yae wa iyo, pavevo teto ninakalecha iyo vausanwali olimba vinjinji na liye. Ninokoza pempela wa liye momasuwa nomufotokozela mwemo ninayamikelela iyo chikondi yae. Ninokoza teto mufotokozela vyongo vyetene vyevyo vinanikumbanyi-a nororomelanga ira unonivwechecha koma teto ngofunechecha nitandiza. (Sal. 145:18, 19) Etene iyene ninokopeya na chikondi ya Yehova ngati mwemo ninakopeelanga iyo na mulo va dambo lelo unde unadidilaathu. Chikondi ya Yehova chiyakopolo koma unoitonyi-eda mooma murima. Eno musangalalenga chifukwa Yehova unoukondani. Vyevi vinipangi-enga etene iyene onga mosangalala ira: “Ndinokonda Yehova.” — Sal. 116:1. w24.01 31 ¶19-20

Yesu oopanga vyongo vinjinji kwaranya keda aiziwi-a athu ira zina la Mulungu ngu Yehova. Ayuda anayo aafunji-a liye, kooiziwa wale zina la Mulungu. Koma Yesu oopeleka isazo yapama “chifukwa ngunoyo afotokozile vya Mulungu.” (Yoh. 1:17, 18) Mwaisazo, Malemba a Chiheberi kanotonyi-eda ira Yehova ngu Mulungu wachifundo koma teto ooma murima. (Ekis. 34:5-7) Yesu oofotokoza movweya pama likundo la choonadi leli vevo afotokozile liye fanizo la mwana olowelela na Ababae. Nawelenganga vyevyo Babola apangile liye angamuonile mwanae unoyo alapile na murima wetene “azanga vandendai,” nomutamangela, mukumbarela koma teto mukululukela na murima wetene, ninovwechecha pama chifundo koma teto oma murima wa Yehova. (Luka 15:11-32) Veva Yesu ootandiza athu vwechecha vyoona viwa vyokuza mwemo Ababae kaliliathu. w24.02 10 ¶8-9

Yehova unosisimula koma teto tonthoza athu anayo kanagumana na mavuto. Kodi ninamusazi-ede avi Yehova votonthoza amo-iwa koma teto atonyi-eda chifundo? Ninokoza panga vyevi voesaesa kala na makalelo anayo kananikami-e ira nitonthozenga athu amo-iwa. Chin’ni inanikami-e kala na chikondi ineyo inafuneya ira ‘nipitilize tonthozana’ dambo na dambo? (1 Ates. 4:18) Ninafuneya kala na makalelo monga vwela amo-iwa chisoni, konda abali koma teto oma murima. (Akol. 3:12; 1 Pe. 3:8) Kodi makalelo anala kananikami-e avi? Nakalanga na chifundo koma teto makalelo anayo niaromolile iywala, ninoza nitonthoze athu amo-iwa. Vale Yesu aongile ira “vamulomo vanoonga vyosefuwela m’murima. Muthu wapama unokumi-a vyapama muchumae yapama yam’murimani mwae, koma muthu otakala unokumi-a vyotakala muchumae yotakala yam’murimani mwae.” (Mat. 12:34, 35) Tonthoza abali na arongoli-u anayo kagumanile na mavuto chindila yofuneya vinjinji ineyo ninatonyi-edele iyo ira ninowakonda. w23.11 10 ¶10-11

Ninafuneela muvepa Mulungu ira anikami-e vwechecha maulosi a m’Baibulo. Kaganizelani isazo ila. Kafwanafwani-edani ira munanaenda mudela lailendo koma fwinyu unoyo muendilena nyo unoliiziwa pama delalo. Unoiziwa pama vevo muli nyo koma teto wewo sewu uliwetene unadowaathu. Mo-okaikela munokoza sangalala ira fwinyuyo oopanga pama somedela ira muendele limo-i. Mofwanafwana na vyevi, Yehova unoiziwa pama thawi ineyo ninakalamo-iywela koma teto vyevyo vinaireye usogolowu. Eno ira nivwecheche maulosi a m’Baibulo, moviyevi-a ninafuneela muvepa Yehova ira anikami-e. (Dan. 2:28; 2 Pe. 1:19, 20) Mofwanafwana na likolo lililetene lachikondi, Yehova unafuna ira a-imae kakaena sogolo lapama. (Yer. 29:11) Koma mo-iyana na makolwi-u, Yehova unokoza onga vyongo vyevyo vinaze viireye usogolo molondola vinjinji. Liye oolola ira maulosi kalembiwe m’Mawae na yolinga yoi niiziwenga vyongo vyofuneya vya-anaireye. — Yes. 46:10. w23.08 8 ¶3-4