“Sakulani . . . Unoyo Munafuna Nyo Mutumikela”

1. Kodi ninafuneya panga n’ni ira nikalenga osangalala? Pelekani chifukwa? (Yesaya 48:17, 18)

BABI-U waudimu unoniomeliwana vinjinji moi unafuna ira nisangalalenga vathawiila koma teto usogolo. (Nam. 3:12, 13) Liye anilengile mundila yoi niwandenga tonyi-eda maluso o-iyana-iyana. Koma kaanilengile nayolinga yoi nivilamulelenga eki-u kapena teto sakulanga eki-u ira vi pivyofwanelela kapena vyolakweya. (Nam. 8:9; Yer. 10:23) Liye unoiziwa ira ninerenga sangalala vinjinji akala ninamutumikelenga koma teto arelanga makudwae. — Welengani Yesaya 48:17, 18.

2. Kodi Satana unafuna ira niroromelenga yonama iivi, nanga Yehova usomedile avi yonama inela?

² Satana unafuna ira niroromelenga ira ninokoza sangalalanga moosogoleliwa na Yehova, kapena ira athu kanokoza vilamulelanga pamapama ekiwa. (Gen. 3:4, 5) Yehova oosomedela vyevyo Satana anamile liyevi volola ira athu kavilamulele nga ekiwa wa thawi yoyeva. Rungunuwa vailambo yetene yavati, ninana ona umboni woi ulamulilo wa athu kai wapama. Koma m’Malemba mukala visazo vya alombwana na a-iyana anayo kali osangalala chifukwa yotumikela Yehova. Muthu m’mo-i unoyo ali osangalala vinjinji ngu Yesu Kristu. Yowambeela, tiyemoni nione chifukwa iwa liye asakulile ira amutumikelenga Yehova. Vanduli viwa ninokambilana chifukwa iwa Babi-u waudimu uli wofwanelela lambeliwa. Vomari-a ninokambilana vifukwa vyevyo vinanipangi-a sakula ira nimutumikelenga Yehova.

CHIFUKWA N’NI YESU ASAKULILE MUTUMIKELA YEHOVA?

3. Kodi Satana amuwandelile Yesu ira apange n’ni, nanga Yesu amusomedile avi?

³ Yesu angali vailambo yavati afuneela sakula woi amutumikelenga. Angakede batiziwa wene, Satana oomuwandela ira unomuva-a maumwene etene a vailambo yavati akala unamukokorele nomulambela ndila imo-i ba-i. Koma Yesu oomusomeda ira: “Choka Satana! Voi Malemba kani, ‘Yehova Mulungwawo ngunoyo unafuneya we mulambela moi unafuneya mutumikela liye ekave ba-i.’” (Mat. 4:8-10) Chifukwa n’ni Yesu aongile vyevi? Tiyemoni nione vifukwa viralu.

4-5. Chifukwa n’ni Yesu asakulile mutumikela Yehova?

⁴ Chifukwa ilukulu ineyo yapangi-ile Yesu sakula ira amutumikelenga Yehova chi chikondi. Yesu unomuomeliwana vinjinji Babae moi kanaza a-iya muomeliwana. (Yoh. 14:31) Enjedela vevo, Yesu unamutumikela Yehova chifukwa unoiziwa ira pivyevyo unafuneya liye panga. (Yoh. 8:28, 29; Chiv. 4:11) Unoiziwa teto ira Yehova ngunoyo amuva-ile moyo, ngororomeleya koma teto wova-a. (Sal. 33:4; 36:9; Yak. 1:17) Yehova oomuwandela Yesu vyoona moi ngu liye unoyo amuva-ile iliyetene ineyo an’na liye. (Yoh. 1:14) Koma Satana ngunoyo ambeeli-ile khwa. Liye ngonama moi unopanga vyongo chifukwa ya djela koma teto chifukwa yovikonda. (Yoh. 8:44) Chifukwa yoiziwa makundo etene anala, Yesu kanaganizelevo vyo-iya muvwela Yehova ngati mwemo Satana mwapangele liye. — Afil. 2:5-8.

⁵ Chifukwa imo-iwa ineyo yapangi-ile Yesu sakula mutumikela Yehova chi yoi ooganizela vyevyo vyaireye akala unakaleve wororomeleya. (Aheb. 12:2) Liye ooiziwa ira akala unakaleve wororomeleya unoza aweli-e zina la Babae koma teto unoza amali-e mavuto etene anayo Mdyerekezi aambeeli-ile liye.

CHIFUKWA N’NI YEHOVA NGOFWANELELA LAMBELIWA?

6-7. Chifukwa n’ni athu anjinji malambwano kanakoonda mutumikela Yehova, nanga chifukwa n’ni liye uli wofwanelela tumikeliwa?

⁶ Athu anjinji malambwano katinamutumikela Yehova chifukwa katinaiziwa makalelo apama anayo un’na liye koma teto katinazindikila vyongo vyevyo uwapangele liye. Mu pumwemo vyaliliathu wa athu anayo namarumiwa Paulo aalaleele liye wu Atene. — Vyo. 17:19, 20, 30, 34.

⁷ Paulo oowawandela athwayo ira Mulungu oona “unowava-a athu etene moyo, mphweya na vyongo vyetene.” Ooenjedela teto ira: “Chifukwa ya liye nikaana moyo, ninoenda koma teto nikalavo.” Mulungu ngofwanelela lambeliwa chifukwa liye ngu Mlengi unoyo “kumela wa muthu m’mo-i” oopanga mitundu detene da athu. — Vyo. 17:25, 26, 28.

8. Kodi chin’ni ineyo Yehova kanapange? Fotokozani.

⁸ Voi Yehova ngu Mlengi koma teto Mwene wa ilengedwe yetene, liye ookoza kanyi-edanga athu ira kamutumikelenga. Koma Yehova kanapanga vyevyo. M’malo mwiwa unoniva-a umboni woi liye ukalavo moi unoniomeliwana vinjinji. Teto liye unafuna ira athu anjinji kakale afwae mpakana walewale. (1 Tim. 2:3, 4) Ira vyevi viwandeye, Yehova unifunji-a mwemo ninawandelele iyo athu amo-iwa vya vyolinga vyae koma teto vyokuza vyongo vyapama vyevyo unaze liye aapangele athu usogolo. (Mat. 10:11-13; 28:19, 20) Ira nimulambelenga pama, liye univa-a pingo koma teto andimuwa achikondi oyi kanikami-enga. — Vyo. 20:28.

9. Kodi Yehova utonyi-edile avi chikondae?

⁹ Chikondi ya Yehova inooneela pama naganizelenga mwemo unapangela liye vyongo na athu amo-i anayo katinaroromela ira liye ukalawo. Kaganizelani makundo ala: Ambeela wale, athu anjinji kookala kasakulanga endela makundwiwa okuza yapama na yotakala. Koma mooma murima, Yehova ukala aava-anga vyongo vyowakami-a ira kakaengana moyo koma teto kasangalalenga. (Mat. 5:44, 45; Vyo. 14:16, 17) Unowakami-a ira kawandenga kala na afwiwa, kaana mabanja koma teto pindula na chito diwa. (Sal. 127:3; Nam. 2:24) Vyevi vinatonyi-eda ira Babi-u waudimu unowaomeliwana vinjinji athu etene. (Ekis. 34:6) Sopano tiyemoni nikambilane vifukwa vyevyo vinanipangi-a sakula mutumikela Yehova koma teto mwemo munanidalisela liye.

CHIFUKWA N’NI NINASAKULA MUTUMIKELA YEHOVA?

10. (a) Kodi chichifukwa ilukulu iivi ineyo inipangi-ile ira nimutumikelenga Yehova? (Mateyu 22:37) (b) Kodi leza murima wa Yehova uukami-ileni avi? (Salimo 103:13, 14)

¹⁰ Mofwanafwana na Yesu, ninomutumikela Yehova chifukwa yoi ninomuomeliwana vinjinji. (Welengani Mateyu 22:37) Funjeda vinjinji vyokuza makalelwae unonipangi-a ira nikale va usamwali wapama na liye. Mwaisazo, kaganizelani mwemo Yehova munatonyi-edela liye leza murima. Va thawi imo-iwa Aisaraeli kangalepelile muvwela, liye oowachondelela ira: “Welelani wa miyo no-iya ndila dinyu dotakala.” (Yer. 18:11) Yehova unoumbuwela ira iyo nili athu ookaana ungwilo teto unoumbuwela ira iyo nili tumbulu. (Welengani Salimo 103:13, 14.) Naganizelanga mwemo Yehova munanitonyi-edela liye leza murima koma teto makalelwae amo-iwa apama, ninofunechecha ira nimutumikelenga mpakana walewale.

11. Kodi pivifukwa vimo-iviwa viivi vyevyo vinanipangi-a ira nisakule mutumikela Babi-u waudimu?

¹¹ Ninofunechecha teto mutumikela Yehova chifukwa ninoiziwa ira pivyevyo ninafuneya iyo panga. (Mat. 4:10) Ninoiziwa teto vyevyo vinaireye akala ninakaleve ororomeleya. Nakala ororomeleya ninokami-a ira zina la Yehova liweli-iwe, ninotonyi-eda ira Mdyerekezi ngonama koma teto ninosangalasa murima wa Babi-u. Nasakula mutumikela Yehova vathawiila, ninokaana idedi-edo yoza mutumikela mpakana walewale. — Yoh. 17:3.

12-13. Kodi ninafunjedavo n’ni va khani ya Jane na Pam?

¹² Akala ninaambeele muomeliwana Yehova nangali ang’onong’ono, chikondiyo inokoza pitilizave ulukula mpakana nangakalambile. Vi pivyevyo vyaireele Jane na dimbilae Pam .a Aluwa koowambeela funjeda Baibulo m’mo-i angan’na chaka 10 m’mo-iwa 11. Makolwiwa kataomeliwa funjeda koma koolola ira Jane na Pam kafunjedenga Baibulo na Mboni da Yehova. Aluwa kakeda funa ira umapeto wa mulungu kadowenga uchalichi uwa. Jane aongile ira: “Vyevyo a Mboni kandifunji-aathu kumela m’Baibulo vyoondikami-a ira kandikedenga landela afwanga anayo ka-indi-eda chito mirombwe doviringani-a ugogo koma teto panga vyaiwerewere.”

¹³ Asikana ambiilala kookala ofalisa kaanakwakwani-e chaka 20. Vanduli viwa kangabatiziwe koowambeela upainiya wu kasamalelanga makolwiwa anayo kali okalamba. Jane oofotokoza mwemo unavwela liye aganizela vyevyo Yehova amupangele liye. Liye aongile ira: “Ndifunjeda ira Yehova ngororomeleya teto unosamalela afwae. Moi mogwilizana na lemba la 2 Timoteyu 2:19, ‘Yehova unoiziwa athwae.’” Kai vyokaiki-a ira Yehova unosamalela athwae anayo kanamuomeliwana koma teto mutumikela.

14. Kodi vyoonga na vyoira vi-u vinaweli-a avi zina la Yehova? (Onani teto ithuzithuzi.)

¹⁴ Ninofuna kami-a voweli-a zina la Mulungu. Niyerekezele ira mukaana fwinyu unoyo ngooma murima, wova-a koma teto wokululuka. Ndiye dambo limo-i muvwa muthu m’mo-iwa auwandelangani ira fwinyuyo ngu muthu wankhaza koma teto wachinyengo. Kodi munapange avi? Munokoza mu-elela unduli fwinyuyo. Mofwanafwana na vyevi, Satana na athu anayo kali umbalae kanotakali-a mbili ya Yehova voonga vyonama vyokuza Liye. Eno ninomu-elela unduli Yehova vowandela athu amo-iwa vyokuza Liye na zina lae. (Sal. 34:1; Yes. 43:10) Vyoonga koma teto vyoira vi-u vinotonyi-eda ira ninofuna mutumikela Yehova na murimi-u wetene.

15. Kodi namarumiwa Paulo apindulile avi chifukwa yochenja vyongo vamoywae? (Afilipi 3:7, 8)

¹⁵ Ninochenja vyongo vimo-i va moywi-u na yolinga yoi nimutumikelenga Yehova mosomedeleya koma teto na murimi-u wetene. Mwaisazo namarumiwa Paulo oololela iya udindo wa vadimu unoyo an’na liye na yolinga yoi akale ofunjeda wa Kristu nomutumikelanga Yehova. (Agal. 1:14) Vyevyo asakulile liye vyoopangi-a ira akaena moyo wapama koma teto idedi-edo yoza lamulela na Kristu udimu. Liye kaviimbile mulandu chifukwa ya vyevyo asakulile liye. Na-iyene teto akala ninasakule tumikela Yehova, kaninaza niviimba mulandu. — Welengani Afilipi 3:7, 8.

16. Kodi ninafunjeda n’ni va isazo ya Julia? (Onani teto ithuzithuzi.)

¹⁶ Naonanga ira tumikela Yehova kofuneya vinjinji, ninoza nikaena moyo wapama vathawiila koma teto usogolo. Isazo vakhani inela ngu murongola m’mo-iwa zina lae Julia. Aanafunjede choonadi, Julia ali muthu oimba kwaya uipembezo wae ambeela angali m’ng’onong’ono. Kaswiri m’mo-iwa oimba oona luso la Julia moi oomufunji-a imba pama. Vaanavire thawi indendai Julia ookala oimba ochuka, moi ooimba munyumba dilukuludilukulu. Vasukulu imo-iwa yofunji-a imba, fwae m’mo-iwa oowambeela muwandela vyokuza Mulungu moi oomufotokozela ira zina la Mulungu ngu Yehova. Vaanavire thawi indendai, Julia oowambeela funjeda Baibulo ndila mbiili va mulungu . Vanduli viwa ooganiza vyo-iya imba nyimbo na yolinga yoi amutumikelenga Yehova. Koma vyevi kavyali vyokweya. Julia aongile ira: “Athu anjinji koondiwandela ira ndinotatila mwai. Koma miyo ndoosakula ira ndimutumikelenga Yehova na moywanga wetene.” Kodi Julia unavivwa avi chifukwa ya vyevyo asakulile liye chaka 30 diviriledo? Liye aongile ira: “Ndikaana murendele wa m’murimani moi ndinororomela ira vachineneeva Yehova unoza andiva-e vyevyo murimanga unafunaathu.” — Sal. 145:16.

PITILIZANI MUTUMIKELA YEHOVA

17. Kodi likundo loi mapeto kali vakwikwi linakuza avi athu anayo kanatumikela Mulungu koma teto athu anayo katinamutumikela?

¹⁷ Mapeto ailambwela kali vakwikwi vinjinji. Namarumiwa Paulo alembile ira: “U-alile ‘thawi yoyeva,’ moi ‘unoyo unazoyo unofiya ndithu.’” (Aheb. 10:37) Kodi vyevi vinatapulela n’ni? Yowambeela, thawi yoi nisakule mutumikela Yehova chiyoyeva. (1 Akor. 7:29) Moi akala nisakulile wale mutumikela Yehova, ninoiziwa ira mavuto anayo ninaavilele iyo mba “thawi yoyeva.”

18. Kodi Yesu koma teto Yehova kanafuna ira nipangenga n’ni?

¹⁸ Yesu oowalimbikisa ofunjedae ira kakale o-arelae koma teto ira kapitilize mu-arela. (Mat. 16:24) Eno akala iyo nikalile nimutumikelanga Yehova wa chaka dinjinji kani-iye mutumikela. Nipitilizeve kala na moyo mogwilizana na vyevyo nasakulile iyo moi napanga eno ninoza nifwanye madaliso vathawiila koma teto usogolo. — Sal. 35:27.

19. Kodi ninafunjeda n’ni va khani ya Gene?

¹⁹ Athu amo-iwa kanaganiza ira muthu atumikelanga Yehova kanasangalala. Akala nyo muli muzombwe, kodi munaganiza ira munoza muimaniwe vyongo vimo-i chifukwa yotumikela Yehova? M’bali m’mo-iwa waizombwe zina lae Gene aongile ira: “Vyaoneya ira afwanga koosangalala na vyongo monga mapwando, vimweendi koma teto masika achiwawa a va kompiyuta koma miyo ndakalela dowa wu misonkano na muutumiki.” Kodi maganizo anala kamukuzile avi Gene? Liye aongile ira: “Ndoowambeela kaana moyo wachinyengo moi ndoona ira ndinaasangalala. Koma isangalalweyo yali yoodimbeliwa. Ndoowambeela ganizela vya makundo apama a choonadi anayo ndaanyalanyaza miyo moi vanduli viwa ndooganizela nawili ambeela mutumikela Yehova na murimanga wetene. Kumela thawi ineyo, Yehova ukala asomedanga mapempelwanga etene.”

20. Kodi ninafuneya simikiza murima panga n’ni?

²⁰ Wolemba masalimo m’mo-i oomuimbela Yehova ira: “Wosangalala ngu munthu unoyo mumusakulile nyo nomuzi-a vakwikwi na nyo, Ira akale m’mabwalwinyu.” (Sal. 65:4) Eno tiyemoni nikaena maganizo ngati anayo Yoswa an’na liye, vevo aongile liye ira: “Koma miyo na banja langa ninerenga tumikela Yehova.”— Yos. 24:15.