Kodi Ninapange Avi Ira Nikondanenga Vinjinji?

1-2. (a) Chifukwa n’ni mtumwi Paulo aongile ira chikondi chi ikalelo ilukulu? (b) Kodi ninakambilana mafuso aavi?

VEVO mtumwi Paulo afotokoza liye vya iroromelo, chiyembekezo na chikondi, amari-ile na mawu oyi “ilukulu va vyongo vyetene vyevi chi chikondi.” (1 Akor. 13:13) Chifukwa n’ni aongile vyevi? Chifukwa usogolowu kaninaza nifuneya roromela malonjezo a Mulungu okuza ilambo yavati isha, kapena teto kaana chiyembekezo yoi malonjezwayo kanoza kakwakwaneli-ediwe chifukwa kanaza kakala kangakwakwaneli-ediwe wale. Koma thawi detene ninaza nifuneya konda Yehova koma teto athu. Ndipo chikondi inela inoza ipitilize ulukula mpakana walewale.

² Voi thawi detene ninoza nifuneye kaana chikondi inela, yowambeela tiyemoni nikambirane mafuso maralu. Lowambeela, chifukwa n’ni ninafuneya kondananga? Lanambili, kodi ninatonyi-ede avi ira ninowakonda athu amo-iwa? Lanararu, kodi ninapange avi ira nikondenga vinjinji afwi-u?

CHIFUKWA N’NI NINAFUNEYA KONDANANGA?

3. Kodi pivifukwa viivi vyevyo vinanipangi-a ira nikondanenga?

³ Chifukwa n’ni vili vyofuneya vinjinji ira nikondanenga? Chifukwa imo-i chi yoi chikondi chi izindikilo ya Akiristu enieni. Yesu ooawandela ofunjedae ira: “Etene kanoza kaiziwe ira muli ofunjedanga, ngati munakondana.” (Yoh. 13:35) Koma teto chikondi inokami-a ira nigwilizanenga. Paulo aongile ira chikondi “inogwilizani-a athu mwakopolo vinjinji kwaranya yongo iliyetene.” (Akol. 3:14) Koma vikala chifukwa imo-iwa teto ilukulu vinjinji yonipangi-a ira nikondenga athu amo-iwa. Mtumwi Yohani ooawandela Akiristu afwae ira: “Muthu unoyo unamukonda Mulungu amukondenga teto balae.” (1 Yoh. 4:21) Nakondananga ninotonyi-eda ira ninomukonda Mulungu.

4-5. Pelekani isazo yotonyi-eda ira akonda afwi-u unogwilizana nomukonda Mulungu.

⁴ Kodi konda Mulungu unagwilizana avi nokonda abali na arongoli-u? Ira nivwecheche kaganizelani gwilizana wewo unakalechavo vaari va murimi-u na mbali dimo-idiwa da thuthu li-u. Dokotala unokoza iziwa ngati murimi-u uli pama vo-inda va muwono vi-u ira aiziwe gunda wa murima. Ndiye kodi vyevi vinagwilizana avi na khani ya chikondi?

⁵ Mofwanafwana na dokotala, unoyo unaanda iziwa vyokuza murimi-u voona gundauwa va muwono, na-iyene ninokoza iziwa ngati ninamukonda vinjinji Mulungu voona mwemo ninakondela iyo afwi-u. Ngati ninaone ira chikondi-u wa Akiristu afwi-u iambeela yeva, inela inokoza kala izindikilo yoi chikondi-u wa Mulungu iambeela teto yeva. Koma ngati thawi detene ninatonyi-eda chikondi, inokoza kala izindikilo yoi ninomukonda teto vinjinji Mulungu.

6. Chifukwa n’ni ninaonge ira muthu a-iya akonda abali na arongola linakalecha vuto lilukulu? (1 Yohani 4:7-9, 11)

⁶ Ngati kaninakonda vinjinji abali na arongoli-u ndiye kuti vikala vuto lilukulu. Chifukwa n’ni ninaonga eno? Chifukwa vinokoza tonyi-eda ira usamwali-u na Mulungu kuli paama. Mtumwi Yohani oofotokoza likundo leli vevo aongile liye ira: “Unoyo kanamukonda balae unoyo unamuona liye, kanamukonde Mulungu unoyo kanamuonevo.” (1 Yoh. 4:20) Ndiye kodi ninafunjedavo n’ni veva? Yehova unosangalala na iyo ngati ‘ninakondana.’ — Welengani 1 Yohani 4:7-9, 11.

KODI NINATONYI-EDA AVI IRA NINOKONDANA?

7-8. Kodi ninatonyi-ede mundila diivi ira ninokondana?

⁷ Mawu a Mulungu kanonilamula moweli-eda weli-eda ira ‘nikondanenga.’ (Yoh. 15:12, 17; Arom. 13:8; 1 Ates. 4:9; 1 Pe. 1:22; 1 Yoh. 4:11) Komave chikondi inakalecha m’murimani ndipo kalivo muthu unoyo unaone m’murimani mwi-u. Ndiye kodi ninatonyi-ede avi ira ninowakonda amo-iwa? Vyoonga koma teto vyoira vi-u pivyevyo vinatonyi-ede.

⁸ Vikala ndila do-iyana-iyana dedo ninatonyi-edele iyo ira ninowakonda abali na arongoli-u. Mwaisazo, Malemba kanonilimbikisa ira “Muwandelanenga vyoona.” (Zak. 8:16) “Sungani murendele vaari vinyu.” (Maliko 9:50) “Votonyi-edana ulemu, kalani vasogolo.” (Arom. 12:10) “Muwachelanenga.” (Arom. 15:7) “Pitilizani lolelana nokululukelana.” (Akol. 3:13) “Pitilizani tukulelana vyongo vyonyemela.” (Agal. 6:2) “Pitilizani limbikisana.” (1 Ates. 4:18) “Pitilizani tonthozana.” (1 Ates. 5:11) ‘Mupempelelanenga.’ — Yak. 5:16.

9. Chifukwa n’ni ninaonge ira tonthoza amo-iwa chindila imo-i yofuneya yotonyi-edelana chikondi? (Onani teto ithuzithuzi.)

⁹ Tiyemoni nikambilane ndila imo-iwa ineyo iromoliwe mundime ivirilela, ineyo ninatonyi-edele iyo ira ninowakonda amo-iwa. Ninokambilana vyevyo mtumwi Paulo aongile liye ira: “Pitilizani tonthozana.” Chifukwa n’ni tonthoza amo-iwa unatonyi-eda ira nikaana chikondi? Buku limo-i lofotokoza mawu a m’Baibulo laongile ira mawu oyi “tonthoza” anayo Paulo aa-indi-edile liye chito kanatanthauza “imela vakwikwi na muthu ira nimulimbikise vevo ugumanile liye na vuto lilukulu.” Eno namutonthoza m’Kiristu fwi-u unoyo ugumanile na vuto ninomukami-a ira aimele koma teto pitiliza enda vandila yodowa wachela moyo. Thawi iliyetene ineyo nimutonthozile iyo m’bali kapena murongola ninotonyi-edecha ira ninowakonda Akiristu afwi-u. — 2 Akor. 7: 6, 7, 13.

10. Kodi chifundo inagwilizana avi notonthoza amo-iwa?

¹⁰ Tonthoza amo-iwa kogwilizana na chifundo. Chifukwa n’ni ninaonga eno? Murima wachifundo ngunoyo unamulimbikisa muthu ira atonthoze amo-iwa koma teto akami-a. Eno ninaambeelecha kaana chifundo, era eno nitonthozenga athu amo-iwa. Paulo oogwilizani-a chifundo ya Yehova na vyevyo ninapanga iyo votonthoza amo-iwa. Paulo aongile ira Yehova ngu “Baba wachifundo ilukulu koma teto Mulungu unoyo unanitonthoza va vuto lililetene.” (2 Akor. 1:3) Paulo oo-indi-eda chito mawu oyi “chifundo ilukulu” vofotokoza mwemo muthu munavwela liye voonga vya athu amo-iwa. Eno “Mulungu unaromoliwa ira Baba, kapena ira Mwinyailo wa chifundo ilukulu, chifukwa chifundweyo inakumelecha wa liye.” Eno chifundo ineyo chineyo inamupangi-a ira ‘anitonthozenga va mavutwi-u etene.’ (2 Akor. 1:4) Mofwanafwana na ma-inje avakasupe anayo kanasisimula athu anayo kan’na tona, Yehova unosisimula koma teto tonthoza athu anayo kanagumana na mavuto. Kodi ninamusazi-ede avi Yehova votonthoza amo-iwa koma teto atonyi-eda chifundo? Ninokoza panga vyevi voesaesa kala na makalelo anayo kananikami-e ira nitonthozenga athu amo-iwa. Tiyemoni nione amo-iwa mwa makalelo anala.

11. Mogwilizana na Akolose 3:12 koma teto 1 Petulo 3:8, kodi mbamakalelo aavi anayo kananikami-e ira nikondenga koma teto tonthoza amo-iwa?

¹¹ Chin’ni inanikami-e kala na chikondi ineyo inafuneya ira ‘nipitilize tonthozana’ dambo na dambo? Ninafuneya kala na makalelo monga vwela amo-iwa chisoni, konda abali koma teto oma murima. (Welengani Akolose 3:12; 1 Petulo 3:8.) Kodi makalelo anala kananikami-e avi? Nakalanga na chifundo koma teto makalelo anayo niaromolile iywala, ninoza nitonthoze athu amo-iwa. Vale Yesu aongile ira “vamulomo vanoonga vyosefuwela m’murima. Muthu wapama unokumi-a vyapama muchumae yapama yam’murimani mwae, koma muthu otakala unokumi-a vyotakala muchumae yotakala yam’murimani mwae.” (Mat. 12:34, 35) Tonthoza abali na arongoli-u anayo kagumanile na mavuto chindila yofuneya vinjinji ineyo ninatonyi-edele iyo ira ninowakonda.

KODI NINAPANGE AVI IRA NIKONDANENGA VINJINJI?

12. (a) Chifukwa n’ni ninafuneya kala osamala? (b) Kodi sopano ninakambilana fuso liivi?

¹² Etene iyene ninafuneya ‘pitiliza kondana.’ (1 Yoh. 4:7) Koma ninafuneya umbuwela ira Yehova oonichenjeza ira “chikondi ya athu anjinji inoza izilale.” (Mat. 24:12) Koma Yesu kaatanthauza ira chikondi ya ofunjedae anjinji inoza iyeve. Ngakale vili eno, ninafuneya kala osamala ira kanilandele murima o-okaana chikondi unoyo uli ofala muilambwela. Voganizela likundo leli, tiyemoni nikambilane fuso limo-iliwa lofuneya. Kodi vikala ndila yoiziwela ngati ninaakonda vinjinji abali-u?

13. Kodi ninaiziwe avi ngati ninakonda vinjinji abali-u?

¹³ Ndila imo-i yoiziwela ngati ninaakonda vinjinji abali-u kuona vyevyo ninapanga iyo va moywi-u. (2 Akor. 8:8) Mtumwi Paulo ooromola imo-i mwa vyongo vyevyo ninapange iyo vevo aongile liye ira: “Kwaranya vyetene, mukondanenga vinjinji chifukwa chikondi inovu-elela machimo oinjiva.” (1 Pe. 4:8) Eno vyevyo ninapangecha iyo abali-u kalakwi-a vyongo vinokoza tonyi-eda ngati ninaakonda vinjinji kapena iyayi.

14. Mogwilizana na 1 Petulo 4:8, kodi ninafuneya kaana chikondi iivi? Pelekani isazo.

¹⁴ Tiyemoni nione pamapama mawu a Petulo anala. Mbali yowambeela ya vesi 8 inofotokoza tundu wa chikondi ineyo ninafuneya iyo kaana. Iwongile ira nikondanenga vinjinji. Mawu anayo Petulo a-indi-edile liye chito oyi “mukondanenga vinjinji” kanokoza tanthauza “masula yongo.” Mbali yanambili ya vesili inofokoza vyo-arelavo vya chikondi inela. Inaonga ira inovu-elela machimo oinjiva a abali-u. Vili ngati nina-inda chikondi na manda ambili ngati mwemo nina-indele iyo nguwo, noimasula ira ipimbe, o-okala machimo oyeva, koma “machimo oinjiva.” Mawu oyi pimba kapena ira “vu-elela,” kanafotokoza vyokululuka. Mofwanafwana na nguwo ineyo inapimbe malo a yowara anayo katakalile, chikondi inopimba vyevyo abali-u kanalakwi-aathu.

15. Kodi akonda vinjinji abali na arongoli-u unanikami-e panga n’ni? (Akolose 3:13)

¹⁵ Ninafuneya akondanga vinjinji abali-u koma teto akululukela vyolakwa viwa, ngakale vevo panga vyevi unakaleathu worucha. (Welengani Akolose 3:13.) Nakululukela amo-iwa ninotonyi-eda ira ninowakonda vinjinji koma teto ninosangalasa Yehova. Kodi chin’ni teto inanikami-e ira ninyalanyazenga vyongo ving’onong’ono ving’onong’ono vyevyo kanalakwi-aathu kapena teto makalelwiwa anayo katinanisangalasa?

16-17. Kodi chin’ni inanikami-e nyalanyaza vyongo ving’onong’ono ving’onong’ono vyevyo athu amo-iwa kanalakwi-aathu? Pelekani isazo. (Onani ithuzithuzi.)

¹⁶ Muganizelenga makalelo apama anayo abali na arongola kan’naathu m’malo mokedanga ganizela vyevyo kanalakwi-aathu. Nierekezele ira muli vagulu na abali na arongola. Munaawaleda mosangalala ndipo vamapeto viwa mujambula foto. Ndiye mujambula mafoto ambiili kapena aralu nayolinga yoi mwina foto yowambeela kioneile pama. Veva sopano mukaana mafoto aralu. Ndiye foto yowambeela m’bali m’mo-iwa kamwetulelevo pama. Kodi vyakala eni munapangecha avi? Munakedecha ifuta chifukwa mukaana mafoto amo-iwa ambiili oyi uliwetene umwetulelavo pama.

¹⁷ Mafoto kali ngati vyongo vyo-iyana-iyana vyevyo ninaumbuwela iyo vyokuza athu amo-iwa. Vikala vyapama vinjinji vyevyo ninaumbuwela iyo vyevyo napangile iyo na abali na arongoli-u. Koma bwanji ngati vathawi imo-iwa m’bali kapena murongola aongile kapena panga vyongo mo-oganizela athu amo-iwa? Kodi ninafuneya panga n’ni? Chipama keda vichosa m’maganizo mwi-u ngati mwemo ninapangele iyo na mafoto. (Miya. 19:11; Aife. 4:32) Ninokoza chosa vyevi m’maganizo mwi-u chifukwa vikala vyapama vinjnji vyokuza abali-u vyevyo ninaviumbuwele iyo. Vyongo vyapamavyo pivyevyo ninafuneya iyo visunga m’maganizo mwi-u.

CHIFUKWA N’NI NINAFUNEYA KONDANANGA VINJINJI MALAMBWANO?

18. Kodi mukhanila nikambilanile makundo alukulu alukulu aavi okuza chikondi?

¹⁸ Chifukwa n’ni ninafuneya kondananga vinjinji malambwano? Niona ira nakondanga vinjinji abali na arongoli-u, ninotonyi-eda ira ninomukonda Yehova. Kodi ninatonyi-ede avi ira ninowakonda abali na arongoli-u? Ndila imo-i kuwalimbikisa kapena atonthoza. Chifundo chineyo inanilimbikise ira ‘nipitilizenga tonthozana.’ Kodi ninapange avi ira nikondenga vinjinji abali-u? Ninokoza panga vyevi voesaesa ira niakululukelenga vyevyo kanalakwi-aathu.

19. Chifukwa n’ni pivyofuneya ira nikondanenga vinjinji malambwano?

¹⁹ Chifukwa n’ni pivyofuneya ira nikondanenga vinjinji malambwano? Petulo oopeleka chifukwaiwa vevo aongile liye ira: “Mapeto a vyongo vyetene koowandamela. Eno . . . mukondanenga vinjinji.” (1 Pe. 4:7, 8) Kodi inaireye chin’ni vevo mapeto kanaandamelaathu vinjinji? Voonga vya o-arelae, Yesu aongile ira: “Athu amitundu detene kanoza kaidane na nyo chifukwa ya zina langa.” (Mat. 24:9) Ira niwande vilela ninafuneya nigwilizanenga vinjinji. Napanga eno, Satana kanaza awanda nimwalani-a chifukwa yoi nikaana chikondi ineyo “inagwilizani-a athu mwakopolo vinjinji kwaranya iliyetene.” — Akol. 3:14; Afil. 2:1, 2.