Yehova Unoza Aukami-eni Vilela Mavuto O-oyembekezeleya

1. Kodi kaninakaikela n’ni?

MONGA athu a Yehova, ninoiziwa ira liye unoniwomeliwana moi unafuna ira nisangalalenga na moyo wapama vinjinji vathawiila. (Arom. 8:35-39) Kaninakaikela ira thawi detene na-arelanga makundo a m’Baibulo vyongo vinongoniyendela pama. (Yes. 48:17, 18) Koma bwanji akala nigumanilena mavuto oyi kanaayembekezela?

2. Kodi ninagumane na mavuto oyi avi, n’nga kanairi-e ira nivifukenga vyofuka vyiivi?

² Atumiki etene a Yehova kanogumanana mavuto. Mofwanafwani-a, bali-u unokoza nikumudwi-a, ninokoza bulela marenda alukulu anayo kanairi-e ira kaniirenga vinjinji votumikela Yehova, kapena teto ninokoza gumanana mavuto oza chifukwa ya ngozi damuchilengedwe. Ninokoza teto zuzumi-iwa chifukwa ya vyevyo ninaroromela iyo. Nagumanana mavuto n’nga anala ninokoza vifukanga ira: ‘Chifukwa n’ni vyevi vinandiireela? Kodi ndilakwi-a yongo? Kodi vyevi vinatapulela ira Yehova kanandidalisa?’ Kodi moowambeelavo vwa eni? Akala chi eno kamutatile murima. Atumiki anjinji ororomeleya a Yehova koovwavo teto eno. — Sal. 22:1, 2; Hab. 1:2, 3.

3. Kodi ninafunjeda n’ni va lemba la Salimu 34:19?

³ Welengani Salimu 34:19. Konani makundo ambin’li ofuneya anayo ninafwanya iyo mu salimuli: (1) Athu olungama kanogumanana mavuto. (2) Yehova unonivulumucha nagumanana mavuto. Ndiye kodi liye unanivulumucha avi? Ndila imo-i kunikami-a ira nionenga vyongo mofwanelela muilambwela. Masiki ira Yehova unonilonjeza ira ninongosangalala namutumikelanga, kanaonga ira kaninagumanenga na mavuto. (Yes. 66:14) Liye unonilimbikisa ira niganizelenga thawi eneyo ninaze iyo nikayena moyo onoyo unafuna liye ira nize nisangalalena mpakana walewale. (2 Akor. 4:16-18) Koma vathawiila liye unonikami-a ira nipitilize mutumikela dambo lililetene. — Mali. 3:22-24.

4. Kodi ninakambirana n’ni mukhanila?

⁴ Tiyemoni nikambirane vyevyo ninafunjede iyo va isazo ya atumiki a Yehova ororomeleya oromoliwa m’Baibulo koma teto amalambwano. Monga mwemo ninaonele iyo, ninokoza gumanana mavuto o-oyembekezeleya. Koma akala ninaroromela Yehova, liye kanaza alepela nikami-eda. (Sal. 55:22) Nakambirananga visazo vyevi muvifukenga ira: ‘Kodi miyo ndaira avi ndaagumanena vyevi? Kodi visazo vyevi vinandikami-eda avi ira ndimuroromelenga Yehova? Kodi mba makundo aavi anayo nina-indi-ede iyo chito vamoywi-u?’

ATHU OROMOLIWA M’BAIBULO

5. Kodi Yakobo agumanile na mavuto oyi avi chifukwa ya Labani? (Onani ithuzithuzi yavatakuru lowambeela.)

⁵ Atumiki a Yehova oromoliwa m’Baibulo koogumanana mavuto oyi kataayembekezela. Kaganizelani isazo ya Yakobo. Babaye oomulamula ira atele m’mo-i wa a-ima a Labani, Baliwa onoyo alambela Yehova moi aluwa koomusimikizela ira Yehova unoza amudalise vinjinji. (Gen. 28:1-4) Eno Yakobo ooira vyongo vyofwanelela. Liye oomaruwa wu Kanani dowa wa Labani onoyo an’na a-ima aa-iyana ambin’li, Leya na Rakele. Yakobo oomuwomeliwana Rakele mwana n’ng’onong’ono wa Labani moi oosomeda ira unomu-indela chito babaye wa chaka 7 ira amutele. (Gen. 29:18) Koma vyongo kavyaireile mwemo Yakobo aganizela liye. Labani oomupusi-a vomuva-a mwanaye wandimuwa Leya ira amutele. Labani oolola ira Yakobo amutele Rakele vangavirile mulungu umo-i koma akala unamu-indele teto chito chaka ndimo-i 7. (Gen. 29:25-27) Labani kaamuirela vyongo mwachilungamo Yakobo. Liye oomuirela Yakobo vyongo vyookaana chilungamo wa chaka 20. — Gen. 31:41, 42.

6. Kodi mba mavuto amo-i aavi anayo Yakobo avilele liye?

⁶ Yakobo oovilela mavuto amo-iwa teto. Liye ookaana banja lilukulu koma thawi dimo-i a-imaye katagwilizana. Aluwa koofiya mpakana vomuguli-a baliwa Yosefe uukapolo. Ambin’li mwa a-ima a Yakobo, Simiyoni na Levi koonyaswi-a banja liwa koma teto koonyozi-a zina la Yehova. Wenjedela vevo mu-iyana wa Yakobo, Rakele, ootatiya vevo abala liye mwaniwa wanambili. Koma teto chifukwa ya ndala ilukulu, Yakobo oovikanyi-eda tamela wu Iguputo angali ouluula. — Gen. 34:30; 35:16-19; 37:28; 45:9-11, 28.

7. Kodi Yehova amutonyi-ede avi Yakobo ira oosangalala na liye?

⁷ Va vyongo vyetene vyevyo vyamuireele, Yakobo ka-iile roromela Yehova koma teto malonjezwaye. Naliyene Yehova oomutonyi-eda ira oosangalala na liye. Mofwanafwani-a, masiki ira Labani oomuirela vyongo vyookaana chilungamo, Yehova oodalisa Yakobo vomuva-a chuma injinji. Moi kakedani ganizela mwemo amuyamikelele liye Yehova angagumanile nawili na mwanaye Yosefe, onoyo aganiza liye ira ookhwa wale. Yakobo ookwakwani-a vilela mavuto anayo agumanana liye chifukwa ali vausamwali wapama na Yehova. (Gen. 30:43; 32:9, 10; 46:28-30) Akala iyo teto nili vausamwali wapama na Yehova, ninokoza vilela mavuto o-oyembekezeleya anayo ninagumanena iyo.

8. Kodi Mwene Davide afuna aire n’ni?

⁸ Mwene Davide kaakwakwani-a panga vyetene vyevyo afuna liye votumikela Yehova. Mofwanafwani-a, Davide oofunechecha mumangela Mulungwaye kachisi. Liye oomusambaulela namaongela Natani vyevyo afuna liye iravyo. Vosomeda Natani eere: “Irani iliyetene eneyo ili m’murimani mwinyu, chifukwa Yehova Mulungu oona uli na nyo.” (1 Lim. 17:1, 2) Mawu anala podi ira koomulimbi-a vinjinji Davide. Mwina thawi eneyo liye oowambeela kozeela chito ilukulwiyo.

9. Kodi Davide airile n’ni angavwile khani yokumudwi-a?

⁹ Vaanavire thawi, namaongela wa Yehovole oozana khani yokumudwi-a. “Ma-iyu anayo,” Yehova oomuwandela namaongela Natani ira Davide kai onoyo unaze amange kachisi koma m’mo-i wa a-imaye. (1 Lim. 17:3, 4, 11, 12) Kodi Davide airile n’ni angavwile uthengola? Oochenja vang’ono vyevyo afuna liye ira. Oowambeela sonkani-a chuma koma teto vyongo vyevyo mwanaye Solomo afuneela liye ira amange kachisiyo. — 1 Lim. 29:1-5.

10. Kodi Yehova amudalisile avi Davide?

¹⁰ Davide angakede wandeliwa wene ira kai liye onoyo unaze amange kachisi, Yehova ooiranaye pangano. Liye oomulonjeza Davide ira m’mo-i wa a-ima obaluwela muzelaye unoza alamulele mpakana walewale. (2 Sam. 7:16) Kaganizelani mwemo Davide unaze liye asangalalele muilambo isha voiziwa ira unasangalala na moyo mu Ulamulilo wa Chaka 1000 wa Yesu, Mwene okumela m’banja laye. Khanila inonikami-a ona vyoi masiki ira kaninakwakwani-e ira vyetene vyevyo ninafuna iyo votumikela Yehova, Mulungwi-u unonisungela madaliso amo-iwa anayo kanaayembekezela.

11. Kodi Akiristu amuthawi ya anamarumiwa kalimbikisiwe avi masiki ira Umwene kawafiile vathawi eneyo kayembekezelaathu? (Vyoira 6:7)

¹¹ Akiristu amuthawi ya anamarumiwa koogumanana mavuto alukulu o-oyembekezeleya. Mofwanafwani-a, aluwa kayembekezela mwachidwi za wa Umwene wa Mulungu koma kataiziwa ira unaza alini. (Vyo. 1:6, 7) Ndiye kodi kairile n’ni? Kootanganisiwa na chito yolaleela. Vevo uthenga wapama wafalikelaathu, aluwa koowona umboni woi Yehova oodalisa tindi liwa. — Welengani Vyoira 6:7.

12. Kodi Akiristu amuthawi ya anamarumiwa kairile n’ni ungali ndala ilukulu?

¹² Vathawi imo-i wookala ndala ilukulu “vailambo yetene yavati wewo uli athu.” (Vyo. 11:28) Vyevi vyookuza teto Akiristu owambeelela. Kakedani ganizela mwemo kavuteeleathu chifukwa ya ndala ilukulwiyo. Pivyookaiki-a ira miru damabanja dookumbanyela ira dinafwanyelenga avi mabanjiwa vyongo vyofuneya. Nanga bwanji vya azombwe anayo kan’na vyolinga vyofuna wenjedela utumikiwa? Kodi mwina aluwa koowambeela ona ira kaimeche kaye vyolinga viwavyo? Masiki ira vookala mavutwala, Akiristwayo koochenja vyongo mogwilizana namwemo vyongo vyaliliathu vamoywiwa. Aluwa koopitiliza laleela mwemo kawandeleathu moi koosangalala gawela Akiristu afwiwa a wu Yudeya vyongo vyevyo kan’naathu. — Vyo. 11:29, 30.

13. Kodi Akiristu kaonile madaliso oyi avi vathawi ya ndala?

¹³ Kodi Akiristu kaonile madaliso oyi avi vathawi ya ndala? Anayo kava-iwe vyongo vyofuneya koowona ira Yehova unowakami-a. (Mat. 6:31-33) Mwina aluwa koowambeela gwilizana vinjinji na Akiristu anayo kaakami-ilayo. Moi anayo kapelekile vyongo viwa kapena indana chito yokami-eyo, koofwanya imwerumweru eneyo inaza chifukwa yova-a. (Vyo. 20:35) Yehova oowadalisa etene anayo chifukwa yoira vyongo mogwilizana na mwemo vyongo vyachenjeleathu vamoywiwa.

14. Kodi chin’ni eneyo yamuireele Baranaba na namarumiwa Paulo, nanga vyo-arelavo viwa vyali vyoi avi? (Vyoira 14:21, 22)

¹⁴ Thawi dinjinji Akiristu amuthawi ya anamarumiwa koozuzumi-iwa mwina teto va thawi yoi kataiyembekezela. Kaganizelani vyevyo vyamuireele Baranaba na namarumiwa Paulo vevo kalaleelaathu wu Lusitala. Vowambeela aluwa koowacheliwa pama na athu anayo kaavuruwana. Koma thawi imo-i dambo lelo, oruni-a “kookopa athwayo” moi amo-i mwa aluwa koomuvoka Paulo mabwe nomu-iya anga-alile vang’ono khwa. (Vyo. 14:19) Koma Baranaba na Paulo koopitiliza laleela udela limo-i. Kodi vyo-arelavo viwa vyali vyoi avi? Aluwa kookami-a “athu owelengeya ira kakale ofunjeda” moi vyoonga viwa koma teto isazo iwa yoolimbikisa Akiristu afwiwa. (Welengani Vyoira 14:21, 22.) Anjinji koopindula chifukwa yoi Baranaba na Paulo katawelele munduli masiki vevo kazuzumi-iweathu mo-oyembekezeleya. Na-iyene ninoza nidalisiwe akala kanina-iya inda chito eneyo Yehova uniwandelile liye ira nii-inde.

ATHU AMUTHAWI-U

15. Kodi ninafunjeda n’ni va isazo ya M’bali A. H. Macmillan?

¹⁵ Chaka ya 1914 ya-anafiye, athu a Yehova kooyembekezela mwachidwi ira vanoireya vyongo vimo-iviwa vyene. Mofwanafwani-a, kaganizelani vyevyo vyamuireele M’bali A. H. Macmillan. Mofwanafwana na athu anjinji vathawiyo, M’bali Macmillan aganiza ira va-anavire thawi kanowachela mphotwiwa eneyo kudowa udimu. Mukhani eneyo akambile liye mu Septembala 1914, eere: “Mwina enela chikhani yogomi-eda kamba.” Koma enela kayali khaniwa yogomi-eda. Vanduli viwa M’bali Macmillan alembile ira: “Mwina anjinji a iyo noopupuluma ganiza ira ninodowa udimu vathawi eneyo.” Aluwa koowenjedela ira: “Eneyo nafuneela iyo ira kutanganisiwa na chito ya Mbwiye.” M’bali Macmillan ootanganisiwa na chitwela. Ookaana mwayi olimbikisa abali anayo kamangiwe chifukwa yokoonda volowa usilikali. Thawi detene aluwa koofwanyeya vamisonkano da pingo masiki vathawi eneyo kaliathu ouluula. Kodi M’bali Macmillan apindulile avi chifukwa yoi ootanganisiwa tumikela Yehova vevo kayembekezelaathu wachela mphotwiwa? Anga-alile vang’ono tatiya mu 1966, alembile ira: “Iroromelo yanga kinafookevo masiki vang’ono.” Enela chiisazo yapama vinjinji eneyo iyo etene ninafuneela iyo isazi-eda, simbwasimbwa akala nivilele wa thawi indedayi kwaranya mwemo nayembekezelela iyo. — Aheb. 13:7.

16. Kodi M’bali Jennings na iyanaye kagumanile na vuto loi avi mo-oyembekezeleya? (Yakobo 4:14)

¹⁶ Atumiki anjinji a Yehova kanogumanana mavuto okuza thanzi liwa mo-oyembekezeleya. Mofwanafwani-a, mukhani yokuza limbili la moywaye, M’bali Herbert Jenningsb oosambaula mwemo liye na iyanaye kasangalalelaathu na utumikiwa waumishonale wu Ghana. Koma va-anavire thawi liye oofwanyeya na marenda am’maganizo. Voganizela mawu ava Yakobo 4:14, M’bali Jennings aongile ira vyevi vyamuireelevi “vyali vyo-oyembekezeleya.” (Welengani.) Liye alembile ira: “Nafuneela somedela, moi nookoza vyoi nitamewo wu Ghana, iya afwi-u avamurima dowa wu Canada ira nawachele likami-edo la mirombwe.” Yehova ookami-a M’bali Jennings na iyanaye ira kapitilize mutumikela mororomeleya masiki ira koogumanana mavuto.

17. Kodi isazo ya M’bali Jennings yakami-ile avi Akiristu amo-iwa?

¹⁷ Vyevyo M’bali Jennings asambaulile liye moona murima mulimbili la moywaye vyookuza vinjinji athu amo-i. Murongola m’mo-i alembile ira: “Kandinakuziwevo vinjinji n’nga mwemo ndairele miyo ndingawelengile khanila. . . . Welenga mwemo M’bali Jennings airele liye vo-iya utumikiwa ira kawachele likami-edo la mirombwe woondikami-a ira ndionenga vyongo mofwanelela vamoywanga.” M’bali m’mo-iwa alembile teto ira: “Ndingatumikele monga ndimuwa mupingo wa chaka 10, ndafuneya iya udindola chifukwa ya marenda a maganizo. Ndakeda viona n’nga muthu olepela teto ndookumbanya vinjinji. Moi kandawanda welenga khani dosambaula limbili la moyo wa athu amo-i. . . . Koma vilela wa M’bali Jennings woondilimbikisa vinjinji.” Vyevi vinoniumbucha ira navilelanga mavuto o-oyembekezeleya, ninolimbikisa amo-iwa. Masiki ira vyongo kavinaireye mundila eneyo nayembekezela iyo, ninokoza kala isazo wa amo-i vakhani yororomeleya koma teto vilela. — 1 Pe. 5:9.

18. Monga mwemo ninaonela iyo va ithuzithuzila, kodi ninafunjeda n’ni va vyevyo vyamuireele murongola wamasiye wawu Nigeria?

¹⁸ Mavuto orurumucha monga mulili wa COVID-19, ukuza atumiki amo-i a Yehova. Murongola m’mo-i wamasiye wu Nigeria a-alile na yodja koma teto ndalama doyeva vinjinji. Dambo limo-i mamawa mwanaye wamu-iyana oomufuka ira kanadja n’ni, voi kali kangaphiile kapu yomari-a ya mbunga onoyo kan’naathu. Murongoloyo oomuwandela mwanayeyo ira kan’na ndalama koma teto yodja iliyetene, eno kafuneya musazi-eda mu-iyana wamasiye wawu Zarefati vopiya yodja yomari-a eneyo kan’naathu nororomelanga Yehova. (1 Mam. 17:8-16) Ka-anaambeele ganiza ira kanadja n’ni mutana wa dambo lelo, aluwa koowachela likami-edo la vyongo vyevyo kafuneelaathu kumela wa Akiristu afwiwa. Koova-iwa yodja yokwakwanela yokwaranya milungu min’li. Murongoloyo aongile ira kaaiziwa ira Yehova oovuruwana vyevyo aonga liye na mwanaye. Onga vyoona, namuroromelanga vinjinji Yehova, va mavuto anayo ninagumanana iyo liye unoza anikami-ede vilela. — 1 Pe. 5:6, 7.

19. Kodi M’bali Aleksey Yershov azuzumile moi avi?

¹⁹ Muchaka diviriledi abali na arongoli-u anjinji kookala kavilelanga zuzumi-iwa o-oyembekezeleya. Kaganizelani vyevyo vyamuireele M’bali Aleksey Yershov onoyo unakala wu Russia. Athu a Yehova a muilambwela kali va ufulu va thawi eneyo M’bali Yershov abadiziwa liye mu 1994. Komave muchaka do-arela vyongo vyoochenja wu Russia. Mu 2020, apolisi koovolowa koma teto saela m’mba mwa M’bali Yershov moi kootukulamo vyongo vinjinji. Vangavirile medi doyeva, boma loomuimba mulandu. Vyongo vyootakala vinjinji vevo muthu m’mo-iwa onoyo anamedela funjeda Baibulo wa chaka na hafu, awoni-ile liye vidiyo eneyo adjambulile liye monga umboni vamulandula. Vyevi vyali vyotakala vinjinji.

20. Kodi M’bali Yershov airile n’ni ira apitilize limbi-a usamwalaye na Yehova?

²⁰ Kodi vookala vyo-arelavo vyapama chifukwa yovilela wa M’bali Yershov? Ee. Usamwalaye na Yehova woolimba vinjinji. Liye aongile ira: “Miyo na mu-iyananga ninopepela vakwikwivakwikwi, chifukwa ndinoiziwa ira kandakwakwani-a vilela mookami-iwa na Yehova.” Oowenjedela teto ira: “Funjeda vameka undikami-a ira kandifooke. Ndinoganizela modii-a visazo vya atumiki ororomeleya awale. Vikala khani dinjinji doromoliwa m’Baibulo, dotonyi-eda funeya wororomela Yehova.”

21. Kodi nifunjedile n’ni mukhanila?

²¹ Kodi nifunjedile n’ni mukhanila? Thawi dimo-i ninokoza gumanana mavuto o-oyembekezeleya muilambwela. Masiki vili eno, thawi detene Yehova unokami-eda atumikaye kamuroromelanga. Monga mwemo lemba lelo linasogolela khanila linaongelaathu, “masoka a muthu olungama mboinjiva, koma Yehova unomuvulumucha wu masoka etene anayo.” (Sal. 34:19) M’malo mokedanga ganizela mavuto anayo ninagumanana iyo, tiyemoni nipitilize ganizela mwemo Yehova munaniva-ela liye kopolo ira niwandenga vilela. Mofwanafwana na namarumiwa Paulo ninoza nionge ira: “Va vyongo vyetene, ndinofwanya kopolo kumela wa liye onoyo unandiva-a kopolo.” — Afil. 4:13.