Septembre

Yezu bu keri ha mutoto bantu bakaka mbo beri monaka ti ndongosolo’andi ka yeri’â ba fwanaka ko. Kâ bu kakala mu ba songela tidimbu ti beri dingaka, bayizi tâ makuba. (Mat. 16:4) Ngano Matsonoko bwe matâka? Mbikuri Izaya watsoneka mu bungu dia Masiya: “Ka kawula ko, ka tumbula zu ko, mpe ka sa ko ti bawâ zu diandi mu nzila.” (Iza. 42:1, 2) Yezu mu tidzunu keri sarilaka tisalu tiandi mpe wa kuluka weri. Ka yizi’â tungisa tempelo za zinene ko, keri’â lwataka binkuti bieri mu swasikisaka na bantu bakaka ko, mpe keri’â zoloko ko bamutâka mbila mu nkumbu za zinene peleko za mfunu. Bu kayizi kota mu mpasi mu luzingu lwandi, Yezu wakala mu sa timangu ngatu katâ mutinu Erode nsayi. (Like 23:8-11) Yezu bimangu bia kasa, kâ musamu wayôka mfunu kwe yandi ni samuma nsangu za mbote. Ntiangu katâ kwe milongoki miandi ti ‘musamu ni wo [nayizila].’​—Mak. 1:38. w21.05 4 par. 9-10

Mbo tudingaka bantu bô “bê na mabanza ma delakana mu baka luzingu lwa mankululu.” (Bis. 13:48, NWT) Mu bakisa bantu bo mu kwizi bâ milongoki, tufweti ba bakisa 1) mu bakula, 2) mu tambula mpe 3) mu sarila misamu mi balongokaka mu Bibila. (Kol. 2:6, 7; 1 Tes. 2:13) Bantu babansoni mu timvuka, balendi bakisa milongoki mia Bibila mu nzila ya tifwani tiawu, bu babasongelaka luzolo mpe bu bababwanaka na tiya twatwansoni ku tukutakanu. (Za 13:35) Mpe muntu wutwarisaka ndongokolo ya Bibila wulendi sarila ntangu yayingi mpe ngolo zazingi mu bakisa mulongoki mu bika nkwikulu peleko nsalulu za mbi. (2 Kor. 10:4, 5) Lendi yôkesa ngonda zazingi mu bakisa muntu mu sa nsobolo mu luzingu lwandi na mu kwizi lungisa kani dia baka bateme. Kâ, kamana sarila ngolo zo, mbo kabaka ndandu. w21.07 3 par. 6

Ngano lukwikulu lwe neto ti bu twena Mbangi za Yehova, matieleka tulongesaka, mpe mpila yi tusambirilaka Yehova ni yo kwa yimutâka nsayi? Ntumwa Paulo lukwikulu lwalwingi lweri nandi mu matieleka. (1 Tes. 1:5) Ka nsayi ya mpamba ko kwa yeri mu tumaka mu bâ na lukwikulu lwa mpila yo. Kâ Paulo mbo keri longokaka Zu dia Nzambi na bunsungu bwabwansoni. Lukwikulu lweri nandi ti Matsonoko ‘mamansoni kwe Nzambi matûka.’ (2 Tim. 3:16) Ngano ndongokolo’andi nti yamunatina? Mu Matsonoko, Paulo wabaka tidimbu ti balendi lembo sila ntembe ti Yezu ni Masiya. Kâ tidimbu tio, mfumu za mabundu za Bayuda tia beri kalaka. Mbo beri tâka ti matieleka ma Nzambi beri longesaka kwe bantu, kâ misamu mi yinaka Nzambi beri yirikaka. (Tite 1:16) Ka bonga nzengolo ko ya solaka misamu mi kakwikila mu Zu dia Nzambi. Wa kubama weri mu longesa na mu sarila malongi mamansoni ma Nzambi.​—Bis. 20:27. w21.10 18 par. 1-2

Bu tukunaka na bu tumwangaka mamba, tufweti zabaka ti ni Nzambi kurisaka. (1 Kor. 3:6, 7) Kwe Yehova luzingu lwa bantu babansoni ntalu lwena. Mbo katuhanaka bweso bwa sala tintwari na Mwana’andi, mu kutakasa bantu ba nsi zazansoni ntete nsuka ya nza yi yatula. (Hag. 2:7) Tisalu tieto tia samuna, tulendi tia fwanakasa na tisalu tia vukisa bantu. Twena ntiana bantu bê mu ekipe yihanaka lubakusu kwe bantu bahatamanaka mu mabulu ma mine. Ni bu sa ti ka bantu babansoni’â ko babakaka bantu ba bavukisa, babansoni mu ekipe tisalu tia ntalu basalaka. Tisalu tia samuna mpe ni bo tiena. Ka tuzebi’â ko bantu bakwa bavuka mu nza yi ya Satana. Kâ Yehova lendi sarila muntu ni muntu mu beto mu ba bakisa. Andreas, bâka ku Bolivie, têle: “Mbo nimonaka ti ngolo za bantu babansoni zisalaka mu ntangu muntu wulongokaka Bibila mpe wubatusuku.” Buna tatatamana mu bâ na mabanza ma mpila yo mu tisalu tieto tia samuna. Tamana sila bo, Yehova mbo katusakumuna mpe tisalu tieto tia samuna mbo tibâ titeko tia nsayi. w21.05 19 par. 19-20

Muntu wusaka mbingu, kani diandi ni mu bwila tibulu peleko mu honda tio. Lendi sarila mitambu mia swaswana, ntiana bwa têla wo ndiku mosi ya Yobe yamubomba mu mpila ya mbi. (Yobe 18:8-10) Ngano muntu wusaka mbingu bwe wulendi sa ngatu tibulu tiabwa mu mutambu? Mbo kadingaka mu zaba bifu bia tibulu. Mbo katiyulaka: Kwe tita kwenda? Nti tizololo? Ntia mutambu wuyôkele bubote mu baka tio? Satana wena ntiana muntu wo wusaka mbingu. Mbo kadingaka mu zaba bifu bieto. Mbo katalaka kuma ku tukwendaka na bima bi tuzololo. Ha manima mbo katûlaka mutambu wu kamonaka ti wufwanakane mu tu bwila mu ntangu yi tulembo sa keba. Kâ, Bibila mbo ditutêlaka ti tala ti tubawukiri tulendi hatumuka peleko tulendi duka mu mutambu wo. Mbo ditulongesaka mpe bwe tulendi sa mu lembo bwa mu mutambu’andi. Mitambu miole mivulu sarilaka satana ni lulendo na bundiafu. Tûka mivu miamingi, Satana watomo lenda mu sarila bifu bio bia mbi. Wena ntiana muntu wubwilaka nuni mpe wusaka miamiansoni ngatu nuni yabwa mu mutambu. (Mik. 91:3) Kâ, ka batêle’â ko ti tufweti bwa mu mitambu mia Satana. Mu bungu dia nti? Mu bungu ti Yehova watuzabikisa mitambu mi kasarilaka.​—2 Kor. 2:11. w21.06 14 par. 1-2

Bu tutomo tala, mpangi zeto za nuna za kwikama, ntiana diamant zo, ntalu zena. Zu dia Nzambi mbo difwanakasaka mvu zawu na mpu ya timfumu. (Bin. 20:29) Kâ, tulendi lembo sa keba mu mpangi zo za ntalu. Mpangi za ntwenia zibakulaka ti mpangi za nuna ntalu zena, zilendi baka bimvwama biyôkele bimvwama bia tinsuni. Mpangi za nuna za kwikama ntalu zena kwe Yehova Nzambi’eto. Zebi ntia mpila bantu bena, mpe bifu biawu bia mbote bia kazololo. Mbo kabâka mu nsayi mu ntangu bantu ba nuna bakabanaka na bantwenia, ndwenga zi babaka mu tisalu tiawu tia kwikama ti basala mu luzingu lwawu. (Yobe 12:12; Bin. 1:1-4) Kwe Yehova, tifu tiawu tia korela ntalu tiena. (Mal. 3:16) Ni bu sa ti misamu miamingi babwabana na mio mu luzingu lwawu, kani kabwe timinu tiawu mu Yehova ka tiawola ko. Tivuvu tiawu mu bungu dia bilumbu bia ku matu ngolo tiena yôka mu ntangu yi balongoka matieleka. Mpe Yehova mbo kabazoloko mu bungu ti mbo batatamanaka mu zonzela nkumbu’andi ni bu sa ti ba nuna bena.”​—Mik. 92:12-15. w21.09 2 par. 2-3

Ntangu zazansoni musamu wa mbote wubâka mu taluzulaka mbanzulu zitutumaka. Tulendi tiyula: ‘Ngano mu bakula ti ntalu ndiena, mfweti tifwanakasa na bantu bakaka? Ngano mbo nisalaka ngolo mu timvuka mu bungu ti nzololo nabâ muntu wutomono yôka peleko wuyôkele bampwana’andi? Peleko nzololo nasala tisalu tia ngolo ngatu nayangirika Yehova?’ Mu bungu dia nti tufweti tiyulaka biyuvu bio? Tataleno misamu mi tâka Zu dia Nzambi. Bibila mbo ditutindisaka mu bika tifu tia tifwanakasaka na bantu bakaka. Mu bungu dia nti? Musamu wa ntete, tala ti tubenzi ti tuyôkele mpangi’eto, tulendi kwizi bâ na lulendo. Musamu wa nzole, tala ti tubenzi ti mpangi zeto zitomono tu yôka, tulendi kwizi nôka. (Rom. 12:3) Tufweti bambukaka ti, Yehova bu katubenda kwe Yandi, ka wena ko ti mu bungu ti ba toma twena, bubote tuzonzaka, peleko ba zabakana twena, kâ mu bungu ti Yandi tuzololo, mpe tatambula mu wirikila Mwana’andi.​—Za 6:44; 1 Kor. 1:26-31. w21.07 14-15 par. 3-4

Diangana mu bâ na mabanza, tufweti sambilaka, tufweti tangaka Zu dia Nzambi mpe tufweti dimbitilaka. Buna, tatamana mu sarila misamu mio, mpe lomba ngolo kwe Yehova. Mpeve santu’andi mbo yikubakisa mu telamana tifu tia tifwanakasaka na bantu bakaka. Yehova mbo kakubakisa mu zaba tala ti tifu tia dienokena tie naku, peleko lulendo lwe naku mpe mbo kakubakisa mu sa nsobolo na manzangu mamansoni. (2 Nta. 6:29, 30) Yehova mitima mieto mia kazebi. Zebi ti ngolo tusarilaka mu telamana misamu mia mpasi mia nza yi na masumu meto. Mu ntangu Yehova yi kamonaka ngolo zi tusarilaka mu telamana misamu mio mia mbi, mbo kavutu tomo tu zoloko. Mu songela mio mi kamonaka mu bungu dia beto, Yehova mbo kasarilaka tifwani tia luzolo lwe ha kati dia mama na mwana’andi. (Iza. 49:15) Ntia mpila nsayi mu zaba ti Yehova luzolo ni lwa mpila yo kabâka na lo mu beto bu katumonaka bu tusarilaka ngolo zeto zazansoni mu mu sarila! w21.07 24-25 par. 17-19

Tulendi kurisa nsayi’eto bu tusala ngolo mu tisalu ni tisalu ti batuhana mu organizasio ya Yehova. Bâ na “tisalu tiatingi” tia sala mu tisalu tia samuna na mu timvuka. (Bis. 18:5; Ebr. 10:24, 25) Tomo kubamaka mu bungu dia tukutakanu, ngatu wahana mvutu zitindisaka. Bongelaka devware zazansoni zi bakuhanaka na bunsungu bwabwansoni. Bamana ku lomba mu hana lubakusu mu timvuka, hana lo mu ntangu yifwanakane, mpe sa ti bakusikirila. Kubongelakandi madema ma bakuhanaka ntiana’eti ma fioti mena mu bungu dia nge. Sarila ngolo mu tomesa misamu mi we na mio lenda. (Bin. 22:29) Bu kwe sariri ngolo mu bisalu biaku bia timpeve na madema maku, mbo kulu kwizi sa nsobolo mpe nsayi’aku mbo yivutu kula. (Nga. 6:4) Mbo kwizi mona mpe ti, ka wena musamu wa mpasi ko mu yangalala na bampwana’aku tala ti babakiri madema ma dingaka mu lungisa.​—Nga. 5:26. w21.08 22 par. 11

Tufweti losa lulendo mpe tabika Yehova kakulongesa. Ntiana kwa timbevo tilendi sa ti wabâ musamu wa mpasi kwe mutima wa muntu mu sala bubote, lulendo lulendi sa ti wabâ musamu wa mpasi kwe beto mu tumamana lutwalusu lwa Yehova. Bafarize babika mitima miawu mizi miabâ ngolo ntiangu bakala bidimbu bieri ba songelaka mpeve ya Nzambi. (Za 12:37-40) Lulendo lwawu lwa lubi lweri mu bungu ti mbo lwaketi ba kabakasa mu baka luzingu lwa mankululu. (Mat. 23:13, 33) Diangana musamu wa mfunu wena mu tatamana mu bika Zu dia Nzambi na mpeve’andi biasobesa timuntu tieto, mbanzulu zeto na nzengolo zeto! Mu bungu ti Zaki wa kuluka weri, wabika Yehova kamulongesa. Mpe,ni tifu tiandi tia kuluka tiasa ti kizi kabâ mulongi wa mbote. w22.01 10 par. 7

Bu ‘tutatamanaka mu lusambulu,’ tulendi bâ na lukwikulu ti Tata’eto die ku zulu beto kawâka. (Kol. 4:2) Ni bu sa ti mvutu ka yita kulu kwiza ko, Yehova watukanisina ti mbo kahanina tusambulu tweto mvutu mu ntangu ya fwanakana. (Ebr. 4:16) Buna, ka tufweti’â tabanzaka ko ti Yehova musamu wa mbi kayirikaka tala ti ka ta kulu hanina tusambulu tweto mvutu ko mu ntangu yi tuta ya kêla. Mu tifwani, bantu babingi basambilaka tûka mivu miamingi, ngatu bamona Timfumu tia Nzambi tikwizi tûla nsuka mu nza yi. Yezu mpe watâ ti tufweti sambirilaka musamu wo. (Mat. 6:10) Kâ, ka wubâ musamu wa ndwenga ko tala ti muntu wuhombese timinu tiandi mu Nzambi, mu bungu ti nsuka ya nza yi ka yita tula ko mu mpila yi kêlelaka yo bantu! (Hab. 2:3; Mat. 24:44) Ndwenga tusarilaka bu tutatamanaka mu kêla Yehova na bu tumusambilaka na timinu tiatiansoni. Nsuka mbo yitula mu ntangu yifwanane mu bungu ti Yehova watisolela ‘tilumbu na ngunga’ ya yitûla. Mpe tilumbu tîna, mbo tibâ tilumbu tia mbote mu bungu dia bantu babansoni.​—Mat. 24:36; 2 Pi. 3:15. w21.08 10 par. 10-11

Bantu ba kuluka mbo babakulaka ti bu bakwe nuni, ka balendi’â bavutu sarila ntiana mu ntama ko. Tabongeno tifwani tia minkengi mia bizunga. Bu bakwizi bâka na mvula 70, mbo babalombaka mu sala tisalu tiakaka. Wulendi bâ musamu wa mpasi kwe bawu. Mbo beri zoloko bweso bwa sarila mpangi zawu. Tisalu tiawu tia beri tomo zoloko mpe nsatu yo ya sala tisalu tio, ngolo kwa yatiri mu mitima miawu. Kâ, mbo babakulaka ti bantwenia bafwanakane mu sala tisalu tio. Mu mpila yo mbo basongelaka tifu tieri na Balevite mu ntangu ya bala ba Israele, beri lembo vutu salaka ku tabernakle bu beri lungisaka mvula 50. Nsayi’awu ka yabâ kwa mu tisalu ti beri salaka ko. Bayizi tomo baka ndandu mu madema meri nawu, mpe basa miamiansoni mi balenda mu bakisa bantwenia. (Lut. 8:25, 26) Lumbu ti, minkengi mia bizunga mie na mvula 70 mbo mibikaka mu kwe tari bimvuka, kâ mbo mihanaka lubakusu na lutindusu mu bimvuka biawu. w21.09 8-9 par. 3-4

Yezu wazonzela tifwani timosi titindisaka tia mwana wawumuka tie mu Like 15:11-32. Ntwenia yimosi ya yibakala yakolamana tata’andi, yaduka ku nzo, mpe yayenda ku nsi yimosi yeri mala. Kûna wabâ na ndiatulu ya vwandi. Kâ bu kabwabana na misamu mia nguria mia mpasi, wabatika mu yindula mu bungu dia nzengolo za mbi zi kabonga. Wayizi bakula bwe luzingu lwandi lweri lwa mbote bu keri ku nzo ya tata’andi. Yezu watâ ti ntwenia yo yakâla ha mahambu. Wabonga nzengolo ya kâla ku nzo ya tata’andi na ya mu lomba mulemvo. Musamu wa mfunu weri kwe ntwenia yo mu bakula ti nzengolo zazîngi zi kabonga za mbi zeri. Wafwanana kasa tima. Mwana wahumuka watomo soba mabanza mu mio mi kayirika. Tifwani ka tiena kwa tinsamu tisimbaka mutima ko. Mitieno mi tilongesaka milendi bakisa bakuluntu mu timvuka mu bakula tala ti Mukristo watomo soba mabanza mu masumu mandi ma manene. w21.10 5 par. 14-15

Ngano nti balembo ningisa peleko balembo katula? Ntumwa Paulo watsoneka: “Ntiangu, mu bungu ti tufweti baka Timfumu tilendi lembo ningana, tatatamaneno mu [. . .] sarila Nzambi tisalu tia santu ti kalendi tambula, na bunkuta mpe na buzitu.” (Ebr. 12:28, NWT) Wa matieleka, ha manima ma ningana kwa mansukina, Timfumu tia Nzambi kwa tiyâla. (Mik. 110:5, 6; Dan. 2:44) Ntangu ka yisiri’â ya nsaka ko! Bantu bafweti bonga nzengolo: Bamana sola mu tatamana mu singasa mbelo ya mbi ya nza yi, mbo bafuka. Bamana sola mu sarila Yehova, mu sa nsobolo zifwanakane mu luzingu lwawu na mu sarila luzolo lwandi, mbo babaka luzingu lwa mankululu. (Ebr. 12:25) Mpe tufweti bambukaka misamu emi mia tâ Mfumu’eto Yezu: “Nsangu za mbote za Timfumu, mbo basamuna zo ha mutoto wawansoni, mu tâ timbangi kwe makanda mamansoni, mpe buna nsuka mbo yikwiza.”​—Mat. 24:14, NWT. w21.09 19 par. 19-20

Bakuluntu, beno dema die neno dia bakisa bantu ba kwikama bê na bantu ba bazololo babika mu sarila Yehova. (1 Tes. 5:14) Dingakeno mu ba tindisa ntete lukutakanu lwabatika na ha manima ma lukutakanu. Yendakeno lwabatalaka, mpe sambilakeno nawu tintwari. Samunakeno nawu peleko batikisakeno ku nsambululu’eno ya kanda. Bakuluntu bafweti kipaka bantu bê mu tiari mpe bafweti ba songela tiari tia mutima na luzolo. (1 Tes. 2:7, 8) Yehova “ka zololo’â ko ti na kani mosi kafuka, kâ zololo ti babansoni basoba mabanza.” (2 Pi. 3:9, NWT) Ni bu sa ti muntu masumu ma manene kayirikiri luzingu lwandi ntalu kwa lwena ha meso ma Nzambi. Bambukaka ti Yehova wahana luzingu lwa Mwana’andi wu kazololo mu nkûlulu mu bungu dia beto. Na tiari tia mutima, Yehova mbo kabakisaka bô babika mu mu sarila mu kâla kwe Yandi. Tivuvu tie nandi ti mbo bakâla kwe Yandi ntiana bu tulendi wa mona mu tifwani tia hana Yezu tia mwana wawumuka.​—Like 15:11-32. w21.09 30-31 par. 17-19

Kampe kulendi’â wavutu samuna mpe walongesa ko mu mpila yi weri bwa silaka mu ntama mu bungu ti tikolela tiaku ka tiena tia mbote ko. Lendi vutu baka nsayi mu tisalu tiaku tia tia mbutu. Tataleno tifwani tia mutinu Davide mu ntangu yandi na bantu bandi bavukisa makanda mawu na bima biawu bi bawuka kwe Bisi-Amaleke. Bantu 200 beri nguria ba fwatika mu kwe nwana, buna basâla mu kengerela bifunda. Bu babaka muzingu, Davide watâ ti mpila mosi bafweti kabanana bima bi babonga kwe mbeni zawu. (1 Sam. 30:21-25) Mpila mosi kwa mpe na tisalu tieto tia kubika milongoki tisalamaka mu nza yayansoni. Bô babansoni basarilaka ngolo zawu, balendi kabana nsayi na bampwana’awu bu babakisaka muntu mu diatila mu nzila ya luzingu. Yehova manzangu na luzolo lu tusarilaka kamonaka mpe beto katusendaka. Mbo katulongesaka mpe mu bâ mu nsayi mu tisalu tia tinene ti tusalaka tia tia mbutu. (Za 14:12) Tulendi bâ na lukwikulu ti Nzambi mbo katutambula tala ti ka tubikiri’â ko! w21.10 28 par. 15-17

Bu tukwe nuni, tulendi bâ na bunkuta bwa lembo vutu sâla salu kwe Yehova ntiana mu ntama. Kampe ka tusiri’â na ngolo ko ntiana mu ntama, kâ tulendi sarila ndwenga zeto na misamu mi tuzebi mu bakisa bantwenia mu bâ na lenda dia nata madema ma môna. Bantu ba nuna bafweti bâ ba kuluka tala ti bazololo mu bakisa bantwenia. Muntu wa kuluka mbo wumonaka ti bantu bakaka bamuyôkele. (Flp. 2:3, 4) Bantu ba nuna basongelaka tifu tio, mbo babakulaka ti mpila zazingi ze kô zidelakanaka na Bibila zi balendi sarila tisalu. Buna, ka badingaka ko ti bantu babansoni bayirikila misamu buna bu beri mia yirikilaka bawu mu ntama. (Ekl. 7:10) Ni bu sa ti misamu miamingi bazebi mpe balendi longesa kwe bantwenia, mbo babakulaka ti “tinsamu tia nza yi soba tita soba,” mpe wulendi bâ mfunu kwe bawu mu yukunu na misamu mia môna.​—1 Kor. 7:31, NWT. w21.09 8 par. 1, 3

Yehova, wa swaswana wena na nzambi za bungungu, kani kabwe ka lendi’â kalomba kwe bisari biandi ko biayirika tima tia mbi. Yandi wa santu wena. Musamu wo, mbo weri tomo monekaka mu lanta dia ore dieri ha zulu turban ya Mfumu-Nganga-Nzambi. Ha zulu lanta dio, batsoneka: “Busantu Yehova vwiri bo.” (Ndu. 28:36-38) Misamu mio, mbo miaketi hana lukwikulu kwe muntu waketi mia mona ti Yehova wa nguria wa santu wena. Kâ bwe tutâ mu bungu dia Musi-Israele waketi lembo bâ na bweso bwa mona lanta dio, mu bungu ti keri’â pusanaka penepene na Mfumu-Nganga-Nzambi ko? Ngano mbo kaketi hombesa nsangu zo za mfunu? Kâni, mu bungu ti bala ba Israele babansoni za beri wâka bu beri tangaka Musiku ha meso ma babakala, bakento na bala. (Lub. 31:9-12) Tala ti kûna wabâ, mbo waketi wâ misamu emi: “Meno ni Yehova Nzambi’eno, mpe lufweti [. . .] bâ ba santu, mu bungu ti meno wa santu ndiena.” “Lufweti bâ ba santu mu bungu dia meno, mu bungu ti meno, Yehova, wa santu ndiena.”​—Lev. 11:44, 45; 20:7, 26. w21.12 3 par. 6-7

Bantu bakaka balendi bâ na lwaka mu bungu dia nsatu zawu za tinsuni. Kampe bakaka ku nsi zilembolo na bimvwama biabingi babêlaka. Wulendi bâ musamu wa mpasi mu baka mbongo mu kipa makanda mawu. Peleko mfumu-kanda yafwiri, mpe kanda ka diasiri’â na mbongo zazingi ko mu kipa nsatu zawu za tinsuni. Mbo tubaka ndandu bu tu yingasa lwaka mu lukwikulu. Bambukeno ti Yehova kanisini ti mbo kakipa nsatul za tinsuni tala ti tusiri bima bia timpeve ha tibuka tia ntete. (Mat. 6:32, 33) Yandi keka’eti lembana ko mu lungisa kani dio. (Lub. 8:4, 15, 16; Mik. 37:25) Tala ti Yehova nsatu za nuni na za bifulu kalungisaka, diangana ka tufweti’â tabâ na lwaka ko mu bungu dia bidia peleko binkuti! (Mat. 6:26-30; Flp. 4:6, 7) Ntiana luzolo bu lutumaka bibuti mu lungisa nsatu za tinsuni za bala bawu, luzolo Tata’eto die ku zulu lutumaka mu kipa nsayu za tinsuni za kanda diandi. w21.12 17 par. 4-5; 18 par. 8

Ngano nge beka bongela na kondo kwa buderede kwe muntu, kampe kwe mpangi ye Mbangi ya Yehova? Mu tifwani, Yozefe wu babongela na kondo kwa buderede kwe bayaya ba yandi beni, ka bika ko ti masumu mawu masa ti kabâ muntu wa mbi. Kâ, watatamana mu tûla mabanza mandi mu tisalu tia Yehova, mpe Yehova wamusenda mu bungu dia luvivululu lwandi na mu bungu dia tifu tiandi tia korela. Ha manima, Yozefe wayizi bâ na lenda dia lemvokela bantu bamumwisa mpasi, mpe Yehova wamusakumuna. (Mba. 45:5) Ntiana Yozefe, mbo tubakaka lutindusu mu ntangu yi tupusanaka kwe Yehova, mpe yi tumubikaka kayirika misamu na buderede mu ntangu yifwanakane. (Mik. 7:17; 73:28) Tala ti kondo kwa buderede ta korela peleko musamu wakaka wa mpasi wufwemesaka, bambuka ti Yehova penepene kena na bô bê na mitima mia pasuka. (Mik. 34:18) Nge kazololo mu bungu dia luvivululu lwaku, mpe mu bungu ti dema diaku losaka kwe Yandi. (Mik. 55:22) Yandi ni Mfundisi ya mutoto wawansoni. Misamu miamiansoni mia kamonaka. (1 Pi. 3:12) Mu ntangu yi bwabana na misamu mia mpasi mi lendi lembo yirika, ngano mbo kêla Yehova na luvivululu lwalwansoni? w21.08 11 par. 14; 12 par. 16

Mbo tusarila ndwenga tamana sarila luzingu lweto mu mpila yi tutuma mu solo Yehova.Tufweti tûla misamu mia mfunu ha tibuka tia ntete. Ngatu tasarila ntangu’eto mu mpila ya mbote, kampe tufweti sa nsololo ha kati dia bima biole bilembolo bia mbi. Tulendi wa mona mu mio miatula mu ntangu Yezu yi kaye tala Mariya na Marte. Mu nsayi yi keri na yo bu kabwana Yezu, Marte walamba bima biabingi bia toma. Mu ntangu yi keri lambaka, mpangi’andi Mariya, mu baka ndandu mu tala ku bayizi ba tala, waye zakala penepene na Mfumu’andi Yezu mu wirikila ndongosolo yi keri hanaka. Ni bu sa ti Marte mbanzulu za mbote zeri nandi, Mariya ‘wasola tikunku tia mbote.’ (Like 10:38-42) Ntangu bu yayôka, kampe Mariya wazimbakana bima bi badia, kâ tulendi tâ ti kani kabwe ka zimbakana misamu mia tâ Yezu ko. Ntiana kwa Mariya wamona ti mwa ntangu yi kayôkesa na Yezu ntalu yeri, beto mpe tufweti monaka ti ntangu yi tuyôkesaka na Yehova ntalu yena. w22.01 27 par. 5-6

Ni bu sa ti Ahabe watibetola ha meso ma Yehova, ha manima ndiatulu’andi yasongela ti ka tomo’â soba mabanza ko. Ka yêla mu katula nsambululu ya Bale ko ku nsi’andi. Mpe ka tuma bantu ko basambilaka Yehova. Ha manima ma lufwa lwa Ahabe, Yehova wasongela bwe keri mu bongelaka. Mbikuru ya Nzambi, Jehu, watâ ti yandi “wa mbi” wabâ (2 Nta. 19:1, 2) Tabanzeno’eti: Tala ti nsobolo ya mabanza ya Ahabe ya matieleka yeri, mbikuri ka keti’â tâ ko ti munkwa-mbi weri wuyinaka Yehova. Ni bu sa ti Ahabe wanionga, kani kabwe ka tomo’â soba mabanza ko. Nti tulendi longoka mu tifwani tia Ahabe? Bu kawâ nsangu za nsembolo za nata Eliya mu bungu dia kanda diandi, Ahabe watoko tibetola. Musamu wa mbote weri. Kâ, nsalulu zandi zasongela ti ka soba mabanza ko. Buna, kwe beto, nsobolo ya mabanza ka yisukinaka ko kwa mu nionga mu bungu dia misamu mi tuyirikiri. w21.10 3 par. 4-5, 7-8

Izaya mbikuri yeri, kampe mukento’andi mpe tisalu tieri nandi tia yandi beni tia bambikuri, mu bungu ti mbo beri mu tâka “mbikuri.” (Iza. 8:1-4) Izaya na mukento’andi, batûla nsambululu ya Yehova ha tibuka tia ntete mu luzingu lwawu. Lumbu ti mpe bantu ba kwelana balendi tunga luzingu lwawu bu basa miamiansoni mi balenda mu tisalu tia Yehova. Balendi yika lukwikulu lwawu mu Yehova ngolo bu balongoka mbikululu za Yehova tintwari, mpe bu bamona kabwe zilungananaka ntangu zazansoni. (Tite 1:2) Balendi banza kabwe balendi hanina lubakusu mu ndungananu ya mbikululu zakaka za Bibila. Mu tifwani, balendi hana lubakusu mu ndungananu ya mbikululu ya Yezu yitâka ti, nsangu za mbote mbo basamuna zo ha mutoto wawansoni ntete nsuka yatula. Mu ntangu bantu ba kwelana yi babâka na lukwikulu ti mbikululu ya Bibila ya yita lungana, timina diawu dia sarila Yehova mbo divutu yikamaka ngolo. w21.11 16 par. 9-10

Yezu lwaka lweri nandi mu bungu dia nguri’andi, kampe weri mufwiri. Luzolo lwa Yezu mu Mariya na lwaka lweri nandi mu yandi, lwamutuma mu sâ mu sisa kwe Za, mu bungu ti wazaba ti mbo kaketi kipa nsatu za timpeve za Mariya. Tûka lumbu tîna, Za wayizi bâ ntiana mwana wa Mariya, mpe mbo keri kipaka Mariya ntiana kwa nguri’andi yamubuta. Ntia mpila luzolo Yezu kasongela kwe mukento watomo mu kipa na luzolo lwalwansoni bu kabutuka, mpe wabâ ha lweka lwandi mu ntangu ya lufwa lwandi! Ntia malongi tulendi baka mu misamu mia tâ Yezu? Tindiku tieto na mpangi zeto za Bakristo tilendi yôka ngolo tindiku tie neto na bantu ba makanda meto. Bantu ba makanda meto balendi tu telamana peleko balendi tu kala, kâ Yezu wakanisina ti, tamana tatamana mu bâ ba kwikama kwe Yehova na kwe organizasio’andi, bima bi tubaka mbo biyôka mbala nkama (100) bio bi tuhombese. Babingi bakwizi bâ ntiana bala beto ba babakala, ba bakento, nguri zeto peleko batata beto. (Mak. 10:29, 30) Ngano bwe monaka ku mutima bu we na mpangi za zikento na za zibakala ze na bumosi mu bungu ti timinu tie nawu mu Yehova, mpe luzolo lwe nawu mu Yandi na mu bampwana’awu?​—Kol. 3:14; 1 Pi. 2:17. w21.04 9-11 par. 7-8

Muntu we na luzolo lwa kwikama, mbo kasaka miamiansoni mi kalenda mu bakisa bampwana’andi. Lumbu ti ntiana kwa mu ntama, mpangi zazingi zasola mu songela luzolo lwa kwikama kwe mpangi zeto ni bu sa ti ka babazebi’â ko. Mu tifwani, bu bawâka ti catastrophe naturelle yibwiri, mbo badingaka mu zaba ti balendi sa mu bakisa. Mu ntangu mpangi ya mu timvuka yibwabanaka na musamu wa mpasi, ka balembeketaka ko mu ba hana lubakusu. Ntiana Bisi-Masedwane ba mu mbandu ya ntete, mbo basaka miamiansoni mi balenda. Mbo bahanaka ntangu na bimvwama biawu mu bakisa mpangi zilembolo na bimvwama biabingi. (2 Kor. 8:3) Lumbu ti, bakuluntu batomo talaka misamu bazebi lubakusu lu hanaka bampangi. Masika ma delakana na ma nsayi mbo mahana kwe bamapangi ngolo zi b6e na zo nsatu mu tatamana.​—Iza. 32:1, 2. w21.11 11 par. 14; 12 par. 21

Beto bansoni nsatu malongi yibâka neto ntangu zakaka. Ntangu zakaka, beto beni tulombaka malongi kwe muntu wu tuzitisaka. Kâ, ntangu zakaka mpangi yitubelokelaka lwaka yilendi tu têla ti nzengolo yi tuta zolo bonga mbo yitunatina misamu mituniongesa. (Nga. 6:1) Ntangu zakaka mpe, malongi malendi bâ nsembolo mu bungu dia musamu wa mbi wu tuyirikiri. Mu ntangu ni ntangu yi batuhanaka malongi, tufweti ma wirikilaka. Tamana sila bo, mbo wubâ musamu wa mbote mu bungu dia beto, mpe wulendi tu vukisa! (Bin. 6:23) Verse ya tilumbu ti mbo yita tu tindisa mu ‘wâ misamu mia bantu ba ndwenga.’ Ka kwena muntu wuzebi misamu miamiansoni ko; muntu kwa wubâka kô wuzebi misamu yôka mi tuzebi beto. (Bin. 12:15) Buna, bu tuwirikilaka malongi mbo tusongelaka ti ba kuluka twena. Mbo wusongelaka ti ndilu zeto za tuzebi; mbo tubakulaka ti nsatu lubakusu ye neto mu lungisa makani meto. Mutimu Salomo, wabâ na ndwenga, watsoneka: “Makani [. . .] mbo malunganaka mu ntangu milongi mibâka miamingi.”​—Bin. 15:22. w22.02 8 par. 1-2

Ka wufweni’â ko kwe muntu wuyirikiri masumu mu tâ ti niongene mu bungu dia masumu ma manene ma kayirikiri. Mu songela ti sobele mabanza, fweti soba mpila yi kamwinaka misamu na ndiatulu’andi. Wuzololo tâ, fweti bika ndiatulu’andi ya mbi, mpe fweti tumamana mitieno mia Yehova. (Ezk. 33:14-16) Musamu wuyôkele mfunu kwe muntu wusumukini ni mu vutu karisa tindiku tiandi na Yehova. Ngano nti tufweti sa tala ti mosi ya ndiku zeto yisiri masumu ma manene? Ndiku’eto kwa tumwisa mpasi tala ti tudingiri mu sweka masumu mandi. Ka tubâ na lenda ko dia sweka masumu mo mu bungu ti Yehova mona kamonaka. (Bin. 5:21, 22) Lendi bakisa ndiku’aku bu mu bambula ti bakuluntu bazololo bamubakisa. Tala ti ndiku’aku kariri mu zonzela masumu mandi kwe bakuluntu, nge fweti kwe ma zonzela kwe bakuluntu mu songela ti zololo wamubakisa. Musamu wa mfunu wena mu bungu ti tala ti ka bakiri’â lubakusu lwa bakuluntu ko, mpe ka sobele’â mabanza ko. w21.10 7 par. 19-21

Beto bansoni tulendi baka malongi mu tifu tia Yezu tia tekesaka nsatu za bampwana’andi ku matu ntete za yandi beni. Bibila mbo ditâka ti wabonga tifwani tia ngamba. (Flp. 2:7) Ngamba ya mbote, peleko tisari mbo tieri dingaka mpila yi kaketi têla mfumu’andi nsayi. Mu bungu ti nge ngamba ya Yehova yena mpe tisari tia mpangi zaku, ntembe kâni mbo ta zolo mu tomo sarila Yehova na mpangi zaku. Tiyula biyuvu ebi: ‘Ngano mbo nizoloko mu sarila ntangu’ani na ngolo zani mu bakisa bantu bakaka? Ngano manzangu nisarilaka mu hana lubakusu mu ntangu yi dinganaka bantu bakipa Nzo ya lukutakanu lwa lunene peleko Nzo ya Nsambululu?’ Banza’eti, mweni ti fweti tomesa timosi tia bifu biaku, kâ ka wena na ngolo ko mu sa nsobolo zifwanakane. Mu musamu wo, dinga wasambila Yehova. Têla Yehova bwe ta mona, mpe mu lomba kakuhana “nsatu na ngolo za sarila.”​—Flp. 2:13. w22.02 22-23 par. 9-11

Yezu wasongela nsayi ya sarila mbote bu keri wa lembama mpe bu keri bâka na mabanza ma delakana ni bu sa ti mu misamu mia mpasi. (Mat. 11:29, 30) Mu tifwani, mu ntangu mukento wumosi wa ku Fenisi kamulemberela mu wasisa mwana’andi, ha mbatukulu, Yezu ka tambula ndombolo’andi ko, kâ bu kasongela timinu tia ngolo, Yezu wawasisa mwana’andi. (Mat. 15:22-28) Ni bu sa ti nsayi ya sarila mbote yeri nandi, Yezu keri’â bikaka ko mu hana malongi. Ntangu zakaka, wasongela nsayi ya sarila mbote bu keri sembaka bô ba keri zoloko. Mu tifwani, mu ntangu Piere yi kayêla mu mu nôkesa mu sarila luzolo lwa Yehova, Yezu wamusungika ha meso ma milongoki miakaka. (Mak. 8:32, 33) Ka sila bo ko mu fwisa Piere nsoni, kâ mu mu kubika na mu lwengesa milongoki miakaka mu lembo yirika misamu mi balembolo na nswa. Ntembe kâni Piere wamona mwa nsoni, kâ wabaka ndandu mu nsembolo yo. Mu songela nsayi ya sarila mbote kwe bô ba zololo, ntangu zakaka fweti ba hanaka malongi. Bu sila bo, landa tifwani tia Yezu weri hanaka malongi masikamanaka mu mitieno mia Zu dia Nzambi. w22.03 11 par. 12-13

Mbo tusilaka Yehova nsambululu bu tumukembelaka. (Mik. 34:1) Mbo tukembelaka Yehova bu tutêlaka bantu bakaka ntia mpila tuzololo mpe tuzitisaka bifu biandi na bisalu biandi. Mbo tubâ na misamu miamingi mi tukembelela Yehova tala ti mbo tumutondaka. Bu tubonga ntangu ya dimbitila mu mbote ya Yehova​—mu miamiansoni mi keka yirika mu bungu dia beto—​kani kabwe ka tukondo’â musamu wu tumukembelela ko. Tisalu tia samuna mbo tituhanaka bweso bwa toma bwa ‘nata mukayulu wa mukembo kwe Nzambi ntangu basiri ntangu, wuzololo tâ mbutu za bikoba bieto.’ Ntiana kwa bu tufweti toko banza misamu mi tutâ kwe Yehova ntete tamusambila, bubote bubâka mu toko banza misamu mi tutêla bantu ba tubwabana na bo bu tusamuna. Tuzololo ti ‘mukayulu’eto wa mukembo’ wabâ wa nkatika wa mbote. Ntiangu tuzonzaka na tiya twatwansoni bu tusamunaka. w22.03 21 par. 8