Août

Ngano lendi banza mu bungu dia nti Yehova katsonekena mu “buku dia mbambukulu” nkumbu za bô basongelaka ti Yandi batînaka mu nzonzolo’awu, mpe badimbitilaka mu nkumbu’andi,? Nzonzolo’eto mio mie neto mu mutima’eto yisongelaka. Yezu watâ ti: ‘Mio misampaka mu mutima, munwa ni mio kadukisaka.’ (Mat. 12:34) Yehova zololo ti bô bamuzololo bamona nsayi ya luzingu lwa mankululu mu nza ya môna. Mpila yi tuzonzelaka yilendi songela tala ti Yehova mbo katambula nsambululu’eto. (Zaki 1:26) Bantu bakaka balembo zoloko Nzambi, na nzonzolo ya miangu, ya ngolo na ya lukuta babâka nawu. (2 Tim. 3:​1-5) Ka tuzololo’â ko tabâ ntiana bawu. Tuzololo tatâka Yehova nsayi mu nzonzolo’eto. Ngano Yehova tutâ nsayi tala ti tusariri nzonzolo ya mbote ku tukutakanu twa Bakristo peleko mu tisalu tia samuna, kâ ku nzo tusariri nzonzolo ya ngolo, mpe yikondolo luzolo kwe bantu ba kanda dieto?—1 Pi. 3:7. w22.04 5 par. 4-5

Nzambi siri mbanzulu zadi mu mutima wa mampoka kuni mpe kwe tibulu tia sangi mu tomo lungisa mfukulu ya Babilone ya yinene. Wa matieleka, Yehova mbo katuma makanda mu sarila tibulu tia sangi tie na langi wa mbwaki ya ngolo, wuzololo tâ ONU, mu balukila mabundu mamansoni ma mu nza, na mu fukisa mo. (Nza. 18:21-24) Ngano bwe wuta zolo tâ mu bungu dia beto? Tufweti tatamana mu sa “nsambululu ya verela mpe yilembolo mvindu ha meso ma Tata’eto Nzambi.” (Zaki 1:​27, NWT) Kani kabwe, ka tubikandi ndongosolo za bungungu, malaki ma bapaye, mitieno mia ndiatulu milembolo mia d elakana na nsalulu za bunganga za Babilone ya Yinene zatusobesa! Mpe tatatamana mu têla bantu ti baduka mu yandi, ngatu Nzambi ka ba sembandi tintwari mu bungu dia masumu mandi.—Nza. 18:4. w22.05 11 par. 17; 14 par. 18

Bibuti dingeno mpila zakaka zi lulongesela bala beno misamu mitariri Yehova mpe zonzelakeno misamu mia mbote mi kayirika mu beno. (Lub. 6:​6, 7) Wufwanakane lwasilaka bo, tala ti mabundu makabana mena ku nzo, kalulendi’â lwa longokaka na bala beno ko ku nzo. Mpangi yimosi ye na nkumbu Christine, têle ti: “Mu bungu ti ka ndieri’â na ntangu yayingi ko mu zonzela Yehova na bala bani, bweso bwabwansoni bweri monekaka ndieri sarilaka mu ba longesa..” Musamu wakaka, zonzelaka organizasio ya Yehova na bampangi mu mpila ya mbote. Kutsâlakandi bakuluntu. Misamu mi tâka mu bungu dia bawu, milendi songela tala ti bala baku balendi kwe ba monekena mu lomba lubakusu. Singasaka tidzunu ku nzo. Vulu songelaka luzolo lwaku kwe bakala diaku na kwe bala baku. Zonzelaka bakala diaku mu mpila ya mbote na buzitu bwabwansoni, bakisa mpe bala baku mu sila bo. Buna, tidzunu tukotesa mu nzo tibakisa mu longoka mu zaba Yehova.—Zaki. 3:18. w22.04 18 par. 10-11

Nsangu za tambika Yezu kwe timvuka tia Efeze zasongela ti bakorela mpe batatamana mu sarila Yehova ntono misamu mia mpasi. Ni bu sa ti ni bo basarila, bayizi hombesa luzolo lweri nawu ha mbatukulu. Wafwanakana ti bavutu yika luzolo lwawu ngolo—tala ti kâni, ka baketi’â tambula nsambululu’awu ko. Mpila mosi mpe lumbu ti, ka tufweti’â kwa takorelaka ko. Tufweti korelaka na mabanza ma delakana. Nzambi’eto misamu mi tuyirikaka kazoloko, kâ mpe na misamu mitutumaka mu yirika mio. Misamu mitutumaka mfunu miena kwe Yandi, mu bungu ti zololo ti nsambululu’eto yasikamanaka mu luzolo lwa ngolo lwe neto mu Yandi na mu mpila yi tu mu mwinaka. (Bin. 16:2; Mak. 12:​29, 30) Tufweti tatamana mu bâ na meso ma tia. Mu timvuka tia Sarde musamu wakaka weri nawu. Ni bu sa ti timpeve tia ngolo tieri nawu mu ntama, bayizi peta mu tisalu tia Nzambi. Yezu wabatêla bavumbuka. Wa matieleka, Yehova ka zimbakana tisalu tieto ko.—Ebr. 6:10; Nza. 3:1-3. w22.05 3 par. 6-7

Salomo watâ nsayi yi tubakaka mu tisalu “kabu dia Nzambi.” (Ekl. 5:​18, 19) Salomo wazaba ti musamu wa matieleka wena. Yandi beni tisari tia ngolo tieri! Watunga nzo zazingi, wakuna miti mia vinu, wasala jardins na piscine. Watunga mpe mimvuka. (1 Mit. 9:19; Ekl. 2:​4-6) Bisalu bia mpasi bieri, mpe ntembe kâni biamutâ nsayi. Kâ, Salomo wazaba ti mu tomo bâ mu nsayi tima tiakaka kafweti sa. Wayizi sala mpe bisalu bia timpeve. Mu tifwani, watwarisa ntungulu ya Tempelo ya toma mu bungu dia nsambululu ya Yehova—ntungulu yo mvula 7 yabonga! (1 Mit. 6:38; 9:1) Bu kamana sala bisalu bia timpeve na bia tinsuni, Salomo wayizi bakula ti bisalu bia timpeve bitomono yôka bisalu bia tinsuni. Watâ ti: ‘Nsukunu ya bunzonzi: miamiansoni miwakane. Bâ na bunkuta bwa Nzambi mpe kêla ntumunu zandi.’—Ekl. 12:13. w22.05 22 par. 8

Bibila diafuluka diena mu bifwani bia bantu Yehova ba kalemvokela. Ngano ntia muntu luta bambukila? Kampe mutinu Manase. Muntu wo wa mbi wasumuka ha meso ma Yehova mu mpila ya mbi. Wasambila nzambi za bungungu mpe watuma bantu bakaka mu sambila zo. Wahonda bala bandi bu keri bahanaka mu mikayulu kwe nzambi za bapaye. Watula mpe titeki tia nzambi ya bungungu mu Tempelo ya mulongo ya Yehova. Mu bungu dia yandi, Bibila ditêle: “Wayirika misamu miamingi mia mbi ha meso ma Yehova mu mu tâ nkesi.” (2 Nta. 33:​2-7, NWT) Kâ, Manase bu katomo soba mabanza, Yehova wamulemvokela. (2 Nta. 33:​12, 13) Kampe, ta bambukila mpe mutinu Davide, wayirika masumu ma manene ha meso ma Yehova, mu kati bunsuza na honda kwa muntu. Kâ, bu katomo soba mabanza mpe bu katambula fote zandi, Yehova wamulemvokela. (2 Sam. 12:​9, 10, 13, 14) Yee, tulendi bâ na lukwikulu ti Yehova zololo mu tu lemvokela. w22.06 3 par. 7

Ntangu zakaka ka wubâka musamu wa fioti ko mu lunda tivuvu tia ngolo. Tulendi kondo luvivululu bu tukêlaka Nzambi. Kâ, Yehova mankululu kazingaka, mpe mpila yi kakontelaka bilumbu ya swaswana yena na ya beto. (2 Pi. 3:​8, 9) Mbo kalungisa makani mandi mu mpila ya delakana, kampe Yandi kasa tima ko mu ntangu beto tukêlaka kasala. Nti bilendi tu bakisa mu lunda tivuvu tieto ngolo bu tuta kwe kêle na luvivululu lwalwansoni ti makani ma Nzambi malungana? (Zaki 5:​7, 8) Tatamana mu bâ penepene na Yehova, Yandi lungisa tivuvu tieto. Bibila tintwari tia ngolo disaka ha kati dia tivuvu na timinu ti Yehova kô kena, mpe ni ‘Yandi sendaka bô bamudingaka mu mutima wawansoni.’ (Ebr. 11:​1, 6) Tala ti tukwikiri ti Yehova kô kena, lukwikulu lweto mbo lukwizi kula ti mbo kalungisa makani mandi mamansoni. Mu lunda tivuvu tieto ngolo, tufweti sambilaka Yehova mpe tufweti tangaka Zu diandi. Ni bu sa ti ka tulendi’â tamona Yehova ko, tulendi pusana kwe Yandi. Tulendi zonza nandi mu lusambulu, na lukwikulu ti mbo katuwirikila.—Yer. 29:​11, 12. w22.10 26-27 par. 11-13

Dimbitileno’eti mu mpila yayôkela misamu. Yobe wa zakala weri ha bombi, mpe mpasi keri monaka. (Yobe 2:8) Ndiku zandi zatatamana mu tâ ti keri’â muntu wa mbote ko, mpe bayêla mu bebesa nkumbu’andi. Misamu miamuturila mbo mieri mu demaka ntiana bu demaka matari ma dema, mpe tiari tia lufwa lwa bala bandi mpasi tieri tomo mu mwisaka ku mutima. Ha mbatukulu, Yobe keri’â zonzaka ko. (Yobe 2:13) Tala ti ndiku za Yobe zabanza ti kuta ku kakuta ni mu songela ti Nzambi’andi kateka manima, nguria wunakana beri wunakanaka. Ntangu yeri kô—kampe Yobe bu kavumbula mutu, watala ndiku zandi za bungungu—watâ: ‘Na tii bu nivutula tiwumunu tiani ka nilosa kwikama kwani ko.’ (Yobe 27:5) Ngano nti biabakisa Yobe mu bâ na butindi na ngolo ntono mpasi zo zazansoni? Ni bu sa ti mu ntangu yi keri wa nguria wa nôka, kani kabwe ka hombesa tivuvu tiandi ko ti Nzambi ya luzolo mpasi zandi kamanisa. Wazaba ti ni bu kaketi fwa kwa Yehova yandi kaketi mu vumbula kwe ba fwa.— Yobe 14:​13-15. w22.06 22 par. 9

Bweso bwa toma tabaka—bwa pusana kwe Mvangi wa mutoto na wa mazulu mu lusambulu. Banza’eti: Tulendi ziburila Yehova mutima mu ntangu ni ntangu, mu zu ni zu. Tulendi mu sambila tûka ku mfulu ya lupitalu peleko ku boloko na lukwikulu ti Tata’eto dia luzolo mbo katuwirikila. Matondo tutomo vutulaka mu bungu dia kabu dio. Mutinu Davide lusambulu ntiana tima tia ntalu keri ya bongelaka. Mu mukunga wu katangila Yehova watâ: ‘Bika lusambulu lwani lwabâ ntiana encens yi bakubikiri ha meso maku.’ (Mik. 141:​1, 2) Mu ntangu ya Davide, encens ya mulongo yi beri sarilaka kwe Banganga-Nzambi, na bunkete bwabwansoni beri ya yirikaka. (Ndu. 30:34, 35) Davide na bunsungu bwabwansoni keri banzaka mu misamu mi kaketi tâ bu keri sambilaka Yehova, ntiana kwa na bunsungu yiberi sarilaka mu kubikaka encens. Beto mpe tuzololo mu sila bo. Tuzololo ti tusambulu tweto twayangirika Yehova. w22.07 20 par. 1-2; 21 par. 4

Yehova kwa lendi zenga mambu. Yehova ka tu hana nswa ko wa karisa mbi mu mbi tala ti muntu wutuyirikiri musamu wa mbi. (Rom. 12:​20, 21) Mu bungu ti bantu ba masumu twena, mpe ndilu ze neto mu misamu mi tulendi banza, ka twena na lenda ko dia tomo zenga musamu buna bufwanakane ntiana bu lendi wa zengela Nzambi. (Ebr. 4:13) Ntangu zakaka, mbanzulu zeto zilendi tu wubakasa, mpe wulendi bâ musamu wa mpasi kwe beto mu zaba ntia musamu wa mbote tulendi yirika. Yehova watâ kwe Zaki katsoneka ti: ‘Muntu wubakaka nkesi ka wusalaka tisalu tia sungama ko ha meso ma Nzambi.’ (Zaki 1:20) Tulendi bâ na lukwikulu ti Yehova mbo kasa miamiansoni mifwanakane, mpe mbo kayirika musamu mu buderede. Mulemvo lukwikulu lwe neto mu buderede bwa Yehova wusongelaka. Bu tubika musamu ha moko ma Yehova mbo tusongela ti lukwikulu lwe neto mu Yehova mu yirika mbi yayansoni ya nata masumu. Mu nza ya môna ya tu kanisina Nzambi, misamu mia mpasi mi tubanzaka ‘ka bavutu’â mia bambukila ko; mpe ka mivutu’â kwiza ku mutima ko.—Iza. 65:17. w22.06 10-11 par. 11-12

Bu batubongelaka na diki dia mpila yo, wusongele ti Yehova beto katamburi. (Mat. 5:​11, 12) Satana tumaka nkwamusu zo. Kâ kena buma ko ha matu ma Yezu! Na lubakusu lwa Yezu, bantu ba makanda mamansoni nsangu za mbote bawâ. Tataluzuleno bidimbu. Bu twena bisamuni, musamu wakaka wa mpasi wu tubwabanaka na wo, ni wutariri luswaswanu lwa mazu. Mu Nzabukusu yi kahana kwe ntumwa Za, Yezu watâ ti mu ntangu yi ya beto nsangu za mbote mbo zaketi nunga musamu wo. (Nza. 14:​6, 7) Ngano mu bwe? Kwe bantu babingi tuhanaka bweso mu hana mvutu mu nsangu za Timfumu zi tubasamuninaka. Lumbu ti, bantu ba mu nza ya mukaka balendi tanga mikanda misikamanaka mu Bibila mu site’eto ya jw.org mu bungu ti mu mazu yôka 1000 yena! Timvuka titwarisaka tiayizi hana nzila ya bangula buku dia Bâ mu nsayi ntangu zazansoni! die buku dia nguri di tusarilaka mu longesa bantu; mu mazu yôka 700! w22.07 9 par. 6-7

Yezu tiari tieri nandi tia bantu. Ntumwa Matie watâ: “Bu kamona yungi dia bantu, tiari tiamubaka, mu bungu ti babaniekona mpe babayambirika ntiana bimeme bikondolo muvungi.” (Mat. 9:36) Mpe Yehova bwe kamonaka? Yezu watâ: ‘Tata’ani we ku mazulu kazololo’ako ti kani wumosi mu bala bo ka wufukandi.’ (Mat. 18:14) Diangana nkatika lutindusu lwena! Bu tutomo kwe longoke mu zaba Yezu, luzolo lweto mu Yehova mbo lutomo kula. Lendi longoka mpe mu songela luzolo na mu bâ Mukristo wa yela bu sa tindiku na Bakristo ba yela bê mu timvuka tiaku. Dinga mu zaba nti bibatâka nsayi. Ka baniongaka ko mu nzengolo yi babonga ya sarila Yehova. Ba lomba mu zonzela misamu mi babwabana na mio mu tisalu tia Yehova. Bu dingaka mu bonga nzengolo ya mfunu, ba lombaka malongi. Bambukaka ti, “mvukulu mu nzanda milongi yena.” w22.08 3 par. 6-7

Beto bansoni mbo tubwabana na mpasi. Kâ, kani kabwe ka tutelamana zo beto kaka ko. Bu kena Tata dia luzolo, ntangu zazansoni Yehova beto kakengerelaka. Ha lweka lweto kena, wa kubama wena mu wirikila ndiyawululu zeto, mpe zololo mu tu bakisa. (Iza. 43:2) Lukwikulu lwe neto ti tulendi telamana misamu mia mpasi mu bungu ti, na luzolo lwalwansoni watuhana bima biabiansoni bie neto nsatu mu korela. Watuhana kabu dia lusambulu, Bibila, bima bia timpeve biabingi na mpangi za luzolo mu tu hana lubakusu bu tubâka na lo nsatu. Diangana mbo tutomo tondaka mu bungu ti Tata dia ku mazulu die neto ditukengerelaka! ‘Mu Yandi mitima mieto miyangalaka.’ (Mik. 33:21) Tulendi songela kwe Yehova ti Yandi tutondaka mu mpila ya luzolo yi katukengerelaka, bu tudinga mu baka ndandu mu bima biabiansoni bi kasa mu tu bakisa. Tufweti nata dema dieto ngatu Nzambi katatamana mu tu kengerela. Wuzololo tâ, tala ti tutatamane mu sa miamiansoni mu tumamana Yehova, mpe tuyirikiri misamu mia sungama ha meso mandi, ntangu zazansoni mbo katukengerela! w22.08 13 par. 15-16

Bantu babingi lumbu ti balembolo zaba nani balendi kwikila. Mbo batiyulaka tala ti bantu ba bazoloko ntiana—bantu ba politike, basiantifike, na bitê bia nkari—nsatu zawu za batomo kipaka. Ka batomo’â kwikilaka mfumu za mabundu matâka ti Bakristo bena. Buna ka wubâka musamu wa nzitukulu ko mu mona bantu balembo zoloko Bibila, mu bungu ti mfumu za mabundu mbo batâka ti ni dio balandaka. Bu twena bisari biandi, lukwikulu lwe neto ti Yehova Nzambi ya matieleka yena, mpe ntangu zazansoni misamu miyôkele bubote kazoloko mu bungu dia beto. (Mik. 31:5; Iza. 48:17) Tuzebi ti tulendi kwikila misamu mi tutanganka mu Bibila. Misamu emi mia tâ muntu wumosi wulongokaka misamu mia Bibila tusingasaka: “Nzambi ka tâ kani musamu wumosi ko wa bungungu peleko wulendi lembo lungana mu matieleka. Kanda dia Nzambi dilendi bâ na lukwikulu mu misamu mi katâ mu bungu ti lukwikulu lwe nawu mu Nzambi yatâ mio.” w23.01 2 par. 1-2

Mpangi zeto tutindisaka, bu tuyikaka ngolo timinu tiawu mu Yehova. Mpangi zakaka baseheselaka kwe bantu balembolo Mbangi za Yehova. Bakaka bimbevo bia ngolo bie nawu, peleko musamu wa mpasi wena kwe bawu mu telamana fwemoso. Bakaka tûka ntama bakêlaka nsuka ya nza yi. Misamu mio milendi kotesa timinu tia Bakristo mu ntontolo. Mpangi za mu timvuka tia mbandu ya ntete misamu ni mia mpila yo batelamana. Ntumwa Paulo wasarila Matsonoko mu tunga timinu tia mpangi zandi. Mu tifwani, kampe Bakristo ba Bayuda ka beri’â zabaka misamu mi baketi tâ ko kwe bantu ba makanda mawu beri lembo kwikilaka, beri tâka ti dibundu dia Bayuda diyôkele dibundu dia Bakristo. Ntembe kâni, mukanda wa tambika Paulo kwe Bahebre watomo yika Bakristo ngolo. (Ebr. 1:​5, 6; 2:​2, 3; 9:​24, 25) Lenda dieri nawu dia sarila nzonzolo ya ngolo mu kutisa bantu beri ba telamanaka. w22.08 23-24 par. 12-14

Bantu mu nza ya Satana ka bazabaka ko nani balendi kwikila. Mbala zazingi babanôkesaka kwe bitê bia nkari, kwe mfumu za politike na za mabundu. Bantu babingi mpe babanzaka ti ka balendi’â bakwikila ndiku zawu ko, bantu ba babandakane na bantu ba makanda mawu. Musamu wo ka wufweti’â watuyitukusu ko. Bibila diatâ ti: “Mu bilumbu bia mansukina [. . .], bantu [. . .] ka babâ ba kwikama ko, [. . .] mbo bahunisina bantu misamu, mbo [. . .] bateka bampwana’awu.” Mu nzonzolo yakaka, bantu mbo baketi bâ na timuntu tia nzambi ya nza yi, nzambi yi balendi lembo kwikila. (2 Tim. 3:​1-4; 2 Kor. 4:4) Kâ, bu twena Bakristo, tuzebi ti tulendi tûla lukwikulu lweto lwalwansoni mu Yehova. Lukwikulu lwe neto ti beto kazololo, mpe kani kabwe ka yambirikaka ndiku zandi ko. (Mik. 9:10) Tulendi bâ mpe na lukwikulu mu Yezu Kristo mu bungu ti wahana luzingu lwandi mu bungu dia beto. (1 Pi. 3:18) Mpe mu misamu mi tabwabana na mio tayizi longoka ti tulendi sikirila Bibila mu bungu ti lutwalusu lwa mbote dihanaka.—2 Tim. 3:​16, 17. w22.09 2 par. 1-2

Nsayi ya matieleka ka yena kwa mwa nsayi ko yikwendaka mpe yikâlaka. Yilendi zingila luzingu lwa mukaka. Ngano bwe? Yezu wabangula wo mu tinzonzi tiandi tia ha zulu mongo. Yandi watâ: “Nsayi kwe bô babakulaka ti nsatu za timpeve ze nawu.” (Mat. 5:3) Yezu wazaba ti bantu babasala na nsatu ya zaba na ya sambila Mvangi’awu Yehova. Zo ni “nsatu zeto za timpeve.” Mu bungu ti Yehova “Nzambi ya nsayi yena,” bantu bamusambilaka bafweti bâ mpe mu nsayi. (1 Tim. 1:11) Ngano mu bâ na nsayi wufwanakane kwa ka tabândi na musamu? Kâni. Mu tinzonzi ti kasa, Yezu watâ ti “bô bata dila” mpe balendi bâ mu nsayi. Yezu watâ musamu wa mpila yo mu bungu dia ‘bô bata kwe kwamusu mu bungu dia misamu mia delalakana.’ (Mat. 5:​4, 10, 11) Yezu watulongesa ti nsayi ka yitûkaka mu luzingu lwa mbote ko, kâ bu tulungisaka nsatu zeto za timpeve, mpe bu tupusanaka kwe Nzambi.—Zaki 4:8. w22.10 6 par. 1-3

Lenda dia swasikisa mbo ditubakisa mu bakula ntangu yifwanane mu kuta na mu zonza. (Ekl. 3:7) Bikulu biakaka bitâka ti “Zonza kwena ntiana arza, mpe kuta kwena ntiana ore.” Mu ntelo yakaka, ntangu zakaka musamu wa mbote wubâka mu kuta. Tabongeno tifwani. Mpangi yimosi ye mukuluntu tûka ntama bavulu lombaka mu bakisa bimvuka biakaka mu misamu miawu mia mpasi. Mukuluntu wakaka mu zonzele mu mpila eyi: “Ntangu zazansoni keba katomo saka mu lembo zonzela nsangu za mansweki za bimvuka biakaka.” Lenda dia swasikisa dia mukuluntu wo diasa ti bakuluntu ba mu timvuka tiandi bamuzitisa. Lukwikulu lwe nawu ti ka zonzela misamu miawu mia mansweki ko. Bunsungu tifu tiakaka tiena ti fweti bâ neto tala ti tuzololo batukwikila. Mbo tukwikilaka muntu wa nsungu mu bungu ti tuzebi ti matieleka kwa wutâka.—Efz. 4:25; Ebr. 13:18. w22.09 12 par. 14-15

Bantu babingi basaka timfwa-makutu mu ntangu ‘ndwenga za matieleka zikawulaka mu nzila.’ (Bin. 1:20) Mu mabanza maBibila bikunku bitatu bie kô bia bantu bakalaka ndwenga: “bantu balembolo zaba misamu,” “bô baseheselaka bampwana’awu,” na “bizoba.” (Bin. 1:​22-25) “Bantu balembolo zaba misamu” ni bantu bakwikilaka misamu miamiansoni mi bawâka, mpe ka wena mpasi ko mu ba wubakasa. (Bin. 14:​15, note) Mu tifwani, banza’eti milio za bantu zi bawubakasaka kwe mfumu za mabundu peleko za politike. Bantu bakaka bafwemaka bu babakulaka ti huna kwa bayizi ba huna kwe mfumu zo. Kâ, bantu ba bazonzele mu Bingana 1:22 mu kondo kwa luzabu kwawubasolaka mu tatamana mu bungu ti ni bo bazoloko mu bêla. (Yer. 5:31) Ka bazololo’â ko mu longoka misamu mi tâka Bibila, peleko mu tumamana mitieno miandi. Ka tuzololo’â ko talanda tifwani tia bô basolaka mu lembo zaba misamu!—Bin. 1:32; 27:12. w22.10 19 par. 5-7

Organizasio ya Nzambi lutwalusu yituhanaka mu tu kengerela. Numéro za telefone zi tusarilaka bavulu tu bambulaka mu hana kwe bakuluntu ngatu batutâ mbila mu ntangu yi lendi tula musamu wa ta-pulukusu. Tulendi baka lutwalusu lutariri mbuka ya swamina ku tizunga tieto, mpila ya diokela, mpila ya bakila lubakusu peleko mpila na ntangu yi tulendi bakisa bantu bakaka. Tala ti ka tutumamane’â ko, tulendi tûla luzingu lweto na lwa bakaka mu mpasi. Bakuluntu beto bakengerelaka. (Ebr. 13:17) Mpangi zazingi zayizi yambirika nzo zawu mu bungu dia katastrofe, mizingu, peleko mu bungu dia vwandi dia bantu ba mpamba-mpamba zayizi sa miamiansoni mu yukunu na misamu mia môna mpe bayizi sala bwabwingi mu tisalu tia Yehova. Ntiana kwa Bakristo ba ntete bamwangana mu bungu dia nkwamusu, mpe batatamana mu samuna nsangu za mbote za Zu dia Nzambi. (Bis. 8:4) Tisalu tia samuna tiababakisa mu tûla mabanza mawu mu Timfumu kani batûla mo mu misamu mia mpasi mi beri bwabanaka na mio. Buna, bayizi lunda nsayi’awu na tidzunu tiawu. w22.12 19 par. 12-13

Muna muntu mu beto ntalu kena kwe Yehova. Ntete katambika ntumwa zandi ku tisalu tia samuna, Yezu wababakisa mu lembo bâ na bunkuta bwa bantu beri ba telamanaka. (Mat 10:​29-31) Wasila bo bu kabazonzela nuni yimosi ya zabakana ku Israele: Nswini. Nuni yo ka yeri’â nguria ntalu ko mu ntangu ya Yezu. Kâ, watêla milongoki miandi ti: ‘Ka kwena wumosi ko ha kati diawu wubwa ha mutoto tala ti Tata ka zebi’â ko.’ Yandi wavutu tâ: ‘Luyôkele nswini zazingi mu ntalu.’ Buna, Yezu wahana lukwikulu kwe milongoki miandi ti Yehova muna muntu mu bawu keri kipaka, mpe ka bafweti’â tîna mfietokoso ko. Kampe, milongoki mbo mieri bambukilaka misamu mia tâ Yezu, bu beri monaka nswini mu ntangu yi beri samunaka ku mimvuka na ku mahata. Ntangu zazansoni zi monaka nuni ya fioti, bambukaka ti Yehova nge mpe katomo kipaka, mu bungu ti “yôkele nswini zazingi mu ntalu.” Na lubakusu lwandi, lendi telamana nkwamusu na lukwikulu lwalwansoni w23.03 18 par. 12

Ntangu zakaka, mpasi tubwabanaka na zo—ntiana nkwamusu za kanda, peleko bu tuhombesaka tisalu. Bu tukorelaka mpasi tûka ntangu yayingi, tulendi kondo tivuvu mpe tulendi kwizi nôka. Satana bweso bo kasarilaka, na mu tu kokesa ntembe mu luzolo lwe na Yehova mu beto. Diabulu zololo ti ta tiyula tala ti ni Yehova peleko organizasio’andi yita tulumuna mpasi zeto. Musamu wa mpila yo waturila bala ba Israele ku Ezipte. Ku mbatukulu, bâba na kwikilaka ti Yehova watambika Mose na Arone mu ba kûla ku bungamba. (Ndu. 4:​29-31) Kâ, Farao bu kayizi yika mpasi mu luzingu lwawu, bayizi songela ti ni Mose na Arone bayizi tulumuna mpasi zawu. (Ndu. 5:​19, 20) Bakwikisila bisari bia Nzambi bia kwikama misamu. Ntia mpila tiari! Tala ti mpasi ta korela tûka ntama,ziburila Yehova mutima’aku mu lusambulu mpe kêla lubakusu lwandi. w22.11 15 par. 5-6

Yehova ni yandi hanaka luzingu mpe lenda die nandi dia vumbula bantu ba fwa. Wahana lenda kwe mbikuri Eliya dia vumbula mwana wa mufwiri wa zarefate. (1 Mit. 17:​21-23) Ha manima, na lubakusu lwa Nzambi, mbikuri Elize wavumbula mwana wa mukento wa Suneme kwe ba fwa. (2 Mit. 4:​18-20, 34-37) Mvumbukulu zo na zakaka zisongele ti Yehova lenda die nandi dia vumbula bantu kwe ba fwa. Ha mutoto Yezu wasongela ti Tata’andi wamuhana lenda dio. (Za 11:​23-25, 43, 44) Bwawu bu Yezu ku zulu kena, mpe wabaka ‘Timfumu tiatiansoni [. . .] ku zulu na ha nsi.’ Buna, lenda die nandi dia lungisa kani dia vumbula bantu bê mu mpiema za mbambukulu na tivuvu tia zinga mankululu.—Mat. 28:18; Za 5: 26-29. w22.12 5 par. 10

Bu bakala Ezekiele, ni Yehova wûna kwa mpe bakala. Misamu mie mu verse ya lumbu ti miayika lukwikulu lwa Ezekiele ti kala kô ka kweri’â zolo tâka ko ti tisalu tiandi tia mbikuri tia kalembana. Yehova wayika mpe lukwikulu lwa Ezekiele ti ntangu mfundusu zi kasamuna bu zilungana, kanda dia Israele mbo diaketi ‘zaba ti mbikuri ye ha kati diawu.’ (Ezk. 2:5; 33:33) Ntembe kâni, mabanza mo ma lutindusu mahana Ezekiele ngolo zeri nandi nsatu mu lungisa tisalu tiandi. Beto mpe butindi bwe neto mu bungu ti tuzebi ti Yehova tu tambikaka mu samuna. Beto kakembesaka bu katutâka “mbangi” zandi. (Iza. 43:10) Ntia mpila bweso bwa bunene! Ntiana kwa bu katâ kwe Ezekiele: ‘Kubatînandi,’ Yehova tu têlele mpe: ‘Ka luteketandi.’ (Ezk. 2:6) Mu bungu dia nti tufweti lembo tînina mbeni zeto? Ntiana Ezekiele, Yehova tu tambikaka, mpe lubakusu lwandi lwe neto.—Iza. 44:8. w22.11 3-4 par. 4-5

Lumbuti bakuluntu na bibakisi mu tisalu tutomo zoloko mu bungu ti bantu bakwikama bena. Diangana, mpangi zo za kwikama beto zitomo kipaka, mpe Yehova tutondaka mu bungu dia bawu! Kâ mu ntia mpila tulendi songela ti balendi tu kwikila? Mpangi zeto za tuzololo tiangu tudingaka mu zaba bwe bata hanina. Kâ, tufweti zitisaka misamu miawu mia mansweki. Bantu bakaka ba mu timvuka tia Bakristo tia mu mbandu ya ntete beri na lwaza, na mata-mata mpe beri kotaka misamu miangana. (1 Tim. 5:13) Ka tuzololo’â ko tabâ ntiana bawu. Kâ bwe tusa tala ti muntu tutêlele misamu mia mansweki mpe tulombele mu lembo mia zonzela? Mpangi ya yikento yilendi tu zonzela musamu wutariri tikolela tiandi peleko musamu wa mpasi wu kata bwabana na wo, mpe tu lombele mu lembo wazonzela. Tufweti zitisa ndombolo’andi. w22.09 10 par. 7-8

Ntelo ya Greke yi babangula mu “tomesa mbanzulu zaku,” yilendi vutu tâ “sa ti mbanzulu peleko mpeve’aku yabâ ya môna.” Ka wuzololo’â tâ ko ti tufweti sa kwa mwa nsobolo za mbote mu luzingu lweto. Kâ tufweti taluzula timuntu tieto tia kati, mpe tufweti sa nsobolo zifwanane ngatu tasarila ngolo zifwanane mu tomo delakasa luzingu lweto na mitieno mia Yehova. Ka tufweti’â bwa sa ko kwa mbala mosi, kâ ntangu zazansoni. Bu tukwizi bâ ba lunga, Yehova tu yangirika ntangu zazansoni bu tubâ na lenda dia mu ta nsayi mu misamu mi tuyirika. Kâ bwabu bu, tufweti tatamana mu sarila ngolo mu yangirika Yehova. Tataleno ntia tintwari Paulo kasa ha kati dia mbanzulu zeto na tifu tia bakula luzolo lwa Nzambi, ntiana bu bazonzelaka wo mu Bisi-Rome 12:2. Kani tazinga moko mpe tabika nza yi yatusobesa, tufweti toko titaluzula mu zaba tala ti mabanza ma Nzambi masobesaka makani meto na nzengolo zeto, kâ ka ma nza ko. w23.01 8-9 par. 3-4

Ngano Yehova misamu miamiansoni mia mbi milendi tu turila kakabakasaka? Ngano ni Yandi bâka ku manima ma misamu miamiansoni mituturilaka mu bungu ti kani die kô kazololo mu lungisa? Kâni, Bibila ka ditâka bo ko. (Ekl. 8:9; 9:11) Kâ, musamu ewu tuzebi: Bu tubwabanaka na musamu wa mpasi, Yehova wa kazabaka, mpe mbila zi tumutâka mu lomba lubakusu za kawâka. (Mik. 34: 15; Iza. 59: 1) Wuyôkele mfunu, Yehova lendi tu bakisa mu musamu wa mpasi mu mpila ya mbote. Mu bwe Yehova beto kabakisaka bu katuyikaka ngolo na bu katutindisaka, vula-vula mu ntangu yafwanakana. (2 Kor. 1:​3, 4) Ngano lendi bambuka ntangu Yehova yi kakubakisa bu kakuyika ngolo na bu kakutindisa mu ntangu yafwanakana? Vula-vula, ha manima ma musamu wa mpasi kwa tukwizi bakulaka bwe Yehova katubakisilaka mu korela musamu wo. w23.01 17-18 par. 13-15

Tibulu tio mbo tifwanakanaka fioti na tibulu tia sangi tie na mitu 7, kâ mbo tiswaswanaka na tibulu tio mu bungu dia langi’andi wa mbwaki ya ngolo. ‘Tifwani tia tibulu tia sangi’ batâka tio,mpe ntiana ‘mutinu wa 8’ bazonzelaka tio. (Nzabukusu 13:​14, 15; 17:​3, 8). Mu mutinu wo batâka ti watoko bâ, wazimbakana mpe wavutu kâla. Diangana mbangululu yo na ONU (Organisation des nations unies) yitomo delakanaka, yandi singasaka misamu mia politike mia nza yi! ONU kô yatoko bâ mu nkumbu ya SDN (Société des nations). Mpe yazimbakana mu ntangu ya Muzingu wa nzole wa wunene wa nza. Mpe ha manima yayizi zabakana mu nkumbu yi tumuzabiri lumbu ti. Bibulu bia sangi peleko guvernema bantu zitumaka mu telamana Yehova na kanda diandi. Musamu wo wena ntiana’eti mitinu mia mutoto wawansoni bakutakasaka mu bungu dia muzingu wa Armagedo, tie tilumbu tia tinene tia Nzambi we Nkwa-Ngolo-Zazansoni.—Nza. 16:​13, 14, 16. w22.05 10 par. 10-11

Mu ntangu Yezu Kayizi longoka mu tanga Matsonoko ma santu, ka yizi’â zaba kwa matieleka ko, kâ wayizi ma zolo, mpe wabika ti masobesa ndiatulu’andi. Mu tifwani, bambuka’eti musamu wayôka ku Tempelo Yezu bu keri na mvula 12. Milongi miatomo zaba Musiku wa Mose miayituku mu mayela ma Yezu na mvutu zandi.” (Like 2:​46, 47, 52) Beto mpe tulendi longoka mu zaba na mu zolo Zu dia Nzambi, bu tukwe dia tangi bilumbu biabiansoni. Tulendi baka malongi mu misamu mia tâ Yezu kwe bantu bazaba Musiku, mu kati na bitsoniki, Bafarize na Basaduseye. Mfumu zo za mabundu Matsonoko zeri vulu tangaka, kâ ka beri’â bakaka ndandu ko mu mio mi beri tangaka. Yezu wazonzela mpila zitatu za lembo sarila bantu bo ngatu babaka ndandu mu Matsonoko. Misamu mi kabatêla mbo mitubakisa mu tomesa lenda dieto 1) dia bakula mio mi tutangaka, 2) dia baka bimvwama bia timpeve 3) dia bika ti Zu dia Nzambi diatusobesa. w23.02 8-9 par. 2-3

Mu mitambu mi tufweti sila keba mwe na flirt, nwa malavu ma yôka, dia kwa yôka, nzonzolo yilwekesaka, porno, tifu tia talaka filme za miangu na misamu miakaka. (Mik. 101:3) Diabulu mpila zi kabebesela tindiku tieto na Yehova katatamanaka mu dinga. (1 Pi. 5:8) Tala ti ka tusiri’â keba ko, Satana lendi kotesa tifu tia dienokena, kondo kwa bunsungu, luwu lwa mbongo, diki, lumpampani na tifu tia tisemba mu mabanza meto na mu mutima’eto. (Nga. 5:​19-21) Tala ti ka tusiri’â keba mu katula misamu mio ko, milendi tatamana mukula na mu tukotesa mu mpasi. (Zaki 1:​14, 15) Mutambu wumosi wulembo zabakanaka ni bindiku bia mbi. Tufweti bambukaka ti bantu ba tusolaka mu yôkesa ntangu nawu, mu mpila ni mpila batusobesaka. (1 Kor. 15:33) Tamana sa keba mu beto beni, mbo tukala mu sa tindiku na bantu balembo sarilaka mitieno mia Yehova. (Like 21:34; 2 Kor. 6:15) Diangana, mbo tumona mutambu mpe ka tubwa mo ko. w23.02 16 par. 7; 17 par. 10-11

Luzolo lwaku mu Yehova lwayizi kula mu bungu ti wayizi longoka misamu miamingi mu Yandi. Buna, zololo wapusana kwe Yandi bwawu bu mpe mankululu. Diangana, bulendi bâ. Na nsayi yayansoni beto katindisaka mu yangirika mutima’andi. (Bin. 23:​15, 16) Lendi bwa sa mu nzonzolo na mu nsalulu. Mpila yi natina luzingu lwaku, mbo yisongela tala ti Yehova Yandi zololo peleko kâni. Dio ni kani diyôkele mfunu difweti bâ naku. Bwe lendi songela luzolo mu Yehova? Ntete, sa lusambulu lwa nzitukulu mu têla Nzambi ya yimosi ya matieleka ti kwe Yandi tiheni. (Mik. 40:8) Ha manima, zabikisa kani dio dia mansweki di wasiri kwe bantu babansoni, bu batusu. Bateme ntangu ya nsayi mpe ya mfunu yena mu luzingu. Luzingu lwa môna lukwizi bâ naku, ka lwa nge beni’â ko, kâ mu bungu dia Yehova zinga. (Rom. 14:8; 1 Pi. 4:​1, 2) Lendi mona ti nzengolo ya yinene yena, yee diangana ya yinene yena. Kâ, nzila yikuziburila ya bâ na luzingu luyôkele bubote. w23.03 5-6 par. 14-15