Septembre

Nzambi wahana Yezu ngolo kwe za yirika misamu mia bantu. Bu keri saka bimangu, Yezu wasongela ti lenda die nandi dia yirika misamu miamiansoni mi tulendi lembo yirika beto beni. Mu tifwani, lenda die nandi dia tu kûla mu musamu wa nguri watulumuna mpasi za bantu—masumu ma tabiarila na misendo miandi, bimbevo na lufwa. (Mat. 9:​1-6; Rom. 5:​12, 18, 19) Bimangu bi kasa biasongela ti lenda die nandi dia wasisa bimbevo bia mpila na mpila na dia vumbula bantu ba fwa. (Mat. 4:23; Za 11:​43, 44) Lenda mpe die nandi dia zabirila bitembo bia ngolo na dia nunga mpeve za mbi. (Mak. 4:​37-39; Like 8:2) Diangana, musamu wa mbote wena mu zaba ti Yehova wahana lenda dia mpila yo kwe Mwana’andi! Tulendi bâ na lukwikulu ti bima bia mbote bia tu kanisina Nzambi mu Timfumu tiandi mbo bilungana. Bimangu bia sa Yezu bu keri ha mutoto, mbo bizabikisaka misamu mi kayirika ha mutoto wa mukaka bu kena Mutinu wa Timfumu tia Nzambi. w23.04 3 par. 5-7

Tala ti mu timvuka tia tinene wena kampe mbo monaka ti ka bavulu’â ku solaka ko bu nangunaka koko, lendi kwizi banza mu lembo vutu nanguna koko. Kâ, kubikandi mu dinga mu hana mvutu. Kubika mvutu zazingi mu muna lukutakanu. Tala ti ka bakusolele’â ko mu hana mvutu ku mbatukulu ya ndongokolo, mbo bâ na bweso bwa hana mvutu bu kwe tatamane lukutakanu. Bu kubamaka mu bungu dia ndongokolo ya Nzo ya Zangama ya Munkengi, banza bwe mabanza ma muna paragrafe mata kwelana na mutu-diambu. Bu sila bo, ntembe kâni mbo bâ na mabanza ma zonzela mu timoko ti lusa. Musamu wakaka, lendi kubika mvutu mu paragrafe zizonzelaka matieleka ma ndilu me mpasi mu bangula. Mu bungu dia nti? Mu bungu ti kampe bantu ka babingi’â ko bananguna moko mu bitini bio. Kâ, nti lendi sa tala ti mweni ti tukutakanu twatwingi tuyôkele, mpe ka weka’eti bwa bweso ko bwa hana mvutu? Tela mpangi yitwarisa ntete lukutakanu lwabatika ti zololo wahana mvutu mu tiyuvu eti peleko eti. w23.04 21-22 par. 9-10

Yozefe mbo keri zoloko mu landa lutwalusu lwa Yehova, mpe musamu wo wasa ti kabâ mulumi wa nguria wa mbote. Mbala kampe tatu kabaka mitieno miatûka kwe Nzambi mu bungu dia kanda diandi. Mu mbala zo zazansoni, watomo tumama, ni bu sa ti wafwanakana kasa nsobolo zazingi. (Mat. 1:20; 2:​13-15, 19-21) Bu kalanda lutwalusu lwa Nzambi, Yozefe wakengerela Mariya, wamubakisa, mpe wakipa nsatu zandi. Banza’eti bwe nsalulu za Yozefe zasa ti luzolo na buzitu bwa Mariya mu yandi biakula! Milumi lulendi landa tifwani tia Yozefe bu ludinga malongi ma Bibila mu kipa makanda meno. Bu lusarilaka malongi mo, ni bu sa ti lufweti sa nsobolo, mbo lusongela luzolo kwe bakento beno, mpe mbo luyika longo lweno ngolo. Mpangi ya yikento ya ku Vanuatu, ye ya kwela tûka mvula yôka 20, têle: “Bakala diani bu kadingaka mpe bu kalandaka lutwalusu lwa Yehova, buzitu bwani mu yandi mbo butomo kulaka. Ka nibâka mu bunkuta ko, mpe mbo nibâka na lukwikulu mu nzengolo zandi.” w23.05 21 par. 5

Bayuda ba katûka ku Babilone bafweti bâ ba santu mu bungu dia Nzambi’awu. (Lub. 7:6) Kâ, ka wuta zolo tâ ko ti ka beri’â na nsatu ko, ya sa nsobolo mu yangirika Yehova. Bayuda babingi babuka ku Babilone, kampe bayukunu na mbanzulu, mpe na mitieno mia Bisi-Babilone. Bayuda ba ntete bu bakâla ku Israele ha manima ma mvula 69, guvernere Nehemi wayituku bu kamona ti bala babutukila ku Israele ka bazaba zu dia Bayuda ko. (Lub. 6:​6, 7; Neh. 13:​23, 24) Mu ntia mpila ntwenia zô zaketi longokela mu zolo na mu sarila Yehova tala ti ka beri’â bakulaka zu dia Hebre ko—dieri zu dia nguri di batsonekena Zu dia Nzambi? (Ezd. 10:​3, 44) Buna, wafwanakana ti Bayuda basa nsobolo za zinene, kâ mbo waketi bâ musamu wa fioti mu sa nsobolo zo ku Israele, yeri mbuka yi beri kârisaka nsambululu ya verela malembe-malembe.—Neh. 8:​8, 9. w23.05 15 par. 6-7

Diangana, ni bu sa ti nsatu ye neto ya lungisa kani peleko bunsungu tuta sarila, tulendi bwabana na misamu mia mpasi. Mu tifwani, misamu mi tulembo kekoloko milendi tu laba ntangu ye neto nsatu mu lungisa kani dieto. (Ekl. 9:11) Tulendi bwabana na musamu wutunôkesa peleko wutumanisa ngolo. (Bin. 24:10) Nitu’eto ya masumu yilendi sa ti tadiatila mu mpila yilembo tu bakisa mu lungisa makani meto. (Rom. 7:23) Peleko tulendi mona ti ba fwatika twena. (Mat. 26:43) Nti bilendi tu bakisa mu telamana musamu wa mpasi? Bambukaka ti bu bwabanaka na mpasi ka wuzololo’â tâ ko ti lembane misamu. Bibila mbo ditâka ti tulendi bwabana na misamu mia mpasi mbala zazingi. Kâ mbo ditutêlaka mpe ti tulendi vutu lungisa makani meto. Diangana mbo yangirikaka Yehova bu kamonaka ti tatamana ta tatamana mu sarila ngolo ngatu walungisa kani diaku! w23.05 30 par. 14-15

Tisalu tia mupasuri-nzila mbo tibakisaka ntwenia ya bakala mu zaba sala tisalu tia ngolo na bantu ba swaswana. Mbo timubakisaka mpe mu zaba bwe kasarila mbongo zandi. (Flp. 4:​11-13) Mpila ya mbote ya batika tisalu tia ntangu zazansoni ni mu bâ mupasuri-nzila wa ntangu fioti. Tisalu tia mupasuri-nzila tilendi zibula nzila mu bisalu biakaka bia ntangu zazansoni, mu kati na tisalu tia ntungulu peleko tia ku Betele. Bakristo ba babakala bafweti bâ na kani dia kubama mu bâ bakuluntu mu sarila mpangi zawu mu timvuka. Bibila ditêle ti babakala badingaka mu nata dema dio ‘tisalu tia mbote bata bindamana.’ (1 Tim. 3:1) Ntete, fweti Bâ wa kubama mu bâ tibakisi mu tisalu. Bibakisi mu tisalu mbo bibakisaka bakulunbtu mu mpila zazîngi za fwanana. Bakuluntu na bibakisi mu tisalu mbo basarilaka mpangi zawu na kuluka kwakwansoni, mpe mbo basalaka tisalu tia samuna na luhemo lwalwansoni. w23.12 28 par. 14-16

Mutinu Yoziase ntwenia yeri bu kabatika mu dinga Yehova. Mbo keri zoloko mu longoka misamu mitariri Yehova na mu sarila mio mi kazololo. Kâ, misamu ka mieri’â mia peta ko mu bungu dia mutinu wo wa ntwenia. Wafwanakana ti kasola mu sa nsambululu ya verela mu ntangu nsambululu ya bungungu yeri ya nguria ya bungula. Mpe ni bo kasila! Ntete Yoziase kalungisa mvula 20, wabatika mu katula nsambululu ya bungungu ku nsi ya mukaka. (2 Nta. 34:​1, 2) Ni bu sa ti wa nguria wa fioti wena, lendi bonga nzengolo ya landa tifwani tia Yoziase bu dinga Yehova na bu longoka mu zolo bifu biandi. Bu sila bo, mbo kwizi bâ na nsatu ya tihana kwe Yandi. Ngano bu tihana kwe Yandi bwe luzingu lwaku lukwizi sobela? Luke, wabatusu bu keri na mvula 14, têle: “Bwawu bu, mbo nitûla tisalu tia Yehova ha tibuka tia ntete mu luzingu lwani, mpe mbo nisarila ngolo mu mu tâ nsayi.” (Mak. 12:30) Diangana mbo baka nguria lusakumunu tala ti siri ntiana yandi! w23.09 11 par. 12-13

Mu ntangu ntumwa Paulo katsoneka mukanda kwe Bisi-Tesalonike, timvuka tia ku Tesalonike ka tiatilungisila mvula mosi ko. Kampe babakala beri na madema ka bazaba misamu miamingi ko mpe makuba mamingi batâ. Kâ, wafwanakana babazitisa. Mpasi ziyôkele bu zita kwe pusane, kampe mbo wufwanakana mu sikirila bakuluntu bê ku mbuka yi tubêlaka mu baka lutwalusu yôka bwawu bu. Tulendi lembo baka lutwalusu lwa Filiale na lwa siège mondial; buna, mfunu wena mu zolo na mu zitisa bakuluntu beto tûka bwawu bu. Musamu ni musamu wutula, talundeno bunsungu bweto, ka tutûlakandi mabanza meto mu makuba mawu, kâ mu Yehova mu nzila ya Kristo, yandi twarisaka babakala bo ba kwikama. Ntiana kwa mpu yeri kengerelaka mutu wa tinwani, tivuvu tieto tia mvukulu mbo tikengerelaka mbanzulu zeto. Tuzebi ti bima bi hanaka nza yi ka biena salu ko. (Flp. 3:8) Tivuvu tieto mbo titubakisaka mu tatamana mu bâ mu tidzunu na mu lembo bâ na mabanza yeko-yeko. w23.06 11-12 par. 11-12

Bô bawirikilaka ‘mukento wa tizoba’ bafweti sola: Ngano mbo batambula mbila’andi peleko kâni? Misamu miamingi mia mbote misaka ti tasa keba mu ndiatulu ya bunsuza. ‘Mukento wa tizoba’ mbo bamuzonzelaka ntiana muntu wuta tâ: ‘Mamba ma balabiri ma lembama mena.’ (Mik. 9:17) Ngano ‘mamba ma balabiri’ ni nti? Bibila mbo difwanakasaka nsayi ya vukasa kwa nitu kwa bantu bakwelana na mamba ma lembama. (Bin. 5:​15-18) Mukento na bakala balendi mona nsayi ya vukasa nitu mu mpila ya delakana mu makwela mawu. Kâ, ntia luswaswanu lwe ha kati dia ‘mamba ma balabiri.’ Musamu wo wulendi tarila bunsuza. Mu masweki wuvulu yôkelaka. ‘Mamba ma balabiri’ malendi bâ ma lembama tala ti bantu babenzi ti ka babazaba ko. Diangana nkatika bungungu bwena! Yehova miamiansoni kamonaka. Tala ti Yehova kata vutu tu tambula ko, wo ni musamu wuyôkele bubi wulendi tu turila, ka wena musamu wa nsayi ko.—1 Kor. 6:​9, 10. w23.06 22 par. 7-9

Ntisa, tala ti mweni ti tusambulu twaku ka tusiri’â na nkatika bunsungu ko peleko kusiri’â na nsayi yayingi ko mu sala tisalu tia samuna? Kubanzandi ti kusiri’â na mpeve ya Yehova ko. Mu bungu ti bantu ba masumu twena, mbanzulu zeto mbo zisobaka ntangu zakaka. Tala ti luhemo lwaku lubatikiri mu dimina dimbitila mu tifwani tia ntumwa Paulo. Ni bu sa ti mbo keri sarila ngolo mu landa tifwani tia Yezu, wazaba ti ntangu zakaka keri’â na ngolo zazingi ko mu sila bo. Mu mpila yakaka Paulo nzengolo kabonga ya sala tisalu tiandi ntono mbanzulu zandi zeri sobaka ntangu zakaka. Mpila mosi mpe, kubikandi mbanzulu zaku zasobesa nzengolo zaku. Bonga nzengola ya yirika misamu mia sungama ni bu sa ti kuta tomo zolo ko mu yirika mio. Ntangu bu yikwe yôke nsalulu zaku zifweti sobesa mbanzulu zaku mu mpila ya mbote.—1 Kor. 9:16. w24.03 11-12 par. 12-13

Tulendi songela luzolo kwe mpangi zeto bu tubakotesa mu liste ya ndiku zeto. (2 Kor. 6:​11-13) Babingi mu beto bê mu bimvuka bie na mpangi zatûka ku mbuka za swaswana, mpe bê na timuntu tia swaswana. Tulendi yika ngolo luzolo lweto mu muna muntu mu bawu, bu tukipa bifu biawu bia mbote. Bu tulongokaka mu mwina bantu bakaka ntiana bu ba mwinaka Yehova, mbo tusongelaka ti bawu tuzololo. Mbo wufwanakana ti tabâ na luzolo mu mpangi zeto mu ntangu ya mpasi ziyôkele. Ngano Yehova bwe katukengerela bu batika mpasi zo? Dimbitila mu mio mia lomba Yehova kwe kanda diandi bu bayizi dia kotela kwe Bisi-Babilone: ‘Yenda, kanda diani, kota mu chambre zaku za kati, kanga mielo miaku ku manima maku. Swama kwaku mwa ntangu, tii bu mana yôka mfukulu.’ (Iza. 26:20) Kampe misamu mio mbo mitutarilaka mpe, beto tubwabana na mpasi ziyôkele. w23.07 6-7 par. 14-16

Mu ndiatulu’eno, songeleno ti mabanza ma delakana me neno.” Tiyula: ‘Ngano bantu mbo babanzaka ti mabanza ma delakana me nani, mpe ka ndiena na yiribita ko? Peleko mbo bakumbongelaka ntiana muntu we na mabanza ma ngolo peleko we na tungu? Mbo niwirikilaka bampwana’ani, mpe mbo nitambulaka mbanzulu zawu tala ti zidelakane?’ Mpila yi tubêlaka na mabanza ma delakana mbo yisongelaka bwe tulandilaka tifwani tia Yehova na tia Yezu. Tufweti bâ na mabanza ma delakana bu sobaka misamu mu luzingu lweto. Nsobolo zo zilendi tu natina misamu mia mpasi mi talembo banza. Mu ta-pulukusu, tikolela tieto tilendi beba. Peleko tulendi bwabana na nsobolo za ta-pulukusu, zitariri lubaku lwa moko peleko misamu mia politike ku mbuka yi tubêlaka, zilendi tûla luzingu lweto mu mpasi. (Ekl. 9:11) Wulendi bâ mpe musamu wa mpasi bu batulombaka mu soba mpila peleko mbuka ya sarila tisalu tieto tia timpeve. Tulendi lenda mu yukunu mu misamu mia môna tala ti tusariri malongi ema ma mayà: 1) tambula mpila yeka misamu, 2) tûla mabanza mu bilumbu bia ku matu, 3) tûla mabanza mu misamu mia mbote, mpe 4) yirika misamu mu bungu dia bantu bakaka. w23.07 21-22 par. 7-8

Mbikuri Daniele ntwenia yeri mu ntangu Bisi-Babilone yi bamukanga ku muzingu, mpe bamunata mala na nsi’andi. Kâ, Daniele wayizi yitukusu bantu bamukanga. Bamona ti Daniele tipamu tia mbote tieri nandi mpe mu kanda dia zabakana katûka. (1 Sam. 16:7) Mu bungu dia misamu mio, Bisi-Babilone bamukubika ngatu kizi kabâ muntu wa mfunu ku hata diawu. (Dan. 1:​3, 4, 6) Yehova Daniele yandi keri zoloko, ka mu bungu dia tipamu tiandi’â ko, kâ mu bungu dia timuntu tia sola ntwenia yo. Yehova bu katâ ti Daniele weri ntiana Noa peleko Yobe, kampe mvula 20 kwa zeri nandi. Buna Yehova mbo keri monaka ti Daniele wa sungama weri ntiana Noa na Yobe bamusarila na kwikama kwakwansoni tûka mivu miamingi. (Mba. 5:32; 6:​9, 10; Yobe 42:​16, 17; Ezk. 14:14) Mpe Yehova watatamana mu zolo Daniele mu luzingu lwa lula mpe lwa nzitukulu lweri nandi.—Dan. 10:​11, 19. w23.08 2 par. 1-2

Bu tubongaka nzengolo ya tunga nzo, bima biabiansoni tutaluzulaka beto beni. Tulendi sila bo bu tutangaka na bu tulongokaka Bibila. Tala ti tengi mu ntinu-ntinu, misamu mia nguri kwa zaba—‘misamu mia mbatukulu mia Nzambi.’ (Ebr. 5:12) Kâ, kani wasila bo, kota mu “kati” mu taluzula misamu mia fioti fioti mia mfunu. Mpila yiyôkele bubote mu longoka Bibila ni mu tala bwe misamu mia swaswana mie mu kati mikwelanaka. Dinga mu bakula matieleka ma kwikilaka, kâ mpe mu bungu dia nti kwikilaka mo. Mu tomo bakula Zu dia Nzambi diadiansoni, tufweti longoka matieleka ma ndilu. Ntumwa Paulo watindisa mpangi zandi za Bakristo mu longoka Zu dia Nzambi na bunsungu, ngatu batomo ‘bakula bunene, bula, mu tela na ndilu ya matieleka.’ Ha manima mbo baketi ‘sikama’ mpe mbo baketi ‘kwikama’ mu timinu. (Efz. 3:​14-19) Ni bo tufweti sila. Tataleno bwe tulendi tomo longokela Zu dia Nzambi mu bakula nsasa’andi yayansoni. w23.10 18 par. 1-3

Mu Bibila bifwani biakaka bia bantu basarila luvivululu biabingi bie mô. Mbo wubâ musamu wa mbote tala ti dingiri mu longoka bifwani bia mpila yo? Mu tifwani, ni bu sa ti Davide bamutumba mu bâ mutinu wa Israele tûka bu keri wa fioti, wakêla mvula zazingi ntete kayôka ha timfumu. Simeyo na Ane mbo beri sarilaka Yehova na kwikama kwakwansoni, bu beri kêlaka mu mona Masiya. (Like 2:​25, 36-38) Bu kwe longoke bifwani bio, dinga mvutu mu biyuvu bita landa: Kampe nti biabakisa muntu wu mu sarila luvivululu? Ntia ndandu kabaka bu kavivirila? Bwe ndendi landila tifwani tiandi? Lendi baka mpe ndandu bu longoka bifwani bia bô balembo sarila luvivululu. (1 Sam. 13:​8-14) Lendi tiyula: ‘Kampe nti biasa ti ka basarilandi luvivululu? Ntia ndandu babaka mu kondo kwa luvivululu kwawu?’ w23.08 25 par. 15

Ntumwa Piere wa kwikama weri; ka kweri’â tima ko tiamukabakasa mu bika mu landa Yezu. Lumbu timosi wasongela kwikama kwandi mu ntangu Yezu yi katâ musamu wa lembo bakula milongoki miandi. (Za 6:68) Kani bakêla mpe badinga mbangululu, babingi babika mu landa Yezu. Kâ ka Piere’â ko. Na kwikama kwakwansoni watâ ti Yezu kwa weri ‘na misamu mia luzingu lwa mankululu.’ Yezu ka yambirika Piere ko. Mu mpimpa ya mansukina yi kayôkesa ha mutoto, Yezu wazaba ti Piere na bantumwa bakaka mbo baketi mu yambirika. Kâ, Yezu wasongela lukwikulu lwandi mu Piere ti mbo kaketi soba mabanza, mpe mbo kaketi tatamana mu bâ wa kwikama. (Like 22:​31, 32) Yezu wabakula ti ‘mpeve ngolo yena, kâ nitu nkwa bunôkena.’ (Mak. 14:38) Buna, ni bu sa ti Piere wakala Yezu ti ka mu zebi’â ko, Yezu ka yambirika ntumwa’andi ko. Bu kavumbuka kwe ba fwa, Yezu wamonekena Piere—kampe mu ntangu Piere yi keri yandi kaka. (Mak. 16:7; Like 24:34; 1 Kor. 15:5) Diangana musamu wo watindisa ntumwa Piere weri wa nôka! w23.09 22 par. 9-10

Nzambi mbo kalemvokelaka peleko mbo kazibikaka masumu ma bô bamusilaka timinu. Mbo katomo ba lemvokelaka mpe ka vutu’â kipaka masumu mawu ko. (Mik. 32:​1, 2) Mbo kababongelaka ntiana bantu balembolo zaba musamu mpe ba sungama mu nzila ya timinu tiawu. Ni bu sa ti babatâ bantu ba sungama, Abrahame, Davide, na bantu bakaka beri ba kwikama kwe Nzambi masumu kwa meri nawu. Kâ mu bungu dia timinu tiawu, Nzambi mbo kababongelaka ntiana bantu ba balembo landaka mambu, nsungula bô beri lembo mu sarilaka peleko ba lembo bâ na timinu mu Yandi. (Efz. 2:12) Ntiana bwa tâ wo ntumwa Paulo mu mukanda’andi, timinu mfunu tiena mu bâ na tindiku tia beto beni na Nzambi. Musamu wo wa matieleka weri mu bungu dia Abrahame na Davide, mpe wa matieleka wena mu bungu dia beto. w23.12 3 par. 6-7

Lumbu ti Bakristo babansoni bweso bwe nawu bwa hana mikayulu kwe Yehova bu basarila ntangu’awu, ngolo zawu, na bima biawu bia ntalu mu yika moko Timfumu tia Nzambi. Tulendi songela ti mbo tutondaka bweso bweto bwa sarila Yehova bu tumuhana mikayulu mia ntalu. Ntumwa Paulo wazonzela bima bi tufweti sa ntangu zazansoni bu tusarilaka Yehova. (Ebr. 10:​22-25) Tufweti pusana kwe Yehova mu lusambulu, tufweti samuna kwe bantu bakaka, tufweti kwendaka ku tukutakanu twa timvuka, na mu kwe titindisi beto na beto bu tuta kwe mone tilumbu tia Yehova tita pusana. Ku nsuka ya mukanda wa Nzabukusu, mbazi ya Yehova mbala zole yitâka musamu ewu: ‘Sambila Nzambi!’ (Nza. 19:10; 22:9) Diangana, kani kabwe ka tuzimbakanandi matieleka ma ma timpeve ma ndilu matriri Tempelo ya timpeve ya Yehova, mpe na bweso bwa ntalu bwe neto bwa sarila Nzambi’eto ya yinene! w23.10 29 par. 17-18

Kâ, mfunu wena kwe beto mu bambuka ti Yezu walwengesa ti ‘luzolo mbo luwola kwe pôka dia bantu.’ (Mat. 24:12) Yezu keri’â zolo tâka ko ti milongoki miandi mbo miaketi bika mu songasana luzolo. Kâ, tufweti saka keba ngatu bantu ba nza bakondoko luzolo ka batusobesandi. Na mabanza mo mu mutu, tataluzuleno tiyuvu eti tia mfunu: Ngano nti bikubakisa mu zaba tala ti luzolo lwaku mu mpangi zeto ngolo lwena? Mpila yimosi ya deza ngolo za luzolo lweto ni mu tala bwe tusaka bu tulaka misamu miakaka mia luzingu. (2 Kor. 8:8) Ntumwa Piere wazonzela musamu wumosi. Watâ: ‘Mu miamiansoni, vulueno tatamana mu luzolo [lwa ngolo] beno na beno, mu bungu ti luzolo pôka dia masumu lukusunaka.’ (1 Pi. 4:8) Buna makuba na masumu ma mpangi zeto malendi kotesa luzolo lweto mu ntontolo. w23.11 10-11 par. 12-13

Ka tulendi’â tatumamana ntumunu ya Yezu ko yitariri luzolo, tala ti mu timvuka bantu bê kô tusongelaka luzolo kâ bakaka kâni. Wa matieleka, tulendi bâ nguria penepene na mpangi zakaka, ntiana bwa sa Yezu. (Za 13:23; 20:2) Kâ, ntumwa Piere tu bamburi ti tufweti sarila ngolo mu zolo mpangi zeto zazansoni mu bungu ti mu kanda dieto bena. (1 Pi. 2:17) Piere watutindisa mu bâ na luzolo lwa ngolo beto na beto mu mutima. (1 Pi. 1:22) Mu verse yo, bâ na luzolo lwa “ngolo” mbo wuzolo tâka zolo muntu ni bu sa ti musamu wa mpasi wena mu mu songela luzolo. Mu tifwani, nti tulendi sa tala ti mpangi yitulwekese peleko yitufwemese? Mabanza ma ntete malendi kwiza ni mu sa ntiana bu kasiri kani tasongela luzolo. Kâ, Piere walongoka kwe Yezu ti tifu tia karisa mbi mu mbi ka titâka Nzambi nsayi ko. (Za 18:​10, 11) Piere watsoneka: ‘Ka luvutulandi mbi mu mbi, peleko tituku mu bituku. Kâ yendeno ba sakumuni.’ (1 Pi. 3:9) Bika luzolo lwa ngolo lwakutuma mu bâ na nsayi na mu kipaka bampwana’aku. w23.09 28-29 par. 9-11

Mbo tuyitukuku bu tumonaka bwe mwana wukulaka. Mbo wumonekenaka ntiana’eti mwana bu wukulaka, ka kudinganaka ngolo zazingi ko ngatu wakula. Kâ, mu kwizi bâ Mukristo wa yela, tufweti sarila ngolo zazingi. (1 Kor. 13:11; Ebr. 6:1) Mu lungisa kani dio, tufweti bâ na tindiku tia ngolo tia beto beni na Yehova. Tufweti bâ mpe na mpeve santu’andi yitubakisa mu kurisa bifu bia timpeve, mu tomesa lenda dieto, na mu kubama mu nata madema ku matu. (Bin. 1:5) Yehova wasala muntu wa mukento na wa bakala. (Mba. 1:27) Diangana, bakento na babakala ba swaswana bena mu tipamu, kâ ba swaswana mpe bena mu misamu miakaka. Mu tifwani, Yehova wasala babakala na bakento ngatu banata madema ma swaswana, buna bafweti bâ na bifu mpe na lenda dibabakisa mu nata madema mawu. w23.12 18 par. 1-2

Ngano Yezu wazolo ti basarila nkumbu ya Tata’andi? Yee. Kampe mfumu za mabundu zakaka zabanza ti kondo kwa buzitu bweri mu sarila nkumbu ya Nzambi, kâ Yezu ka bika ko ti bikulu bio bieri lembo sikamanaka mu Bibila biamukabakasa mu kembela nkumbu ya Tata’andi. Tataluzeleno ntangu yi kawasisa muntu wumosi weri mu lutumu lwa bademo ku tizunga tia Bisi-Gereza. Bantu bayizi bâ mu bunkuta mpe balomba Yezu ti kenda kwandi, buna ka vutu’â tatamana ko mu bâ ku tizunga tio. (Mak. 5:​16, 17) Kâ, Yezu wazolo ti nkumbu ya Yehova yazabakana ku tizunga tio. Buna, walomba kwe muntu wu kawasisa mu tâ kwe bantu mio mia yirika Yehova, kani kazonzela mio mia yirika Yezu. (Mak. 5:19) Lumbu ti mpe musamu ni wo kazololo—tazabikisa nkumbu ya Tata’andi mu nza ya mukaka! (Mat. 24:14; 28: 20) Bu tusilaka bo, mutinu’eto, Yezu tutâka nsayi. w24.02 10 par. 10

Diangana nguria lusakumunu lwena bu twena mu organizasio ya Yehova mu ntangu yi ya mansukina ya mpasi. Luzingu mu nza yi lweka lwa nguria lwa mpasi, kâ Yehova tu heni bampangi mu tu bakisa. (Mik. 133:1) Mbo katubakisaka mu bâ na luzingu lwa nsayi mu kanda. (Efz. 5:33–6:1) Mpe mbo katuhanaka ndwenga ze neto nsatu mu telamana lwaka lweto na mu bâ mu nsayi. Kâ, tufweti sarila ngolo mu tatamana mu sarila Yehova na kwikama kwakwansoni. Mu bungu dia nti? Mu bungu ti tulendi fwema mu bungu dia misamu mi tâka peleko mi yirikaka bantu bakaka. Tulendi nôka mpe bu tusaka fote, nsungula bu tuvulu kârilaka fote yo mbala zazingi. Tufweti tatamana mu sarila Yehova 1) mpangi bu yitufwemesaka, 2) muntu wu takwelana bu wutuniongesaka, mpe 3) bu tunôkaka mu bungu dia fote zeto. w24.03 14 par. 1-2

Ntangu zakaka, mbo kwizi wâ binsamu bia bampangi babonga nzengolo ya kurisa tisalu tiawu mu Yehova. Kampe Lukolo lwa bisamuni bia Timfumu basa peleko bayenda ku mbuka yeri dinganaka bisamuni. Tala ti kani dia mpila yo die naku sa miamiansoni mi lenda mu lungisa dio. Dinga mpila zi sarila bwabwingi mu bungu dia Yandi. (Bis. 16:9) Ngano nti bilendi yilama tala ti wena na lenda dia sila bo ko bwawu bu? Kubanzandi ti bantu balenda mu sila bo bakuyôkele. Musamu wuyôkele mfunu ni wena’eti tufweti tatamana mu korela. (Mat. 10:22) Kunioniandi mfunu ya sarila Yehova mpila mosi na lenda mpe na misamu mie naku. Mpila ya mfunu yena mu tatamana mu landa Yezu ha manima ma bateme.—Mik. 26:1. w24.03 10 par. 11

Tata’eto dia ku mazulu watukanisina ti mbo katulemvokela tala ti tusobele mabanza. (Mik. 86:5) Buna tala ti tatomo nionga mu masumu ma tayirika, tulendi kwikila misamu mia tâ Yehova—watulemvokela. Bambuka ti Yehova kena ni kekete ko, mabanza ma delakana me nandi. Kani kabwe, ka tulombaka ko mu yirika misamu mi tulembo lenda. Mbo kayangalalaka mu miamiansoni mi tuyirikaka mu bungu dia Yandi tala ti mu ngolo zeto zazanzoni tusilaka bo. Dimbitila mpe mu bifwani bia Bibila bia bantu basarila Yehova mu tilundi tiawu tiatiansoni. Lendi bonga tifwani tia ntumwa Paulo. Wasala na luhemo lwalwansoni tûka mvula zazingi, wasa nzietolo mu bitini bia bila, mpe wakubika bimvuka biabingi. Kâ, misamu bu miayizi mu kabakasa mu tomo sala tisalu tia samuna, ngano Nzambi keri’â vutu mu tambulaka ko? Kâni. Watamamana mu sa mio mi keri na mio lenda, mpe Yehova wamusakumuna. (Bis. 28:​30, 31) Mpila mosi mpe, ntangu zakaka bima bi twe na bio lenda mu hana kwe Yehova bilendi soba. Kâ Yandi ti katalaka ni mu bungu dia nti tusilaka bo. w24.03 27 par. 7, 9

Mu tusambulu twa yandi beni kwe Yehova, Yezu wasongela tifwani ti fweti landa milongoki miandi. Mu tisalu tiandi ha mutoto, Yezu mbo keri vulu sambilaka. Wafwanakana kasârisa ntangu ya sambila, mu bungu ti bisalu biabingi keri salaka mpe bantu babingi beri mu zungirilaka. (Mak. 6:​31, 45, 46) Nkatika pari keri vumbukaka mu bâ na ntangu ya sambila ha yandi kaka. Lumbu timosi, wasambila mpimpa ya mukaka ntete kabonga nzengolo ya mfunu. (Like 6:​12, 13) Mpe Yezu mbala zazingi kasambila mu mpimpa ntete lufwa lwandi bu katûla mabanza mandi mamansoni mu dema diandi dia mansukina ha mutoto dieri nguria mpasi mu lungisa. (Mat. 26:​39, 42, 44) Tifwani tia Yezu mbo titulongesaka ti ni bu sa ti bisalu biabingi bie neto, tufweti sârisa ntangu ya sambila. Ntiana Yezu, tulendi sârisa ntangu ya sambila—bu tuvumbuka mu nkatika pari peleko mu mpimpa. Bu tusila bo, mbo tusongela kwe Yehova ti mbo tutondaka mu kabu dio dia nzitukulu. w23.05 3 par. 4-5

Tala ntelo ya ‘lwahombolo’ Mu verse ye ha mbatukulu. Buku dimosi dibangulaka ntêlo za Bibila ditâka ti “mbo lutukwizilaka ntiana nto.” Diangana, tifwani tio ngolo tiena mu songela luzolo lwalwîngi lwe na Yehova mu bantu ba tumbu! Bantu ba tumbu bazebi ti Nzambi bawu kazololo. (Yude 1) Ntumwa Za wazonzela mbanzulu za Bakristo ba tumbu bu katsoneka: ‘Taleno ntia luzolo Tata katuzololo: batutêle bala ba Nzambi.’ (1 Za 3:1) Ngano luzolo lwa Yehova kwe Bakristo ba tumbu kwa lusukisinaka? Kâni, Yehova wasongela luzolo lwandi kwe beto bansoni. Mu ntia musamu wuyôkele bunene Yehova katomo songela luzolo lwandi? Nkûlulu—yo ni mpila ya nguria ya nzitukulu ya songela luzolo mu nza!—Za 3:16; Rom. 5:8. w24.01 28 par. 9-10

Verse yi batuheni mpila yizabikisaka Davide yi kanungina bunkuta bwandi. Ni bu sa ti ntangu zazansoni luzingu lwandi mu mpasi lweri, mbo keri dimbitilaka mu mio Yehova mi keri vutu yirikaka mu yandi. Davide wazaba ti Yehova mbo kaketi mu vûkisa mu ntangu ya fwanana. Kâ, Yehova watâ ti Davide mbo kabâ mutinu ku Israele. (1 Sam. 16:​1, 13) Miamiansoni mia kanisina Yehova kwe Davide mialungana. Ngano Yehova nti kakanisina mu sa mu bungu dia nge? Ka tukêlaka ko ti katukengerela mu misamu miamiansoni. Kâ, mpasi ni mpasi zi bwabana na zo mu nza yi, Yehova mbo kakatula zo mu nza yikwiza. (Iza. 25:​7-9) Mu bungu ti Mvangi’eto ngolo zazingi ze nandi mu vumbula bantu ba fwa, mu tu wasisa na mu honda bantu bamutelamanaka.—1 Za 4:4. w24.01 6 par. 12-13

Banzaka nti biakutuma mu tihana kwe Yehova na mu batusu. Wayizi bonga nzengolo yo ngatu wabâ ku lweka lwa Yehova. Bambuka nti biakuhana lukwikulu ti matieleka wabaka. Wayizi bâ na luzabu lwa matieleka mu Yehova mpe wayizi longoka mu mu zolo ntiana Tata’aku dia ku mazulu. Wayizi bâ na timinu mpe wayizi soba mabanza. Mutima’aku wayizi ku tuma mu bika nsalulu za mbi na mu diatila mu luzolo lwa Nzambi. Wabâ mu nsayi bu wabakula ti Nzambi wakulemvokela. (Mik. 32:2) Wabatika mu kwendaka ku tukutakanu na mu samunaka misamu mia mbote mi wayizi longoka. Bwawu bu, bu wena Mukristo watihana kwe Nzambi mpe wa batusu, mu nzila ya luzingu ta diatilaka, mpe nzengolo bongele mu lembo ya hombesa. (Mat. 7:​13, 14) Buna, bika watatatamana mu bâ wa kangama, mu zolo Yehova na mu tumamana ntumunu zandi. w23.07 17 par. 14; 19 par. 19

Bu banza lusambulu lwaku lu wasa mu tihana kwe Yehova, mbo baka ngolo za telamana ntontolo zazansoni. Mu tifwani, ngano mbo batika mu sa flirter na mukento peleko na bakala dia muntu wakaka? Kampe kâni! Mu bungu ti wakanisina kwe Yehova ti kulendi’â wayirika musamu wa mpila yo ko. Buna, tala ti kubikiri’â ko ti mbanzulu za mbi zakula mu nge, ha manima kubâ na nsatu ko ya nwana mu katula zo. ‘Ku landa nzila ya minsa-mbi’ ko.” (Bin. 4:​14, 15) Tifu tia dimbitilaka mu tifwani tia Yezu mbo titubakisa. Yandi wabonga nzengolo ya tâ Tata’andi nsayi, ntiana yandi beto mpe tufweti bonga nzengolo ya tâka Nzambi yi tahana luzingu lweto nsayi. (Mat. 4:10; Za 8:29) Mpasi na ntontolo mbo zikuhana bweso bwa songela ti nge nzengolo wabongele ya tatamana mu landa Yezu. Bu sila bo mbo bâ na lukwikulu ti Yehova mbo kakubakisa. w24.03 9-10 par. 8-10