Ngano Yehova mbo kahanina tusambulu twani mvutu?

1-2. Mu bungu dia nti tulendi banza ti Yehova kata hanina tusambulu tweto mvutu ko?

“TOMO yangalala mu Yehova, mpe mbo kalungisa nsatu za mutima’aku.” (Mik. 37:​4, NWT) Diangana kani dio dia nzitukulu diena! Kâ ngano tufweti kekolo ti Yehova katuhana bima biabiansoni bi tumulombaka buna kwa bu tumulombaka bio? Mu bungu dia nti tuta yula tiyuvu tio? Tazonzela bifwani ebi. Mpangi ya yikento yilembolo ya kwela yita sambila ngatu bamutikisa ku Lukolo lwa bisamuni bia Timfumu (EER). Kâ mvula zazingi ziyôkele mpe ka ta baka mbila ko. Mpangi ya yibakala ya ntwenia yilombele Yehova kamuwasisa ngatu kabâ na lenda diadingi dia mu sarila mu timvuka. Kâ tikolela tiandi ka tita toma ko. Bibuti bie Bakristo bisambiri mu bungu dia mwana’awu ngatu watatamana mu bâ mu matieleka. Kâ, mwana’awu bongele nzengolo ya bika mu sarila Yehova.

² Kampe nge mpe tima walombele kwe Yehova, kâ ka weka’eti tia baka ko. Buna, lendi kwizi bâ na mabanza ti Yehova tusambulu twa bantu bakaka kawâka, ka twa nge’â ko. Peleko lendi banza ti musamu wa mbi wayirikiri. Mpangi ya yikento ye na nkumbu Janiceb mabanza ni mo meri nandi. Yandi na bakala diandi bayizi sambila mu bungu dia nsatu’awu ya sala ku Betele. Têle ti: “Lukwikulu lweri nani ti ka taketi’â zingila ko mu batika mu sala ku Betele.” Kâ, bakêla ngonda na mivu, ka babatâ mbila ko. Janice têle: “Mu tiari ndieri, mpe mabanza yeko-yeko meri nani. Natiyula ka nti nasa bianiongesa Yehova. Nasambila bwabwingi mu zonzela nsatu’eto ya kwenda ku Betele. Mu bungu dia nti Yehova kalembo hanina mvutu mu tusambulu twani?”

3. Nti tuzonzela mu timoko ti?

³ Ntangu zakaka, tulendi tiyula tala ti Yehova tusambulu tweto twa kawâka. Bisari bia Yehova bia ntama mpe lwaka lo lweri nawu. (Yobe 30:20; Mik. 22:2; Hab. 1:2) Nti bilendi ku hana lukwikulu ti Yehova mbo kahanina mvutu mu tusambulu twaku? (Mik. 65:2) Mu bakila tiyuvu tio mvutu, tufweti toko hanina mvutu mu biyuvu ebi: 1) Nti tulendi kêla kwe Yehova? 2) Ngano Yehova nti kakêlaka kwe beto? 3) Mu bungu dia nti wulendi bâ mfunu mu delakasa ndombolo zeto?

NTI TULENDI KÊLA KWE YEHOVA?

4. Tintwari na Yeremi 29:​12, Yehova nti kakanisina mu sa?

⁴ Yehova wakanisina ti mbo kawirikila tusambulu tweto. (Tanga Yeremi 29:12.) Nzambi’eto bisari biandi bia kwikama bia kazololo, buna ntangu zazansoni mbo kakipaka tusambulu twawu. (Mik. 10:17; 37:28) Kâ, ka wuzololo’â tâ ko ti mbo katuhana bima biabiansoni bi tumulombaka. Tulendi kêla mpe nza ya môna ntete tabaka mvutu mu tima ti tulombaka.

5. Ngano Yehova nti katalaka bu kawirikilaka tusambulu tweto? Bangula.

⁵ Yehova kani dibâka nandi bu kawirikilaka tusambulu tweto. (Iza. 55:​8, 9) Mu kani diango mwe na kani dia fulusa mutoto mu bakento na babakala babâ mu nsayi mpe na bumosi mu luyalu lwandi. Kâ, Satana mbo katâka ti bantu mbo babâ na luzingu lwa mbote tala ti batitwarisi bawu beni. (Mba. 3:​1-5) Mu songela ti Satana ngungu yena, Yehova wabika bantu batitwarisa bawu beni. Kâ, luyalu lwa bantu lwatulumuna misamu miamingi mia mpasi mi tubwabanaka na mio lumbu ti. (Ekl. 8:9) Mbo tubakulaka ti Yehova ka yirika misamu mio miamiansoni ko bwawu bu. Tala ti sariri bo, bantu bakaka balendi banza ti luyalu lwa bantu lwa mbote lwena, mpe lulendi yirika misamu mieto.

6. Mu bungu dia nti tufweti bêla na lukwikulu ti ntangu zazansoni Yehova mbo kayirika misamu mu luzolo na mu buderede?

⁶ Yehova lendi hana mvutu za swaswana mu misamu midelakane. Mu tifwani, mutinu Ezekiase bu keri na timbevo tia nguria tia ngolo, walemberela Yehova ngatu kamuwasisa. Buna, Yehova wamuwasisa. (2 Mit. 20:​1-6) Ku lweka lwakaka, ntumwa Paulo bu kalomba Yehova kamukatula ‘lusende’ lweri nandi mu nitu, kampe timbevo tieri, Yehova ka yirika musamu wo ko. (2 Kor. 12:​7-9) Tabongeno mpe tifwani tia ntumwa Zaki na ntumwa Piere. Ba bole, mutinu Erode wabakanikina lufwa. Timvuka tiasambila mu bungu dia Piere, ntembe kâni na mu bungu dia Zaki mpe. Zaki bamuhonda, kâ Piere mbazi yamuvukisa. (Bis. 12:​1-11) Tulendi tiyula: ‘Mu bungu dia nti Yehova kavukisa Piere, kâ kabikila Zaki?’ Bibila ka ditâka wo ko.c Musamu wu tulendi bêla na lukwikulu ni wena’eti nsalulu za Yehova ka zikondoko’â buderede ko. (Lub. 32:4) Mpe tuzebi ti Piere na Zaki Yehova bawu keri tambulaka. (Nza. 21:14) Ntangu zakaka, tulendi baka mvutu yi tuta lembo kêla. Kâ mu bungu ti lukwikulu lwe neto ti Yehova mbo kahanina mvutu mu tusambulu tweto mu luzolo na mu buderede, ka tufweti’â taniongenaka mpila yi kasolaka ko mu tu hana mvutu.—Yobe 33:13.

7. Ntia musamu tusarilaka ngolo mu lembo sa, mpe mu bungu dia nti?

⁷ Mbo tusarilaka ngolo mu lembo fwanakasa misamu mieto na mia bantu bakaka. Mu tifwani, tulendi lomba Yehova katubakisa mu musamu wu tutomono mu zonzela, kâ ka tubakiri’â mvutu ya musamu wu tusambiriri ko. Ha manima, twizi wâ ti muntu wakaka wasa ndombolo ya mpila yo, kâ ntiana’eti Yehova wamuheni mvutu. Mpangi ya yikento ye na nkumbu Anna musamu ni wo kamona. Wasambila ngatu kansere ya bakala diandi, Matthew, yawasa. Mpe mu ntangu yo kwa, mpangi zole za zikento za nuna zeri na kansere. Anna wasambila bwabwingi mu bungu dia Matthew na mpangi zo. Mpangi za zikento zawasa, kâ Matthew wafwa. Ntete-ntete, Anna wadinga mu zaba tala ti mpangi zo wasa zawasa ni mu bungu ti Yehova wababakisa. Mpe tala ti ni bo, mu bungu dia nti kalembo wîla tusambulu twandi mu bungu dia bakala diandi? Wa matieleka, ka tuzebi’â ko ka mu bwe mpangi za zikento zawasila. Musamu wu tuzebi ni ewu: Yehova mpila ye nandi yi kakaturila mpasi zeto zazansoni mankululu, mpe timina die nandi dia vumbula ndiku zandi zafwa.—Yobe 14:15.

8. a) Tintwari na Izaya 43:​2, bwe Yehova katubakisilaka? b) Bwe lusambulu lulendi tu bakisila bu tubwabanaka na misamu mia mpasi? (Tala video Lusambulu mbo lutubakisaka mu korela mu ntangu ya mpasi.)

⁸ Ntangu zazansoni Yehova mbo katubakisa. Bu kena Tata’eto dia luzolo, Yehova kazololo’â ko ti tamonaka mpasi. (Iza. 63:9) Kâ, ka kabakasaka mpasi zazansoni ko zilendi tu turila, zi balendi fwanakasa na nzari peleko na tiya. (Tanga Izaya 43:2.) Watukanisina mu tu bakisa ngatu talenda mu telamana zo. Mpe ka bika ko ti mpasi zeto zatunimba mankululu. Yehova mbo katuhanaka mpe mpeve santu mu tu bakisa mu korela. (Like 11:13; Flp. 4:13) Buna, tulendi bâ na lukwikulu ti ntangu zazansoni mbo tubâ na bima bifwanane bitubakisa mu korela na mu tatamana mu bâ ba kwikama kwe Yehova.d

NGANO YEHOVA NTI KAKÊLAKA KWE BETO?

9. Tintwari na Zaki 1:​6, 7, mu bungu dia nti tufweti bêla na lukwikulu ti Yehova mbo katubakisa?

⁹ Yehova mbo kakêlaka ti tamukwikila. (Ebr. 11:6) Ntangu zakaka, mpasi zeto zilendi bâ nguria mpasi mu korela. Tulendi kwizi bâ na ntembe tala ti Yehova mbo katubakisa. Kâ Bibila mbo dituhanaka lukwikulu ti mu ngolo za Nzambi tulendi ‘yomboka bikaku.’ (Mik. 18:29) Buna, kani tabâ na ntembe, tufweti sambilaka na timinu tiatingi, bu tukwikila ti Yehova mbo kahanina mvutu mu tusambulu tweto.—Tanga Zaki 1:​6, 7.

10. Hana tifwani tita songela mpila yi tulendi sarila tintwari na tusambulu tweto.

¹⁰ Yehova mbo kakêlaka ti tasala tintwari na tusambulu tweto. Mu tifwani, mpangi yilendi lomba kwe Yehova mu mu bakisa ngatu bamuhana nzila ku tisalu tiandi mu bâ ku lukutakanu lwa lunene. Bwe Yehova kalendi hanina mvutu mu lusambulu lo? Lendi hana mpangi yo butindi bwa monekena mfumu’andi. Kâ, mbo wufwanakana ti mpangi yo kenda kwe mfumu’andi mu zonzela musamu’andi. Wulendi fwanakana ti kasa ndombolo yo mbala zazingi. Lendi lomba mu yingasa mpwana’andi ya tisalu tilumbu tiakaka. Mpe tala ti wufwanakane, lendi bonga congé yi balembo mu futa.

11. Mu bungu dia nti tufweti sambilaka mbala zazingi mu bungu dia misamu mieto?

¹¹ Yehova mbo kakêlaka ti tasambirila lwaka lweto mbala zazingi. (1 Tes. 5:17) Yezu watuzabikisa ti ndombolo zeto zakaka ka balungisa zo ko ho nkatika bendo. (Like 11:9) Buna kubikandi! Sambila mbala zazingi na bunsungu bwabwansoni. (Like 18:​1-7) Bu tutatamana mu sambirila musamu, mbo tusongela kwe Yehova ti musamu wu tuta mu lomba ka yena kwa nsatu ya mpamba-mpamba ko. Mbo tusongela mpe timinu tieto mu lenda die nandi dia tu bakisa.

MU BUNGU DIA NTI WULENDI BÂ MFUNU MU DELAKASA NDOMBOLO ZETO?

12. a) Ngano tiyuvu timosi ti tufweti tiyula mu bungu dia ndombolo zeto ni tie, mpe mu bungu dia nti? b) Bwe tulendi sa ngatu tusambulu tweto twasongela ti Yehova tuzitisaka? (Tala kaku “Ngano ndombolo zani mbo zizitisaka Yehova?”)

¹² Tala ti ka tubakiri’â mvutu mu lusambulu lweto ko, tulendi tiyula biyuvu bitatu. Tiyuvu tia ntete titêle: ‘Ngano tima ti nita sambirila ni tio tie nani nsatu?’ Vula-vula, mbo tubanzaka ti bima bitufwanane bia tuzebi. Kâ, bima bi tulombaka bilendi lembo bâ neto salu ku matu. Tala ti musamu tuta sambirila, kulendi bâ mvutu yakaka yiyôkele yo yi tuta kekolo. Mpe bima biakaka bi tulombaka bilendi lembo kwelana na luzolo lwa Yehova. (1 Za 5:14) Tabongeno tifwani tia bibuti bi tuzonzele ku mbatukulu. Balombele kwe Yehova mu sa ti mwana’awu watatamana mu maiteleka. Tulendi banza ti ndombolo yo ya delakana yena. Kâ, Yehova ka tumaka bantu mu ngolo ko mu mu sarila. Zololo ti beto bansoni, mu kati na bala, tasola mu mu sarila. (Lub. 10:​12, 13; 30:​19, 20) Buna, kani basa lusambulu lwa mpila yo, bibuti bilendi lomba kwe Yehova mu ba bakisa ngatu balenda mu simba mutima wa mwana’awu ngatu kizi kazolo Yehova, mpe kabâ ndiku’andi.—Bin. 22:6; Efz. 6:4.

13. Tintwari na Bahebre 4:​16, ntia ntangu Yehova katubakisa? Bangula.

¹³ Tiyuvu tia nzole ni eti: ‘Ngano yi ni ntangu yifwanane kwe Yehova mu lungisa ndombolo’ani?’ Tulendi banza ti tufweti baka mvutu mu tusambulu tweto ho nkatika bendo. Kâ mu matieleka, ni Yehova zebi ntangu yifwanane mu tu bakisa. (Tanga Bahebre 4:16.) Bu tulembo bakaka bio bi tulombaka ho nkatika bendo, tulendi banza ti Yehova têle, ‘Kâni.’ Kâ, mvutu’andi yilendi bâ, ‘Toko kêla.’ Mu tifwani, vutu’eti banza mu mpangi yisambiri ngatu kawasa. Tala ti Yehova siri timangu mu mu wasisa, Satana lendi tâ ti tala ti mpangi yo Yehova kata sarila mu bungu ti wasisa kamuwasisi. (Yobe 1:​9-11; 2:4) Musamu wakaka, Yehova watikubikila ntangu yi kakatula bimbevo biabiansoni. (Iza. 33:24; Nza. 21:​3, 4) Kâ bwawu bu, ka tufweti’â takêla ko basa bimangu mu tu wasisa. Buna, mpangi yo yilendi lomba kwe Yehova kamuhana ngolo na tidzunu mu korela timbevo tiandi na mu tatamana mu mu sarila na kwikama kwakwansoni.—Mik. 29:11.

14. Ntia malongi ta baka mu tifwani tia Janice?

¹⁴ Bambukila tifwani tia Janice, wasambila ngatu kenda ku Betele. Mivu 5 miayôka ntete kabakula mpila Yehova yi kahanina mvutu mu lusambulu lwandi. Têle ti: “Yehova wasarila ntangu yo mu kundongesa na mu sa ti nabâ Mukristo wa mbote. Wafwanakana nakurisa lukwikulu lwani mu Yandi. Nafweti dinga mu zaba mu tomo longoka Bibila na bunsungu bwabwansoni. Mpe nafweti longoka ti ndendi bâ mu nsayi kuma ni kuma ku nisarila Yehova.” Ha manima, Janice na bakala diandi babalomba mu sala tisalu tia tizunga. Bu kavutulu banza, Janice têle ti: “Yehova wahana mvutu mu tusambulu twani, kâ ka mu mpila ko yi ndieri kekoloko. Wafwanakana nayôkesa ntangu mu bakula mvutu ya toma yi kakungana, mbo nita tonda mu bweso bweri nani bwa mona luzolo na mbote’andi.”

15. Ntangu zakaka, mu bungu dia nti tulendi zonzelaka kwa misamu mia nguri mu tusambulu tweto? (Tala mpe bifwani.)

¹⁵ Tiyuvu tia ntatu titêle: ‘Ngano mfweti sambala mu bungu dia tima tiakaka?’ Ni bu sa ti bubote bwena mu tomo zabikisaka musamu we neto mu lusambulu, tulendi bakula ka nti Yehova kazololo mu bungu dia beto bu tuzonzela kwa musamu wa nguri. Tabongeno tifwani tia mpangi ya yikento yilembolo ya kwela yisambiri mu kwenda ku Lukolo lwa bisamuni bia Timfumu. We nandi kenda ku lukolo ngatu kahana lubakusu ku mbuka yita dingana bisamuni. Kâ kani katatamana mu sambila ngatu bamutikisa, lendi mpe lomba kwe Yehova kamubakisa mu bakula mpila zakaka zi kalendi kurisila tisalu tiandi tia samuna. (Bis. 16:​9, 10) Ha manima, lendi sala tintwari na lusambulu lo bu kalomba kwe munkengi wa tizunga tala ti timvuka tia tizunga tiawu tie na nsatu mipasuri-nzila. Peleko lendi tsoneka kwe biro ya filiale mu dinga mu zaba ka ntia mbuka ye na nsatu bisamuni bia Timfumu tia Nzambi.e

16. Mu nti tulendi bêla na lukwikulu?

¹⁶ Ntiana bu tulongokele wo, tulendi bâ na lukwikulu ti Yehova mbo kahanina mvutu mu tusambulu tweto mu luzolo na buderede. (Mik. 4:3; Iza. 30:18) Ntangu zakaka tulendi lembo baka mvutu yi tuta kêla. Kâ kani kabwe, Yehova ka kanga makutu ko mu tusambulu tweto. Beto katomono zolo. (Mik. 9:10) Buna, tatamana mu mu kwikila ntangu zazansoni, mu mu ziburilaka mutima’aku mu lusambulu.—Mik. 62:8.