CHO 1925​—Cho 100 da b’lo

B’O LE B’O NÁ RITSI SI NZƗ NARI

Bí kʉ ná Wanafunzi wa Biblia ungʉeri u nari kʉ, dz’ ka ndi sie ngʉ Paradiso cho 1925 na. Ká addudho? Le-djo Albert Schroeder, luti ndi ngʉngʉe Lo dho chutso ddá ná Baraza nǎ ddike ro, pongʉeri ɨ: “Ko ungʉeri u nari kʉ, cho 1925 na ché na le d’ri ná Wakristo krʉ ka ndima sie dji ra na. Ndirigoti che chengʉeni ná chi ngʉ tøni Yova dho ná kpa, loroji na; Abrahamu ma, Daudi ma na ka ndima sie ga ndiro ndima ddá chutso dz’ djo ka ndima sie ma ná ndrŭ dho d’e.” Kpa ngʉ b’o ná fø lo njingʉeni nzá nari dho, nja kʉ ná le-djoi ma, le-vei ma na thí bʉngʉeni bʉ.​—Mez. 13:12.

Nzá mai kpa ngʉ b’o ná lo njingʉeni ro, bí kʉ ná Wanafunzi wa Biblia rangʉe anzi dhé hwè lo-i ndima ngʉ d’ra nari na. Kpa rangʉe riutso d’i nari kʉ, hwè lo-i ndima d’ra Yova djo nari kʉ bbo na mana kʉ ndima dho ná njí. Loroji na, akonja ngbaribbai ma kpa njingʉe njí radio na ndiro ndima d’ralo bí kʉ ná ndrŭ dho d’e nari di.

YOVA DZÁ DIMU CHINGɄE RADIO DHI NGA BÍ

Cho 1924 na, bí kʉ ná ndrŭ ngʉ adi WBBR le ngʉ adi nzǐ ná radio rr. Nì mai ri kʉ fø ro, cho 1925 na Wanafunzi wa Biblia chingʉe nja nga ki radio dho, fø saa na Chicago dhi vile kuso, Illinois na. Wø kpa lingʉe ná fø radio le ngʉ adi nzǐ WORD. Ralph Leffler, radio dhi nga chidha tsotso ngʉ adi kó ná ke pongʉeri nari kʉ: “Grì dhi saa na, ngasdjó bí kʉ ná ndrŭ ngʉ adi fø radio rr njonjonga lu ro ndirigoti dadanga nǎ ro.” Loroji na, ddikpa familia ngʉ di kilometre 5 000 djolu da ná ngana fø radio le lingʉe ná nga ró ro. Fø familia ngʉe Alaska nǎ ndirigoti kpa rrngʉe fø radio nǎ emisio kana ya kwanza ri. Emisio ndima rrngʉe nari goti, fø familia ndingʉe ddikpa barua radio dhi ngana ngʉ njínji ná ndrŭ dho. Fø barua nǎ, fø familia pongʉe mbai kpakpa lingʉe ndima ndirigoti ndima tsotso kongʉe ndiro ndima chu lo Mungu ma, Biblia ma na djo d’e ná fø programu kpengʉe ná ndrŭ dho.

Bi 12 ddo 1, 1925 nǎ Dzamu dhi Munara tungʉe addudho ma ri kangʉe ka bí kʉ ná ndrŭ rr fø radio nǎ programu nari nanga. Ri pongʉeri nari kʉ: “WORD kʉ États-Unis nǎ bbobbo radio kana ddiri ro. Atlantique ma, Pacifique ma na dhi jʉdda tsotsolu ngʉe ná ndrŭ ma, Cuba ma, Alaska dzá angønga laidjó ngʉe ná ndrŭ ma na ka ndima rr e ri ddi. Nzá d’engʉe bbʉbbʉlo rr ná bí kʉ ná ndrŭ jingʉeri ndima chu lo bbo fø radio ndima rrngʉe nari dho.”

Føri kina, Wanafunzi wa Biblia jingʉeri ndima ngá radio chulu ndima hwè lo-i d’ra nari tso Canada na. Føri dho, 1924 na kpa chingʉe nja nga ki radio dho Saskatoon na, Saskatchewan na. Fø ngana kpa lingʉe ná radio le ngʉ adi nzǐ CHUC. Ri ngʉe dini chingʉe ná ya kwanza radio dhi nga Canada na. Ro, 1925 na ringangʉeni kpa ba radio dho ndima ka ndima chie ná d’i nga. Føri dho, tengenezo vʉngʉeri fø radio ngʉ Saskatoon nǎ, Regent dhi dza na. Føri ngʉe teatre ndrŭ ngʉ adi nji nǎ ná dza. Kpa dzingʉe fø dza ndirigoti kpa thɨngʉe ri ronga.

Fø radio djotsina, Saskatchewan nǎ njonjo ngalu ngʉe ná bí kʉ ná ndrŭ rrngʉe hwè lo-i ya kwanza ina ndima dhó maisha nǎ. Loroji na, da ngʉe ná ddikpa vile nǎ ro, Graham ró dho ngʉe ná ddikpa le kongʉe Biblia ró d’yʉ ndi ná kichapo barua chulu ddikpa emisio ndi rrngʉe nari goti. Le-djo George Naish pongʉeri nari kʉ: “Le ngʉ hø ‘Addi longa ko dho!’ Ná føri chulu ringʉnjani ledhó lo u ko kó ndi tsotso lele nari bbai. Føri dho, ko chongʉe Studies in the Scriptures ró dho ngʉe ná buku le dho.” Luti, Graham plingʉe Pidhinga dhi imba nanga nja kʉ ná ngalu.

KO CHUNGɄE BBO NA MANA KɄ NÁ BBɄBBɄLO

Bi 3 ddo 1, 1925 nǎ Dzamu dhi Munara nǎ ngʉe ɨ djǒ ripo ná ddikpa bbo na mana kʉ ná lo: “Birth of the Nation” (Ndrŭ tsɨ gøni nari). Ká addudho fø lo ngʉe bbo na mana kʉ ná ri? Ddikpa saa na, Wanafunzi wa Biblia chungʉeri nari kʉ, Shetani chutso ddá gó kparɨ dho ndirigoti kali dhi dini ma, turusa ma, guvernema ma na dho. Nì mai ri kʉ fø ro, fø Dzamu dhi Munara nǎ lo chulu “chi njí dhi noke” kongʉe le-djoi ma, le-vei ma na tsotso ndiro kpa famuri nari kʉ, Yova dhó ma e ddikpa tengenezo ddi. Fø tengenezo nǎ ndrŭ nzɨ adi ndima tso gba Shetani dhó i dz’ djó lo na ri, ro kpa adi njínji ddinga ndiro ndima kó Yova tsotso d’e. (Mt. 24:45) Føri kina, chi njí dhi noke pongʉeri nari kʉ, cho 1914 na ‘tangʉe ra na ná vita’ djotsina, Shetani ma, ke na gbangʉe ndima tso ná malaiká ma na le bʉngʉe ra nǎ ro dz’ djo.​—Ufu. 12:7-9.

Nja kʉ ná Wanafunzi wa Biblia dho ringʉe kpakpa ndima u fø wø lo. Føri dho, fø Dzamu dhi Munara pongʉeri nari kʉ: “Njati rié ni i Dzamu dhi Munara zø ndirigoti ni gba ni tso nzá ri nǎ lo na ró, ko rinzi ni tso nari kʉ, adi ngatsovedha na ndirigoti ali ni thí Yova djo chi ni tøni ro ni ra anzi ke dho ni njínji ro nari na.”

Grande-Bretagne nǎ Tom Eyre, kolpolter (njʉ ko adi rinzi painia) ndi ngʉe ro, tu ngbaribbai ma bí kʉ ná Wanafunzi wa Biblia mbungʉe ndima fø lo djo nari nanga ɨ: “Le-djoi ma, le-vei ma na nanga jingʉeni bbo Ufunuo 12 nanga le tungʉe nari dho. Ko rangʉe riutso d’i nari kʉ, Mungu dhó Pidhinga lini b’lo ra nǎ ná saa na, føri chongʉe ko ronga ndiro ko d’ra fø hwè dhi lo-i nja ndrŭ dho d’e. Ri lingʉeri ko di lod’ra bbo pli ndirigoti ri kongʉe ko tsotso ko njari nari kʉ, Yova kʉ chøchø ndiro ndi njí ké dho ndidzá ndrŭ nanga si keni dho ná lo d’e.”

YOVA DJO LE LOD’RA NARI

Njʉ, Yova dzá Dimu adi loti bí ina Isaya 43:10 djo, ɨ ndi ripo ro: “‘Ni kʉ madzá dimu,’ Yova pori, ‘O, madzá vʉ ma vʉngʉe ná njí dhi ke.’” Nì mai ri kʉ fø ro, cho 1925 njí fø andiko nzɨ ngʉ adi bani bí ina kodhó vichapo nǎ ri. Ro, fø lo thika wøngʉeni wø. Cho 1925 na vʉngʉe ná Dzamu dhi Munara tingʉe lo Isaya 43:10, 12 djo 11 ngʉe ná njonjo longanedha dhi ri nǎ!

Cho 1925 nǎ bi 8 dzá ya mwisho ddo kana, Wanafunzi wa Biblia njungʉe ndima tso asamble dho Indianapolis na, Indiana na. Le-djo Joseph F. Rutherford ndingʉe bblo sidha ngʉ po d’i ngø nǎ ro singʉe ná le-djoi ma, le-vei ma na dho ná lo fø asamble dhi programu djo. Ri pongʉeri ɨ: “Ko si i asamble na ndiro ko ba . . . kpakpanga Bboke dhó ro d’e. Føri dho, ko si ngʉ lod’radha dhi njí gʉ wø kpakpanga na.” Ddo 8 kana ndima nji asamble nari goti, krʉ singʉe asamble dhi ngana ná ndrŭ bangʉe kpakpanga ndiro ndima di lod’ra Yova djo krʉ bbʉni ná chu nǎ d’e.

Zanji dyi bi 8 ddo 29 na, le-djo Rutherford tingʉe lo ɨ djǒ ripo ná hotuba djo: “Njí dho le nzini nari.” Fø hotuba nǎ, ke dhongʉe addudho ma lod’radha dhi njí kʉ bbo na mana kʉ ná njí nari. Ke pongʉeri ɨ: “Yova pori ndidzá ndrŭ dho . . . : ‘Ni kʉ madzá dimu . . . ma kʉ Mungu.’ Ndirigoti ke pongʉe kpakpa lingʉe ndrŭ ná i lo: ‘Aningbe alama ndrŭ dhi lo djotsina.’ Yova djo ka ndima d’ralo dz’ djó nari kʉ, Yova chutso ddá ndidzá roho chulu dho ná ndrŭ dhé dhonalo kpa kʉ kedzá ndrŭ.”​—Isa. 43:12; 62:10.

Le-djo Rutherford d’yangʉe ndidhó hotuba tso nari gori, ke zøngʉe ddikpa dokima ndrŭ dho. Fø dokima djǒ ngʉe “Message of Hope” (Ngab’odha dhi imba) ndirigoti ndrŭ krʉ gbangʉe ndima tso ri djó ngʉe ná lo na. Fø lo pongʉeri nari kʉ, Mungu dhó Pidhinga ddiro dhé si “ngoi ma, bblo maisha ma, bblo afya ma, shinga ma, huru le kʉ nari ma, theinga dho kʉ ná bblonga ma na bbʉ.” Luti, le tafsiringʉe fø dokima djó ngʉe ná lo bí kʉ ná luga nǎ ndirigoti le lingʉe fø lo trakt djo ndiro le-djoi ma, le-vei ma na di lod’ra ri na d’e. Kpa ndongʉe chøchø milioni 40 ngʉe ná ri ndrŭ dho.

Cho bí kana nzá Wanafunzi wa Biblia wøngʉe ndima ró dho thika Yova dzá Dimu na ri. Ro, kpa ngangʉe ngbaribbai ma ri kʉ bbo na mana kʉ ná lo ndima di lod’ra Yova djo nari ndima famu nari tso.

KPA NGANGɄE JI NANGA JINI NÁ NDRŬ RONGA NDIMA NGɄ BE NARI TSO

Dz’ djolu gble ngʉe ná Wanafunzi wa Biblia dhó hesabu ngʉ ndrini bbo nari dho, tengenezo pongʉeri nari kʉ, ri nzá ngani le-djoi ma, le-vei ma na di vichapo dhé ndo ndrŭ dho ri, ro kpa di ngʉ ji nanga jieni hwè lo-i dho ná ndrŭ ronga ma be ddi. Message of Hope (Ngab’odha dhi imba) djǒ ngʉe ná trakt ndodha dhi kapanye goti, Bulletina djó le jangʉeri nari kʉ: “Aningʉ Message of Hope (Ngab’odha dhi imba) dhi trakt ni bbae dhona ná ndrŭ ronga be.”

Cho 1925 nǎ, bi 1 nǎ Bulletin tingʉe lo Texas nǎ, Plano dhi vile nǎ ngʉ di ná ddikpa mwanafunzi wa Biblia pongʉe ná lo djo. Ri pongʉeri ɨ: “Ko nanga kengʉeni ngbaribbai ma bí ina ko ngʉ lod’ra nǎ ná eneo nǎ ndrŭ ngʉ adi ko ki kó bblo wø nǎ ko ra lod’ra ná eneo djolu nari dho. Kodhó eneo nǎ ddikpa kar vile nǎ lo d’rangʉeni 10 dangʉe b’lo ná cho kana 5 ina dhé. . . . Sese da ná ddo kana, le-ve Hendrix ma, madzá mama ma na rangʉe lo ki d’ra vi fø vile na ndirigoti kpa bbʉngʉe buku kparɨ bí [anziro] nga djolu.”

Ndirigoti Panama dhi ngø nǎ ngʉe ná ddikpa kolporter ndingʉeri ɨ: “Ya kwanza dingʉe ma ndima bbá ro ná bí kʉ ndrŭ wøngʉe ndima dhó nganjadha thika ma ki ngʉngʉe kpa ronga be ná saa na. I cho nǎ, ma lod’ra anziro ma d’rae lo dho ná ndrŭ dho i bbo ndirigoti ko kana kau kʉ bblo pli kpa kana bí ndrŭ na.”

GOSI NÁ DDO DJO LE LE THÍ LI NARI

Cho 1925 dzá mwisho na, le-djo Rutherford ndingʉe lo fø cho na bbapainia njingʉe ná njí djo ndirigoti ke dhongʉe fø cho goti ringangʉeni kpa njí ná lo maddi. Ke pongʉeri ɨ: “B’lo dae ná cho kana, ni pɨe njedha na e ná bí kʉ ná ndrŭ iso. Fø ni njieri nari bbʉe hwè bbo ni dho . . . Ro, cho 1926 na, ni si bí kʉ ná chu ba ndiro ni d’ralo Mungu ma, kedhó Pidhinga ma na djo ndirigoti ni si ke dho adi madha bbʉ nari ká kʉ ie ma nari d’ra ndrŭ dho. . . . Nde, ddinga akora anzi kodhi Mungu ndirigoti kodhi Pi dho ko madha bbʉ bbobbo ko chu na ko dyi ngo nari na.”

Cho 1925 dzá mwisho na, le-djoi kpengʉeri ndima chi bbò Beteli Brooklyn na. Føri dho, cho 1926 na, tengenezo ngangʉe nzá ro ko d’erie nji anziro ná ngachidha dhi njí tso.