December

Sa Yehova alicite nkusu shakubusha bantu bakafwa? Ncakutatoonsha! Ngu Lesa “Shinkusu Shoonse.” (Ciyu. 1:8) Aboobo alicite nkusu shiinditeewo shakukoma mulwani uli woonse, kwiilikaawo alufu. (1 Koli. 15:26) Ceebo acimwi ceenga catupa kushoma kwaamba ayi Lesa alicite nkusu shakubusha baabo bakafwa, ncakwaamba ayi aleebaluka shintu shoonse. Alishi liina lya nyenyeenshi yomwi ayomwi. (Isa. 40:26) Alimwi abo bakafwa alabeebaluka. (Jobo 14:13; Luka 20:38) Ncuubu kuli nguwe kwiibaluka makani oonse pabaabo mbweshi akabushe, kwiilikaawo ambobakalinga kuboneka, nshebakeendaamo mubuumi alimwi ambobakalinga kuyeeya. Ncakutatoonsha kwaamba ayi inga twashoma mucishomesho cakwe Lesa ca kubushikwa kwa bafu, mukwiinga tulicishi kwaamba ayi alisunishishi kubusha baabo bakafwa alimwi alicite nkusu shakucita boobo. Ceebo acimwi ceenga catupa kushoma cishomesho ca kubushikwa kwa bafu ncakwaamba ayi Yehova wakabushaawo kale bantu kuswa kubafu. Paciindi Baibo ndyeyakalinga kulembwa, Yehova wakapa basankwa bamwi nkusu shakubusha bantu kuswa kubafu. Alimwi wakapa a Yesu nkusu shakubusha bantu kuswa kubafu. w23.04 mape. 9-10 mapa. 7-9

Aswebo na katubandika abantu munshila yeenga taibakalashi alimwi cakulibombya, inga basuna kukutika akutolelela amubandi. Nacibi boobo, na muntu taasuniwo kukutika alimwi kaimfwibo pa kupikisha nshotushoma, tatweelete kutolelela amubandi. (Tus. 26:4) Sombi teshi boonse beenga bakaka kutukutika na kupikisha nshotushoma. Ncakutatoonsha kwaamba ayi kwiiya kuba bantu balibombya kulatucafwa abuumbi. Na muntu wamwiipusha mwiipusho uyumu nabi kutalika kupikisha nshomushoma, amupaile kuli Yehova kwaamba ayi amucaafwe kumukumbula cakulibombya. Munokwiibaluka ayi kukumbula cakulibombya inga kwapa kwaamba ayi mutataliki kupikishanya ceebo cakwaamba ayi mulashoma shipusene. Kwiilikaawo, kukumbula munshila yabulemu alimwi cakulibombya inga kwapa kwaamba ayi bamwi mbotushimikila baalule mbobatubona ambobabona cancine camu Baibo. “Munoolibambite lyoonse kusansulwita muntu uliwoonse” weenga wamwiipusha pa nshomushoma. Sombi munoocita boobo ‘cakulibombya alimwi cabulemu.’ (1 Pit. 3:15) Amutolelele kunotondesha ayi muli bantu balibombya! w23.09 pe. 19 mapa. 18-19

Amuleke tubandike panshila shili 4 mbweenga twatondesha kukalika moyo. Nshila yakutaanguna, muntu ukalika moyo ngumuntu utafwambaani kukalala. Aleelesha kulicata akuleya kuboosha cibiibi pa cibiibi na wakalashikwa nabi na walisukama. (Kulo. 34:6) Nshila yabili, muntu ukalika moyo inga walindila cintu cimwi kwakubula kucimwa. Na cintu ncaatolindila cacelwa kushika, muntu ukalika moyo alaleya kucimwa na kukalala. (Mate. 18:​26, 27) Nshila yatatu, muntu ukalika moyo taaingani kucita shintu. Na kuli ncito imwi iyandika njaaelete kukumanisha, aleelesha kuteengana kwiitalika na kwiimanisha. Muciindi cakucita boobo, alashinisha kwaamba ayi waba aciindi cikwene cakuyeeya mbweshi akumanishe ncito iyo. Lyalo alatalika kusebensa ncito iyo camoyonteeka. Nshila yane, muntu ukalika moyo aleelesha kuliyumya ndyaatokwiinda mumapensho, kwakubula kutongooka. Alacita nsheenga wacikonsha kwaamba ayi atolelele kuliyumya, akutolelela kusebensela Yehova calusangalalo. (Kolo. 1:11) Bantu bakwe Yehova balyeelete kutondesha kukalika moyo munshila shoonse ishi nshetwabandikaawo. w23.08 mape. 20-21 mapa. 3-6

Ceebo cinene ceelete kutupa kushitilisha moyo wesu wacikoshanyo, ncakwaamba ayi Yehova alalanga langa moyo wesu. Ici cilaamba ayi Yehova Lesa alabona mbotubete mukati ka moyo kuteshibo mbotuboneka pansengwe. Alaakutusuna na katukutumana kuyeeya pabusongo bwakwe bweenga bwatucafwa kwikala kwamuyayaya. (Joni 4:14) Kucita boobo kulaakutushitilisha ku mibo ibiibi abubeshi bwakwe Satana abantu babiibi ba mucishi cakwe. (1 Joni 5:​18, 19) Na twayumya bushicibusa bwesu a Yehova, tulamusuna akunoomulemeka abuumbi. Ceebo cakwaamba ayi tatusuni kukalasha Ishiwesu, tulaakupata nabibo kuyeeya pacintu ceenga catupa kubisha. Nankashi waliina lya Marta ukala ku Croatia, uyo wakeeleshekwa kucita bufuule wakaamba ayi: “Cakanjumina kuyeeya kabotu akukoma lusuno lwakusuna kucita cintu citabete kabotu. Nacibi boobo, kuloonda Yehova kwakanshitilisha.” Ino kuloonda Yehova kwakamushitilisha buyani? Ba Marta bakaamba ayi bakakutumana kuyeeya pashibiibi sheenga shaswaamo na bacita bufuule. Aswebo inga twakutumana kuyeeya pashibiibi sheenga shaswaamo. w23.06 mape. 20-21 mapa. 3-4

Yesu wakalinga kucishi ayi luyaando lwakwe Yehova nkusalasha liina Lyakwe, akumana bubeshi boonse bwaambwa pali nguwe. Nceceeco Mwaami wesu wakalwiita bashikwiiya bakwe kunoopaila ayi: ‘NoBeeshiwesu nomuli kwiculu, liina lyanu alisalashikwe.’ (Mate. 6:9) Yesu wakalinga kucishi kwaamba ayi aya ngomakani ayandika abuumbi atookuma bantu abaanjelo boonse. Taakuwo munjelo nabi muntu wakacita shiinji kwaamba ayi asalashe liina lyakwe Yehova mbuli Yesu mbwaakacita. Nacibi boobo, Yesu ndyebakamwaanga, balwani bakwe bakamubekesha ayi taakalinga kutondesha bulemu abuumbi kuli Baishi! Ncakutatoonsha kwaamba ayi Yesu wakalinga kulinyumfwa ayi kubisha liina lisalalite lya Baishi ncilubo cinene abuumbi. Wakalinyumfwa cibiibi abuumbi ceebo cakumwaanga akumupa mulandu wamushobo uyu. Mpashi ici ncocakapa kwaamba ayi Yesu ‘apenshekwe bunene mumoyo’ ndyekwakacaalabo paniini kwaamba ayi bamwaange.—Luka 22:​41-44. w24.02 pe. 11 pala. 11

Ndyetuli mulubilo lwesu lwakubuumi, tulyeelete kusuna Yehova a Yesu kwiinda mbotusuni beshikamukowa besu. (Mate. 10:37) Sombi ici tacaambi ayi tatweelete kukumanisha mikuli njetucite mumukwashi, kuba anga mikuli iyo itoopa kwaamba ayi twaalilwe kucita shisangalasha Lesa a Klistu. Sombi kwaamba ayi tusangalashe Lesa a Klistu, tulyeelete kukumanisha mikuli njetucite mumukwashi. (1 Timo. 5:​4, 8) Na twacita boobo, tulaakuba alusangalalo abuumbi. Yehova alicishi kwaamba ayi mumikwashi mulaba lusangalalo na musankwa amwanakashi kabatondeshanya lusuno abulemu, bashali kabatondesha lusuno kubana babo akubaiisha alimwi abaana na kabanyumfwila bashali babo. (Efe. 5:33; 6:​1, 4) Tacicite mulandu amukuli ngomucite mumukwashi, amucinke manungo mubusongo bwamu Baibo muciindi cakucitabo shintu nshemutoobona ayi shili kabotu, na shintu bantu bakumusena nkomukala nshobacita, nabi shintu bantu bakeeya abuumbi pamakani aya nshobaamba ayi nshomweelete kucita. Amusebenseshe mabuku esu aamba shamu Baibo. Mumabuku aya mulacanika makani eenga amucafwa kukonkela njiisho shamu Baibo. w23.08 pe. 28 mapa. 6-7

Mwanakashi Mwineklistu alyeelete kwiiya kucita shintu sheenga shamucafwa. Shintu shimwi mwanakashi nsheenga weeya kubwanike shilaakutolelela kumucafwa mubuumi bwakwe boonse. Kucakubonenaako, amwiiye kulemba akubelenga kabotu. Mumisena imwi, bantu balabona ayi kulemba akubelenga teshi shintu shiyandika mwanakashi nsheenga weeya. Nacibi boobo, ishi nshintu shiyandika Mwineklistu uli woonse nshaeelete kwiiya. (1 Timo. 4:13) Aboobo mutasuminishi cili coonse kumupa kwaalilwa kwiiya bwakulemba akubelenga kabotu. Ino nshibotu nshi sheshi shikasweemo na mukeeye kucita boobo? Na mweeya kucita boobo, inga camucafwa kucana ncito akutolelela kusebensa. Alimwi kucita boobo kulaakumucafwa kucishiba kabotu bwakwiiya Baibo akunookwiishako bamwi nshomutokwiiya. Ciinditeewo ncakwaamba ayi, mulaakuba abushicibusa buyumu a Yehova ndyeshi mukanoobelenga Maswi akwe akukutumana kuyeeyawo.—1 Timo. 4:15. w23.12 pe. 20 mapa. 10-11

Amusenge Yehova kwaamba ayi amucaafwe kukaka meelesho. Mukwiinga tuli bantu batamaninite, lyoonse tulayandika kusebensa cankusu kwaamba ayi tukake meelesho. Satana atoocita shoonse nsheenga wacikonsha kwaamba ayi citubete ciyumu kukaka meelesho. Nshila yomwi mbwaeelesha kutupa kuba amiyeeyo itabete kabotu, nkwiinda mu shakulikondelesha shitabete kabotu. Shakulikondelesha isho shitabete kabotu inga shatupa kuba amiyeeyo itabete kabotu iyo yeenga yatupa kuba batasalalite kuli Yehova akutupa kucita cilubo cinene. (Maako 7:​21-23; Jemu. 1:​14, 15) Tulayandika lucafwo lwakwe Yehova kwaamba ayi tucikonshe kukaka meelesho. Mumupailo wa cakubonenaako Yesu ngwakaamba, wakeelikaamo amaswi akwaamba ayi: ‘Mutatwinjishi mumeelesho, sombi amutufuune kuswa ku mubiibi.’ (Mate. 6:13) Yehova alisuni kutucafwa. Sombi tulyeelete kumusenga kwaamba ayi atucaafwe. Alimwi na twapaila kuli Yehova kwaamba ayi atucaafwe, tulyeelete kucita nsheenga twacikonsha kwaamba ayi tuleye shintu sheenga shatunjisha mumeelesho. w23.05 mape. 6-7 mapa. 15-17

Na beebene kababikila maano ku bushicibusa bwabo a Ishiwabo wakwiculu, cilaakubabeta cuubu kukonkela butanjilishi bwakwe, ico ceshi cikabacaafwe kuleya akukoma mapensho eenga apa kwaamba ayi bacileeke kusunana abuumbi. Abo bacite bushicibusa buyumu a Yehova baleelesha kukonkela cakubonenaako cakwe akutondesha mibo njaacite mbuli kubota moyo, kukalika moyo alimwi akulekelela. (Efe. 4:32–5:1) Na beebene kabatondesha mibo iyi, cilaakubabeta cuubu kusunana abuumbi. Nankashi waliina lya Lena, uyo wekala mucikwati kwamyaaka iindilila 25 wakaamba ayi, “Ncuubu kusuna akulemeka muntu ucite bushicibusa buyumu a Yehova.” Amuyeeye pacakubonenaako ici camu Baibo. Yehova ndyaakalinga kusala beebene abo bakalinga kusa mukuba bashali bakwe Mesiya, wakasala Josefu a Maliya, pabantu baanji bakalinga bamulunyungu lwakwe Defedi. Ino nceebonshi? Nceebo ncakwaamba ayi boonse bobilo bakalinga kucite bushicibusa buyumu a Yehova. Alimwi Yehova wakalinga kucishi kwaamba ayi balaakutolelela kumubika panembo mucikwati cabo. w23.05 pe. 21 mapa. 3-4

Nabi kwaamba ayi Yesu Mutanjilili wesu alimaninite, bamakwesu mbaakasala kututanjilila pano pacishi tabamaninite. Mpashi inga catuyumina kubanyumfwila, bunene bunene na batulwiita kucita cintu ncotutasuni kucita. Paciindi cimwi mutumwi Pita alakwe cakamuyuminaako kukonkela butanjilishi mbwaakapekwa. Munjelo ndyaakamulwiita ayi alye shinyama shatakalinga kusalalite kweelana a Milawo yakwe Mose, Pita wakakaka mankanda otatwe! (Milimo 10:​9-16) Ino nceebonshi? Mukwiinga wakalinga kubona ayi butanjilishi mbwaakapekwa tabubete kabotu. Nacibi boobo, mutumwi Paulo wakanyumfwila bamanene ku Jelusalemu ndyebakamulwiita ayi aye abasankwa bone ku tempele akulisalasha kweelana amulawo, kutondesha ayi wakalinga kukonkela Milawo yakwe Mose. Paulo wakalinga kucishi ayi Beneklistu tabakalinga kukonkela Milawo yakwe Mose. Nabi kwaamba ayi taakuwo cibiibi Paulo ncaakacita, wakakonkela butanjilishi mbwaakapekwa. “Paulo wakaya abasankwa bone abo akulisalasha pantu pomwi ambabo.” (Milimo 21:​23, 24, 26) Ceebo cakwaamba ayi Paulo wakakonkela butanjilishi mbwaakapekwa, cakapa kwaamba ayi bashominyina babe bacatene.—Loma. 14:​19, 21. w23.10 pe. 10 mapa. 15-16

Mpashi inga tamuyeeyiwo ayi kuloonda ngu mubo uyandika kwaamba ayi bantu batolelele kuba abushicibusa buli kabotu. Nacibi boobo, abo basuni kuba abushicibusa buyumu a Yehova balyeelete ‘kumuloonda.’ Nabi kwaamba ayi twasebensela Yehova kwaciindi cilaamfu buyani, soonse tulayandika kutolelela kumulemeka abuumbi. Ano ino kuloonda Lesa cilaamba nshi? Muntu uloonda Lesa munshila yeelete, alisuni Yehova alimwi taasuni kucita cili coonse ceenga canyonyoola bushicibusa bwakwe anguwe. Yesu alakwe wakalinga “kuloonda Lesa” munshila yeelete. (Ebu. 5:​7, NWT) Taakalinga kuloonda Yehova cakufwa. (Isa. 11:​2, 3) Sombi wakalinga kusuni Yehova abuumbi alimwi wakalinga kunoomunyumfwila. (Joni 14:​21, 31) Bweenka mbuli Yesu, tulamulemeka abuumbi Yehova akumuloonda mukwiinga ngu Lesa ucite lusuno, busongo, bululami ankusu. Alimwi tulicishi kwaamba ayi Yehova alitusuni alimwi alabikila maano kushintu nshotucita na watwiisha. Nshotucita inga shakalasha Yehova na kupa kwaamba ayi asangalale.—Kulu. 78:41; Tus. 27:11. w23.06 pe. 14 mapa. 1-2; pe. 15 pala. 5

Mwaami Usiya ndyakaba ankusu pabwaami, wakacileka kulumba Yehova pashintu shoonse shibotu nshakamucitila. Ino nciiyo nshi ncotutokwiiyako? Tulyeelete kunokwiibaluka ayi Yehova ngotupa shintu shoonse shibotu nshotucite alimwi amikuli njetucite muncito yakwe. Muciindi cakulisumpula pashintu nshotwakacita, tulyeelete kulumba Yehova pashintu nshetucikonsha kukumanisha. (1 Koli. 4:7) Tulyeelete kuliceesha akushiba ayi tatumaninite alimwi tulayandika kululikwa. Mukwesu umwi ucite myaaka pafwiifwi a 60 wakalemba ayi: “Ndakeeya ayi nsheelete kukalala nabi kulefuka na bamwi babona shintu shimwi nshentaciti kabotu. Na ndalulikwa pacintu cimwi citabete kabotu nceenga ndaciita, ndeelesha kusebenselawo akutolelela kucita nsheenga ndacikonsha muncito yakwe Yehova.” Cancine ncakwaamba ayi na katunyumfwila Yehova akutolelela kuliceesha, tulaakuba alusangalalo lwancinencine mubuumi.—Tus. 22:4. w23.09 pe. 10 mapa. 10-11

Beneklistu bakutaanguna bakalinga kuyandika kuliyumya. Kwiilika pa kwiinda mumapensho amwi ngobakalinga kwiindaamo paciindi cilya, kuli mapensho aamwi ngobakalinga kwiindaamo. Baanji bakalinga kupenshekwa ku bamatanjilili ba baJuda, kubeendeleshi ba bene Loma alimwi akubeshikamukowa babo. (Mate. 10:21) Alimwi bakalinga kweelete kushinisha kwaamba ayi babula kuyungwa kunjiisho shakubeca isho shakalinga kwaamba baabo bakapondoka alimwi abaabo bakalinga kweelesha kupansaanya libungano. (Milimo 20:​29, 30) Nacibi boobo, Beneklistu abo bakatolelela kuliyumya. (Ciyu. 2:3) Ino nshiinshi shakabacafwa? Bakayeeya pashakubonenaako shamu Malembo sha baabo bakaliyumya, mbuli cakubonenako cakwe Jobo. (Jemu. 5:​10, 11) Bakapaila kuli Lesa kwaamba ayi abape nkusu shakuliyumya. (Milimo 4:​29-31) Alimwi bakatolelela kwiibaluka kwaamba ayi Yehova alaakubapa shoolwe na batolelela kuliyumya. (Milimo 5:41) Aswebo inga twatolelela kuliyumya na lyoonse katwiiya shakubonenaako sha bantu abo baambwa mu Maswi akwe Lesa amumabuku esu lyalo akukutumana kuyeeyawo. w23.07 pe. 3 mapa. 5-6

Yehova a Yesu teshi bakatukakeewo. Pesule lyakukaka Yesu, mutumwi Pita wakalinga kweelete kusalawo cakucita ciyandika. Sa wakasalawo kucileka na kutolelela kuba shikwiiya wakwe Yesu? Yesu wakapaila kuli Yehova kwaamba ayi Pita atolelele kuba alushomo. Yesu wakalwiitako Pita pamupailo uyu alimwi wakamulwiita ayi alaakucikonsha kuyuminisha bashominyina. (Luka 22:​31, 32) Pita alyeelete wakalinga kuyuminishikwa abuumbi na wayeeya maswi Yesu ngaakamulwiita! Na aswebo tutoyandika kusalawo cakucita ciyandika, Yehova inga wasebensesha beembeshi abo batubikilako maano, kwaamba ayi batuyuminishe akutucafwa kutolelela kumusebensela cakushomeka. (Efe. 4:​8, 11) Bweenka Yehova mbwaakacafwa Pita abatumwi bamwi kucana nshebakalinga kuyandika lwakumubili, aswebo alaakutucafwa kucana nshetuyandika lwakumubili na twabika ncito yakushimikila panembo mubuumi bwesu. w23.09 mape. 24-25 mapa. 14-15

Yehova alabona nabi tuntu tuniini ntotucitila bamwi kwaamba ayi tubacaafwe. Alabona kulyaaba kwesu kucafwa bamwi ayi kulayandika abuumbi alimwi anga ni nkongole njeshi akabooshe. Na kale kale mwakalinga kusebensa mbuli musebenshi ucafwilisha na munene, Yehova aleebaluka ncito njomwakasebensa alimwi alusuno ndomwakatondesha. (1 Koli. 15:58) Alimwi alabona lusuno ndomwatolelela kutondesha. Yehova alisuni ayi soonse twiiye kumusuna abuumbi akusuna bamakwesu abenankashi. Inga tweeya kusuna Yehova abuumbi na katubelenga Maswi akwe, kukutumana kuyeeyawo alimwi akunoopaila lyoonse kuli nguwe. Inga tweeya kusuna bamakwesu abenankashi na katubacafwa mushintu nshebatoyandika. Kusuna Yehova abamakwesu abenankashi abuumbi, kulaakutucafwa kuba abushicibusa buyumu anguwe alimwi abashominyineesu. Alimwi bushicibusa ubo bulaakutolelela kwamuyayaya! w23.07 pe. 10 pala. 11; pe. 11 pala. 13; pe. 13 pala. 18

Mwineklistu uli woonse alyeelete kulisalila mbwaasuni kushilikwa. Sombi Mwineklistu ndyaatosalawo mbwaasuni kushilikwa, alyeelete kukonkela milawo yamu Baibo yaamba pakutabikwa bulowa alimwi akuleya shamishimu. (Milimo 15:20; Gala. 5:​19, 20) Nacibi boobo, inga balisalila beene pamakani ambobasuni kushilikwa. Mpashi inga katushinishite ayi nshila imwi yakushilikwa njibotu na taibete kabotu. Nacibi boobo, tulyeelete kulemeka bamakwesu abenankashi nshobasalawo kucita pamakani ambobasuni kushilikwa. Aboobo ndyetutosalawo shakucita pamakani aya, tulyeelete kunookwiibaluka shiteente shili 4 shitokonkelaawo: (1) Bwaami bwakwe Lesa bweenkabo mbweshi bukamane malwashi oonse cakumaninina. (Isa. 33:24) (2) Mwineklistu uli woonse alyeelete kushinisha nshila ili kabotu kuli nguwe ndyaatosalawo mbwaasuni kushilikwa. (Loma. 14:​5, NWT) (3) Tatweelete koombolosha bamwi pa nshobasalawo kucita na kucita cintu cimwi cili coonse ceenga cabakalasha. (Loma. 14:13) (4) Beneklistu balatondesha lusuno alimwi balanyumfwishisha kwaamba ayi lucatano mulibungano ncintu ciyandika abuumbi kwiinda mbobayeeya.—Loma. 14:​15, 19, 20. w23.07 pe. 24 pala. 15

Sa Yehova mulimusuni? Ncakutatoonsha mulimusuni! Kuswabo kale kale, bantu baanji balalinyumfwa bweenka mbomulinyumfwa. (Kulu. 104:​33, 34) Baanji bakalyaaba kwaamba ayi basebensele Yehova. Ubo mbocakalinga kubantu bakalinga kwiitwa ayi ba Nasili, muciindi ca bene Isilaeli na abo bakalyaaba kusebensako incito ilibetele. Ba Nasili bakalinga mbene Isilaeli basebensa cankusu abo bakalinga kulyaaba kusebensela Yehova munshila ilibetele. Milawo yakwe Mose yakalinga kusuminisha musankwa nabi mwanakashi kushomesha cakulumbila kuli Yehova kwiinda mukusalawo kuba Munasili kwakaciindi. (Shakube. 6:​1, 2) Na mwine Isilaeli washomesha cakulumbila kuba Munasili, wakalinga kweelete kukonkela milawo imwi bene Isilaeli boonse njebatakalinga kweelete kukonkela. Aboobo ino nceebonshi mwine Isilaeli wakalinga kusalawo kuba Munasili? Kusuna Yehova abuumbi akulumba pashoolwe shiinji nshaakalinga kumupa, nsheshakalinga kupa kwaamba ayi mwine Isilaeli asaleewo kuba Munasili.—Duto. 6:5; 16:17. w24.02 pe. 14 mapa. 1-2

Liinji Baibo ilaamba “pakushomeka” na “lusuno lutamaani,” ulo Yehova ndwatondesha kubeshicibusa bakwe. Baibo ilaamba apakushomeka bantu bakwe Lesa nkobatondeshanya. (2 Samwe. 9:​6, 7) Inga tweeya kuba bantu bashomeka abuumbi. Amuleke tubandike shakacafwa Danyelo kuba muntu ushomeka abuumbi. Kuli shintu shiinji shakacitika mubuumi bwakwe Danyelo, shakalinga kweelete kumupa kutolelela kushomeka kuli Yehova nabi sobwe. Sombi paciindi ndyaakalinga kucite myaka iindilila 90, kuli cintu cimwi cakamucitikila cakamuyumina abuumbi. Bacinenenene bakalinga kusebensela Mwaami Dalyasi, bakalinga kumupatite Danyelo alimwi tabakalinga kulemeka Lesa wakwe. Aboobo bakayeeya mbweenga Danyelo wacaikwa. Bakapa mwaami kusaina mulawo, uyo wakapa kwaamba ayi Danyelo asaleewo kushomeka kuli Lesa na kumwaami. Danyelo ncaakalinga kweeletebo kucita kwaamba ayi atondeshe kushomeka kumwaami nkucileka kupaila kuli Yehova kwanshiku shili 30. Sombi Danyelo wakasalawo kutolelela kushomeka kuli Yehova.—Danye. 6:​12-15, 20-22. w23.08 pe. 5 mapa. 10-12

Yehova alisuni kwaamba ayi tutolelele kunotondesha lusuno ku bamakwesu abenankashi. Na bamakwesu abenankashi bacita cintu ncotutalangili Mwineklistu kucita, inga twashoma ayi tabana kucita kashanga alimwi batokweelesha kucita shintu Yehova nshaamba ayi shililuleme. (Tus. 12:18) Lesa alibasuni basebenshi bakwe bashomeka nabi kwaamba ayi balacita shilubo. Alatolelela kuba abushicibusa andiswe nabi kwaamba ayi twaciita shilubo; alimwi taatubikili mfundilishi. (Kulu. 103:9) Tulalumba abuumbi kwaamba ayi Yehova alatulekelela! Aboobo aswebo tulyeelete kunolekelela bamwi bweenka Yehova mbwaacita! (Efe. 4:32–5:1) Alimwi munokwiibaluka ayi mamanino ndyaatoya cisena pafwiifwi, tulyeelete kutolelela kuba abushicibusa buyumu abamakwesu abenankashi. Inga twalangila ayi kupenshekwa kulaakwiindaawo. Alimwi mpashi inga twaangwa ceebo calushomo lwesu. Na ishi shikacitike, ndyeshi tukayandike bunene lucafwo kuswa ku bamakwesu abenankashi.—Tus. 17:17. w24.03 mape. 15-16 mapa. 6-7

Mu Baibo muli makani aamba pabacanike bakalinga kucite bushicibusa buyumu a Yehova, bakalinga kucafwikwa kuli nguwe alimwi bakalinga kucite lusangalalo mubuumi bwabo. Defedi ngomwi pabacanike bakalinga kucite bushicibusa buyumu a Yehova. Ndyaakalinga wacanike, wakasalawo kuba abushicibusa a Lesa alimwi mukuya kwaciindi wakesa mukuba mwaami. (1 Baam. 3:6; 9:​4, 5; 14:8) Na mweeya pali Defedi, cakubonenaako cakwe cilaakumuyuminisha kusebensela Yehova cakushomeka. Na mpashi inga mwasalawo kwiiya shiinji pacakubonenaako cakwe Maako a Timoti. Bakatalika kusebensela Yehova ndyebakalinga bacanike abuumbi alimwi bakatolelela kumusebensela cakushomeka. Yehova wakalinga kusangalete ceebo cakwaamba ayi bakasalawo kumusebensela. Shintu nshomusalawo kucita pacecino ciindi inga shakuma buumi bwanu mbweshi bukabe kunembo. Na munocinka manungo muli Yehova kuteshi mumaano anu akunyumfwisha shintu, alaakunoomucafwa kusala kucita shintu shili kabotu. Inga mwaba alusangalalo mubuumi bwanu akucana shoolwe shiinji. Munokwiibaluka ayi Yehova alalumba pashintu nshomumucitila. Takuuwo cintu cibotu nceenga mwasalawo kucita mubuumi bwanu, kwiinda kusebensela Ishiwesu wakwiculu shilusuno, Yehova. w23.09 pe. 13 mapa. 18-19

Mutumwi Paulo wakalinga kucishi ayi bashominyina tabakalinga kumaninitewo. Kucakubonenaako, bamwi mulibungano lyaku Jelusalemu, tabakalinga kushoma ayi ngushikwiiya ndyebakakumanaakwe. (Milimo 9:26) Ndipakeenda ciindi, bamwi bakatalika kwaamba shibiibi pali nguwe kwaamba ayi bamwi bacileeke kumushoma. (2 Koli. 10:10) Paulo wakabona munene wakasalawo kucita cintu citabete kabotu mpashi cakakalasha bamwi. (Gala. 2:​11, 12) Alimwi Maako shicibusa wakwe umwi uyo ngwaakalinga kunyumfwanaakwe, wakamulefula abuumbi. (Milimo 15:​37, 38) Paulo naakwiinga wakasuminisha bukaalo ubu kumupa kucileka kunooba pomwi abaabo bakamukalasha. Muciindi cakucita boobo, wakatolelela kubona bashominyina ayi balayandika alimwi wakatolelela kusebensela Yehova cakushomeka. Ino nciinshi cakamucafwa? Paulo wakalinga kubasuni bashominyina. Lusuno ndwaakalinga kucite pabamwi lwakamucafwa kubikila maano kumibo yabo ibotu, kuteshi kushintu nshobatakalinga kucita kabotu. Alimwi lusuno lwakacafwa Paulo kulekelela bamwi kweelana alilembo lya bushiku bwasunu mbolyaamba. w24.03 pe. 15 mapa. 4-5

Mu Baibo muli makani aanji atondesha kuyandika kwa kulibombya. Amuyeeye pacakubonenaako cakwe Isaki. Ndyaakekala ku Gela, bene Filisiti bakalinga bene musena uyu bakamunyumfwila munyono akufukila mikalo basebenshi ba baishi njobakalinga bakaba. Muciindi cakulwana ambabo kwaamba ayi bataifukili mikalo, Isaki wakasalawo kulonga pomwi amukwashi wakwe kuya kulaale uko nkwaakaya mukukaba mikalo imwi. (Mata. 26:​12-18) Sombi bene Filisiti bakaamba ayi maanshi ayo akalinga mumikalo njaakakaba aalo ngabo. Nabi kwaamba ayi bakacita boobo, Isaki wakasalawo kulonga akubashiya muluumuno. (Mata. 26:​19-25) Ino nciinshi cakamucafwa kutolelela kulibombya nabi cakaboneka kwaamba ayi bamwi bakalinga kusunibo kumukalasha? Ncakutatoonsha kwaamba ayi wakeeya shiinji kuswa ku cakubonenako cakwe Abulaamu mbwaakalinga ‘kucita shintu muluumuno’ a Sala mbwaakalinga ‘kukalika moyo akulibombya.’—1 Pit. 3:​4-6; Mata. 21:​22-34. w23.09 pe. 15 pala. 4

Ceebo ca lusuno Yehova wakatuma Mwanaakwe wakashalwabo eenka kusa pacishi mukwiisha bantu pa Bwaami bwakwe Lesa, akwaaba buumi bwakwe mbuli cilubula kwaamba ayi atulubule kububi alufu. Lyalo Yesu wakabushikwa akuboolela kwiculu mukweendelesha mu Bwaami bwakwe Lesa. Makani ayandika abuumbi aambwa mu Baibo nkusalashikwa kwa liina lyakwe Yehova paciindi ndyeshi akakumanishe luyaando ndwaakalengela cishi. Alimwi alaakucita boobo kwiinda mukusebensesha Bwaami bwakwe ubo bweendeleshekwa a Klistu. Taakuwo weenga waalula luyaando lwakwe Lesa. Wakatushomesha ayi shoonse shilaakuswitilila kweelana ambwaakaamba. (Isa. 46:10; Ebu. 6:​17, 18) Cishi cilaakuba paladaiso umo bamulunyungu lwakwe Adamu a Efa baluleme mweshi bakabe bamaninite, ‘akusangalala abuumi kwamuyayaya.’ (Kulu. 22:26) Sombi kuli ashimwi Yehova nsheshi akakumanishe. Luyaando lunene ndwaacite ndwaakwaamba ayi baanjelo boonse alimwi abantu bakabe bacatene. Lyalo baanjelo boonse alimwi abantu balaakunonyumfwila Yehova mbuli Mweendeleshi wabo. (Efe. 1:​8-11) Sa kushiba Yehova mbwaakumanisha luyaando lwakwe munshila ili kabotu kwamusangalasha? w23.10 pe. 20 mapa. 7-8

BaJuda bakaswa ku Babiloni ndyebakashika ku Jelusalemu, cakababeta ciyumu kucana shiyandika sha mikwashi yabo, mu bwaami bwa bene Pesha mwakalinga nkoondo alimwi bakalinga kupikishikwa kushishi shimwi. Aboobo bamwi cakabayumina kubikila maano ku kuyaka cipya tempele yakwe Yehova. Yehova wakatuma bashinshimi bobilo, Agayi a Sekaliya, kuya mukucafwa bantu kwaamba ayi batalike kusebensa cankusu muncito yakwe. Alimwi kuyuminisha kwa bashinshimi aba kwakacafwa. (Aga. 1:1; Seka. 1:1) Nacibi boobo, pesule lya myaaka pafwiifwi a 50, baJuda bakalinga kuyandika kuyuminishikwa alimwi. Lyalo Esila shikukopolola Milawo, wakesa ku Jelusalemu kuswa ku Babiloni mukuyuminisha bantu bakwe Lesa kwaamba ayi babikile maano kukulambila kwancine. (Esila 7:​1, 6) Bweenka bushinshimi bwakwe Agayi a Sekaliya mbobwakacafwa bantu bakwe Lesa kutolelela kucinka manungo muli Yehova ndyebakalinga kupikishikwa, aswebo inga bwatucafwa kushoma ayi Yehova alaakutucafwa ndyetutokwiinda mumapensho.—Tus. 22:19. w23.11 mape. 14-15 mapa. 2-3

Ino tulatondesha buyani ayi tulisuni bashominyineesu? Nshila yomwi nkwiinda mukubayuminisha. Kunyumfwila bamwi inkumbu, kulaakutucafwa ‘kutolelela kubayuminisha.’ (1 Tesa. 4:18) Ino inga twacita buyani kwaamba ayi tutolelele kusunana abuumbi? Inga twacita boobo kwiinda mukulekelela bamakwesu nabi ndyecibete ciyumu kucita boobo. Ino nceebonshi ncotuyandikila bunene kutondesha lusuno munshiku shino? Pita wakaamba ayi: ‘Mamanino ashintu shoonse ali pafwiifwi. Aboobo, . . . amusunane abuumbi.’ (1 Pit. 4:​7, 8) Ino nshiinshi nsheenga twalangila mamanino acishi cino cibiibi ndyatooya cisena pafwiifwi? Kwaamba pa bashikwiiya bakwe, Yesu wakaambila limwi ayi: “Bantu ba mishobo yoonse balaakumupata ceebo ca liina lyangu.” (Mate. 24:9) Tulyeelete kutolelela kuba bacatene kwaamba ayi tucikoonshe kutolelela kushomeka kuli Yehova bantu ndyebatupata. Na katusuni bamakwesu abenankashi, Satana teshi akacikoonshe kutupansaanya.—Filip. 2:​1, 2. w23.11 pe. 13 mapa. 18-19

Cancine camu Maswi akwe Lesa cilicite nkusu abuumbi. Kuli shibotu shiswaamo na katwiisha bantu pali Yehova apamibo yakwe. Bantu balacileka kushoma bubeshi bwakwe Satana alimwi balatalika kubona mibo ibotu Ishiwesu njaacite. Balamulemeka abuumbi ceebo cakushiba nkusu shiinditeewo nshaacite. (Isa. 40:26) Baleeya kucinka manungo muli nguwe ceebo cakwaamba ayi alacita shintu mubululami. (Duto. 32:4) Baleeya shiinji pabusongo mbwaacite. (Isa. 55:9; Loma. 11:33) Alimwi balayuminishikwa kushiba ayi mubo unene ngwaacite ndusuno. (1 Joni 4:8) Ndyebatooya ciba abushicibusa buyumu a Yehova, balashoma cakutatonsha ayi kulangila nkobacite kwakukala kwamuyayaya kulaakukumanishikwa. Tulicite coolwe cibotu abuumbi cakucafwa bantu kwaamba ayi babe bushicibusa a Ishiwabo! Na twacita boobo Yehova alatubona ayi tuli ‘basebenshinyina.’—1 Koli. 3:5. w24.02 pe. 12 pala. 15

Na muli shikwiiya Baibo nabi na bashali banu Mbakamboni, sa mutoyeeya kubombekwa? Ici ncintu cibotu nceenga mwasalawo kucita! Nacibi boobo, kamutana kubombekwa, mulyeelete kwaaba buumi bwanu kuli Yehova. Ino mulyeelete kucita buyani kwaamba ayi mwaabe buumi bwanu kuli Yehova? Mulashomesha Yehova mumupailo ayi mulaakunolambila nguwe eenkabo alimwi mulaakubika panembo kucita kuyanda kwakwe mubuumi bwanu. Lyalo mulamushomesha ayi mulaakutolelela kumusuna ‘amoyo wanu woonse, abuumi bwanu boonse, amiyeeyo yanu yoonse alimwi ankusu shanu shoonse.’ (Maako 12:30) Mulalyaaba kuli Yehova kamulibo nweenka. Mubupusano, kubombekwa kulacitwa kunembo lya bantu baanji; alimwi bamwi balashiba ayi mwakalyaaba kuli Lesa. Kulyaaba ncishomesho ciyandika abuumbi. Mulyeelete kuba bashinishite kucita kweelana ambomwakashomesha Yehova alimwi alakwe mbwaamulangila kucita.—Shiku. 5:​4, 5. w24.03 pe. 2 pala. 2; pe. 3 pala. 5

Mushikwati shoonse mulaba mapensho. Baibo ilaamba cakuteenda mweela ayi bantu na beebana ‘balaakwiinda mumakatasho.’ (1 Koli. 7:28) Ino nceebonshi? Mukwiinga musankwa amwanakashi boonse tabamaninite, balaba amibo ipusene alimwi balasuna shintu shipusene. Alimwi mpashi bakakomenena kumisena ipusene amubukaalo bupusene. Mpashi inga batalika kutondesha mibo njobatakalinga kutondesha kabatana kweebana. Ishi shoonse inga shapa kwaamba ayi batanoonyumfwana kabotu. Inga batalika kupaana milandu pamapensho ngobatokwiindaamo mucikwati nabi kwaamba ayi boonse balacita shilubo alimwi balyeelete kusebensela pomwi kwaamba ayi bamane mapensho ayo. Alimwi mpashi inga batalika kuyeeya ayi kupansaana nabi kulekana nkweenga kwacafwa. Ano sa kusalawo kupansaana nabi kulekana nkweenga kwamana mapensho mucikwati? Sobwe. Yehova alisuni kwaamba ayi musankwa amwanakashi beebene batolelele kuba pomwi nabi kwaamba ayi umwi nciyumu kukalaakwe. w24.03 pe. 16 pala. 8; pe. 17 pala. 11

Pesule lyakwaamba ayi mwaaba buumi bwanu kuli Yehova akubombekwa, mwakatolelela kwiiya shiinji pali nguwe akushimpa lwakumushimu, lyalo kulangila kwanu kwakukala kwamuyayaya mu paladaiso pacishi kwakayuminaako. (Ebu. 5:13–6:1) Mpashi shaambwa pa Bene Loma 5:​2-4 shakamucitikilaawo. Mwakeenda mumapensho apusenepusene, sombi mwakaliyumya alimwi mwakabona ayi Yehova wakalinga kusangalete pali ndimwe. Mukwiinga mulishi kwaamba ayi Yehova alimusuni alimwi alisangalete pali ndimwe, mulashoma cakutatoonsha ayi alaakukumanisha nshaakamushomesha. Kulangila kwanu kwayuminaako kwiinda mbokwakalinga ndyemwakatalikabo kwiiya cancine. Alimwi kulangila nkomucite mulikusuni abuumbi. Kulakuma shintu shoonse nshomucita mubuumi bwanu akwaalula nshomucita ku bamumukwashi wanu, mbomusala shakucita alimwi ambomusebensesha ciindi ncomucite. Mutumwi Paulo wakaamba citeente cimwi ciyandika abuumbi pakulangila nkomucite ceebo cakwaamba ayi mulacita shisangalasha Lesa. Paulo wakaamba ayi nshomutolangila shilaakukumanishikwa.—Loma. 15:13. w23.12 mape. 12-13 mapa. 16-19

Ndyetutokwiinda mubukaalo buyumu, inga catuyumina kulinyumfwa, kuyeeya, akucita shintu bweenka mbotucita lyoonse. Bweenka bwaato mbobutolanishikwa kumaaba na palweenge pesa cipuupu cinene, aswebo inga twatalika kulinyumfwa munshila shipusenepusene. Ino Yehova alatucafwa buyani na twatalika kulinyumfwa munshila shipusenepusene ndyetuli mubukaalo buyumu? Wakatushomesha ayi alaakutucafwa kutatenkaana. Na palweenge pesa cipuupu cinene, bwaato inga bwatalika kutenkaanishikwa abuumbi kumaaba. Kwaamba ayi bwaato butanootolanishikwa kumaaba, maato amwi alaba asheela mweela kumbasu shoonse shobilo. Sheela isho shilacafwa bwaato kutatenkaana bunene, alimwi batantitemo inga bendabo kabotu. Nacibi boobo, sheela shiinji isho shilasebensa kabotu na bwaato butokweenda. Aswebo Yehova inga watucafwa kutatenkaana na twatolelela kumusebensela cakushomeka, nabi ndyetuli mubukaalo buyumu. w24.01 pe. 22 mapa. 7-8

Na mwaloonda, amuliipushe ayi, ‘Ino nshiinshi Yehova nshaakacitawo kale?’ Amukutumane kuyeeya pashintu nshaakalenga. Kucakubonenaako, na twabona Yehova mbwaabikila maano tuyuni amaluba—isho shitana kulengwa mucikoshanyo cakwe alimwi sheenga tashimulambili—tulashoma cakutatoonsha ayi ananotubikilako maano. (Mate. 6:​25-32) Alimwi amuyeeye Yehova nshaakacitila basebenshi bakwe. Inga mweeya pamuntu umwi waambwa mu Baibo uyo wakatondesha lushomo luyumu, na mpashi kubelenga makani aamba pamusebenshi umwi wakwe Yehova wa munshiku shino. Kwiilikaawo, inga mwakutumana kuyeeya pashintu Yehova nshaakamucitila kutondesha ayi alamubikilako maano. Ino wakamucafwa buyani kwaamba ayi mwiiye cancine? (Joni 6:44) Ino mipailo yanu wakaikumbula buyani? (1 Joni 5:14) Ino mulafubilaamo buyani mumulambu wacilubula ca Mwanaakwe ngwaasuni abuumbi?—Efe. 1:7; Ebu. 4:​14-16. w24.01 pe. 4 pala. 6; pe. 7 pala. 17