Amutolelele Kusebensela Yehova Nabi Ndyemwakalashikwa na Kulefuka

1. Ino nshoolwe nshi shimwi nshotucite ceebo cakuba lubasu lwa libunga lyakwe Yehova?

TULICITE coolwe cinene kuba lubasu lwa libunga lyakwe Yehova ndyetuli munshiku shino shiyumu shakweelaako. Shintu mucishi shitooya cibicilaako, sombi Yehova wakatupa bamakwesu abenankashi kwaamba ayi banootucafwa. (Kulu. 133:1) Alatucafwa kuba alusangalalo mumikwashi yesu. (Efe. 5:33–6:1) Alimwi alatupa busongo ubo butucafwa kuba alusangalalo akutanolisukama abuumbi.

2. Ino nshiinshi nshotuyandika kucita, alimwi ino nceebonshi?

² Nacibi boobo, tulyeelete kusebensa cankusu kwaamba ayi tutolelele kusebensela Yehova cakushomeka. Ino nceebonshi? Mukwiinga cimwi ciindi bamwi inga batukalasha ceebo ca shintu nshobaamba anshobacita. Alimwi mpashi inga twalefuka ceebo ca shilubo nshotwakacita, bunene bunene na twabooshaawo kucita shilubo isho mankanda aanji. Tulyeelete kutolelela kusebensela Yehova na (1) mukwesu nabi nankashi watukalasha, (2) ngotweebenaakwe watukalasha, alimwi (3) na twalefuka ceebo cakucita shilubo. Mumutwi uyu, tutoobandika pabukaalo ubu bomwi abomwi. Alimwi tutoobandika ansheenga tweeya kubantu botatwe baambwa mu Baibo abo bakatolelela kushomeka.

AMUTOLELELE KUSEBENSELA YEHOVA NA MUSHOMINYINAANU WAMUKALASHA

3. Ino ndipenshi nshi bantu bakwe Yehova ndyebendaamo?

³ Lipenshi. Bashominyineesu bamwi balicite mibo yeenga yatukalasha. Inga bacita cintu ceenga catulefula na kutucitila shintu shitabete kabotu. Bamanene abalo inga bacita shilubo. Na shamushobo uyu shacitika, bamwi inga batalika kutoonsha na tuli mulibunga lyakwe Lesa. Muciindi cakutolelela kusebensela Yehova pomwi abamakwesu abenankashi “camoyo womwi,” inga bacileka kubandika abaabo bakabakalasha nabibo kucileka kucanika kumabungano. (Sefa. 3:9) Sa kucita boobo kuli kabotu? Amuleke tubandike nsheenga tweeya kumuntu umwi waambwa mu Baibo uyo wakeenda mumapensho mbuli aaya.

4. Ino ngamapensho nshi mutumwi Paulo ngakeendaamo?

⁴ Cakubonenaako camu Baibo. Mutumwi Paulo wakalinga kucishi ayi bashominyina tabakalinga kumaninitewo. Kucakubonenaako, bamwi mulibungano lyaku Jelusalemu, tabakalinga kushoma ayi ngushikwiiya ndyebakakumanaakwe. (Milimo 9:26) Ndipakeenda ciindi, bamwi bakatalika kwaamba shibiibi pali nguwe kwaamba ayi bamwi bacileeke kumushoma. (2 Koli. 10:10) Paulo wakabona munene wakasalawo kucita cintu citabete kabotu mpashi cakakalasha bamwi. (Gala. 2:​11, 12) Alimwi Maako shicibusa wakwe umwi uyo ngwaakalinga kunyumfwanaakwe, wakamulefula abuumbi. (Milimo 15:​37, 38) Paulo naakwiinga wakasuminisha bukaalo ubu kumupa kucileka kunooba pomwi abaabo bakamukalasha. Muciindi cakucita boobo, wakatolelela kubona bashominyina ayi balayandika alimwi wakatolelela kusebensela Yehova cakushomeka. Ino nciinshi cakamucafwa?

5. Ino nciinshi cakacafwa Paulo kutolelela kunoocanika pomwi abashominyina? (Bene Kolose 3:​13, 14) (Amubone acikope.)

⁵ Paulo wakalinga kubasuni bashominyina. Lusuno ndwaakalinga kucite pabamwi lwakamucafwa kubikila maano kumibo yabo ibotu, kuteshi kushintu nshobatakalinga kucita kabotu. Alimwi lusuno lwakacafwa Paulo kulekelela bamwi kweelana ambwaakatulwiita kucita pa Bene Kolose 3:​13, 14. (Amubelenge.) Amubone Paulo mbwaakalekelela Maako. Nabi kwaamba ayi Maako wakashiya Paulo palweendo lwakwe lwa bumishonali lwakutaanguna, Paulo taakwe kutolelela kunookalalitebo. Lyalo Paulo ndyaakalembela bene Kolose nkalata iyuminisha, wakalumbaisha Maako ayi ngu musebenshinyina uyandika alimwi ‘umuyuminisha abuumbi.’ (Kolo. 4:​10, 11) Alimwi Paulo ndyaakalinga kwangitwe ku Loma, wakasenga ayi Maako aye mukumucafwa. (2 Timo. 4:11) Ncakutatoonsha kwaamba ayi Paulo wakalekelela bashominyina akutolelela kunoocanika pomwi ambabo. Ino nshiinshi nsheenga tweeya kuswa kucakubonenaako cakwe Paulo?

6-7. Ino nshiinshi sheenga shatucafwa kutolelela kutondesha lusuno ku bamakwesu abenankashi nabi kwaamba ayi cimwi ciindi inga batukalasha? (1 Joni 4:7)

⁶ Ncetutokwiiyawo. Yehova alisuni kwaamba ayi tutolelele kunotondesha lusuno ku bamakwesu abenankashi. (Amubelenge 1 Joni 4:7.) Na bamakwesu abenankashi bacita cintu ncotutalangili Mwineklistu kucita, inga twashoma ayi tabana kucita kashanga alimwi batokweelesha kucita shintu Yehova nshaamba ayi shililuleme. (Tus. 12:18) Lesa alibasuni basebenshi bakwe bashomeka nabi kwaamba ayi balacita shilubo. Alatolelela kuba abushicibusa andiswe nabi kwaamba ayi twaciita shilubo; alimwi taatubikili mfundilishi. (Kulu. 103:9) Tulalumba abuumbi kwaamba ayi Yehova alatulekelela! Aboobo aswebo tulyeelete kunolekelela bamwi bweenka Yehova mbwaacita.—Efe. 4:32–5:1.

⁷ Alimwi munokwiibaluka ayi mamanino ndyaatoya cisena pafwiifwi, tulyeelete kutolelela kuba abushicibusa buyumu abamakwesu abenankashi. Inga twalangila ayi kupenshekwa kulaakwiindaawo. Alimwi mpashi inga twaangwa ceebo calushomo lwesu. Na ishi shikacitike, ndyeshi tukayandike bunene lucafwo kuswa ku bamakwesu abenankashi. (Tus. 17:17) Amuyeeye shakacitikila munene mulibungano waliina lya Josep,a uyo ukala ku Spain. Lakwe abamakwesu bamwi bakaangwa ceebo cakukaka kunjila busoja. Wakaamba ayi: “Ndyetwakalinga mujeele, cakalinga cuubu kukalashanya amushominyoko ceebo cakwaamba ayi twakalinga kukala pomwi. Twakalinga kulekelelana amoyo woonse. Kucita boobo kwakatucafwa kuba bacatene akutolelela kucafwana. Bakaili mbotwakalingaabo tabakalinga kusebensela Yehova. Paciindi cimwi ndakalicisa kulyaansa lyalo bakaŋanga bandeji, aboobo nshindakalinga kucikonsha kulicitila shintu. Sombi mukwesu umwi wakalinga kungwashilako shakufwala akuncitilako shintu shimwi. Ndakatondeshekwa lusuno lwancinencine paciindi ndyendakalinga kuyandika kucafwikwa.” Ishi nsheebo shibotu sheelete kutupa kweelesha kunonyumfwana abashominyineesu pacecino ciindi!

AMUTOLELELE KUSEBENSELA YEHOVA NA NGOMWEBENAAKWE WAMUKALASHA

8. Ino ndipenshi nshi beebene ndyobeendaamo?

⁸ Lipenshi. Mushikwati shoonse mulaba mapensho. Baibo ilaamba cakuteenda mweela ayi bantu na beebana ‘balaakwiinda mumakatasho.’ (1 Koli. 7:28) Ino nceebonshi? Mukwiinga musankwa amwanakashi boonse tabamaninite, balaba amibo ipusene alimwi balasuna shintu shipusene. Alimwi mpashi bakakomenena kumisena ipusene amubukaalo bupusene. Mpashi inga batalika kutondesha mibo njobatakalinga kutondesha kabatana kweebana. Ishi shoonse inga shapa kwaamba ayi batanoonyumfwana kabotu. Inga batalika kupaana milandu pamapensho ngobatokwiindaamo mucikwati nabi kwaamba ayi boonse balacita shilubo alimwi balyeelete kusebensela pomwi kwaamba ayi bamane mapensho ayo. Alimwi mpashi inga batalika kuyeeya ayi kupansaana nabi kulekana nkweenga kwacafwa. Ano sa kusalawo kupansaana nabi kulekana nkweenga kwamana mapensho mucikwati?b Amuleke twiiye kucakubonenaako ca mwanakashi umwi waambwa mu Baibo uyo wakatolelela kushomeka kuli Yehova nabi kwaamba ayi ibaye wakalinga kucita shintu shibiibi abuumbi.

9. Ino ndipenshi nshi Abigelo ndyakacana?

⁹ Cakubonenaako camu Baibo. Abigelo wakalinga kweebetwe kuli Nabali uyo Baibo ngoyaamba ayi wakalinga shilunkutwe alimwi ucenena. (1 Samwe. 25:3) Cilyeelete tacakalinga cuubu kuli Abigelo kukala amusankwa uyu. Sa Abigelo wakalinga kucite coolwe cakumana cikwati cakwe? Ee. Wakaba acoolwe ici Defedi uyo wakalinga kusa mukuba mwaami wa bene Isilaeli, ndyakesa mukucaya ibaye ceebo cakumucobola pomwi abasankwa bakwe. (1 Samwe. 25:​9-13) Abigelo naakwiinga wakacica kwaamba ayi Defedi acaye Nabali. Muciindi cakucita boobo, wakabandika munshila yakapa kwaamba ayi atacayi Nabali. (1 Samwe. 25:​23-27) Ino nceebonshi ncaakacitila boobo?

10. Ino nceebonshi Abigelo wakatolelela kuba mucikwati nabi kwaamba ayi bukaalo bwakalinga buyumu?

¹⁰ Abigelo wakalinga kusuni Yehova alimwi wakalinga kubona cikwati bweenka Yehova mbwaacibona. Cilyeelete kwaamba ayi wakalinga kucishi Yehova nshaakalwiita Adamu a Efa, ndyaakatalika cikwati. (Mata. 2:24) Abigelo wakalinga kucishi ayi cikwati cilisalalite kuli Yehova. Wakalinga kusuni kusangalasha Lesa, aboobo ici mpashi ncocakapa kwaamba ayi acite nsheenga wacikonsha kupulusha bamuŋanda yakwe, kwiilikaawo a ibaye. Wakacitawo comwi cakufwambaana kwaamba ayi Defedi atacayi Nabali. Alimwi wakalinga kulibambite kusenga kulekelelwa pacilubo ncaatana kucita. Ncakutatoonsha kwaamba ayi Yehova wakalinga kumusuni mwanakashi uyu musongo alimwi wakalinga kubikila maano kubamwi. Ino nshiinshi nsheenga beebene beeya kuswa kucakubonenaako cakwe Abigelo?

11. (a) Ino beebene Yehova alabalangila kucita nshi? (Bene Efeso 5:33) (b) Ino nshiinshi nshomweeya kusheesho ba Carmen nshobakacita kwaamba ayi cikwati cabo citamaani? (Amubone acikope.)

¹¹ Ncetutokwiiyawo. Yehova alisuni kwaamba ayi musankwa amwanakashi beebene batolelele kuba pomwi nabi kwaamba ayi umwi nciyumu kukalaakwe. Lesa alasangalala abuumbi na wabona beebene kabasebensa cankusu kumana mapensho mucikwati cabo alimwi akutondeshanya lusuno lwancinencine abulemu. (Amubelenge Bene Efeso 5:33.) Amuyeeye pacakubonenaako caba Carmen. Ndyepakeenda myaaka pafwiifwi a 6 pesule lyakweebwa, bakatalika kwiiya Baibo a Bakamboni Bakwe Yehova lyalo mukuya kwaciindi bakabombekwa. Bakaamba ayi: “Beebangu tabakwe kukondwaawo panshondakasala kucita. Bakalinga kukalala ceebo cakwaamba ayi cimwi ciindi nshindakalinga kuba pomwi ambabo ceebo cakuba kumabungano akuba ushinishite kusebensela Yehova. Bakalinga kuntukana akundwiita ayi batonkaka.” Nacibi boobo, ba Carmen bakatolelela kuba mucikwati. Kwamyaaka 50, bakasebensa cankusu kunotondesha lusuno abulemu kubeebabo. Bakatolelela akwaamba ayi: “Ndipakeenda myaaka, ndakeeya kunyumfwishisha beebangu mbobakalinga kulinyumfwa akubandikaabo munshila ili kabotu. Ndakacita nsheenga ndacikonsha kwaamba ayi nshitilishe cikwati cesu, ceebo cakushiba ayi cilisalalite kuli Yehova. Nshina kuyeeya kulekana abeebaangu mukwiinga ndisuni Yehova.”c Na mwaba mapensho mucikwati canu, inga mwashoma ayi Yehova alaakumucafwa kutolelela kuba pomwi angomweebenaakwe.

AMUTOLELELE KUSEBENSELA YEHOVA NABI NDYEMWALEFUKA CEEBO CAKUCITA SHILUBO

12. Ino ndipenshi nshi ndyeenga twacaana na twaciita cilubo cinene?

¹² Lipenshi. Inga twalinyumfwa kulefuka abuumbi na twaciita cilubo cinene. Baibo ilatondesha ayi na twaciita shilubo inga twalinyumfwa “buumba akulefuka.” (Kulu. 51:​17, NWT) Mukwesu waliina lya Mike wakasebensa cankusu kwaamba ayi eelele kusebensa mbuli musebenshi ucafwilisha. Nacibi boobo, wakacita cilubo cinene akushiba ayi wapondokela Yehova. Wakaamba ayi: “Ndyendakashiba ncendakacita, njeelacaamba yakampensha abuumbi. Lyalo ndakanyumfwa mumala mwakeenda. Ndakalila akupaila kuli Yehova. Ndakayeeya ayi Yehova inga taeeleshi akukutika kumipailo yangu ceebo cakwaamba ayi ndakamukalasha.” Na twaciita cilubo cinene, inga twalefuka abuumbi akutalika kuyeeya ayi Yehova watukaka alimwi ayi kumusebensela nkulipenshabo. (Kulu. 38:4) Na mwakalinyumfwawo kale boobo, amuyeeye pa cakubonenaako camusankwa umwi ushomeka waambwa mu Baibo uyo wakatolelela kusebensela Yehova nabi ndyakacita cilubo cinene.

13. Ino ncilubo nshi cinene Pita ncaakacita, alimwi ino nshilubo nshi nshaakacita kaatana kucita cilubo ico?

¹³ Cakubonenaako camu Baibo. Mashiku Yesu kaatana kucaikwa, Pita wakacita shilubo shiinji isho shakapa kwaamba ayi acite cilubo cinene abuumbi. Cakutaanguna, Pita wakalishoma akulinyumfwa ayi alakutolelela kushomeka nabi batumwi bamwi bakakake Yesu. (Maako 14:​27-29) Lyalo ndyebakalinga mumuunda wa Getisemani, mankanda aanji Pita wakaalilwa kutolelela kuba ulibambite kulindilila. (Maako 14:​32, 37-41) Alimwi ndyekwakesa bantu baanji mukucata Yesu kabacite mipeeni ankooli, Pita wakacica. (Maako 14:50) Mukweelaako, Pita wakakaka Yesu mankanda otatwe akulumbila ayi taamwishiiwo. (Maako 14:​66-71) Ino Pita wakacita buyani ndyaakashiba ayi wacita cilubo cinene? Wakalinyumfwa cibiibi abuumbi akulila ceebo ca cilubo ncaakacita. (Maako 14:72) Amuyeeyebo Pita mbwaakapenshekwa mumoyo Yesu shicibusa wakwe ndyaakacaikwa ndyepakeendabo mawoola aniini. Pita alyeelete wakalinyumfwa kubula mpindu!

14. Ino nciinshi cakacafwa Pita kutolelela kusebensela Yehova? (Amubone cikope cili papeeji yakutaanguna.)

¹⁴ Kuli sheebo shiinji shakapa Pita kutolelela kusebensela Yehova. Taakalinga kulitalamusha kubamwi; wakaya kubashikwiiya bamwi alimwi bakamuyuminisha. (Luka 24:33) Kwiilikaawo, Yesu ndyaakabushikwa wakabonekela kuli Pita mpashi kwaamba ayi amuyuminishe. (Luka 24:34; 1 Koli. 15:5) Ndyepakeenda ciindi, muciindi cakwaamba ayi Yesu akalalile Pita pashilubo nshaakacita, wakamulwiita ayi alaakupekwa mikuli inene. (Joni 21:​15-17) Pita wakalinga kucishi ayi wakacita cilubo cinene, sombi wakatolelela kweelesha kucita shiluleme. Ino nceebonshi? Mukwiinga wakalinga kushomete cakutatoonsha ayi Yesu Mwaami wakwe acimusuni. Alimwi Pita wakatolelela kucafwikwa kubashominyina. Ino nshiinshi nsheenga tweeya kuswa kucakubonenaako cakwe Pita?

15. Ino nciinshi Yehova ncaasuni ayi tunoshoma cakutatoonsha? (Kulumbaisha 86:5; Bene Loma 8:​38, 39) (Amubone acikope.)

¹⁵ Ncetutokwiiyawo. Yehova alisuni ayi tushome cakutatoonsha ayi alitusuni alimwi alilibambite kutulekelela. (Amubelenge Kulumbaisha 86:5; Bene Loma 8:​38, 39.) Na twabisha tulalinyumfwa cibiibi. Kulinyumfwa boobo kulibo kabotu. Nacibi boobo, tatweelete kunoyeeya ayi Yehova taatusuniiwo na ayi inga taatulekeleliiwo. Muciindi cakuyeeya boobo tulyeelete kusenga lucafwo peenkaapo. Ba Mike mbotwalinga twaambawo bakaamba ayi: “Ndakabisha mukwiinga ndakalinga kucinka manungo munkusu shangu kwaamba ayi nkake bweelesho.” Bakashiba ayi bakalinga kweelete kubandika abamanene. Bakaamba ayi: “Ndyendakabandika abamanene, bakancafwa kushiba ayi Yehova alinsuni. Alimwi ndakalinyumfwa ayi abalo bamanene bakalinga kunsuni. Bakancafwa kushoma ayi Yehova taakwe kunkaka.” Aswebo inga twashoma ayi Yehova alitusuni abuumbi alimwi alatulekelela na twaana pa shilubo shesu, twasenga lucafwo ndotutoyandika, akweelesha cankusu kutabooshawo kucita shilubo isho. (1 Joni 1:​8, 9) Na twashoma cakutatoonsha ayi Yehova alitusuni alimwi alisuni kutulekelela, teshi tukacileeke kumusebensela nabi twaciita cilubo.

16. Ino nceebonshi mulishinishite kutolelela kusebensela Yehova?

¹⁶ Yehova alalumba abuumbi pakweelesha cankusu kwesu kumusebensela ndyetuli munshiku shino shakweelaako shiyumu. Kwiinda mulucafwo lwakwe Yehova, inga twatolelela kumusebensela cakushomeka nabi twalefuka ceebo ca shilubo shesu na kukalashikwa kubamwi. Inga twatolelela kusuna bamakwesu abenankashi akubalekelela nabi kwaamba ayi batukalasha. Inga twatondesha ayi tulisuni Lesa abuumbi alimwi tulalemeka cikwati kwiinda mukucita nsheenga twacikonsha kwaamba ayi tumane mapensho ngeenga twacaana mucikwati cesu. Alimwi na twaciita cilubo, inga twasenga kwaamba ayi Yehova atucaafwe, kushoma ayi alitusuni alimwi inga watulekelela, akutolelela kumusebensela. Inga twashoma cakutatoonsha ayi Yehova alaakutupa shoolwe shiinji na twabula ‘kucileka kucita shibotu.’—Gala. 6:9.