Liina Lyakwe Yehova Lilayandika Abuumbi Kuli Ndiswe

1-2. Ino tulishi buyani ayi liina lyakwe Yehova lilayandika abuumbi kuli Yesu?

LIINA lyakwe Yehova lilayandika abuumbi kuli Yesu. Lakwe ngowakacita shiinji kwaamba ayi liina lyakwe Yehova lishibikwe. Kweelana ambotwakeeya mumutwi wamana, Yesu wakalyaaba kufwitawo paliina lyakwe Yehova kwaamba ayi atondeshe ayi lilisalalite alimwi ayi lyoonse Yehova alacita shintu shiluleme. (Maako 14:36; Ebu. 10:​7-9) Pesule lya Buleelo Bwakwe bwa Myaaka 1,000, Yesu alaakuboosha Bwaami kuli Yehova mukwiinga alisuni ayi Baishi bakalemekwe mbabo. (1 Koli. 15:​26-28) Shintu shoonse Yesu nshaakacitila Yehova, shakatondesha patuba ayi alibasuni abuumbi Baishi.

² Yesu wakesa pacishi mukwiimikaninaako Yehova. (Joni 5:43; 12:13) Wakacafwa bashikwiiya bakwe kushiba liina lya Baishi. (Joni 17:​6, 26) Wakalinga kwiisha bantu akucita shaankamiko muliina lyakwe Yehova. (Joni 10:25) Alimwi Yesu wakasenga Baishi ayi banoolama bashikwiiya bakwe “munkusu sha liina [lyabo].” (Joni 17:11) Ishi shoonse shilatondesha patuba ayi liina lyakwe Lesa lyakalinga kuyandika abuumbi kuli Yesu kwiinda cintu cili coonse. Aboobo ino muntu inga waamba buyani ayi ngu shikwiiya wakwe Yesu sombi kaateshi liina lyakwe Yehova nabi kulisebensesha?

3. Ino nshiinshi nsheshi twiiye mumutwi uyu?

³ Ceebo cakwaamba ayi tuli Beneklistu bancine, tulakonkela cakubonenaako cakwe Yesu kwiinda mukulemeka liina lyakwe Yehova akutondesha ayi tulilisuni. (1 Pit. 2:21) Mumutwi uyu, tutokwiiya Yehova ncaakapeta liina lyakwe kubaabo bashimikila ‘makani abotu a Bwaami’ munshiku shino. (Mate. 24:14) Tutokwiiya aliina lyakwe Yehova ncolyeelete kubeta liyandika kuli ndiswe soonse.

‘BANTU BEETWA LIINA LYAKWE’

4. (a) Ino nincito nshi Yesu njaakapa bashikwiiya bakwe kaatana kuboolela kwiculu? (b) Ino ngumwiipusho nshi ngweshi tubandikeewo?

⁴ Ndyekwakacaalabo paniini kwaamba ayi Yesu aboolele kwiculu, wakalwiita bashikwiiya bakwe ayi: ‘Mulaakutambula nkusu na mushimu usalashi ukese pali ndimwe, alimwi mulaakuba bakamboni bangu mu Jelusalemu, mu Judeya moonse alimwi amu Samaliya kushikila amucishi coonse capanshi.’ (Milimo 1:8) Aboobo bashikwiiya bakwe bakalinga kweelete kushimikila makani abotu mumisena yoonse kuteshibo mu Isilaeli. Mukuya kwaciindi, bantu bamishobo yoonse bakalinga kusa mukuba acoolwe cakuba bashikwiiya bakwe Yesu. (Mate. 28:​19, 20) Sombi Yesu wakaamba ayi: “Mulaakuba bakamboni bangu.” Sa bashikwiiya bakwe Yesu bapya bakalinga kweelete kushiba liina lyakwe Yehova, na bakalinga kweelete kubabo bakamboni bakwe Yesu camana? Makani ngotucana mu Milimo capita 15 atootucafwa kucana cikumbulo kumwiipusho uyu.

5. Ino batumwi abamanene ku Jelusalemu bakatondesha buyani kuyandika kwa kucafwa bantu kushiba liina lyakwe Yehova? (Amubone acikope.)

⁵ Mu 49 C.E., bamanene abatumwi ku Jelusalemu bakabungana kwaamba ayi babandikeewo na baswamashi bakalinga kuyandika kupalulwa kwaamba ayi babe Beneklistu. Kumamanino akubungana kwabo, Jemusi mukwabo Yesu wakucanaamo wakaamba ayi: ‘[Pita] waswa mukutusansulwita kabotu mbuli Lesa mbwaakabonesha lusuno kubaswamashi bakunsengwe akusala bantu pakati kabo ayi babe bantu beetwa liina lyakwe.’ Ino Jemusi wakalinga kwaamba paliina lya baani? Jemusi wakeelikaawo akwaamba maswi amushinshimi Amosi ayi: ‘Aboobo bantu bamwi boonse balaakulangoola nshila yakwe Yehova, nkokwaamba ayi baswamashi bakunsengwe boonse abo mbondakasala ayi babe bantu beetwa liina lyangu, mbwaamba Yehova.’ (Milimo 15:​14-18) Aboobo bashikwiiya aba bapya tabakalinga kweelete kwiiyabo paliina lyakwe Yehova, sombi bakalinga kusa mukunokwiitwa aliina lyakwe. Ici cilaamba ayi bakalinga kweelete kunoolwiitako bamwi liina lyakwe akushibikwa ayi baleemikaninaako liina ili.

6-7. (a) Ino nciinshi Yesu ncaakesita pacishi? (b) Ino ncintu nshi ciyandika Yesu ncaakesa mukucita pacishi?

⁶ Liina lyakwe Yesu lilasansulula ayi “Yehova ngo Mupulushi.” Alimwi wakasebensesha Yesu kwaamba ayi apulushe bantu boonse bashoma muli nguwe amu Mwanaakwe. Yesu wakesa pacishi mukwaaba buumi bwakwe kwaamba ayi alubule bantu. (Mate. 20:28) Ndyaakacita boobo, wakapa kwaamba ayi cikonsheke bantu kunoolekelelwa shibiibi shabo akulangila kuba abuumi butamaani.—Joni 3:16.

⁷ Sombi ino nceebonshi bantu bakalinga kuyandika cilubula? Nceebo ca shakacitika mumuunda wa Edeni. Kweelana ambotwakeeya mumutwi wamana, Adamu a Efa bashali besu bakutaanguna bakapondokela Yehova aboobo bakasowa coolwe cakukala kwamuyayaya. (Mata. 3:​6, 24) Sombi Yesu wakesa pacishi mukucita cintu cimwi cakalinga kuyandika abuumbi kwiinda kulubula bantu kuswa kububi alufu. Satana wakaamba bubeshi bubiibi abuumbi pali Yehova. (Mata. 3:​4, 5) Aboobo bantu bakalinga kweelete kushiba ayi taakuwo cibiibi Yehova ncaakacita alimwi ayi ngu Ishiwesu shilusuno. Yesu ngowakalinga kweelela kucafwa bantu kushiba cancine ici, mukwiinga wakalinga kwiimikaninaako Yehova alimwi wakakonkela kabotu shoonse Yehova nshaakalinga kusuni ayi acite.

8. Ino bashikwiiya bakwe Yesu boonse balyeelete kucita nshi?

⁸ Bashikwiiya bakwe Yesu boonse bakalinga kweelete kushiba Yehova Baishi Yesu, kwaamba bakapuluke. (Joni 17:3) Alimwi bweenka mbuli Yesu, abalo bakalinga kweelete kunookwiitwa liina lyakwe Yehova. Bakalinga kweelete kushiba akuyandika kwakusalasha liina ili. Bakalinga kweelete kunoocita boobo kwaamba ayi bakapuluke. (Milimo 2:​21, 22) Aboobo bashikwiiya bakwe Yesu boonse bashomeka bakalinga kweelete kwiiya pali Yehova apali Yesu. Ncoceeco Yesu wakamanisha mupailo ngotucana mu Joni capita 17 amaswi akwaamba ayi: ‘Ndabeeisha kwaamba ayi bamushibe [bashibe liina lyanu] alimwi ndanoobeeishabo kwaamba ayi lusuno ulo ndomucite pali ndime lube amuli mbabo anebo mbe muli mbabo.’—Joni 17:26.

“MULI BAKAMBONI BANGU”

9. Ino inga twatondesha buyani ayi liina lyakwe Yehova lilayandika abuumbi kuli ndiswe?

⁹ Kweelana ambotweeya, kwaamba ayi tube bashikwiiya bakwe Yesu tulyeelete kusalasha liina lyakwe Yehova. (Mate. 6:​9, 10) Tulyeelete kunobona ayi liina lyakwe Yehova lilayandika abuumbi kwiinda liina lili lyoonse. Alimwi tulyeelete kutondesha ayi ncakwiila lilayandika abuumbi kuli ndiswe. Aboobo ino nshiinshi nsheenga twaciita kwaamba ayi tusalashe liina lyakwe Yehova akutondesha ayi Satana nshakaamba pali Yehova nshakubeca?

10. Ino ngamakani nshi ngotucana mu Isaya capita 42-44? (Isaya 43:9; 44:​7-9) (Amubone acikope.)

¹⁰ Mu Isaya capita 42-44, muli makani atucafwa kushiba nsheenga twaciita kwaamba ayi tusalashe liina lyakwe Yehova. Muma capita aya Yehova alalwiita bantu batamulambili ayi batondeshe na balesa babo mbancine. Alimwi bweenka mbociba na muntu atokoomboloshekwa mukooti, alabalwiita ayi balete bakamboni bakubemikaninaako. Sombi tabacitewo kamboni nabi womwi!—Amubelenge Isaya 43:9; 44:​7-9.

11. Ino nshiinshi Yehova nshalwiita bantu bakwe pa Isaya 43:​10-12?

¹¹ Amubelenge Isaya 43:​10-12. Yehova alalwiita bantu bakwe ayi: “Muli bakamboni bangu kwaamba ayi ndimebo Lesa.” Alimwi alabeepusha ayi: “Sa kuliiwo Lesa umwi kulekabo ndime?” (Isa. 44:8) Tulicite coolwe cinene cakukumbula mwiipusho uyu. Kwiinda mushintu nshotwaamba anshotucita, tulatondesha ayi taakuwo Lesa umwi uli anga ngu Yehova. Liina lyakwe Iilinditeewo pa meena oonse. Kwiinda mushintu nshotucita, tulatondesha ayi tulimusuni abuumbi Yehova alimwi tulatolelela kushomeka kuli nguwe nabi Satana atweeleshe buyani. Na twacita boobo, tulasalasha liina lyakwe Yehova.

12. Ino bushinshimi mbotucana pa Isaya 40:​3, 5 bwakakumanishikwa buyani?

¹² Tulakonkela cakubonenaako cakwe Yesu na katwiimikaninaako liina lyakwe Yehova. Alimwi Isaya wakaambila limwi ayi muntu umwi ‘alakubaamba nshila yakwe Yehova.’ (Isa. 40:3) Ino bushinshimi ubu bwakakumanishikwa buyani? Joni Mubombeki wakabambila Yesu nshila, sombi yakalinga ni ‘nshila yakwe Yehova’ mukwiinga Yesu wakesita muliina lyakwe Yehova akunookwiisha bantu muliina ili. (Mate. 3:3; Maako 1:​2-4; Luka 3:​3-6) Alimwi Isaya wakaamba ayi: ‘Bulemu bwakwe Yehova bulaakuyubululwa.’ (Isa. 40:5) Ino bwakayubululwa buyani? Yesu ndyaakalinga pacishi, wakakonkela kabotu cakubonenaako ca Baishi cakwaamba ayi cakalingabo anga Yehova mwiine ngweesa pacishi.—Joni 12:45.

13. Ino cakubonenaako cakwe Yesu inga twacikonkela buyani?

¹³ Aswebo tuli bakamboni bakwe Yehova bweenka mbuli Yesu. Tuleetwa liina lyakwe Yehova alimwi tulalwiitako bantu boonse shintu shibotu nshaakacita. Sombi tulyeelete kunoobalwiitako apashintu shoonse Yesu nshaakacita kwaamba ayi asalashe liina lyakwe Yehova. (Milimo 1:8) Yesu ngo Kamboni winditeewo wakwe Yehova, lyalo swebo tulakonkela cakubonenaako cakwe. (Ciyu. 1:5) Ino nshiinshi shimwi nsheenga twaciita kwaamba ayi tutondeshe ayi liina lyakwe Yehova lilayandika abuumbi kuli ndiswe?

NSHILA SHIMWI MBOTUTONDESHA AYI LIINA LYAKWE YEHOVA LILAYANDIKA ABUUMBI KULI NDISWE

14. Kweelana a Kulumbaisha 105:​3, ino tulalinyumfwa buyani paliina lyakwe Yehova?

¹⁴ Tulisangalete kwiitwa liina lyakwe Lesa. (Amubelenge Kulumbaisha 105:3.) Yehova alasangalala abuumbi na katulilumbaisha muliina lyakwe. (Jele. 9:​23, 24; 1 Koli. 1:31; 2 Koli. 10:17) Tulabona ayi ncoolwe cinene kulwiitako bamwi ayi Yehova alisalalite alimwi ayi lyoonse alacita shintu shiluleme. Tatweelete kunonyumfwa nsoni kulwiitako mbotusebensaabo, mbotwiiyabo ambotubambenaabo ayi tuli Bakamboni bakwe Yehova! Satana alisuni ayi tucileeke kunoolwiitako bamwi paliina lyakwe Yehova. (Jele. 11:21; Ciyu. 12:17) Alimwi Satana abaabo baamba bubeshi bwakwe balisuni ayi bantu balube liina lyakwe Yehova. (Jele. 23:​26, 27) Sombi ceebo cakwaamba ayi tulisuni liina lyakwe Yehova, tulisuni kunoomulumbaisha ciindi cili coonse.—Kulu. 5:11; 89:16.

15. Ino kwiita paliina lyakwe Yehova cilaamba nshi?

¹⁵ Tulatolelela kwiita paliina lyakwe Yehova. (Loma. 10:​13, 14, NWT) Kwiita paliina lyakwe Yehova teshi kushibabo liina lyakwe Lesa akunoolisebensesha. Sombi cileelikaawo akumushiba kabotu Lesa, kunooshoma muli nguwe, akunoosenga lucafwo abutanjilishi kuli nguwe. (Kulu. 20:7; 99:6; 116:4; 145:18) Alimwi tulalwiitaako bamwi liina lyakwe amibo ibotu njaacite, akubacafwa kwaalula buumi bwabo kwaamba ayi banoosangalasha Yehova lyalo kunembo bakapuluke.—Isa. 12:4; Milimo 2:​21, 38.

16. Ino inga twatondesha buyani ayi Satana ngumubeshi?

¹⁶ Tulilibambite kupenga kwaamba ayi liina lyakwe Yehova lilemekwe. (Jemu. 5:​10, 11) Tulatondesha ayi Satana ngumubeshi, na twatolelela kushomeka kuli Yehova ndyetutopenga. Muciindi cakwe Jobo, Satana wakaamba pabaabo basebensela Yehova ayi: “Muntu ulaakonsha kupa shintu shoonse nshaacite kwiinda kufwa.” (Jobo 2:4) Satana wakalinga kusansulula ayi bantu inga kabasebenselabo Yehova na shintu kashibeendela kabotu, sombi na shintu shabayumina mubuumi inga bacileka kumusebensela. Jobo wakatondesha ayi ubu bwakalinga mbubeshi bwakwaansa. Aswebo tulicite coolwe cakutondesha ayi Satana ngumubeshi, kwiinda mukutolelela kusebensela Yehova nabi shintu shituyumine buyani mubuumi nabi na Satana weelesha kutulefula. Inga twashoma cakutatoonsha ayi Yehova alaakunootulama ceebo ca liina lyakwe.—Joni 17:11.

17. Kweelana a 1 Pita 2:​12, ino ninshila nshi imwi mbweenga twapa kwaamba ayi liina lyakwe Yehova lilemekwe?

¹⁷ Tulacita nsheenga twacikonsha kwaamba ayi tulumbaishe liina lyakwe Yehova. (Tus. 30:9; Jele. 7:​8-11) Ceebo cakwaamba ayi bantu balicishi ayi tuli Bakamboni Bakwe Yehova, nshotucita inga shapa kwaamba ayi liina lyakwe lilumbaishikwe nabi kusebaanishikwa. (Amubelenge 1 Pita 2:12.) Aboobo tulisuni kucita nsheenga twacikonsha kwaamba ayi tunoolumbaisha Yehova kwiinda mushintu nshotwaamba anshotucita. Na katucita boobo, tulaakunoolemeka liina lyakwe nabi kwaamba ayi tatumaninite.

18. Ino ninshila nshi imwi mbweenga twatondesha ayi liina lyakwe Yehova lilayandika abuumbi kuli ndiswe? (Amubone a futunoti.)

¹⁸ Tulalemeka liina lyakwe Yehova tacicite mulandu ansheenga bantu bayeeya pali ndiswe. (Kulu. 138:2) Ino nceebonshi kucita boobo kulayandika abuumbi? Mukwiinga na twaciita shintu shisangalasha Yehova, liinji bantu tabakondwi alimwi inga baamba shintu shibiibi palindiswe.a Yesu wakalinga kulibambite kufwa lufu lulensha nsoni mbuli kapondo kwaamba ayi alemeke liina lyakwe Yehova. Taakwe kunyumfwa nsoni kufwa lufu lwamushobo uyu mukwiinga taakwe kulisukama abuumbi pashintu bamwi nshobakalinga kuyeeya pali nguwe. (Ebu. 12:​2-4) Ncakabikilako maano nkucita kuyanda kwa Baishi.—Mate. 26:39.

19. Ino mulalinyumfwa buyani pa liina lyakwe Yehova, alimwi ino nceebonshi?

¹⁹ Tulilisuni abuumbi liina lyakwe Yehova alimwi tulalinyumfwa ayi ncoolwe cinene kwiitwa ayi Bakamboni Bakwe Yehova. Ceebo cakwaamba ayi liina lyakwe Yehova lilayandika abuumbi kuli ndiswe, tulaakutolelela kumulumbaisha nabi bamwi baambe shibiibi pali ndiswe. Liina lyakwe Yehova lilayandika abuumbi kuli ndiswe kwiinda ampuuwo yesu. Aboobo atube bashinishite kutolelela kulumbaisha liina lyakwe Yehova nabi Satana eeleshe buyani kutulefula. Na tukacite boobo, tulaakutondesha ayi liina lyakwe Yehova lilayandika abuumbi kuli ndiswe bweenka mboliyandika kuli Yesu Klistu.