‘ Uli Muntu Uyandika Abuumbi’!

1-2. Ino nciinshi nceenga twaciita kwaamba ayi tunooshoma cakutatonsha ayi tulayandika kuli Yehova?

BASEBENSHI bakwe Yehova balayandika abuumbi kuli nguwe. Sombi bamwi balalinyumfwa ayi Yehova tabasuniiwo, mpashi ceebo cakwaamba ayi umwi alabacitila shintu shibapa kulinyumfwa ayi taakuwo mbobabete. Sa amwebo cimwi ciindi mbomulinyumfwa ubo? Na mbomulinyumfwa, ino nshiinshi nsheenga mwaciita kwaamba ayi munooshoma ayi Yehova alamubona ayi mulayandika?

² Comwi nceenga mwaciita nkubelenga makani amu Baibo atondesha Yehova mbwaasuni ayi tunoobona bamwi anshotweelete kunoobacitila. Kucakubonenaako, Yesu wakalinga kutondesha bulemu kubantu akubacitila shibotu. Ndyaakacita boobo wakatondesha ayi bantu balinyumfwa ayi taakuwo mbobabete balayandika abuumbi kuli nguwe akuli Baishi. (Joni 5:19; Ebu. 1:3) Aboobo mumutwi uyu, tutobandika pashintu Yesu nshaakacita kwaamba ayi acafwe bantu kushiba ayi balayandika alimwi ansheenga twaciita kwaamba ayi tunooshoma cakutatonsha ayi tulayandika kuli Yehova.—Aga. 2:​7, NWT.

YESU NSHAAKACITA KWAAMBA AYI ACAFWE BANTU KUSHIBA AYI BALAYANDIKA

3. Ino nshiinshi Yesu nshaakacita kwaamba ayi acafwe bantu baku Galili?

³ Yesu ndyaakalinga kushimikila ku Galili, bantu kuswa mumisena ipusenepusene bakalinga kuya kuli nguwe kwaamba ayi abeeishe akubashilika. Wakabona ayi ‘bakalinga kulemete akupenga anga nimbelele shitacite mweembeshi,’ mukwiinga bamatanjilili babupailishi bakalinga kubabona ayi mbantu bataaku mbobabete akunoobalwiita ayi ‘bakashinganishikwa.’ (Mate. 9:36; Joni 7:​47-49) Sombi Yesu wakalinga kubabona ayi balayandika mukwiinga wakacana ciindi cakubeeisha akubashilika. (Mate. 9:35) Alimwi wakeeisha batumwi bakwe bwakushimikila akubalwiita ayi banoshilika balwashi, kwaamba ayi acafwe bantu baanji.—Mate. 10:​5-8.

4. Ino Yesu nshaakacitila bantu bakalinga kubonwa ayi taakuwo mbobabete shilatwiisha nshi?

⁴ Na muli musebenshi wakwe Yehova sombi mulatoonsha na mulayandika kuli nguwe, amuyeeye pashintu Yesu nshaakacitila baabo bakalinga kusuni ayi abeeishe. Wakabatondesha bulemu akubacitila shibotu, alimwi ici cakatondesha ayi bantu babonwa ayi taakuwo mbobabete balayandika abuumbi kuli nguwe akuli Baishi. Kukutumana kuyeeya pamakani aya inga kwamucafwa kunooshoma ayi Yehova alamubona ayi mulayandika.

5. Ino nshiinshi nshotucishi pa mwanakashi Yesu ngwaakakumanya ku Galili?

⁵ Yesu takalinga kwiishabo bantu na babungana, sombi wakalinga kucafwa muntu womwi awomwi. Kucakubonenaako, ndyaakalinga kushimikila ku Galili, wakakumanya mwanakashi umwi wakalinga mulwashi mukunko kwamyaaka 12. (Maako 5:25) Ceebo cabulwashi ubu, mwanakashi uyo taakalinga kusalalite kweelana a Milawo yakwe Mose, alimwi uli woonse weenga wamucata wakalinga kuba utasalalite. Ici cakapa kwaamba ayi atanocanika pabantu. Alimwi na bantu bakwe Lesa baya mukulambila ku sunagogi na kuya mukucita kusekelela ku Jelusalemu, lakwe takalinga kuyaako. (Lefi. 15:​19, 25) Aboobo mwanakashi uyo wakalinga kulinyumfwa ayi taakuwo mbwabete alimwi ayi bantu tabamusuniiwo.—Maako 5:26.

6. Ino nciinshi mwanakashi wakalinga mulwashi mukunko ncaakacita kwaamba ayi oole?

⁶ Mwanakashi uyo wakalinga kusuni ayi Yesu amushilike mukwiinga wakalinga kupengete abuumbi. Sombi wakaalilwa kusenga Yesu kwaamba ayi amushilike. Mpashi wakanyumfwa nsoni ceebo cabulwashi mbwakalinga kuciswa. Na mpashi wakaloonda ayi Yesu atomutaanda ceebo cakusa pabantu mukwiinga takalinga kusalalitewo. Aboobo wakacatabo kucisani capeculu cakwe Yesu kaashomete cakutatoonsha ayi na acite boobo atokoola. (Maako 5:​27, 28) Alimwi ncakwiila wakoola ceebo calushomo lwakwe. Lyalo Yesu wakeepusha ayi ngaani wancata kucisani? Mwanakashi uyo wakaliyubulula. Ino nciinshi Yesu ncaakacita?

7. Ino nshiinshi Yesu nshaakacita kumwanakashi uyo wakalinga kupenga abuumbi? (Maako 5:34)

⁷ Yesu wakabandikaakwe munshila ili kabotu alimwi cabulemu. Wakabona ayi mwanakashi uyo ‘wakaloonda alimwi wakalinga kututuma.’ (Maako 5:33) Aboobo ndyakalinga kubandikaakwe wakamuyuminisha. Alimwi wakamwiita ayi “nankashi” na ayi [mwanaangu, NWT.] Yesu ndyaakasebensesha liswi ili wakatondesha ayi alimusuni alimwi ayi alamubikilaako maano. (Amubelenge Maako 5:34.) Ici ncociindi cakutaanguna mu Baibo Yesu ndyaakeeta mwanakashi ayi mwanaangu. Mpashi wakasebensesha liswi ili ceebo cakubona ayi mwanakashi uyo wakalinga kuloondete abuumbi. Amuyeeyebo mwanakashi uyo mbwakayuminishikwa Yesu ndyakabandikaakwe munshila yamushobo uyu! Maswi Yesu ngakaamba akamucafwa kutalinyumfwa cibiibi ceebo cakumucata kucisani capeculu aceebo cakusa pabantu. Yesu takalinga kusunibo kumushilika sombi wakalinga kusuni kwaamba ayi ashibe ayi ngumwaana uyandika kuli Yehova Ishiwesu wakwiculu.

8. Ino mbukaalo nshi buyumu Nankashi Maria mbwakeendaamo?

⁸ Amunshiku shino, basebenshi bakwe Lesa bamwi balaciswa malwashi abapa kulinyumfwa cibiibi alimwi ayi tabayandiki. Kucakubonenaako, ba Mariaa bakala ku Brazil abo basebensa mbuli painiya waciindi coonse, bakashalwa kabatacitewo myeendo alyaansa lyakucipiko. Bakaamba ayi: “Lyoonse kucikolo bakalinga kunseka ceebo cakulemana. Bakalinga kumpa meena abiibi alimwi acisa kumoyo. Alimwi cimwi ciindi nabibo bamumukwashi wangu bakalinga kuncitila shintu shakalinga kumpa kulinyumfwa ayi nshiyandiki.”

9. Ino mbaani bakacafwa ba Maria kutalika kulinyumfwa ayi balayandika?

⁹ Ino nciinshi cakacafwa ba Maria kutalika kulinyumfwa ayi balayandika? Ndyebakaba Kamboni wakwe Yehova, bamakwesu abenankashi bakabayuminisha akubacafwa kutalika kunolibona mbuli Yehova mbwababona. Bakaamba ayi: “Bamakwesu abenankashi baanji bakancafwa! Ndalumba Yehova kuswa panshi lyamoyo ceebo cakuba amukwashi wakumushimu unsuni.” Bashominyineesu bakacafwa ba Maria kushoma cakutatonsha ayi balayandika abuumbi kuli Lesa.

10. Ino ndipenshi nshi linene Maliya waku Magadala ndyakalinga kwiindaamo, alimwi ino wakalinga kulinyumfwa buyani? (Amubone ashikope.)

¹⁰ Umwi Yesu ngwakacafwa ngu Maliya waku Magadala uyo wakalinga kucite shibanda shili 7! (Luka 8:2) Cilyeelete wakalinga kucita shintu shikankamika ceebo cakwaamba ayi shibanda nshoshakalinga kumweendelesha. Aboobo bantu tabakalinga kusuniiwo nabibo paniini kuba pafwiifwi anguwe. Mwanakashi uyu wakapenga abuumbi. Alimwi cilyeelete wakalinga kulinyumfwa ayi taakuwo wakalinga kumusuni nabi weenga wamucafwa. Yesu ndyakamukumanya wakashitandaamo shibanda lyalo wakaba shikwiiya wakwe.

11. Ino nshiinshi Yesu nshaakacita shakatondesha ayi Maliya waku Magadala wakalinga kuyandika abuumbi kuli Yehova? (Amubone ashikope.)

¹¹ Ino nshiinshi shimwi Yesu nshaakacita kwaamba ayi acafwe Maliya waku Magadala kushiba ayi alayandika abuumbi kuli Lesa? Wakamusuminisha kunooya cishimikila pomwi anguwe abashikwiiya bakwe.b Aboobo Maliya wakaba acoolwe cakunokutika kuli Yesu ndyaakalinga kwiisha bantu. Alimwi Yesu ndyaakabushikwabo, wakabonekela kuli Maliya. Cilyeelete ngoshikwiiya wakutaanguna Yesu ngwakabandikaakwe pabushiku ndyaakabushikwa. Alimwi wakamupa acoolwe cakuya mukulwiita batumwi ayi wabushikwa. Ishi shoonse Yesu nshaakacita, shakatondesha ayi Maliya wakalinga kuyandika abuumbi kuli Yehova!—Joni 20:​11-18.

12. Ino nshiinshi shakapa kwaamba ayi Nankashi Lidia anoolinyumfwa ayi tayandiki alimwi ayi taakuwo weenga wamutondesha lusuno?

¹² Bweenka mbocakalinga kuli Maliya waku Magadala, baanji munshiku shino balalinyumfwa ayi tabayandiki alimwi ayi taakuwo weenga wabatondesha lusuno. Ubo mbwakalinga kulinyumfwa nankashi waliina lya Lidia ukala ku Spain. Kaatana kushalwa, banyina bakalinga kusuni kukusha lifumo. Lyalo ndyaakashalwa, bakalinga kumwaambila maswi abiibi abuumbi kaalibo muniini, alimwi tabakalinga kumubikilako maano. Nankashi Lidia wakaamba ayi: “Ceebo cakwaamba ayi bama tabakalinga kunsuniiwo, lyoonse ndakalinga kuyeeya ayi mpashi bamwi balaakuntondesha lusuno akusuna kuba beshicibusa bangu. Sombi ndakalinga kubona ayi taakuwo beenga bacita boobo nabi ndacita shibotu buyani, mukwiinga nshobakalinga kucita bama beene bakunshala shakampa kunooshoma ayi ndimuntu mubiibi.”

13. Ino nshiinshi shakacafwa ba Lidia kutalika kunooshoma ayi balayandika kuli Yehova?

¹³ Ba Lidia ndyebakeeya cancine, bakacileka kulinyumfwa ayi tabayandiki. Ino nshiinshi shakabacafwa? Nkupaila kuli Yehova, kubelenga Baibo, kuyuminishikwa kuswa kubashominyinaabo ashintu shibotu nshobakalinga kubacitila. Ishi shoonse shakabacafwa kushiba ayi balayandika abuumbi kuli Yehova. Bakaamba ayi: “Liinji beebangu balandwiita mbobansuni amibo ibotu njoncite. Ubo mbobacita abeshicibusa bangu bamwi.” Bweenka mbuli ba Lidia, mpashi mulibungano lyanu muli bamwi batoyandika kucafwikwa kushiba ayi Yehova alibasuni. Alimwi maswi ngeenga mwabalwiita ansheenga mwabacitila, inga shabacafwa kushiba ayi balayandika abuumbi kuli Yehova.

SHEENGA SHATUCAFWA KUNOOLIBONA MBULI YEHOVA MBWAATUBONA

14. Ino 1 Samwelo 16:7 ilatucafwa buyani kunoolibona mbuli Yehova mbwaatubona? (Amubone akabokosi kacite mutwi utokwaamba ayi “Ino Nceebonshi Basebenshi Bakwe Yehova Balayandika Abuumbi Kuli Nguwe?”)

¹⁴ Munokwiibaluka ayi Yehova taamuboni mbuli bantu bakucishi mbobamubona. (Amubelenge 1 Samwelo 16:7.) Bantu bakucishi balabona ayi muntu alayandika na kaacite maali aanji, kayiite nabi ceebo ca mbwaaboneka. (Isa. 55:​8, 9) Aboobo munoolibona mbuli Yehova mbwaamubona, kuteshi mbuli bantu bakucishi mbobamubona. Inga mwabelenga makani aamba pabantu bamwi bamu Baibo abo bakalinyumfwawo kale ayi taakuwo mbobabete. Kucakubonenaako, inga mwabelenga pali Elija, Naomi a Aana. Ndyeshi mukanoobelenga makani aamba pabasebenshi bakwe Yehova aba, mukabikile maano kubona mbwaakatondesha ayi wakalinga kubasuni abuumbi. Alimwi inga mwalemba ashintu Yehova nshaakamucitila shitondesha ayi alamubona ayi mulayandika alimwi alimusuni abuumbi. Kwiilikaawo, inga mwalangoola amakani mumabuku esu aamba pakulinyumfwa ayi taakuwo mbomubete.c

15. Ino nceebonshi Danyelo wakalinga ‘muntu uyandika abuumbi’ kuli Yehova? (Danyelo 9:23)

¹⁵ Munooshoma ayi mulayandika abuumbi kuli Yehova ceebo cakushomeka kwanu. Paciindi cimwi, Danyelo wakalinga ‘walefuka abuumbi.’ Mpashi paciindi ico wakalinga kucite myaaka iindilila 90. (Danye. 9:​20, 21) Ino nciinshi Yehova ncaakacita kwaamba ayi amuyuminishe? Wakatuma munjelo waliina lya Gabuliyelo kusa mukulwiita Danyelo ayi ngu ‘muntu uyandika abuumbi’ alimwi ayi mipailo yakwe yakumbulwa. (Amubelenge Danyelo 9:23.) Ino nceebonshi Danyelo wakalinga muntu uyandika abuumbi kuli Lesa? Nceebo cakwaamba ayi wakalinga kusunishishi kucita shintu shiluleme alimwi wakalinga kushomeka. (Esek. 14:14) Yehova wakapa kwaamba ayi makani aamba pamusankwa uyu alembwe mu Baibo kwaamba ayi anootuyuminisha na twaabelenga. (Loma. 15:4) Amwebo Yehova alakutika mipailo yanu alimwi alamubona ayi mulayandika ceebo cakwaamba ayi mulisunishishi kunoocita shintu shiluleme alimwi mulashomeka kuli nguwe.—Mika 6:8; Ebu. 6:10.

16. Ino nshiinshi sheenga shamucafwa kunoobona ayi Yehova ngu Ishiwanu umusuni?

¹⁶ Munoobona ayi Yehova ngu Ishiwanu umusuni. Alisuni kumucafwa kuteshi kunomulangweeta shilubo. (Kulu. 130:3; Mate. 7:11; Luka 12:​6, 7) Kukutumana kuyeeya pamakani aya nkokucafwa bamwi balinyumfwa ayi taakuwo mbobabete. Kucakubonenaako, nankashi waliina lya Michelle ukala ku Spain, wakalinga kulinyumfwa ayi taakuwo mbwabete ceebo cakwaamba ayi kwamyaaka iinji beebaye bakalinga kumucobola. Ici cakamupa kunolinyumfwa ayi tabamusuniiwo. Sombi wakaamba ayi, “Na ndalinyumfwa ayi taakuwo mbombete, ndeelesha kuyeeya ayi Yehova wanyamuna akunshitilisha. Na ndacita boobo ndalinyumfwa ayi alinsuni.” (Kulu. 28:9) Nankashi Lauren waku South Africa, lakwe alaliibalusha ayi, “Na Yehova wakansenya kuli nguwe ceebo cakwaamba ayi alinsuni, wancafwa kutolelela kumusebensela kuswabo ndyendakabombekwa, alimwi wakansebensesha kwiishako bamwi pali nguwe, nkokwaamba ayi ndayandika kuli nguwe alimwi alaakutolelela kunsebensesha.”—Joni 6:44.

17. Ino nshiinshi sheenga shamucafwa kunooshoma cakutatoonsha ayi Yehova alikondetwe pali ndimwe? (Kulumbaisha 5:12) (Amubone acikope.)

¹⁷ Munooshoma cakutatoonsha ayi Yehova alikondetwe pali ndimwe. (Amubelenge Kulumbaisha 5:12.) Defedi wakaamba ayi na Yehova kaakondetwe pali ndiswe, cilaba anga “ndiyawo” lishitilisha bantu bakwe baluleme. Kushiba ayi Yehova alikondetwe pali ndimwe alimwi ananomucafwa, inga kwamucafwa kucileka kulibona ayi tamuyandiki. Ino nshiinshi sheenga shamucafwa kushiba ayi Yehova alikondetwe pali ndimwe? Kweelana ambotweeya, wakatupa Maswi akwe atucafwa kushiba mbwaalinyumfwa pali ndiswe. Alimwi cimwi ciindi alasebensesha bamanene, beshicibusa mbomunyumfwanaabo, alimwi abamwi kwaamba ayi amwiibalushe ayi mulayandika abuumbi kuli nguwe. Ino mulyeelete kulinyumfwa buyani na bamwi bamulwiita shintu shibotu nshomucita?

18. Ino nceebonshi tamweelete kutoonsha na bamwi bamulumba?

¹⁸ Na bamwi mbomushibenaabo alimwi bamusuni bamulumba pashibotu nshomucita, mutanoyeeya ayi tabatomulumba kuswa panshi lyamoyo. Munokwiibaluka ayi ninshila yomwi Yehova njeenga wasebensesha kumucafwa kushiba ayi alikondetwe pali ndimwe. Ba Michelle mbotwalinga twaambaawo bakaamba ayi: “Paniini paniini ndakatalika kushoma ayi maswi akundumba bamwi ngobandwiita, alaswa panshi lyamoyo wabo. Nciyumu kushoma ayi kuli shibotu nshoncita. Sombi Yehova alisuni ayi noshoma ayi kuli mibo ibotu njoncite.” Bamanene abalo bakacafwa ba Michelle kunooshoma ayi Yehova alibasuni. Pacecino ciindi batosebensa bupainiya bwaciindi coonse alimwi balasebensela kuŋanda kucafwilishaako anciito shimwi shapa Bethel.

19. Ino nceebonshi inga twashoma cakutatoonsha ayi tulayandika kuli Lesa?

¹⁹ Yesu wakaamba ayi tulayandika abuumbi kuli Ishiwesu wakwiculu. (Luka 12:24) Aboobo inga twashoma cakutatoonsha ayi Yehova alatubona ayi tulayandika kuli nguwe. Lyoonse tunokwiibaluka cancine ici! Alimwi atutolelele kucita nsheenga twacikoonsha kucafwako bamwi kushiba ayi balayandika kuli Lesa!