Liina Lyakwe Yehova Lilayandika Abuumbi Kuli Yesu

1-2. (a) Ino nshiinshi Yesu nshaakacita mashiku pa Nisani 14? (b) Ino njimiipusho nshi njeshi tucane shikumbulo mumutwi uyu?

PACINAYI mashiku pa Nisani 14 33 C.E., Yesu wakatalika Mulalilo wa Mwaami pomwi abatumwi bakwe bashomeka. Wakalinga kucishi ayi conoonobo Judasi atomwaaba, balwani bakwe batoomupensha lyalo akumucaya. Aboobo pesule lyakulya mulalilo, wakalwiita batumwi bakwe makani aanji kwaamba ayi abayuminishe. Ndyekwakacaalabo paniini kwaamba ayi bapalangane, Yesu wakaamba mupailo uyandika abuumbi. Mutumwi Joni wakalemba mupailo uyo mu Joni capita 17.

² Mumutwi uyu, tutobandika pashintu shimwi nsheenga tweeya kuswa kumupailo Yesu ngwaakapaila. Ino nshiinshi nshaakalinga kuyeeyawo abuumbi paciindi ici? Ino nciinshi cakalinga kuyandika abuumbi kuli nguwe ndyakalinga pacishi? Amuleke tucane shikumbulo kumiipusho iyi.

‘NDABEEISHA KWAAMBA AYI BAMUSHIIBE’

3. Ino nshiinshi Yesu nshakaamba pa liina lyakwe Yehova, alimwi ino wakalinga kusansulula nshi? (Joni 17:​6, 26)

³ Mumupailo Yesu ngwaakapaila wakaamba ayi: ‘Ndabeeisha kwaamba ayi bamushiibe [bashibe liina lyanu].’ Ici cakalinga cintu ciyandika kuli Yesu mukwiinga wakalwiita bashikwiiya bakwe makani aya mankanda obilo. (Amubelenge Joni 17:​6, 26.) Ino wakalinga kusansulula nshi? Sa wakalinga kwiisha bashikwiiya bakwe ayi liina lyakwe Lesa ngu Yehova? Sobwe. Bashikwiiya bakwe Yesu bakalinga mbaJuda, aboobo bakalinga kucishi kale ayi liina lyakwe Lesa ngu Yehova. Liina ili lilacanika pafwiifwi amankanda 7,000 mu Malembo amu ciEbulu. Aboobo Yesu ndyakaamba ayi ‘ndabeeisha kwaamba ayi bamushiibe [bashibe liina lyanu],’ takalinga kusansulula ayi wakabeesha ayi liina lyakwe Lesa ngu Yehova. Sombi wakalinga kusansulula ayi wakabacafwa kushiba kabotu Yehova mbwaabete, ico ciilikaawo luyaando Yehova ndwaakalengela cishi abantu, nshaakacita, nsheshi akacite alimwi amibo njaacite. Yesu eenkabo ngwamwishi kabotu Yehova.

4-5. (a) Ino kushiba liina lya muntu cilaamba nshi? Amwaambe cakubonenaako. (b) Ino nciinshi cakacafwa bashikwiiya bakwe Yesu kumushiba kabotu Yehova?

⁴ Kucakubonenaako, amuyeeye ayi mulibungano lyanu muli munene waliina lya David alimwi alasebensa mbuli dokota. Mwakamushiba kale kale abuumbi mukwesu uyo. Sombi bushiku bumwi, cakuteengashila mwaciswa abuumbi. Lyalo cakufwambaana bamutola kucipatela mukwesu uyo nkwaasebensa. Ayi mushike, wamushilika lyalo mwapuluka. Inga mwamusuna abuumbi mukwesu uyo kwiinda ambomwakalinga kumusuni kamutana kuciswa, alimwi lyoonse na mwanyumfwa liina lyakwe inga kamwiibaluka nshaakamucitila. Inga mwatalika kunoobona Mukwesu David ayi ngu munene mulibungano alimwi ayi ngu dokota wakamupulusha.

⁵ Bashikwiiya bakwe Yesu abalo bakalinga kulishi kale liina lyakwe Lesa. Sombi liina ili lyakaba liyandika abuumbi kuli mbabo mukwiinga Yesu wakabacafwa kumushiba kabotu Yehova. Ino nceebonshi nceenga twaambila boobo? Nceebo cakwaamba ayi Yesu wakalinga kukonkela cakubonenaako ca Baishi mushintu shoonse nshaakalinga kwaamba akucita. Aboobo bashikwiiya bakwe ndyebakanyumfwa nshaakalinga kubeeisha akubona mbwakalinga kucita shintu kubamwi, bakamushiba kabotu Yehova mbwaabete.—Joni 14:9; 17:3.

“LIINA LYANU NDIMWAKAMPA”

6. Ino Yesu wakalinga kusansulula nshi ndyakaamba ayi Baishi bakamupa liina lyabo? (Joni 17:​11, 12)

⁶ Yesu ndyakalinga kupaila, wakapaililako bashikwiiya bakwe ayi: “Amubalaame munkusu sha liina lyanu ndimwakampa.” (Amubelenge Joni 17:​11, 12.) Sa Yesu ndyakaamba maswi aya wakalinga kusansulula ayi bantu batotalika kumwiita ayi Yehova? Sobwe. Yesu ndyakaamba paliina lyakwe Yehova wakaamba ayi “liina lyanu.” Aboobo liina lyakwe Yehova talina kuba liina lyakwe Yesu. Ano ino Yesu wakalinga kusansulula nshi ndyakaamba ayi “liina lyanu ndimwakampa”? Cakutaanguna, Yehova wakatuma Yesu kusa pacishi mukumwiimikaninaako. Wakesa muliina lya Baishi akunoocita shaankamiko kwiinda muliina lyabo. (Joni 5:43; 10:25) Cabili, liina lyakwaamba ayi Yesu lilasansulula ayi “Yehova ngo Mupulushi.” Aboobo mubusansulushi bwa liina lyakwe Yesu muli aliina lyakwe Yehova.

7. Ino nceebonshi nceenga twaambila ayi Yesu wakalinga kwiimikaninaako Yehova? Amwaambe cakubonenaako.

⁷ Amuyeeye pacakubonenaako ici kwaamba ayi munyumfwishishe nceenga twaambila ayi Yesu wakalinga kwiimikaninaako Yehova. Mweendeleshi inga watuma muntu umwi kwaamba ayi aye mukulwiita bantu makani amwi. Bantu balyeelete kushoma na kukonkela nsheenga muntu uyo wabalwiita mukwiinga wapekwa nkusu ku mweendeleshi. Yesu alakwe wakalinga kucite nkusu shakwiimikaninaako Yehova, mukwiinga ngowakamutuma.—Mate. 21:9; Luka 13:35.

8. Ino nceebonshi Yehova ncakaambila ayi liina lyakwe lili “muli” Yesu nabi Yesu kaatana kusa pacishi? (Kulonga 23:​20, 21)

⁸ Baibo ilaamba ayi Yesu Ndiswi, mukwiinga Yehova wakamusebensesha kulwiita baanjelo abantu nshaakalinga kusuni ayi bashibe akucita. (Joni 1:​1-3) Cilyeelete Yesu ngomunjelo Yehova ngwaakatuma kutanjilila bene Isilaeli ndyebakalinga muluyanga kabaya ku Kenani. Yehova ndyaakalwiita bene Isilaeli kunyumfwila munjelo uyo, wakeelikaawo akubalwiita ayi: “Mukwiinga liina lyangu lili muli nguwe.”a (Amubelenge Kulonga 23:​20, 21, NWT.) Yehova wakaamba maswi aya mukwiinga Yesu alamwiimikaninaako alimwi ngwainditeewo kutondesha ayi Yehova alisalalite alimwi lyoonse alacita shintu shiluleme.

“TA, AMUPE KWAAMBA AYI LIINA LYANU LILEMEKWE”

9. Ino Yesu wakatondesha buyani ayi liina lya Baishi lyakalinga kuyandika abuumbi kuli nguwe?

⁹ Kweelana ambotwaswa mukwiiya, liina lyakwe Yehova lyakalinga kuyandika abuumbi kuli Yesu nabi kaatana kusa pacishi. Alimwi ndyakalinga pacishi, shintu shoonse nshaakalinga kucita shakatondesha ayi liina lyakwe Yehova lyakalinga kuyandika abuumbi kuli nguwe! Ndyekwakacaala paniini kwaamba ayi amanishe ncito njaakesita pacishi, wakasenga Yehova ayi: “Ta, amupe kwaamba ayi liina lyanu lilemekwe.” Peenkaapo Baishi bakakumbula muliswi lyankusu kuswa kwiculu ayi: “Ndakapa kale kwaamba ayi lilemekwe alimwi ndaakupa kwaamba ayi likalemekwe.”—Joni 12:​28, NWT.

10-11. (a) Ino nshiinshi Yesu nshaakacita kwaamba ayi alemeke liina lya Baishi? (Amubone acikope.) (b) Ino nceebonshi liina lyakwe Yehova lilyeelete kusalashikwa akulemekwa?

¹⁰ Yesu alakwe wakalemeka liina lya Baishi. Munshila nshi? Wakalinga kulwiita bantu pamibo ibotu Yehova njaacite apashintu shibotu abuumbi nshaacita. Sombi kuli acimwi ncaakacita kwaamba ayi alemeke liina lya Baishi. Yesu wakalinga kweelete kutondesha ayi liina lya Baishi lilisalalite alimwi ayi lyoonse balacita shintu shiluleme. Wakacafwa bashikwiiya bakwe kushiba kuyandika kwakucita boobo ndyakabeisha bwakupaila. Wakaamba ayi: ‘Nobeshiwesu nomuli kwiculu, liina lyanu alisalashikwe.’—Mate. 6:9.

¹¹ Ino nceebonshi liina lyakwe Yehova lilyeelete kusalashikwa akulemekwa? Nceebo cakwaamba ayi Satana wakaamba makani akubeca pali Yehova Lesa mumuunda wa Edeni. Satana wakaamba ayi Yehova ngumubeshi alimwi ayi wakalinga kwiima Adamu a Efa shintu shibotu. (Mata. 3:​1-5) Ndyakacita boobo cakaboneka anga Yehova taeendeleshi kabotu. Bubeshi Satana mbwakaamba bwakabisha liina na impuwo yakwe Yehova. Lyalo muciindi cakwe Jobo Satana wakaamba ayi abo basebensela Yehova balamusebenselabo ceebo cashintu shibotu nshabapa. Wakeelikaawo akwaamba ayi bantu inga bacileka kusebensela Yehova na beenda mumapensho mukwiinga tabamusuni kuswa panshi lyamoyo. (Jobo 1:​9-11; 2:4) Pakalinga kweelete kwiinda ciindi kwaamba ayi mubeshi abonekele patuba na ngu Yehova nabi Satana.

“NDISUMINITE KWAABA BUUMI BWANGU”

12. Ino nciinshi Yesu ncaakalinga kulyaabite kucita ceebo cakusuna liina lya Baishi?

¹² Ceebo cakwaamba ayi Yesu alisuni Yehova abuumbi, wakalinga kusuni kucita nsheenga wacikonsha kwaamba ayi asalashe liina lya Baishi akulilemeka. Wakaamba ayi: “Ndisuminite kwaaba buumi bwangu.” (Joni 10:​17, 18) Yesu wakalinga kulyaabite kufwitaawo kwaamba ayi asalashe liina lyakwe Yehova.b Adamu a Efa bakapondokela Yehova akuba kulubasu lwakwe Satana. Sombi Yesu lakwe wakalinga kulyaabite kusa pacishi mukutondesha ayi alibasuni abuumbi Baishi. Wakacita boobo kwiinda mukunoonyumfwila Yehova mushintu shoonse nshaakalinga kwaamba akucita. (Ebu. 4:15; 5:​7-10) Wakatolelela kushomeka kuli Yehova kushikila ndyaakafwa lufu lucisa abuumbi pacisamu cakupenshesha. (Ebu. 12:2) Ndyaakacita boobo, wakatondesha ayi alibasuni Baishi aliina lyabo.

13. Ino nceebonshi Yesu wakalinga muntu weelela kutondesha ayi Satana ngomubeshi? (Amubone acikope.)

¹³ Shoonse Yesu nshaakacita shakatondesha ayi Satana ngomubeshi kuteshi Yehova! (Joni 8:44) Yesu wakalinga kumushi kabotu Yehova kwiinda muntu umwi uli oonse. Naakwiinga shintu shimwi Satana nshakaamba pali Yehova shakalinga shancine, Yesu naakwiinga wakashiba. Sombi Yesu wakalinga kushinishite kusalasha liina lyakwe Yehova, mukwiinga wakalinga kucishi ayi shoonse Satana nshakaamba shakalinga shakubeca. Nabi paciindi ndyecakaboneka anga Yehova wamulekelesha, Yesu wakalinga kulyaabite kufwa akutolelela kushomeka kuli Baishi muciindi ca kubapondokela.—Mate. 27:46.c

‘NDAMANISHA MULIMO NGOMWAKAMPA’

14. Ino nshoolwe nshi Yehova nshaakapa Yesu ceebo cakushomeka kwakwe?

¹⁴ Mumupailo Yesu ngwaakapaila ndyekwakacaalabo bushiku bomwi kwaamba ayi afwe, wakaamba ayi: ‘Ndamanisha mulimo ngomwakampa.’ Wakalinga kushomete ayi Yehova alaakumupa shoolwe ceebo ca kushomeka kwakwe. (Joni 17:​4, 5) Alimwi Yesu taakwe kulenshekwa nsoni. Yesu ndyaakafwa, Yehova wakamubusha. (Milimo 2:​23, 24) Alimwi wakamupa mukuli winditeewo ndyaakaboolela kwiculu. (Filip. 2:​8, 9) Mukuya kwaciindi, Yesu wakatalika kweendelesha kwiculu mbuli Mwaami wa Bwaami bwakwe Lesa. Ino nshiinshi Bwaami ubu nsheshi bukacite? Yesu ndyaakalinga kwiisha bashikwiiya bakwe bwakupaila, wakaamba ayi: ‘Abwise Bwaami bwanu. Kuyanda kwanu [Yehova] akucitwe panshi pano bweenka mbuli kwiculu.’—Mate. 6:10.

15. Ino nshiinshi Yesu nsheshi akacite?

¹⁵ Conoonobo Yesu alaakulwana balwani bakwe Lesa akunyonyoola bantu bacita shibiibi pa nkoondo ya Amagedoni. (Ciyu. 16:​14, 16; 19:​11-16) Kuswawaawo, alaakucata Satana akumuwaala “mucilindi citeeli,” umo mweshi akabule nkusu shakucita cili coonse. (Ciyu. 20:​1-3) Lyalo Yesu ndyeshi akanookwendelesha mu Buleelo Bwakwe bwa Myaaka 1,000, alaakupa kwaamba ayi pacishi pabe luumuno akucafwa bantu kuba bamaninite. Alaakubusha bafu. Alaakupa kwaamba ayi cishi coonse cibe paladaiso. Lyalo kuyanda kwakwe Yehova kulaakukumanishikwa!—Ciyu. 21:​1-4.

16. Ino buumi bulaakuba buyani pacishi pesule lya Buleelo Bwakwe Klistu bwa Myaaka 1,000?

¹⁶ Ino buumi bulaakuba buyani pacishi pesule lya Buleelo Bwakwe Klistu bwa Myaaka 1,000? Bantu teshi bakanobishaawo alimwi balaakuba bamaninite. Teshi bakayandike kunoosenga kulekelelwa shibiibi shabo kwiinda mucilubula. Alimwi teshi bakayandike ba 144,000 kuba bapailishi babo nabi Yesu Mupailishi wabo Munene kwaamba ayi babe abushicibusa a Yehova. Kwiilikaawo, lufu ndotwakapyana kuswa kuli Adamu ulo luli ngu “mulwani wakweelaako,” lulaakukomwa. Mushuumbwe teshi mukabeewo bafu mukwiinga balaakubushikwa. Bantu boonse pacishi balaakuba bamaninite.—1 Koli. 15:​25, 26.

17-18. (a) Ino nshiinshi sheshi shikacitike pesule lya Buleelo bwa Myaaka 1,000? (b) Ino nciinshi Yesu nceshi akacite na akamanishe kweendelesha? (1 Bene Kolinto 15:​24, 28) (Amubone acikope.)

¹⁷ Ino nshiinshi shimwi sheshi shikacitike pesule lya Buleelo Bwakwe Klistu bwa Myaaka 1,000? Kulaakucitika cintu cilibetele. Paciindi ici taakuwo nabi womwi weshi akanootonsha ayi Yehova alisalalite alimwi ayi alacita shintu shiluleme. Ino nceebonshi? Mumuunda wa Edeni, Satana wakaamba ayi Yehova ngumubeshi alimwi ayi taeendeleshi bantu calusuno. Kuswabo paciindi cilya, basebenshi bakwe Yehova batolelela kutondesha ayi Yehova ngu Lesa uli kabotu alimwi weendelesha calusuno. Aboobo pesule lya Buleelo bwa Myaaka 1,000, liina lyakwe Yehova lilaakusalashikwa cakumaninina. Alimwi bantu boonse balaakushiba ayi ngu Ishiwesu wakwiculu shilusuno.

¹⁸ Pesule lya myaaka 1,000, bantu boonse balaakushiba ayi shoonse Satana nshakaamba pali Yehova nshakubeca. Ino nciinshi Yesu nceshi akacite na akamanishe kweendelesha? Sa alaakucita mbuli Satana akupondokela Yehova? Sobwe! (Amubelenge 1 Bene Kolinto 15:​24, 28.) Yesu alaakuboosha Bwaami kuli Baishi. Lyalo alakwe alaakunokweendeleshekwa a Baishi. Mubupusano a Satana, Yesu alilibambite kuboosha bweendeleshi kuli Baishi ceebo cakwaamba ayi alibasuni.

19. Ino nshiinshi nshotweeya mumutwi uyu pali Yesu?

¹⁹ Ici ncocakapa kwaamba ayi Yehova ape Yesu liina lyakwe! Yesu wakatondesha kabotu Baishi mbobabete. Liina lyakwe Yehova lilayandika abuumbi kuli Yesu kwiinda cintu cili coonse. Wakalyaaba kufwitaawo paliina ili alimwi alaakuba ulibambite kuboosha Bwaami kuli Yehova pesule lya Buleelo Bwakwe bwa Myaaka 1,000. Ino cakubonenaako cakwe Yesu inga twacikonkela buyani? Tulaakucana cikumbulo kumwiipusho uyu mumutwi utokonkelaawo.