Munooda dhowanave m’labela Yohova angalive ira mutosukwali-iwa

1. N’nga mbamaraeli-o avi anofwanya i-yo namwasa okala mugulu la Yohova?

NDINGARI ilukulu kala mugulu la Yohova malambo oruchala. Vyongo vanodhowanave aliwa thakala muilamboi, Yohova utoniva-a banja lauzimu lovwelana, la abali naarongola. (Sal. 133:1) Yohova unonikami-a thitho ira nikaengana banja lapama. (Aef. 5:33–6:1) Thitho unoniva-a zelu ira nikaengana rendele wa rimani.

2. N’nga ninofwanela iranan’ni, n’nga mwasiwa ngwan’ni?

² Mbwenye ninofwanela kaana thindhi ira nidhowenave m’labela Yohova mwathindhi. Mwasiwa ngwan’ni ninoonga ee-no? Namwasa oi hora dhinango ninooda sukwala na vyongo vinodawi-a atu enango. Ninooda thitho sukwala akala ninodawi-a vyongo vinangovyee moweli-edha weli-edha. Ninofwanela dhowanave m’labela Yohova angalive ira (1) kristau fwi-u utonisukwali-a, (2) man’ni-u venango i-yani-u anisukwali-a thitho ya (3) nasukwalanga na vyongo vinodawi-a i-yo. Muyofunjedha yei ninotapanyani vyoireya vyevi imbo-i na imbo-i. Ninotapanyani thitho vinafunjedhevo i-yo wa mutu ororomeleya oongiwa Bibilyani.

KRISTAU FWINYU AUSUKWALI-ANI MUDHOWENAVE M’LABELA YOHOVA

3. N’nga ndi nyarwa iivi inolimbanana atu a Yohova?

³ Nyarwa. Makristau enango anokaana makalelo enao ta-anonisangalali-a. Enango mwama kristau ala, anooda nisukwali-a venango niirela vyongo mo-onithuulela. Atu enao anonisogolela anooda dawi-a vyongo. Vyevi vinooda iri-a ira atu enango taromenga kaikela akala talidi mugulu la Nlungu. Malo modhowanave m’labela Nlungu movwelana naabali naarongoliwa, aliwa anooda i-ya irana vyongo naatu enao aasukwali-idhe venango i-yachi dhowa migumanoni. (Zef. 3:9) N’nga ndizelu irana vyevi? Dhoweni nioneni vinafunjedhevo i-yo wa mutu oongiwa Bibilyani wenuo agumanena vyongo ninga vyevi.

4. N’nga rumiwi Paulo agumanena nyarwa dhiivi?

⁴ Ifwanafwani-o ya Bibilyani. Rumiwi Paulo anooidhiwa ira abali naarongolee kai olongomana. Mofwanafwani-a, abali enango tatom’tonga modaweya angaromile vwelana na pingo. (May. 9:26) Vasongolovee abali enango tanom’mongela mafyeda vofuna nonga limbililee. (2 Ak. 10:10) Paulo atom’mona bali mwinango wa izo airangana vyodaweya vyevyo vyasukwali-e abali enango. (Agl. 2:11, 12) Fwee mwinango dhinalee Marku atom’sukwali-a maningi. (May. 15:37, 38) Paulo angaodile sakula ira a-avwelanenga naabali enao tam’sukwali-idhe. Mbwenye liye atoodhowanave ona vyongo vyapama mwaabali naarongolee thitho anom’lambela Yohova mwathindhi. N’nga chini yam’kami-idhe Paulo dhowanave m’lambela Yohova?

5. N’nga chini yam’muiri-idhe Paulo ira a-atatile rima va hora yasukwali-iwile liye naabali naarongolee? (Akolose 3:13, 14) (Muone thitho iruthiruthi.)

⁵ Paulo anoodhiveliwana abali naarongolee. Dhiveliwana atu enango watom’kami-a Paulo ira athuulelenga makalelwiwa apama a-kala vyongo vyadawi-a aliwa. Udhivela watom’kami-a Paulo ira airengana vyongo vyevyo vyalembile liye va Akolose 3:13, 14. (Muleri.) Umboni wa vyevyo, ndi vyaireile vamwasa wa Marku. Angalive ira Marku atom-iya Paulo vaulendwee oroma wau misionario, Paulo kaadhowilenave m’thakaleliwanee. Vangavirile hora Paulo atoolembela karta pingo wau Kolose, kartanimo atoolembamo ira Marku ali “namalaba fwee thitho anom’limbi-a.” (Ako. 4:10, 11) Angamangiwile wu Roma, Paulo atom’vepa Marku ira adhowe amam’kami-e. (2 Ti. 4:11) Vyevi vinothonyi-edha ira Paulo anoororomelave abalee. N’nga ninofunjedhavon’ni wa Paulo?

6-7. N’nga ninaire a-vi ira nidhowenave dhiveliwana abali naarongoli-u angalive ira anodawi-a vyongo vinango? (1 Juwau 4:7)

⁶ Vinofunjedhavo i-yo. Yohova unofuna ira kani-iye thonyi-edha udhivela abali naarongoli-u. (Muleri 1 Juwau 4:7.) Akala kristau mwinango utoimwanana thonyi-edha makalelo aphama, nionenga ira unofuna a-rela makundo a Bibilyani thitho uirile vyongo mo-othuulela phama. (San. 12:18) Nlungu unodhiveliwana arumiwee ororomeleya angalive ira anodawi-a vyongo vinango. Kano-iya nidhiveliwana nadawi-a vyongo vinangovyee thitho kanonilokotedha vya rimani. (Sal. 103:9) Ee-no ninofwanela m’sazi-edhanga Babi-u wenuo unolevelela!—Aef. 4:32–5:1.

⁷ Nithuulelenga ira vevo komoni vanowandamela aliwa, ninofwanela vwelananga naabali naarongoli-u. Nidedi-edhelenga ira i-yo Makristau, ninooda oni-iwa nyarwa maningi venango mangiwa namwasa wa vyongo vinororomela i-yo. Akala vyevyo vitoniireela, ninooda funafuna maningi ira abali naarongoli-u tanikami-e. (San. 17:17) Ifwanafwani-o ndi vyongo vyam’muireele Yosefe,a wenuo ngu ndimuwa wau Espanha. Liye vambo-i na abali enango tatoomangiwa namwasa okhonda kala anyakondo. Yosefe aongile ira: “Nangali perezoni, vyali vyo-orucha nyanyuwela kristau fwi-u namwasa oi vyongo vyothene nairela vambo-i. Nanoofuneela lolelana thitho levelelana na rima wethene. Vyevyo vyatoonikami-a ira nivwelanenga thitho barelana. Nakalecha na anaperezo enango oi katam’lambela Yohova. Vahora inango ndatoopeya wono thitho tatoondimanga na karagadhura, voi kandaoda irana vyongo vinango ndekene. Mbwenye bali mwinango anoondifulela vyowara thitho ndikami-a mundhila dho-iyana-iyana. Ndinoona ira atoondithonyi-edha udhivela va hora yoruchila.” Nitokaana myasa minjinji yaphama yoniiri-a mali-a a-vwana va-eeni.

MANINYU VENANGO I-YANINYU AUSUKWALI-ANI MUDHOWENGANAVE M’LABELA YOHOVA

8. N’nga atu othelana anogumanana nyarwa ivi?

⁸ Nyarwa. Mabanja othene anogumanana nyarwa. Bibilya linoonga mo-ovira kundu ira atu enao tali va banjani, “anogumanana nyarwa vaingumiiwa.” (1 Ak. 7:28) Vili ee-no namwasa oi banja ndi vwelano waatu ambili oi kai olongomana. Thitho anokaana makalelo o-iyana-iyana, vyongo vinodhiveliwana aliwa na vyongo vinoidanana aliwa. Anooda i-yana vikalelo namwasa wa weo ulukulele aliwa thitho hora dhinango anooda kaana makalelo oi kataoneya va hora yali aliwa ta-anakale vabanjani. Vyongo ninga vyevi, vinooda romi-a nyarwa. Malo moi mutu uliwethene va banjanivo azindiyele yoruchayee noimali-a, anoroma ombana landu unango nafwee. Thitho anooda onanga ira mwadhana ndi ndhila imbo-i inaode aliwa mali-edha nyarwadho. N’nga vyevi pyaimbarimbari?b Dhoweni nitapanyeni vya mutu mwinango oongiwa Bibilyani wenuo avilenle nyarwa dhilukulu maningi banjani.

9. N’nga Abigaeli agumanena nyarwa yoi a-vi?

⁹ Ifwanafwani-o ya Bibilyani. Abigaeli atheliwile na Nabala wenuo Bibilya linom’monga aliwa ira ali ouma rima thitho o-okaana makalelo apama. (1 Sa. 25:3) Vinooneya ira vyali vyorucha maningi wa Abigaeli kaana lombwana ninga wen’na. N’nga Abigaeli atokaana ndhila yogwandela yomali-edha banjalee? Kabe. Liye angaodile irana vyevi vevo Davide wenuo afuna dhakala mwene wa Aisaraeli, vyadhidhe liye ira adham’phe man’nee namwasa onyoza Daviduo na anamalabee. (1 Sa. 25:9-13) Abigaeli angaodile tawa i-yachi Davide ira aire vyafuna liye. Malomwee Abigaeli atoodhowa mam’mongana Davide ira a-am’phe Nabala. (1 Sa. 25:23-27) Mwasiwa ngwan’ni atoirana vyevi?

10. N’ga chini yam’kami-idhe Abigaeli vilela nyarwa dhagumanana liye?

¹⁰ Abigaeli anom’dhiveliwana Yohova thitho anoolemeza makundwee oonga vya banja. Mo-okaikela liye atoidhiwa vyevyo Yohova vyam’mwandele liye Adamu na Eva vevo varomi-a liye banja loromali. (Mar. 2:24) Abigaeli anoona ira Yohova unoona ira banja ndi yongo yopambuleya. Liye anoofuna m’sangalali-a Nlungu thitho vyevi vyatom’limbi-a ira aire vyongo vyothene vinaode liye ira avunele banjalee thitho man’nee. Atooirana vyongo mombaranya ira Davide a-am’phe Nabala. Thitho ali okozeya mapepesa va vyongo vya-adawi-idhe liye. Pyo-okaikela ira Yohova anom’dhiveliwana Abigaeli wenuo ali olimba rima thitho o-ovidhiveliwana. N’nga alombwana naa-iyana anofunjedhavon’ni va ifwanafwani-o ya Abigaeli?

11. (a) N’nga Yohova unodedi-edhela ira atu tali vabanjani tairengan’ni? (Aefeso 5:33) (b) N’nga ninofunjedhavon’ni vavyongo vyairile Carmen ira abarele banjalee? (Muone thitho iruthiruthi.)

¹¹ Vinofunjedhavo i-yo. Yohova unofuna ira atu othelana talemezenga banja angalive ira lombwana venango i-yana ngorucha. Nlungu unosangalala aonanga atu avabanjani tavilimbi-edhanga mali-a nyarwa dhinogumanana aliwa thitho tathonyi-edhangana udhivela na lemezo. (Muleri Aefeso 5:33.) Ifwanafwani-o va mwasula ndi Carmen. Ali vabanjani wa vyawa 6 voi ee-no atooroma funjedha Bibilya na Amboni dha Yohova thitho vasogolovee atoobadiziwa. Carmen aongile ira: “Man’nanga kaasangalala. Liye anokaana sanje voona ira ndinom’iya ekene ndadhowanga mam’labela Yohova. Voi ee-no anoondinyoza thitho nditucha ira unondi-iya.” Angalive ira vyali ee-no, Carmen atoodhowanave vilela banjanimwee. Wa vyawa 50, atoodhilimbi-edha ira am’dhiveliwengana thitho m’lemeza man’nee. Liye aongile ira: “Vyawa vyavira aliwa ndatoofunjedha irana vyongo mwazelu thitho onga mosamala na man’nanga. Ndanoidhiwa ira banja tophambuleya wa Yohova, ee-no ndanooirana yongo iliyothene yeniyo yaode miyo ira ndidhibarele. Kandinathuulelevo vyomwadhana naman’nanga namwasa oi ndinom’dhiveliwana Yohova.”c Akala munogumanana nyarwa banjani mwinyu, kamukaikelenga ira Yohova unodha ukami-ani ira muvilele.

MWADAWI-A VYONGO VINANGOVYEE MUDHOWENGANAVE M’LABELA YOHOVA

12. N’nga naira yodawa ilukulu ninogumanana nyarwa ivi?

¹² Nyarwa. Mutu unooda dhikumbanyedhanga maningi akala utoira yodawa ilukulu. Bibilya linooga ira vyodawa vi-u vinooda niiri-a ira “nikaena rima othweya thitho opwanyeya.” (Sal. 51:17) Bali mwinango dhinalee Robert atokaana thindhi maningi wa vyawa vinjinji ira afwanelele kala rumiwi okami-a. Mbwenye liye atooira yodawa ilukulu thitho aona ira utom’sukwali-a Yohova. Robert aongile ira: “Ithuulela rimanga yanoondiruchi-a moi vyakala ninga nditopwatela tolo wonyemela maningi. Vyevyo vyatoondiiri-a ira nda-adhivwenga pama navang’novene. Ndanoola thitho lobela wa Yohova. Vahora yeniyo ndaona ira Nlungu kanatatile horee ira avuruwane malobelwanga namwasa oi ndali ndingam’sukwali-idhe.” Naira yodawa ninooda tatila rima namwasa oi rimi-u wothweya unooda niiri-a thuulelanga ira Yohova utonitatila. (Sal. 38:4) Akala mutoroma dhivwavo e-no, dhoweni nitapanyeni ifwanafwani-o ya mutu oongiwa Bibilyani wenuo adhowilenave m’lambela Yohova angalive ira atoodawi-a vyongo vinango.

13. N’nga rumiwi Pedru adawi-idhe vyongo viivi, n’nga chini yam’muiri-idhe irana vyevi?

¹³ Ifwanafwani-o ya Bibilyani. Vama-iyu omari-a wa Yesu, rumiwi Pedru atoodawi-a vyongo vyevyo vyairi-idhe ira adawi-e maningo vyongo vinango. Yoroma, Pedru atoothonyi-edha vinyindela voonga modhigweli-a ira unodha kalave ororomeleya masiki arumiwi enango tam-iye Yesu. (Mrk. 14:27-29) Ee-no tangali mundani mwa Jesemani, Pedru atoimwanana kala methove. (Mrk. 14:32, 37-41) Vasogolovee, atootawa mwinji waatu wadhidhe dham-inda Yesu. (Mrk. 14:50) Vamamari-edhovee, Pedru atom’konda fendo uraru ira kanom’muidhiwa Yesu fiedha lumbelela vyonamavyo. (Mrk. 14:66-71) N’nga Pedru airilen’ni angaidhiwile ira utodawi-a vyongo? Liye atoodhivwela tangaranga rimani thitho atoola maningi venango namwasa oviomba landu. (Mrk. 14:72) N’nga munothuulela ira Pedru avivwide a-vi, vangavirile mahora oyeva vevo Yesu vaphiwile liye? Aviona ira ngo-okaana basa.

14. N’nga chini yam’kami-idhe Pedru ira adhowenave m’lambela Yohova? (Muone iruthiruthi yavakapani.)

¹⁴ Vatokala myasa mingasi yam’kami-idhe Pedru ira adhowenave m’lambela Yohova. Liye kaadhowile makala weewene mbwenye atoodhowa waabalee thitho vinooneya ira tatom’limbi-a. (Luk. 24:33) Wenjedhela vevo, Yesu angavenyathi-iwile atoodhowa maoneela wa Pedru, venango naifunelo yoi aman’limbi-e. (Luk. 24:34; 1 Ak. 15:5) Vasogolovee, malo mom’muombela uwali Pedru namwasa wa vyongo vyadawi-idhe liye, Yesu atom’mwandela fweula ira unodha wachela vizo vilukulu. (Ju. 21:15-17) Pedru atooidhiwa ira atoodawi-a vyongo maningi, mbwenye kaatatin’le rima. N’nga chini yam’kami-idhe? Liye atooidhiwa ira Mbwiyee Yesu kaa-iidhe m’dhiveliwana. Thitho abalee auzimu tatoodhowanave m’kami-a. N’nga ninofunjedhavon’ni vaifwanafwani-o ya Pedru?

15. N’nga Yohova unofuna ira na-akaikelenga n’ni? (Salimo 86:5; Aroma 8:38, 39) (Muone thitho iruthiruthi.)

¹⁵ Vinofunjedhavo i-yo. Yohova unofuna ira kanikaikelenga vyoi liye unonidhiveliwana thitho nilevelela. (Muleri Salimo 86:5; Aroma 8:38, 39.) Nadawa ninoviomba landu thitho vyevi pyovweya. Mbwenye kaninofwanela thuulelanga ira kanili ofwanelela dhiveliwiwa venango leveleliwa. Malomwee, ninofwanela sakasakanga kami-o mombaranya. Robert um’mongile i-yo ndulimu aongile ira: “Ndatoodawa namwasa oi ndanyindela kopolo dhanga ira ndirambele vyowesedha.” Liye atoozindiela ira afuneela wandela andimuwa avapingoni. Robert aongile ira: “Ndangairile vyevi, andimuwa avapingonao tatoondikami-a idhiwa ira Yohova unondidhiveliwana. Aliwa tatoothonyi-edha ira anondidhiveliwana. Tatoondikami-a idhiwa ira Yohova kandi-iidhe.” I-yo thitho kanikaikelenga ira Yohova unonidhiveliwana nonilevelela nachinyuwa vyodawa vi-u, vepha kami-o thitho dhilimbi-edha ira na-awelele irana vyongo vyadawi-idhe i-yovyo. (1 Ju. 1:8, 9) Roromela vyongo vyevyo unooda nikami-a ira na-atatile rima nagwegweduwa venango wugwa.

16. Mwasiwa ngwan’ni munofunechecha dhowanave m’labela Yohova?

¹⁶ Yohova unosimba maningi nadhilimbi-edhanga ira nim’lambelenga malambo omari-a oruchala. Liye unooda nikami-a ira nidhowenave m’lambela angalive ira ninosukwali-iwa. Ninooda dhiveliwangana abali naarongoli-u thitho alevelelanga tanidawela. Ninooda thonyi-edha ira ninom’dhiveliwana maningi Nlungu thitho lemeza makundwee, nadhilimbi-edhanga mali-a nyarwa dhinogumanana i-yo banjani mwi-u. Naira vyodawa, nim’vephenga Yohova ira anikami-e, nirumelenga ira unonidhiveliwana nonilevelela thitho nidhowenganave m’lambela. Kanikaikelenga ira ninodha fwanya maraeli-o manjinji akala “kanino-iya irana vyongo vyaphama.”—Agl. 6:9.