Muthuulelenga lobelela atu enango

1. N’nga ninoidhiwa a-vi ira malobelwi-u mbofuneya wa Yohova?

LOBELO ndi yotuva ya vakhundu. Muthuulele likhundo nli: Yohova atoovelela mabasa enango wa angelo. (Sal. 91:11) Thitho atoova-a Mwanee vizo vyofuneya maningi. (Mat. 28:18) N’nga izo yovuruwana malobelwi-u atooivelela thitho wa mutu mwinango? Khabe. Yohova atoosakula ira izo yen’na ikale yee baa-i. Yohova oi ndi “Ovwa lobelo,” unovuruwana ekhene malobelwi-u.—Sal. 65:2.

2. N’nga rumiwi Paulo avelenle ifwanafwani-o yoi a-vi vamwasa olobelela atu enango?

² Ninooda lobela wa Yohova nom’mwandela nyarwa dhi-u dhinonikhumbanyi-a. Mbwenye thitho nilobelelenga atu enango. Vyevi ndi vyairile rumiwi Paulo. Mofwanafwani-a, liye atoolembela pingo wau Efeso ira: “Ndinodhowanave ulobelelani.” (Aef. 1:16) Paulo anoolobelela thitho atu o-iyana-iyana. Mofwanafwani-a, liye atoom’mwandela Timoteo ira: “Ndinosimba Nlungu . . . thitho kandinodiwala uromola malobelwanga osembezela, nathana nama-iyu.” (2 Ti. 1:3) Paulo atookaana nyarwa dhee dhafuneela liye dhilobelela. (2 Ak. 11:23; 12:7, 8) Angalive ira vyali e-no, anoofwanyave hora yolobelela atu enango.

3. N’nga ndi vyongo vivi vinaniiri-e ira nidiwale lobelela atu enango?

³ Hora dhinango ninooda diwala lobelela atu enango. Mwasiwa ngwan’ni? Rongola mwinango dhinalee Sabrinaa atoonga mwasa umbo-i. Liye aongile ira: “Malamboano ingumii-u inokala yopingeya maningi. Ninooda thuulelanga maningi vya nyarwa dhi-u baa-i, fiyedha volobelelanga vyokhuza i-yo baa-i.” N’nga nyo thitho hora dhinango vyevi vinouirelani? Akala ndi e-no, yofunjedhila inoukami-ani. Yofunjedhila inoonga (1) mwasee unofuneela i-yo lobelelanga atu enango thitho (2) moda unairele i-yo vyevyo.

N’NGA MWASIWA NGWAN’NI NINOFWANELA LOBELELA ATU ENANGO?

4-5. N’nga malobelo anolobelela i-yo atu enango ‘analabe a-vi basa mwakopolo maningi’? (Yakobo 5:16)

⁴ Malobelo anolobelela i-yo atu enango ‘anolaba basa mwakopolo maningi.’ (Muleri Yakobo 5:16.) N’nga vyongo vinooda chinja vaingumi ya mutu namwasa oi nitom’lobelela? Ee vinooda chinja. Yesu angaidhi ira Pedru unom’khonda va-anavile hora, atoom’mwandela ira: “Miyo nditoulobelela ira iroromeloyaa ya-afooke.” (Luk. 22:32) Paulo naliyene thitho anoidhiwa ira lobelela atu enango unooda kami-a ira vyongo vichinje vaingumiiwa. Angamangiwile vo-okala mwasa wu Roma, Paulo atoom’mwandela Filimoni ira: “Ndinororomela ira namwasa wa malobelwinyu, ndinothathuliwa ira ndidhaulabeleni.” (Fil. 22) Thitho vyevi ndi vyaireile. Va-anavire hora, Paulo atookhumi-iwa perezoni atooroma okoka laleela.

⁵ Mbwenye vyevi kavinothapulela ira malobelwinyu anooda m’kanyi-edha Yohova ira aire vyongo vinango. Liye unoona vyongo vinokhumbanyi-a anamalabee thitho hora dhinango unosakula irana vim’vephile aliwavyo. Idhiwa vyevi unooda nikami-a ira nilobelenga wa Yohova moweli-edha weli-edha va nyarwa igumanen’na i-yo nororomelanga ira liye unoniwakhula mundhila yofwanelela.—Sal. 37:5.

6. N’nga lobelela atu enango unokhuza a-vi moda munowaonela i-yo? (1 Pedru 3:8)

⁶ Nalobelelanga atu enango, vinonikami-a ira nikaengana “tangaranga dhilukhulu.” (Muleri 1 Pedru 3:8.) Mutu watangaranga unozindiyela nyarwa dhinogumanana atu enango thitho unodhilimbi-edha fanya ndhila dhoi aakami-ena. (Mrk. 1:40, 41) Bali mwinango oi ndi ndimuwa wavapingoni dhinalee Michael atoonga ira: “Nalobelelanga atu enango, nom’mwandela Yohova vyongo vinofuneela aliwa, vinondikami-a idhiwa nyarwa dhinolimbanana aliwa thitho vyevi vinoiri-a ira ndiadhiveliwengana maningi. Ndinoaona ira mbaafwanga avarimani angalive ira aliwa katinoviidhiwa vyevi.” Bali Richard, oi ndi ndimuwa wavapingoni atoonga ira: “Nalobelela mutu mwinango paevo vanokala i-yo ofunechecha m’kami-a.” Liye atoonga thitho ira: “Nakami-a mutu mwinango unolobelelecha i-yo vinokala ninga nitokami-a wakhula lobelo li-unle.”

7. N’nga lobelela atu enango unanikami-e a-vi ira na-athuulelenga vya nyarwa dhi-u baa-i? (Afilipi 2:3, 4) (Muone thitho viruthiruthi.)

⁷ Nalobelelanga atu enango, vinonikami-a ira nionenga nyarwa dhi-u mofwanelela. (Muleri Afilipi 2:3, 4.) Uliwethene wa i-yo unolimbanana nyarwa dhinango namwasa oi ninokala ilambo inotongiwa na Namanami-a. (1 Ju. 5:19; Apok. 12:12) Hora dhothene nalobelela atu enango ninothuulela ira ‘abali-u vailambo yothene anogumanana thitho nyarwa ninga dhedho.’ (1 Pe. 5:9) Rongola mwinango oi ndi painiya, dhinalee Katherine atoonga ira: “Ndalobelela atu enango, ndinothuulela ira kandili ndekhene unogumana vyorucha. Likhundo leli linondikami-a ira nda-athuulelenga maningi vya nyarwa dhanga.”

NILOBELELENGA ATU ENANGO

8. Muonge vifwanafwani-o vyaatu anaode i-yo alobelela.

⁸ N’nga mbaatu a-vi anaode i-yo alobelela? Ninooda lobelela atu amaziza o-iyana-iyana. Mofwanafwani-a, ninooda lobelela atu anobulela, azombwe anokanyi-edhiwa naafwiwa irana vyongo vyo-ofwanelela xikolani venango atu anogumanana vyorucha namwasa oulula. Makristau afwi-u anjinji anaaoni-iwa nyarwa naabaliwa venango maguverno. (Mat. 10:18, 36; May. 12:5) Namwasa wa nyarwa dha vyandale abali naarongoli-u tatootawa no-iya nyumba dhiwa. Thitho enango anaaona nyarwa namwasa wa masoka a vilengo. Atu enango mwaabali naarongolala kaninoaidhiwa. Mbwenye naalobelelanga ninothonyi-edha ira ninovwela lamulo laniva-idhe Yesu loi, “mudhivelengana.”—Ju. 13:34.

9. N’nga mwasiwa ngwan’ni ninofwanela lobelela abali anosogolela mugulu la Yohova thitho a-iyaniwa?

⁹ Ninooda thitho lobelela abali anosogolela mugulu la Yohova. Abalala anothangani-avo abali a Gulu Lotonga na anoakhami-a, abali Amakomisau a Tambi, abali anoing’anela madipartamento amaofesi atambi, anamaing’nela isa, andimuwa avapingoni naarumiwi okami-a. Anjinji mwaabalala anolimbanana nyarwa dhinowakhumbanyi-a mbwenye angalive e-no anodhivelela ira tanikami-e. (2 Ak. 12:15) Mofwanafwani-a, bali mwinango oi ndi nama-ing’anela isa dhinalee Mark atoonga ira: “Yongo imbo-i inondikhumbanyi-a maningi choi ndinokala undendai maningi naanamabalanga oi mboulula. Anamabalanga ambilene atokaana vyorucha vyamanungoni. Angalive ira rongolanga na man’nee anowasamalela, vinondipha maningi rimani ona ira kandinaode irana vinjinji voakami-a.” Angalive ira kaninaode idhiwa vyongo vyothene vinokhumbanyi-a abali anolaba mwathindhi ndipama alobelela. (1 At. 5:12, 13) Ndipama thitho lobelela a-iyana aabalala oi anokami-a aman’niwa mororomeleya ira adhowenave laba urumiwiiwa.

10-11. N’nga Yohova unooda sangalala na malobelwi-u angalive ira kaniongile bali venango rongola uliwethene vaekhene? Muongemo.

¹⁰ Ninga muoni i-yo, hora dhinjinji ninolobelela magulu aabali naarongola o-iyana-iyana. Mofwanafwani-a, angalive ira kaninothuulela vya mutu mwinango, ninooda vepha Yohova ira akami-e abali naarongola ali perezo thitho didili-a rima abali takweliwile. Bali mwinango oi ndi ndimuwa wa vapingoni dhinalee Donald atoonga ira: “Vatokala abali naarongola anjinji anogumanana nyarwa moi hora dhinango ndinoalobelelecha othene enao vambo-i ira Yohova aakami-e.”

¹¹ N’nga Yohova unosangalala na malobelo enao? Ee. Thitho kanaode idhiwa vyothene vinofuneela bali venango rongola uliwethene. Ee-no pyofwanelela lobelela abali naarongola othene vambo-i. (Ju. 17:20; Aef. 6:18) Malobelo ninga enala anothonyi-edha ira ‘ninodhiveliwana gulu lothene laabali.’—1 Pe. 2:17.

VINOFWANELA I-YO ONGA NALOBELELANGA MUTU ULIWETHENE VAEKHENE

12. N’nga aidhiwa pama atu enango unanikhami-e a-vi ira niongenga vyongo vyaimbarimbari vinoaireela naalobelelanga?

¹² Mwaaidhiwenga pama atu enango. Wenjedhela volobelela abali naarongola ninga gulu, ninofwanela lobelela thitho mutu uliwethene vaekhene vom’romola dhina. N’nga pingoni mwinyu mutokala mutu uliwethene unobulela urenda o-oila? N’nga mutokala zombwe oi unokhumbanya namwasa oi afwee anaam’kanyi-edha ira airena vyongo vyothakala? N’nga vatokala namabala mwinango oi unaadhilimbi-edha ulukhuli-a mwana ekhene “movwelana na vinoonga Yohova”? (Aef. 6:4) Naidhiwa vyongo vinoaireela atu enango, vinodha nikami-a ira naavwelenga tangaranga thitho adhiveliwangana maningi. Vyevi vinooda nilimbi-a ira naalobelelenga.b—Aro. 12:15.

13. N’nga ninaire a-vi ira niodenga lobelela atu oi kaninoadhiwa?

¹³ Mulobelelenga atu enango voaromola madhina. Ninooda irana vyevi masiki waatu oi kaninaromevo agumanana. Mofwanafwani-a, kathuulelani vya abali naarongola oi tali perezoni wu Crimea, Eritrea, Rusiya na Singapura. Munooda fwanya madhina aabali naarongola oi tali perezo va jw.org.c Namaeng’anela isa mwinango dhinalee Brian atoonga ira: “Ndinoona ira ndalemba dhina la bali venango rongola oi uli perezo nolileri mogweli-a madhu, vinondikami-a ira ndithuulelenga mutuo nom’romola ndalobelanga.”

14-15. N’nga ninaire a-vi ira nalobelelanga atu enango niongenga vyongo vyaimbarimbari vinofuna i-yo?

¹⁴ Muongenga vyongo vyaimbarimbari vinofuna nyo. Michael um’muongile i-yo maromelule atoonga ira: “Ndaleringa va jw.org vyaabali naarongola oi tali perezo, ndinoroma thuulela mwemo mwadhivwele miyo aakale ira ngumiyo umangiwile. Ndinoidhiwa ira ndingakhumbanyedhenga vya i-yananga thitho onechecha ira vatokala mutu unom’samalela. Vyevi vinondikhami-a ira ndiidhiwenga vyongo vyaimbarimbari vinaonge miyo ndalobelelanga abali othela oi tali perezoni.—Aeb. 13:3.

¹⁵ Akala ninothuulela vyongo vyo-iyana-iyana vinogumanana abali naarongoli-u perezo dambo nlilothene, vinooda nikami-a fwanya vyongo vinaonge i-yo naalobelelanga. Mofwanafwani-a, ninooda lobela ira alimbo ing’anela perezo tairenga vyongo mwatangaranga naabali naarongoli-u thitho ira anamatonga taarumeli-enga ira talambelenga Yohova mothathuwa. (1 Ti. 2:1, 2) Ninooda lobela thitho ira abali naarongola pingoni talimbi-iwenga namwasa ororomeleya wa bali venango rongola uli perezoni. Venango ira atu oi kai Amboni takaengana ifunelo namwasa wa kalelolee novuruwana milanywi-u. (1 Pe. 2:12) Makhundu enala anooda nikami-a nalobelelanga abali na arongola oi anaagumanana nyarwa dhoi-yana-iyana. Naidhiwa pama atu enango, thitho alobelela voromola madhiniwa noonganga vyongo vyaimbarimbari vinofuna i-yo ira Yohova aairele, vinothonyi-edha ira ‘ninodhivelana maningi.’—1 At. 3:12.

NIONENGA MOFWANELELA MALOBELWI-U

16. N’nga ninaire a-vi ira nionenga mofwanelela malobelwi-u? (Mateu 6:8)

¹⁶ Ninga muoni i-yo, nalobelelanga atu enango vinokhami-a ira vyongo vichinje vaingumiiwa. Mbwenye likhundo leli ninofwanela liona mofwanelela. Nithuulelenga ira nalobelanga ninokala nim’mwandelanga Yohova vyongo vyoi liye utomala viidhiwa wale. Mbwenye thitho kaiira Yohova unofuna malangi-oi-u a mwemo munairele liye vyongo vinango. Yohova unoidhiwa vyongo vinofuneela arumiwee masiki aliwa venango i-yo na-anaviidhiwe. (Muleri Mateu 6:8.) Akala ndi e-no n’nga vatokala mwasa uliwethene ira nilobelelenga atu enango? Ee. Wenjedhela va myasa ioni i-yo muyofunjedha yei, nalobelelanga atu enango, ninothonyi-edha ira ninoathuulela. Udhivela unonilimbi-a ira nilobelelenga atu enango. Thitho Yohova unosangalala aona ira anamalabee tano-arela ifwanafwani-oyee vothonyi-edha atu enango udhivela.

17-18. N’nga malobelo anolobelela i-yo abali naarongola ninooda afwanafwani-edhela na n’ni?

¹⁷ Angalive ira hora dhinango malobelwi-u kanaode chinja vyongo vaingumi ya abali naarongoli-u, mbwenye anothonyi-edha ira ninoadhiveliwana thitho Yohova unoona vyevi. Vyevi ninooda vifwanafwani-a na banja lina a-ima ambili ang’ono, wa lombwana na wa-iyana. Mwana walombwana unaabulela. Thitho mwana wa sikana unaavepha babee ira: “Ndinouvephani ira mum’kami-e balangula. Liye unaauvwa upha maningi.” Babuo unoidhiwa moda uli vyongo, thitho unom’dhiveliwana maningi mwanuo nom’samalela pama. Mbwenye babuo unosangalala voona ira mwaniwa wa i-yanuo unom’dhiveliwana maningi baleuo moi unaavepha babeuo ira am’kami-e.

¹⁸ Vyevi ndi vinofuna Yohova ira niviirengana. Liye unofuna nidhivelengana thitho lobelelana. Nairangana vyevi malobelwi-u anothonyi-edha ira ninodhiveliwana afwi-u mokhumela vathi varima thitho Yohova unoona vyevi. (2 At. 1:3; Aeb. 6:10) Ninga muoni i-yo, hora dhinango malobelwi-u anooda kami-a ira vyongo vichinja vaingumi yaatu enango. Ee-no dhoweni niire vyothene vinaode i-yo ira nithuulelenga lobelela atu enango.