MURU OFUNJEDHA 47
NYUMBO 38 Adzakulimbitsa
“ Nyo muli ofuneya maningi”!
“Weyo uli mutu ufuneya maningi.”—DAN. 9:23.
VINOFUNA I-YO FUNJEDHA
Kami-a atu anodhiona ira mbothitha pereso ira tavwecheche ira aliwa mbofuneya maningi vamethoni va Yohova.
1-2. N’nga chini inofuna nikami-a sikimizela ira nili ofuneya vamethoni va Yohova?
ARUMIWI a Yohova mbofuneya maningi wa liye. Mbwenye atu enango vinoarucha roromela ira Yohova unowadhiveliwanadi. Venango anothuulela vyevi namwasa oi atooroma ireliwavo vyongo vyothakala, ngumwasee anodhiona ninga mbo-ofuneya. N’nga nyo thitho munodhivwa e-no? N’nga chini inaukami-eni ira mukaena inyindelo ira muli ofuneya maningi vamethoni va Yohova?
2 Yongo imbo-i inaode ukami-ani kuthuulela myasa ya Bibilyani inothonyi-edha moda mwemo Yohova munofunela liye ira atu taoniwenga a-vi thitho tasamaleliwenga a-vi. Mwanee Yesu, anowasamalela atu mwalemezo. Voirana vyevyo, liye atoothonyi-edha ira atu enao tadhiona ira mbo-ofuneya mwaimbarimbari mbofuneya maningi wa liye na wa Babee. (Ju. 5:19; Aeb. 1:3) Muyofunjedha yei, ninotapanya: (1) mwemo Yesu mwakami-edhe liye atu dhiona kala ofuneya maningi vamethoni va Yohova thitho (2) mwemo munaode i-yo sikimizela ira nili ofuneya maningi vamethoni va Yohova.—Aga. 2:7.
N’NGA YESU AAKAMI-IDHE A-VI ATU DHIONA IRA MBOFUNEYA MANINGI?
3. N’nga Yesu aakami-idhe a-vi atu enao tadha wa liye angali wu Galileya?
3 Yesu vyalaleela liye wu Galileya, atu anjinji tanoodha wa liye dham’vuruwana thitho ira taili-iwe. Yesu atoozindiyela ira aliwa “tali onyozeya thitho o-okaana namasogolela ninga mabila o-okaana namakumbiza.” (Mat. 9:36; muone madhu achindo a yofunjedha.) Anamasogolela amareligiau taaona atwao ninga atu o-oidhiwa vyongo oi katinooda asamalela. Aliwa tanoaromola ira “mbaatu otembeleliwa.” (Ju. 7:47-49 thitho madhu achindo) Mbwenye Yesu anoasamalela moriya rima thitho mwalemezo, vokaana hora yoafunji-a noili-a marendiwa. (Mat. 9:35) I-yavo vyevyo, ira aodenga kami-a atu anjinji, Yesu anoafunji-a anamafunjedhee laleela milanyu yapama noava-a kopolo ira ‘taili-enga arenda.’—Mat. 10:5-8.
4. N’nga ninofunjedhavon’ni vya moda mwemo Yesu mwaakami-edhela liye atu enao tadhiona ninga mbonyozeya?
4 Vosamalela atu mwalemezo, Yesu atoothonyi-edha ira liye vambo-i na Babee, atu anooneya ninga mbonyozeya mbofuneya maningi waaliwa. Akala nyo munom’labela Yohova mbwenye mukaikelanga ira muli ofuneya, murome thuulela mwemo Yesu mwaasamalele liye atu ooneya ninga mbo-ofunja enao tafuna idhiwa vinjinji vyokhuza liye. Irana vyevyo unooda ukami-ani ira mudhionenga ira muli ofuneya vamethoni va Yohova.
5. N’nga chini inoidhiwa i-yo vyokhuza i-yana wenuo aguman’nena Yesu wu Galileya?
5 Kai ira Yesu airave funji-a mwinji waatu baa-i, mbwenye thitho anooing’anechecha mutu uliwethene vaekhene. Mofwanafwani-a, wari mwa urumiwee wu Galileya, liye atoogumanana i-yana mwinango wenuo abulela marenda okhuma sangiri wa vyawa 12. (Mrk. 5:25) Movwelana na ilamulo, urenda wen’na wanoom’mwiri-a i-yanula kala othakali-iwa thitho mutu uliwethene afuna m’samela angakanle othakali-iwa. Ee-no liye kaafwanela kala duzi naatu thitho vinooneya ira hora injinji akalecha ekhene. I-yavo vyevyo, liye kaafwanela lambela Yohova vambo-i naatu enango mu sinagoga venango mafesta enango taireya. (Lev. 15:19, 25) Mwaimbarimbari, i-yanula anoorucheya maningi mwaututuni thitho mumathuulelo.—Mrk. 5:26.
6. N’nga i-yana arilen’ni ira aili-iwe?
6 I-yana orucheyula afuna ira Yesu am’mwili-e. Mbwenye liye kaam’vephile ira airena vyevyo. Namwasa wan’ni? Venango anookaana manyadho namwasa wa urendee. Venango thitho aova ira Yesu unom’tamangi-a, namwasa oi ali othakali-iwa thitho kaafwanela kala vamwinjini vaatu. Liye a-indile yowara ya Yesu baa-i, vororomela ira airana vyevyo unoila. (Mrk. 5:27, 28) Thitho liye atookaana iroromelo yolimba. Urendee watoomala! Adhamale Yesu atoofuka atu ira undi-indile mbaani, thitho i-yanuo atoonga vyairile liye. N’nga Yesu airilen’ni?
7. N’nga Yesu am’kami-idhe a-vi i-yana arucheya maningule? (Marku 5:34)
7 Yesu atoom’kami-a i-yanuo moriya rima thitho mwalemezo. Liye atoona ira i-yanuo “atoova noroma ngurumela.” (Mrk. 5:33) Angazindiyele moda mwadhivwa i-yanuo thitho yorucha yana liye, moriya rima liye atoom’limbi-a. Liye atoofiya vom’romola ira “mwanawe” —madhu enala kaathonyi-edha lemezo baa-i, mbwenye thitho anoothonyi-edha m’dhiveliwana. (Muleri Marku 5:34.) Madhu achindo a yofunjedha vamadhu enala anoonga ira: “Yen’na yali fendo yoroma yolembiwa Bibilyani vevo Yesu vam’mwitanile liye i-yana ira ‘mwanawe.’ Venango Yesu atooirana vyevi namwasa oi marendao tali ova-a manyadho thitho i-yanuo ‘aira ngurumela.’” Kathuulelani moda mwadhivele liye kala oluluveliwa thitho osangalala! Aakale ira Yesu kai oriya rima, i-yanuo angaodile ila mwaututuni, mbwenye mathuuleloni angadhowilanave uvwa upha thitho dhiombanga landu. Yesu anoofuna m’mwirela vyongo vinjinji a-kala m’mwili-a mwaututuni baa-i. Yesu afuna ira i-yanuo aone ekhene ira mwaimbarimbari ali mwana ofuneya wa Babi-u waudhivela wadhulu.
8. N’nga pyorucha vivi vyalimban’nena rongola mwinango wau Brazil?
8 Malamboano thitho arumiwi a Nlungu tanorucheya namwasa wa marenda enao anoairi-a ira takalenga osukwala thitho dhionanga ira mbo-ofuneya. Kathuulelani yorucha ya Mariya,a wenuo ndi painiya okaatheya wa Brazil. Namwasa wa vyorucha vya manungoni, liye abaliwile o-okaana mendo thitho dhandha la ono wazwele. Liye aongile ira: “Miyo ndanoosingililiwecha xikolani thitho oni-iwa nyarwa namwasa orangala wanga. Afwanga a xikolani tanoondiva-echa madhina enango ondisingilila. Thitho hora dhinango atu a banjani mwanga tanoondinyoza.”
9. N’nga chini yam’kami-idhe Mariya dhiona ira ali ofuneya maningi wa Yohova?
9 N’nga chini yam’kami-idhe Mariya? Liye angakanle wa Mboni dha Yohova, abali naarongola tanoodha dham’didili-a thitho tatoom’kami-a Mariya ona ekhene ira Yohova unom’mona. Liye aongile ira: “Kadernwanga utoyeva ira ndilembe madhina othene aabali naarongala enao aodile ndikami-a! Miyo ndinosimba Yohova narimanga wethene vondiva-a banja lauzimu lapama.” Abali naarongolala tatoom’kami-a Mariya ona ira liye ngofuneya maningi vamethoni va Nlungu.
10. N’nga chorucha ivi yana Mariya Madalena thitho liye adhivwa a-vi namwasa wa vyevyo? (Muone thitho viruthiruthi.)
10 Kaonani mwemo Yesu mwakami-edhele liye mutu mwinango wenuo aitaniwa Mariya Madalena. Liye atookaana viwanda 7! (Luk. 8:2) Venango liye anoirana vyongo vyothakala namwasa wa viwanda vyana liyevyo. Ngumwasiwa atu takalecha undendai na liye. Vaingumiyee yoruchila, liye anoodhivwa kala o-obaliwa thitho o-obareleya, nothuulelanga ira kana idedi-edho iliyothene. Vinooneya ira Yesu atookhumi-a viwanda vyam’moni-a nyarwavyo, thitho liye atookala nama-arelee ororomeleya. N’nga Yesu am’kami-idhe Mariya Madalena mundhila inango ivi ira aidhiwe ira ngofuneya maningi wa Nlungu?
N’nga Yesu am’sikimizele a-vi Mariya Madalena ira ali ofuneya maningi wa Yohova? (Muone ndima 10 na 11)
11. N’nga Yesu am’thonyi-edhe a-vi Mariya Madalena ira ali ofuneya maningi wa Nlungu? (Muone thitho iruthiruthi.)
11 Yesu thitho atoom’tukula Mariya Madalena ira am’velele va maulendwee odhowa malaleela.b Mwandhila yen’na liye atookaana ngari yodhowanave m’vuruwana Yesu vahora yafunji-a liye atu enango. Yesu thitho atooneela wa liye vahora yavenyathi-iwile liye, moi liye ali mutu oroma tapanya na Yesu vadambo lelo. Thitho Yesu atoom’vepha liye ira amawandele arumiwee vyoi liye utovenyathi-iwa. Muvyothene vyevi, Yesu atoom’kami-a Mariya Madalena ona ira mwaimbarimbari ali ofuneya maningi wa Yohova!—Ju. 20:11-18.
12. N’nga chini yam’mwiri-idhe Lidia dhionanga ira kanofwanela dhiveliwiwa?
12 Molandana na Mariya Madalena, atu anjinji malamboano tanorucheya na mathuulelo odhiona ninga katinobaliwa. Rongola mwinango wau Espanha, uongile ira, m’manga angana wise atoothuulela vyotatila wisiyo. Lidia unothuulela ira angali mwana, m’mee kam’samalela pama thitho anoom’mongela vyongo vyothakala. Liye aongile ira vyafunecha miyo vaingumi yanga pyoi tandionenga kala ofuneya thitho tandidhiveliwengana. Miyo ndanoovecha ira kandinodha dhiveliwiwa na mutu mwinango, namwasa oi m’manga atoondisikimizela ira ndili mutu othakala maningi.”
13. N’nga chini yam’kami-idhe Lidia dhiona ira ngofuneya wa Yohova?
13 Lidia angaromile funjedha Bibilya, vyongo vyatoochinja. Lobela wa Yohova, leri Bibilya thitho madhu apama a abali naarongola vyatoom’kami-a ira avwecheche ira ali ofuneya maningi vamethoni va Yohova. Liye aongile ira: “Hora dhothene unondiwandelecha moda munondidhiveliwana liye. Thitho hora dhothene unodithuucha vyamakalelwanga apama. Axamwalanga avarimani tanoirana thitho vimbo-ive.” Mofwanafwana na Lidia, mutu mwinango pingoni mwinyu unooda thitho funeeleya kami-o ira adhionenga kala mutu ofuneya maningi vamethoni va Yohova. N’nga nyo munooda thuulela mutu mwinango unofuneeleya kami-o mundhila yen’na?
N’NGA NINAIRE A-VI IRA NIDHIONENGA NINGA MUNONIONELA YOHOVA?
14. N’nga lemba la 1 Samueli 16:7 linanikami-e a-vi dhiona ninga munonionela Yohova? (Muone thitho kwadru “Mwasiwa ngwan’ni atu a Yohova mbofuneya maningi wa liye?”)
14 Muthuulelenga ira Yohova kanouonani ninga mwemo munouonelani atu amuilamboi. (Muleri 1 Samueli 16:7.) Atu anjinji muilamboi, mutu unom’mona aliwa ira ngofuneya akale obaleya, akaena kobiri, thitho afunje maningi. Bwenye Yohova kanoniona mundhila yen’na. (Esa. 55:8, 9) Moi e-no, malo modhilandani-a na mathuulelo amuilambonimu, munofwanela dhilandani-a namathuulelo a Yohova. Bibilya linonga vyaatu enango oi hora dhinango tadhiona ira mbaatu o-okaana basa, mofwanafwani-a, Eliya, Naomi thitho Ana. Mwaleringa Bibilya, muvwechechenga mwemo Yohova mwaadhiveliwana liye. Nyo thitho munofwanela kaana kaderno oi mulembe vyongo vyaireile vaingumiinyu vyothonyi-edha moda mwemo munoudhiveliwanani liye thitho uonani ira muli ofuneya. I-yavo vyevo, munoda sakasaka mwasa oi “dhiona ninga o-ofuneya” mumabukhwi-u.c
15. Mwasiwa ngwan’ni Yohova anoom’mona Danieli kala mutu “ofuneya maningi”? (Danieli 9:23)
15 Muidhiwe ira roromeleleya winyu unouri-ani ira mukale ofuneya wa Yohova. Vahora inango, namaongela Danieli, oi venango ana vyawa 90, “atoochenyela maningi” thitho sukwala. (Dan. 9:20, 21) N’nga Yohova am’limbi-idhe a-vi? Liye atooruma ngelo Gabrieli dhathuucha Danieli ira ali mutu “ofuneya maningi” thitho dham’mwandela ira malobelwee atoovuruwaniwa. (Muleri Danieli 9:23.) N’nga chini yam’mwiri-idhe Danieli kala mutu ofuneya wa Nlungu? Enango mwamakalelwee ali oi anoodhiveliwana vyongo vyapama thitho ali ororomeleya. (Zak. 14:14) Yohova atoolokota yoireya yei Bibilyani ira anididili-enga. (Aro. 15:4) Liye thitho unovuruwana malobelwinyu nouonani kala ofuneya namwasa odhiveliwana vyongo vyapama thitho namwasa om’labela mororomeleya.—Mik. 6:8, madhu achindo; Aeb. 6:10.
16. N’nga chini inaukami-eni m’mona Yohova kala Baba waudhivela?
16 Mum’monenga Yohova ninga Babinyu wenuo unoudhiveliwani. Liye ngofunechecha ukami-ani, thitho kanousakelani myasa. (Sal. 130:3; Mat. 7:11; Luk. 12:6, 7) Thuulela vyongo vyevi utokami-a atu anjinji enao tadhiona kala o-ofuneya. Mofwanafwani-a, kaonani vyam’muireile Michelle rongola mwinango wau Espanha wenuo adhivwa ninga kanobaliwa thitho adhiona ninga ngo-ofuneya wa vyawa vinjinji namwasa wa madhu aiburutu am’moongela man’nee. Liye aongile ira: “Vahora iliyothene yadhivwa miyo ira ndili o-ofuneya, ndanoodhilimbi-edha thuulela Yohova anganditukunle mandhanimwee thitho andithonyi-edhanga udhivela nondibarela.” (Sal. 28:9) Lauren, rongola mwinango wau África do Sul, hora dhothene unothuulela ira: “Akala Yohova moriya rima utondimburulela wa liye naudhivelee ulukhulu, nondiiri-a kalanga duzi na liye wa vyawa vyothene vyevi thitho ndi-indi-edha basa vofunji-a atu enango imbarimbari, mwaimbarimbari liye unondiona ira ndili ofuneya maningi.” —Ose. 11:4.
17. N’nga munasikimizele a-vi ira munodhiveliwiwa na Yohova? (Salimo 5:12) (Muone thitho iruthiruthi.)
17 Musikimizelenga ira Yohova unoudhiveliwanani. (Muleri Salimo 5:12.) Davide atoofwanafwani-edha dhiveliwana Yohova na “yodhibarelana ilukhulu” inobarela atu olongomana. Idhiwa ira munodhiveliwiwa thitho kami-iwa na Yohova unooda kala ninga yodhibarelana yeniyo inofuna ubarelani mwaroma thuulela vyongo vyothakala. N’nga nyo munaidhiwe a-vi akala munodhiveliwiwa na Yohova? Ninga muoni i-yo ninooda sikimizela, akala ninoleri Bibilya, mwemo Yohova munoonga liye vyokhuza i-yo. I-yavo vyevo, liye uno-indi-edha basa andimuwa apingoni, axamwalinyu avarimani, thitho atu enango ira authuuchengani ira nyo muli ofuneya maningi vamethoni va liye. N’nga munaire a-vi akala mutu mwinango utouwandelani vyongo moriya rima?
Thuulela ira ninodhiveliwiwa na Yohova unonikami-a ira niodenga limbanana mathuulelo odhiona ninga kanili ofuneya (Muone ndima 17)
18. N’nga mwasiwa ngwan’ni munofwanela rumela atu enango tausimbangani?
18 Murumelenga akala atu enao anoudhiveliwani thitho uidhiwani tausimbangani. Muthuulenga ira Yohova uno-indi-edha basa atu enao ira taukami-eni vwechecha ira nyo munodhiveliwiwa na liye. Michelle, umuongile i-yo ndulimu, unoonga ira: “Mwavang’ono navang’ono, ndinaafunjedha khumela vathi va rima atu enango tandisimbanga moriya rima. Irana vyevi pyorucha maningi wa miyo mbwenye nditoidhiwa ira ndi vyevyo vinofuna Yohova ira ndiirengana.” Andimuwa avapingoni moriya rima anom’kami-a Michelle ona ira unodhiveliwiwa na Yohova. Va-eeni liye ndi painiya thitho unokami-a va Beteli angali vandhevee.
19. Mwasiwa ngwan’ni munofwanela sikimizela ira muli ofuneya maningi vamethoni va Nlungu?
19 Moriya rima Yesu unonithuucha ira nili ofuneya maningi wa Babi-u wa dhulu. (Luk. 12:24) Ninooda sikimizela ira Yohova unoniona kala atu ofuneya maningi. Moi ee-no kamudiwale vyevi! Thitho ninofwanela ira vyothene vinaode i-yo ira nikami-e atu enango dhiona ira mbofuneya maningi vamethoni va Nlungu!
NYUMBO 139 Yerekezerani Kuti Muli M’dziko Latsopano
a Madhina enanga atochinjiwa.
b Vinooneya ira Mariya Madalena ali m’mbo-i mwaai-yana enao tawendecha na Yesu. A-iyanala tanoo-indi-edha basa kobiri dhiwa ira tasamalele vyofuneeleya vya Yesu na vyaanama-arelee.—Mat. 27:55, 56; Luk. 8:1-3.
c Mofwanafwani-a, munooda leri kapitulu 24 ya bukhu loi Yandikilani Yohova na vyoireya vya Bibilyani vili mu muru oi “Kudzikayikira” mu bukhu loi Malemba Othandiza pa Moyo wa Chikhristu.