Mokanda ya liboso epai ya Bakorinti
3 Na yango, bandeko, nakokaki te koloba na bino lokola bato ya elimo,+ kasi nde lokola bato ya mosuni, lokola bana mike+ na kati ya Kristo. 2 Napesaki bino nde mabɛlɛ, kasi bilei ya makasi te, mpo bozalaki naino mpenza makasi te. Kutu, ata sikoyo mpe bozali mpenza makasi te,+ 3 mpamba te bozali naino bato ya mosuni.+ Mpo lokola zuwa mpe koswana ezali na kati na bino, bozali bato ya mosuni+ mpe bozali kotambola lokola bato batambolaka, boye te? 4 Mpo ntango moko alobi ete: “Ngai nazali moto ya Paulo,” kasi mosusu alobi ete: “Ngai moto ya Apolosi,”+ bozali kaka kosala makambo lokola bato te?
5 Kutu, Apolosi nde nani? Ɛɛ, Paulo azali nani? Basaleli+ oyo na nzela na bango bokómaki bandimi, kaka ndenge Nkolo apesaki na moto na moto. 6 Ngai nalonaki,+ Apolosi amwangisaki mai,+ kasi Nzambe azalaki kokolisa. 7 Na yango, moto oyo azali kolona azali eloko te, ndenge moko mpe moto oyo azali komwangisa mai, kasi kaka Nzambe oyo akolisaka.+ 8 Nzokande moto oyo azali kolona mpe moto oyo azali komwangisa mai bazali moko,* kasi moto na moto akozwa mbano na ye na kolanda mosala na ye moko.+ 9 Mpo tozali bato oyo bazali kosala elongo na Nzambe. Bozali elanga ya Nzambe oyo ezali kolonama, ndako oyo Nzambe azali kotonga.+
10 Na kotalela boboto monene ya Nzambe oyo emonisamaki epai na ngai, natyaki moboko+ lokola mokambi ya misala oyo ayebi malamu mosala na ye.* Sikoyo moto mosusu azali kotonga likoló na yango. Kasi moto na moto asengeli kokeba na ndenge oyo azali kotonga likoló ya moboko yango. 11 Mpo moto moko te akoki kotya moboko mosusu longola kaka oyo etyamá, oyo ezali Yesu Kristo.+ 12 Nzokande soki likoló ya moboko yango moto atongi na wolo, na palata, na mabanga ya ntalo, na mabaya, na matiti, to na ndɛlɛ, 13 mosala ya moto na moto ekomonana polele, mpo mokolo ya komekama ekomonisa yango, mpo ekomonisama na nzela ya mɔtɔ;+ mpe mɔtɔ nde ekolakisa soki mosala ya moto mokomoko ezalaki malamu to mabe. 14 Soki mosala oyo moto atongi likoló ya moboko wana etikali, moto yango akozwa mbano; 15 soki mosala ya moto eziki, moto yango akotikala mabɔkɔ mpamba, kasi ye moko akobika; nzokande, soki bongo, ekozala lokola nde aleki na mɔtɔ.
16 Boyebi te ete bino bozali tempelo ya Nzambe,+ mpe ete elimo ya Nzambe efandi na kati na bino?+ 17 Soki moto abebisi tempelo ya Nzambe, Nzambe akobebisa ye; mpo tempelo ya Nzambe ezali mosantu, mpe bozali tempelo yango.+
18 Moto amikosa te: Soki moto moko na kati na bino akanisi ete azali moto ya bwanya na mokili oyo,* akóma zoba, mpo akóma moto ya bwanya. 19 Mpo bwanya ya mokili oyo ezali bozoba na miso ya Nzambe; mpo ekomamá ete: “Akangaka bato ya bwanya na kati ya mayele mabe na bango moko.”+ 20 Mpe lisusu: “Yehova* ayebi ete makanisi ya bato ya bwanya ezali mpamba.”+ 21 Na yango, moto amikumisa te mpo na bato; mpo biloko nyonso ezali ya bino, 22 ezala Paulo to Apolosi to Kefa*+ to mokili to bomoi to liwa to biloko oyo ezali sikoyo to biloko oyo ekoya, biloko nyonso ezali ya bino; 23 kasi bino bozali bato ya Kristo;+ mpe Kristo azali moto ya Nzambe.