Mokanda ya liboso ya Samwele

2 Bongo Hana abondelaki boye:

11 Na nsima, Elekana akendaki na ndako na ye na Rama, kasi mwana yango ya mobali akómaki mosaleli ya* Yehova+ liboso ya nganga-nzambe Eli.

12 Nzokande, bana mibali ya Eli bazalaki bato mabe;+ bazalaki kotosa Yehova te. 13 Na esika ya kozwa eteni oyo banganga-nzambe basengelaki kozwa+ ntango moto ayei kopesa mbeka, bango bazalaki kosala boye: Mbala nyonso oyo moto azalaki kopesa mbeka, mosaleli moko ya nganga-nzambe azalaki koya na nkanya ya mino misato ntango mosuni ezalaki naino kotɔka, 14 mpe azalaki kotuba yango na kati ya saani monene, na kati ya nzungu ya mabɔkɔ mibale, na kati ya nzungu ya monene, to na kati ya nzungu ya lobɔkɔ moko. Eloko nyonso oyo nkanya ezalaki kobimisa, nganga-nzambe azalaki kozwa yango mpo na ye moko. Ndenge wana nde bazalaki kosalela Bayisraele nyonso oyo bazalaki koya na Shilo. 15 Lisusu, liboso kutu mafuta ya nyama oyo moto amemi mpo na kopesa mbeka etumbama mpe ebimisa milinga,+ mosaleli ya nganga-nzambe azalaki koya mpe koloba na moto oyo ayei kopesa mbeka yango ete: “Pesá nganga-nzambe mosuni mpo atumba. Akolinga te opesa ye mosuni oyo batɔkisá, alingi kaka mosuni ya mobesu.” 16 Soki moto yango alobi na ye: “Zelá básala naino ete mafuta ebimisa milinga,+ na nsima, okozwa eloko nyonso oyo olingi,”* ye azalaki koloba: “Te, pesá ngai yango sikoyo; soki te, nakozwa yango na makasi!” 17 Bongo lisumu ya basaleli yango ekómaki monene mpenza na miso ya Yehova,+ mpo mibali yango bazalaki komemya likabo ya Yehova te.

18 Nzokande, Samwele azalaki kosala mosala+ liboso ya Yehova; azalaki kolata* efode ya lini,+ atako azalaki naino mwana moke. 19 Lisusu, mbula na mbula mama na ye azalaki kosalela ye mwa kazaka ezangá mabɔkɔ, mpe komemela ye yango ntango azalaki kokende elongo na mobali na ye mpo na kopesa mbeka ya mbula na mbula.+ 20 Mpe Eli apambolaki Elekana ná mwasi na ye mpe alobaki boye: “Tiká ete Yehova apesa yo mwana na nzela ya mwasi oyo, azala na esika ya mwana oyo bodefisaki Yehova.”+ Bongo bazongaki epai na bango. 21 Yehova atyelaki Hana likebi mpe azwaki zemi;+ mpe abotaki bana mibali mosusu misato mpe bana basi mibale. Nzokande elenge Samwele azalaki se kokola liboso ya Yehova.+

22 Bongo Eli akómaki mobange mpenza, kasi ayokaki makambo nyonso oyo bana na ye bazalaki kosalela+ Bayisraele nyonso, mpe ndenge bazalaki kolala na basi oyo bazalaki kosala na ekɔtelo ya hema ya kokutana.+ 23 Azalaki kaka koloba na bango boye: “Mpo na nini bozali kosala makambo ya boye? Mpo makambo oyo nazali koyoka epai ya bato nyonso mpo na bino ezali mabe. 24 Te, bana na ngai, nsango oyo nazali koyoka bato ya Yehova bazali kotambwisa mpo na bino ezali malamu te. 25 Soki moto asaleli moninga lisumu, moto mosusu akoki kobondela Yehova mpo na ye;* kasi soki moto asaleli Yehova lisumu,+ nani akoki kobondela mpo na ye?” Nzokande, baboyaki koyokela tata na bango, mpo Yehova azwaki ekateli ya koboma bango.+ 26 Na ntango wana, elenge Samwele azalaki se kokola. Yehova mpe bato bazalaki kosepela na ye mingi.+

27 Mosakoli moko ya Nzambe ayaki epai ya Eli mpe alobaki na ye: “Talá oyo Yehova alobi: ‘Ngai nde namimonisaki mpenza epai ya ndako ya nkɔkɔ na yo ntango ye ná libota na ye bazalaki baombo na ndako ya Farao na Ezipito, boye te?+ 28 Mpe naponaki ye kati na mabota nyonso ya Yisraele,+ mpo azala nganga-nzambe na ngai mpe amata na etumbelo na ngai+ mpo na kopesa mbeka, mpo na kotumba mpaka ya malasi,* mpe mpo na kolata efode liboso na ngai. Mpe napesaki ndako ya nkɔkɔ na yo makabo nyonso ya Bayisraele* oyo etumbami na mɔtɔ.+ 29 Mpo na nini bozali kotyola mbeka na ngai mpe likabo na ngai oyo napesaki mitindo ete esengeli kopesama na ndako na ngai?+ Mpo na nini ozali kokoba kokumisa bana na yo koleka ngai, na ndenge bozali kolya biteni oyo eleki malamu ya likabo nyonso oyo bato na ngai Bayisraele bazali kopesa?+

30 “‘Yango wana Yehova, Nzambe ya Yisraele alobi boye: “Ya solo, nalobaki ete bato ya ndako na yo mpe bato ya ndako ya nkɔkɔ na yo bakotambola ntango nyonso liboso na ngai.”+ Kasi sikoyo, Yehova alobi: “Ekosalema lisusu bongo te, mpo baoyo bazali kopesa ngai lokumu, ngai mpe nakopesa bango lokumu,+ kasi baoyo bazali kotyola ngai, nakotala bango lokola eloko mpamba.” 31 Talá! Na mikolo ezali koya, nakosilisa nguya* na yo mpe nguya ya ndako ya nkɔkɔ na yo, mpo moto moko te ya libota na yo akokóma mobange.+ 32 Wana makambo ya Yisraele ekotambola malamu, okomona monguna na yo na kati ya ndako na ngai;+ mpe ata mokolo moko te moto moko akokóma mobange na libota na yo. 33 Moto na yo moko oyo nakolongola te na mosala na etumbelo na ngai akosala ete miso na yo elɛmba mpe akomemela yo mpasi,* kasi bato mingi ya libota na yo bakokufa na mopanga.+ 34 Mpe likambo oyo ekokómela bana na yo mibale Hofini ná Finehase, ekozala elembo mpo na yo: Bango nyonso mibale bakokufa mokolo moko.+ 35 Na nsima, nakotya nganga-nzambe moko ya sembo mpo na ngai.+ Akosala makambo oyo motema na ngai elingi;* mpe nakosala ete bakitani na ye bázala banganga-nzambe mpo na libela, mpe akotambola ntango nyonso liboso ya moto oyo natye mafuta. 36 Moto nyonso oyo akotikala na ndako na yo akoya kogumbamela ye mpe kobondela ye ete apesa ye mosala mpo azwa mwa mbongo mpe limpa; mpe akoloba: “Nabondeli yo, kómisá ngai nganga-nzambe mpo nazwaka mwa eloko ya kolya.”’”+