Bizaleli malamu oyo esilaka ngala te​—Bolingo

TOLI YA BIBLIA: “Bólata bolingo, mpo ezali ekanganeli ya kokoka mpo na bomoko.”​—Bakolose 3:14.

MATOMBA: Bolingo oyo Biblia elobeli mingi ezali te bolingo ya mwasi ná mobali. Ezali nde bolingo oyo emonanaka na bizaleli lokola motema mawa, kolimbisa, komikitisa, bosembo, boboto, motema pɛtɛɛ mpe motema molai. (Mika 6:8; Bakolose 3:12, 13) Na kokesana na lolango oyo ezwaka moto soki amoni mwasi to mobali moko ya kitoko, oyo mbala mingi esilaka nsima ya mikolo, bolingo oyo Biblia elobeli ekobaka nde kobakisama.

Brenda, oyo abalá eleki sikoyo mbula soki 30, alobi boye: “Bolingo oyo baoyo bauti kobalana sika bazalaka na yango ekopusana ata moke te na bolingo oyo mwasi ná mobali bakómaka na yango ntango bambula ezali koleka na libala na bango.”

Sam, mobali oyo abalá eleki sikoyo mbula koleka 12, alobi boye: “Ngai ná mwasi na ngai tosepelaka mingi mpe tokamwaka na ndenge oyo batoli ya Biblia esalisaka mpenza mpe ezalaka mindɔndɔ te! Soki osaleli yango, makambo etambolaka malamu. Kasi, atako nakoki koloba ete nasalelaka ntango nyonso batoli na yango, kasi ekómaka mpe nasalela yango te, na ndakisa soki nakómi kosilika mpambampamba, koluka mwa moke matomba na ngai moko to soki nalɛmbi. Na bantango ya ndenge wana, nabondelaka Yehova asalisa ngai nalongola makanisi wana ya mabe. Na nsima, napesaka mwasi na ngai bizi mpe tobosanaka nyonso oyo eleki!”

Yesu Kristo alobaki ete “bwanya ya moto emonanaka na makambo ya boyengebene oyo asalaka.” (Matai 11:19) Na yango, Biblia ezali mpenza na bwanya ya solosolo. Mateya mpe bizaleli oyo yango elendisaka esalisaka mpenza bato. Esilaka ngala te. Ekipaka mimeseno to ekólo ya moto te. Lokola emonisaka mpenza bomoto na biso, yango emonisi ete ezali buku ya Yehova Nzambe, Mozalisi na biso. Yango emonanaka ntango tozali kosalela batoli na yango. Yango wana Biblia esɛngi biso ‘tómeka mpe tómona ete Yehova azali malamu.’ (Nzembo 34:8) Okondima kosala bongo?