Bosembo ezali nzela eleki malamu

BOSEMBO elendisami kati na Biblia, mpe esɛngami epai na baklisto na solo. (Matai 22:39; 2 Bakolinti 8:21) Epai mosusu, ezali mpenza nzela eleki malamu, lokola emonisi yango na mikolo na biso, bomoi na bato mingi oyo elimo mpe motema na bango esili kobongwana na boyebi ya solo ya Biblia. Ezali yango nde emonisami na ndakisa oyo euti na Libéria.

Nsima na kokanisa mingi mpe kobondela, nkulutu moko mpe mwasi na ye bazwaki ekateli ya kokanga atélier na bango ya kotonga bilamba. Mpo na nini? Mpamba te mosala oyo bazalaki kosala kuna ezalaki kozwa bango ntango mingi; ezalaki kotya nkaka na misala na bango mpo na Nzambe mpe boyekoli na bango ya Biblia. Bazwaki bongo ekateli ya kosepela na mosolo moke ekozwama na kotekisa langi. Kasi bobele nsima mwa moke ntango bazwaki ekateli yango, motuya ya langi ekitaki makasi na mboka na bango. Mosolo bakomaki kozwa ezalaki lisusu kokokisa bamposa ya libota na bango te. Basengelaki kosala nini?

Basengaki na kompanyi oyo epai bazalaki kokenda kosomba langi ete bakitisa ntalo mpo ete bazwa mwa litomba likoló, kasi baboyaki. Nzokande, kompanyi yango eyebisaki bango ete bakokaki kotindela bango factures mibale: moko ekozala na ntalo mpenza oyo basombelaki biloko mpe mosusu ekozala ntalo ya lokuta. Na kolakisaka yango na douane, bakofuta taxe ya moke. Na ndenge yango, nkulutu wana alingaki kozwa litomba ya moyibi ya 2 000 dollars ntango nyonso oyo akosomba langi.

Temwe aboyaki kosangana na likambo wana ya moyibi na nzela na yango alingaki koyiba Leta. Bakonzi ya kompanyi bakamwaki mpe bakomelaki ye ete: “Tozali kotosa lisosoli na yo”, mpe baponaki ye lokola motekisi se moko ya biloko ya kompanyi na bango na Libéria. Lokola babandaki bongo kokokisa bamposa ya libota na bango, nkulutu wana mpe mwasi na ye bakɔtaki na mosala ya pionnier auxiliaire, yango ezali kosalisa bango na kosala elongo na baninga na bango baklisto mpe kolendisa lisangá na bango. Na ntembe te, bosembo na bango ezalaki lipamboli mpo na bango.

Na Espagne, Alfonso mpe ayaki komona ete koloba solo ezali nzela eleki malamu. Elenge yango akimaki ndako ya baboti na ye wana ezalaki ye na mibu 12; nsima mwa moke, abandaki kotekisa drogue, koyiba mituka mpe koyiba na bandako mpe na bamagasini, ata zomi na mokolo moko. Wana ekomaki ye na mibu 21, baninga na ye oyo bayibaki na ye elongo babetaki ye makasi, bayibaki drogue na ye nyonso mpe balobaki na ye ete bakoboma ye soko ameki kofunda bango epai na bapolisi. Ayebanaki mingi mpenza na bapolisi na yango amekaki te ata kokenda na hopital mpo na kozwa nkisi.

Ntango bampota na ye ebandaki kosila mokemoke, Alfonso akanisaki malamumalamu na bomoi oyo azalaki kolanda. Amikundolaki makambo oyo mama na ye ayebisaki ye na ntina na Biblia mpe na mitinda na boklisto ntango azalaki naino elenge. Ayokelaki ye te, kasi sikawa alukaki ete ayekola Biblia elongo na ba Témoins de Jéhovah. Nsima na sanza motoba abongolaki mpenza bizaleli mpe bomoto na ye mpe akokisaki masɛngami mpo na kozwa batisimo.

Nzokande, mokolo moko liboso na batisimo na ye, ebongisamaki na tribinale mpo na kosamba mpo bafundaki ye ete ayibaki na monduki. Efundeli yango ezalaki mpo na koyiba oyo ayibaki kala mpenza. Ata bongo, Alfonso andimaki mabe na ye mpe akangamaki na kozelaka kosambisama Avocat na ye apusaki ye aloba ete ayibaki te mpe asalelaki monduki te mpo na koyiba. Kasi Alfonso alingaki koloba solo. Lokola likambo asalaki ezalaki monene mpe asila kofundama mpo na makambo ebele, Leta akatelaki ye mibu 13 ya boloko. Kasi mpo na etamboli na ye malamu mpe bosembo na ye, bazuzi bakatelaki ye se sanza motoba. Yango ezalaki ntango oyo asilaki kolekisa na boloko na kozelaka ete basambisa ye.

Sikawa, Alfonso mpe mwasi na ye bazali kosalela Jehovah na bosembo nyonso. Bazali na esengo na ndenge bazwi mokano ya solo kati na bomoi na bango mpe bamoni na bomoi na bango mpenza ete, bosembo ezali nzela eleki malamu.