Ndenge oyo mwana moko asalisaki Tata na ye

JAMES azali na mbula 32 mpe afandaka na Angleterre; azali na mayele mpenza te mpo bɔɔngɔ na ye esalaka malamu te. Atako bongo, James, mama na ye na yaya na ye ya mwasi, bazalaki koyangana na makita ya Batatoli ya Yehova banda bambula mingi. Kasi, tata na ye azalaki kolanda ata moke te makambo na bango ya kosambela. Mokolo moko na mpokwa, nsima ya likita moko oyo basalaki elakiseli oyo emonisaki ndenge ya kobengisa moto oyo oyebi na Ekaniseli ya liwa ya Klisto, James akendaki mbangu na eteni ya ndako oyo alalaka. Mama na ye alandaki ye na motema likoló, mpe akutaki ye azali kobimisa nokinoki bazulunalo Linɔ́ngi ya Mosɛnzɛli mpe Lamuká! ya kala. Aponaki moko oyo, na lokasa ya nsuka, ezalaki na fɔtɔ ya lokasa mpo na kobengisa bato na Ekaniseli mpe akendaki mbangu epai ya tata na ye. Alakisaki liboso mosapi na elilingi mpe na nsima alakisaki tata na ye mpe alobaki ete “Yo!” Baboti na ye batalanaki mpe bakamwaki ntango bakangaki ntina ete James azalaki kobengisa tata na ye na Ekaniseli. Tata na ye alobaki ete akokende.

Na mpokwa ya mokolo ya Ekaniseli, James afungolaki armware oyo tata na ye atyaka bilamba mpe aponaki patalo moko, amemelaki tata na ye, mpe alakisaki ye na bilembo ete alata yango. Tata na ye ayebisaki ye ete akokende te. James na mama na ye bakendaki bango moko na Ndako ya Bokonzi.

Kasi, nsima ya mikolo, James akómaki koboya ete mama na ye abongisa ye mpo bákende na makita, azalaki kosepela kotikala na tata na ye na ndako. Mokolo moko ya lomingo na ntɔngɔ, James aboyaki lisusu ete mama na ye abongisa ye mpo na kokende na makita. Kasi, mama na ye akamwaki ntango tata ya James atunaki ete, “James, soki ngai nakei makita lelo yo mpe okokende?” James asepelaki. Ayambaki tata na ye mpe alobaki ete “Ɛɛ!” mpe bango misato bakendaki na Ndako ya Bokonzi.

Banda mokolo yango, tata na James akómaki kokende makita nyonso ya mokolo ya lomingo mpe mosika te alobaki ete soki alingi kokola, asengeli koyanganaka na makita mosusu nyonso. (Baebele 10:​24, 25) Asalaki yango, mpe na nsima ya sanza mibale, abandaki koyekola Biblia mbala na mbala. Akolaki nokinoki, abongolaki bomoi na ye, mpe mosika te akómaki kosakola nsango ya Bokonzi. Nsima ya mbula moko banda akómaki koyekola Biblia, amipesaki na Yehova mpe azwaki batisimo na mai. Lelo oyo azali mosaleli na misala na lisangá. Libota mobimba bazali kosalela Yehova na bomoko.