Tólona bizaleli oyo ekosalisa biso tókómisa bato bayekoli
“Bókende mpe bókómisa bato bayekoli na bikólo nyonso.”—MATAI 28:19.
1. Na ntango ya kala, basaleli mosusu ya Nzambe basengelaki kokolisa makoki mpe bizaleli nini?
NA BANTANGO mosusu, esɛngaka ete basaleli ya Yehova bákolisa makoki mpe bizaleli oyo ekosalisa bango básala mokano ya Nzambe. Na ndakisa, ndenge Nzambe asɛngaki bango, Abalayama ná Sala balongwaki na Ulu, engumba ya bozwi, mpe bakolisaki bizaleli mpe makoki oyo esalisaki bango bámesana kofanda na bahema. (Baebele 11:8, 9, 15) Mpo na kokɔtisa Bayisalaele na Mokili ya Ndaka, Yosua asengelaki kozala na mpiko, na elikya makasi epai ya Yehova, mpe koyeba Mibeko ya Nzambe. (Yosua 1:7-9) Atako Besalele mpe Oholiaba bazalaki na makoki mingi, elimo ya Yehova esalisaki bango bákolisa makoki yango mpo na kotambwisa mosala ya kotonga tabenakle mpe misala na yango mosusu.—Exode 31:1-11.
2. Mituna nini oyo etali mosala ya kokómisa bato bayekoli tokolobela?
2 Bankama ya bambula na nsima, Yesu Klisto apesaki bayekoli na ye etinda oyo: “Bókende mpe bókómisa bato bayekoli na bikólo nyonso, . . . koteyáká bango bátosa makambo nyonso oyo napesi bino etinda.” (Matai 28:19, 20) Liboso na yango, bato bazwaki mokumba monene ndenge wana te. Tosengeli kozala na bizaleli nini mpo na kokokisa mosala ya kokómisa bato bayekoli? Ndenge nini tokoki kolona bizaleli yango?
Tómonisa bolingo makasi mpo na Nzambe
3. Mosala ya kokómisa bato bayekoli ezali kopesa biso libaku nini?
3 Kosolola na bato mpe kosalisa bango bándima kosambela Nzambe ya solo ezali kosɛnga ete tózala na bolingo makasi mpo na Yehova. Mpo na komonisa bolingo na bango mpo na Nzambe, Bayisalaele basengelaki kotosa mibeko na ye na motema mobimba, kopesa ye bambeka ya malamu, mpe kosanzola ye na banzembo. (Deteronome 10:12, 13; 30:19, 20; Nzembo 21:13; 96:1, 2; 138:5) Lokola tozali na mokumba ya kokómisa bato bayekoli, biso mpe totosaka mibeko ya Nzambe, kasi tomonisaka mpe bolingo na biso mpo na Yehova na ndenge toyebisaka bato mosusu nkombo na ye mpe mokano na ye. Yango ezali kosɛnga tólobaka na kondima; tópona maloba ya malamu mpo na komonisa ndenge oyo totalelaka elikya oyo Nzambe apesi biso.—1 Batesaloniki 1:5; 1 Petelo 3:15.
4. Mpo na nini Yesu azalaki kosepela koteya bato makambo ya Yehova?
4 Lokola Yesu azalaki na bolingo makasi mpo na Yehova, azalaki kosepela kolobela mokano ya Nzambe, Bokonzi na ye, mpe losambo ya solo. (Luka 8:1; Yoane 4:23, 24, 31) Kutu, alobaki boye: “Bilei na ngai ezali nde kosala mokano ya moto oyo atindaki ngai mpe kosilisa mosala na ye.” (Yoane 4:34) Yesu akokisaki maloba oyo ya mokomi ya nzembo: “Nasepeli kosala yango ekosepelisa yo; e Nzambe na ngai; mibeko na yo ezali kati ya motema na ngai. Nasakoli boyengebene kati na koyangana monene; talá nakokanga bibɛbu na ngai te. Ee [Yehova], yo oyebi bongo.”—Nzembo 40:8, 9; Baebele 10:7-10.
5, 6. Wapi ezaleli ya ntina mingi mpo na kokómisa bato bayekoli?
5 Na bantango mosusu, bolingo mpo na Yehova etindaka bato oyo bayekoli solo ya Biblia sika bálobelaka makambo ya Yehova mpe Bokonzi na ye na kondimisama makasi na boye ete bato mosusu bandimaka koyekola Biblia. (Yoane 1:41) Bolingo mpo na Nzambe nde ezaleli ya ntina mingi oyo etindaka biso tómipesa na mosala ya kokómisa bato bayekoli. Yango wana, tótángaka mpe tómanyolaka Liloba ya Nzambe mokolo na mokolo mpo bolingo yango ekita te.—1 Timote 4:6, 15; Emoniseli 2:4.
6 Ya solo, bolingo oyo Yesu azalaki na yango mpo na Yehova nde esalisaki ye azala moteyi ya molende. Nzokande, ezali mpe na ezaleli mosusu oyo esalisaki ye azala mosakoli malamu ya Bokonzi. Na yango, wapi ezaleli mosusu oyo esalisaki Yesu alonga kokómisa bato bayekoli?
Tómibanzabanzaka mpo na basusu
7, 8. Ndenge nini Yesu azalaki kotalela bato?
7 Yesu azalaki komibanzabanza mpo na bato mpe azalaki mpenza kotyela bango likebi. Ata liboso aya na mabelé, ntango azalaki elongo na Nzambe na likoló lokola “mosali ya mayele,” azalaki kosepela na bato awa na mabelé. (Masese 8:30, 31, NW) Ntango ayaki awa na mabelé, Yesu azalaki komonisela bato boboto mpe kobɔndisa baoyo bazalaki koya epai na ye. (Matai 11:28-30) Yesu amonisaki bolingo mpe boboto ya Yehova, mpe yango ebendaki bato na losambo ya Nzambe kaka moko ya solo. Bato ya lolenge nyonso bazalaki koyoka Yesu mpamba te azalaki mpenza komibanzabanza mpo na bango mpe makambo ya bomoi na bango.—Luka 7:36-50; 18:15-17; 19:1-10.
8 Ntango moto moko atunaki Yesu nini asengeli kosala mpo na kozwa bomoi ya seko, “Yesu atalaki ye mpe liyoki ya bolingo mpo na ye ezwaki ye.” (Malako 10:17-21) Mpo na bato mosusu oyo Yesu ateyaki na Betania, tozali kotánga boye: “Yesu azalaki kolinga Malata mpe ndeko na ye ya mwasi mpe Lazalo.” (Yoane 11:1, 5) Yesu azalaki komibanzabanza mingi mpo na bato na boye ete na bantango mosusu azalaki komipimela kopema mpo na koteya bango. (Malako 6:30-34) Komibanzabanza mpe bolingo mpo na bato esalaki ete Yesu aleka moto mosusu nyonso na oyo etali kobenda bato na losambo ya solo.
9. Ezaleli nini Paulo azalaki na yango na mosala ya kokómisa bato bayekoli?
9 Ntoma Paulo mpe azalaki komibanzabanza mingi mpo na bato oyo azalaki koteya. Na ndakisa, akomelaki baklisto ya Tesaloniki boye: “Kozaláká na bolingo ya motema mpo na bino, tosepelaki mingi kopesa bino, kaka nsango malamu ya Nzambe te, kasi mpe milimo na biso moko, mpamba te bokómaki balingami na biso.” Mpo na milende oyo Paulo asalaki, bato mosusu na Tesaloniki ‘batikaki bikeko na bango mpo na kosala lokola baombo mpo na Nzambe ya bomoi.’ (1 Batesaloniki 1:9; 2:8) Soki biso mpe tolandi ndakisa ya Yesu mpe ya Paulo mpe tozali mpenza komibanzabanza mpo na bato, tokoyoka esengo ya komona ndenge nsango malamu ekosimba mitema ya baoyo ‘bazali na ezaleli oyo ebongi mpo na bomoi ya seko.’—Misala 13:18.
Tómonisa elimo ya komipimela
10, 11. Ndenge nini elimo ya komipimela esalisaka biso na mosala ya kokómisa bato bayekoli?
10 Bato oyo balongaka na mosala ya kokómisa bato bayekoli, bamonisaka elimo ya komipimela. Mpo na bango, koluka kozala na bozwi mingi, yango nde likambo eleki ntina te. Kutu, Yesu ayebisaki bayekoli na ye boye: “Ekozala likambo ya mpasi mpenza mpo baoyo bazali na mbongo bákɔta na bokonzi ya Nzambe!” Bayekoli bakamwaki ntango bayokaki maloba yango; kasi, Yesu abakisaki boye: “Bana, ezali mpenza likambo ya mpasi kokɔta na bokonzi ya Nzambe! Koleka ya kamela na lidusu ya ntonga ezali mpenza pɛtɛɛ mingi koleka kokɔta ya moto ya bomɛngo na bokonzi ya Nzambe.” (Malako 10:23-25) Yesu apesaki bayekoli toli ete bázala na bomoi ya mindɔndɔ te mpo bátya makanisi na bango nyonso na mosala ya kokómisa bato bayekoli. (Matai 6:22-24, 33) Ndenge nini elimo ya komipimela esalisaka biso na mosala ya kokómisa bato bayekoli?
11 Mpo na koteya bato makambo oyo Yesu apesaki etinda, esɛngaka kosala milende. Mbala mingi, mosala ya kokómisa bato bayekoli esɛngaka ete mosakoli atambwisaka boyekoli ya Biblia pɔsɔ na pɔsɔ na moto oyo azali kosepela. Mpo na kozwa mabaku mingi ya kokutana na bato, basakoli mosusu batikaki misala oyo ezalaki kozwa bango mokolo mobimba. Ebele ya baklisto mosusu bayekoli monɔkɔ mosusu mpo na koteya bapaya oyo bazali na mboka na bango. Baklisto mosusu mpe bakei na bamboka to bikólo mosusu mpo na kosala mingi na mosala ya kobuka mbuma. (Matai 9:37, 38) Nyonso wana esɛngaka kozala na elimo ya komipimela. Kasi, esuki kaka wana te.
Tózala na motema molai kasi tóbebisaka ntango te
12, 13. Mpo na nini motema molai ezali na ntina mingi na mosala ya kokómisa bato bayekoli?
12 Motema molai ezali ezaleli mosusu oyo esalisaka biso na mosala ya kokómisa bato bayekoli. Bato basengeli kozwa ekateli nokinoki ntango bayoki nsango ya Bokonzi; kasi, mbala mingi kokómisa moto moyekoli esɛngaka ntango mpe kozala motema molai. (1 Bakolinti 7:29) Yesu azalaki motema molai mpo na ndeko na ye Yakobo. Ekoki kozala ete Yakobo ayebaki mosala ya kosakola oyo Yesu azalaki kosala; atako bongo makambo mosusu ezalaki kopekisa ye akóma moyekoli. (Yoane 7:5) Kasi, emonani ete Yakobo akómaki moyekoli mwa moke liboso ya Pantekote ya mobu 33 ya ntango na biso (T.B.), mpamba te Biblia emonisi ete azalaki elongo na mama na ye, na bandeko na ye, mpe bantoma mpo na kobondela. (Misala 1:13, 14) Na nsima, Yakobo akolaki mingi na elimo, azwaki mikumba minene na lisangá.—Misala 15:13; 1 Bakolinti 15:7.
13 Ndenge moko na basali-bilanga, baklisto bazali kolona biloko oyo mbala mingi ekolaka malɛmbɛmalɛmbɛ—kokanga ntina ya Liloba ya Nzambe, kolinga Yehova, mpe kozala na bizaleli ya boklisto. Nyonso wana esɛngaka kozala motema molai. Yakobo akomaki boye: “Bómonisa motema molai, bandeko, tii na kozala ya Nkolo. Talá! Moloni-bilanga akobaka kozela mbuma ya malamu ya mabelé, komonisáká motema molai likoló na yango tii akozwa mbula ya ebandeli mpe mbula ya nsuka. Bino mpe bómonisa motema molai; bókómisa mitema na bino ngwi, mpamba te kozala ya Nkolo ekómi pene.” (Yakobo 5:7, 8) Yakobo alendisaki baklisto ‘bámonisa motema molai tii na kozala ya Nkolo.’ Ntango bayekoli bazalaki te kokanga ntina ya likambo moko, Yesu azalaki na motema molai mpe azalaki kolimbwela bango makambo yango mpe kopesa bango bandakisa. (Matai 13:10-23; Luka 19:11; 21:7; Misala 1:6-8) Lokola tozali na eleko ya kozala ya Nkolo, tosengeli kozala motema molai na mosala ya kokómisa bato bayekoli. Lelo oyo, tosengeli kozala motema molai mpo na koteya bato oyo bazali kokóma bayekoli ya Yesu.—Yoane 14:9.
14. Ata soki tosengeli kozala motema molai, ndenge nini tosengeli kosalela ntango na biso na mayele?
14 Kasi, ata soki tozali motema molai, liloba ebotaka mbuma te epai ya bato mingi oyo tobandaka koyekola na bango Biblia. (Matai 13:18-23) Yango wana, soki tosali milende oyo ekoki mpo na kosalisa bango, ekozala malamu tóbebisa ntango mpamba te na bato ya ndenge wana, mpe tóluka bato oyo bakopesa motuya na solo ya Biblia. (Mosakoli 3:1, 6) Ezali kosɛnga biso ntango mpo na kosalisa ata bato oyo basepeli mpenza mpo bábongola makanisi na bango, bizaleli na bango, mpe makambo oyo batyaka liboso na bomoi na bango. Yango wana, tosengeli kozala motema molai, ndenge Yesu azalaki na bayekoli na ye oyo bazalaki na mokakatano mpo na kokóma na makanisi oyo ebongi.—Malako 9:33-37; 10:35-45.
Tókolisa mayele ya koteya
15, 16. Mpo na nini koteya na ndenge ya pɛtɛɛ mpe komibongisa malamu ezali na ntina na mosala ya kokómisa bato bayekoli?
15 Bolingo mpo na Nzambe, komibanzabanza mpo na bato, kozala na elimo ya komipimela, mpe motema molai ezali na ntina mingi mpo na kokómisa bato bayekoli. Kasi, tosengeli mpe kozala na mayele ya koteya mpamba te yango esalisaka biso tólimbolaka makambo na ndenge ya polele mpe ya pɛtɛɛ. Na ndakisa, mateya mingi ya Yesu, Moteyi Monene, ezalaki kosimba mitema mpo ezalaki pɛtɛɛ. Na ntembe te, oyebi maloba ya Yesu lokola oyo: “Bómibombela biloko ya motuya na likoló.” “Bópesa eloko ya bosantu na bambwa te.” “Bwanya emonani moyengebene na misala na yango.” “Bózongisa biloko ya Kaisala epai ya Kaisala, kasi biloko ya Nzambe epai ya Nzambe.” (Matai 6:20; 7:6; 11:19; 22:21) Yesu azalaki kaka koloba maloba mikusemikuse ndenge wana te. Azalaki mpe koteya na maloba ya polele mpe azalaki kolimbola makambo ntango amoni ete ebongi kosala yango. Ndenge nini tokoki komekola lolenge ya koteya ya Yesu?
16 Mpo na koteya na ndenge ya pɛtɛɛ mpe ya polele, esɛngaka komibongisa malamu. Mosakoli oyo amibongisi te alobaka mingi. Akoki kotika makanisi ya ntina, mpe koloba makambo nyonso ayebi mpo na likambo oyo bazali kolobela. Nzokande, mosakoli oyo amibongisi malamu atalelaka mposa ya moto oyo azali koteya, amanyolaka makambo oyo bakolobela, mpe alobelaka polele kaka makambo esengeli. (Masese 15:28; 1 Bakolinti 2:1, 2) Atalelaka makambo oyo moto yango ayebi mpe makanisi nini asengeli konyata na boyekoli. Mosakoli akoki koyeba malamu lisolo oyo bazali kolobela, kasi, mpo na koteya na ndenge ya polele, esɛngaka kolongola makanisi oyo ezali mpenza na ntina te.
17. Ndenge nini tokoki kosalisa bato bákanisa na makambo oyo ezali na Biblia?
17 Yesu azalaki mpe kosalisa bato bákanisa, na esika ayebisa bango makambo oyo basengeli kosala. Na ndakisa, mokolo moko, atunaki boye: “Okanisi nini, Simona? Bakonzi ya mabelé bazwaka lifuti to mpako ya moto na moto epai ya banani? Epai ya bana na bango to epai ya bapaya?” (Matai 17:25) Na bantango mosusu, esɛngaka tómipekisa mpo tótika koloba mingi mpo na kopesa moyekoli nzela abimisa makanisi na ye to alimbola likambo moko oyo touti koyekola. Kasi, tosengeli te kolekisa ndelo na kotuna mituna. Nzokande, soki tozali na mayele, tozali kosalela bandakisa ya malamu, mpe tozali kotuna mituna oyo ebongi, tokosalisa bango básepela na makanisi ya Biblia oyo ezali na mikanda na biso.
18. Kozala na “mayele ya koteya” esangisi makambo nini?
18 Biblia elobeli “mayele ya koteya.” (2 Timote 4:2; Tito 1:9) Kozala na mayele yango esuki kaka te na kosalisa moto akangaka makambo na motó. Tosengeli kosalisa moyekoli ayeba malamu bokeseni kati na solo mpe lokuta, malamu ná mabe, mpe kati na bwanya mpe bozoba. Soki tozali kosala bongo mpe tozali kosala makasi mpo na kolona bolingo ya Yehova na motema ya moto, yango ekosalisa ye amona ntina ya kotosa Nzambe.
Tózala na molende na mosala ya kokómisa bato bayekoli
19. Na ndenge nini baklisto nyonso bapesaka mabɔkɔ na mosala ya kokómisa bato bayekoli?
19 Lisangá ya boklisto ezali ebongiseli mpo na kokómisa bato bayekoli. Ntango moto moko akómi moyekoli, ezali te kaka Motatoli oyo akutanaki na ye mpe ayekolaki na ye Biblia nde asepelaka. Na ndakisa, ntango etuluku moko ya bato bazali koluka mwana moko oyo abungi, ntango mosusu kaka moto moko nde akomona mwana yango. Kasi, ntango bamemi mwana yango epai ya baboti na ye, moto nyonso oyo apesaki mabɔkɔ mpo na koluka ye asepelaka. (Luka 15:6, 7) Ndenge moko, kokómisa bato bayekoli ezali milende ya lisangá mobimba. Baklisto nyonso bapesaka mabɔkɔ na mosala ya koluka bato oyo bakoki kokóma bayekoli. Ntango moto ya sika abandi koyangana na makita na Ndako ya Bokonzi, moklisto nyonso asalisaka mpo moto yango asepela na losambo ya solo. (1 Bakolinti 14:24, 25) Yango wana, moklisto nyonso akoki kosepela na ndenge mbula, na mbula, bankóto ya bato bazali kokóma bayekoli.
20. Osengeli kosala nini soki ozali na mposa makasi ya koteya bato mosusu solo ya Biblia?
20 Baklisto mingi basepelaka kozwa libaku ya koteya ata moto moko makambo na ntina na Yehova mpe kosalisa ye aya na losambo ya solo. Kasi, mbala mosusu naino bazwá libaku yango te. Soki ezali bongo mpo na yo, kobá kokolisa bolingo na yo mpo na Yehova, komibanzabanza mpo na bato, kozala na elimo ya komipimela, kozala na motema molai, mpe kokolisa mayele na yo ya koteya. Kasi, koleka nyonso, bondeláká mpo na koyebisa Nzambe mposa na yo ya koteya bato solo ya Biblia. (Mosakoli 11:1) Yebá ete makambo nyonso oyo ozali kosala na mosala ya Yehova ezali kosalisa na kokómisa bato bayekoli, mosala oyo epesaka Nzambe nkembo.
Okoki kolimbola?
• Mpo na nini mosala ya kokómisa bato bayekoli esɛngaka ete tózala na bolingo mpo na Nzambe?
• Bizaleli nini mosakoli asengeli kozala na yango mpo na kokómisa bato bayekoli?
• Kozala na “mayele ya koteya” esɛngaka nini?
[Elilingi na lokasa 21]
Baklisto bamonisaka bolingo makasi mpo na Nzambe na ndenge bakómisaka bato bayekoli
[Elilingi na lokasa 23]
Mpo na nini basakoli basengeli komibanzabanza mpo na basusu?
[Elilingi na lokasa 24]
Bizaleli nini tosengeli na yango na mosala ya kokómisa bato bayekoli?
[Elilingi na lokasa 25]
Baklisto nyonso basepelaka ndenge bato mingi bazali kokóma bayekoli